Matumuuna nalunaarutigineqarpoq Grønlands tekniske Organisationi pillugu Inatsisartut peqqussutaat nr. 8, 19. december 1986-imeersoq, misissueqqarnerit pillugu Inatsisartut peqqussutaat nr. 18, 28. oktober 1993-imeersoq, nukissamik pilersuineq pillugu Inatsisartut peqqussutaat Inatsisartut peqqussutaat nr. 14, 6. november 1997-imeersoq, Grønlands Tekniske Organisationi pillugu Inatsisartut peqqussutaata allanngortinneqarneranik Inatsisartut peqqussutaat nr. 5, 29. oktober 1999-imeersoq, Grønlands tekniske Organisationi pillugu Inatsisartut peqqussutaata allanngortinneqarneranik Inatsisartut peqqussutaat nr. 8, 21. maj 2002-meersoq, imermik pilersuineq pillugu Inatsisartut peqqussutaat nr. 10, 19. november 2007-imeersoq, Grønlands tekniske Organisationi pillugu Inatsisartut peqqussutaata allanngortinneqarnissaa pillugu Inatsisartut inatsisaat nr. 21, 21. november 2022-meersoq aamma sanaartorneq pillugu Inatsisartut inatsisaata allanngortinneqarnera aamma Grønlands tekniske Organisationi pillugu Inatsisartut peqqussutaata allanngortinneqarnera pillugit Inatsisartut inatsisaat nr. 29, 13. juni 2023-meersoq malillugit allannguutit ilanngullugit.

 

Kapitali 1

Pilersinnera siunertaalu

 

  § 1.  Kalaallit Nunaanni Namminersornerullutik Oqartussat Grønlands tekniske Organisationi, GTO, 1. januar 1987-imi tigussavaat.

 

  § 2.  Nukissiorfiit ingerlatsiviuvoq Namminersornerullutik Oqartussat sinnerlugit, makkuninnga suliassaqartoq:

1) Namminersornerullutik Oqartussat illuliortiternermut pisortaqarfiannik ingerlatsineq, tassunga ilanngullugit ilaatigut inissaqartitsineq nerisaqartitsinerlu kiisalu biililiorfiit ingerlanneri aammalu umiarsualivinnik aserfallatsaaliuineq.

2) Namminersornerullutik Oqartussat umiatsialiorfiutaannik ingerlatsineq tassunga ilannguullugu suliffissuaqarnermik ingerlatsineq.

3) Kalaallit Nunaanni Nalunaarasuartaaserisoqarfimmik ingerlatsineq ilaatigut telefonikkut telexikkut qarasaasiatigullu atassuteqarneq ilanngullugit.

4) Narsarsuarmi Mittarfimmik ingerlatsineq.

5) Sanaartornermi illuliortiternermilu allaffeqarfik, tassunga ilaallutik pilersaarusiortarneq, sanaassanik titartaaneq, sanasussarsiuussisarneq nakkutilliinerlu.

6) Teknikkimut tunngasuni ilaatigut pilersaarusiornermi aaminalu pisortatut maleruagassiornermi siunnersuineq kiisalu nakkatigisassat ilaannik nakkutilliineq.

  Imm. 2.  Naalakkersuisut aalajangersinnaavaat Nukissiorfiit allanik suliaqarnissaa, imm. 1-imi taaneqartat saniatigut, imaluunniit aalajangersinnaallutik allat imm. 1-imi taaneqartunik suliassanik isumaginnissasut.

 

Kapitali 2

Aaqqissuussineq, ingerlatsineq aqutsinerlu

 

  § 3.  Nukissiorfiit Namminersornerullutik Oqartussat ingerlassaattut aaqqissuussaassaaq qullersaqarfia Nuummi inissitaalluni.

  Imm. 2.  Nukissiorfiit siulersuisunit pingaarnertigut aqutsinermik isumaginnittuusunit, aammalu pisortamit ulluinnarni aqutsinermik isumaginnittuusumik aqunneqarpoq. Siulersuisut Naalakkersuisunit toqqarneqassapput. Pisortaq siulersuisunit inassuteqaammik piniareernermik kingorna Naalakkersuisunit toqqarneqassaaq.

  Imm. 3.  Nukissiorfiit-mut ukiumut atugassiissutit Inatsisartut aningaasanut inatsisaatigut aalajangersarneqartassapput.

  Imm. 4.  Akit allanngortut allat atalinnginnerini Naalakkersuisunut akuerisassanngorlugit saqqummiunneqartassapput.

 

  § 4.  Naalakkersuisut § 2-i imm. 1-imi taaneqartumik suliassat isumagineqarnissaat qulakkeerniarlugu Nukissiorfiit aaqqissugaaneranut, ingerlanneranut aqunneqarneranallu erseqqinnerusunik aalajangersagaliorsinnaapput.

 

  § 5. Atorunnaarsinneqassaaq.

 

Kapitali 3

Ikaarsaariarnermi aalajangersakkat

 

§ 6. Maannamut maleruagassat Kalaallit Nunaannut ministereqarfimmit GTO-millu suliassanut § 2, imm. 1-mi taaneqartunut aaqqissuussinerit atortuuginnassapput allanngortinneqarnissaasa imaluunniit atorunnaarsinneqarnissaasa tungaannut.

