Matumuuna Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersoq, allannguutit ukunani pineqartut ilanngullugit Inatsisartut peqqussutaat nr. 14, 20. november 2006-imeersoq, aamma Inatsisartut peqqussutaat nr. 9, 5. december 2008-meersoq, aamma Inatsisartut inatsisaat nr. 17, 8. juni 2017-imeersoq, aamma Inatsisartut inatsisaat nr. 29, 28. november 2019-imeersoq, aamma Inatsisartut inatsisaat nr. 23, 1. december 2021-mersooq, aamma Inatsisartut inatsisaat nr. 13, 21. novembari 2022-mersooq.

 

Kapitali 1
Atuuffissaa

 

  § 1.  Peqqussutip atuuffigisaa tassaavoq illunik illunilu ineeqqanik inigisassanik attartortitsineq, attartukkanik attartortitseqqinneq ilanngullugu, tamatumani aningaasaanik allaanerusunik akiliuteqartarnersoq aamma inissiap ilaa inissiatuunngitsoq attartortinneqarnersoq apeqqutaatinnagu, taamaattorli tak. imm. 2.
  Imm. 2.  Peqqussut taamaallaat attartornermi pissutsinut atuuppoq, attartortoq inuttut namminiussuseqarpat.

 

  § 1 a.  Namminersorlutik Oqartussat kommunillu inissiaataat attartortittakkat pillugit kapitali 3-7-imi aamma 9-11-mi aalajangersakkat pisariaqartunik naleqqussaavigineqarlutik aamma ukununnga atuutissapput: 
1)  Inissianik attartortittakkanik, Namminersorlutik Oqartussanit imaluunniit kommunimit attartorneqartunik, tamatumalu kingorna attartortussamut attartorteqqinneqartunik attartortumut najugaqarfissatut attartortitsinissamut isumaqatigiissut.
2)  Inissianik attartortittakkanik, inissiaatileqatigiiffinnit, Namminersorlutik Oqartussanit imaluunniit kommuninit aalajangiiffigineqarlutik sunniuteqarfigineqartartunit attartorneqartunik, tamatumalu kingorna attartortussamut attartorteqqinneqartunik attartortumut najugaqarfissatut attartortitsinissamut isumaqatigiissut.
  Imm. 2.  Imm. 1 malillugu inissiat attartortittakkat najugaqatigiiffittut ataasiusutut naatsorsuusioriaatsimi immikkoortutut nammineertutut attartortitsisumit ataatsimoortinneqarsinnaapput, takuuk kapitali 3-4.
  Imm. 3.  Naalakkersuisut najugaqartut oqartussaaqataanissaannut, attartornermut akiliummik aalajangersaanissamut, attartornermut akiliummik iluarsiinissamik aqutsinermillu, attartornermi akiliisarnermut, attartukkap aserfallatsaaliorneqarneranut, iluarsaanneqarneranut atorneqarneranullu, atuisinnaatitaanerup allamut tunniunneqarneranut, kiisalu inissianut attartortittakkanut, imm. 1-imut ilaatinneqartunut attartorunnaarsitsisarnermut atorunnaarsitsisarnermullu maleruagassanik aalajangersaasinnaapput. Tassunga ilanngullugu kapitali 3-7-imi aamma 9-11-mi aalajangersakkat imm. 1 malillugu inissianut attartortittakkanut aalajangigaasumik annertussusilimmik atuutinnginnissaat pillugu maleruagassanik Naalakkersuisut aalajangersaasinnaapput.

 

  § 2.  Attartornissaq isumaqatigiissutigineqartassaaq immersugassaq Naalakkersuisunit akuerisaalluni kalaallisut qallunaatullu naqitaasoq atorlugu.
  Imm. 2.  Attartornermi isumaqatigiissummi allataasumi aalajangersakkat peqqussummi taaneqartunit annertunerusumik attartortumut pisussaffeqartitsiviusut imaluunniit annikinnerusumik attartortumut pisinnaatitaaffeqartitsiviusut atuutsinneqassappata, tamanna erseqqissaatigineqassaaq.
  Imm. 3.  Isumaqatigiissuteqarnikkut imm. 1-mi aamma 2-mi aalajangersakkat attartortumut ajoqutaasussamik sanioqqunneqarsinnaanngillat.

  Imm. 4.  Illumik imaluunniit illumi ineeqqamik najugaqarfissatut attartortinneqartumik pigisassatut imaluunniit attartugassatut tunniussinermi, takuuk § 1, pissarsisoq attartortumut pisinnaatitaaffinnik pisussaaffinnillu atuuttunik, Inatsisartut peqqussutaannik matumannga aamma attartortitsinermut isumaqatigiissummik malinniffiusunik tamaginnik tigusissaaq.

 

  § 3.  Peqqussut attartornernut, immikkut inatsisiliaasunit aqutaasunut atuutsinneqanngilaq, imaluunniit inissianut ukununnga atuutsinneqassanani:
1)  Namminersorlutik Oqartussat inissiaataannut attartortittakkanut Naalakkersuisunit ilaajunnaarsinneqarsimasunut.
2)  kommunep inissiaataanut attartortittakkanut kommunalbestyrelsimit ilaajunnaarsinneqarsimasunut, taamaattorli tak. imm. 2.
3)  Namminersorlutik Oqartussat kommunellu ilinniartut ilinniarnerannut atatillugu atugassiissapput, taamaattorli tak. imm. 3.
  Imm. 2.  Inissianut imm. 1, nr. 2-mi pineqartunut Nunap Karsianit sananeqarnerminnut tapiiffigineqarsimasunut ilaajunnaarsitsinissamut Naalakkersuisut akuersissuteqanissaat piumasaqaataavoq. 

 

  § 4.  Peqqussut utaqqiisaagallartumik inigitinneqartunut atuutinngilaq, taamaattorli tak. § 20, imm. 1, nr. 3.
  Imm. 2.  Peqqussut Namminersorlutik Oqartussat kommunelluunniit inissiaataanni utaqqiisaasumik sulisunut inigitinneqarallartunut tunngassuteqartunut atuutinngilaq, tamatumani apeqqutaatinnagu inissiinermut akiliuteqartitsisoqartarnersoq akiliuteqartitsisoqartannginnersorluunniit, taamaattorli tak. imm. 3 aamma 4.
  Imm. 3.  Namminersorlutik Oqartussani kommuneniluunniit sulisunik inissianut utaqqiisaasumik sulisunut inigitinneqarallartunut inissinneqarallartoq sullissinermut akiliummik akiliuteqartinneqarsinnaavoq, tak. imm. 2.
  Imm. 4.  Utaqqiisaagallartumik inigitinneqartartut aqunneqarnerat ingerlanneqarnerallu pillugit Naalakkersuisut maleruagassiorsinnaapput, matumani akiliutigineqartartussat annertussusissaat kiisalu inissiigallarnermi aningaasartuutaasut matussusiivigineqarnissaat ilanngullugit.

 

Kapitali 2
Innersuussissarnermi maleruagassat

 

  § 5.  Illuutini Namminersorlutik Oqartussanit kommunenilluunniit pigineqartuni inissiat inigineqanngitsut inissarsiortunut imatut tulleriinnilersuilluni innersuunneqartassapput, inissiat: 
1)  iluarsaassinernut isaterinernullu atatillugu Namminersorlutik Oqartussat kommunellu inisseeqqinnissaannut atugassat, tak. § 68. 
2)  attartortunut iniminnik piginneqatigiilluni inissiatut pigisatulluunniit tiguserusunngitsunut, tak. § 24, imm. 1 aamma § 24 a, imm. 1.
3)  initaartinneqarnissamik siusinnerusukkut qularnaveeqqusiivigineqarsimasunut eqquutsitsiniarluni innersuunneqartussat, tak. § 58, imm. 4. 
4)  aapparisap toqukkut qimagaasup atorfimmut aalajangersimasumut inigitinneqartumik qimatsinissaanut atatillugu innersuussutigineqartussat, tak. § 63, imm. 2.
5)  aapparisap toqukkut qimagaasup inimik innarluutilimmut immikkut aaqqissugaasumik tunniussaasimasumillu qimatsinissaanut atatillugu innersuussutigineqartussat, tak. § 63, imm. 3.
6)  siunertanut aalajangersimasunut inniminnigaasut, tak. imm. 3. 
7)  sullissivinni sulisunut inissamut normumik atorneqanngitsumik pigisaqartunut atugassat, tak. § 9,
8)  kommunet isumaginninnermi inissaqartitsinissaannut atugassat, tak. § 22, 
9)  nammineq kissaatigalugu nuunniartunut atugassat, tassunga ilanngullugu inigisanik paarlaannerit, tak. § 59, 
10)  utaqqisut allattorsimaffianni nalinginnaasumi allassimallutik inissarsiortunut atugassat, tak. § 6.
  Imm. 2.  Imm. 1, nr. 1 – 5 naapertorlugu inissiat innersuunneqartut naleqquttumik angissuseqartinniarneqassapput pitsaassuseqassallutillu. Ineqarnermut aningaasartuutit tamarmiusut sapinngisamik inissiami qimanneqartumi aningaasartuutaasarsimasunit amerlanerunissaat pinngitsoorniarneqassaaq.
  Imm. 3.  Namminersorlutik Oqartussat kommuneluunniit siunertanut aalajangersimasunut atugassanik inissianik inniminniisinnaapput, tassunga ilanngullugit inissiat atorfinnut aalajangersimasunut atugassiissutigineqartussat.
  Imm. 4.  Naalakkersuisut kommunet ataasiakkaat isumaqatiginiareerlugit inissiat imm. 1, nr. 7-10-mi taagorneqartut qanoq agguarneqarnissaat pillugu kommunenut tamanut immikkut aalajangersaasinnaapput.

  § 6.  Utaqqisut allattorsimaffianni nalinginnaasumi inissarsiorlutik allatsissimasut inissiamut immikkut kissaateqarsinnaapput, tassani pineqarlutik inissiap akia, inissisimaffissaa, taassuma ataani init quleriit arlaannut inissikkusunneq kiisalu angissusissaq, inissiap angissusia inoqutigiinni inuit amerlassusiinut naapertuuppat.
  Imm. 2.  Utaqqisut allattorsimaffianni nalinginnaasumi, allamut nuunnissamik kissaateqartut allattorsimaffianni kiisalu paarlaateqateqarniarlutik utaqqisut allattorsimaffianni inissarsiorlutik allatsissimasut inissiamik innersuussinermi inoqutigiinni inuit amerlassusii ataatsimik sinnerlugit initalimmik neqerooruteqartoqarsinnaavoq, tak. § 19.
  Imm. 3.  Najukkami inissianik attartortitsiniarneq ajornakusoortinneqartoq paasinarsippat, inissiamik inoqutigiinni inuit amerlassusii ataatsimik marlunnilluunniit sinnerlugit initalimmik neqerooruteqartoqarsinnaavoq.

 

  § 7.  Inissamik innersuussinermi attartortitsisup attartortussaq isertitai pigisaalu pillugit paasissutissanik piumasaqarfigisinnaavaa, attartortoq ineqarnermut aningaasartuutinik ingerlaavartunik kiisalu qulaarnaveeqqusiissutissamik akiliisinnaanersoq pillugu naliliiniarnermut atugassanik.
  Imm. 2.  Inissarsiortoq utaqqisut allattorsimaffiannut ilaatinneqarnerminut akiliuteqartinneqartassaaq, aammalu ukiut tamaasa allatsissimanerup ingerlaqqiinnarnissaanik uppernarsaanermini akiliuteqartinneqartassalluni.
  Imm. 3.  Naalakkersuisut inissianik innersuussisarneq attartortitsisarnerlu, akiligassat akilersinniarneqartarnissaat akitsuutillu annertussusissaat, kiisalu utaqqisut allattorsimaffiinik aqutsinissaq, taassumalu ataani utaqqisut allattorsimaffiisa inissianut sunut ataneri suussusiilu pillugit maleruagassiorsinnaapput, tak. § 5, imm. 1.

 

  § 8.  § 5, imm. 4-mi allassimasut apeqqutaatinnagit sulisunut inissiat inigineeruttut 20 %-ii sulisunut, nammineq kissaatigisamik nuunnissamut utaqqisut allattorsimaffiannut allatsissimasunut innersuunneqartassapput. Sulisut inissiamut immikkut kissaateqarsinnaapput, tassani pineqarlutik inissiap akia, inissisimaffissaa, taassuma ataani init quleriit arlaannut inissikkusunneq kiisalu angissusissaq, inissiap angissusia inoqutigiinni inuit amerlassusiinut naapertuuppat.
  Imm. 2.  Nammineq kissaatigisamik nuunnissamut utaqqisut allattorsimaffiani sulisunik allatsissimasoqanngippat, sulisunut inissiat inueruttut § 5-imi taaneqartutut innersuunneqarsinnaapput.

 

  § 9. Naalakkersuisut inissianut normunik aalajangersimasunik amerlassusilinnik, sulisunut atorfeqarnermi inissiamik innersuussiffigineqarsinnaatitaasunut, tak. § 5, imm. 1, nr. 7, Namminersorlutik Oqartussat inissiaataanniit tunniussassanik agguaassisinnaapput. Inissianut normunut tunniunneqarsimasunut sulisitsisoq, inissianut normunik pigisaqartoq ukiumoortumik akiliuteqartinneqarsinnaavoq.
  Imm. 2.  Aammattaaq Namminersorlutik Oqartussani sulisunut inissiat aqunneqarnerinut akiliuteqartitsisoqarsinnaavoq, aqutsinermi aningaasartuutiviusunut matusissutissanik.
  Imm. 3.  Naalakkersuisut Namminersorlutik Oqartussani sulisunut inissiat aqunneqarneri ingerlanneqarnerilu pillugit maleruagassiorsinnaapput, matumani ilanngullugit ukiumoortumik sullissinermut akitsuusiissutaasartut kiisalu allaffissornikkut aqutsinermut akitsuusiissutaasartussap angissusissaasa aalajangersaavigineqartarnissaat.

 

  § 10.  Naalakkersuisut inissianut normunik aalajangersimasunik amerlassusilinnik, sulisunut atorfeqarnermi inissiamik innersuussiffigineqarsinnaatitaasunut, tak. § 5, imm. 1, nr. 7, kommunalbestyrelsemut tunniussisinnaapput.
  Imm. 2.  Kommunalbestyrelsip kommunemi taassumaluunniit sullissiviini atorfillit, inissiaq kommunep inissiaataannut attartortittakkanut ilaalluni sulisunut inissianut attuumassuteqarpat, inoqutigiinni inuit amerlassusaat inimik ataatsimik sinnerlugit tunineqassanersut aalajangersinnaavaa.
  Imm. 3.  Kommune sulisunut inissianik agguaassinermi aqutsineq tulleriiaarinermilu tunngavissat pillugit sukumiisunik aalajangersaasinnaavoq. Maleruagassat taamaattut Naalakkersuisunit akuerineqassapput.

 

  § 11.  Sulisunut naalagaaffiup sullissiviini inissiamut innersuunneqarsinnaatitaallutik atorfeqartunut inissianik innersuussisarneq pillugu danskit naalagaaffiannut Naalakkersuisut Rigsombudi aqqutigalugu isumaqatigiissuteqarsinnaapput.
  Imm. 2.  Inissiat imm. 1-imi taaneqartut inissiap piniarneqarneraniit kingusinnerpaamik qaammatit pingasut qaangiunnerini innersuunneqartarnissaat anguniarneqartassaaq.
  Imm. 3.  Sullissivinni imm. 1-imi taaneqartuni sulisunut inissianik innersuussisarnissamut pisussaaffik eqqortinniarlugu Namminersorlutik Oqartussat inissianik arlalinnik inniminniisarsinnaapput.
  Imm. 4.  Sullissivinni imm. 1-imi taaneqartuni pisortatut sulisunut pisortanut inissianik innersuussisoqarsinnaavoq, tamanna pillugu Naalakkersuisunut aalajangersimasumik isumaqatigiissuteqarnikkut.

 

  § 12.  Inissiat Inatsisartuni sullissivinnilu taakkununnga attuumassuteqartuni sulisunut inissamik innersuunneqarsinnaatitaallutik atorfinitsitaasimasunut inissiat, kiisalu inissiat allat Inatsisartunut atorneqartussat innersuunneqartassapput, Naalakkersuisut Inatsisartullu isumaqatigiissuteqarnerat naapertorlugu.
  Imm. 2.  Sullissivinni imm. 1-imi taaneqartuni sulisunut inissianik innersuussisarnissamut pisussaaffik eqqortinniarlugu, Namminersorlutik Oqartussat inissianik arlaqartunik immikkoortitassanik inniminniisarsinnaapput.
  Imm. 3.  Sullissivinni imm. 1-imi taaneqartuni pisortatut sulisunut pisortanut inissianik innersuussisoqarsinnaavoq, tamanna pillugu Naalakkersuisunik aalajangersimasumik isumaqatigiissuteqarneq naapertorlugu.
  Imm. 4.  Inatsisartuni sullissivinnilu taakkununnga attuumassuteqartuni sulisunut atorfeqarnermi inissamik innersuussiffigineqarsinnaatitaasunut, inissiat §§ 16-18-imi maleruagassat malillugit innersuunneqassapput.

 

  § 13.  Namminersorlutik Oqartussat inissiaataat, sulisunut atorfeqarnermi inissiamik innersuussiffigineqarsinnaatitaasunut innersuunneqartartussat sisamanut agguagaapput tulleriiaarinerlu una malillugu innersuunneqartassallutik:
1)  Naalakkersuisoqarfinni ataasiakkaani naalakkersuisunut pisortanullu inissiat, tak. § 14,
2)  Namminersorlutik Oqartussat qitiusumik allaffeqarfianni immikkoortortani pisortanut assigisaannullu, akissaateqarfik 37 tassanngaanniilluunniit qaffasinnerusoq naapertorlugu akissarsiaqartinneqartunut inissiat, tak. § 15,
3)  Namminersorlutik Oqartussat qitiusumik allaffeqarfianni allaffinni pisortanut, akissaateqarfik 36 tassanngaanniilluunniit qaffasinnerusoq naapertorlugu akissarsiaqartinneqartunut inissiat, tak. § 16,
4)  Namminersorlutik Oqartussat qitiusumik allaffeqarfianni, sullissivinni suliffeqarfinnilu tassunga atasuni kiisalu sullissivinni, suliffeqarfinni aammalu aktiaateqarluni ingerlatseqatigiiffinni Namminersorlutik Oqartussanit pigineqartuni sulisunut allanut atorfeqarnermi inissiamik innersuussiffigineqarnissamik piginnaatitaaffeqartunut inissiat, tak. § 17.
  Imm. 2.  Naalakkersuisut inunnut §§ 16-imi 17-imilu taaneqartunut inissianik innersuussisarneq pillugu maleruagassiorsinnaapput.

 

  § 14.  Naalakkersuisunut naalakkersuisoqarfinni pisortanullu inissianik innersuussisarnissamut Namminersorlutik Oqartussat inissianik, Naalakkersuisunut naalakkersuisoqarfimmi pisortanullu inissiatut taagorneqartunik arlaqartunik immikkoortitassanik inniminniissapput.
  Imm. 2.  Naalakkersuisunut pisortanullu inissiat, tak. imm. 1, pingaarnerutillugu tassaasassapput ilaqutariinnut ataatsinut illut imaluunniit illut affarleriit.
  Imm. 3.  Imm. 1-imi taaneqartunut inissianik innersuussinermi inissianut ataasiakkaanut inoqutigiinni inuit qanoq amerlatiginissaat piumasaqaataanngilaq. 
  Imm. 4.  Inissiat imm. 1-imi taaneqartut najugaqatigiiffimmut nammineq ingerlasumut, ingerlatsinermut tapiiffigineqarsinnaasumut imaluunniit ingerlatsinermi immikkut ittumik aningaasartuutinut matusissutissanik tapiiffigineqarsinnaasumut inissinneqassapput.

 

  § 15.  Namminersorlutik Oqartussat qitiusumik allaffeqarfianni immikkoortortani pisortanut, akissaateqarfik 37 tassanngaanniilluunniit qaffasinnerusoq naapertorlugu akissarsiaqartinneqartunut inissianik innersuussinissamut Namminersorlutik Oqartussat inissianik, pisortanut inissianik taaneqartartunik arlalinnik inniminniissapput.
  Imm. 2.  Pisortanut inissianik innersuussinermi inissiat inoqutigiinni inuit amerlassusaat, § 19 naapertorlugu naatsorsorneqartut ininik marlunnik sinnerlugit innersuussisoqarsinnaavoq.

 

  § 16.  Namminersorlutik Oqartussat qitiusumik allaffeqarfianni allaffinni pisortanut, akissaateqarfik 36 tassanngaanniilluunniit qaffasinnerusoq naapertorlugu akissarsiaqartinneqartunut inissiat § 17-imi taaneqartunit salliutinneqarlutik innersuunneqartassapput.

