Avatangiisit innarlitsaaliorneqarnissaannik Inatsisartut peqqussutaanni nr. 9-imi, 22. november 2011-meersumi, Inatsisartut inatsisaatigut nr. 1-ikkut 29. maj 2012-imeersukkut allannguuteqartinneqartumi § 10, imm. 1, nr. 15-16, § 10, imm. 1, nr. 19. § 18, imm. 1, nr. 1-7, § 48, § 56, imm. 1, § 66, imm. 3, aamma § 67, imm. 1 tunngavigalugit makku aalajangersarneqarput:

Siunertat atuuffiillu

§ 1.  Nalunaarut anartarfiit imaannik aamma imermik errortuivikumik eqqaanermut atuuppoq.
Imm. 2.  Aammattaaq nalunaarut pisortat inuinnaallu imermut errortuivikumut katersuiviinut atuuppoq.
Imm. 3.  Sumiiffiit kommunit aggornerisa avataanniittut nunami susassaqarfittut isigineqarput, aammalu Avatangiisinut Naalakkersuisumit aqutarineqarlutik.

Nassuiaatit

§ 2.  Uku imatut paasineqassapput:
1) Imeq sunaluunniit najugaqarfinnit, suliffeqarfinnit sanaartukkanillu allanit kuutsinneqartoq imertut errortuivikutut isigineqassaaq. Imermut errortuivikumut ilaatinneqartut tassaapput imeq errortuivikoq illunit kuutsinneqartoq: imeq errortuivikoq mingoqannginnerusoq, imeq errortuivikoq mingoqarnerusoq, sulinermit imeq errortuivikoq kuutsinneqartoq,  imeq imaarsaanermi kuutsinneqartoq kiisalu imeq illut qaavinut nunallu qaavanut kuuttoq.
2)  Imeq illut qaavinut, imaartarfinnut nunallu qaavanut kuuttoq tassaavoq imeq nittaalarnerani illup qaavinut nunaminertanullu tamakkiisumik ilaannaasumilluunniit aalaakkaasunngorlutik sulianut torartoq. Imeq illut qaavinut, imaartarfinnut nunallu qaavanut kuuttoq akuutissanik, nunaminertanit taamaattunit nalinginnaasumik kuuttoqarnerani nassatarineqarsinnaasunik allanik akoqassanngilaq, imaluunniit allatut annertuumik akuugaassanani.
3)  Illunit imeq errortuivikoq tassaavoq angerlarsimaffinnit imeq kuutsinneqartoq, tassungalu ilaavoq imeq anartarfinnit imermik errortortakkanit kuutsinneqartoq.
4)  Imeq errortuivikoq mingoqannginnerusoq tassaavoq imeq illunit kuutsinneqartoq, tassungalu imeq anartarfinnit imermik errortortakkanit kuutsinneqartoq ilaanngilaq.
5)  Imeq errortuivikoq mingoqarnerusoq tassaavoq imeq anartarfinnit imermik errortortakkanit kuutsinneqartoq.
6)  Anartarfiit imaartakkat tassaapput eqqagassat inuit timaannit pisuusut, tassalu qooq anarlu.
7)  Sulinermit imeq errortuivikoq tassaavoq suliffeqarfiit tunisassiornerinit imeq kuutsinneqartoq.
8)  Imermut errortuivikumut kuuffeqarfiit tassaapput kussinerit ammasut, taamatullu aqqusersuutit matoqqasut atortullu allat, katersuivimmut kuutsitsiviusut imaluunniit imermik errortuivikumik akuiaaviusut il.il.
9)  Imermut errortuivikumut kuuffeqarfiit pisinnaasaat tassaapput erngup errortuivikup annertussusii, akuutissanik mingutsitsisunik, nunap kuuffeqarfittut aalajangersarneqartup iluani illumit ataatsimit amerlanerusunilluunniit kuutsinneqarsinnaasunik imaqartut.
10)  Pisortat imermut errortuivikumut kuuffeqarfii tassaapput imermut errortuivikumut kuuffeqarfiit, ingerlanneqarnerminni aamma/imaluunniit aserfallatsaaliorneqarnerminni kommunalbestyrelsinit akisussaaffigineqartut.
11)  Namminersortut imermut errortuivikumut kuuffeqarfii tassaapput imermut errortuivikumut kuuffeqarfiit, nr. 10-mut ilaatinneqanngitsut.
12)  1 personækvivalent (PE), nalunaarummi matumani allassimasoq tassaavoq, ukiumut akuutissat uumassusillit 21,9 kg-t, iltimik biokemiskiusumik (BI5), ukiumut kvælstof-imik katillugit 4,4 kg-nik imaluunniit ukiumut fosfor-imik  katillugit 1,0 kg-nik atuisutut uuttorlugit.
13)  Anartarfiit imermik errortortakkat tassaapput anartarfiit imermut imermullu errortuivikumut kuuffeqarfimmut, soorlu pisortat kuuffeqarfiinut katersuivimmulluunniit atassuserneqarsimasut.
14)  Anartarfik imaartagaq tassaavoq eqqiluisaarnermut atortulersuut imilerneqartussaanngitsoq imaluunniit annikitsuaraannarmik imilersorneqarsinnaasoq (anartarfiit kuuffeqanngitsut). Anartarfiit taamaattut tassaasinnaapput puussiartalertakkat imaluunniit siparnilertakkat, kisiannili aamma tassaasinnaallutik anartarfiit nunamut issumullu itersaliorsimasat.
15)  Illuliornermut malittarisassat, kiisalu illuliornermut inatsisini maleruagassat aalajangersarneqarsimasut sukkulluunniit atuuttut naapertorlugit imermut errortuivikumut peqqussutit malillugit katersuivik tassaavoq tanki ussissoq qerinaveersaartinneqartoq kuuffeqanngitsorlu, kalerrisaarutitalik imaluunniit ulikkaarnermini allatut nalunaarsuutitalik, kiisalu imaarneqarnissamut maqitsivilik.
16)  Imeq naqitsinilik tassaavoq imeq, aqqusersuutit qerinaveersaartinneqartut aqqutigalugit naqitsineq atorlugu illuni ataasiakkaani il.il. maqinneqartartoq.
17)  Imeq pajugutaasoq tassaavoq imeq, pilersuinermut aaqqissuussinermit akuerisamiit illup nammineerluni toqqorsivittut tankianut, pisariaqartitsineq malillugu maqitsivigineqartartumut pajugutigineqartoq.
18)  Kuuffiit tassaapput kuuffiit matoqqasut, illut imermik errortuivikumik kuutsitsisut ataannut silataannulluunniit inissinneqarsimasut.
19)  Nuna kuuffeqarfik tassaavoq sumiiffik, kuuffinnut atugassatut aalajangerneqarsimasoq, nalinginnaasumillu imeq errortuivikoq assatamut kuutsinneqarsinnaavoq. Nuna kuuffeqarfiusoq immikkoortunik arlalinnik kuuffeqarfeqarsinnaavoq, kisiannili imaanut ataasiinnarmik kuuffeqarluni.
20)  Katersuivik tassaavoq sumiiffik, imermik errortuivikumik kuuffimmit ataatsimit amerlanerusunilluunniit sunniuteqarfigineqartoq.

