Piniarneq aallaaniarnerlu pillugit Inatsisartut inatsisaanni nr. 12-imi 29. oktober 1999-imeersumi kingusinnerusukkut inatsisartut inatsisaatigut nr. 1 16. maj 2008-meersukkut allanngortinneqartumi § 2, imm. 4, §§ 12, 13 aamma § 17 naapertorlugit aalajangersarneqarpoq:

§ 1. Tikaagullimmik arfermilluunniit tikaagullimmit anginerusumik pisaqartoq pissaasorluunniit tamatuminnga piaartumik kommuniminut nalunaaruteqassaaq. Ataatsimoorluni piniarnermi toqqagaalluni aquttoq nalunaaruteqassaaq.
Imm. 2. Kitaani tikaagulliit pisat pissatallu tamarmik kommunimut pisassiissutinit ilanngaataassapput ukiumi pineqartumi imaluunnit ukiumi tullermi. Tunumili pisat kisimik ilanngaataassapput.
Imm. 3. Immersuiffissaq akuerisaq (ilanngussaq 1) atorlugu kommunip allaffianut kommunilluunniit nunaqarfimmi allaffianut qaninnerpaamut nalunaaruteqartoqartassaaq, tassanngaaniillu piaartumik nalunaarut pisaqartup kommunianut ingerlateqqinneqassaaq.

§ 2. Arferit § 1-imi taaneqartut pisarineqareeraangata immersugassami makku nalunaarutigineqartassapput:
1) arfermut tunngatillugu (immersugassami B-E):
a) Suunera.
b) Takissusia, kakkiviaata nuuaniit sarpiisa kiggaannut uuttorlugu.
c) Suiaanera.
d) Arnaviaappat: immoqarnersoq, illaaqarnersoq, taamaassimappallu illaava qanoq takitiginersoq suiaanersorlu.
e) Sunik aqajarormioqarnersoq.
2) piniarnermut tunngatillugu (immersugassami A, F, G, H, I aamma J):
a) Angallatip aqqa GR-normualu, ataatsimoorluni piniarnermi; angallatit aqqi GR-normuilu imaluunniit angallateeqqat qassiunersut.
b) Piniartup aqqa, inuttut normua, ataatsimoorluni piniarnermi piniaqataasut aqqi inuttullu normui, allaffissiap tunuanut allanneqassapput.
c) Pisaqarnissamut kommunip akuersissutaata normua tikaagullimmut.
d) Pisaqarfiup sumiinnera, allorniusat sanimukaartut ammukaartullu imaluunnit feltkode (sumiiffik immikkut ilisarnaasigaq), Kalaallit Nunaanni Aalisarnermik Avatangiisinillu Misissuisoqarfiup feltkodinut tunngatillugu assiliaa naapertorlugu, atorlugu. Imaluunniit allatut paatsuugassaanngitsumik nalunaarutigalugu.
e) Ulloq pisaqarfik.
f) Pilaffik.
g) Pisap oqimaassusaa missingerlugu; kilogram mattak, orsoq kiisalu neqi. Kiisalu misissugassamik peersisoqarsimanersoq Pinngortitaleriffimmullu nassiullugu.
h) Sakku arfannermi atorneqartoq, nalunaarutigalugu sakku imalunniit sakkup paatussusia sorleq atorneqarsimanersoq. Qamutilimmik sakkoqarsimagaanni tuukkaq qaartartoqarsimanersoq nalunaarutigineqassaaq. Tuukkaq qaartartullip serienormua tassunga kigartorneqarsimasoq nalunaarutigineqassaaq.
i) Arfeq qanoq sivisutigisumik toqujartorsimanersoq nalunaarutigineqassaaq, tassa eqqortinneraniit toqunissaa tikillugu. Aammattaaq Ilanngussami I-imi qupp. 2-mi titartakkami nalunaaqutserneqassaaq arfeq sukkut eqqorneqarsimanersoq. Minutsit 30-it sinnerlugit toqusaasoqarsimappat tamanna nassuiaatigineqassaaq.
3) immersuisup aqqa ullorlu immersuiffik. (immersugassami L).

§ 3. Arferit § 1-imi taaneqarsimasut pissanneqarsimappata tulaanneqaratik makku nalunaarutigineqassapput (immersugassami A, B, F, I, K & L):
1) Arfeq suusimanersoq.
2) Angallatip aqqa GR-normualu, ataatsimoorluni piniarnermi piniaqataasut aqqi inuttullu normui; pujortuleeqqat aqqi GR-normuilu imaluunniit angallateeqqat qassiuneri.
3) Piniartup aqqa, ataatsimoorluni piniarnermi peqataasut aqqi inuttullu normui immersugassap tunuani.
4) Pisaqarnissamut kommunip akuersissutaata normua tikaagullimmut,
5) Arfeq sumi pissanneqarsimanersoq, allorniusat sanimukaartut ammukaartullu imaluunniit feltkode (sumiiffik immikkut ilisarnaasigaq), Kalaallit Nunaanni Aalisarnermik Avatangiisinillu Misissuisoqarfiup feltkodinut tunngatillugu assiutaa naapertorlugit imaluunniit sumiiffia allatut ililluni paatsuugassaajunnaarlugu nalunaarutigalugu.
6) Ulloq pissaaffik.
7) Pissaanermi sakkut atukkat. Qamutilimmik sakkoqarsimagaanni tuukkaq qaartartoqarsimanersoq nalunaarutigineqassaaq. Tuukkaq qaartartullip serienormua tassunga kigartorneqarsimasoq nalunaarutigineqassaaq.
8) pissaasimanermi peqqutaasut suunersut; soorlu assersuutigalugu silap ajornera, atortunik ajutoorneq il.il. Aammattaaq Ilanngussaq I, qupp. 2-mi titartakkami nalunaaqutserneqassaaq arfeq sukkut eqqortissimanersoq.
9) Immersuisup aqqa ullorlu immersuiffik.

§ 4. Kommunalbestyrelsi pisussaavoq qularnaallillugu uppernarsineqarpat arfermik unioqqutitsilluni pisaqartoqarsimasoq imlt. pissaasoqarsimasoq tamatuma mailikkut imlt. oqarasuaatikkut kiisalu immersugassaq atorlugu nalunaarutiginissaanut. Nalunaarut tuaviortumik mailikkut imlt. faxikkut Aalisarnermut, Piniarnermut Nunalerinermullu Aqutsisoqarfimmut nassiunneqartassaaq.
Imm. 2. Naalakkersuisut kommunalbestyrelsi piumaffigisinnaavaat akuersissutit tunniunneqarsimasut atorunnaarseqqullugit kommunalbestyrelsi paasissutissanik piffissaq eqqorlugu Naalakkersuisunut nassitsisarsimanngippat imaluunniit paasissutissanik amigartunik nassitsisarsimappat.

§ 5. §§ 1, 2, aamma 3-mik unioqqutitsisoq akiliisitaasinnaavoq.

§ 6. Nalunaarut atortuulissaaq aprilip 17. april 2009-meersoq.
Imm. 2. Tamatumunnga peqatigitillugu arfattat pissatallu nalunaarutigineqartarnerat pillugu nalunaarut nr. 13. 3. april 1998-imeersoq atorunnaarpoq

Namminersornerullutik Oqartussat, 17. april 2009-meersoq.

Finn Karlsen

/

Amalie Jessen

Ilanngussaq