 

  § 17.  Inunnut §§ 11-16-imi taaneqartunut inissianik innersuussinissamut pisariaqartinneqartut naammassineqarpata, inissiat Namminersorlutik Oqartussat qitiusumik allaffeqarfianni, sullissivinni suliffeqarfinnilu tassunga atasuni kiisalu sullissivinni, suliffeqarfinni aammalu aktiaateqarluni ingerlatseqatigiiffinni Namminersorlutik Oqartussanit pigineqartuni sulisunut allanut atorfeqarnermi inissiamik innersuussiffigineqarsinnaatitaasunut innersuunneqarsinnaapput.

 

  § 18.  Inunnut §§ 12, 16 aamma 17-imi taaneqartunut inissianik piniarnermi innersuussinermilu inissiat imatut innersuussassanngorlugit piniartoqarsinnaavoq:
1)  Kisimiittut inissiamik marlunnik initalimmik pissarsisinnaatitaapput.
2)  Aappariit qitornaqanngitsut, kisimiittut ataatsimik qitornallit aamma aappariit ataatsimik qitornallit inissiamik pingasunik initalimmik pissarsisinnaatitaapput.
3)  Kisimiittut marlunnik qitornallit aamma aappariit marlunnik qitornallit inissiamik sisamanik initalimmik pissarsisinnaatitaapput.
4)  Kisimiittut pingasunik amerlanerusunilluunniit qitornallit aamma aappariit pingasunik amerlanerusunilluunniit qitornallit inissiamik tallimanik initalimmik pissarsisinnaatitaapput.
  Imm. 2.  Najukkami inissianik attartortitsiniarneq ajornakusoortinneqartoq paasinarpat, inissiamik inoqutigiinni inuit amerlassusii ataatsimik marlunnilluunniit sinnerlugit initalimmik qaqutiguinnaq immikkut ittumik tunniussisoqarsinnaavoq.
  Imm. 3.  Sulisunut, tak. § 15, annerpaamik inissiat tallimanik initallit piniarneqarsinnaapput, inoqutigiinni inuit amerlassusaat § 19-imi maleruagassat malillugit naatsorsorneqarnerini sulisoq inissiamik anginerusumik ineqarnissamut pisinnaatitaanersoq apeqqutaatinnagu.
  Imm. 4.  Sulisitsisoq inoqutigiinni inuit amerlassusaat, taamatullu inissiamik inniminniinermut piffissaq inissiallu innersuunneqarnissaanut piffissaq pillugit ilisimatitsissuteqassaaq. Piffissami innersuussiffiusumi inoqutigiinni inuit amerlassusaat inissiap, sulisumut innersuunneqartup angissusissaanut aalajangiisuussaaq.
  Imm. 5.  Sulisitsisoq akisussaavoq, inoqutigiinni inuit amerlassusaat ingerlaavartumik eqqortumik nalunaarutigineqartuarnissaanut.

 

  § 19.  Inoqutigiinni inuit amerlassusaannik kisitsinermi angajoqqaat kisimiittut aappariillu inuttut marluttut naatsorsorneqartarput. Qitornat angerlarsimaffimmi najugaqartut, inissarsiortup taassumaluunniit aappaata inooqataataluunniit pilersuisussaatitaaffigisai tamarmik immikkut meeqqatut ataatsitut naatsorsorneqassapput. Qitornat 18-it sinnerlugit ukiullit ukiuni kingullerni marlunni inissarsiortumik ineqateqarsimagunik inoqutigiinnut ilaasutut naatsorsuutigineqassapput. Naartunerit naatsorsuinermi ilanngunneqarneq ajorput.

 

  § 20.  Sulisunut, tak. §§ 11, 12, 15, 16 aamma 17, inissiamik innersuunneqarsinnaatitaallutik atorfinitsitaasimasunut atuutissapput:
1) Atorfeqartoq pisussaavoq sulisunut inissiaq innersuuneqartoq tigussallugu.
2)  Sulisoq sulisunut inissiamik innersuunneqartumik tigusiumanngitsoq inissiamik allamik innersuunneqarnissamik pisinnaatitaaffeqanngilaq.
3)  Sulisoq sulisunut inissiamik innersuunneqartumik tigusiumanngitsoq aammalu utaqqiisaagallartumik inissinneqarsimasoq, utaqqiisaagallartumik ineqartitaanerminut ajunngitsorsiassaqartinneqarunnaassaaq imaluunniit sulisitsisup akiligaanik inissinneqarallarnini ingerlateqqissinnaajunnaassallugu.
4)  Sulisoq sumiginnaaneq pissutigalugu sulisunut inissiamit anisitaasoq inissiamut allamut innersuunneqarnissamut pisinnaatitaaffeqanngilaq.
  Imm. 2.  Naalakkersuisut sulisorisap soqutigisaqaqatigiiffik isumaqatigiinniarsinnaasoq ilaasortaaffigisaa isumaqatigiissuteqarfigisinnaavaa inissianik immikkut ittunik innersuussisarneq pillugu.

 

  § 20 a.  § 20-mi, imm. 1-imi allassimasut apeqqutaatinnagit, inissiat ukiut kingulliit tallimat iluini oqoqarsimasutut attartortitsisup nalunaarsuiffianni inissiaq allassimappat, atorfilik sulisunut inissiamik innersuunneqartumik itigartitsisinnaavoq, takuuk § 32 a, taamaaliornerminilu sulisunut inissiamik innersuunneqarsinnaatitaanini, inissinneqarallarnermi ajunngitsorsiassaqarsinnaatitaanini imaluunniit sulisitsisup akiligaanik inissinneqarallarnerminik ingerlatsiinnarsinnaatitaanini annaassanngilaa.

 

  § 21.  Attartortoq sulisunut inissiami najugaqartoq aammalu inissiamik attartortittakkamik nalinginnaasumik neqeroorfigineqartoq, sulisunut inissiaq najukkani inissianik nalinginnaasumik attartortitsisarnermi piumasaqaatit malillugit tigusinnaavaa, taamaattorli tak. imm. 4.
  Imm. 2.  Attartortoq ukiuni kingullerni tallimani sulisunut inissiami najugaqarsimasoq, sulisunut inissiap najukkani inissiatut nalinginnaasumik attartortittakkatut tigunissaanut pisinnaatitaavoq, taamaattoq takuuk imm. 4.
  Imm. 3.  Attartortoq soraarninngunnginnermini ukiuni pingasuni kingullerni sulisunut inissiami najugaqarsimasoq pisinnaatitaavoq sulisunut inissiaq najukkani inissiatut nalinginnaasumik attartortittakkatut tigussallugu, taamaattorli tak. 4.
  Imm. 4.  Imm. 1-3 naapertorlugit pisinnaatitaaffik atuutissanngilaq: 
1)  Inissianut Naalakkersuisunut naalakkersuisoqarfinni pisortanullu inniminnerneqarsimasunut, tak. § 14. 
2)  Pisortanut inissianut, Namminersorlutik Oqartussat qitiusumik allaffeqarfiani immikkoortortani pisortanut inniminnerneqarsimasunut, tak. § 15. 
3)  Inissianut siunertanut aalajangersimasunut imaluunniit atorfinnut aalajangersimasunut inniminnerneqarsimasunut, tak. § 5, imm. 3.

  § 22.  Kommunalbestyrelsep inunnik isumaginninnermik tunngaveqartumik ineqartitsinermut siunertanut innersuussisinnaatitaanini atorpagu, kommunep piffissap inissiap kommunemit atorneqarsinnaalerfia aallarnerfigalugu attartortitsilernissarlu tikillugu ineqarnermut akiliutit inissiamullu atatillugu aningaasartuutit allat kommunep akilertassavai. Tamatuma peqatigisaanik saniatigut kommunep qularnaveeqqusiissutissaq tamakkerlugu akilissavaa.
  Imm. 2.  Kommunalbestyrelse annaasaqaratarsinnaanermut qularnaveeqqusiissaaq, tak. § 23, attartortup inissiamut aningaasartuutinut ingerlaavartunut akiliisinnaanera attartortup attartortitsisumut uppernarsarsinnaanngippagu, tak. § 7.
  Imm. 3.  Attartortitsisup kommune inunnik isumaginninnermik tunngaveqartumik ineqartitsinissamik siunertaqarluni inissiiniarnerani itigartissinnaavaa, attartortoq siornatigut attartortitsisumut attartukkaminut akilinngitsuukkaminik ineqarnermut akiligassaqarpat imaluunniit akilersimanngisanik taarseeqqusissutinik akiligassaqarpat, taamaattorli tak. imm. 4.
  Imm. 4.  Attartortitsisup akerliunera atuutissanngilaq, attartortup isertinnginnerani ineqarnermut akiligassat akilinngitsuukkat taarseeqqusissutinillu akiligassat kommunep akilersimappagit.

 

  § 23.  Annaasaqaratarsinnaanermut qularnaveeqqusiissutit attartortup ineqarnermut aningaasartuutinullu allanut inissiamut attuumassuteqartunut, taakkununnga ilanngullugit iluarsaassinermut aningaasartuutinut, akiliuteqanngitsoorneratigut attartortitsisup aningaasatigut annaasaqaatigisinnaasaanut sillimmatitut akilerneqassapput.
  Imm. 2.  Annaasaqaratarsinnaanermut qularnaveeqqusiissutit qaammatini aqqaneq-marlunni ineqarnermut akiliutit annertoqatigissavaat, taamaattorli annerpaamik 60.000 kr.-iussallutik.
  Imm. 3.  Annaasaqaratarsinnaanermut qularnaveeqqusiissutit inissiap attartortumut atugassiissutigineqarneraniit qaammatit aqqaneq-marluk qaangiunnerini ingerlaannartumik atorunnaassapput. Qaammatit aqqaneq-marluk iluanni attartortup sumiginnaanerata kingunerisaanik attartortitsisup attartorneq taamaatitsissavaa, kiisalu allakkatigut kommunemut nalunaarutigissallugu attartortitsisup annaasaqaratarsinnaanermut qularnaveeqqusiissutit tigusussanngorai.
  Imm. 4.  Attartortitsisup annaasat tamakkiisut inaarutaasumik naatsorsoreerpagit, attartortitsisup erngerluni annaasat annertussusaat kommunemut nalunaarutigissavai, taannalu tunngavigalugu kommunep qularnaveeqqusiissut akilissavaa.

 

  § 24.  Namminersorlutik Oqartussat imaluunniit kommunip inissiaataasa attartortittakkat ilaanni attartortut piginneqatigiilluni inissiaatillit peqatigiiffiannik pilersitsisimappata, aammalu inissianik attartukkaminnik piginneqatigiilluni inissiatut tigusinissaminnik Namminersorlutik Oqartussanut imaluunniit kommunimut qinnuteqarsimappata, attartortitsisup §§ 5-imi aamma 65-imi aalajangersakkat sanioqqussinnaavaat. Piffissamit qinnuteqarfiusumit Namminersorlutik Oqartussat imaluunniit kommunip piginneqatigiilluni inissiaatillit peqatigiiffiat inummik, piginneqatigiilluni inissiaatillit peqatigiiffiata utaqqisunut allattuiffiani allatsisimasumik inissiamut inueruttumut innersuussinissamut piginnaatissinnaavaa. 
  Imm. 2.  Namminersorlutik Oqartussat imaluunniit kommunip attartortoq, tak. imm. 1, inissiamik najukkaminik piginneqatigiilluni inissiatut tigusinissamik kissaateqanngitsoq illoqarfimmi najukkamini inissiamik najugaata taamaaqataanik neqeroorfigissavaa. Inissiaq angissutsimigut neqeroorutip saqqummiunnerani inoqutigiinni inuit amerlassusaannut naapertuutissaaq, tak. § 6, imm. 2 aamma 3.
  Imm. 3.  Imm. 2 naapertorlugu inissiamut allamut innersuunneqarnissamut pisinnaatitaaffik taamaallaat atuutissaaq attartortup attartornermut isumaqatigiissut malissimappagu. Pissutsinik pingaaruteqangaanngitsunik imaluunniit attartortumit iluarsineqareersimasunik attartortitsisoq pissutissarsiorsinnaatitaanngilaq.
  Imm. 4.  Attartortup imm. 2 naapertorlugu neqeroorut allannguiniarluni sulinermut atatillugu akuerissappagu, attartortitsisup attartortoq nuuttussanngortoq nuunnermut atatillugu taarsiiffigissavaa, taakkulu tunngaviusumik aningaasartai 1.200 kr.-inik, kiisalu inimut najugaqarfiusumut ataatsimut 1.000 kr.-inik amerlassuseqartinneqassapput. Taarsiissutit aningaasartaat inaarutaasumik allannguinermut atatillugu aningaasartuutinut tamakkiisunut ilanngunneqassapput. Nuunneq kapitali 12-imi maleruagassat naapertorlugit ingerlanneqassaaq.
  Imm. 5.  Attartortup imm. 2 naapertorlugu neqeroorut akuerinngippagu attartorneq ingerlaannassaaq. Ukiumoortumik attartornermut akiliutip aalajangersarneqarnerani allaffissornermut akiliut 4.200 kr.-inik, illuutip tunniunneqarnerani aningaasaaliissutinit iluanaarutissat 1,5%-inik, kiisalu kvadratmeterimut ataatsimut ingerlatsinermut, aserfallatsaaliuinermut illuartitsinernullu akiliutit 405 kr.-inik annertussusilerneqassapput. Attartornermut akiliutip annertussusissaa ukiumi pineqartumi Inatsisartut aningaasanut inatsisaanni oqaasertaliussinikkut allanngortinneqarsinnaavoq.
  Imm. 6.  Attartorneq imm. 5 naapertorlugu ingerlatiinnarneqassappat, attartortup Namminersorlutik Oqartussanut imaluunniit kommunimut pisinnaatitaaffii atuutsinneqarsinnaasut taamaallaat tassaassapput, Namminersorlutik Oqartussat imaluunniit kommunip piginneqataasutut piginneqatigiilluni inissiaatillit peqatigiiffiannut pisinnaatitaaffigisai.
  Imm. 7.  Attartortup inissiaq attartukkani piffissap qanorluunniit ilinerani piginneqatigiilluni inissiatut tigusinnaavaa.

 

  § 24 a.  Namminersorlutik Oqartussat imaluunniit kommunit illuutaanni attartortittakkani annerpaamik 16-inik inissiartaqartuni attartortut affaat sinnerlugit inissiamik piginnittut peqatigiiffiannik pilersitsisimappata, aammalu inissianik attartortittakkanik inissiatut nammineq pigisatut tigusinissamik allakkatigut Namminersorlutik Oqartussanut imaluunniit kommunimut qinnuteqaateqarsimappata, attartortitsisup §§ 5-imi aamma 65-imi aalajangersakkat sanioqqussinnaavai. 
  Imm. 2.  § 24, imm. 2-7 taamatuttaaq inissianik attartortittakkanik inissiatut nammineq pigisatut allanngortinneqarnerinut atatillugu atuutissaaq, tak. imm. 1
  Imm. 3.  Attartortup pissutsit imm. 1-imi taaneqartut saniatigut allanik peqquteqarluni inissiap attartukkami inissiatut nammineq pigisatut tigunissaanik kissaateqarpat, illuummi attartortut allat piumasaqaatit atuutereersut tunngavigalugit attartortutut inissisimaannassapput.

 

Kapitali 3
Najugaqartut oqartussaaqataanerat

 

  § 25.  Namminersorlutik Oqartussat kommunellu ilaqutariinnut arlalinnut illuutaat, tassaasut illut quleriinnik initallit, illut sanileriit illullu uiguleriit ikinnerpaamik pingasunik atasunik inissiartallit, najugaqatigiiffinnut aningaasaqarnikkut imminnut ingerlattunut agguarneqarsinnaapput.
  Imm. 2.  Najugaqatigiiffinni ataasiakkaani attartortut najugaqatigiiffiup § 26-mi aamma § 28, imm. 4-mi maleruagassat malillugit ingerlanneqarneranut sunniuteqaqataanissamut pisinnaatitaapput, najugaqatigiiffimmi attartortut najugaqatigiiffimmi ataatsimiititsinermi najugaqatigiiffimmi siulersuisussanik sunniuteqaqataasussanik qinersisimappata.
  Imm. 3.  Naalakkersuisut Namminersorlutik Oqartussat kommunellu ilaqutariinnut arlalinnut illuutaasa najugaqatigiiffinnut agguarneqarnissaat, najugaqatigiiffiinni siulersuisunut qinersisarneq najugaqatigiiffinnilu siulersuisut sulinerat, matumani ilanngullugit najugaqatigiiffinni siulersuisut najugaqartunut aningaasaliissutinik atuinissaannut maleruagassat pillugit aalajangersaasinnaapput.

 

  § 26.  Najugaqatigiiffinni tamaginni attartortitsisoq ingerlatsinermut missingersuusiussaaq, tak. § 28, imm. 2 aamma imm. 3, taannalu attartortitsisumit inaarutaasumik akuerineqannginnermini najugaqatigiiffinni siulersuisunut oqaaseqarfigisassanngorlugu saqqummiunneqassaaq.
  Imm. 2.  Najugaqatigiiffimmi siulersuisut ingerlatsinermut missingersuutini killiliussat iluanni makkununnga tunngasunik siunnersuuteqarsinnaapput:
1)  aserfallatsaaliugassat nutartigassallu suut attartortitsisup najugaqatigiiffimmi suliarisariaqarnerai,
2)  najugaqatigiiffimmi init ataatsimoorussat ingerlanneqarnerat atorneqarnerallu, aamma
3)  najugaqatigiiffimmi sunngiffimmi sammisassanik assigisaannillu pilersitsineq.

 

  § 27.  Inissiaqarfinni namminersortunit pigisani imaluunniit illuutini namminersortunit pigisani, ikinnerpaamik najugaqarfiusunik arfinilinnik inissiartaqartuni, piginnittumillu ataatsimit pigineqartuni, aammalu ataatsimik amerlanerusunilluunniit ataatsimut atortulersugaasuni, soorlu kiassarneq, errorsisarfeqarneq, nalliuttorsiortarfeqarneq imaluunniit najugaqartut illuat, attartorlutik najugaqartut sinniisissaannik toqqaasinnaapput, apeqqutit illup ingerlanneqarneranut pingaarutillit tamaasa pillugit attartortitsisumut oqaloqatiginnissinnaatitaasussamik.
  Imm. 2.  Naalakkersuisut najugaqartut sinniisissaannik qinersisarneq najugaqartullu sinniisaasa sulinerat, taassuma ataani taakku illuutini attartortittakkani namminersortuni pigisani sunniuteqaqataasinnaanerat pillugu maleruagassiorsinnaapput.

 

Kapitali 4
Ineqarnermut akiliutit angissusilerneqartarnerat, ineqarnermut akiliutit iluarsiivigineqartarnerat allaffissornikkullu aqutsineq

Namminersornerullutik Oqartussat kommunellu inissiaataat attartortittakkat

 

  § 28.  Namminersorlutik Oqartussat kommunellu ilaqutariinnut arlalinnut illuutaanni najugaqatigiiffimmi inissianik attartortitsinermit isertitat tamakkiisut sukkulluunniit annertussusilerneqarnerini, najugaqatigiiffiup aningaasartuutinik tamanik akiliisinnaanissaa periarfissinneqassaaq, matumani ilanngullugit aningaasaliissutinit iluanaarutinut illumik piginnittumut akiliutitut aningaasartuutit, tak. § 31, aamma ingerlatsinermut atatillugu aningaasartuutit, matumani ilanngullugit allaffissornikkut aqutsinermut akiliutit, tak. § 32, imm. 1-6, aserorterisarnermik pinaveersaartitsinermut akiliutit, tak. § 32, imm. 7, aamma akiliutissatut illuartitallu aalajangikkat.
  Imm. 2.  Ineqarnermut akiliutit ukiumoortumik attartortitsisup najugaqatigiiffiummi ingerlatsinermut missingersuusiai akuerisaalu tunngavigalugit ukiumut tulliuttumut annertussusilerneqartassapput. Imm. 1-imi piumasaqaatit naammassiniarlugit ineqarnermut akiliummik qaffaanissaq pisariaqassappat, tamanna attartortunut ataasiakkaanut qaammatinik pingasunik sioqqutsisumik nalunaaruteqareernikkut pisinnaavoq. Siumoortumik ilisimatitsissut qaffaanermut tunngaviusut qaffaatissallu qaammammut koruuninngorlugit annertussusissaat pillugit paasissutissanik imaqanngippat siumoortumik ilisimatitsissut atortussaatinneqarsinnaanngilaq. Ukiumut tulliuttumut missingersuutit siumoortumik ilisimatitsissummut ilanngunneqarsinnaapput, tassanilu qaffaanermut tunngaviusoq allaqqassaaq. Ineqarnermut akiliutinik appaanerit siumut ilisimatitseqqaarani pisinnaapput.
  Imm. 3.  Aningaasartuutit ingerlatsinermut missingersuutinut ilanngunneqarsinnaasut ilaatigut tassaasinnaapput ilanngussaq 1-imi aningaasartuutit suussusilersornissaannut assersuutigineqartut. Ilanngussaq 1-imi allassimasut aningaasartuutaasinnaasut tamakkerneqanngillat.
  Imm. 4.  Najugaqatigiiffimmi siulersuisut immikkoortortami akuersaarnartunik annertussusilimmik pitsanngorsaanissamut nutarterinissamullu siunnersuuteqarsinnaapput, tamatuma peqatigisaanik naugaqatigiiffimmi siulersuisut ineqarnermut akiuliummut qaffaatissat pisariaqartut akuerisinnaappatigik. Naugaqatigiiffimmi siulersuisut akuersaarnartunik annertussusilimmik pitsanngorsaanissamut nutarterinissamullu siunnersuutaat najugaqatigiiffimmi ataatsimiititsisinermi akuersissutigineqassaaq.
  Imm. 5.  Naalakkersuisut pilersaarutaasumik aserfallatsaaliuinissamut teknikikkullu atortulersuutinik nutarterinissamut illuartitsisarneq, ineqarnermut akiliutip naatsorsorneqartarnera aamma ineqarnermut akiliutip iluarsineqarnissaanut siumoortumik ilisimatitsisarneq pillugu maleruagassiorsinnaapput.