§ 3.  Atuisinnaatitaasut tassaapput suliffeqarfiit nunaminertanik, nalinginnaasumik nunaminertanik atugassiiffiusartunik atuisinnaatitaasut tamarmik. Tamanna utaqqiisaagallartumik imaluunniit ataavartumik atugassiisarnermut, kiisalu nunaminertanut sanaartorfigineqarsimanngitsunut atuuppoq.
Imm. 2.  Atuisinnaatitaasunut aamma suliffeqarfiit, peqatigiiffiit aaqqissuussinernullu aaqqissuisunut, ataavartumik imaluunniit utaqqiisaagallartumik inunnik amerlasuunik katersuutsitsisunut sanilliunneqassapput.

Imermut errortuivikumut pilersaarut

§ 4.  Kommunalbestyrelsi kommunimi illoqarfinni nunaqarfinnilu imermik errortuivikumik eqqaanissamut pilersaarusiussaaq. Kiisalu kommunalbestyrelsi asimut tunngatillugu pilersaarusiorsinnaavoq. Imermut errortuivikumut pilersaarut minnerpaamik uku pillugit paasissutissanik imaqassaaq:
1)  Imermut errortuivikumut pilersaarut qanoq kommunimut pilersaarummut, § 34 naapertorlugu katersuivinnut pilersaarummut kiisalu kommunimi aningaasaqarnermut pilersaarummut naleqqiunneqarsimanersoq.
2)  Nunanut kuuffeqarfiusunut ataasiakkaanut killiliussat.
3)  Imermut errortuivikumut kuuffeqarfinnut pioreersunut pilersaarutaasunullu nunap assinga, imermut errortuivikumut kuuffeqarfiit pisortanit namminersortunilluunniit pigineqarnersut nalunaarsorlugu.
4)  Illut suut pisortat imermut errortuivikumut kuuffeqarfiinut attavilerneqarsimanersut, aammalu illut suut namminersortut imermut errortuivikumut kuuffeqarfiinut attavilerneqarsimanersut naatsorsukkat, kiisalu kuutsitsisartunut ataasiakkaanut nassuiaatit.
5)  Kommunip imermut errortuivikumut kuuffeqarfiutaasa pilersaarutaasumik iluarsaanneqarnissaannut aserfallatsaaliorneqarnissaannullu pilersaarut, tassungalu ilanngullugu pingaarnersiuinissaq.
6)  Suliniutit imermut errortuivikumut pilersaarummi nassuiarneqarsimasut atulersinneqarnissaannut piffissamut pilersaarut.
7)  Katersuiviit suut nunatanit ataasiakkaanit imermik errortuivikumik kuutsitsivigineqarsimanersut, imaluunniit kuutsitsivissanut, kuuffiit inissiffissaannut aammalu erngup errortuivikup kuutsinneqartussatut naatsorsuutigineqartup annertussusissaanut kissaataasinnaasut. Aammattaaq saliinermut iliuusissaasinnaasut aamma katersuiviit pitsaassusissaattut kissaatigisat nassuiarneqarsinnaapput.
8)  Pisortat kuuffeqarfiutaannik pilersitsinermut, iluarsaassinermut ingerlatsinermullu isertitassatut aningaasartuutissatullu naatsorsuutigineqartut suunersut.
Imm. 2.  Aalajangiinerup kingorna ukiut arfinilikkaarlugit kommunimi pilersaarutit ataasiakkaat akuersissutigineqarnerini imermik errortuivikumik eqqaanermut pilersaarutit kommunalbestyrelsip iluarsaattassavai.
Imm. 3.  Illoqarfinni ataasiakkaani imermut errortuivikumut pilersaarut saqqummersoq siulleq kingusinnerpaamik ulloq 1. august 2018-imi akuerineqarsimassaaq.
Imm. 4.  Nunaqarfinni ataasiakkaani imermut errortuivikumut pilersaarut saqqummersoq siulleq kingusinnerpaamik ulloq 1. august 2020-mi akuerineqarsimassaaq.

