Inissianik attartorneq pillugu Namminersornerullutik Oqartussat peqqussutaanni nr. 3, 13. juni 1994-imeersumi, § 9, imm. 7, naapertorlugu aalajangersarneqarput:

Kapitali 1
Nalinginnaasumik

§ 1. Attartortitsisutut paasineqassaaq Inissiaatileqatigiiffik INI A/S, inissiaateqarfimmik imaluunniit illumik piginnittoq inissiaateqarfiup illuutilluunniit ingerlanneqarnera aqunneqarneralu pillugit inissiaatileqatigiiffimmik isumaqatigiissuteqarsimappat.

Kapitali 2
Ineqartut ataatsimíinnerannut aggersaaneq

§ 2. Inissiaateqarfimmi illuummiluunniit namminerisamik pigineqartumi, inissianik attartorneq pillugu Inatsisartut peqqussutaanni § 9 naapertorlugu attartortut ineqartut sinniisaannik qinersisinnaasaraangata, attartortoq kinaluunniit ineqartut sinniisaannik qinersinissamut ineqartunik ataatsimiigiaqqusisinnaatitaavoq.
Imm. 2. Ataatsimiigiaqqusineq minnerpaamik ullunik arfineq marlunnik piffissaliilluni pisassaaq naleqquttukkut allagarsiinikkut, atuagassiatigut takoqqussaarummik ilanngussinikkut imaluunniit inissiarsuarmi inissiarsuaniluunniit najugaqartunut tamanut allagaqarnikkut. Tamanna peqatigalugu inissiamik attartortitsisoq allakkatigut ataatsimiigiaqquneqassaaq.
Imm. 3. Najugaqartut ataatsimiinneranni peqataasinnaatitaapput inissiarsuarmi najugaqartut attartortitsisullu sinniisaat. Attartortoq allagartaq piginnaatitsissut atorlugu ataatsimiinnermi peqataannginnermini sinniiseqarsinnaavoq.
Imm. 4. Ineqartut ataatsimiittut aqutsisussartik namminneq toqqassavaat.
Imm. 5. Ineqartut ataatsimiittut ineqartut sinniisissaannik qinersinissamut tunngatillugu aalajangiisinnaassuseqassapput inissiat attartortinneqartut ikinnerpaamik arfineq pingajorarterutaat, minnerpaamilli pingasut, najuutsitaqarpata.

Kapitali 3
Ineqartut sinniisaat

§ 3. Ineqartut ataatsimiinneranni inissianik attartortut aalajangissavaat ineqartut sinniisaannik pilersitsisoqassanersoq, aammalu pilersitsisoqassappat ineqartut sinniisaat taakkualu sinniisussaat qassiussanersut.
Imm. 2. Ineqartut sinniisaat ikinnerpaamik pingasuussapput amerlanerpaamillu tallimaassaallutik. Inissianik attartortut najuuttut amerlanerussuteqartut aalajangiisussaapput. Inissiaq attartugaq ataaseq taasinermik ataatsimik naleqarpoq.
Imm. 3. Kinaluunniit nammineerluni aalajangiisinnaalersimasoq inissiarsuarmi, attartortuisa attartortitsisup tungaanut sinniisuutitaqalernissaminnik kissaateqarfigisaanni inissiat arlaanni najugalik ineqartut sinniisaattut qinigaasinnaavoq, attartorneq pillugu isumaqatigiissummi taaneqarsimanngikkaluaruniluunniit. Qinigaaffik ukiumik ataatsimik sivisussuseqarpoq. Qinigaaqqittoqarsinnaavoq.

§ 4. Ineqartut sinniisaasa qinigaareerunik attartortitsisoq qinersinerup inerneranik nalunaarfigissavaat ilisimatillugulu apeqqutit ineqartut sinniisaannik oqaloqatiginnissutigiumasani pillugit kimut saaffiginissinnaasoq.

§ 5. Ineqartut sinniisaasa isumagisassaraat ineqartut attartortitsisup tungaanut soqutigisaasa sulissutiginissaat taakkua inissiarsuit pillugit isumaasa siunnersuutaasalu attartortitsisumut saqqummiutttarnerisigut.
Imm. 2. Ineqartut sinniisaat ingerlatsinermi naatsorsuutinik takussutissinneqarnissaminnut aammalu pitsanngorsaatissanik siunnersuuteqarsinnaatitaanermut piginnaatitaapput, tamanna peqatigalugu innersuuteqarsinnaagunik pitsannguutigitinniakkat piviusunngortinnissaannut ingerlanneqarnissaannullu sutigut aningaasaliisoqarsinnaanersoq.

