Kommunit Namminersorlutillu Oqartussat missingersuutaat naatsorsuutaallu pillugit Inatsisartut Inatsisaanni nr. 26, 28. november 2016-imeersumi § 46, imm. 2 aamma 4 naapertorlugu aalajangersarneqarput:

Aningaasaqarnermut Siunnersuisooqatigiit katitigaanerat

  § 1. Aningaasaqarnermut Siunnersuisoqatigiit siulittaasoqarfimmit 6-inik inuttaqartumit, tamatumalu saniatigut 14-inik ilaasortaqartumit, aqunneqarput.

  Imm. 2.  Naalakkersuisut siulittaasoqarfimmi ilaasortanik ukiut pingasukkaarlugit toqqaasassapput, taamaattoq takuuk § 12.

  Imm. 3.  Siulittaasoqarfimmi inuk ataaseq arlallilluunniit naleqquttunik piginnaasaqartoqartoq Aningaasaqarnermut Siunnersuisoqatigiit suliassaasa isumagineqarnerannut ikiuunnissamut piffissami isumaqatigiissutigineqartumi aalajangiisinnaatitaanani ilaasortaasinnaavoq.

Imm. 4. Naalakkersuisut inassuteqaatit makkua malillugit piffissani ukiunik pingasunik sivisussusilinni Aningaasaqarnermut Siunnersuisoqatigiinni ilaasortat sinneri toqqassavaat:

1) ilaasortat 4-t Aningaasaqarnermut Naalakkersuisumit inassutigineqartut,

2) ilaasortat 2-t kommuninit ataatsimoorullugu inassutigineqartut,

3) ilaasortaq 1 Ilisimatusarfimmit inassutigineqartoq,

4) ilaasortat 1 Pinngortitaleriffimmit inassutigineqartoq,

5) ilaasortat 2-t Sulinermik Inuussutissarsiuteqartut Kattuffianit (SIK), Atorfillit Katuffianit (AK), Ilinniartitsisut Meeqqat Atuarfianneersut Kattuffianit (IMAK), Nunatsinni Perorsaasut Kattuffianit (NPK), Peqqinnissaq Pillugu Kattuffianit (PPK) aamma Ilinniagartuut Kattuffiannit (IK/ASG) ataatsimoorullugu inassutigineqartut,

6) ilaasortat 1 Sulisitsisunit inassutigineqartoq,

7) ilaasortat 2-t aningaaserivinnit Kalaallit Nunaanni angerlarsimaffeqartunit imaluunniit aalajangersimasumik ingerlatsiveqartunit inassutigineqartut,

8) ilaasortat 1 KNAPK-mit inassutigineqartoq.

  Imm. 5.  Inassuteqarnermi angutit arnallu naligiissitaanerat pillugu Inatsisartut inatsisaanni § 8, imm. 1-imi aamma 2-imi aalajangersakkat malinneqassapput.

  § 2.  Aningaasaqarnermut Siunnersuisoqatigiit sulinerminni Naalakkersuisunut attuumassuteqanngillat.

  § 3.  Aningaasaqarnermut Siunnersuisoqatigiinni ilaasortanik toqqaanermi, ilanngullugu Aningaasaqarnermut Siunnersuisoqatigiit siulittaasoqarfianik, pineqartut aningaasaqarnermut apeqqutini ilisimasaqarnerat paasisimasaqarnerallu aalajangiisuulluinnartumik pingaartinneqassaaq.

  Imm. 2.  Siulittaasoqarfimmut ilaasortassanik toqqaasoqartussanngornerani, siulittaasoqarfiup atuuttup piukkunneqartunut sulianut naleqquttunut siunnersuutinut allattuiffik Naalakkersuisutnut saqqummiutissavaa. Allattuiffik isertuussassaavoq. Naalakkersuisut siulittaasoqarfimmi ilaasortassanik allanik, siulittaasoqarfiup allattugaanni allassimasunit allaanerusunik, killilersugaanngitsumik toqqaasinnaapput, taamaattoq takuuk imm. 1.

  § 4.  Inatsisartuni imaluunniit Naalakkersuisuni ilaasortat peqatigisaanik Aningaasaqarnermut Siunnersuisoqatigiinni ilaasortaasinnaanngillat.

