Inatsisartut inatsisaanni  nr. 26 novembarip 28-anni 2016-imeersumi kommunit Namminersorlutillu Oqartussat missingersuutatt naatsorsuutaallu pillugit § 36 naapertorlugu makku aalajangersarneqarput:

Kapitali 1
Atuuffia

  § 1.  Nalunaarut manna Namminersorlutik Oqartussat suliffeqarfiutaannut nammineertitanut ukununnga taamaallaat atuuppoq Nukissiorfiit, Mittarfeqarfiit aamma Asiaq.
  Imm. 2.  Imm. 1-imi suliffeqarfiit taaneqartut ukiumoortumik naatsorsuusiortarnerminni Nunatta Karsiata aningaasaqarnermut ukiua malissavaat.

Kapitali 2
Ukiumoortumik naatsorsuusiortarneq pillugu inatsisimmi aalajangersakkat atortarneri

§ 2.  Nukissiorfiit Kalaallit Nunaanni ukiumoortumik naatsorsuusiortarneq pillugu inatsit pillugu peqqussut qaqugukkulluunniit atuuttoq naapertorlugu Sanaartukkat innaallagissamut sakkortuumut atugassat atortullu innaallagiatortut pillugit Inatsisartut peqqussutaat nr. 12, 3. november 1994-imeersumi aammalu Nukissamik pilersuineq pillugu Inatsisartut peqqussutaat nr. 14, 6. november 1997-imeersumi malittarisassat malillugit inuiaqatigiit isiginiarlugit suliffeqarfik Namminersorlutik Oqartussat  pigisaattut ingerlanneqartuunerata kingunerisaanik nikingassutit atorlugit ukiumoortumik nalunaarusiortassapput.

§ 3.  Mittarfeqarfiit  Kalaallit Nunaanni ukiumoortumik naatsorsuusiortarneq pillugu inatsit pillugu peqqussut qaqugukkulluunniit atuuttoq naapertorlugu inuiaqatigiit isiginiarlugit suliffeqarfik Namminersorlutik Oqartussat pigisaattut ingerlanneqartuunerata kingunerisaanik nikingassutit atorlugit ukiumoortumik nalunaarusiortassapput.

§ 4.  Asiaq Kalaallit Nunaanni ukiumoortumik naatsorsuusiortarneq pillugu inatsit pillugu peqqussummi qaqugukkulluunniit atuuttumi inuiaqatigiit isiginiarlugit suliffeqarfik Namminersorlutik oqartussat pigisaattut ingerlanneqartuunerata kingunerisaanik nikingassutit atorlugit ukiumoortumik nalunaarusiortassapput.

  § 5.  §§ 2-4 naapertorlugit naatsorsuusiortarnermut malittarisassani nikingassutit ukiumoortumik nalunaarusiani naatsorsuusioriaatsip atorneqartup ataani allanneqartassapput.

Kapitali 3
Ukiumoortumik nalunaarutip il.il. avammut saqqummiunneqartarnerat

  § 6.  Ukiumoortumik nalunaarusiat Nunap Karsiata naatsorsuutaannut ilaapput.
Imm. 2.  Naalakkersuisoqarfiup suliassaqarfinnik akisussaasup ukiumoortumik nalunaarut Aningaasaqarnermut Akileraartarnermullu Naalakkersuisoqarfimmut nassiuttassavai.
Imm. 3.  Ukiumoortumik nalunaarusiaq taassumaluunniit ilaa Naalakkersuisunut saqqummiunneqarsimatinnagit avammut saqqummiunneqartassanngillat.
Imm. 4.  Ukiumoortumik nalunaarusiaq Inatsisartunut Nunap Karsiata ukiumut aningaasaqarfiusumut pineqartumut naatsorsuutaat ilanngullugit akuerineqarnissaat siunertaralugu Inatsisartunut saqqummiunneqartassapput.

  § 7.  Suliffeqarfik ukiumoortumik nalunaarusiaq tamarmiutillugu saqqummiuppagu, tamanna kukkunersiorneqaranni ilusaat oqaasertaalu atorlugit kukkunersiuinermilu oqaaseqaatit ilanngullugit pissaaq.
  Imm. 2.  Ukiumoortumik nalunaarusiaq ilaannakortumik saqqummiunnerani, ukiumoortumik nalunaarusiaq naalisarneqarnikoq avammut saqqummiussinermi ersarissumik allaqqassaaq. Kukkunersiuinermi oqaaseqaatit avammut saqqummiussinermi naalisarlugit ilanngunneqartariaqanngillat, kukkunersiuisorli nangaassuteqarsimanersoq avammut saqqummiussinermi ersarissumik allaqqassaaq.