 

  § 29.  Namminersorlutik Oqartussat kommunellu ilaqutariinnut arlalinnut illuutai kingusinnerpaamik 2010-mi imermut uuttuusersorneqarsimassapput, taamaalilluni illuummi imermik nillertumik kissartumillu atuinermut tamakkiisumut aningaasartuutinut naatsorsukkat immikkut atuineq malillugu attartukkanut ataasiakkaanut agguaanneqarsinnaassallutik, taamaattorli tak. imm. 2.
  Imm. 2.  Imermut uuttuutinik inissianut ikkussuinissamut pisussaaffik atuutissanngilaq:
1)  ikkussuinissaq teknikip tungaanit isigalugu isumatusaarnerunngippat,
2)  Illuutip teknikikkut atortuinik iluarsaassinissaq 1. januar 2011 nallertinnagu pisussatut pilersaarusiorneqarsimappat, imaluunniit
3)  ikkussuinissaq najugaqatigiiffiup aningaasaqarneranut naleqqutinngitsumik nammakkiissappat.
  Imm. 3.  Illuummi teknikikkut atortulersuutinik, tak. imm. 2, nr. 2, iluarsaassinerup peqatigisaanik immikkut imermut uuttuusersuisoqassaaq.

 

  § 30.  Ilaqutariinnut ataatsinut illut illullu affarleriit Namminersorlutik Oqartussanit kommunenillu pigineqartut ingerlatsinermut aserfallatsaaliuinermullu immikkoortortaqarfinnut, aningaasaqarnikkut imminnut ingerlattunut agguarneqassapput. Kommunep ilaqutariinnut ataatsinut illut illullu affarleriit ingerlatsinermut aserfallatsaaliuinermullu immikkoortortaqarfimmut ataatsimut amerlanerusunulluunniit agguassavai. Ilaqutariinnut ataatsinut illut illullu affarleriit Namminersorlutik Oqartussanit pigineqartut ingerlatsinermut aserfallatsaaliuinermullu immikkoortortaqarfimmut, Kalaallit Nunaanni ilaqutariinnut ataatsinut illunik illunillu affarleriinnit Namminersorlutik Oqartussanit pigineqartunit tamanit peqataaffigineqartumut ataatsimoortinneqassapput, matumanili Naalakkersuisunut pisortanullu inissiat, tak. § 14, imm. 1, ingerlatsinermut aserfallatsaaliuinermullu immikkoortortaqarfimmut imminut ingerlattumut, tak. § 14, imm. 4, inissinneqartut pineqanngillat. 
  Imm. 2.  Namminersorlutik Oqartussat kommunellu ilaqutariinnut ataatsinut illuutaanni illuutaannilu affarleriinni ingerlatsinermut aserfallatsaaliuinermullu immikkoortortaqarfiup inissiaataanik attartortitsinermi akiliutip sukkulluunniit annertussusilerneqarnerani, ingerlatsinermut aserfallatsaaliuinermullu immikkoortortaqarfiup aningaasaliissutinit iluanaarutinut aningaasartuutinik, tak. § 31, aamma ingerlatsinermut aningaasartuutinik inissiamik piginnittumut akiliisinnaanissaa periarfissinneqassaaq, matumani ilanngullugit allaffissornikkut aqutsinermut akiliutit, tak. § 32, imm. 1-6, matumani aningaasartuutit attartortumit toqqaannartumik akilerneqartut pinnagit, tak. imm. 7.
  Imm. 3.  Ineqarnermut akiliutit ukiumoortumik attartortitsisup ingerlatsinermut aserfallatsaaliuinermullu immikkoortortaqarfinnut ataasiakkaanut ingerlatsinermut missingersuusiaai akuerisaalu tunngavigalugit ukiumut tulliuttumut annertussusilerneqartassapput. Aningaasartuutit ingerlatsinermut missingersuutinut ilanngunneqarsinnaasut ilaatigut tassaasinnaapput aningaasartuutit ilanngussaq 2-mi sunaasinnaanerannut assersuutigineqartut. Ilanngussaq 2-imi allassimasut aningaasartuutaasinnaasut tamakkerneqanngillat.
  Imm. 4.  Imm. 2-mi piumasaqaatit naammassiniarlugit ineqarnermut akiliummik qaffaanissaq pisariaqassappat, tamanna attartortunut ataasiakkaanut qaammatinik pingasunik sioqqutsisumik nalunaaruteqareernikkut pisinnaavoq. Siumoortumik ilisimatitsissut qaffaanermut tunngaviusut qaffaatissallu qaammammut koruuninngorlugit annertussusissaat pillugit paasissutissanik imaqanngippat siumoortumik ilisimatitsissut atortussaatinneqarsinnaanngilaq. Ineqarnermut akiliutinik appaanerit siumut ilisimatitseqqaarani pisinnaapput.
  Imm. 5.  Imm. 2-4-mi aalajangersakkat apeqqutaatinnagit ingerlatsinermut aserfallatsaaliuinermullu immikkoortortaqarfimmi ineqarnermut akiliutit ilanngussaq 3-mi akinut tunngavissatut allanneqartut, aningaasaliissutinit iluanaarutinut aningaasartuutinik illumik piginnittumut akilerneqartussanik, tak. § 31, aamma allaffissornikkut aqutsinermut aningaasartuutinik, tak. § 32, imm. 1-6, ilaqartinneqartut tunngavigalugit aalajangersarneqassapput. Akinut tunngavissat ukiumoortumik Inatsisartut aningaasanut inatsisaannut oqaasertaliussinikkut allanngortinneqarsinnaapput. Akinut tunngavissanik allannguinerup imaluunniit aningaasaliissutinit iluanaarutinut allaffissornikkullu aqutsinermut aningaasartuutit, tak. §§ 31 aamma 32, imm. 1-6, qaffannerisa kingunerisaanik ineqarnermut akiliutit qaffanneqassappata, tamanna attartortunut ataasiakkaanut qaammatinik pingasunik sioqqutsisumik nalunaaruteqareernikkut pisinnaavoq. Siumoortumik ilisimatitsissut qaffaanermut tunngaviusut qaffaatissallu qaammammut koruuninngorlugit annertussusissaat pillugit paasissutissanik imaqanngippat siumoortumik ilisimatitsissut atortussaatinneqarsinnaanngilaq. Ineqarnermut akiliutinik appaanerit siumut ilisimatitseqqaarani pisinnaapput.
  Imm. 6.  Attartortitsisup ingerlatsinermut aserfallatsaaliuinermullu immikkoortortaqarfimmi ineqarnermut akiliutissamik aalajangersaariaaseq allanngortissinnaavaa, attartortunut ataasiakkaanik qaammatinik pingasunik sioqqutsisumik qaammatisiutit malillugit ukiup naanissaanut atuuttussanngorlugu ilisimatitsereernermigut. Naatsorsueriaatsip allanngortinneqarnera ineqarnermut akiliutit qaffannerinik kinguneqassappat, siumoortumik ilisimatitsissut atorsinnaassaguni qaffaanermut tunngaviusunik qaffaatissallu qaammammut koruuninngorlugit annertussusissaannik imaqassaaq.
  Imm. 7.  Eqqaavilerinermut, anartarfilerinermut, septiktankinik imaarsisarnermut, illu imermut tankeqarpat imermik pajunneqartarnermut aningaasartuutit kiisalu innaallagissamut, imermut kiassarnermullu aningaasartuutit toqqaannartumik attartortumit akilerneqartassapput.
  Imm. 8.  Naalakkersuisut pilersaarutaasumik aserfallatsaaliuinissamut teknikikkullu atortulersuutinik nutarterinissamut illuartitsisarneq, ineqarnermut akiliutip naatsorsorneqartarnera aamma ineqarnermut akiliutip iluarsiivigineqartarnissaanut siumoortumik ilisimatitsisarneq pillugu maleruagassiorsinnaapput. 

 

  § 31.  Ukiumoortumik Namminersorlutik Oqartussat kommunellu aningaasaliissutinit iluanaarutissaat illuutip sananeranut akiusup 1,5%-iannik annertussuseqassaaq.
  Imm. 2.  Illuutip sanameranut akiusup naatsorsorneqarnerani aningaasartuutit sananermut attuumassuteqartut tamarmik ilaatinneqassapput, matumani ilanngullugit pilersaarusiorneq, nakkutilliineq illuliorfissamillu sanaartorfissagiuminarsaaneq. Illuutip sananeranut akiusoq, sananermut aningaasartuutiviusut apeqqutaatinnagit minnerpaamik kvadratmeterimut 7.000 kr.-inik aamma annerpaamik kvadratmeterimut 15.000 kr.-inik annertussusilerneqartassaaq.
  Imm. 3.  Illuummi iluarsaanneqarsimasumi iluarsaassinerup naammassinerata kingorna illuutip teknikimut aningaasaqarnermullu tunngasunik naliliiffigineqarnera tunngavigalugu sananermut akiusoq aalajangersarneqassaaq, taamaattorli tak. imm. 2.
  Imm. 4.  Illuutinik pisinermi, pisinermi akiusoq illup sananeqarneratut akiusutut isigineqassaaq, kingusinnerusukkut naleqarnerulersitsisumik allanngortiterinerit, iluarsaassinerit imaluunniit pitsanngorsaanerit ilassutigalugit, taamaattorli tak. imm. 2 aamma imm. 3. Illuutit akeqanngitsumik, tunissutitut, kingornussinikkut, taarsiissutitalimmik arsaagaanikkut imaluunniit pigisanik paarlaaseqatigiinnikkut pissarsiarineqartut sananermut akiata aalajangersarneqarnerani illuutip teknikimut aningaasaqarnermullu tunngasunik naliliiffigineqarnera tunngavigineqassaaq, taamaattorli tak. imm. 2.
  Imm. 5.  Illuutip sananeqarnerani akiusoq kvadratmeterimut 7.000 kr.-inut aalajangerneqarppat, tak. imm. 2, aammalu illuummi atortulersuutinit ukunannga ataaseq amerlanerusulluunniit amigaataappata, sananermut akiusoq, tak. imm. 2, atortulersuummut amigaataasumut ataatsimut kvadratmeterimut 1.000 kr.-inik appartinneqartassaaq:
1)  Uffarfik/anartarfik imermik kuutsitsiviusartoq.
2)  Kiassaateqarfimmiit kiassarneqarneq /kiassaat uuliatortoq/kiassaatit innaallagiatortut.
3)  Innaallagiaq
4)  Imeq imaluunniit imermut tanki.
5)  Gassi imaluunniit innaallagiaq qalatsissutaasartoq.
6)  Kiffiutissat oqorsaatit, tak. imm. 6.
  Imm. 6.  Naternut, qilaamut iikkanullu kiffiutissat mineraluldit 250 mm-it inorlugit issussuseqarpata, sananermut akiusoq ilanngaaserneqassaaq, tak. imm. 5, nr. 6. Kiffiutissat allat atorneqarsimappata, kiffiutissat oqorsaasinnaassusiat mineraluldip oqorsaasinnaassusianut uuttuunneqassapput.
  Imm. 7.  Naalakkersuisut imm. 3 aamma 4 malillugu teknikimut aningaasaqarnermullu naliliinissap qanoq ingerlanneqarnissaa pillugu maleruagassiorsinnaapput.

 

  § 32.  Attartortitsisup attartortut allaffissornikkut aqutsinermut akiliuteqartissinnaavai, aningaasartuutinut allaffissornermut attuumassuteqartunut matusissutissanik. Allaffissornermut akiliut imm. 3-5-imi maleruagassat malillugit aalajangerneqassapput.
  Imm. 2.  Allaffissornikkut aqutsisussamik attartortitsisoq avataaniit atorfinitsitsisinnaavoq. Avataaniit allaffissornikkut aqutsisussap akissarsiassai attartortitsisup allaffissornikkullu aqutsisup akunnerminni isumaqatigiissuteqarnerisigut aalajangerneqassapput, taakkulu attartortitsisup imm. 3-5-imi maleruagassat malillugit allaffissornikkut aqutsinermut akiliutitut attartortunit akilertissinnaavai.
  Imm. 3.  Allaffissornikkut aqutsinermut akiliutit attartukkanut ataasiakkaanut angeqqatigiimmik agguarlugit imaluunniit imm. 4-mi aamma 5-imi maleruagassat malillugit angissusilerneqassanersut attartortitsisup aalajangissavaa.
  Imm. 4.  Allaffissornikkut aqutsinermut akiliutit agguarlugit aalajangiiffigineqarsinnaapput, taamaalilluni tunngaviusumik sullissinernut akiligassanut tunngaviusumik annertussusiliisoqartassalluni aammalu ilassutitut sullissinernut akiligassanut ilassutissanik annertussusiliisoqartassalluni. Tunngaviusumik sullissinermi akiliutip qularnaasavaa tunngaviusumik isumannaatsumik allaffissornikkut aqutsinerup isumagineqarnissaa.
  Imm. 5.  Tunngaviusumik sullissinermi akiliutissat attartornernut ataasiakkaanut angeqqatigiinnik annertussusilerlugit aalajangerneqassapput. Ilassutitut akiliutissat najugaqatigiiffinni imaluunniit ingerlatsinermut aserfallatsaaliuinermullu immikkoortortaqarfinni, attartortitsisup ilassutitut suliassatut toqqarsimasaani attartortunut akilersissavai.
  Imm. 6.  Naalakkersuisut Namminersorlutik Oqartussat kommunellu inissiaataasa attartortittakkat allaffissornikkut aqunneqarnerat ingerlanneqarnerallu, matumani ilanngullugit ilaatigut allaffissornikkut aqutsinermut akiliutip immikkoortui, tunngaviusumik ilassutitullu sullissinerit immikkoortiterneri, akiliutit kiffartuussinernullu akiliutit immikkoortiterneri, aningaasaliissutinik allaffissornikkut aqutsineq, missingersuusiorneq, naatsorsuutinik saqqummiussisarneq kukkunersiuinerlu pillugit maleruagassiorsinnaapput. 
  Imm. 7.  Attartortitsisup Namminersorlutik Oqartussat kommunellu ilaqutariinnut arlalinnut illuutaanni attartortut akiliisissinnaavai, najugaqatigiiffimmi aserorterisarnermik pinaveersaartitsinermut atatillugu aningaasartuutinut naleqquttunut matussutissanik.

  Imm. 8.  Attartortitsisup inissiaataasa inissisimaffiannut pitsanngorsaanissamut imaluunniit aningaasaleeqqinnissamut aningaasartuutinut matussutissanik attartortitsisoq Namminersorlutik Oqartussat kommunillu ilaqutariinnut arlalinnut illuutaanni attartortunut akiliisitsisinnaavoq. Akiliutissap annertussusissaa ukiumi pineqartumi Inatsisartut aningaasanut inatsisaanni oqaasertaliussinikkut annertussusilerneqassaaq.

 

Namminersorlutik Oqartussat kommunellu inissiaataat attartortittakkat

 

  § 32 a.  Namminersorlutik Oqartussat imaluunniit kommunit inissiaataat attartortittakkat, ukiut tallimat kingulliit iluini oqoqarsimasut nalunaarsorneqassapput. Inissiaq qaqugukkut oqoqarsimanersoq, qanoq annertutigisumik oqoqarsimanersoq, oquijaanerlu pillugit attartortitsisoq nalunaarsuissaaq.
  Imm. 2.  Oquk patsisaalluni inissiaq attartortittagaq nutarterneqarsimappat, inissiarlu attuumassuteqanngitsumit paasisimasalimmiillu misissuinikkut oqoqarunnaarsimasutut uppernarsarneqarsimappat, imm. 1 naapertorlugu nalunaarsuinissaq pinngitsoortinneqarsinnaavoq. Inissiaq oqoqarunnaarsimasoq misissuinerup uppernarsassavaa.
  Imm. 3.  Nalunaarsuinissaq pillugu, matumani inissiat attartortittakkat sulisunut inissiatut atorneqartut kisimik nalunaarsorneqarnissaat kiisalu inissiat attortittakkat annertugisassaanngitsumik oqoqartut nalunaarsorneqartariaqannginnerat ilanngullugit, Naalakkersuisut malittarisassanik aalajangersaasinnaapput.

 

  § 32 b.  §§ 11, 12, 15, 16, 17-ilu innersuussutigalugit atorfillip sulisunut inissiaq § 32 a naapertorlugu nalunaarsorneqarsimalluni Namminersorlutik Oqartussanit imaluunniit kommunimit pigineqarluni innersuunneqartoq tigujumanngippagu, Namminersorlutik Oqartussat imaluunniit kommuni najugaqarfimmut ingerlatsinermut tapiissuteqassaaq. Inissiaq attartortittagaq allamut attartortinneqarsinnaanngippat ingerlatsinermi tapiissutit tunniunneqassapput, tamatumalu kingunerisaanik najugaqarfiup amigartoorutit ingerlatsinermut missingersuutini matussusersinnaassavai. Atuineq ilanngunnagu qaammammut attartornermi akiligassaq, ingerlatsinermi tapiissutit naleqqatigissavai. Ukiumut ataasiarluni ingerlatsinermut tapiissuteqartoqarsinnaavoq, inissiamullu ataatsimut annerpaamik pingasoriarluni ingerlatsinermut tapiissuteqartoqarsinnaalluni.

 

Illuutit attartortittakkat namminersortunit pigineqartut

 

  § 33.  Inissiani attartortittakkani namminersortunit pigineqartuni ineqarnermut akiliut aningaasartuutit malillugit annertussusilerneqassaaq, taannalu attartortitsisup aningaasaliissutinut aningaasartuutigisaanit uppernarsarneqartunit, ingerlatsinermut aningaasartuutigisaanit uppernarsarneqartunit aammalu illuutip teknikikkut aningaasaqarnikkullu nalingata diskontop affaatut annertussusilimmik ernialersorneqarneranut akiliutigisaanit qaffasinnerussanngilaq. Ineqarnermut akiliut inissiat angissusiat naapertorlugu agguarneqassaaq.
  Imm. 2.  Aningaasaliissutinut aningaasartuutit uppernarsarneqartsut tassapput illutaarnissaq siunertaralugu taarsigassarsilluni aningaasaliissuteqarnermi taarsigassarsiat erniaat imaluunniit sanatitsisup nammineq aningaasaatai atorlugit annaaratarneqarsinnaanngitsunik aningaasaliissuteqarnermi erniat naatsorsukkat, aningaasaliissuteqarnermi annaasaqaratarsinnaanermut ilassuserlugit.
  Imm. 3.  Ingerlatsinermut aningaasartuutit uppernarsarneqartsut ilaatigut tassaapput innaallagissamut, imermut, eqqiaanermut, allaffissornikkut aqutsinermut, sillimmasiinermut aserfallatsaaliuinermullu aningaasartuutit, kiisalu illuutip attartukkallu qanoq issusia eqqarsaatigalugu naapertuuttutut isigineqartut malillugit teknikikkut atortulersuutinik nutarterinissamut illuartitat.
  Imm. 4.  Illuutip teknikikkut aningaasaqarnikkullu nalingata naatsorsorneqarnerani periaatsit Naalakkersuisunit aalajangersarneqartut malinneqassapput, tak. § 31, imm. 7. 
  Imm. 5.  Attartortitsisoq pisinnaatitaavoq akinik qaffaanerit, akigititaasunik qaffaanerit il.il. kingunerisaannik, imaluunniit attartortitsisoq illuummi attartukkamiluunniit pitsannguisimappat ineqarnermut akiliummik qaffaanissamik piumasaqaateqassalluni. Piumasaqaat allakkatigut saqqummiunneqassaaq, tamatumunngalu peqatigitillugu illuummi attartortunut tamanut qaammatinik pingasunik sioqqutsisumik saqqummiunneqassalluni. Piumasaqaat qaffaanermut tunngaviusut qaffaatissallu annertussusissaat pillugit paasissutissanik imaqanngippat, siumoortumik ilisimatitsissut atortussaatinneqarsinnaanngilaq.