§ 5.  Imermut errortuivikumut pilersaarummut siunnersuutip kommunalbestyrelsimit akuersissutigineqannginnerani, imermut errortuivikumut pilersaarummut missiliuut Avatangiisinut Naalakkersuisumut akisussaasuusumut nassiunneqassaaq, taassumalu tigusinerminiit sapaatit akunneri arfineq pingasut qaangiutinnginnerini tassunga oqaaseqaatigisinnaasani saqqummiutissavai.

§ 6.  Imermut errortuivikumut pilersaarummut siunnersuutip akuerineqarnerata kingorna, kommunalbestyrelsip siunnersuut tamanut ammasumik saqqummiutissavaa.
Imm. 2  Imermut errortuivikumut pilersaarummut siunnersuut sivikinnerpaamik sapaatit akunnerini arfineq pingasuni tamanut ammasumik, aammalu misissorneqarsinnaasunngorlugu oqaaseqarfigineqarsinnaasunngorlugulu saqqumitinneqassaaq. Imermut errortuivikumut pilersaarummut siunnersuut minnerpaatut kommunip nittartagaani pissarsiarineqarsinnaassaaq.
Imm. 3.  Tamanut ammasumik saqqummiussinermi siunnersuummut oqaaseqaateqarnissamut allannguutissanilluunniit siunnersuuteqarnissamut piffissaliussaq allanneqassaaq.
Imm. 4.  Tamanut ammasumik saqqummiussinerup peqatigisaanik imermut errortuivikumut pilersaarummut siunnersuut akuerisaq Avatangiisinut, Nuna tamakkerlugu pilersaarusiortarnermut, Peqqissutsimut Naalakkersuisuusunut akisussaasuusunut, Nersutit Nakorsaqarnermi Inuussutissaqarnermilu Oqartussaasumut kiisalu Nakorsaaneqarfimmut aamma Nukissiorfinnut nassiunneqassaaq. Akerliliissuteqarnissamut oqaaseqaateqarnissamullu piffissarititaasoq allanneqassaaq.

§ 7.  Oqaaseqarnissamut piffissarititaasoq naappat, kommunalbestyrelsip imermut errortuivikumut pilersaarutip nutaamik suliarereernerani siunnersuut inaarutaasumik akuerissavaa. Tamatuma peqatigisaanik akerliliissutit allannguutissatullu siunnersuutit piffissami saqqumititsiviusumi tiguneqartut suliarineqassapput.
Imm. 2.  Kommunalbestyrelsip imermut errortuivikumut pilersaarummut akuersissuteqarnerani, kommunalbestyrelsi siunnersuummik tamanut ammasumik saqqumitinneqartumik allannguisinnaavoq. Allannguutit annertuutut imaluunniit pilersaarutip imaanut tunngaviusunut uniuuttutut kommunalbestyrelsimit naliliiffigineqarpata, imermut errortuivikumut pilersaarutissatut siunnersuut allanngortinneqartoq tamanut ammasumik saqqummiuteqqinneqassaaq, tak. § 6, tassanili akerliliissuteqarnissamut piffissarititaasoq sivikinnerpaamik sapaatit akunnerinik arfinilinnik sivisussusilerneqassaaq.

