§ 1

Soraarnerussutisiaqalernissamut aaqqissuussinermut peqataasussaatitaaneq pillugu Inatsisartut inatsisaanni nr. 21, 28. november 2016-imeersumi, Inatsisartut inatsisaatigut nr. 18, 30. november 2020-mi allanngortinneqartumi makkuninnga allannguisoqarpoq:

1.  § 1, imm. 3, imatut oqaasertalerneqarpoq:
“  Imm. 3.  Soraarnerussutisiaqalernissamut aaqqissuussineq soraarnerussutisiaqarnissamut aningaasaateqarfimmi Danmarkimi imaluunniit Kalaallit Nunaanni nalunaarsorsimaffeqartumi imaluunniit inuunermut soraarnerussutisiaqalernissamullu sillimmasiisarfimmi Danmarkimi imaluunniit Kalaallit Nunaanni nalunaarsorsimaffeqartumi imaluunniit aningaaserivimmi Kalaallit Nunaanni nalunaarsorsimaffeqartumi aalajangersimasumilluunnit ingerlatsiveqartumi pilersinneqassaaq, imm. 4-li imaluunniit uani Centralforeningen for Stampersonels Pensionsfond (CS-Pensionsfond) imaluunniit HKKF-fond takuuk. Piumasaqaataavoq soraarnerussutisiaqarnissamut aningaasaateqarfik, inuunermut soraarnerussutisiaqalernissamullu sillimmasiisarfik imaluunniit aningaaserivik aningaasanik ingerlatsineq pillugu inatsimmi ilaassasoq suliffeqarfillu pineqartoq ingerlatsinissamut Finanstilsynimit akuerineqarluni.”

2. § 2 immikkoortoq 4-tut ikkunneqassaaq:
“  Imm. 4.  Imm. 2-mi nr. 1-4-mi aalajangersakkani akiliutit inuup tjenestemanditut soraarnerussutaanut tunngaviit ilaatinneqarput.”

3. § 3, imm. 1-4, imatut oqaasertalerneqarput:
“Inuup soraarnerussutisiaqalernissami aaqqissuussinermut akiliutai ukioq aningaasarsiorfimmi 2023-mi ileqqaarnissamut tunngavik 175.00 kr.-uppat qaffasinneruppalluunniit ileqqaarnissamut tunngaviup 7 procentianit annikinnerussanngilaq, imm. 2-li aamma 5 takukkit. Ukioq aningaasarsiorfimmi 2024-mit 2026-mut procenti ukiumut 1 procentimik qaffanneqartassaaq, taamaalilluni 2026-mi 10 procentiussalluni.
  Imm. 2.  Imm. 1-imi aalajangersagaq apeqqutaatinnagu inuup ukioq aningaasarsiorfimmi 2023-mi soraarnerussutisiaqalernissamut aaqqissuussinerminut akiliutai namminerisamik inuussutissarsiornermi sinneqartoorutit 175.00 kr.-uppata qaffasinneruppataluunniit sinneqartoorutit akileraarutaasussaatitaasut 5 procentiannit annikinnerussanngillat, imm. 5-imili takuuk. Ukioq aningaasarsiorfimmi 2024-mit ukiullu aningaasarsiorfiusuni tulliuttuni akiliutit namminerisamik inuussutissarsiornermi sinneqartoorutit akileraarutaasussaatitaasut 6 procentiannit annikinnerussanngillat.
  Imm. 3.  Imm. 1 malillugu qaffasissuseq atuuttoq inuit ileqqaarnissamut tunngaviat 125.000 kr.-uppat assigiiaamik 0 procentimit inuit ileqqaarnissamut tunngaviat 175.000 kr.-uppat 100 procentimut qaffanneqassaaq.
  Imm. 4.  Imm. 2 malillugu qaffasissuseq namminerisamik inuussutissarsiornermi inuit sinneqartoorutaat 125.000 kr.-uppat assigiiaamik 0 procentimit inuit sinneqartoorutaat 175.000 kr.-uppat 100 procentimut qaffanneqassaaq.”

4. § 7-imi, imm. 2, “2.000 kr.” uunga allanngortinneqarpoq: “4.000 kr.”.

§ 2

Inatsisartut inatsisaat ulloq 1. januar 2023 atuutilissaaq.

Namminersorlutik Oqartussat, ulloq 25. novembari 2022

Múte Bourup Egede
Naalakkersuisut Siulittaasuata