 

  § 34.  Attartortup attartornermut akiliutip qaffannissaa, tak. § 33. imm. 5, pillugu piumasaqaat akueriumanngikkuniuk, attartortoq piumasaqaatip tiguneraniit kingusinnerpaamik sapaatit akunnerisa sisamat qaangiunnerini attartortitsisumut allakkatigut akerliliissummik saqqummiussissaaq, tassanilu piumasaqaammi immikkoortut suut akuerineqarsinnaannginnersut allanneqassaaq. Taamatut pisoqarpat attartortitsisup ineqarnermut akiliummik qaffaanissaminik piumasaqarnini aalajangiisimaannaruniuk suliaq sapaatit akunneri arfinillit qaangiutinnagit eqqartuussivinnut suliakkiissutigissavaa.
  Imm. 2.  Suliaq eqqartuussivinnut suliakkiissutigineqarpat, attartortitsisup ineqarnermut akiliutissatut siumoortumik nalunaarutigalugu piumasaqaatigineqartoq akilersortissavaa ineqarnermut akiliutaagallartutut eqqartuussiviup aalajangiinissaata tungaanut. Tamatuma kingorna ineqarnermut akiliut eqqartuussiviup aalajangiinera naapertorlugu iluarsiivigineqassaaq. Ineqarnermut akiliummik akiliisitsivallaartoqarsimappat, eqqartuussiviup aalajangerneraniit kingusinnerpaamik qaammatit pingasut qaangiunnerini attartortitsisup ineqarnermut akiliut iluarsiivigissavaa, piffissamit ineqarnermut akiliisitsivallaarfiusup aallartinneraniit atuuttussatut naatsorsorlugu.
  Imm. 3. Attartortitsisup ineqarnermut akiliisitsivallaarutinik iluarsiinera eqqartuussiviup aalajangiineraniit qaammatit pingasut sinnerlugit kingusinneruppat, attartortup ineqarnermut akiliivallaarutit ernialerneqarnissaat piumasarisinnaavaa, piffissamit ineqarnermut akiliisitsivallaarfiusup aallartinneraniit atuuttussatut naatsorsorlugu. Kingusinaarluni akiliinermi il.il. ernialersuisarneq pillugu inatsimmi maleruagassat naapertorlugit erniat naatsorsorneqassapput.

  Imm. 4.  Attartornermut akiliutip qaffanneqarnissaanik ilimasaarinissamut maleruagassanik attartortitsisup malinninnginnera, inissiamik attartortittakkamik, inissiaatileqatigiiffimmit Namminersorlutik Oqartussanit imaluunniit kommunimit aalajangiiffigineqarlutik sunniuteqarfigineqartartumit, takuuk § 33, imm. 5, oqaaseqatigiit aappaat pingajuallu naapertorlugit kingusinnerpaamik piumasaqaatip tiguneqareerneranit sapaatit akunnerisa sisamat qaangiutinnginnerini, attartortup Ineqarneq pillugu Maalaaruteqartarfimmut maalaarutigisinnaavaa. Ineqarneq pillugu Maalaaruteqartarfiup aalajangiinissaata tungaanut attartortitsisup attartornermut akiliut ilimasaarutigineqartoq ineqarnermut akiliutaagallartutut akilersittarsinnaavaa. Imm. 2-3 taamaaqataanik atuutissapput. Ineqarneq pillugu Maalaaruteqartarfimmut maalaaruteqartoqarnerani, Ineqarneq pillugu Maalaaruteqartarfiup aalajangiinerata attartortitsisumut apuunnissaata tungaanut eqqartuussivinnut suliakkiissuteqarnissamut attartortitsisup piffissamut killigititaa atorunnaarsinneqassaaq.

 

  § 35.  Illuutini illuniluunniit pisortanit imaluunniit namminersortunit pigineqartuni ineeqqanik najugaqarfissanik inuinnarnut attartortitsinermi, ineqarnermut akiliutit annerpaamik inissiami ineqarnermut imaluunniit akilersuutinut akiliutinut, kiassarnermut, innaallagissamut, imermut il.il. aningaasartuutaasunut, ineeqqat amerlassusaannut naatsorsorneqartunut naapertuuttumik annertussusilerneqassapput.
  Imm. 2.  Ineeqqani attartortitsisup nammineq najugaata ilaanniittuni attartornermut akiliutit qaffanneqarnissaat qaammammik ataatsimut sioqqutsisumik ilisimatitsissuteqareernikkut pisassapput. Ineeqqanut allanut tunngatillugu qaammatinik pingasunik sioqqutsisumik ilisimatitsisoqartassaaq. Siumoortumik ilisimatitsissut allaganngorlugu saqqummiunneqassaaq.

 

Ataatsimut aalajangersakkat

 

  § 36.  §§ 30-35-mi maleruagassat attartortumut ajoqutaasumik isumaqatigiissuteqarnikkut sanioqqunneqarsinnaanngillat.

 

Kapitali 5
Qularnaveeqqusiissummik ineqarnermullu akiliummik akiliisarneq

 

  § 37.  Attartornerup aallartinnerani Namminersorlutik Oqartussat kommunellu inissiaataanni attartortittakkani attartortut qularnaveeqqusiissut, qaammatini pingasuni ineqarnermut akiliutissap annertoqataanik annertussusilerneqartoq attartortitsisumut tamakkerlugu akilissavaat. Attartortup attartornerup aallartinnerani qularnaveeqqusiissutissaq tamakkerlugu akilersinnaanngikkuniuk, attartortup akiligassaq qaammatinut aqqaneq-marlunnut angeqqatigiinnut aggorlugu qaammatikkaartumik akilersorsinnaavaa, tak. imm. 7.
  Imm. 2.  Akilersuinissamik isumaqatigiissuteqarnermi, tak. imm. 1, attartortoq isumaqatigiissutip pilersinneqarneranut akiliutitut 500 kr.-inik sullissinermut akiliisinneqassaaq, piffissallu akilersuiffiusup ingerlanerani qaammatit tamaasa 50 kr.-inik sullissinermut akiliisinneqartassalluni, taamaattorli tak. imm. 3. Attartortitsisup akileeqqusinermut sullissinermut akiliutitut 50 kr.-inik, taassumalu saniatigut akiitsut 1.000 kr.-it sinnerlugit amerlassuseqartut 2%-iinik akiliinissaq piumasarisinnaavaa, taamaattorli tak. imm. 3. Aningaasat koruuninut ilivitsunut qaninnernut ikilineqassapput. Sullissinermut akiliut attartortitsisumut tutsinneqartassaaq.
  Imm. 3.  Sullissinermi akiliutissanik akiilisitsiniartarneq, tak. imm. 2, inissarsiortunut, inoqutigiinni inissarsiortuni ukiumut isertitat akileraarutaasussat piffissami pineqartumi naatsorsorneqartut inissiani attartortittakkani ineqarnermut tapiissuteqartarneq pillugu Inatsisartut peqqussutaat nalunaarutillu tassunga attuumassuteqartut sukkulluunniit atuutsinneqartut naapertorlugit ineqarnermut tapiiffigineqarnissamut killissarititaasut inorlugit amerlassuseqarpata atuutsinneqassanngilaq.
  Imm. 4.  Eqqunngitsunik paasissutissiinerup kingunerisaanik qularnaveeqqusiissutigineqartussat tamakkerlutik ataatsikkut akiligassanngortinneqarsinnaapput.
  Imm. 5.  Attartortup attartukkaminik qimatsineranut atatillugu attartortitsisup qularnaveeqqusiissut immikkullu qularnaveeqqusiissut, tak. § 50, imm. 7, attartortumut piumasaqaatinut matusissutissatut atorsinnaavai.
  Imm. 6.  Naafferartumik akilersuinissamik isumaqatigiissuteqarsinnaatitaaneq attartortunut ukiut pingasut kingulliit iluanni attartorsimasaminni inigisamut aningaasartuutinut ingerlaavartunut akiliinngitsoortarnikkut sumiginnaasimasunut atuutinngilaq.
  Imm. 7.  Naalakkersuisut qularnaveeqqusiissuteqartarneq pillugu maleruagassiorsinnaapput.

 

  § 38.  Attartortoq pisussaavoq ineqarnermut, imermut kiassarnermullu akiligassanik, attartornermut isumaqatigiissummi aalajangersarneqartumi akiliinissamut piffissaq eqqorlugu akiliisassalluni.
  Imm. 2.  Attartornissamut isumaqatigiissummi allatut aalajangersagaqanngippat ineqarnermut, imermut kiassarnermullu qaammammi pineqartumi akiligassat qaammatip naanerani aningaaseriviit ulloq kingulleq ammasarfiini qaammammut siumoortumik akilerneqartassapput. Ineqarnermut, imermut, kiassarnermullu akiligassat qaammammut naatsorsorneqaratik piffissamut allamut akilerneqartussatut naatsorsorneqartut, aningaaseriviit ulloq kingulleq ammasarfiini piffissamut pineqartumut siumoortumik akilerneqartassapput. Piffissaagallartillugu akiliineq, ullormi akiliiffissatut kingullermi kingusinnerpaamik akiliisoqartassaaq.
  Imm. 3.  Attartortitsisoq akiliiffissamik akileeriaasissamillu innersuussissaaq. Aningaaserivikkut akiliineq akiliiffissatut innersuunneqartumut akiliinertut isigineqassaaq. Akiliiffissamik innersuussisoqarsimanngippat ineqarnermut akiliut attartortitsisup niuernermik ingerlataqarfianut imaluunniit attartortitsisoq avataaniit aqutsisumik atuippat, taassuma niuernikkut ingerlataqarfianut akilerneqassaaq.

 

  § 39.  Attartornermik taamaatitsitsinermi imaluunniit piffissami aalajangersimasumi attartortitsinerup naanerani attartortoq pisussaavoq, attartornerup attartornissamik isumaqatigiissut naapertorlugu naanissaata tungaanut piffissaq eqqorlugu ineqarnermut akiliissassalluni, tak. §§ 70 aamma 71.

 

  § 40.  Inissianik namminersortunit pigineqartunik attartortitsinermi qularnaveeqqusiissutit siumoortumillu ineqarnermut akiliutit qaammatini arfinilinni attartornerup nalinga sinnerlugu amerlassuseqassanngillat.
  Imm. 2.  Imm. 1 attartortumut ajoqutaasumik sanioqqunneqarsinnaanngilaq.

 

Kapitali 6
Imermut, kiassarnermut il.il. akiliisarneq

 

  § 41.  Attartortitsisoq kiassanermik imermillu kissartumik attartortumut pilersuisuuguni, attartortitsisup attartortup kiassarnermut imermullu kissartumut atugaanut aningaasartuutini, kiisalu attartortup inini ataatsimoorfiusuni assigisaanniluunniit kiassarnermut imermullu aningaasartuutinut akileeqataassutissai attartortumut akiligassiissutigisinnavai. Tamakkununnga aningaasartuutit ineqarnermut akiliummut ilaatinneqarsinnaanngillat, ukiumoortumilli kiassarnermut naatsorsuutit immikkut ittut, attartortitsisup suliarineqartut aqqutigalugit akilerneqassallutik. Ukiumoortumik kiassarnermut naatsorsuuteqarfiusumi qaammatisiutit ukiuat malinneqaassaaq.
  Imm. 2.  Attartortup aningaasartuutinut akileeqataasutissatut matusissutissaannut attartortoq qaammatikkaartumik akiliutaagallartunik akiliisinneqartassaaq. Attartortup akiligassaa attartornermini akiligassatut pisussaaffiuvoq, aammalu ineqarnermut akiliummut ilanngullugu akiligassiissutigineqartassalluni, tak. § 38.
  Imm. 3.  Attartortitsisoq kiassarnermut naatsorsuusiornerminut atatillugu allaffissornikkut aqutsinermut akiligassanik akiliisitsisinnaavoq.
  Imm. 4.  Naalakkersuisut kiassarnermut naatsorsuusiorneq, aningaasartuutit attartortunut agguarneqartarnerat, akiliisarneq aamma kiassarnermut akiliutissat iluarsiivigineqartarnerat pillugit maleruagassiorsinnaapput.

 

  § 42.  Attartortitsisup illuummi ukiumi kiassarnermut naatsorsuuteqarfiusumi kiassarnermut imermillu kissartumik pilersuinermut aningaasartuutit pillugit kiassarnermut naatsorsuutit, sumiiffimmut attartortitsisup nammineerluni toqqagaanut kingusinnerpaamik apriilip ulluisa 30-anni saqqummiutissavai.
  Imm. 2.  Ulloq imm. 1-imi aalajangerneqartoq taanna nallertinnagu naatsorsuutit saqqummiunneqanngippata, attartortitsisup akiliutaagallartut saniatigut akiligassanik akiliisitsiniarsinnaatitaanini annaassavaa.
  Imm. 3.  Naatsorsuutit kingusinnerpaamik juunip ulluisa 30-anni saqqummiunneqanngippata, attartortup naatsorsuutit inaarutaasut malillugit pisassami akilerneqarnissaasa tungaanut, Kalaallit Nunaanni aningaaserivimmi uninngasuutinut erniat sukkulluunniit qaffasinnerpaatinneqartut annertoqataannik ernialersussallugit pisinnaatitaavoq. Attartortup pisassaasa ernialersorneqarnerat aallarissaaq juunip ulluisa 15-anni, attartortup pisassaqarnera ulloq taanna allakkatigut attartortumut nalunaarutip nassiunneqartussaaffia aallarnerfigalugu.
  Imm. 4.  Kingusinnerpaamik juunip ulluisa 15-anni akileriikkat saniatigut akiligassat imaluunniit utertitassat pillugit allakkatigut nalunaarutit attartortumut nassiunneqarsimassapput. Nalunaarut attartortup imm. 6 naapertorlugu akerliliisinnaanera pillugu paasissutissanik imaqassaaq.
  Imm. 5.  Imm. 4 naapertorlugu allakkatigut nalunaarut kingusinnerpaamik juunip ulluisa 15-anni nassiunneqarsimanngippat, attartortoq akiligassat saniatigut akiliisinniarneqarsinnaanngilaq.
  Imm. 6.  Attartortup naatsorsuutinut akerliliissutaa allakkatigut attartortitsisumut saqqummiunneqassaaq, kingusinnerpaamillu aggustip ulluisa aallaqqaataanni attartortumut nassiunneqarsimassalluni. Akerliliissut naatsorsuutini immikkoortut suut akuerineqannginnersut pillugit paasissutissanik imaqassaaq.

 

  § 43.  § 42, imm. 4-mi piffissarititaasup naanerani avataanit pilersuisunit kiassarnermut naatsorsuutinut naammassisunut akiligassanik siumut naatsorsuutigeriinngisanik tigusaqartoqarpat, attartortitsisup akiligassat immikkut ittumik iliuuseqarluni kiassarnermut naatsorsuutinut tulliuttunut nuussinnaavai. Attartortitsisoq akiligassat nuunneqartut annertussusiat pillugu attartortunut ilisimatitsissuteqassaaq.
  Imm. 2.  Aningaasartuutit attartortut akornanni kukkusumik agguarneqarsimappata, attartortitsisup kukkuneq erngerluni iluarsissavaa, tamannalu pillugu attartortunut kalluarneqartunut allakkatigut ilisimatitsissuteqassalluni, tak. imm. 3 aamma 4.
  Imm. 3.  Attartortoq akiligassiissutaagallartunut akiliinikippallaarsimappat, attartortitsisoq akiligassanut ilassutissanik siusinnerpaamik attartornermut akiliutinik akiliiffissami siullermi, imm. 2 naapertorlugu qaammammi attartortup nalunaarummik tigusaqarfianut tulliuttumi akiliisoqarnissaanik piumasaqarsinnaavoq. Ilassutissatulli akiligassat qaammatini pingasuni kiassarnermut siumoortumik akiliutaagallartunit amerlaneruppata, attartortoq pisinnaatitaavoq akiligassat qaammatikkaartumik akiligassatut pingasunut annertoqatigiinnik annertussusilerlugit agguarlugit akilissallugit.
  Imm. 4.  Attartortoq akiligassiissutaagallartunut akiliivallaarsimappat, imm. 2 naapertorlugu nalunaaruteqarnerup kingorna akiliivallaarutit attartortumut aningaasanngorlugit akilerneqassapput, imaluunniit attartornermut akiligassanit siullernit ilanngaatigineqassallutik.
  Imm. 5.  §§ 41 - 43-mi maleruagassat attartortumut ajoqutaasumik isumaqatigiissuteqarnikkut sanioqqunneqarsinnaanngillat.

 

  § 44.  Pilersuinermik ingerlatseqatigiiffiusoq illuatungeriit isumaqatigiissuteqarnerat tunngavigalugu attartortunut imermik pilersuisuuppat, akileeqqusissut akilikkallu pilersuinermik ingerlatseqatigiiffiusup attartortullu akornanni toqqaannartumik naammassineqassapput. Akileeqqusissutit akilikkallu pilersuinermik ingerlatseqatigiiffiusup piumasaqaatai nalinginnaasut naapertorlugit ingerlanneqassapput.
  Imm. 2.  Attartortitsisoq attartortumut imermik pilersuisuuppat, attartortitsisoq tamatumunnga aningaasartuutini matussusertinniarlugit piumasaqarsinnaavoq. Attartortitsisup attartortoq attartortitsisup imermut aningaasartuutaanut matusissutissanik akiliutaagallartussanik akileeqqussavaa. Akiliutaagallartussat qaammammut ataasiarluni immikkoortillugit ineqarnermut akiliutissat nassiunneqarnerinut ilanngullugit akilersinniarneqartassapput.
  Imm. 3.  Illuummi inissiat immikkut naatsorsuinermut uuttuusersugaanngippata, illummi imeq atorneqartoq tamakkiisoq attartukkat ataasiakkaat angissusaat naapertorlugu agguarneqassaaq. Imermut naatsorsuusiornermi attartortitsisoq attartukkamut ataatsimut akiliisitsisinnaavoq, akiliutissarlu 275 kr.-init annertunerussanngilaq. Imermut naatsorsuutit najugaqatigiiffimmi illuutip inissisimaffigisaani ukioq naatsorsuusiorfiusoq malissavaat.
  Imm. 4.  Illuummi attartukkat ataasiakkaat immikkut naatsorsuinermut uuttuusersugaappata, uuttuutit ataasiakkaat aningaasartuutinut matussusiissutissanik akiliisitsiniarnissaq imaluunniit akiliutaagallartunut akiliivallaarutinik utertitsinissaq siunertaralugu ukiumut ataasiarlutik atuarneqartassapput. Tamannattaaq attartortup inissiamut iserterneranut aamma inissiamit anineranut atuutsinneqarpoq. Akiligassani attartortumut nassiunneqartuni ilaatinneqartussat tassaapput piffissami imermut uuttuut malillugu imermik atuinerup annertussuserpiaa 5 %-inik ilaqartinneqartoq, atuaanermut akiliut 175 kr.-init annertunerutinneqartussaanngitsoq, kiisalu uuttuummik attartorneq uuttuummut ataatsimut qaammammut 10 kr.-inik annertussusilerneqartoq.
  Imm. 5.  Attartortup attartortitsisumut isumaqatigiissuteqareeragut nammineerluni imermut uuttuumik atuaalluni tamatuma inerneranik attartortitsisumut nalunaaruteqartarpat, attartortoq atuaanermut akiliummik 50 kr.-it sinnernagit annertussuseqartumik akiliisinneqartassaaq. Akiliutaagallartunut akiliivallaarutit attartortumut utertinneqartassapput, aammalu akiliutaagallartunut akiliinikippallaarutit attartortumut ilassutitut akiligassanngortinneqartassapput. Ilassutitut akiligassat qaammatini pingasuni imermut akiliutaagallartunit annertuneruppata, attartortoq pisinnaatigaavoq akiligassat qaammatikkaartumik akiligassatut annertoqatigiinnut pingasunut agguarlugit akilersussallugit.
  Imm. 6.  Naalakkersuisut atuaasarneq imermullu atukkamut akiliisitsisarneq, kiisalu imermut naatsorsuusiortarneq pillugu sukumiisunik maleruagassiorsinnaapput.

 

Kapitali 7
Aserfallatsaaliuineq, iluarsaassineq atuinerlu

 

  § 45. Namminersorlutik Oqartussat kommunillu inissiaataanni attartortittakkani illuutit attartortitallu isumannaatsumik aserfallatsaaliorneqarnissaasa isumagineqarnissaa attartortitsisup pisussaaffigaa.
  Imm. 2.  Avammut kuuffinnut, kiassarnermut, innaallagissamut, gassimut imermullu teknikikkut atortulersuutit tamarmik pitsaasuutinneqassapput atorsinnaasuutinneqassallutillu. Taamatuttaaq innaallagissamut ikkuffiit, iikiussat, matserfiit, kiassaatit, ruujorit, sikaaviit alaakkaasut, illup iluani atortut il.il. aserfallatsaalissallugit attartortitsisup pisussaaffigai. Nungullarnikkut pisoqalinikkullu ajorseriaatsit kingunerisaannik ima akulikitsigisumik isumagineqartassapput nutarterinerit iluarsaassinerillu illuutit attartorneqartullu pissusissaat eqqarsaatigalugit pisariaqartitsinerit malillugit suliarineqartassallutik.
  Imm. 3.  Piffissami attartorfiusumi attartortup inissiami qilaat qalipallugit qaqorsarnissaat, iikkat qalipannissaat aamma/imaluunniit ungalitsersorneqarnissaat kiisalu natit lakkernissaat akisussaaffigaa taakkununngalu aningaasartuutit akilissallugit.