§ 8.  Kommunalbestyrelsi imermut errortuivikumut pilersaarutip inaarutaasumik akuerineqarnerata kingorna pisariaqanngitsumik uninngatitsinani tamanut ammasumik nalunaaruteqassaaq.
Imm. 2.  Kommunalbestyrelsi imermut errortuivikumut pilersaarutip tamanut ammasumik nalunaarutigineqartup naqinneranik Avatangiisinut, Nuna tamakkerlugu pilersaarusiortarnermut, Peqqissutsimut Naalakkersuisuusunut akisussaasuusunut, Nersutit Nakorsaqarnermi Inuussutissaqarnermilu Oqartussaasumut kiisalu Nakorsaaneqarfimmut aamma Nukissiorfinnut ilisimatitsissutitut nassiussissaaq.
Imm. 3.  Kommunip imermut errortuivikumut pilersaarut tamanut ammasumik nalunaarutigineqartoq minnerpaatut kommunip nittartagaanut ikkutissavaa, taamaalilluni pilersaarut tamanit pissarsiarineqarsinnaasunngortissallugu.

§ 9.  Kommunalbestyrelsi imermut errortuivikumut pilersaarutit akuerineqartut tunngavigalugit kommunimi imeq errortuivikoq qanoq isumagineqassanersoq ataatsimut takussutissiussaaq.
Imm. 2.  Takussutissiami ataatsimoortumi takuneqarsinnaassaaq kommunalbestyrelsip anartarfiit imaartakkat erngullu errortuivikup kommunimi isumagineqarnerinut anguniagai suunersut.
Imm. 3.  Ataatsimut takussutissiap naqinnera siulleq kingusinnerpaamik ulloq 1. januar 2021-mi akuerineqarsimassaaq.
Imm. 4.  Takussutissiaq ataatsimoortoq Avatangiisinut, Nuna tamakkerlugu pilersaarusiortarnermut, Peqqissutsimut Naalakkersuisuusuut akisussaasuusunut, Nersutit Nakorsaqarnermi Inuussutissaqarnermilu Oqartussaasumut kiisalu Nakorsaaneqarfimmut aamma Nukissiorfinnut nassiunneqassaaq.
Imm. 5.  Kommunip pilersaarut ataatsimoortoq minnerpaamik kommunip nittartagaanut ikkutissavaa, taamaalilluni takussutissiaq tamanit pissarsiarineqarsinnaassalluni.

Imermut errortuivikumut kuuffeqarfinnut attaviliineq

§ 10.  Pisortat aqqusiniutaannut qaninnermut imaluunniit nuna pineqartoq aqqutigalugu kuuffiliisoqarsimatillugu, atuisinnaatitaasut pioreersut nunami kuuffeqarfiup imermut errortuivikumut pilersaarummi aalajangersarneqarsimasup iluani nunami kuuffeqarfiusumi aqqutit matoqqasut aqqutigalugit imermut errortuivikumut kuuffeqarfimmut attaviliisussaapput.
Imm. 2.  Attaviliineq atuisinnaatitaasup nammineq akiligaanik pissaaq.
Imm. 3.  Nunami kuuffeqarfittut aalajangersarneqarsimasumi illut pioreersut pisortat aqqusiniutaannut qaninnermut imaluunniit nuna pineqartoq aqqutigalugu kuuffeqarfiliinerup kingorna kingusinnerpaamik ukiut marluk qaangiunnerini kuuffeqarfimmut attavilerneqarsimassapput.
Imm. 4.  Kommunalbestyrelsip pineqartut piffissaliussaq pillugu allakkatigut ilisimatissavai.
Imm. 5.  Imm. 3 naapertorlugu piffissaliussaq siusinnerpaamik kommunalbestyrelsip sumiiffimmi imermut errortuivikumut pilersaaruteqarfiusumut akuersinerani atuutilissaaq.
Imm. 6.  Kommunalbestyrelsi illumut tunngasuni pissutsinik immikkut ittumik naliliineq tunngavigalugu, tassungalu ilanngullugu anartarfiliinissamut periarfissaqartoqannginnera imaluunniit atuisinnaatitaasup aningaasaqarnikkut atugai tunngavigalugit, attaviliinissamut pisussaaffeqarnermik saneqqutsinissamut immikkut ittumik akuersissuteqarsinnaavoq.

§ 11.  Sanaartorfiusoq pioreersoq siunissami imermik naqitsinilimmik pilerneqassappat, tamatuma peqatigisaanik kuuffeqarfimmut aqqusersuummik akuerisamik kuuffiliinissaq, imaluunniit illuniit imermut errortuivikumut katersuivinnik immikkoortunik ikkussuinissaq kommunalbestyrelsip qulakkiissavaa.

§ 12.  Kommunalbestyrelsi sanaartorfissagissaaneq, pisortat kuuffeqarfinnut aqqusersuutaat aamma pisortat aqqusiniutaat pillugit Inatsisartut inatsisaat naapertorlugu akuersissuteqarsimappat, kuutsitsinerup imermut errortuivikumut kuuffeqarfimmut tamarmiusumut  akuersissutip malinneqarnissaanut akornutaannginnissaa kommunalbestyrelsip qulakkiissavaa.

