Matumuuna nalunaarutigineqarpoq pigisanit pissarsiat ilaasa akileraaruserneqartarnerat pillugu Inatsisartut inatsisaat nr. 37, 28.novemberi 2017-meersoq aamma Inatsisartut inatsisaat nr. 25, 23.novemberi 2018-imeersoq aamma Inatsisartut inatsisaat nr. 13, 19.novemberi 2020-meersoq malillugit allanngutai ilanngullugit, matumuuna nalunaarutigineqarpoq.

Akileraartussaatitaaneq

  § 1. Soraarnerussutisiaqarsinnaatitaasut aningaasarsianit akileraarutit pillugit Inatsisartut inatsisaanni (aningaasarsianit akileraarutit pillugit inatsimmi) § 1, imm. 1, nr. 1 imaluunniit 2, imaluunniit imm. 2 naapertorlugu akileraartussaatitaasut, aammalu marloqiusamik akileraartannginnissamik isumaqatigiissummi aalajangersakkat naapertorlugit naalagaaffimmi takornartami, Danmarkimi imaluunniit Savalimmiuni angerlarsimaffeqartutut isigineqanngitsut, inuunermut sillimmasiissutinit aamma soraarnerussutisiaqarnissamut aaqqissuussinernit, aningaasarsianit akileraarutit pillugit inatsimmi § 39 a, imm. 1-imi 2-milu imaluunniit § 39 c, imm. 1-imi aamma imm. 2-mi piumasaqaatinik naammassinnittunit, kiisalu soraarnerussutisianut aaqqissuussinerit soraarnerussutisianut aningaasaateqarfimmi  Danmarkimi angerlarsimaffeqartumi pilersinneqarsimappata, soraarnerussutisianik akileraarusiisarneq pillugu danskit inatsisaanni § 53 A-mi pineqartunut ilaasuni pissarsianit akileraarutinik, Inatsisartut inatsisaat manna malillugu akiliissapput.

  Imm. 2.  Soraarnerussutisiaqarsinnaatitaasoq toqukkut qimaguppat akileraartussaatitaaneq unissaaq.

Akileraarusiinermut tunngaviit

  § 2.  Iluanaarutit akileraarusigassat nunatta karsianut 15,3 procentimik akileraaruserneqassapput.

  Imm. 2.  Akileraarusiinermut tunngaviusut tassaapput ukiumi aningaasarsiaqarfiusumi iluanaarutit. Ukioq aningaasarsiaqarfiusoq tassaavoq qaammatisiutit malillugit ukioq ataaseq. Soraarnerussutisiaqarsinnaatitaasut soraarnerussutisiaqalersinnaanermut aaqqissuussinermi ataatsimi arlaliuppata iluanaarutit naatsorsorneqartut akileraaruserneqartussat pineqartut akornanni ukiup aningaasarsiaqarfiusup naanerani aaqqissuussinermi uninngasuutaannut naleqqiussilluni agguarneqassapput.

  Imm. 3.  Ukiumi aningaasarsiaqarfiusumi akileraaruteqartussaatitaanerup aallartiffiani imaluunniit uniffianit, taava ukioq aningaasarsiaqarfiusoq tassaassaaq qaammatisiutit malillugit ukioq aningaasarsiaqarfiusup ilaa akileraaruteqartussaanerup atuuffigisimasaa.

  § 3.  Iluanaarutit akileraaruserneqartussaat imatut naatsorsorneqassapput illuatungaani ukiup

aningaasarsiaqarfiusup naanerani aaqqissuussinerup aningaasatigut nalingata taakkununnga ilanngullugit ukiup ingerlanerani tunniunneqartut, illuatungaatigullu aaqqissuussinerup aningaasatigut ukiup aningaasarsior usup aallartinnerani nalingata taakkununnga ilanngullugit ukiup ingerlanerani akilerneqartut taakku assigiinngissutaat. Akileraaruserifik aningaasatigut nalinganik missingiilluni aalajangersaasinnaavoq, imaappat soraarnerussutisiaqarsinnaatitaasup aalajangersakkami matuma maleruaqqusat tunngavigalugit aningaasatigut nalinga naatsorsorsimanagu.

  Imm. 2.  Akileraarut Inatsisartut Inatsisaat manna naapertorlugu naalagaafimmut allamut, Danmarkimut Savalimmiunulluunniit akilerneqarsimasoq aningaasarsianit akileraartarnermut inatsimmi § 69 naapertorlugu ilanngaatigineqarsinnaavoq.

  Imm. 3.  Ukiumi aningaasarsiaqarfiusumi iluanaarutaasussaagaluaq annaasanngorsimappat, taava taanna ukiumi aningaasarsiaqafiusumi tassani ilanngaataasinnaavoq, soorluttaaq aamma iluanaarutaasut aaqqissuussinermi tassanerpiaq ukiuni tulliuttuni 10-ni. Annaasaqaatit ukiumut allamut aatsaat nuutsinneqarsinnaasassapput annaasaqaat ukiumi aningaasarsiaqarfiusumi siullermi ataatsimi iluanaarutaasimasunit matussuserneqarsinnaanngippat.