Kapitali 4
Kukkunersuineq

  § 8.  Ukiumoortumik naatsorsuutit kukkunersiuisumit naalagaaffimmit akuerisaasumit Inatsisartunit toqqarneqartumit nunap karsiata naatsorsuutaanik kukkunersiuisumit kukkunersiorneqassapput.
  Imm. 2.  Kukkunersiuisup tamat kukkunersuinermi ileqqugisartagaat naapertorlugit ukiumoortumik naatsorsuutit kukkunersiortassavai, tassungalu ilanngullugu suliffeqarfiup naatsorsuusiornermi atortui taakkulu imarisaat allat isornartorsiuilluni misissussallugit.
  Imm. 3.  Kukkunersiuisoq pissutsinik sulinermini ilisimalikkaminik pisortanilu ilaasortat suliffeqarfimmut, Nunap Karsianut, akiitsoqarfinnut sulisunulluunniit kalluaasumik taarsiisussaatitaaffigilersinnaasaminnik pillarneqaatigisinnaasaminnilluunniit iliuuseqarsimanerannik iliuuseqarsimannginnerinnilluunniit tunngavissaqartumik ilimasuuteqarnerminik immikkut paasissutissiisassaaq.
 Imm. 4.  Kukkunersuisup Inatsisartut piumasaqaataat inatsisinut imaluunniit kukkunersiuinermi ileqqorissaarnermut akerliunngippata malissavai.

§ 9.  Suliffeqarfimmi pisortat paasissutissat suliffeqarfimmik taassumalu ukiumoortumik nalunaarusiaanik naliliinermut pingaaruteqartutut isigineqarsinnaasut kukkunersiuisumut paasissutissiissutigisassavaat.
  Imm. 2.  Suliffeqarfimmi pisortat kukkunersiuisup pisariaqartutut isigisaanik misissuisinnaatissavaa, isumagisssallugulu kukkunersiuisup paasissutissanik pissarsinissaa kukkunersiuisullu suliaminik ingerlatsinerminut pingaaruteqartutut isigisaanik ikiussallugu.
  Imm. 3. Suliffeqarfinni pisortat kukkunersiuinermi allattuivik atsiornermikkut akuerissavaat.

§ 10.  Kukkunersiuineq naammassereerpat, kukkunersiuisup ukiumoortumik nalunaarusiamik kukkunersiuisimanini tamassumunngalu pisariaqartunik iliuuseqarsimanini naatsorsuutinut oqaaseqaateqarnermigut uppernarsassavai.

§ 11.  Kukkunersiuisoq Inatsisartut atugassaannik kukkunersiuinermi allattuvimmut allattuisassaaq.

§ 12.  Kukkunersiuisoq sulisuilu suliffeqarfiup naatsorsuutai pissutsillu allat pillugit susassaqanngisunut paasissutissiisassanngilaq.

Kapitali 5
Atuutilersitsineq

§ 13.  Nalunaarut ulloq 1. januar 2018-imi atuutilersinneqarpoq, takujulli imm. 2.
  Imm. 2.  § 3-mi aalajangersagaq ulloq 1. januar 2019 atuutilersinneqarpoq
  Imm. 3. Namminersornerullutik Oqartussat suliffeqarfiutaasa namminersortitat naatsorsuuseriveqarnerat il.il. pillugit Namminersornerullutik Oqartussat nalunaarutaat nr. 25, 26. november 1998-imeersoq 1. januar 2018-imi atuutilersumik suliffeqarfinnut § 2-mi aamma § 4-mi taaneqartunut atuukkunnaarpoq.
  Imm. 4.  Namminersornerullutik Oqartussat suliffeqarfiutaasa namminersortitat naatsorsuuseriveqarnerat il.il. pillugit Namminersornerullutik Oqartussat nalunaarutaat nr. 25, 26. november 1998-imeersoq ulloq 1. januar 2019 atorunnaarsinneqarpoq.

Namminersorlutik Oqartussat ulloq 22. december 2017.

Aqqaluaq B. Egede

/

Nikolai S. Christensen