§ 13.  Ikkuffik inuinnaat imermut errortuivikumut kuuffeqarfianut atassuserneqassappat, imermut errortuivikumut kuuffeqarfimmik piginnittup tamanna pillugu kommunalbestyrelsi ilisimatissavaa.
Imm. 2.  Inuinnaat imermut errortuivikumut kuuffeqarfimmut atassusiineranni, kuuffeqarfimmik piginnittup kuutsitsinerit tamarmiusut kuuffeqarfimmi pisinnaasassatut akuerisat iluanni annertussuseqarnissaat qulakkiissavaa. 

Sikukkut, nunakkut, imermik tarajulimmik tarajoqanngitsumillu kuutsitsinissamut akuersissutit

§ 14.  Imermik errortuivikumik katersuivimmut kuutsitsisarnermi kuutsitsinissamut akuersissuteqartoqarnissaa pisariaqarpoq.
Imm. 2.  Kuutsitsinissamut akuersissuteqartoqarnissaanik qinnuteqaat allaganngorlugu tunniunneqassaaq, aammalu paasissutissanik ilanngussaq 1-imi taaneqartunik ilaqartinneqassalluni.
Imm. 3.  Kuutsitsinissamut akuersissuteqartoqarnissaanik qinnuteqaat kommunalbestyrelsimut nassiunneqassaaq.
Imm. 4.  Imm. 3-mi allassimasut apeqqutaatinnagit, suliffeqarfinnit atortuniillu, avatangiisit innarlitsaaliorneqarnissaannik Inatsisartut inatsisaanni, kingusinnerusukkut allannguuteqartinneqartumi, annertuumik mingutsitsisutut imaluunniit sanaartukkatut annerusutut suliffeqarfittulluunniit pilersinneqartutut allatut, avatangiisinut annertuumik sunniuteqartussatut ilimagineqartutut taaneqartunit imermik errortuivikumik imermut errortuivikumut kuuffikkut, kangerlummut imaanullu kuutsinneqartukkut kuutsitsinissamut qinnuteqaatit Avatangiisinut Naalakkersuisumut akisussaasuusumut toqqaannartumik nassiunneqassapput.
Imm. 5.  Inoqutigiinnit erngup errortuivikup 50 PE tikillugu annertussuseqartup imermut errortuivikumut kuuffeqarfikkut, kangerlummut imaanullu kuutsinneqartukkut kuutsitsinissamut akuersissuteqartarnermi kommunalbestyrelsi oqartussaasuuvoq.
Imm. 6.  Imermik errortuivikumik nunamut kussinernullu ammaannartunut, kangerlummut imaanullu kuutsinneqartunut kuutsitsinissamut akuersissuteqartarnermi kommunalbestyrelsi oqartussaasuuvoq.
Imm. 7.  Suliani allani, tassungalu sulinermi imermik errortuivikumik kuutsitsisarnermut suliat kiisalu kommunalbestyrelsimit qinnuteqaatit tamaasa ilanngullugit akuersissuteqartarnermi Avatangiisinut Naalakkersuisoq akisussaasuusoq oqartussaasuuvoq.
Imm. 8.  Imm. 5-6-imi allassimasut apeqqutaatinnagit, suliffeqarfinnit atortuniillu, avatangiisit innarlitsaaliorneqarnissaannik Inatsisartut inatsisaanni, kingusinnerusukkut allannguuteqartinneqartumi annertuumik mingutsitsisutut imaluunniit sanaartukkatut annerusutut suliffeqarfittulluunniit pilersinneqartutut allatut, avatangiisinut annertuumik sunniuteqartussatut ilimagineqartutut taaneqartunit kuutsitsisarnermut akuersissuteqartarnermi Avatangiisinut Naalakkersuisoq oqartussaasuuvoq.
Imm. 9.  Suliani Avatangiisinut Naalakkersuisup akisussaasuusup oqartussaaffigisaani qinnuteqaatit kommunalbestyrelsip Avatangiisinut Naalakkersuisumut akisussaasumut ingerlateqqittartussaavai. Suliat ingerlateqqinneqartut aamma kommunalbestyrelsip qinnuteqaammut oqaaseqaataanik ilaqartinneqartassapput, pingaartumik imermut errortuivikumut pilersaarummut tunngatillugu.
Imm. 10.  Avatangiisit innarlitsaaliorneqarnissaannik Inatsisartut peqqussutaanni, kingusinnerusukkut allannguuteqartumi kapitali 5 aamma 8 naapertorlugit, Avatangiisinut Naalakkersuisup akuersinissamut oqartussaaffigisaani akuersissutit suliarineqarnerini, imermut errortuivikumut akuersissutit akuersissutinut taakkununnga ilanngunneqassapput.
Imm. 11.  Imm. 1-imi allassimasut apeqqutaatinnagit imeq illut qaavinut, imaarsivimmut nunallu qaavanut kuuttoq akuersissummik pigisaqarani kuutsinneqarsinnaavoq.