Kapitali 4
Inissiani maleruagassanut siunnersuut

§ 6. Ineqartut ineqartut ataatsimiinneranni siunnersuuteqarsinnaapput inissiani maleruagassanik isumaqatigiissutigineqarunik atortinneqartussanik, inissianik attartortitsisup peqquteqavilluni tamanna akerlilissanngippagu.
Imm. 2. Inissiani maleruagassatut siunnersuutit akuersissutigineqassappata inissianik attartortut tamakkerlutik amerlanersaat ineqartut ataatsimiinneranni akuersillutik taasisimasariaqarput.
Imm. 3. Siunnerssuut imm. 2-mi aalajangersagaq malillugu akuersissutigineqanngikkaluarluni attartortut ataatsimiinnermi najuuttut ikinnerpaamik affaannit tapersersorneqarpat qaammat ataaseq qaangiutsinnagu ineqartut ataatsimiiteqqinneqassapput. Ataatsimiinnermi tamatumani siunnersuut taasinerit affaannit akuersissutigineqarsinnaavoq ataatsimiigiarsimasut amerlassusiat apeqqutaatinnagu.

Kapitali 5
Ineqartut ataatsimiítinneqartarneri

§ 7. Ineqartut sinniisaasa qaammatisiutit malillugit ukiut tamaasa majip ulluisa siulliat nallersinnagu ineqartut pisarnertut ataatsiitinniartassavaat.
Imm. 2. Ataatsimiinnermi ullormut oqaluuserisassat minnerpaamik makku ilagisassavaat:
1)Ukioq qaangiuttoq pillugu nalunaarummik saqqummiussineq.
2)Ineqartut sinniisissaannik qinersineq.
Imm. 3. § 2-mi aalajangersakkat taamatulli malinneqassapput. Ineqartut ataatsimiittut aalajangiisinnaasuseqassapput inissianik attartortut arfineq pingajorarterutaat ataatsimiinnermi najuutsitaqanngikkaluarpataluunniit, tamaattorli takoqquneqarpoq § 6, imm. 2 aamma 3 kiisalu § 10.
Imm. 4. Ineqartut ataatsimiinneranni attartortut najuuttut akornanni amerlanerullutik taasisut aalajangiisuusassapput. Attartortut ataatsit ataatsimik taasisinnaapput. Taasisinnaatitaaneq inoqutigiit ilaannit imaluunnit allagartamik pisinnaatitsissummik tigummiartunit atorneqarsinnaavoq.

§ 8. Ineqartut immikkut ittumik ataatsimiitinneqarsinnaapput ineqartut sinniisaasa tamanna pisariaqarsorippassuk, inissianik attartortut ikinnerpaamik arfineq pingajorarterutaasa, ikinnerpaamilli pingasut, tamanna kissaatigippassuk, imaluunniit siusinnerusukkut ineqartut ataatsimiinneranni taamaaliornissaq aalajangiunneqarsimappat.
Imm. 2. § 7, imm. 3-mi aalajangersakkat taamatulli malinneqassapput.

Kapitali 6
Ineqartut sinniisaasa illersorneqarneri

§ 9. Inissianik attartorneq pillugu Inatsisartut peqqussutaanni § 30, imm. 1, nr. 1 naapertorlugu inissiamik attartortoq ineqartut sinniisaatilluni inigisaminit aneqquneqarsinnaanngilaq, akerlianilli attartortitsisup attartornissamik isumatigiissut atorunnaarsissinnaajuassallugu inissianik attartortitsineq pillugu Inatsisartut peqqussutaanni §§ 5, imm. 3, 22 aammalu 24-27-mi aalajangersakkat attartortup unioqqutissimappagit.

Kapitali 7
Ineqartut siinniiseqarnerup atorunnaarnera

§ 10. Ineqartut ataatsiinneranni § 2, imm. 5-imi taaneqartutut amerlatigisunik peqataasoqanngippat, attartortitsisup taassumaluunniit sinniisaata ataatsimiinnermi tamanna piumasarippagu, aammalu kingusinnerpaamik qaammatip ataatsip kingornagut ikinnerpaamik attartortut arfineq pingajorarterutaasa peqataaffigisaannik ineqartut ataatsimiitinneqanngippata ineqartut sinniiseqartitaanerat atorunnaassaaq.

Kapitali 8
Nalunaarutip atuutilerfia

§ 11. Nalunaarut atuutilerpoq ulloq 1. januar 1995
Imm. 2. Ineqartut sinniisaat pillugit nalunaarut nr 37, 21. december 1989-imeersoq atorunnaarsinneqarpoq.

Namminersornerullutik Oqartussat, ulloq 29. december 1994.

Emil Abelsen

/

Peter Beck