§ 1

Meeqqanut tapiissutit pillugit Inatsisartut inatsisaanni nr. 9, 7. december 2009-imeersumi ima allannguisoqarpoq:

1. Kapitalitut qulequtaq Kapitali 1 ima oqaasertalerneqassaaq:

“Kapitali 1

Aalajangiineq naatsorsuinerlu”

2. § 1, imm. 1, nr. 4 ima oqaasertalerneqassaaq:

”4)  Meeqqanik inuusuttunillu ikiorsiisarneq pillugu Inatsisartut peqqussutaat imaluunniit Meeqqat tapersersorneqarnissaannut Inatsisartut inatsisaat naapertorlugit meeraq angerlarsimaffiup avataanut pisortanit inissinneqarsimassanngilaq allatigulluunniit pisortanit pilersorneqarluni aamma”

3. § 3 ima oqaasertalerneqassaaq:

”  § 3. Procenti aaqqiissutissaq aamma maannakkorpiaq aningaasarsiat pillugit Inatsisartut inatsisaanni § 5 naapertorlugu meeqqanut tapiissutit maannakkorpiaq aningaasarsiat aallaavigalugit naatsorsorneqassapput.

  Imm. 2. Angajoqqaat najugaqatigiippata, angajoqqaat maannakkorpiaq ataatsimoortumik aningaasarsiaat aallaavigalugit meeqqanut tapiissutit naatsorsorneqassapput.

  Imm. 3. Meeraq angajoqqaami arlaanni najugaqarpat, meeqqamut tapiissutit angajoqqaap najugaqarfigisaata maannakkorpiaq aningaasarsiai aallaavigalugit naatsorsorneqassapput. Angajoqqaaq taanna meeqqamut angajoqqaajunngitsumik katissimappat aappaqarpalluunniit, minnerpaamillu ukioq 1 aappariissimappata, aappaasup maannakkorpiaq aningaasarsiai naatsorsuinermut ilanngunneqassapput.

  Imm. 4. Meeraq angajoqqaamini tamani naligiimmik najugaqartarpat, meeqqap inunnik nalunaarsuisarfimmi nalunaarsorneqarfigisaani angajoqqaap maannakkorpiaq aningaasarsiai tunngavigalugit meeqqanut tapiissutit naatsorsorneqassapput.

  Imm.5. Maannakkorpiaq aningaasarsiat naatsorsuinermi tunngaviusut malunnaatilimmik allannguuteqarpata imaluunniit meeqqat amerlassusaat allanngorpat, allannguutit naapertorlugit meeqqanut tapiissutit naatsorsorneqaqqissapput.  Maannakkorpiaq aningaasarsiat malunnaatilimmik allanngorsimatillugit,

procenti aaqqiissutissaq aamma maannakkorpiaq aningaasarsiat pillugit Inatsisartut inatsisaanni § 6-imi malittarisassat naapertorlugit maannakkorpiaq aningaasarsiat naatsorsorneqassapput.

  Imm. 6.  Ilaqutariit Kalaallit Nunaannut nuuttut, § 1-imi piumasaqaatit naammassisimappatigit, nuunnermik kingorna qaammatip aallaqqaataaniit meeqqanut tapiissutinik tunineqarsinnaapput. Procenti aaqqiissutissaq aamma maannakkorpiaq aningaasarsiat pillugit Inatsisartut inatsisaanni § 6 naapertorlugu meeqqanut tapiissutit, maannakkorpiaq aningaasarsiassatut naatsorsuutigisat allaavigalugit naatsorsorneqassapput.”

4. § 4 ima oqaasertalerneqassaaq:

”  § 4. Ukiumoortumik meeqqamut ataatsimut tapiissutit qaffasinnerpaaffissaasa annertussusaat tassaapput 8.477 kr.-it.

  Imm. 2.  Meeqqanut tapiissutit aningaasarsiat annertusiartornerat ilutigalugu annikillilerneqassapput. Maannakkorpiaq aningaasarsiat 130.000 kr.-it anguppatigit meeqqanut tapiissutit annikillilerneqalissapput. Aningaasanut killigititaq taanna meeqqap siulliup saniatigut meeqqanut, meeqqamut ataatsimut 25.000 kr.-inik qaffanneqassaaq.

  Imm. 3.  Annikilliartortitsineq pissaaq annikilliartortitsinermut procentit nikerartut atorlugit.

Meeqqamut ataatsimut, naatsorsuinermut tunngavigineqartumut, annikilliartortitsinermut procenti 3,5 pct.-iuvoq.

  Imm. 4.  Meeqqanut tapiissutit ima naatsorsorneqassapput aningaasarsiatut tunngavik annikilliartortitsinermi procentimik atorneqartumik amerlisariarlugu meeqqanut tapiissutinit annerpaanit ilanngaatigineqassalluni.  Imm. 2 naapertorlugu aningaasarsiat tunngaviusut tassaapput maannakkorpiaq aningaasarsiat, aningaasarsiat apeqqutaatillugit ilanngaatissanik ilanngarlugit.

  Imm. 5.  Meeqqanut tapiissutit imaluunniit aningaasarsiat tunngaviusut negativiusinnaanngillat.

Imm. 6 . Procenti aaqqiissutissaq aamma maannakkorpiaq aningaasarsiat pillugit Inatsisartut inatsisaanni § 3 naapertorlugu imm. 1-imi aamma imm. 2-mi aningaasat ukiumi naatsorsuiffimmi pineqartumi procenti aaqqiissutissaq malillugu ukiut tamaasa aaqqiivigineqartassapput.”

5. § 6, imm. 5, ima oqaasertalerneqassaaq:

”  Imm. 5.  Meeqqanut tapiissutit tunniunneqartarnerannut malittarisassanik Naalakkersuisut aalajangersaasinnaapput, matumani inersimanngitsunut tapiissutinik tunniussisarnermi aqutsinermilu malittarisassat aamma aningaasat tunniunneqartussat minnerpaaffissaannik aalajangersaaneq ilanngullugit.”

6. § 9, imm. 2, ima oqaasertalerneqassaaq:

”  Imm. 2.  Maannakkorpiaq aningaasarsiat, meeqqanut tapissutit naatsorsorneqarnissaannut tunngaviusussat, pillugit kommunalbestyrelse paasissutissanik piniarsinnaavoq.”

7. § 11 ima oqaasertalerneqassaaq:

”  § 11.  Inatsisartut inatsisaanni matumani malittarisassat naapertorlugit aalajangiinerit, isumaginnittoqarfiup aqunneqarnera aaqqissuussaaneralu pillugit inatsimmi malittarisassat naapertorlugit, Isumaginninnermi Naammagittaalliuuteqartarfimmut naammagittaalliutigineqarsinnaapput.”

§ 2

Inatsisartut inatsisaat atuuttuulerpoq 1. januar 2019.

Namminersorlutik Oqartussat ulloq 27. november 2018