Piniarneq aallaaniarnerlu pillugit Inatsisartut inatsisaanni nr. 12-imi 29. oktober 1999-imeersumi kingusinnerusukkut inatsisartut inatsisaatigut nr. 1 16. maj 2008-meersukkut allanngortinneqartumi § 2, imm. 4, §§ 12, 13 aamma § 17 naapertorlugit aalajangersarneqarpoq:

Atuuffia

  § 1.  Tikaagullimmik arfermilluunniit tikaagullimmit anginerusumik pisaqartoq pissaasorluunniit tamatuminnga piaartumik kommuniminut nalunaaruteqassaaq. Ataatsimoorluni piniarnermi toqqagaalluni aquttoq nalunaaruteqas­saaq.
Imm. 2.  Kitaani tikaagulliit, tikaagulliusaat, arfiviit aamma qipoqqaat pisat pissatallu tamarmik kommunimut pisassiissutinit ilanngaataassapput ukiumi pineqartumi imaluunnit ukiumi tullermi. Tunumi tikaagulliit pisat pissatallu tamarmik ingerlatsivimmi pisassiissutinit ilanngaataassapput ukiumi pineqartumi imaluunniit ukiumi tullermi.
Imm. 3.  Immersuiffissaq akuerisaq (ilanngussaq 1) atorlugu kommunip allaffianut kommunilluunniit nunaqarfimmi allaffianut qaninnerpaamut nalunaaruteqartoqartassaaq, tassanngaaniillu piaartumik nalunaarut pisaqartup kommunianut ingerlateqqinneqassaaq.

Arfanneq

§ 2.  Arferit § 1-imi taaneqartut pisarineqareeraangata immersugassami makku nalunaarutigineqartassapput:
1) arfermut tunngatillugu (immersugassami B-E):
a) Suunera.
b) Takissusia, kakkiviaata nuuaniit sarpiisa kiggaannut uuttorlugu.
c) Suiaanera.
d) Arnaviaappat: immoqarnersoq, illaaqarnersoq, taamaassimappallu illaava qanoq takitiginersoq suiaanersorlu.
e) Sunik aqajarormioqarnersoq.
2) piniarnermut tunngatillugu (immersugassami A, F, G, H, I aamma J):
a) Ulloq pisaqarfik, piniartup aqqa, inuttut normua, ataatsimoorluni piniarnermi piniaqataasut aqqi inuttullu normui, allaffissiap tunuanut allanneqassapput.
b) Angallatip aqqa GR-normualu, ataatsimoorluni piniarnermi; angallatit aqqi GR-normuilu imaluunniit angallateeqqat qassiunersut.
c) Pisaqarnissamut kommunip akuersissutaata normua.
d) Pisaqarfiup sumiinnera, allorniusat sanimukaartut ammukaartullu imaluunnit feltkode (sumiiffik immikkut ilisarnaasigaq), Kalaallit Nunaanni Aalisarnermik Avatangiisinillu Misissuisoqarfiup feltkodinut tunngatillugu assiliaa naapertorlugu, atorlugu. Imaluunniit allatut paatsuugassaanngitsumik nalunaarutigalugu.
f)  Pilaffik.
g) Pisap oqimaassusaa nerineqarsinnaasut missingerlugit; kilogram mattak, orsoq, qiporaq, neqi kiisalu tamakkerlugu oqimaassusaa. Kiisalu misissugassamik peersisoqarsimanersoq Pinngortitaleriffimmullu nassiullugu. Tikaagulliusaaq, arfivik aamma qipoqqaq eqqarsaatigalugit ilitsiviit/karillu nerineqarsinnaasunik immersinnaasut immikkut qassiuneri aamma ilitsiviup/karillu angissusaat nerineqarsinnaasunik immikkut immerneqarsimasut oqimaassusaat nalunaarutigineqassapput. Kiisalu misissugassamik peersisoqarsimanersoq taannalu Pinngortitaleriffimmut nassiunneqarsimanersoq.
h) Sakku arfannermi atorneqartoq, nalunaarutigalugu sakku(t) imalunniit sakkup(t) sulloqqortussusaa(t) sorleq atorneqarsimanersoq. Qamutilimmik sakkoqarsimagaanni tuukkaq qaartartoqarsimanersoq nalunaarutigineqassaaq. Tuukkaq qaartartullip sorliunera aamma serienormua tassunga kigartorneqarsimasoq nalunaarutigineqassaaq.
i)  Arfeq qanoq sivisutigisumik toqujartorsimanersoq nalunaarutigineqassaaq, tassa eqqortinneraniit toqunissaa tikillugu. Aammattaaq Ilanngussami I-imi qupp. 3-mi titartakkami nalunaaqutserneqassaaq arfeq sukkut eqqorneqarsimanersoq. Minutsit 30-it sinnerlugit toqusaasoqarsimappat tamanna nassuiaatigineqassaaq.
3) immersuisup aqqa ullorlu immersuiffik. (immersugassami L).