§ 15.  Akuersissuteqartarnermi oqartussaasut kuutsitsinissamut akuersissummi minnerpaamik piumasaqaatit uku aalajangersassavaat:
1)  Imermut errortuivikumut kuuffeqarfiup pisinnaasai.
2)  Kuutsitassap annertussusia katitigaaneralu.
3)  Ilusilersugaanera.
Imm. 2.  Akuersissuteqartarnermut oqartussaasut kuutsitsinissamut akuersissummi saliisarnermi iliuusissanut piumasaqaateqarsinnaapput.
Imm. 3.  Aamma akuersissuseqartarnermi oqartussaasuusoq suliffeqarfinnut kuutsitsinissamut akuersissuteqarnerminni imminut nakkutiginissamik piumasaqaateqarsinnaavoq.
Imm. 4.  Kuutsitsinissamut akuersissut piffissamut killiliinissamut piumasaqaammik imaqarsinnaavoq.
Imm. 5.  Kuutsitsinissamut akuersissuteqarnermi akuersissuteqartarnermut oqartussaasup imermut errortuivikumut kuuffeqarfiup imermut errortuivikumut pilersaarummut naapertuuttuunera qulakkiissavaa.

§ 16.  Akuersissutit qinnuteqartumut, Nakorsaaneqarfimmut, Peqqissutsimut Naalakkersuisumut akisussaasuusumut, Nersutit Nakorsaqarnermi Inuussutissalerinermilu Oqartussaasunut, kiisalu Avatangiisinut Naalakkersuisumut akisussaasuusumut imaluunniit kommunalbestyrelsimut nassiunneqassapput, tassani akuersissuteqarnermut oqartussaanerup arlaata isumagineraa apeqqutaalluni.

§ 17.  Imermut errortuivikumut kuuffeqarfiit pioreersut, siusinnerusukkut maleruagassat naapertorlugit sananeqarsimasut atorneqaannarsinnaapput.
Imm. 2.  Imermut errortuivikumut kuuffeqarfinnut pioreersunut, siusinnerusukkut maleruagassaasimasut malillugit piffissap aalajangersimasup iluani sananeqarsimasunut nalunaarut manna naapertorlugu qinnuteqartoqarnissaa akuersissuteqartarnermut oqartussaasut pequssutigisinnaavaat.

§ 18.  Imermut errortuivikumut kuuffeqarfik imaluunniit pissutsit imermut errortuivikumut kuuffeqarfimmut sunniuteqartut annertuumik allanngortinneqarpata, tassungalu ilanngullugu kuuffik nuunneqarpat, § 14 naapertorlugu nutaamik akuersissuteqartoqarnissaa pisariaqarpoq.
Imm. 2.  Kiisalu erngup errortuivikup, kuuffeqarfikkut kuutsinneqartup annertussusia katitigaaneraluunniit annertuumik allannguuteqarpat, § 14 naapertorlugu nutaamik akuersissuteqartoqarnissaa pisariaqarpoq.
Imm. 3.  Imm. 1 aamma imm. 2 naapertorlugu allannguineq annertuujunersoq akuersissuteqartarnermi oqartussaasut aalajangertussaavaat, taamaattumillu nutaamik akuersissuteqartoqarnissaa pisariaqarpoq.

Akiliutit

§ 19.  Akuersissuteqartarnermut oqartussaasut malittarisassani imermik errortuivikumik kuutsitsinissamut akuersissummik tunniussinnissamut akiliummik aalajangersaasinnaapput.

§ 20.  Kommunalbestyrelsi pisortat malittarisassanik imermik errortuivikumik kuutsitsinissamut kuuffeqarfii aqqutigalugit imermik errortuivikumik eqqaanermut ukiumoortumik akiliummik aalajangersaasinnaapput.
Imm. 2.  Imermik errortuivikumik kuutsitsinermut ukiumoortumik akiliut atuisinnaatitaasup imermik atuinera tunngavigalugu aalajangerneqarsinnaavoq.
Imm. 3.  Imermik errortuivikumik kuutsitsinermut akiliut ukiumoortoq taamaallaat aningaasanik, kommunip sanaartukkamik ingerlatsineranut aningaasartuutinut matussutissanik, kiisalu siunissami imermik errortuivikumut kuuffeqarfinnik iluarsaassinermut taarsiinermulluunniit atugassanik imaqarsinnaavoq.

Anartarfiit imaartakkat

§ 21.  Anartarfiit imaartakkat taamaallaat anartarfittut atorneqassapput.

§ 22.  Inatsisini allani maleruagassanik aalajangersaasoqarsimatinnagu, kommunalbestyrelsi anartarfiit imaartakkat amerlassusissaannut ilusissaannullu aalajangiissaaq, sumiiffinnullu taakkununnga tammaarsimaarfiit aammalu sumiiffiit inuit amerlasuut ataavartumik utaqqiisaagallartumillu katersuuffigisartagaat ilaatinneqarput. Matumani illoqarfiit nunaqarfiillu iluini avataannilu sumiiffiit pineqarput.
Imm. 2.   Kommunalbestyrelsi anartarfiit imaartakkat amerlassusissaannut ilusissaannullu aalajangiissapput, ilanngullugit tammaarsimaarfiit aammalu sumiiffiit illoqarfiit nunaqarfiillu avataanni inuit amerlasuut ataavartumik utaqqiisaagallartumillu katersuuffigisartagaat.