Paasissutissanik nalunaarutiginninneq

  § 4.  § 3 apeqqutaatinnagu pissarsiat soraarnerussutisiaqalernissamut aningaasaatit ilaannit pissarsiat akileraaruserneqartarnerat pillugu Inatsisartut inatsisaanni § 3 malillugu naatsorsorneqarsinnaapput. § 3 malillugu imaluunniit Soraarnerussutisiaqalernissamut aningaasaatit ilaannit pissarsiat akileraaruserneqartarnerat pillugu Inatsisartut inatsisaat § 3 malillugu pissarsiat naatsorsorneqarnissaannik toqqaaneq, ukiumi isertitaqarfiusumi tullermi allanngortinneqarsinnaanani pisussaaffiliivoq. Ukiumi isertitaqarfiusumi akileraartussaatitaanerup atuutilerfiani imaluunniit atorunnaarfiani, ukioq isertitaqarfiusoq qaammatisiutit malillugit ukiumi akileraartussaatitaaffiusumi ilaavoq.

  Imm. 2.  Aaqqissuussami pissarsiat amigartoorutaasut ukiumi isertitaqarfiusumi pineqartumi aammalu ukiuni isertitaqarfiusuni 10-ini tullerni aaqqissuussami ataatsimi pissarsiani sinneqartoorutaasuni taamaallaat ilanngaatigineqarsinnaapput. Pissarsiat amigartoorutaasut, ukiuni isertitaqarfiusumi siusinnerusumiittumi pissarsiani sinneqartoorutaasuniitinneqarsinnaanngippata, aatsaat ukiumut isertitaqarfiusumut kingusinnerusumiittumut ingerlatinneqarsinnaapput.

Oerelse nr 37 a Nammineerluni nalunaarusiaq

  § 5.  Soraarnerussutisiaqarsinnaatitaasut § 1, imm. 1-imi 2-milu taaneqartut, ukiup aningaasarsiaqarfiusup siuliani iluanaarutit § 3-mi taaneqartut pillugit akileraaruseriffimmut nammineerluni nalunaarusiaq atorlugu nalunaaruteqassapput kingusinnerpaamik ulloq:

1)  1. maaji tamanut, tassa normu 2-mi ilaatinneqanngitsunut,

2)  15. maaji namminersorlutik inuussutissarsiutinik ingerlatsisunut, tassa elektroniskiusumik

akileraaruserfiup innersuussinera malillugu nammineerluni nalunaarusiamik nassiussisartunut.

Akiliisitsiniut

  § 6.  Akileraaruseriffik akileraarummit naatsorsorneqarsimasumit akiliisitsissaaq.

  Imm. 2.  Ukiup aningaasarsiaqarfiusup siuliani iluanaarutinit akileraarutit akiligassanngortinneqassapput 1. septembari, kingusinnerpaamillu akiliiffissaq tassaassalluni 20. septembari.

  Imm. 3.  Soraarnerussutisiaqarsinnaatitaasut  akileraarusernermmut akileraarummik akiliigallarsinnaapput. Akiliineq taama ittoq ukiup aningaasarsiaqar usup naareernerani pisinnaavoq, taamaattorli ukiumi aningaasarsianik akileraaruteqaataasussanik naatsorsuiffiusumi 1. maajip kingornatigut pisinnaanani.

Ukiumi aningaasarsiaqarfiusumi akiliuteqarnermut tunngasumut akileraarutit

kinguaattoorutaasimasinnaasut erniaat ilanngullugit, aningaasanit akiliutigineqartunit taakku

ilanngaatigineqaqqaassapput.

  § 7.  (Atorunnaarsinneqarpoq)

  § 8.  Inuunermik sillimmasiinernik aamma soraarnerussutisiassanut ileqqaarnissamut neqerooruteqartut, aningaasarsianit akileraarutit pillugit Inatsisartut inatsisaanni § 39 a, imm. 1-imi aamma 2-mi, § 39 c, imm. 1-imi aamma 2-mi, imaluunniit danskit soraarnerussutisianut akileraarusiisarnermut inatsisaanni § 53 A -mi, piumasaqaatinik naammassinnittut, akileraartarnermut ingerlatsivimmut makku pillugit paasissutissanik nalunaaruteqartarnissaannik Naalakkersuisut isumaqatigiissuteqarfigisinnaavaat:

1)  kontumik piginnittut ataasiakkaat aqqi, najugaat aamma CPR normui,

2)  ukiup aallartinnerani naaneranilu uninngasuutit, aamma

3)  ukiumi iluanaarutit, takuuk § 3.

