Matumuuna Inissiani attartortakkani ineqarnermut tapiissutit pillugit Inatsisartut inatsisaat nr. 32 23. novemberi 2017-imeersumi aamma Inatsisartut inatsisaat nr. 24 13. juuni 2023-meersumi allannguutitalinni nalunaarutigineqarpoq.

Kapitali 1
Aalajangersakkat nalinginnaasut

  § 1. Ineqarnermut tapiissutit Inatsisartut inatsisaat manna malillugu inoqutigiinnut, inissiami attartortittakkami, inissianik attartortitsisarneq pillugu inatsisiliorneq qaqugukkulluunniit atuuttumi ilaatinneqartumi najugaqartunut tunniunneqartarput.

  § 2. Inoqutigiittut isigineqarput inersimasut meeqqallu tamarmik inissiami aalajangersimasumik najugallit.

  § 3. Init najugarineqartut najugaqartunut naleqqiullugu ataaseq sinnerlugu amerlaneruppata ineqarnermut tapiissutit tunniunneqarsinnaanngillat.

  Imm. 2. Ineqarnermut tapiissutinik tunineqartup inoqutigiinni ilaaffigisaani toqukkut qimaguttoqarpat allatigulluunniit atukkat allanngornerisigut inoqutigiit ikilippata, inooqatigiinni pisup kingorna qaammatini 6-ilinni siullerni imm. 1 atorneqassanngilaq.
  Imm. 3. Ineqarnermut tapiissutinik tunineqartup inoqutigiinni ilaaffigisaani toqukkut qimaguttoqarpat allatigulluunniit atukkat allanngornerisigut inoqutigiit ikilippata, ineqarnermut tapiissutinik tunineqartup kommunalbestyrelsimut inissiamik allamik, tassani ininik najugarineqartussanik najugaqartunut naleqqiullugu amerlanerunngitsunik qinnuteqarsimalluni uppernarsaaneraniit qaammatit 24-it tikillugit imm. 1 aammattaaq atorneqassanngilaq.
  Imm. 4. Ineqarnermut tapiissutinik tunineqartup inissiamik init najugaqartussallu amerlassusissaannut piumasaqaatinik naammassinnissinnaasumik neqeroorfigineqarnini itigartissimappagu, itigartitsinerminngaanniit imm. 1 qanorluunniit imm. 3-imi allassimasoqaraluarpat atorneqassaaq, taamaattoq siusinnerpaamik inooqatigiinni pisup pineraniit qaammatit 6-it kingorna.

  Imm. 5. Pissutsit immikkut ittut pissutissaqartippassuk imm. 1-imit 4-mut aalajangersakkanit kommunalbestyrelsi immikkut akuersissuteqarsinnaavoq.

  § 4. Ineqarnermut tapiissutit tunniunneqarsinnaapput taamaallaat inissiani attartortittakkani ineqarnermut akiliummut.
  Imm. 2. Atuinermi aningaasartuutinut atuinermilu akiliutinut ineqarnermut tapiissuteqartoqarneq ajorpoq.
  Imm. 3. Inissiani attartortittakkani ineqarnermut akiliutit inissianik attartortitsisarneq pillugu inatsisiliorneq qaqugukkulluunniit atuuttumi nassuiarneqarput.

  § 5. Inissiani attartortittakkani akiliutinut tapiissutit inigisamut akiliutit annertussusaat, najugaqatigiillu tamakkiisumik isertitarisaat aammalu inissiap pissuserisaa naapertorlugit taamatullu najugaqatigiinni 18-t inorlugit ukioqartut amerlassusaat naapertorlugit aalajangersaavigineqartarput. Piffissami 1. juuli 2022-miik 31. december 2022-imut utoqqalinersiallip isertitaaniit kr. 13.100,00 ilanngaatigineqassaaq, siusinaarlunilu utoqqalinersiallip isertitaaniit kr. 9.760,00 ilanngaatigineqassalluni. Ukioq 2023-imut utoqqalinersiallip isertitaaniit kr. 14.817,00 ilanngaatigineqassaaq, siusinaarlunilu utoqqalinersiallip isertitaaniit kr. 12.679,00 ilanngaatigineqassalluni. Ukioq 2024-imut siunissamilu allannguutit inummut ilanngaammi utoqqalinersialinnut- aamma siusinaarluni utoqqalinersiaqartunut aaqqiissuteqarfigineqartassapput matumani ukiumut siuliani utoqqalinersialinnut- aamma siusinaarluni utoqqalinersialinnut ukiumut inummut ilanngaat ilanngunneqarluni.

