Inissiani attartortittakkani ineqarnermut tapiissutit pillugit Inatsisartut inatsisaanni nr. 23, 7. december 2015-imeersumi § 8, imm. 2 naapertorlugu aalajangersarneqarput:

 

Kapitali 1
Tapiissutinik appariartuaartitsineq minnerpaamillu akiliutip ilaata agguaqatigiissinnera nammineq akiligassaq

 

Inoqutigiit meerartaqanngitsut

 

§ 1.  Inoqutigiit meerartaqanngitsut ukiumut 60.000 kr.-nik isertitaqarpata ineqarnermut tapiissutit appariartuaartinneqalissapput.
  Imm. 2.  Inoqutigiit meerartaqanngitsut isertitaat 1.000 kr.-nik qaffappata akiliutip ilaata agguaqatigiissinnera nammineq akiligassaq 0,7 procentpointinik qaffassapput.
  Imm. 3.  Inoqutigiit meerartaqanngitsut namminneq minnerpaamik akiliutip ilaata agguaqatigiissinnera nammineq akiligassaq ineqarnermut akiliutigisartagaasa 5 procenterissavaat.

Inoqutigiit meerartallit

 

  § 2.  Inoqutigiit ataatsimik arlalinnilluunniit meerartallit ukiumut 25.000 kr.-nik isertitaqarpata ineqarnermut tapiissutit appariartuaartinneqalissapput.
  Imm. 2.  Inoqutigiit meerartallit isertitaat 1.000 kr.-nik qaffappata akiliutip ilaata agguaqatigiissinnera nammineq akiligassaq 0,25 procentpointinik qaffassaaq.
  Imm. 3.  Inoqutigiit meerartallit minnerpaamik ineqarnermut akiliutip 2 procentia nammineq akilertassavaat.

 

  § 3.  Appariartuaartitsinissamut killiliussat  § 1 imm. 1-imi aamma imm. 3-mi pineqartut procentimut aaqqiissutissamut ukiut tamaasa nalimmassarneqartassapput.
  Imm. 2.  Appariartuaartitsinissamut killiliussat isumaginninnikkut tunniuttakkat pillugit kaajallaasitaq aqqutigalugu ukiut tamaasa tamanut saqqummiunneqartassapput.

Akiliutip ilaata agguaqatigiissinnera nammineq akiligassaq

 

  § 4.  § 1-imi § 2-milu killissarititaasut tikillugit isertitaqqortussutsini assigiinngitsuni akiliutip ilaata agguaqatigiissinnera nammineq akiligassaq ilanngussaq 1-imi takuneqarsinnaavoq.

Tapiissutit minnerpaaffissaat annerpaaffissaallu

 

§ 5.  Ineqarnermut tapiissutit ukiumut 1.200 kr.-nit annikinnerusut tunniunneqartussaanngillat.
  Imm. 2.  Ukiumit ataatsimit sivikinnerusumik ineqarnermut tapiissutisisinnaatitaanermi imm. 1 naapertorlugu minnerpaamik tunniunneqarsinnaasoq piffissamut naleqquttumik ilaannakortumik annertussuseqassaaq.

 

§ 6.  Ineqarnermut tapiissutit inoqutigiinnut ataatsinut ukiumut annerpaamik 60.000 kr.-nik annertussuseqarsinnaapput.
  Imm. 2.  Inimik ataatsimik attartornermi ineqarnermut tapiissutit ukiumut annerpaamik 18.000 kr.-nik annertussuseqarsinnaapput.
  Imm. 3.  Ukiumit ataatsimit sivikinnerusumik ineqarnermut tapiissutisisinnaatitaanermi imm. 1 imaluunniit 2 naapertorlugit minnerpaamik tunniunneqarsinnaasoq piffissamut naleqquttumik ilaannakortumik annertussuseqassaaq.

Kapitali 2
Atuutilersitsinermut atorunnaarsitsinermullu aalajangersakkat

 

§ 7.  Nalunaarut ulloq 1. januar 2018 atuutilissaaq.
  Imm. 2.   Peqatigisaanik atorunnaarsinneqarpoq Ineqarnermut tapiissutisinissamut aningaasanut killiliussat, akiliutip ilaata agguaqatigiissinnera nammineq akiligassaq kiisalu ineqarnermut tapiissutit aningaasartaasa minnerpaaffissaat annerpaaffissaallu pillugit Namminersorlutik Oqartussat nalunaarutaat nr. 22, 29. december 2015-imeersoq.

 

 

Namminersorlutik Oqartussat, ulloq 24. november 2017

 

 

Sara Olsvig

/

Julie Præst Wilche