 

  § 46.  Inuinnaat inissianik attartortitsineranni attartortoq attartortitsisorlu allanik isumaqatigiissuteqarsimanngippata § 45-mi allassimasut atorneqassapput.

 

  § 47.  Attartortitsisup attartorneqartoq piffissamit attartornissap aallartiffissaaniit pitsaasumik isumannaatasumillu pitsaassuseqartillugu attartortumut atugassanngortissavaa. Iikkat, qilaat naqqillu nalinginnaasumik iluarsaanneqarsimassapput, tak. § 77, imm. 1. Attartugassaq eqqiarneqarsimassaaq uumasuaraqassananilu, igalaat, sikaaviit matui aamma matut ilivitsuussapput atorsinnaasunillu paarnaarsaateqassallutik. Kiisalu matut silarliit tamarmik immikkut marlunnik matuersaateqassapput, teknikikkullu atortulersuutit ajoquteqassanatik.
  Imm. 2.  Inissiamut iserternissamut atatillugu attartortitsisup attartortoq taannaluunniit sinnerlugu takkuttoq ilagalugu inissiaq takuniassavaat inissiamullu iserternermut nalunaarusiussallutik, taassumalu assilineranik attartortoq tunineqassaaq, taamaattorli tak. imm. 5. Takuniaanermi amigaatit malugineqartut inissiamut iserternermut nalunaarusiamut ilanngunneqassapput.
  Imm. 3.  Amigaatit allat, attartortup inissiamut iserternermi kingorna tigusinermut atatillugu tikkuarsutai inissiamut iserternermiit sapaatit akunneri marluk qaangiutsinnagit allakkatigut attartortitsisumut nalunaarutigineqassapput. Amigaatilli nalinginnaasumik misissuinermi takuneqarsinnaasimanngippata imaluunniit attartortitsisoq peqquserlussimappat tamanna atuutissanngilaq.
  Imm. 4.  Imm. 2-mi aamma 3-mi maleruagassat attartortumut ajoqutaasumik isumaqatigiissuteqarnikkut sanioqqunneqarsinnaanngillat.
  Imm. 5.  Inissiamut iserternissamut atatillugu misissuinissamut aningaasartuutissat annertuallaarpata, inissiamut iserternissamut atatillugu takuniaaneq pinngitsoorneqarsinnaavoq.

 

  § 48.  Attartortup attartorneqartoq isumannaatsumik paarissavaa, ajoqusikkanullu attartortup nammineq, attartortup inoqutaasa allalluunniit attartortup attartorneqartumut isersinnaatitaasa isumannanngitsumik pissusilersornerisigut ajoqusersimasaannut taarsiinissamut attartortoq akisussaavoq. Takusaanermi paarsinerluttoqarsimasoq paasineqarpat, attartortitsisup tamanna piumasarippagu attartortup ingerlaannartumik ajoqusikkat iluarsaatissavai.
  Imm. 2.  Attartortup attartortitsisoq akuersiseqqaarnagu inissiaq isumaqatigiissutigineqartumit allaanerusumik atussanngilaa.
  Imm. 3.  Inissiami ineeqqanik ataasiakkaanik inisimasunut allanut attartortitsinerup saniatigut, attartortup attartortitsisoq akuersiseqqaarnagu inoqutigisami saniatigut allanut attartorneqartoq atugassanngortissanngilaa, taamaattorli tak. § 58.
  Imm. 4.  Ineeqqanik attartortut attartortitsisoq akuersiteqqaarnagu ineeqamik atuinernik allanut tunniussinnaanngilaat.
  Imm. 5.  Attartortup attartortitsisoq pisariaqartinneqartumik isumaqatigiissuteqarfigeqqaartinnagu inissiaq piffissaanngitsukkut qimassanngilaa.

 

  § 49.  Attartortup pissutissaqavinngikkuni attartortitsisoq inissiamik inatsisinik unioqqutitsilluni atuisoqarnersoq imaluunniit aserfallatsaaliinerup qanoq issusianik paasiniaalluni, iluarsaassisoqassatillugu imaluunniit allanut attartortitsisoqassatillugu inissiamik misissuiniarpat inissiamut isernissaanik itigartissinnaanngilaa.
  Imm. 2.  Attartortitsisoq sapaatit akunnerinik arfinilinnik siumut ilisimatitsereernermigut attartukkami suliassanik aallartitsisinnaavoq, suliat ingerlanneqarnissaat attartortumut annertuumik akornutaassanngippata. Sulianik allanik aallartitsisoqartinnagu attartortoq qaammatinik pingasunik siumut ilisimatitsereertussaavoq. Taamaattorli attartortitsisoq tamatigut suliassanik kinguartinneqarsinnaanngitsunik siumut ilisimatitseqqaarani iluarsaassisinnaavoq.
  Imm. 3.  Suliat suugaluartulluunniit attartortitsisumit aallartinneqartut unitsinneqaratik attartortumullu sapinngisamik annertunerpaamik mianerinnilluni suliarineqartassapput. Attartortitsisoq ingerlaannartumik suliat malitsigisaanik iluarsaassissaaq.

 

  § 50.  Attartortup taassumalu inoqutaasa kiisalu inuit attartortumit attartorneqartumut isersinnaatitaasut illumi torersaarnissamut maleruagassat, ilanngussaq 4-mi taaneqartut maleruassavaat.
  Imm. 2. Najugaqatigiiffimmi siulersuisut torersaarnissamut maleruagassanut ilassutaasunik aalajangersaasinnaapput, taakkulu attartortitsisumit akuerineqarnerminni atuutsinneqalissapput.
 Imm. 3.  Namminersorlutik Oqartussat aamma kommunit inissiaataanni attartortittakkani uumasuuteqarnissaq akuerisaavoq, taamaattoq takukkit imm. 4-7.
  Imm. 4.  Imm. 3 apeqqutaatinnagu, taamaattoq najugaqatigiiffimmi pineqartumi uumasuuteqarneq akuerisaassanngitsoq, najugaqatigiiffimmi siulersuisut aalajangersinnaapput.
  Imm. 5.  Ilanngussaq 4 naapertorlugu uumasuuteqarneq pillugu torersaarnissamut maleruagassani piumasaqaatit sukkulluunniit naammassineqarsimassapput. 
  Imm. 6.  Uumasuuteqalernermi attartortoq qaammatini pingasuni ineqarnermut akiliutip annertoqqataanik immikkut qularnaveeqqusiissaaq. Attartortup uumasuuteqalernermi qularnaveeqqusiussassaq attartortitsisumut aningaasanngorlugu akilissavaa. Uumasuutigineqartoq toquppat imaluunniit attartortoq allatut uumasuuteqarunnaarpat, attartortitsisoq illuutip attartorneqartup misissoreernerani aalajangersinnaavoq, attartortup qularnaveeqqusiussaasa uninngatinnissaannut piumasaqaatit atuukkunnaassasut aammalu aningaasat tamakkiisumik ilaannaasumilluunniit utertillugit tunniullugit. 
  Imm. 7.  Imm. 6-imi qularnaveeqqusiussatut akiliutigineqartut, ajoqusiinernut uumasuuteqarnermit pilersinneqartunut matussutissatut, attartortitsisup atorsinnaavai.

 

Kapitali 8
Attartortup attartukkamik atuisinnaaneranik piginnaatitaaffii

 

  § 51.  Namminersorlutik Oqartussat imaluunniit kommunet inissiaataanni attartortittakkani attartortoq siumoortumik attartortitsisoq akuersiteqqaarlugu nammineq akilikkaminik attartukkami atortulersuutinik nalinginnaasunik ikkussuinissamut pisinnaatitaavoq, tamatumani attartortitsisup illuutip innaallagissamut kuuffinnullu atortuisa pisinnaasai atortulersuutinut naammanngitsut qularnaarsimanngippagu.
  Imm. 2.  Attartortitsisoq piumasaqarsinnaavoq attartortoq inissiamit nuunnermini iluarseeqqissasoq imaluunniit atortulersuutit attartortitsisumit tiguneqassasut.
  Imm. 3.  Attartortitsisoq piumasaqarsinnaavoq attartortoq atortulersuusersuinerup iluarseqqinnissaanut sillimmatissatut naammaginartunik annertussusilinnik qularnaveeqqusiissasoq.

 

  § 52.  Namminersorlutik Oqartussat kommunellu inissiaataanni attartortittakkani attartortut kommunemi najukkamilu pilersaarutit ataqqillugit ataasiakkaarlutik imaluunniit ataatsimoorlutik illumi attartortitsisup innersuussineratigut radiop TV-llu aallakaatitaannik tigooqqaanissamut radiomut fjernsynimulluunniit antenniliisinnaatitaapput, taamaattorli tak. imm. 2. Taamatuttaaq attartortut illumi radiup TV-llu aallakaatitaannik isiginnaarnissamut kabelikkut attaviliisinnaatitaapput, najugaqarfimmi TV-mut kabelinut attaviliinissaq periarfissaqarpat.
  Imm. 2.  Imm. 1 malillugu attartortut pisinnaatitaaffiat atuutissanngilaq, ikkussineq illumut najugaqartuinullu allanut akornutaassasoq attartortitsisup uppernarsarsinnaappagu. Kiisalu pisinnaatitaaneq atuutissanngilaq attartortitsisup ataatsimoorussamik TV-kkut isiginnaagassanik pilersuinera aqqutigalugu imaluunniit attartortut arlaata antenniliussaa ataatsimoorussaasinnaasoq aqqutigalugu attartortut kissaatigisaminnik isiginnaarsinnaappata.
  Imm. 3.  Attartortut illumi antenneliinnginneranni attartortitsisoq taamaaliornissamut allakkatigut akuersissuteqassaaq, attartortitsisullu tassunga atatillugu piumasarisinnaavaa attartortut allamut nuuttoqarnerani pissusaatut pilersitseqqissasut aamma attartortut atortut peerneqareerpata illumik pissusaatut pilersitseqqinnissamut qulakkeerutaasunik naammaginartunik qularnaveeqqutissanik akiliissasut.
  Imm. 4.  Immikkut imaluunniit ataatsimut antenniliussat, tak. imm. 1, ingerlanneqarnerat attartortitsisumit susassarineqanngilaq.

 

  § 53. Namminersorlutik Oqartussat inissiaataanni attartortittakkami attartortoq attartortitsisoq siumut allakkatigut akuersissuteqarteqqaarlugu inunnik isumaginninnermi inatsisini aalajangersakkat malillugit iluaqusersuutinik ikkussuisinnaatitaavoq. Attartortitsisup attartortoq attartukkaminik qimatsinermini inissiap pissusiatut pilersitseqqinnissaa aamma kommunalbestyrelsi inissiap pissusaatut pilersitseqqinnermut aningaasartuutit akilerneqarnissaannut qularnaveeqqusiinissaa piumasaqaatigisinnaavaa. Attartortup attartortitsisoq iluaqusersuutit ikkussuunneqannginneranni kingusinnerpaamik sapaatit akunnerinik arfinilinnik sioqqutsilluni ilisimatitsissuteqarfigissavaa. 

 

  § 54.  Namminersorlutik Oqartussat kommunelluunniit inissiaataanni attartortittakkami attartortoq ajoqusikkanut, attartortut ataasiakkaat §§ 51 aamma 52 malillugit ikkussuussimasaannik pissuteqartunut taarsiinissamut akisussaavoq. 
  Imm. 2.  Attartortup taarsiisussaatitaanera iluarseeqqinnermi imaluunniit attartortitsisup atortulersuutinik tigusinerani atorunnaassaaq.

 

  § 55.  Namminersorlutik Oqartussat kommunelluunniit inissiaataanni attartortittakkami attartortoq attartortitsisumit siumut allaganngorlugu akuersissummik peqqaarluni inissiami silataanilu erseqqissumik aalajangikkanik pitsanngorsaasinnaatitaavoq il.il., inissiamiillu nuunnermini aningaasartuutigisimasani uppernarsaaserneqartut aningaasanngorlugit taarsertinnissaannut pisinnaatitaalluni, tak. §§ 56 aamma 57. 
  Imm. 2.  Attartortoq attartortitsisumit akuerineqarani attartukkamik allanngortiterisimappat, attartortoq attartortitsisumut tamanna pillugu taarsiissuteqarnissamut akisussaatinneqassaaq.

 

  § 56.  Ajunngitsorsiassat attartortup inissiamik qimatsinerani attartortitsisumit akilerneqassapput. Attartortitsisoq attartortup ajunngitsorsiassaanik attartortup attartortitsisumut pisussaaffiinit ilanngaassisinnaavoq. Ajunngitsorsiassat attartortup pitsangorsaaneraniit qaammatit 100-t ingerlaneranni assigiimmik annertussusilinnik agguakkamik nalikilliartuaartinneqassapput.
  Imm. 2.  Attartortumik nutaamik inissiamut, attartortup siulliup pitsanngorsaavigisimasaanut il.il. nuuttoqartillugu, attartortitsisup ajunngitsorsiassatut aningaasartuutigisimasani matussutissiiviginiarlugit ineqarnermut akiliut qaffaassavaa. Akiliutip qaffaataa unitsinneqassaaq nalikillisitsiartuaarneq naammassippat, tak. imm. 1.

 

  § 57.  Naalakkersuisut attartortup pitsanngorsaavigisinnaasai suliarisinnaasaalu allat, naatsorsuisarneq ajunngitsorsiassanullu akiliisarneq pillugu sukumiinerusunik maleruagassiorsinnaapput. 
  Imm. 2.  Attartortitsisoq §§ 51 aamma 55 naapertorlugit qinnuteqaatinik suliarinninnerminut sullissinermut akiliuteqartoqarnissaanik piumasaqarsinnaavoq. Naalakkersuisuniit sullissinermut akiliutip annertussusissaa aalajangerneqassaaq. Sullissinermut akiliutissaq qinnuteqaatip tunniunneqarnerani akilerneqassaaq.

 

Kapitali 9
Atuisinnaatitaanerup allamut nuunneqarnera

 

  § 58.  Attartortup attartornissamik isumaqatigiissut maleruarsimaguniuk, attartortoq inigisaminik qimatsisimagallarnermini inigisaminik qaammatit aqqaneq-marluk tikillugit allamut attartortitsigallarnissamut pisinnaatitaavoq. Allamut attartortisigallarneq qaammatinit pingasunit sivikinnerutinneqarsinnaanngilaq. Attartortup inigisaminik allamut attartortitsigallarnera ukiut tallimat ingerlanerini taamaallaat katillugit qaammatini aqqaneq-marlunni pisinnaavoq, taamaattorli tak. imm. 2.
  Imm. 2.  Imm. 1-imi piffissamut killiliussaq apeqqutaatinnagu attartortup inigisaminik allamut attartortitsigallarnissaq qinnutigisinnaavaa, attartortup peqannginnissaa peqanngikkallarnerusimappat, aammalu nappaammik, ilinniagaqarnermik, pineqaatissinneqarsimasunut inissiisarfimmiinnermik imaluunniit attartortoq nammineerluni imaluunniit inoqutaasa ilaat nuukkallartitaaneranik tamanna pissuteqarpat. Allamut attartortisigallarneq qaammatinit pingasunit sivikinnerutinneqarsinnaanngilaq.
  Imm. 3.  Attartortitsisup allamut attartortitsigallarnissaq akueriumanngissinnaavaa,
1)  inissiaq innersuunneqarsimappat, tak. § 5, imm. 1, nr. 7,
2)  inissiami ineqartussat katillutik ininit amerlanerusussaassappata, imaluunniit
3)  attartortitsisoq allamut attartortitsigallarnissamut akerliunissamut naammaginartunik pissutissaqarpat.
  Imm. 4. Namminersorlutik Oqartussat kommuunillu inissiaataanni attartortittakkani najugaqartut inigisaminnik allamut attartortitsigallarnissamut taarsiullugu pisinnaatitaapput, piffissap peqarfiginngisassamik naanerani inissiamut allamut innersuunneqarnissamut qularnaveeqqusiivigineqarsinnaagunik attartornerminnik unitsitsinissamut, tak. § 5, imm. 1, nr. 3.
  Imm. 5.  Allamut attartortitsigallarnissap akuerineqarnissaanut piumasaqaataavoq, ineqarnermut akiligassap annerpaamik attartortup ineqarnermut, kiassarnermut, innaallagissamut, imermut il.il. aningaasartuutigisartagaasa amerlaqataannik annertussuseqarnissaa. Immikkut ittunik pissutissaqartillugu, soorlu pequtit attartorallarnermut ilaatinneqassappata akiliutissaq anginerutinneqarsinnaavoq. Attartorallakkamik attartorallartoq attartortitsisumut toqqaannartumik ineqarnermut akiliutissamik akiliisassaaq.
  Imm. 6.  Attartortoq pisinnaatitaavoq attartukkaminik utoqqiisaasumik allamit attartorallartumit qularnaveeqqusiissummik akiliisitsissalluni, attartukkamik utaqqiisaasumik attartorallartinneqartup attartortup pisussaaffiinut sillimmatissanik. Qularnaveeqqusiissut aamma inissiamik attartornermut siumoortumik akiliutit katillugit annerpaamik qaammatini arfinilinni attartornermut akiliutit amerlaqatigissavaat.
  Imm. 7.  Attartortitsisup attartukkamik attartorallarneq § 75-imi maleruagassat malillugit taamaatitsissinnaavaa.
  Imm. 8.  Naalakkersuisut attartukkamik attartortitsigallarneq ineqarnermullu qularnaveeqqusiissut pillugit maleruagassiorsinnaapput. 

 

  § 59.  Namminersorlutik Oqartussat kommunelluunniit inissiaataanni attartortittakkani attartortut nammineq kissaatigalugu nuunnissamut allattuiffimmut allatsissinnaapput. 
  Imm. 2.  Attartortut iniminnik paarlaateqatigiinnissartik namminneerlutik isumaqatigiissutigisimappassuk, tamanna nuunnissamik kissaateqartut allattorsimaffiannut allatsinngikkaluarluni pisinnaavoq.
  Imm. 3.  Attartortut iniminnik paarlaateqatigiinnissamut kissaateqartut tamarmik attartornermut isumaqatigiissutinik maleruaasimanissaat piumasaqaataavoq. Inigisanik paarlaateqatigiinnermi attartornermut ataatsimut 250 kr.-inik sullissinermut akiliisitsisoqartarpoq.
  Imm. 4.  Attartortut inigisaminnik paarlaateqatigiissinnaapput imaaliorlutik:
1)  Isumaqatigiissuteqarlutik attartornermut isumaqatigiissutertik paarlaallutik ingerlatiinnarumallugit. Inigisamik paarlaateqatigiinneq aatsaat pisinnaavoq, attartortut marluk tamarmik kingusinnerpaamik qaammatit 36-it paarlaateqatigiinnissamut qinnuteqaat sioqqullugu attartornermut isumaqatigiissuteqarsimagunik. Attartortut pisinnaatitaaffitik pisussaatitaaffitillu aammalu attartornissamik isumaqatigiissutitik paarlaatissavaat. Attartortut qularnaveeqqutissatut akiligaat assigiinngippata, tamanna attartortitsisumit susassarineqanngilaq. Attartortitsisup attartortut pisinnaatitaaffimminnik pisussaaffimminnillu paarlaannerisa attartortut inatsisitigut inissisimanerinut sunniutissai pillugit ilitsersuutissavai.
2)  Inissiat paarlaateqatigiinnermi nalinginnaasumik iluarsaanneqarnissaat imaluunniit nalinginnaasumik iluarsaanneqarsimanissaat isumaqatigiissutigigalugu. Attartortitsisoq inissianik attartornermut peqqussut sukkulluunniit atuuttoq naapertorlugu attartornissamik isumaqatigiissut nutaaq sanassavaa. Attartortut allakkatigut uppernarsassavaat inissiamut iserternissamut atatillugu attartugassap nutaap nalinginnaasumik iluarsaanneqarnissaa namminneerlutik isumagissinnaallugu. Taamaattumik inissiat taakku nuunnerup nalaani §§ 77-imut aamma 78-mut tunngatillugu iserternerup nalaani nalinginnaasumik iluarsaanneqarsimasutut isigineqassapput.
  Imm. 5.  Imm. 4, nr. 2 naapertorlugu inissianik paarlaateqatigiinnermi attartortitsisup attartortup attartugassamini nutaami nammineerluni nalinginnaasumik iluarsaassinissamik kissaateqarnera itigartissinnaavaa, nalinginnaasumik iluarsaassinermit kingullermiit ukiut tallimat sinnerlugit qaangiussimappata.
  Imm. 6.  Imm. 4, nr. 2 naapertorlugu nalinginnaasumik iluarsaassinermut atatillugu inissiat paarlaateqatigiinnermi pineqartut nalinginnaasumik iluarsaassinerup nalaani inigineqarnerat pissutigalugu saniatigut aningaasartuuteqartoqassappat, saniatigut aningaasartuutit attartortumit qimatsisussamit akilerneqassapput.
  Imm. 7.  Atorfeqarnermut atasumik inissianik attartortut attartortitsisoq akuersiteqqaartinnagu inissianik paarlaasseqatigiissinnaanngilat.
  Imm. 8.  Namminerisamik kissaateqarluni nuussinnaaneq aamma inigisamik paarlaasseqatigiissinnaaneq pillugit Naalakkersuisut maleruagassanik erseqqinnerusunik aalajangersaasinnaapput.