  Imm. 2.  Inuunermik sillimmasiinernik aamma soraarnerussutisiassanut ileqqaarnissamut neqerooruteqartut, soraarnerussutisiaqarsinnaatitaasut sinnerlugit akileraarutinik naatsorsuineq, unerartitsineq aamma akiliineq, takukkit § 2, imm. 1 aamma 2, § 3, § 6 aamma aningaasarsianit akileraarutit pillugit inatsimmi § 46, imm. 1-2 aamma § 46 a, pillugit imm. 1-imi pineqartunut ilaasut Naalakkersuisut isumaqatigiissuteqarfigisinnaavaat.

  Imm. 3.  Paasissutissanik tunniussisarneq aamma akileraarutinik unerartitsisarneq akiliisarnerlu il.il. imm. 1-imi aamma 2-mi taaneqartut pillugit maleruagassanik erseqqinnerusunik Naalakkersuisut aalajangersaasinnaapput.

Pineqaatissiissutit

  § 9.  § 1, imm. 1-imik aamma § 5-imik piaaraluneerluni mianersuaalliorujussuarluniluunniit unioqqutitsineq Kalaallit Nunaanni pinerluttulerinermik inatsimmi maleruagassat malillugit akiliisitsinermik pineqaatissiissutigineqarsinnaavoq

  Imm. 2.  Piaaraluni imaluunniit mianersuaalliorujussuarluni, isumaqatigiissuteqartup pisussaanerinik § 8-imi taaneqartunik unioqqutitsineq, Kalaallit Nunaanni Pinerluttulerinermi inatsit naapertorlugu pineqaatissiinneqaataasinnaavoq.

  Imm. 3.  Inatsisartut inatsisaata matuma kingunerisaanik najoqqutassat saqqummiunneqartut malillugit Kalaallit Nunaanni Pinerluttulerinermi inatsit naapertorlugu akiligassiisoqarsinnaavoq.

  Imm. 4.  Inatsisartut inatsisaat imaluunniit najoqqutassat Inatsisartut inatsisaata matuma kingunerisaanik saqqummiunneqartut malillugit akileeqqusissummik aalajangersaanissamik tunngaveqartitsippata, akileeqqusissut Kalaallit Nunaanni Pinerluttulerinermi inatsimmi maleruaqqusat malillugit inatsisitigut pisinnaatitaasoq akileeqqusissummik pisussaaffilerneqarsinnaavoq.

  Imm. 5.  Pillaammik akiligassiissutit imm. 1-4 naapertorlugit aalajangerneqartut Nunatta Karsianut nakkartassapput.

  § 10.  Akileraaruseriffik isumaqarpat unioqqutitsineq akiliisitaanermit sakkortunerusumik

pineqaatissiissutigineqartariaqartoq, taava Naalakkersuisut imaluunniit Naalakkersuisut

taamaaliornissamut piginnaatitaata pineqartoq nalunaarfigissavaa suliassaq

eqqartuussisutigoortitsinertaqanngitsumik inerneqarsinnaasoq, pineqartup ilumut unioqqutitsisimanini nassuerutigippagu aammalu pifissaatitaasup erseqqinnerusumik aalajangikkap, qinnuteqarnikkut sivitsorneqarsinnaasup, qaangiutinnginnerani akiliutissamik nalunaarummi taaneqartumik akiliiumappat.

  Imm. 2.  Paasisitsissummut imm. 1-imi taaneqartumut tunngatillugu Kalaallit Nunaanni

eqqartuussisarnermi inatsimmi maleruaqqusat unnerluussutip imarisai pillugit taamaallutik atuutissapput.

Atuutilerfia

  § 11.  Inatsisartut in atsisissaat ulloq 1. januar 2018-imi atuutilissaaq.^[1]

Inatsisartut inatsisaat nr. 25, 28.novemberi 2018-meersoq (Inatsisip atuuffianik annikillisitsineq)^[2] atuutilernissaanut aalajangersakkamik matuminnga imaqarpoq:

§ 2

Inatsisartut inatsisaat 1. Juli 2018-imi atortuulissaaq.

Imm. 2.  Inatsisartut inatsisaat ukiumit aningaasarsiorfiusumit 2018-imiit atuutilissaaq.

Inatsisartut inatsisaat nr. 13, 19. Novemberi 2020-meersoq (Atuuffissaasa annikillisinneqarnerat)^[3] atuutilernissaanut aalajangersakkamik matuminnga imaqarpoq:

§ 2

Inatsisartut inatsisaat ulloq 1. Januar 2021 atuutilerpoq aammalu ukioq isertitaqarfiusoq 2021 aallarnerfigalugu atuulluni.

Aningaasaqarnermut Naalakkersuisoqarfik, ulloq 1. September 2026.

Nikolai S. Christensen (atsior.)

Naalakkersuisoqarfimmi pisortaq

/Per Nielsen (atsior.)