§ 23.  Imaajaasarnermut aaqqissuussinernut atatillugu kommunalbestyrelsi malittarisassiani anartarfinnik imaartakkanik aalajangersimasunik atuinissamut peqqussuteqarsinnaavoq.
Imm. 2. Anartarfinnik imaartakkanik puussiartalinnik atuinissaq kommunalbestyrelsip peqqussutigippagu, anartarfiit puussaat kommunimit pilersuutigineqassapput.

§ 24.  Anartarfiit puuinik siparninilluunniit aasassanik, katersugassanik, imaagassanik illup silataanut inissiisoqassappat, imaat qimminit, timmissanit uumasunilluunniit allanit anguneqarsinnaajunnaarlugit inissinneqassapput.

Anartarfiit imaartakkat imaannik imermullu errortuivikumut katersuiviit imaannik eqqaasarneq

§ 25.  Kommunalbestyrelsi anartarfiit imaartakkat imaannik imermullu errortuivikumut katersuiviit imaannik eqqaavissatut periarfissamik innersuussissaaq.
Imm. 2.  Eqqaavissatut periarfissaq innersuunneqartoq atuisinnaatitaasumit atorneqassaaq.
Imm. 3.  Illoqarfimmi nunaqarfimmiluunniit illut tamarmik kuuffeqarfimmut atassuserneqarnissaq anguppassuk, kommunalbestyrelsip imm. 1 naapertorlugu anartarfiit imaannut innersuussisussaatitaanera atorunnaassaaq.

§ 26.  §§ 4-9-mi imermut errortuivikumut pilersaarut pillugu aalajangersakkat eqqarsaatigalugit illoqarfinni nunaqarfinnilu anartarfiit imaartakkat imaannik imermullu errortuivikumut katersuiviit imaannik eqqaanermut majorallaffimmik eqqaanermulluunniit aaqqissuussamik akuerisamik allamik pilersitsinissaq kommunalbestyrelsip qulakkiissavaa.
Imm. 2.  § 25, imm. 3 naammassineqarsimappat, anartarfiit imaartakkat imaannik imermullu errortuivikumut katersuiviit imaannik eqqaanermut majorallaffimmik eqqaanermulluunniit aaqqissuussamik akuerisamik allamik pilersitsinissamut pisussaaffik atorunnaassaaq.

§ 27.  Asimi sanaartukkap qanoq ittuunera tunngavigalugu, kommunalbestyrelsimit innersuussutit naapertorlugit anartarfiit imaartakkat imaannik eqqaanissaq atuisinnaatitaasup nammineerluni isumagissagaa kommunalbestyrelsip piumasarisinnaavaa.
Imm. 2.  Asimi erngup errortuivikup annertussusia sanaartukkallu qanoq ittuunera tunngavigalugu kommunalbestyrelsimit innersuussutit naapertorlugit imermut errortuivikumut katersuiviit imaannik atuisinnaatitaasup eqqaanissaa kommunalbestyrelsip piumasarisinnaavaa.

§ 28.  Illoqarfinni nunaqarfinnilu eqqaanissamut aaqqissuussinerit § 26-imi taaneqartut pilersinneqannginnerminni Avatangiisinut Naalakkersuisumit akisussaasumit akuerineqartussaapput.
Imm. 2.  Eqqaanermut aaqqissuussinerit pioreersut atorneqarneri akuersissutitaqanngitsumik ingerlaannarsinnaapput.
Imm. 3.  Eqqaanermut aaqqissuussinerit pioreersut piffissaliussap qaangiutinnginnerani nalunaarut manna malillugu akuerineqarnissamik qinnuteqarfiussasut Avatangiisinut Naalakkersuisoq akisussaasuusoq aalajangersinnaavoq. Akuersissuteqarnissamut eqqaanermut aaqqissuussinerit pioreersut allanngortinneqarnissaat nuunneqarnissaallu piumasaqaatigineqarsinnaavoq.
Imm. 4.  Imm. 3 uniffik siulleq malillugu piffissaliussaq minnerpaamik ukiumik ataatsimik sivisussuseqassaaq.

Imaajaasarnermik aaqqissuussinerit

§ 29.  Kommunalbestyrelsi illoqarfinni nunaqarfinnilu anartarfiit imaartakkat imaannik imermullu errortuivikumut katersuiviit imaannik imaajaanermut aaqqissuussinernik atuutsitsilersinnaavoq.
Imm. 2.  Kommunalbestyrelsi ukiunik marlunnik sioqqutsisumik nalunaaruteqarluni anartarfiit imaartakkat imaannik imermullu errortuivikumut katersuiviit imaannik imaajaanermut aaqqissuussinernik atulersinneqarsimasinnaasunik atorunnaarsitsisinnaavoq.
Imm. 3.  Imm. 2 naapertorlugu aaqqissuussinermik atorunnaarsitsinermi kommunalbestyrelsip eqqorneqartussat allakkatigut ilisimatissavai.