 

  § 60.  Attartortup toqunerani aappaasoq, aappaasutut nalunaarsorsimasoq imaluunniit inooqataasoq, maannamut atugassarititaasut naapertorlugit attartortunngornissamut pisinnaatitaaffeqarpoq. Inuk, attartortup aappariinnermut assingusumik inooqatigisaa inooqataasutut isigineqarpoq. Taamatuttaaq inuk, attartornermut isumaqatigiissummut atsioqataanngitsoq, kisiannili sivikinnerpaamik qaammatini arfinilinni attartortumut inoqutaasutut najugaqateqartoq inuillu allattorsimaffianni nalunaarsorsimasoq pisinnaatitaaffeqarpoq, taamaattorli tak. § 63, imm. 3.
  Imm. 2.  Taamatuttaaq imm. 1 attartortup qitornaanut 18-it sinnerlugit ukiulinnut atuutissaaq. Qitornaq illoqarfimmi allami ilinniakkaminik naammassinnereerluni imaluunniit unitsitsereerluni attartukkami najugaqartutut inuit allattorsimaffiannut nalunaarsorneqarpat, piffissaq ilinniarfiusoq imm. 1 naapertorlugu naatsorsuinermut ilanngunneqassaaq. Qitornat angerlarsimaffimmi najugaqartut arlallit attartortunngornissamik kissaateqarpata, qitornaq, attartortup toqunissaa sioqqullugu sivisunerpaamik attartortumut inoqutaasutut najugaqateqarsimasoq inuillu allattorsimaffianni nalunaarsorsimasoq salliutinneqassaaq.
  Imm. 3.  Sulisunut inissiaq, attartortup pisortani sulisitsisuni atorfeqarnera aqqutigalugu innersuunneqarsimasoq tassani pineqarpat, attartortumut aappaasoq, aappaasutut nalunaarsorsimasoq, inooqataasoq inuillu allat imm. 1-imi taaneqartut attartornermut atugassarititaasut nalinginnaasut naapertorlugit inissiamut innersuunneqarnissamut pisinnaatitaapput, taamaattorli tak. § 63, imm. 2-3. Attartortumut aappaasup, aappaatut nalunaarsorsimasup, inooqataasup, inuillu allat, imm. 1-imi taaneqartut namminneerlutik pisortani sulisitsisumi atorfeqarnertik aqqutigalugu sulisunut inissiamut innersuunneqarnissamut pisinnaatitaaffeqannginnissaat piumasarineqarpoq.
  Imm. 4.  Attartortoq ukioqqortussutsini imaluunniit napparsimanini pissutigalugu utoqqaat illuannut assigisaanulluunniit nuuppat, imm. 1-3-imi aalajangersakkat taamaaqataanik atuutissapput.

 

  § 61.  Attartortup averusernerani avinneraniluunniit imaluunniit aappariinneriinnerup atorunnaarsinneqarnerani aappariinni arlaat attartornerup ingerlateqqinnissaanut pisinnaatitaassanersoq aappariit isumaqatigiissutigisinnaavaat. Aappariit isumaqatigiissinnaanngippata aappariinni arlaat attartornerup ingerlateqqinnissanut pisinnaatitaassanersoq akuersissuteqarnikkut imaluunniit eqqartuussinermi aalajangiinikkut tamanna aalajangiiffigineqassaaq, taamaattorli tak. § 63, imm. 4.
  Imm. 2.  Attartortup aappani qimappagu, aappaasup attartorneq ingerlatiinnarsinnaavaa.
  Imm. 3.  Eqqartuussinermi aalajangiinikkut attartornermik ingerlatitseqqinnissamut pisinnaatitaaffik aalajangiiffigineqarpat, pingaartumik meeqqat suli inersimasutut oqartussaassuseqalersimanngitsut immikkut pingaartillugit isiginiarneqassapput, averuserneq avinnerluunniit persuttaanermik imaluunniit timikkut allatigut nakuuserfigineqarsimanermik pinerluttulerinermut inatsimmi ilaatinneqartumik peqquteqarnersoq isiginiarneqassalluni.

 

  § 62.  Inuit sivikinnerpaamik ukiuni marlunni ataatsimut inoqutigiissimasut inooqatigiinnerminnik taamaatitsigunik, arlamik sorliup attartorneq ingerlatiinnarsinnaassaneraa isumaqatigiissutigisinnaavaat. Attartortitsisoq isumaqatigiissummut akerliusinnaavoq, attartortitsisoq taamaaliornissamut pingaarutilinnik pissutissaqaruni, taamaattorli tak. § 63, imm. 4.
  Imm. 2.  Pineqartut akornanni isumaqatigiittoqarsinnaanngippat, taakku arlaat inissiamik attartornerup ingerlateqqinnissaanut pisinnaatitaassanersoq eqqartuussinikkut aalajangiisoqassaaq. Eqqartuussinermi aalajangiinermi pingaartumik meeqqat suli inersimasutut oqaartussaassuseqalersimanngitsut immikkut pingaartillugit isiginiarneqassapput, kiisalu aamma averuserneq avinnerluunniit persuttaanermik imaluunniit timikkut allatigut nakuuserfigineqarsimanermik pinerluttulerinermut inatsimmi ilaatinneqartumik peqquteqarnersoq isiginiarneqassalluni.

 

  § 63.  Attartortup pisinnaatitaaffiit, §§ 58-62 naapertorlugu attartortumut allanulluunniit pisinnaatitaaffiliunneqartut taamaatissinnaanngilai, taamaattorli tak. imm. 2-5.
  Imm. 2.  Inissiaq sulisunut inissiaappat atorfimmut aalajangersimasumut atugassanngortitaasoq § 60, imm. 4 -mi aalajangersakkat atuutissanngillat. Tassunga taarsiullugu inissiamik allamik innersuussisoqarsinnaavoq, tak. § 5, imm. 1, nr. 4.
  Imm. 3.  § 60, imm. 1-4-mi aalajangersakkat inissianut innarluutilinnut inissiatut immikkut aaqqissukkanut atugassanngortinneqarsimasunullu atuutinngillat. Tassunga taarsiullugu inissiamik allamik innersuussisoqarsinnaavoq, tak. § 5, imm. 1, nr. 5.
  Imm. 4.  Inissiaq atorfeqartitaanermut atatillugu atugassanngortitaasimappat imaluunniit innarluutilinnut inissiatut innersuussaasimappat, tamatumani pissutsit immikkut ittut pineqanngippata §§ 61-imi aamma 62-mi aalajangersakkat atuutissanngillat.

  Imm. 5.  §§ 58-imi aamma 59-imi aalajangersakkat inissianut siunertanut aalajangersimasunut inniminnerneqarsimasunut, imaluunniit inissianut immikkut ittumik ilusilersugaasunut aammalu inissianut innarluutilinnut atugassanngortitaasunut atuutissanngillat.

 

Kapitali 10
Attartornermik taamaatitsineq

 

  § 64.  Attartortup inissiamik attartornermut isumaqatigiissummi § 69, imm. 2-mi siumut ilisimatitsinissamut piumasarisaasut malillugit attartornini atorunnaarsissinnaavaa. Taamaattorli attartortup aapparisani akuersiteqqaarnagu ilaqutariit inigisaannik attartorneq imaluunniit aappariit aapparisalluunniit suliffeqarfianut atatillugu attartorneq atorunnaarsissinnaanngilaa. Attartortup taamaatitsinera allakkatigut nalunaarutigineqassaaq.

 

  § 65.  Sulisunut inissiamik attartorneq atorfeqarnerup unitsinneqarnerani atorunnaassaaq, tamatumunngalu atatillugu inissiaq qimanneqassalluni. Atorfilik pisussaavoq inissiaq allakkatigut taamaatissallugu. Atorfillip akiligassat ingerlaavartut attartornermut attuumassutillit, taamaatitsinissamut piffissarititaasup nalinginnaasup naanissaata tungaanut akiligassarai, taamaattorli tak. § 70, imm. 3.
  Imm. 2.  Sulisunut inissiaq attartugaq kingusinnerpaamik qimareersimaneqassaaq nalinginnaasumik taamaatitsinnisaamut nalunaarfissatut piffissarititaasupnaanginnerani.

 

  § 66.  Attartortitsisup attartornerit imaattut allakkatigut atorunnaarsittassavai:
1)  Ineeqqat, attartortitsisup inigisaani inissiap ilaaniittut, imaluunniit ilaqutariinnut ataatsinut illuni illuniluunniit affarleriinni attartortitsisup najugarisaata ilaaniittut.
2)  Illumi najugaqarfittut inissiat, piffissami atorunnaarsitsiviusumi najugaqarfittut inissiat marluinnaatillugit, aappaanilu piginnittoq najugaqartillugu.

 

  § 67.  § 66-imi taaneqartut saniatigut attartornerni allani attartortitsisoq taamaallaat atorunnaarsitsisinnaavoq:
1)  Attartortitsisup attartortitamini nammineerluni najugaqalivinniarluni nalunaarutigippagu, imaluunniit attartortitsisoq pingaarutilinnik tunngaveqarluni attartornermik atorunnaarsitsinissamut immikkut pissutissaqartitsippat, aammalu atorunnaarsitsiniarluni nalunaaruteqarneq illuatungeriinnut tunngasut nalilerneqarnerat aallaavigalugu naammaginartutut isigineqarsinnaappat.
2)  Attartortitsisup illumik iluarsaassinissaq isaterinissarluunniit peqqutaalluni attartorneqartoq qimanneqartariaqartoq uppernarsarpagu.
3)  Attartortoq illup ingerlanneqarnerani suliaqartussatut atorfeqartitaasimappat, inissiarlu attartortitseqqinnermi atorfimmit taartaasumut atorneqassappat.
4)  Attartortoq attartortitsisumit allakkatigut mianersoqqussutinik tunineqartaraluarluni pissuserisassanik malinninngippat, imaluunniit pissusilersornera illumut ineqartunulluunniit allanut akornutaappat, pissutsilli imaanngippata attartortitsisup attartornermik isumaqatigiissut atorunnaarsisinnaallugu. Attartortoq allakkatigut mianersoqqussutsinik inassutinilluunniit pingasunik qaammatit tulleriit aqqaneq marluk iluanni tigusisimasussaavoq.

 

§ 68.  Namminersorlutik Oqartussat imaluunniit kommunep inissiamik attartukkamik nutarterinissaq isaterinissarluunniit pissutigalugu attartorneq atorunnaarsissappagu, tak. § 67, nr. 2, attartortoq inissiamik taartissamik innersuussivigineqassaaq, tak. § 5, imm. 1, nr. 1. Inissiamik taartissamik innersuussisussaatitaaneq taamaallaat atuutissaaq, attartortup attartornermut isumaqatigiissummi Namminersorlutik Oqartussanit kommunemilluunniit attartornermik atorunnaarsitsinerup nalaani attartornissamik isumaqatigiissummik attartortoq eqqortitsisimappat.
  Imm. 2.  Attartortut iluarsaassinerup kingunerisaanik inissiamik taartissamik innersuussivigineqartut iluarsaassinerup naammassereerneratigut illuni iluarsaanneqarsimasuni inissiamik innersuussivigineqarnissamut salliutinneqartussaatitaapput, attartortullu isaterinerup kingunerisaanik inissiamik taartissamik innersuussivigineqartut illunut isatikkanut taartissatut inissiaqarfimmi sananeqartunut inissiamik innersuussivigineqarnissamut salliutinneqartussaatitaallutik.
  Imm. 3.  Salliutinneqartussaatitaaneq taamaallaat atuutissaaq attartortup inissiami taartissatut innersuussivigineqartumi attartornermut isumaqatigiissut eqqortissimappagu, aammalu attartortup inissiamik innersuussivigineqarnissamut piumasaqaatit allat naammassisimappagit. Attartortitsisup pissutsit annertuumik pingaaruteqanngitsut, imaluunniit attartortumit piffissami iluarsaassinissaq isaterinissarluunniit pissutigalugit attartornermik attartorunnaarsitsinissamik nalunaaruteqarfiup nalaani aaqqinneqarsimasut pissutiginiarsinnaanngilai.
  Imm. 4.  Attartortup attartukkani qimassappagu, tak. imm. 1, attartortitsisup attartortoq taarsiissuteqarfigissavaa, inissiamut ataatsimut tunngaviusumik 1.200 kr.-inik amerlassuseqartunik, ininut najugaqarfiusunut tamanut immikkut 1.000 kr.-inik ilassusikkanik. Attartortitsisup attartortoq iluarsaassinerup naammassinerani attartortup inigisaminut uterneranut atatillugu imaluunniit isaterinerup kingorna nutaamik sanaqqiinermi illuummut nutaamut attartulerneranut atatillugu taamatorpiaq taarsiissuteqarfigissavaa, tamatumunngali piumasaqaataavoq attartortup attartornissamik isumaqatigiissummik eqqortitsisimanissaa.
  Imm. 5.  Imm. 4-mut atatillugu aningaasartuutit illuummi iluarsaassinissamut isaterinissamulluunniit aningaasaliissutit aqqutigalugit akilerneqassapput.

 

  § 69.  § 67 naapertorlugu attartortitsisup atorunnaarsitsiniarnera allakkatigut nalunaarutigineqassaaq, aammalu attartortup imm. 2 naapertorlugu akerliliissuteqarsinnaaneranut paasissutissanik imaqassalluni. Aammattaaq atorunnaarsitsissut atorunnaarsitsinermut tunngaviusoq pillugu paasissutissanik imaqassaaq.
  Imm. 2.  Attartortup atorunnaarsitsissut akueriumanngikkuniuk, attartortoq atorunnaarsitsissutip tiguneraniit sapaatit akunneri arfinillit qaangiutsinnagit allakkatigut akerliliissuteqassaaq. Attartortitsisup atorunnaarsitsissut atuutsiinnarniarlugu kissaatigiguniuk, attartortitsisoq sapaatit akunneri qaavatigut arfinillit qaangiutsinnagit eqqartuussivimmi suliassanngortitsissaaq. § 67, nr. 2 aamma 3 naapertorlugit Namminersorlutik Oqartussat kommunellu inissiaataanni attartortittakkani attartornermik atorunnaarsitsinermut akerliliissut kinguartitsigallarnermik kinguneqarsinnaanngilaq.

 

  § 70.  Attartortitsisumit atorunnaarsitsisoqassaaq sivikinnerpaamik qaammatinik pingasunik siumut ilisimatitsereernikkut, qaammatip naanerani atuuttussanngorlugu, taamaattorli matumani ineeqqanik attartortitsineq pineqarpat qaammammik ataasiinnarmik siumut ilimatitsinikkut atorunnaarsitsisoqarsinnaavoq, tak. § 66, nr. 1.
  Imm. 2.  Attartortup tungaaniit atorunnaarsitsiniarneq allakkatigut sivikinnerpaamik qaammammik ataatsimik siumut ilimatitsereernikkut, qaammatip naanerani atuuttussamik pissaaq. Taamaattorli inisiamik namminersortumit pigisamik attartortitsitsisup attartortullu isumaqatigiissutigisinnaavaat, attartortup tungaaniit atorunnaarsitsiniarneq allakkatigut sivikinnerpaamik qaammatinik pingasunik siumut ilisimatitsereernikkut, qaammatip naanerani atuuttussamik pissasoq. Piumasaqaat atuutissaguni attartornissamik isumaqatigiissummi immikkut ittumik erseqqissarneqassaaq.
  Imm. 3.  Attartortoq piffissaq ilisimatitsissutaasoq suli naanngitsoq inissiamiit nuuppat, attartortitsisup attartukkap allamut attartorteqqinnissaa anguniassavaa. Attartortitsisup allamut attartortitsinermini isertitai isertitassaraluiluunniit attartortumut piumasaqaatigisaanit ilanngaatigineqassapput.

 

  § 71.  Attartornermut isumaqatigiissut piffissamut aalajangersimasumut atuuttussanngortitaasimappat, piffissap attartornissamut isumaqatigiissuteqarfiusup naanerani siumut ilisimatitsinertaqanngitsumik attartorneq unitsinneqassaaq. Attartornermut isumaqatigiissut piffissamut aalajangersimasumut atuuttussanngortitaasoq piffissap attartorfiusup ingerlanerani atorunnaarsinneqarsinnaanngilaq, tamatumani attartornermut isumaqatigiissutip atorunnaarsinneqarsinnaanera allaganngorlugu isumaqatigiissutigineqarsimanngippat.
  Imm. 2.  Imm. 1-imi aalajangersarneqartut apeqqutaatinnagit attartortup attartornissamut isumaqatigiissut kapitali 11-mi aalajangersakkat malillugit atorunnaarsissinnaavaa, pissutsit attartortumut assuarliutigineqarsinnaasut annertuumik pingaaruteqarpata.
  Imm. 3.  Attartortup attartortitsisup ilisimasaanik attartornerup piffissamut aalajangersimasumut atuuttussanngortitaasup naareernerani attartukkani atuinnarpagu, attartorneq attartornermut nalinginnaasumut piffissamut aalajangigaanngitsumut ingerlaannartumik nuussaaq, inatsisitigut sunniutissai tassunga attuumassutillit atuutsilerlutittaaq.

 

  § 72.  §§ 67 – 71-imi maleruagassat attartortumut ajoqutaasumik isumaqatigiissuteqarnikkut sanioqqunneqarsinnaanngillat.

 

Kapitali 11
Attartortitsisup attartornermut isumaqatigiissummik atorunnaarsitsisinnaatitaaneranik pisinnaatitaaffik

 

  § 73.  Inissiani attartortittakkani pisortanit pigineqartuni attartortitsisup ineqarnermut, imermut, kiassarnermut imaluunniit qularnaveeqqutissamut akiliutissanut akiliinngitsoornerup kingunerisaanik attartornermut isumaqatigiissut atorunnaarsissava, tak. §§ 37, imm. 1, 38, imm. 1, aamma 74, imm. 1. Inissiani attartortittakkani namminersortunit pigineqartuni attartortitsisup peqqutitut taaneqartut tunngavigalugit attartornermut isumaqatigiissut atorunnaarsissinnaavaa.
  Imm. 2.  Attartortitsisup attartornermut isumaqatigiissut atorunnaarsissinnaavaa:
1)  Inissiaq unioqqutitsisumik atorneqarpat, tak. § 48, imm. 2 aamma 3.
2)  Inissiaq ikerinnaannakkut qimanneqarpat, tak. § 48, imm. 5.
3)  Inatsisini piumasarineqartut unioqqutillugit attartortitsisoq inissiamut isernissaanut itigartinneqarpat, tak. § 49, imm. 1.
4)  Ileqqorissaarnissamut maleruagassat unioqqutinneqarpata, tak. § 50.
  Imm. 3.  Attartortitsisup aatsaat imm. 1 aamma 2 naapertorlugit attartorneq atorunnaarsissinnaavaapissutsit attartortumut assuarliutaasut annertuumik pingaaruteqarpata.
  Imm. 4.  Pissutsit imm. 1-imi aamma imm. 2-mi taaneqartut attartortitsisup tunngaviginiarsinnaanngilai, pissutsit attartortitsisup attartornermut isumaqatigiissummik atorunnaarsitsinnginnerani aaqqinneqarsimappata.
  Imm. 5.  Attartortitsisup pissutsit imm. 2-mi taaneqartut tunngavigalugit attartornermik atorunnaarsitsinnginnerani attartortitsisup attartortoq pissutsit aaqqeqqullugit peqqussavaa.
  Imm. 6.  Attartortoq attartukkaminit anisinneqarpat, attartortitsisup kommunimi inunnik isumaginnittoqarfik tamanna pillugu ilisimatissavaa. Ilisimatitsinermi attartortitsisup anisitsinermut nalunaarutip assilinera nassiutissavaa.