Aningaasaqarnermut Siunnersuisoqatigiit suliassaat ataatsimiittarnerilu

  § 5.  Siulittaasoqarfik tamanut saqqummiunneqartussamik ukiumoortumik nalunaarusiortassaaq. Aningaasaqarnermut Siunnersuisoqatigiinni ilaasortat nalunaarusiap imarisaanut oqaaseqaateqarsinnaapput, nalunaarusialli imarisassai siulittaasoqarfimmit taamaallaat akisussaaffigineqassapput.

  Imm. 2. Aammattaaq siulittaasoqarfik tamanut saqqummiunneqartussanik sulinermi allakkiortarsinnaavoq imaluunniit teknikimut tunngassutilinnik allakkiortarsinnaalluni.

  § 6. § 5 malillugu nalunaarusiornissap saniatigut Aningaasaqarnermut Siunnersuisoqatigiit namminersorlutik pisortallu ingerlatsiveqarfiini naammassisaqarsinnaassutsip ineriartorneranik naliliinernik suliaqartassapput.

  § 7.  Aningaasaqarnermut Siunnersuisoqatigiit siulittaasoqarfiup nalunaarusiaa oqallisiginiarlugu annikinnerpaamik ukiut ataasiarlutik ataatsimiittassapput.

  Imm. 2.  Siulittaasoqarfiup Aningaasaqarnermut Siunnersuisoqatigiinni ataatsimiittarnerit aaqqissuutissavaat.

Aningaasarsiaqartitsineq amingaasartuutinullu

  § 8. Aningaasaqarnermut Siunnersuisoqatigiit siulittaasuat sulinerminut ukiumut 100.000 koruuninik aningaasarsiaqartinneqassaaq. Siulittaasup tullia aamma siulittaasoqarfimmi ilaasortat allat kiisalu inuit siulittaasoqarfimmi aalajangiisinnaanatik ilaasortaasut ukiumut 50.000 koruuninik aningaasarsiaqartinneqassapput.

  Imm. 2.  Qaammatisiutit malillugit ukiup affaanut siullermut aningaasarsiarititassat 50 procentii aggustimi kingumoortumik tunniunneqassapput aammalu qaammatisiutit malillugit ukiup affaata aappaanut 50 procentii ukiup tulliani februaarimi tunniunneqassallutik.

  Imm. 3. Ilaasortap imaluunniit aalajangiisinnaatitaanani ilaasortap ilaasortanngornerani imaluunniit ilaasortaajunnaarnerani, qaammammut aningaasarsiassanik siusinnerusukkut tunniussisoqarsimanngippat, aningaasarsiarititassat aqqaneq marlorarterutaat qaammatip pineqartup ilaasortaaffigisaata imaluunniit aalajangiisinnaatitaanani ilaasortaaffigisaata aallartinneri tamaasa tunniunneqartassapput.

  § 9.  Aningaasartuutit ilaasortat § 1, imm. 4-mi taaneqartut Aningaasaqarnermut Siunnersuisoqatigiit suliaanni peqataanerannut il.il.  tunngassuteqartut, inassuteqarsinnaatitaasumit akilerneqassapput, taamaattoq takuuk imm. 2.

  Imm. 2.  Aningaasartuutit Namminersorlutik Oqartussani atorfilinnut tunngassuteqartut, naalakkersuisoqarfimmi suliassaqarfimmi, pineqartup ulluinnarni suliffigisaanit, akilerneqassapput.

Aningaasaqarnermut Siunnersuisoqatigiit allattoqarfiat

  § 10.  Aningaasaqarnermut Siunnersuisoqatigiinnut allattoqarfeqartitsineq Aningaasaqarnermut Naalakkersuisoqarfimmit isumagineqassaaq.

Atuutilernera aamma ikaarsaarnermut aalajangersakkat

  § 11.  Nalunaarut ulloq 1. januar 2020 atuutilerpoq.

  Imm. 2.  Nalunaarutip atuutilernerata kingorna aningaasarsianik tunniussineq 2020-imi februarimit atuutilersumik pissaaq, takuuk § 8, imm. 2.

  § 12. Nalunaarutip atuutilernerata kingorna siullermeertumik siulittaasoq aamma siulittaasoqarfimmi ilaasortaq alla piffissamut ukiumik ataatsimik sivisussusilimmut toqqarneqassapput, aammalu siulittaasup tullia aamma siulittaasoqarfimmi ilaasortaq alla ataaseq piffissamut ukiunik marlunnik sivisussusilimmut toqqarneqassallutik.

Namminersorlutik Oqartussat, ulloq 24. juli 2020

Vittus Qujaukitsoq

/

Nikolai S. Christensen