 

Kapitali 4

Atulersitsinerup ullua

 

  § 7.  Inatsisartut peqqussutaat una 1. januar 1987-imi atulissaaq Kalaallit Nunaannut inatsisip innaallagissamut, imermut, kiassarnermullu, qatserisartoqarnermut, umiarsualivinuut, aqqusinernut, nalanaarasuartaaseriveqarnermut il.il. tunngasup folketingimit akuerineqarnissaa tunngavigalugu.

 

 

___________________________________________________________________________

Inatsisartut peqqussutaat nr. 18, 28. oktober 1993-imeersoq^[1] atuutilerneranut aalajangersakkanik makkuninnga imaqarpoq:

 

§ 4.

 

Inatsisartut peqqussutaat 1. novembarip 1-anni 1993-imi atuutilissaaq.

___________________________________________________________________________

 

Nukissamik pilersuineq pillugu Inatsisartut peqqussutaat nr. 14, 6. november 1997-imeersoq^[2] atuutilerneranut aalajangersakkanik makkuninnga imaqarpoq:

 

§ 26.

 

Inatsisartut peqqussutaat manna 1. januar 1998-imi atuutilerpoq.

 

Grønlands Tekniske Organisationi pillugu Inatsisartut peqqussutaata allanngortinneqarneranik Inatsisartut peqqussutaat nr. 5, 29. oktober 1999-imeersoq^[3] atuutilerneranut aalajangersakkanik makkuninnga imaqarpoq:

 

§ 2

 

Inatsisartut peqqussutaat 1. december 1999 atuutilerpoq.

___________________________________________________________________________

 

Grønlands tekniske Organisationi pillugu Inatsisartut peqqussutaata allanngortinneqarneranik Inatsisartut peqqussutaat nr. 6, 21. maj 2002-meersoq (Sulinermi periaatsip allanngortinneqarnissaanut akuersissutigineqarnissaa erngup akiinut)^[4] atuutilerneranut aalajangersakkanik makkuninnga imaqarpoq:

 

§ 2

 

Inatsisartut peqqussutaat una ulloq 1. juli 2002 atuutilerpoq.

___________________________________________________________________________

 

Imermik pilersuineq pillugu Inatsisartut peqqussutaat nr. 10, 19. november 2007-imeersoq^[5] atuutilerneranut aalajangersakkanik makkuninnga imaqarpoq:

 

§ 16.

 

Inatsisartut peqqussutaat manna 1. januaar 2008-mi atuutilissaaq.

___________________________________________________________________________

 

Grønlands tekniske Organisationi pillugu Inatsisartut peqqussutaata allanngortinneqarnissaa pillugu Inatsisartut inatsisaat nr. 21, 21. november 2022-meersoq (Nukissiorfinnut siulersuisunik pilersitsineq)^[6] atuutilerneranut aalajangersakkanik makkuninnga imaqarpoq:

 

§ 2

 

Inatsisartut inatsisaat ulloq 1. januar 2023 atuutilerpoq.

___________________________________________________________________________

 

Sanaartorneq pillugu Inatsisartut inatsisaata allanngortinneqarnera aamma Grønlands tekniske Organisationi pillugu Inatsisartut peqqussutaata allanngortinneqarnera pillugit Inatsisartut inatsisaat nr. 29, 13. juni 2023-meersoq (Sanaartukkani piusuni nukimmik sipaarniarluni aaqqissuussinerit kiisalu nuna tamakkerlugu Illuutinik Inissianillu Nalunaarsuiffimmik IIN-imik pilersitsinissamut Naalakkersuisunut piginnaatitsisut)^[7] atuutilerneranut aalajangersakkanik makkuninnga imaqarpoq:

 

§ 3

 

Inatsisartut inatsisaat manna 2023-mi juulip aallaqqaataani atuutilissaaq.

 

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Nakugiissitaanermullu Naalakkersuisoqarfik, ulloq 28. oktober 2025

 

 

 

Jørgen Hammeken-Holm (atsior.)

Naalakkersuisoqarfimmi Pisortaq

 

 

 

/Ane Wraae Nielsen (atsior.)

 

 

[1] (Inatsisip allanngortinneqarnerani § 2, imm. 1, nr. 6 aamma 8 atorunnaarsinneqarput)

[2] (Inatsisip allanngortinneqarnerani § 3, imm. 4 atorunnaarsinneqarpoq)

[3] (Inatsisip allanngortinneqarnera § 3, imm. 4-mut tunngassuteqarpoq)

[4] (Inatsisip allanngortinneqarnerani § 3, imm. 4 atorunnaarsinneqarpoq, tamatumalu kingorna imm. 5 im. 4-nngorpoq)

[5] (Inatsisip allanngortinneqarnerani § 2, imm. 1, nr. 1 atorunnaarsinneqarpoq)

[6] (Inatsisip allanngortinneqarnerani § 3, imm. 2-mut tunngassuteqarpoq aammalu Inatsisartut peqqussutaanni tamarmi ”Naalakkersuisut” uunga ”Naalakkersuisut”, ”Namminersornerullutik Oqartussat” uunga ”Namminersorlutik Oqartussat”, ”Namminersornerullutik Oqartussat suliffeqarfiat” uunga ”Namminersorlutik Oqartussat suliffeqarfiat” aamma ”Inatsisartut” uunga ”Inatsisartut” allanngortinneqarput. Aammattaaq  §§ 2-mi, 3-mi aamma 4-mi ”GTO” uunga ”Nukissiorfiit” allanngortinneqarpoq

[7] (Inatsisip allanngortinneqarnerani § 5 atorunnaarsinneqarpoq)