 

  § 74.  Pisortaniit attartortitsisup akiliinngitsoortoqartillugu attartornermik isumaqatigiissut atorunnaarsissaavaa, tak. § 73, imm. 1, tamanna pillugu piumasaqaatip allakkatigut attartortumut takkunnerata kingorna attartortup kingusinnerpaamik ulluinnaat arfinillit qaangiunneranni akiligassanut kinguaattoorutini akilersimanngippagit, imaluunniit imm. 5 naapertorlugu piffissaliussaq naatinnagu attartortoq akilersuinissamik isumaqatigiissuteqarsimanngippat. Tamannattaaq akilersukkanut akiliutissat akiliinngitsoorneranni atuutissaaq. Attartortitsisup akileeqqusissutaa ullup piffissaq eqqorlugu akiliiffissap kingulliup kinguninngua tunniunneqassaaq, tassanilu paatsuugassaanngitsumik allassimassaaq, attartornermut akiliutissanut kinguaattoorutit piffissaliussap naannginnerani akilerneqanngippata attartortitsineq atorunnaarsinneqassasoq.
  Imm. 2.  Allakkatigut akileeqqusissutip attartortumut takkunnerata kingorna kingusinnerpaamik ulluinnaat pingasut qaangiunnerini akiitsuni akilinngitsuukkani iluarsiiffigisimanngippagit, attartortitsisup namminersortup § 73, imm. 1 naapertorlugu kingusinaartumik akiliinerup kingunerisaanik attartornermut isumaqatigiissut atorunnaarsissinnaavaa. Attartortitsisup akileeqqusissutaa ullup piffissaq eqqorlugu akiliiffissap kingulliup kingunitsianngua tunniunneqassaaq, tassanilu paatsuugassaanngitsumik allassimassaaq, attartornermut akiliutissanut kinguaattoorutit piffissaliussap naannginnerani akilerneqanngippata attartortitsineq atorunnaarsinneqassasoq.
  Imm. 3.  Pisortat attartortitsisut akileeqqusissutip suliarineqarneranut akitsuutitut annerpaamik 150 koruuninik akileeqqusisinnaapput.
  Imm. 4.  Pisortanit attartortitsisup attartornermut isumaqatigiissut atorunnaarsissimappagu, attartortitsisoq atorunnaarsitsinermik atortussaajunnaarsitsinerminut annerpaamik 150 koruuninik akileeqqusisinnaavoq.
  Imm. 5.  Attartortoq ineqarnermut, imermut kiassarnermulluunniit akilinngitsuukkaminik akiitsoqartoq akilersuinissamut nammineq piumassutsiminik pisortanut attartortitsisunut isumaqatigiissuteqarsinnaatitaavoq, taannalu qaammatit sisamat sinnerlugit sivisussuseqartinneqarsinnanngilaq. Akilersuinissamut isumaqatigiissuteqarnissamut piumasaqaatit makkua naammassineqarsimassapput:
1)  Attartortup pisortat attartortitsisut akilersuinissamik isumaqatigiissuteqarnissamik qinnuigissavai, allakkatigut akileeqqusissutip attartortumut apuutereernerata kingorna kingusinnerpaamik ulluinnaat arfinillit qaangiutsinnagit.
2)  Attartortoq akilersuinissap isumaqatigiissutigineqarneranut akitsuummik 250 koruuninik akiliuteqassaaq aammalu qaammatit akilersuiffiusut ingerlaneranni qaammatit tamaasa 50 koruunimik akiliuteqartassalluni.
3)  Akilinngitsuukkat attartortup qaammatini 1-iniit 4-inut akilersussavai.
  Imm. 6.  Attartortut uku akilersuinissamut pisinnaatitaaffeqassanngillat:
1)  Ukiut pingasut kingulliit iluanni attartorfigisimasaminni ineqarnermut aningaasartuutinut akilersukkanullu ingerlaavartunut akiliinngitsoortarnermikkut sumiginnaasimasut.
2)  Akilersukkanik ingerlatsereersut.
3)  Pisortanit ikiorserneqarnissamut pisinnaatitaaffeqartut, tassunga pisortanit ikiorsiisssutit pillugit Inatsisartut peqqussutaat nr. 15, 20. november 2006-imeersoq tunngavigineqartunut ilaalluni.
4)  Aningaasaqarnikkut akisussaassuseqanngitsumik iliuuseqarnerup kingunerisaanik imaluunniit allatut nammineq pisuussutigisamik akilerneqanngitsunik akiitsoqalersimasut.
  Imm. 7.  Pisortat attartortitsisut najugaqatigiiffinni pigisaminni tamani attartortitsinermi annaasanut akilersukkanullu annaasanut ataatsimut nalimmassaanissamik, naatsorsuutinut tunngasumik naatsorsuutini immikkoortuni kontomik ataatsimoorussamik ammaalluni pilersitsissapput, kontomullu tassunga najugaqarfiit ataasiakkaat ukiumut annaasassaattut missingersuusiarineqartut, inigisap annertussusaani kvadratmeterimut ukiumut 25 koruuninit ikinnerusinnaanngitsut illuartinneqartassapput. Annaasaqaatit konto naatsorsuutinut tunngasoq, ukiumoortumik naatsorsuusiorneqartartussaq, aqqutigalugu akilerneqartassapput.

 

  § 75.  Attartortitsisup attartortitsineq erngerluni atuutilersussamik atorunnaarsissinnaavaa, attartortoq illumut, attartortitsisumut, taassuma atorfeqartitaannut, illumi attartortunut allanut inatsisit malillugit eqqortumik illumiittunut annertuumik ajoqutaasumik pissusilersorpat, taamatuttaaq:
1)  Attartortoq inunnut pineqartunut nakuuserpat imaluunniit persuttaanissamik siorasaarippat.
2)  Attartortup pissusilersornera illumut imaluunniit inunnut pineqartunut ulorianartorsiortitsisinnaappat, matumani ilanngullugit sakkunik atuisimappat imaluunniit attartorneqartumi atortunik ulorianartunik uninngatitaqarpat.
  Imm. 2.  Attartortitsineq atorunnaarsinneqarsinnaavoq, tamatumani pissusilersornerit imm. 1-imi taaneqartut attartortumit namminermit, attartortup inoqutaanit allanilluunnit attartortup attartukkamut isersinnaatitaanit piliarineqarnersut apeqqutaatinnagu, tak. § 58.

 

  § 76.  Pissutsit §§ 73-imi aamma 75-imi taaneqartut píssutaallutik attartorneq atorunnaarsinneqarpat, attartortoq pisussaavoq erngerluni attartukkaminit anissalluni, aammalu ineqarnermut akiliut, aammalu attartortup inissiamiit nuunnissaanut siumut nalunaarfissap nalinginnaasup naanissaata tungaanut attartukkamut akiligassat allat akilissallugit. Kiisalu attartortoq pisussaavoq sumiginnaanerup kingunerisaanik attartortitsisup annaasai taarsissallugit, matumani ilanngullugit attartukkamit anisitsinermut aningaasartuutit.
  Imm. 2.  Attartortitsisup attartukkap allamut attartorteqqinnissaa anguniassavaa. Attartortitsisup allamut attartortitsinermini isertitai piffissamiluunniit imm. 1-imi taaneqartumi isertitassaralui attartortumut piumasaqaatigisaanit ilanngaatigineqassapput.
  Imm. 3.  Naalakkersuisut Namminersorlutik Oqartussat kommunellu inissiaataanni attartortittakkani attartornermik atorunnaarsitsisarneq pillugu maleruagassiussapput.

 

Kapitali 12
Attartortup inigisaq qimallugu nuunnera

 

  § 77.  Inissiamit anisoqarnerani inissiaq nalinginnaasumik iluarsaanneqassaaq, tassanilu pineqarput qilaavinik qaqorsarlugit qalipaaneq, iiganik qalipaaneq aamma/imaluunniit ungalitsersuineq kiisalu eqqiaaneq. Natii nutaamik lakkersimasutut isikkoqassapput, taamaattorli tak. imm. 3.
  Imm. 2.  Attartortup nammineerluni nuunnerminut atatillugu nalinginnaasumik iluarsaassinissani kissaatigippagu, iluarsaassineq assassornermik ilinniagaqarsimasutut illersorneqarsinnaasumik pitsaassuseqartillugu suliarineqassaaq. Attartornermik unitsitsinissaq imaluunnit atorunnaarsitsinissaq naapertorlugu inissiap qimanneqarnissaa, inissiap takuniarneqarnissaa sioqqullugu suliaq naammassereersimassaaq, tak. § 79.
  Imm. 3.  Attartortup inissiamut iserternerani inissiaq nalinginnaasumik iluarsaanneqarsimanngippat, attartortup inissiaq iserternermini pissuserisaatut itsillugu tunniutissavaa.
  Imm. 4.  Attartortitsisup imm. 1-imi aamma 2-mi aalajangersakkat sanioqqussinnaavai, attartornerup atorunnaarnerata nutaamillu aallartitsinerup kingorna inissiap iluarsaanneqarnissaa annertuunik ajornartorsiutitaqarpat. Attartornerup atorunnaarnerani tamatumunnga taarsiullugu attartortoq inissiamik attartornerup nalaani nungullarnernut naleqquttumik annertussusilinnik akiliuteqassaaq. Akiliutissaq qaammammut ataatsimut inimut ataatsimut 50 kr.-inik annertussuseqarpoq. Attartortitsisup nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai.
  Imm. 5.  Naalakkersuisut inissiamit aninermi nalinginnaasumik iluarsaassisarneq aamma attartortup tamatumunnga atatillugu aningaasartuutigisaanut ajunngitsorsiassaqartarneq pillugu maleruagassiorsinnaapput. 

 

  § 78.  Attartortitsisup § 77 malillugu nalinginnaasumik iluarsaassinermut aningaasartuutit attartortup inissiamik tigusineraniit qaammatit 100-t ingerlanerini tigujartuaassavai. Piffissaliussatut aalajangiunneqartup naannginnerani inissiamit anisoqarnerani attartortup taamaallaat aningaasat piffissami tassani attartortitsinerup atorunnaarfigisaani attartortitsisumit akilerneqartussanngorsimanngitsut akilissavai.

 

  § 79.  Attartortitsineq atorunnaarsinneqartussanngorsimappat imaluunniit inissiaq allamik pissuteqartumik qimanneqartussanngorsimappat attartortitsisup attartortullu piffissaq qimatsivissaq inissiamillu misissuisoqarnissaa allaganngorlugu isumaqatigiissutigissavaat. Attartortoq immikkut ilisimasalimmik ilaqarluni misissuinermut peqataanissamut pisinnaatitaavoq. Attartortitsisup sivikinnerpaamik ullunik arfineq-marlunnik siumut ilisimatitsinermigut attartortoq misissuinermut peqataaqqullugu noqqaaffigissavaa.
  Imm. 2.  Misissuinermi attartortitsisoq misissuisimanermut nalunaarusiussaaq, tassanilu amigaataasinnaasut paarinerlutallu attartortitsisup isumaa malillugu attartortup akisussaaffigisassai allassimassapput. Attartortoq taakkununnga isumaqataanngippat, tamanna attartortup isumai taallugit nalunaarusiami allanneqassapput. Nalunaarusiaq misissuinermut atatillugu illuatungeriinnit atsiorneqassaaq. Attartortoq taannaluunniit sinnerlugu takkuttoq misissuinermut nalunaarusiap assinganik tunineqassaaq. Tamatuma kingorna attartortup tamanna piumasarippagu, pissutissaqanngitsumik uninnganertaqanngitsumik suliassat attartortitsisup isumaa malillugu attartortumit akilerneqartussanut suliassat qanoq akeqarnissaanik missingersuummik allakkatigut nalunaarfigineqassaaq.
  Imm. 3.  Attartortup inissiamik qimatsinissani kingusinnerpaamik ullunik arfineq-pingasunik sioqqullugu najugaq nalunaarutit nassiunneqartarfissaat nalunaarutigissavaa.

 

  § 80.  Attartortoq taassumaluunniit piginnaatitaa misissuinermut takkutinngippat, attartortitsisoq pisinnaatitaavoq nalunaarusiaq tunngavigissallugu attartortullu qularnaveeqqusiissutaasa nalinginnaasumik iluarsaassinermut aningaasartuutissanut, tak. §§ 77, imm. 2 aamma 78, matussutigineqarnissannut aamma attartornermik isumaqatigiissut naapertorlugu attartortup pisussaaffiinut matussutigineqarnissannut atussallugit.
  Imm. 2.  Attartortitsisup amigaatit misissuinerup nalaanni pissusissaatut malugineqarsinnaasimagaluit piumasaqaatigisinnaanngilai, tamatumani attartortoq peqquserlulluni iliuuseqarsimanngippat.
  Imm. 3.  Attartortitsisoq inissiami qimanneqartumi paarsinerluttoqarsimaneranik aserorterisoqarsimaneranilluunniit uparuaasimappat, pissutsit annertussusiilu immikkoortillugit uppernarsaaserneqassapput.

 

Kapitali 13
Nakkutilliineq

 

  § 81. Namminersorlutik Oqartussat kommuneluunniit inissianik allaffissornikkut aqutsisussamik avataaniit pissarsisimappat, Naalakkersuisut imaluunniit Kommunalbestyrelsep nakkutigissavaa, inissianik allaffissornikkut aqutsisup suliani Inatsisartut peqqussutaat manna aamma aalajangersakkat peqqussut manna naapertorlugu suliarineqartut naapertorlugit suliarinerai.
  Imm. 2.  Kommune nammineerluni inissiaatiminik allaffissornikkut aqutsinermik isumaginnittuuguni, kommunep suliani Inatsisartut peqqussutaat manna aamma aalajangersakkat peqqussut manna naapertorlugu suliarineqartut naapertorlugit isumagissavai.
  Imm. 3.  Namminersorlutik Oqartussat kommuneluunniit aningaasatigut nakkutilliisussaatitaanini, tak. imm. 1, naammassiniarlugu inissianik allaffissornikkut aqutsisup kukkunersiuisua inissianik allaffissornikkut aqutsisup suliani Inatsisartut peqqussutaat manna aamma aalajangersakkat peqqussut manna naapertorlugu suliarineqartut naapertorlugit suliarinerai nalunaarusiortissinnaavaa. 
  Imm. 4.  Kommunep inissiaatiminik nammineq allaffissornikkut aqutsisup ukiumoortumik suliassat Inatsisartut peqqussutaat manna aamma aalajangersakkat peqqussut manna naapertorlugu suliarineqartut naapertorlugit isumagineqarnerat pillugu kukkunersiuisuni ukiumoortumik nalunaarusiortittassavaa.
  Imm. 5.  Namminersorlutik Oqartussat imaluunniip kommunip imm. 1 naapertorlugu nakkutilliinera ilaatigut aningaasatigut ingerlatsinermik nakkutilliinermut ilaatigullu avataaniit aqutsisup allaffissornermi suliassaanik allanik nakkutilliinermut tunngasuuvoq.
  Imm. 6.  Naalakkersuisut Namminersorlutik Oqartussat kommunellu inissiaataat attartortittakkat najugaqatigiiffiillu nakkutigineqarnerat, matumani ilanngullugit inissianik piginnittup imaluunniit aqutsisup aningaasaatinik aqutsinera, missingersuusiortarnera, naatsorsuutinik saqqummiisarnera kukkunersiuisoqarneralu, pillugu maleruagassiorsinnaapput.

 

Kapitali 14
Ineqarneq pillugu maalaaruteqartarfik

 

  § 82.  Inissiani attartortittakkani attartortup attartortitsisullu akornanni aaqqiagiinngissutaasut suliarineqartarnissaannut Naalakkersuisut Ineqarneq pillugu Maalaaruteqartarfimmik, siulittaasoqartumik kiisalu pingasunik ilaasortaqartumik pilersitsisinnaapput.
  Imm. 2.  Siulittaasoq taassumalu sinniisissaa Naalakkersuisunit toqqarneqassapput. Siulittaasoq taassumalu sinniisissaa inatsisilerituutut kandidatitut soraarummeersimassapput, aammalu ineqarnermi pissutsinut immikkut ilisimasaqassallutik. Maalaaruteqartarfimmut ilaasortaq ataaseq taassumalu sinniisissaa INI A/S-p innersuussuteqarneratigut Naalakkersuisunit toqqarneqassapput. Maalaaruteqartarfimmut ilaasortaq ataaseq taassumalu sinniisissaa kommunit peqatigiillutik inassuteqarnerisigut Naalakkersuisunit toqqarneqassapput, aammalu maalaaruteqartarfimmut ilaasortaq ataaseq taassumalu sinniisissaa Ineqartut Peqatigiiffiisa Kattuffiata IPK-p inassuteqarneratigut Naalakkersuisunit toqqarneqassallutik, taamaattorli takuuk imm. 6. Maalaaruteqartarfimmut ilaasortat pingasut nalinginnaasut taakkulu sinniisissaat ineqarneq pillugu sulianut tunngasunik ilisimasaqassapput.
  Imm. 3.  Siulittaasumik, ilaasortanik sinniisissanillu toqqaaneq ukiut sisamat tikillugit atuuttassaaq.
  Imm. 4.  Siulittaasoq sinniisissaaluunniit piginnittut kattuffiannut, inissiaatileqatigiit kattuffiannut imaluunniit attartortut kattuffiannut immikkut attuumassuteqartuussanngilaq, imaluunniit inuussutissarsiutigalugu illuutinik nioqquteqarnermut akuliussimasuussanani.
  Imm. 5.  Maalaaruteqartarfimmut ilaasortaq sinniisussaaluunniit pissusissamisoortumik aggersarneqareernermini maalaaruteqartarfimmut aggernissamut pisussaatitaavoq. Naalakkersuisut ineqaneq pillugu maalaaruteqartarfimmi ataatsimiinnissamut takkutinngitsoornerup kingunerisassai pillugit sukumiinerusunik maleruagassiorsinnaapput. 
  Imm. 6.  IPK maalaaruteqartarfimmut ilaasortassamik toqqaanngippat, maalaaruteqartarfimmut ilaasortassamik innersuussisinnaatitaaneq suliniaqatigiiffinnut ukununnga, taaneqartut tulleriiaarneri malillugit tutsinneqassaaq: SIK, IMAK aamma PPK.

 

  § 82 a.  Ineqarneq pillugu Maalaaruteqartarfiup aaqqiagiinngissutit attartornissamut isumaqatigiissutinit makkunannga pisut suliarisinnaavai:
1)  Inissianik attartortittakkanik Namminersorlutik Oqartussanit imaluunniit kommunimit pigineqartunik attartortumut najugaqarfissatut attartortitsinissaq pillugu isumaqatigiissut.
2)  Attartortitsinissamut isumaqatigiissuteqareernerup kingorna inissiaq attartortittagaq allamut tunniunneqarsimappat, inissianik attartortittakkanik isumaqatigiissuteqarnerup nalaani Namminersorlutik Oqartussanit imaluunniit kommunimit pigineqartunik attartortumut najugaqarfissatut attartortitsinissaq pillugu isumaqatigiissut. 
3)  Inissianik attartortittakkanik, Namminersorlutik Oqartussanit imaluunniit kommunimit attartorneqartunik, tamatumalu kingorna attartortumut attartorteqqinneqartunik, attartortumut najugaqarfissatut attartortitsineq pillugu isumaqatigiissut.
4)  Inissianik attartortittakkanik, inissiaatileqatigiiffimmit, Namminersorlutik Oqartussanit imaluunniit kommunimit aalajangiiffigineqarlutik sunniuteqarfigineqartartumit attartorneqartunik, tamatumalu kingorna attartortumut attartorteqqinneqartumik, attartortumut najugaqarfissatut attartortitsinissaq pillugu isumaqatigiissut. 
5)  Inissianik attartortittakkanik inissiaatileqatigiiffimmit, Namminersorlutik Oqartussanit imaluunniit kommuninit aalajangiiffigineqarlutik sunniuteqarfigineqartartumit pigineqartunik, attartortumut najugaqarfissatut attartortitsinissaq pillugu isumaqatigiissut.

