Innaallagiaq, imeq kiallu, qatserisartoqarneq, umiarsualiviit, aqqusernit, nalunaarasuaatikkut atassuteqarneq il.il. pillugit Kalaallit Nunaannut inatsimmi nr. 943, 23. december 1986-imeersumi § 11, imm. 2 naapertorlugu aalajangersarneqarpoq:

§ 1. Misissueqqaarnerit pinngortitami avatangiisinik assiliortiterlutillu nalunaarsuisussaapput aammalu tamatumani ilisimasassatigut paasissutissat ingerlateqqittassallugit. Pinngortitami avatangiisit tassaapput uumassuseqanngitsut Kalaallit Nunaanni pinngortitamiittut aammalu sanaartukkat kiisalu inuit piliaat pinngortitamiittut.

Imm. 2. Misissueqqaarnerit misissueqqaarnernit ilisimalikkat pissarsiarineqartarnerat atorneqartarnissaallu pillugit siunnersuisartussaapput, tassa pinngortitami avatangiisit pillugit paasissutissanik aammalu apeqqutinik tamakkununnga tunngassuteqartunik paasissutissiisartussaallutik.

Imm. 3. Nunaminertani sanaartorfissanngortitaallutillu sanaartorfigineqalersuni, pinngortitami pisuussutinik uumassuseqanngitsunik iluaquteqarniarfiusuni aammalu allani inuiaqatigiinnut pingaaruteqartunik siunertaqarfiusuni assiliortiternerit, nalunaarsuinerit paasissutissanillu katersuinerit ingerlanneqartassapput.

Imm. 4.Ilisimalikkat misissueqqaarnernit pissarsiat nunaminertanik atuinermik pilersaarusiornernut aammalu suliassanut imm. 3-mi taaneqartunut misissueqqaarnernullu tamakkunínnga siunertaqartunut iluqutaaniartussaapput.

Imm. 5. Naalakkersuisut nalunaarutiliorsinnaapput Misissueqqaarnerit ingerlatsinerminni malittarisassaannik aalajangersaasunik.

§ 2. Misissueqqarnerit Namminersornerullutik Oqartussat suliffeqarfiutigaat imminut ingerlattutut aaqqissuussaaq.

Imm. 2. Suliffeqarfimmut ukiumoortumik akuersissutit aningaasanut inatsimmi aalajangersarneqartassapput.

Imm. 3. Suliffeqarfik pisortamit Naalakkersuisunit toqqarneqartumit aqunneqassaaq.

§ 3. Misissueqqaarnerit suliassarititat suliarineqarnerisa saniatigut pinngortitami avatangiisit pillugit paasissutissanik siunertanut atorluarsinnaasunik pissarsiniaqqullugit aammalu tamakku kingunerisaannik nalilersueqqullugit suliassinneqarsinnaapput. Suliassiissutit taamaattut suliarineqartassapput suliassiisup akiliuteqarneratigut.

Imm. 2. Ikiorsiinertigut illut, sanaartukkat atortussallu pilersaarusiorneqarneri, illuliornerit, sanaartukkat torersaanerillu naammassineqarneri, pinngortitami pisuussutinik uumassuseqanngitsunik iluaquteqarniarnerit, inunnik avatangiisinik il. il. illersuinerit allanngutsaaliuinerillu qanoq periarfissaqartigineri sunillu atugassaqarfiuneri paasisaqarfigineqarsinnaalissapput.

Imm. 3. Pisortanut, pisortat suliffeqarfiutaannut sullissiviinullu, ingerlatseqatigiiffinnut akuersissuteqarfigineqarlutik ingerlatsisunut, naalagaaffimmut namminersortunullu ikiorsiisoqartarsinnaavoq.

§ 4. Inatsisartut peqqussutaat novemberip 1-anni 1993-imi atuutilissaaq. Tamatumunnga peqatigitillugu Grønlands Tekniske Organisationi pillugu Inatsisartut peqqussutaanni nr. 8-mi decemberip 19-anni 1986-imeersumi § 2, imm. 1-imi nr. 6 aamma nr. 8 atorunnaarput.

Namminersornerullutik Oqartussat, ulloq 28. oktober 1993.

Lars Emil Johansen

/

Kuupik Kleist