  Imm. 2. Inissiani attartortittakkani akiliutinut tapiissutit pissarsiarineqarsinnaanissaannut aammalu akiliutip malunnaatilimmik allanngortussaaneranut, najugaqatigiit isertitarisaasa malunnaatilimmik allanngorsimanerannut, inigisap pissuserisaata allangortinneqarneratigut imaluunniit meeqqat 18-t inorlugit ukiullit najugaqartut amerlassutsimikkut allanngornerannut tunngatillugu tamatuma kingunerisaanik akiliutinut tapiissutit tamakkiisumik isertitariligassat toqqammavigalugit nutaamik naatsorsorneqartassapput.
  Imm. 3. Meeqqat angerlarsimaffimmi najugaqartut ilanngullugit naatsorsuiffigineqartarnerat pissaaq qaammatip taassumap 18-liiffissaata naanissaa tikillugu. Kommuunimut nalunaaruteqareernerup kingorna meeqqat 18-t inorlugit ukiullit naatsorsuinermi ilanngunneqassapput nalunaaruteqarnermit qaammatip tulliuttup aallaqqaataaniit.

  § 6.  Ineqarnermut tapiissutinik qinnuteqartoq qinnuteqartup ineqarnermut tapiissutinik tunineqarnissaanut naliliinissami paasissutissanik pingaaruteqartunik aammalu ineqarnermut tapiissutinik kommunalbestyrelsip naatsorsuinissaanut paasissutissanik suugaluartunik paasissutissiinissaminut pisussaaffeqarpoq.
  Imm. 2. Pissutsit ineqarnermut tapiissutinik pisinnaanermut aamma kommunalbestyrelsip ineqarnermut tapiissutinik naatsorsuinissaanut pingaaruteqartut allanngorneri pillugit ineqarnermut tapiissutinik tunineqartoq kommunalbestyrelsimut nalunaaruteqarnissaminut pisussaaffeqarpoq.

  Imm. 3. Paasissutissat imm. 1-2-mi taaneqartut qinnuteqartup imaluunniit ineqarnermut tapiissutinik pisartagallip nassiutinngippagit, kommunalbestyrelsi paasissutissat pisariallit pillugit eqqoriaalluni aalajangiisinnaavoq.

  § 7. Kommunalbestyrelsi tunineqartup ineqarnermut tapiissutinik tunineqarnissaanut aamma kommunalbestyrelsip ineqarnermut tapiissutinik naatsorsuinissaanut nakkutiginnissalluni pisussaaffeqarpoq.

  § 8. Ineqarnermut tapiissutit tunniunneqassapput inoqutigiit ukiumut aningaasarsiaat § 5-imi maleruaqqusat malillugit naatsorsorneqartut ineqarnermut tapiissutisisinnaanermut killissarititaniit appasinneruppata. Tapiissutisinissamut killissarititaniit appasinnerusunik inoqutigiit isertitaqartartut ineqarnermut akiliutip ilaata agguaqatigiissinnera namminneq akilertassavaat.
  Imm. 2. Ineqarnermut tapiissutinik naatsorsuinermut piumasaqaatinik, § 5 naapertorlugu, taassuma ataani tapiiffigineqarnissamut killissarititanik, nammineq akiliutissanut kiisalu ukiumut ineqarnermut tapiissutit minnerpaaffissaannut annerpaaffissaannullu malittarisassanik erseqqinnerusunik Naalakkersuisut aalajangersaasinnaapput.

  § 9. Inissiani attartortittakkani ineqarnermut tapiissutit ukiup naatsorsuiffiusup naanerani aamma § 5 naapertorlugu iluarsiiffigineqartarput.
  Imm. 2. Inissiaq attartugaq ineqarnermut immikkoortortamut attuumassuteqarpat ukiup ineqarnermut tapiissuteqarfiusup ineqarnermut immikkoortortat ataasiakkaat ukiumoortumik naatsorsuutaat malissavai.
  Imm. 3. Inissiaq attartugaq ineqarnermut immikkoortortamut attuumassuteqanngippat ukiup ineqarnermut tapiissuteqarfiusup ukioq qaammatisiuteqarfiusoq malissavaa.

Kapitali 2
Aqunneqarnera tapiissutinillu tunniussisarneq

  § 10. Ineqarnermut tapiissutinik qinnuteqaat uppernarsaatissat pisariaqartinneqartut ilaatillugit kommunalbestyrelsimut tunniunneqassaaq.

  § 11. Ineqarnermut tapiissutit pillugit kommunalbestyrelsi aalajangiissaaq.
  Imm. 2. Inissiani attartortittakkani ineqarnermut tapiissutit aningaasanut aalajangersimasunut naatsorsorneqassapput attartortup ineqarnermut akiliutaani ineqarnermut tapiissutit ilanngaatigineqarlutik, taamaalilluni ineqarnermut tapiissutit ineqarnermullu akiliutit nikingassutaat kisimi attartortumit akiliutigineqassalluni.
  Imm. 3. Ineqarnermut tapiissutit toqqaannartumik attartortitsisumut akilerneqartarput.

