Inissianik attartortitsisarneq pillugu Inatsisartut peqqussutaanni § 82, imm. 1, § 82, imm. 5, aamma § 83, imm. 5 naapertorlugit Namminersorlutik Oqartussat nalunaarutaat nr. 52, 17. oktobari 2023-meersoq, Inatsisartut Inatsisaat nr. 55, 25. novemberi 2024-meersumi allannguutai imatut aalajangersarneqarput:

Ineqarneq pillugu maalaaruteqartarfiup sulinera

  § 1. Ineqarneq pillugu maalaaruteqartarfik, Namminersornerullutik Oqartussat kommunillu inissiaataanni attartortittakkani attartortitsisup attartortullu akornanni maalaarutinik allaffissornikkut inaarutaasumik aalajangiisartussaq pilersinneqarpoq.
  Imm. 2.  Naalakkersuisut ineqarneq pillugu maalaaruteqartarfimmut allatsitut ikiuutissapput.

  § 2.  Allattoqarfiup suliassaraa:

1) Ineqarneq pillugu Maalaaruteqartarfimmut allakkatigut, oqarasuaatikkut aammalu nammineq ornigullutik saaffiginnittunut akissuteqartarnissaq.

2) Suliassat Ineqarneq pillugu Maalaaruteqartarfimmi suliarineqartussat pillugit paasissutissiisarnermigut piareersaasarnermigullu siulittaasumut ikiuunnissaq.

  § 3.  Suliarissallugit itigartitsilluni aalajangiinerit allattoqarfiup Ineqarneq pillugu Maalaaruteqartarfik sinnerlugu suliarissallugit piginnaatitaaffigai.

  Imm. 2.  Allattoqarfiup aalajangiussai allattaavinnut allanneqassapput.

  § 4.  Maalaarutip piareersarneqarneranut atatillugu takuniaaneq Ineqarneq pillugu Maalaaruteqartarfiup suliamik isumagisaqarneranut piffissaliussat kinguartinneqarnerinik kinguneqarsinnaavoq.

  § 5.  Maalaaruteqartarfimmi aalajangiinerup kingorna kingusinnerpaamik sapaatit akunnerisa marluk qaangiunnerini aalajangiineq attartortumut attartortitsisumullu nalunaarutigineqarsimassaaq.

  Imm. 2.  Imm. 1-mut atatillugu attartortitsisup attartortullu akornanni isumaqatigiinngissutaasup eqqartuussivinnut ingerlateqqinneqarsinnaaneranut periarfissaqartoq Ineqarneq pillugu Maalaaruteqartarfiup erseqqissaatigissavaa.

  § 6.  Ineqarneq pillugu Maalaaruteqarfiup aalajangiinerata nassatarisaanik attartortitsisoq iliuuseqarnissamut pisussaaffilerneqarsimappat, iluarsisassat Ineqarneq pillugu Maalaaruteqartarfiup aalajangiinerata § 5 naapertorlugu saqqummiunneqarnerata kingorna kingusinnerpaamik sapaatit akunnerisa sisamat qaangiunnerini iluarsineqarsimassapput.

Ataatsimiigiarnissamut pisussaaffeqarneq

  § 7.  Siulittaasoq imaluunniit maalaaruteqartarfimmi ilaasortaq maalaaruteqartarfiup ataatsimiinneranut unioqqutitsinerunngitsumik peqataasinnaanngippat, siulittaasup imaluunniit maalaaruteqartarfimmi ilaasortap sinniisissaa ataatsimiigiassaaq.

  Imm. 2.  Siulittaasoq, maalaaruteqartarfimmi ilaasortaq taakkuluunniit sinniisissaat atuuttussamik ataatsimiigiaqquneqarsimagaluarlutik, unioqqutitsisumik peqataanngitsoornermik kinguneqartumik, maalaaruteqartarfiup ataatsimiinnerannut peqataanngippata, maalaaruteqartarfimmi ataatsimiinnerup kingorna kingusinnerpaamik sapaatit akunnerisa marluk qaangiunnerini Ineqarneq pillugu Maalaaruteqartarfiup siulittaasuanit tamanna pillugu nalunaarfigineqassapput. Ilisimatitsisoqareernerani Naalakkersuisut pineqartumut allakkatigut uparuaassapput.

  Imm. 3.  Takkutinngitsoortuartoqartillugu Naalakkersuisut pineqartup qinigaanera atorunnaarsinniarlugu aalajangersinnaapput.

  Imm. 4.  Innersuussuteqarnissamut piginnaatitaasoq qinigaanerup imm. 3 naapertorlugu atorunnaarsinneqarnerata kingorna kingusinerpaamik sapaatit akunnerisa pingasut qaangiunnerini inummik nutaamik Ineqarneq pillugu Maalaaruteqartarfimmut inassuteqassaaq.

Atuutsinneqalerfissaa

  § 8.  Nalunaarut ulloq 1. februaari 2025-mi atuutsinneqalissaaq.

Namminersorlutik Oqartussat, ulloq 31. januaari 2025

Hans Peter Poulsen (atsior.)

Ineqarnermut Attaveqaasersuutinuullu Naalakkersuisoq

/ Ruth Lindhardt (atsior.)