 

  § 83.  Naalakkersuisut maalaaruteqartarfiup atortussatut pisariaqartitaannik atugassiissapput, aammalu pisariaqartitsinikkut allaffeqarfimmiit ikiorneqarnissaat isumagissallugu.
  Imm. 2.  Maalaaruteqartarfiup sulineranut aningaasartuutit Naalakkersuisunit akilerneqartassapput, matumani ilanngullugit siulittaasup ilaasortallu suliaminnut atatillugu akiliussigallarnerannut, tak. imm. 5, kiisalu allaffissornermut il.il. aningaasartuutit. Ineqarneq pillugu maalaaruteqartarfimmi ilaasortat Inatsisartunut, Naalakkersuisunut il.il. ilaasortat akissarsiaqartitaanerat pillugu Inatsisartut inatsisaanni maleruagassat naapertorlugit akissarsiaqartinneqassapput, ullormusiaqartinneqarlutik angalanermilu aningaasartuutinut ajunngitsorsiassaqartinneqassallutik. Aningaasartuutit taakku ukiumoortumik Nunap Karsianit tapiissutigineqartut iluanniit akilerneqartassapput. 
  Imm. 3.  Maalaaruteqartarfik oqarasuaatit atorlugit ataatsimiissinnaavoq, maalaaruteqartarfimmi ilaasortat tamarmik illoqarfimmi, maalaaruteqartarfiup allattoqarfeqarfigisaani najugaqanngippata. 
  Imm. 4.  Ineqarneq pillugu maalaaruteqartarfik ukiumoortumik nalunaarummik saqqummiussisassaaq, ilaatigut suliassat takkuttut suliallu naammassineqartut pillugit kisitsisitigut takussutissanik, kiisalu aalajangiisarnerit ataasiakkaat inernerinik naatsunngorlugit saqqummiunneqarnerinik imaqartunik.
  Imm. 5.  Aningaasartuutinut imm. 2-mi taaneqartunut matussutissatut, Naalakkersuisut attartortitsisoq peqqusinnaavaat ukiumoortumik ineqarnermut akiliutit aqqutigalugit akiliutissat attartortunut ataasiakkaanut akilerseqqullugit akileqqullugillu. Attartortitsisup akiliutissat ukiumi akiliiffiusussami kingusinnerpaamik januaarip ulluissa 31-anni Naalakkersuisunut akilissavai. Akiliutissaq piffissaq eqqorlugu akilerneqanngippat, Naalakkersuisut missingiillutik pisassanik attartortitsisumut ilanngaateqarsinnaapput. Akiliutissaq ukiumoortumik Inatsisartut aningaasanut inatsisaannut oqaasertaliinikkut annertussusilerneqartassaaq. 
  Imm. 6.  Naalakkersuisut maalaaruteqartarfiup suliai, matumani ilanngullugit ataatsimiittarnerit akuttussusissaat suleriaasissarlu pillugit sukumiinerusunik maleruagassiorsinnaapput.

 

  § 84.  Ineqarneq pillugu Maalaaruteqartarfiup maalaarutit makkununnga tunngasut attartortunit suliakkiissutigineqartut suliarisarpai, takuuk § 82 a, nr. 1-4:
1)  Ineqarnermut akiliutinik qaffaanissamik siumoortumik ilisimatitsisarnermi piumasarisat, takuuk § 28, imm. 2.
2)  Aserfallatsaaliuineq iluarsaassinerlu, takuuk § 45.
3)  Inissiap iserterfigineqarnerani qanoq issusia, takuuk § 47.
4)  Attartukkami atortut ikkussukkat pitsanngorsaanerillu (atuisinnaatitaaneq), takuuk §§ 51 aamma 55.
5)  Attartortup attartukkaminik atuinera (peqqissaarnissamik malittarisassanik unioqqutitsinerit), takuuk § 50.
6)  Atuisinnaatitaanerup allanut tunniunneqarnera (inissianik paarlaaseqatigiinneq, attartukkamik allamut attartortitsineq aamma attartornermik nangitsineq), takuuk §§ 58-62.
7)  Inissiamit aninermi inissiap qanoq issusia (iluarsaassineq nalinginnaasoq), takuuk § 77.

 

  § 84 a.  Ineqarneq pillugu Maalaaruteqartarfiup maalaarutit makkununnga tunngasut attartortunit suliakkiissutigineqartut suliarisarpai, takuuk § 82 a, nr. 5:
1)  Ineqarnermut akiliutinik qaffaanissamik siumoortumik ilisimatitsisarnermi piumasarisat, takuuk § 33, imm. 5.
2)  Aserfallatsaaliuineq iluarsaassinerlu, takuuk § 46.
3)  Inissiap iserterfigineqarnerani qanoq issusia, takuuk § 47.
4)  Attartortup attartukkaminik atuinera (peqqissaarnissamik malittarisassanik unioqqutitsinerit), takuuk § 50.
5)  Atuisinnaatitaanerup allanut tunniunneqarnera (attartukkamik allamut attartortitsineq aamma attartornermik nangitsineq), takuuk § 58, imm. 1-3 aamma §§ 60-62.
6)  Inissiamit aninermi inissiap qanoq issusia (iluarsaassineq nalinginnaasoq), takuuk § 77.

 

 § 84 b.  Maalaarutit Ineqarneq pillugu Maalaaruteqartarfimmut allaganngorlugit tunniunneqartassapput, aammalu maalaaruteqartup maalaaruteqartarfiup sumik isummerfigisaqarnissaanut kissaataanik erseqqissaassummik imaqassalluni. Maalaarut maalaaruteqarnermi suliap attartortitsisumit naammassineqarneraniit kingusinnerpaamik sapaatit akunnerisa sisamat qaangiunnerini Ineqarneq pillugu Maalaaruteqartarfimmut nassiunneqassaaq. Pissutsinut attartortup suliaritikkusutaanut uppernarsaatissat pisariaqartut maalaarummut ilanngunneqassapput.
  Imm. 2.  Maalaarutip Ineqarneq pillugu Maalaaruteqartarfimmi suliarineqarnissaanut attartortoq annerpaamik 500 koruuninik sullissinermut akiliummik akiliissaaq. Maalaarutigineqartoq pillugu attartortoq taperserneqarpat imaluunniit suliaq Ineqarneq pillugu Maalaaruteqartarfimmi suliarineqarnissaminut naleqqutinngitsutut itigartinneqarpat, maalaaruteqarnermut akiliut utertillugu akilerneqassaaq.
  Imm. 3.  Attartortup suliaq eqqartuussivinnut suliakkiissutigineqareersoq Ineqarneq pillugu Maalaaruteqartarfimmut suliakkiissutigineqarnissaa kissaatigippagu, maalaaruteqartarfiup maalaarutip pissusiviusut tunngavigalugit suliarineqarnissaa itigartissavaa.
  Imm. 4. Pissutsit imm. 1-imi taaneqartut pillugit maalaarutit Ineqarneq pillugu Maalaaruteqartarfiup saniatigut allaffissornikkut oqartussamut allamut suliakkiissutigineqarsinnaanngillat.

 

  § 85. Ineqarneq pillugu Maalaaruteqartarfiup maalaarutip, maalaaruteqartarfimmi suliarineqarnissamut naleqqutinngitsutut nalilerneqarpat imaluunniit maalaarnissamut piffissarititaasup qaangiutereernerani tiguneqarsimappat suliarinissaa itigartissavaa. Maalaarutit, suliap isumannaatsumik paasissutissiiviginissaanut suliamut ilisimasalimmit misissorneqarnissaa naliliiffigineqarnissaalu, imaluunniit suliamut attuumassuteqartut takunnittullu nassuiaanissaat pisariaqarsimappata, Ineqarneq pillugu Maalaaruteqartarfiup itigartissavai.
  Imm. 2.  Maalaaruteqartarfiup maalaarut attartortup taperserneqarnissaanik ilimanaateqanngitsutut isigisariaqartoq suliariumanngissinnaavaa.
  Imm. 3.  Maalaaruteqartarfiup allattoqarfik imm. 1-imi 2-milu aalajangigassanik taaneqartunik aalajangiinissamut pisinnaatissinnaavaa.
  Imm. 4.  Ineqarneq pillugu maalaaruteqartarfiup allattoqarfiata aamma siulittaasup maalaaruteqarfiup tullianik ataatsimiinnissami suliassat piareersassavaat. Siulittaasoq aalajangiisinnaavoq suliassaq aalajangersimasoq misissorneqassasoq imaluunniit erseqqinnerusumik qulaajaaffigineqassasoq suliassap qanoq inernilerneqarnissaa pillugu inassuteqaammik suliaqarnermut atasumik. Tassunga atatillugu siulittaasup piumasarisinnaavaa suliami ilaasut illuatungeriit, pisortat aamma namminersortut paasissutissanik tunniussissasut.
  Imm. 5.  Suliap suliarisassanngortinneqarluni ilanngunneqarneraniit kingusinnerpaamik sapaatit akunnerisa marluk qaangiunnerini maalaaruteqartarfiup allattoqarfiata suliami illuatungiliuttoq suliakkiissuteqarneq pillugu ilisimatissavaa, tassanilu nalunaarutip nassiunneraniit sapaatit akunneri pingasut qaangiutsinnagit illuatungiliuttup suliamut isummaminik saqqummiussisinnaanera allanneqassaaq. Piffissamik killissarititaasoq tamanna maalaaruteqartarfiup sivitsorsinnaavaa, tamatumani immikkut ittunik pissutissaqartoqarpat.
  Imm. 6.  Allattoqarfik siulittaasup suliami pineqarlutik ilaasunut allanulluunniit apeqqutigisaanut akissuteqarnissamut piffissamik killiliissaaq, tamatumanilu nalinginnaasumik sapaatit akunneri pingasut qaangerneqarsinnaanngillat. Nalunaarutip nassiunneraniit piffissamut killissarititaasoq tamanna maalaaruteqartarfiup sivitsorsinnaavaa, tamatumani immikkut ittunik pissutissaqartoqarpat.
  Imm. 7.  Siulittaasup maalaaruteqartarfiup allattoqarfia noqqaaffigisinnaavaa inissiaq maalaarutigineqartoq suliamut attuumassuteqanngitsunit takuniarlugu misissorteqqullugu. Suliami pineqarlutik ilaasut sivikinnerpaamik sapaatip akunnera ataaseq sioqqullugu aggersarneqassapput. Takuniaalluni misissuinermut aningaasartuutit Naalakkersuisunit akilerneqassapput.
  Imm. 8.  Suliami pineqarlutik ilaasut takkunnerminni maalaaruteqartarfimmut nassuiaateqarsinnaanngillat.

 

  § 86.  Misissuinerit § 85, imm. 4-mi taaneqartut naammassineriniit kingusinnerpaamik sapaatit akunnerisa sisamat qaangiunnerini maalaaruteqartarfiup allattoqarfia suliap inassutitalimmik saqqummiunneqarnissaanut siunnersuusiussaaq, taannalu siulittaasumit saqqummiunneqassaaq. Siulittaasup inassutigineqartoq akuerippagu, siulittaasup inassutigineqartoq maalaaruteqartarfimmut saqqummiutissavaa.
  Imm. 2.  § 85, imm. 6 naapertorlugu akissuteqartoqarani piffissamut killiliussaq naappat, maalaaruteqartarfiup akissuteqannginneq illuatungiliuttumut pitsaanerpaamik sunniuteqartussatut nassuiarsinnaavaa, pingaartumillu taassuma saqqummiussaa aalajangiinermut tunngavigisinnaallugu.
  Imm. 3.  Ineqarneq pillugu maalaaruteqartarfiup aalajangigai nalinginnaasumik amerlanerussuteqarnikkut aalajangiiffigineqassapput. Taasisut amerlaqatigiippata siulittaasup taasinera aalajangiisuussaaq. Ineqarneq pillugu maalaaruteqartarfik aalajangiisinnaatitaavoq, siulittaasoq taassumaluunniit sinniisussaa ikinnerpaamillu ilaasortat marluk taakkuluunniit sinniisussaat najuuppata.
  Imm. 4.  Ineqarneq pillugu maalaaruteqartarfiup aalajangiineri allattaavinnut allanneqassapput. Aalajangiineq tamanit isumaqataaffigineqanngippat, aamma taarsineq pillugu paasissutissat ilanngunneqassapput.
  Imm. 5.  Ineqarneq pillugu maalaaruteqartarfiup aalajangiinera maalaaruteqartumut suliamilu illuatungeriittut peqataasunut allanut allakkatigut nalunaarutigineqassaaq. Aalajangiineq tunngavilersugaassaaq. Aalajangiineq tamanit isumaqataaffigineqanngippat, aamma taasineq taasisullu agguarneqarnerat pillugu paasissutissat aalajangiinermut ilanngunneqassapput.
  Imm. 6.  Ineqarneq pillugu Maalaaruteqartarfiup aalajangiineri § 82 a, nr. 1-4-imi pineqartunut ilaasunik attartortitsineq pillugu isumaqatigiissut naapertorlugu attartortitsisumut pisussaaffiliisumik atuutissapput. Attartortitsisoq avataaneersumik allaffissornikkut aqutsisussamik suliaqartitsippat, maalaaruteqartarfiup aalajangiineri taamatuttaaq tassunga pisussaaffiliisumik atuutissapput.
  Imm. 7.  Maalaarummik itigartitsineq allaffissornikkut aqutsinermi pisortanut oqartussaasunut allanut suliassanngorteqqinneqarsinnaanngilaq.

 

Kapitali 15
Ikaarsaariarnissamut atuutsilerfissaanullu aalajangersakkat

 

  § 87.  Inatsisartut peqqussutaat manna 1. juli 2005-imi atuutilerpoq.
  Imm. 2.  Tamatumunnga peqatigitillugu inissianik attartorneq pillugu Inatsisartut peqqussutaat nr. 5, 31. maj 2001-imeersoq, kingullermik Inatsisartut peqqussutaatigut nr. 3-kkut, 15. april 2003-meersukkut allannguuteqartinneqartoq atorunnaarpoq.
  Imm. 3.  Inatsisartut peqqussutaat imm. 2-mi taaneqartut tunngavigalugit nalunaarusiat allaffissornikkullu aqutsinermi aalajangersakkat pequssut manna tunngavigalugu aalajangersaanikkut allanngortinneqarnissamik imaluunniit atorunnaarsinneqarnissamik tungaannut atuutiinnassapput.

 

  § 88.  § 45, imm. 3 aamma §§ 77, 78 aamma 80, imm. 1 aamma 2 attartornernut, 1. januar 1990 sioqqullugu aallartissimasunut atuutissanngillat.
  Imm. 2.  Inissiani attartortittakkani namminersortunit pigisani attartornerit, Inatsisartut peqqussutaata matuma atuutilernissaa sioqqullugu attartornissamik isumaqatigiissuteqarfiusut, attartornerup atorunnaarnissaata tungaanut attartornermut aalajangersakkanut isumaqatigiissutit ingerlaannassapput.

 

Inissianik attartortitsisarneq pillugu Inatsisartut peqqussutaata allanngortinneqarnera pillugu Inatsisartut peqqussutaat^[i] (Inissiamik tigusinissamut ukiuni arfineq marlunni najugaqarsimasussaatitaaneq pillugu maleruagassanik allannguineq, inissiat piginneqatigiilluni inissianut imaluunniit inissianut nammineq pigisanut allanngortinneqarnerini attartortuni sinneruttut inatsisitigut inissisimanerat pillugu aalajangersakkat, Ineqarnermut maalaaruteqartarfiup piginnaatitaaffiinik erseqqissaaneq kiisalu aalajangersakkani ataasiakkaani teknikkikkut allannguutit.)

 

§ 2

 

Inatsisartut peqqussutaat 1. januar 2007-imi atuutilerpoq. § 1, nr. 4 aamma 5 piginneqatigiilluni inissiaatillit peqatigiiffiinut aamma nammineq pigisanik inissiaatillit peqatigiiffiinut ulloq atuutilerfissaq sioqqullugu pilersinneqarsimasunut atuutissanngillat.

 

Inissianik attartortitsisarneq pillugu Inatsisartut peqqussutaata allannguuteqartinneqarnissaa pillugu Inatsisartut peqqussutaat^[ii] (Piffissaq eqqorlugu akiliiffissatut piffissaliussap sivitsorneqarnissaa aamma akilinngitsuukkanik akiitsoqalernermi annaasanullu nalimmassaasoqarnerani akilersuisinnaanermut periarfissiineq il.il.)

 

§ 2

 

Inatsisartut peqqussutaat 1. januar 2009-mi atuutilerpoq.

 

Inissianik attartortitsisarneq pillugu Inatsisartut peqqussutaata allanngortinneqarnera pillugu Inatsisartut inatsisaat^[iii] (Sulisunut inissiamik tigusinissamut ukiunik 7-inik maleruagassaqarnermut allanngortitsineq)

 

§ 2

 

Inatsisartut inatsisaat ulloq 1. august 2017 atuutilerpoq.

 

Inissianik attartortitsisarneq pillugu Inatsisartut peqqussutaata allanngortinneqarnissaa pillugu Inatsisartut inatsisaat^[iv] (Pisortat inissiaataanni uumasuuteqarnissamut tunngatillugu maleruagassat allanngortinneqarnerat aamma attartortup toqukkut qimagunnerani il.il. attartukkap tiguneqartarnera pillugu)

 

§ 2

 

Inatsisartut inatsisaat ulloq 1. januar 2020 atuutilerpoq.

 

Ilinniartut ineqarfii pillugit Inatsisartut inatsisaat atortuulersinneqarpoq:^[v]

 

  § 50.  Inatsisartut inatsisaat manna atortuulerpoq ulloq 1. august 2020, taamaattoq tak. § 51.
  Imm. 2.  Ilutigisaanik atorunnaarsinneqarpoq Ilinniartut ineqarfii pillugit Namminersornerullutik Oqartussat nalunaarutaat nr. 18, ulloq 1. november 2007-imeersoq, aamma Inissianik attartortitsisarneq pillugu Inatsisartut peqqussutaanni nr. 2, 12. maj 2005-imeersumi § 3, imm. 3.

 

  § 51.  Malittarisassat §§ 2 aamma 3-miittut ilinniartutut inissamik tunineqartarneq pillugu § 50, imm. 2-mi eqqaaneqartutut najoqqutassani suli ilinniartut ineqarfiini najugaqartunut atuupput, ilinniartutut inissamik 1. august 2020 sioqqullugu tunineqarsimasunut. Attartornermut isumaqatigiissummik atorunnaarsitsinerni imaluunniit attartornermut isumaqatigiissummik taamaatitsinerni 1. august 2020 sioqqullugu atortuulersimasunik, ilinniartut ineqarfianni najugaqartoq ilinniartutut ineqarfimmik qinnuteqassaaq Inatsisartut inatsisaat manna tunngavigalugu.

 

Inissianik attartortitsisarneq pillugu Inatsisartut peqqussutaata allanngortinneqarnera pillugu Inatsisartut inatsisaat^[vi] (Attartornermut akiligassap piffissaq akilerneqarfissaa, inissianik attartortittakkanik oqoqalersimasunik nalunaarsuineq kiisalu suliffimmut atatillugu inissianik oqoqarsimasunik innersuunneqartunik itigartitsisinnaatitaaneq)

 

§ 2

 

Inatsisartut inatsisaat ullormi 1. januar 2022 atuutilissaaq. 
  Imm. 2.  § 1, nr. 8 aamma 25 piffissaq atuutilerfissaat pillugu Naalakkersuisut tamanna pillugu nalunaarutikkut aalajangersaanerisigut pissaaq.

 

Inissianik attartortitsisarneq pillugu Inatsisartut peqqussutaata allanngortinnera pillugu Inatsisartut inatsisaat^[vii] (Ineqarneq pillugu Maalaaruteqartarfiup pisortat inissiaatileqatigiiffiinut il.il. aalajangiisinnaatitaanerata annertusitinneqarnera)

 

§ 2

 

Inatsisartut inatsisaat manna ulloq 1. januar 2023 atuutilerpoq, aammalu attartortumut najugaqarfissatut attartortitsinissaq pillugu isumaqatigiissutinut ingerlasunut siunissamilu piumaartussanut atuutissalluni, taamaattorli tak. imm. 2 aamma 3.
  Imm. 2.  Maalaarutit, attartortumut najugaqarfissatut attartortitsineq pillugu isumaqatigiissutinik § 82 a, nr. 3-5-imi ilaatinneqartunik pioreersunik aallaaveqartut, Inatsisartut inatsisaanni matumani § 1, nr. 6-imi ilaatinneqartut maleruagassat nalinginnaasut naapertorlugit Ineqarneq pillugu Maalaaruteqartarfimmut ingerlatinneqartassapput. Pissutsit pillugit maalaarutit, 1. januar 2023 sioqqullugu tunniunneqarsimasut, Inatsisartut inatsisaata matuma atuutilerneraniit kingusinnerpaamik sapaatit akunneri sisamat qaangiunnerini Ineqarneq pillugu Maalaaruteqartarfimmut tunniunneqassapput.
  Imm. 3.  Ineqarneq pillugu Maalaaruteqartarfiup maalaarut, attartortumut najugaqarfissatut attartortitsineq pillugu isumaqatigiissutinik § 82 a, nr. 2-mi ilaatinneqartunik pioreersunik aallaaveqartoq, Inatsisartut inatsisaanni matumani § 1, nr. 6-imi ilaatinneqartoq itigartippagu, aammalu inissiap Namminersorlutik Oqartussanit kommunimilluunniit pigineqannginnera innersuussutigippagu, maalaaruteqartup suliap qaqeqqinneqarnissaa piumasarisinnaavaa. Suliap qaqeqqinneqarnissaanut piumasaqaat Inatsisartut inatsisaata matuma atuutilerneraniit kingusinnerpaamik sapaatit akunnerisa arfinillit qaangiunnerini allakkatigut tunniunneqassaaq. Kingusinnerusukkut qaqinneqarnissaanut piumasarinerani Ineqarneq pillugu Maalaaruteqartarfik piumasaqaammut itigartitsisinnaavoq.

 

 

Ineqarnermut Attaveqaasersuutinullu Naalakkersuisoqarfik, ulloq 9. oktober 2023

Ruth Lindhardt

Naalakkersuisoqarfimmi pisortaaneq

 

 

/ Embla Kristjánsdóttir