§ 1.  Inuk 18-ileereersimasoq Kalaallillu Nunaannut tamakkiisumik akileraartussaatitaasoq utoqqalinersiaqarneq pillugu Inatsisartut inatsisaanni § 1 naapertorlugu soraarninngornissani tikillugu soraarnerussutisiaqarnissamut aaqqissuussinermut akiliisassaaq.
Imm. 2.  Akiliisarneq kingusinnerpaamik aallartinneqassaaq ukiumi aningaasarsiorfiusumi inuup 18-inik ukioqalerfiata tulliani, ukiumilu aningaasarsiorfiusumi pineqartup soraarninngorfissaa nallerpat unitsinneqarsinnaalluni.
Imm. 3.  Soraarnerussutisiaqarnissamut aaqqissuussineq soraarnerussutisiaqarnissamut aningaasaateqarfimmi, sillimmasiisarnermik ingerlatsineq pillugu inatsimmi pineqartumi  inuunermut soraarnerussutisiaqarnissamulluunniit sillimmasiisarfimmi Finanstilsyn­imit akuersissummik peqarluni sillimmasiisarnermik ingerlatsisumi pilersinneqarsimassaaq imaluunniit aningaaserivimmi, Kalaallit Nunaanni angerlarsimaffeqartumi imaluunniit aalajangersimasumik ingerlatsiveqartumi kiisalu maani nunami aningaaserivimmik ingerlatsisinnaanissamut Finanstilsynet-imit akuersissuteqartumi.

§ 2.  Inuup soraarnerussutisiaqarnissamut aaqqissuussineranut ukiumi aningaasarsiorfiusumi akiliutit, ileqqaarnissamut tunngavissat 150.000 kr.-iuppata amerlaneruppataluunniit ileqqaar­nissamut tunngavissat 4 procentiinit ikinnerussanngillat. Ileqqaarnissamut tunngavissat tassaapput inuup aningaasarsiai A-t B-llu tamarmiusut aningaasanik, aningaasarsianit akileraarutit pillugit Inatsisartut inatsisaanni § 41, imm. 2 naapertorlugu aningaasarsianut akileraaruteqaataasussanut ilanngunneqartussaanngitsunik ilasat, taamaattorli tak. § 4.
Imm. 2.  Kisitsit imm. 1-imi taaneqartoq piffissami 2019-imiit 2024-mut ukiumut 1 procenti­mik qaffattassaaq, kisitsit taamaalilluni 2024-mi 10 procentinngussalluni.
Imm. 3.  Imm. 1-imi aalajangersagaq apeqqutaatinnagu inuup soraarnerussutisiaqarnissamut aaqqissuussinerminut akiliutai, sinneqartoorutit 150.000 kr.-iuppata amerlaneruppataluunniit, namminersorluni inuussutissarsiummik ingerlatsinikkut sinneqartoorutaasa akileraaruteqaa­taasussat 2 procentiinit ikinnerussanngillat.
Imm. 4.  Kisitsit imm. 3-mi taaneqartoq piffissami 2019-imiit 2022-mut ukiumut 1 procenti­mik qaffattassaaq, kisitsit taamaalilluni 2022-mi 6 procentinngussalluni.

  § 3.  Kisitsit § 2, imm. 1 naapertorlugu atuuttoq inuit ileqqaarnissamut tunngavissaat 100.000 kr.-iuppata kisitsit 0 procentimiit, inuit ileqqaarnissamut tunngavissaat 150.000 kr.-iuppata kisitsit 100 procentimut assigiiaamik qaffakkiartuaassaaq.
  Imm. 2.  Kisitsit § 2, imm. 3 naapertorlugu atuuttoq inuit sinneqartoorutaat 100.000 kr.-iuupata kisitsit 0 procentimiit, inuit sinneqartoorutaat 150.000 kr.-iuppata ki­sitsit 100 procentimut assigiiaamik qaffakkiartuaassaaq.

§ 4.  Ileqqaarnissamut tunngavissanik naatsorsuinermi makku naapertorlugit tunniunneqartartut ilanngunneqassanngillat:
1) Kalaallit Nunaanni Namminersornerullutik Oqartussani kommuninilu tjenestemandit pillugit Inatsisartut inatsisaat,
2) Tjenestemandit Inatsisartut suliffeqarfiini atorfillit pillugit Inatsisartut inatsisaat,
3) Naalagaaffimmi tjenestemanditut atorfillit Kalaallit Nunaanniittut pillugit inatsit,
4) Inuit annertuumik innarluutillit ikiorserneqartarnerat pillugu Inatsisartut peqqussutaat,
5) Meeqqanut tapiissutit pillugit Inatsisartut inatsisaat,
6) Meeqqanik inuusuttunillu ikiorsiisarneq pillugu Inatsisartut peqqussutaat,
7) Pisortanit ikiorsiissutit pillugit Inatsisartut peqqussutaat,
8) Utoqqalinermi pensionisiat pillugit Inatsisartut inatsisaat,
9) Siusinaartumik pensionisiat pillugit Inatsisartut inatsisaat,
10) Inissiani attartukkani ineqarnermut tapiissutit pillugit Inatsisartut inatsisaat, aamma
11) Ilinniagaqarnersiutit pillugit Inatsisartut inatsisaat.
  Imm. 2.  Ileqqaarnissamut tunngavissanik naatsorsuinermi makku aamma ilanngunneqassanngillat:
1)  meeqqanut akilersuutit, inuup angajoqqaavinit pisortanilluunniit akilerneqartussat, aamma
2)  pensionisiatut tunniunneqartut allat, Utoqqalinersiaqarneq pillugu Inatsisartut inatsisaanni pineqartunut ilaanngitsut.