Pissaanermi

§ 3.  Arferit § 1-imi taaneqarsimasut pissanneqarsimappata tulaanneqaratik makku nalunaarutigineqassapput (immersugassami A, B, F, I, K & L):
1) Ulloq pissaaffik, piniartup aqqa aamma inuttullu normua, ataatsimoorluni piniarnermi peqataasut aqqi inuttullu normui immersugassap tunuani.
2) Angallatip aqqa GR-normualu, ataatsimoorluni piniarnermi piniaqataasut aqqi inuttullu normui; pujortuleeqqat aqqi GR-normuilu imaluunniit angallateeqqat qassiuneri.
3) Arfeq suusimanersoq
4) Tikaagullinnissamut kommunip akuersissutaata normua,
5) Arfeq sumi pissanneqarsimanersoq, allorniusat sanimukaartut ammukaartullu imaluunniit feltkode (sumiiffik immikkut ilisarnaasigaq), Kalaallit Nunaanni Aalisarnermik Avatangiisinillu Misissuisoqarfiup feltkodinut tunngatillugu assiutaa naapertorlugit imaluunniit sumiiffia allatut ililluni paatsuugassaajunnaarlugu nalunaarutigalugu.
6) Pissaanermi sakkut atukkat. Qamutilimmik sakkoqarsimagaanni tuukkaq qaartartoqarsimanersoq nalunaarutigineqassaaq. Tuukkaq qaartartullip type sorliunera aamma serienormua tassunga kigartorneqarsimasoq nalunaarutigineqassaaq.
7) pissaasimanermi peqqutaasut suunersut; soorlu assersuutigalugu silap ajornera, atortunik ajutoorneq il.il. Aammattaaq Ilanngussaq I, qupp. 3-mi titartakkami nalunaaqutserneqassaaq arfeq sukkut eqqortissimanersoq.
8) Immersuisup aqqa ullorlu immersuiffik.

§ 4.   Kommunalbestyrelsi pisussaavoq qularnaallillugu uppernarsineqarpat arfermik unioqqutitsilluni pisaqartoqarsimasoq imlt. pissaasoqarsimasoq tamatuma mailikkut imlt. oqarasuaatikkut kiisalu immersugassaq atorlugu nalunaarutiginissaanut. Nalunaarut tuaviortumik mailikkut imlt. faxikkut Aalisarnermut, Piniarnermut  Nunalerinermullu Aqutsisoqarfimmut nassiunneqartassaaq.
Imm. 2.  Naalakkersuisut kommunalbestyrelsi piumaffigisinnaavaat akuersissutit tunniunneqarsimasut atorunnaarseqqullugit kommunalbestyrelsi paasissutissanik piffissaq eqqorlugu Naalakkersuisunut nassitsisarsimanngippat imaluunniit paasissutissanik amigartunik nassitsisarsimappat.

§ 5.  §§ 1, 2, aamma 3-mik unioqqutitsisoq akiliisitaasinnaavoq.

§ 6.  Nalunaarut atortuulissaaq 13. august 2010.
Imm. 2.  Tamatumunnga peqatigitillugu arfattat pissatallu nalunaarutigineqartarnerat pillugu nalunaarut nr. 10 17. april 2009-meersoq atorunnaarpoq.

Namminersorlutik Oqartussat, 16. juli 2010-meersoq.

Ane Hansen

/

Jens K. Lyberth

Ilanngussaq