  § 12. Ineqarnermut tapiissutit qinnuteqaatip tunniunneqareerneratigut aamma piumasaqaatit naammassineqareernerisigut qaammatip 1-ni atuutilersumik tunniunneqassapput.
  Imm. 2. Ineqarnermut tapiissutit qaammammut siumoortumik tunniunneqassapput.

Kapitali 3
Utertitsisarneq

  § 13. Ineqarnermut tapiissutinik qinnuteqartoq tunineqartorluunniit paasissutissiisussaatitaanerminik saneqqutsisimappat ineqarnermut tapiissutit annertuallaartut tunniunneqartut akilersorneqarnissaat pillugit kommunalbestyrelsi aalajangiisinnaavoq, tamanna § 6 naapertorlugu.
  Imm. 2. Utertitsilluni akiliuteqarnissaq kommunalbestyrelsip aalajangerpagu pisortanut akiligassanik akiliisitsiniartarneq pillugu inatsisiliorneq atuuttoq malillugu aningaasat akilersinniarneqassapput.

Kapitali 4
Ineqarnermut tapiissutit atorunnaarsinnerat

§ 14. Ineqarnermut tapiissutisiat qaammatip ineqarnermut tapiissutisisinnaanermut piumasaqaatinik naammassinniffiusup naanerani unitsinneqassapput.
  Imm. 2. Inissiamut allamut nuunnermi ineqarnermut tapiissutit atorunnaassapput, ineqarnermullu tapiissutit pillugit qinnuteqaammik nutaamik tunniussisoqassalluni.

Kapitali 5
Aningaasalersuineq

  § 15. Inatsit manna naapertorlugu ineqarnermut tapiissutinut aningaasartuutit 40%-ii kommunimit kiisalu 60%-ii Nunatta Karsianit aningaasartuutigineqassapput.
  Imm. 2. Naatsorsuutinik saqqummiussisarnissaq kukkunersiuisarnissarlu pillugit malittarisassat Naalakkersuisunit aalajangersarneqassapput.

Kapitali 6
Naammagittaalliorsinnaaneq

  § 16. Aalajangiinerit, inatsimmi matumani malittarisassat malillugit aalajangiiffigineqartut, isumaginninnermut aqutsisoqarfik aaqqissuussaanerlu pillugit Inatsisartut peqqussutaanni malittarisassat malillugit Isumaginninnermi Naammagittaalliuuteqartarfimmut naammagittaalliutigineqarsinnaapput.

Kapitali 7
Atortuulersitsineq

  § 17. Inatsit januaarip 1-ni 2016-imi atuutilissaaq.
  Imm. 2. Inatsisip atuutilersinneqarnera sioqqullugu ineqarnermut tapiissutit naatsorsorneqareersut piffissaq naatsorsuiffiusoq naallugu ingerlassapput imaluunniit pissutsit allanngortut malillugit naatsorsoqqinneqarlutik, tamanna § 5 malillugu.
  Imm. 3. Tamanna ilutigalugu Inissiani attartortittakkani ineqarnermut tapiissutit pillugit Inatsisartut peqqussutaat nr. 3, 31. maj 2001-imeersoq atorunnaarsinneqarput.
  Imm. 4. Maleruaqqusat Ineqarnermut tapiissutit pillugit Inatsisartut peqqussutaat nr. 3, 31. maj 2001-imeersoq tunngavigalugu aalajangersarneqartut , malittarisassanik Inatsisartut inatsisaanni matumani inatsisiniluunniit allani aalajangersakkanik piginnaatitsisunik taarserneqarnissamik atorunnaarsinneqarnissamilluunniit tungaanut atuutiinnassapput.

Inatsisartut inatsisaat nr. 32 23. november 2017-meersoq (Aapparisap inooqatigisalluunniit toqukkut qimagunneratigut, allatigullu pissutsit allanngorneri pillugit ineqarnermut tapiissutit)[1] atuutilersinneqarnissaanut aalajangersaatit taakkartorneqartut imarivai:

§ 2

Inatsisartut inatsisaat 1. januar 2018 atuutilersinneqarpoq.

Inatsisartut inatsisaat nr. 24 13. juuni 2023-meersoq (Utoqqalinersialinnut siusinaarlunilu utoqqalinersialinnut tunngaviusumik inummut ilanngaatip qaffanneqarnissaanut naatsorsueriaaseq)[2] atuutilersinneqarnissaanut aalajangersaatit taakkartorneqartut imarivai:

§ 2

Isumaginninnermut, Ilaqutariinnut, Suliffeqarnermut Nunamullu namminermut Naalakkersuisoqarfik 27. januar 2025

Martha Abelsen (atsior.)

Naalakkersuisoqarfimmi Pisortaq

/ Mehdi Shams (atsior.)