§ 5.  Soraarnerussutisiaqarnissamut aaqqissuussinermut akiliutit, aningaasarsianut akileraaruteqaataasussanut ilanngunneqartussat imaluunniit akiliutit, aningaasarsianit akileraaruteqaataasussanit ilanngaatigineqarsinnaanngitsut ileqqaakkat § 2-mi taaneqartutut naatsorsorneranni akileraarutit ilanngaatigineqartinnagit amerlassusiinut naatsorsoqqinneqassapput.

§ 6.  Kialuunniit, akileraaruserinermik ingerlatsineq pillugu Inatsisartut inatsisaanni § 30 a, imm. 1-imi pineqanngitsumik pissuteqarluni soraarnerussutisiaqarnissamut aaqqissuussiner­nut akiliuteqarsimasup, ukiumi aningaasarsiorfiusumi qaangiuttumi akiliutaasimasut kingusinnerpaamik 1. maj akileraaruseriffimmut nalunaarutigisassavai.

§ 7.  Akileraaruseriffik, inuup soraarnerussutisiaqarnissamut aaqqissuussineranut akiliutissat minnerpaaffissaannik § 2-mi taaneqartunik ukiumi aningaasarsiorfiusumi qaangiuttumi akiliisoqarsimanera paasiniarlugu 31. august nallertinnagu naatsorsuissaaq.
  Imm. 2.  Inuup soraarnerussutisiaqarnissamut aaqqissuussineranut akiliutissat minnerpaaffissaat inorlugu akiliisoqarsimanera naatsorsuinerup takutippagu, nikingassut 1.000 kr.-init angi­neruppat akileraaruseriffiup inuk qinnuigissavaa taanna inuup soraarnerussutisiaqarnissamut aaqqissuussineranut sap.ak. 4-t qaangiutsinnagit akileeqqullugu, akiliinerlu akileraaruseriffimmut uppernarsaqqullugu.
  Imm. 3.  Imm. 2-mi piffissaliussaq qaangerneqarpat akileraaruseriffik skattekortimik nutaamik skattebilletsinilluunniit nutaanik sanasinnaavoq, nikingassut procentimut akileraarutissamut tapiliussatut akiligassiissutigalugu. Tapiliussaq annerpaamik tassaassaaq procentit § 2 naapertorlugu atuuttut.
  Imm. 4.  Akileraaruseriffiup tapiliussaq, tak. imm. 3, akilerneqartoq inuup soraarnerussutisiaqarnissamut aaqqissuussineranut ingerlateqqissavaa.
  Imm. 5.  Inuup soraarnerussutisiaqarnissamut aaqqissuussinermik atuuttumik peqarnera akileraaruseriffimmit ilisimaneqanngippat, akileraaruseriffiup pineqartoq soraarnerussutisiaqar­nissamut aaqqissuussinermik pilersitsissussinnaavaa, tak. § 8.

§ 8.  Naalakkersuisut piginnaatinneqarput soraarnerussutisiaqarnissamut aaqqissuussinernik akileraaruseriffiup § 7, imm. 5 naapertorlugu pilersitaanik isumaginninnissaq pillugu, soraarnerussutisiaqarnissamut aningaasaateqarfimmut, sillimmasiisarnermik ingerlatsineq pillugu inatsimmi pineqartumut, imaluunniit inuunermut soraarnerussutisiaqarnissamulluunniit sillimmasiisarfimmut, sillimmasiisarfimmik imaluunniit aningaaserivimmik ingerlatsinissamut Finanstilsynimit akuersissumik peqartumut Kalaallit Nunaanni angerlarsimaffeqartumut imaluunniit aalajangersimasumik ingerlatsiveqartumut aamma Finanstilsynimit akuersissummik peqarluni sillimmasiisarnermik ingerlatsisumut isumaqatigiissuteqarnissamut.

§ 9.  Inatsisartut inatsisaat 1. januar 2018-imi atortuulissaaq.

Namminersorlutik Oqartussat, ulloq 28. november 2016

Kim Kielsen