§ 30.  Asimi avatangiisit peqqissutsimilu pissutsit tunngavigalugit pisariaqartinneqartutut naliliisoqarpat, kommunalbestyrelsi anartarfiit imaartakkat imaannik imermullu errortuivikumut katersuiviit imaannik imaajaanermut aaqqissuussinernik atuutsitsilersinnaavoq.

§ 31.  Kommunimi anartarfiit imaartakkat imaannik imermullu errortuivikumut katersuiviit imaannik imaajaanermut aaqqissuussinernik  atuutsitsisoqarpat, aaqqissuussineq atuisinnaatitaasumit atorneqassaaq.
Imm. 2.  Anartarfiit imaartakkat imaannik imermullu errortuivikumut katersuiviit imaannik imaajaanermut akiliutinik kommunalbestyrelsi ukiumoortumik aalajangersaasinnaavoq.
Imm. 3.  Anartarfiit imaartakkat imaannik imermullu errortuivikumut katersuiviit imaannik imaajaanermut akiliut ukiumoortoq taamaallaat aningaasanik, Anartarfiit imaartakkat imaannik imermullu errortuivikumut katersuiviit imaannik imaajaanermut, kiisalu siunissami iluarsaassinissamut ineriartortitsinissamulluunniit aningaasartuutinut atugassanik imaqarsinnaavoq.

§ 32.  Anartarfiit imaartakkat imaannik imermullu errortuivikumut katersuiviit imaannik suliaqarneq assartuinerlu peqqissutsimut avatangiisinullu isumannaatsumik, aammalu kommunalbestyrelsip aalajangersagaannut naapertuuttumik ingerlanneqassapput.
Imm. 2.  Suliffeqarfiup kommunimit ingerlanneqanngitsup isumaqatigiissuteqarfigineqarnera malillugu, anartarfiit imaartakkat imaannik imermullu errortuivikumut katersuiviit imaannik eqqaasarneq tamakkiisoq taassumaluunniit ilaa suliffeqarfiup suliarisassagaa kommunalbestyrelsi aalajangersinnaavoq.
Imm. 3.  Anartarfiit imaartakkat imaannik imermullu errortuivikumut katersuiviit imaannik imaajaasarneq kommunalbestyrelsip innersuussutaannut naapertuuttumik ingerlanneqartoq kommunalbestyrelsip qulakkiissavaa.

Anartarfiit imaartakkat imaannut imermullu errortuivikumut katersuivinnut maleruaqqusat

§ 33.  Kommunip illoqarfiani nunaqarfiinilu anartarfiit imaartakkat imaannik imermullu errortuivikumut katersuivinnik imaajaaneq eqqaanerlu pillugit maleruaqqusat erseqqinnerusut kommunalbestyrelsip maleruaqqusani aalajangersassavai.
Imm. 2.  Maleruaqqusat taakku paasissutissanik makkuninnga imaqassapput:
1)  Imermut errortuivikumut katersuiviit imaasa anartarfiillu imaartakkat imaasa eqqarneqarfigisinnaasaat.
2)  Anartarfiit imaartakkat akuerisat suussusii anartarfiillu puussiartai.
3)  Erngup errortuivikup katitigaanera.
4)  Kommunimi anartarfiit imaartakkat imaannik imermullu errortuivikumut katersuiviit imaannik imaajaasarnerit.
5)  Anartarfilerisut anartarfinnik imaartakkanik imaarsinissaannut imaluunniit siparnit anartarfiilluunniit puussiartaasa illup silataani inissinneqarnissaat pillugit malittarisassat.
6)  § 31, imm. 3 naapertorlugit kommunit imaajaasarnermi aaqqissuussinerinik atuinermut akiliutit.

Katersuiveqarnissamut pilersaarut

§ 34.  Avatangiisinut Naalakkersuisoq akisussaasuusoq katersuivinnut pilersaarummik, katersuiviup atorneqarneranut uuttuutinik pingaarnernik aammalu avatangiisit qanoq issusissaannut piumasaqaatinik allattuiviusumik suliaqarsinnaavoq, taakkununngalu pissutsit isikkussaannut eqqiluisaarnermullu tunngasut ilaatinneqassapput. Anguniakkat anguniarlugit imermik errortuivikumik saliiveqarnissaq pisariaqartinneqarpat, pilersaarut piumasaqaatinik pingaarnernik imaqassaaq.
Imm. 2.  Katersuiviit pilersaarusiornissaannut siunnersuut tamanut ammasumik saqqummiunneqassaaq, aammalu inaarutaasumik aalajangiinissaq sivikinnerpaamik qaammatinik pingasunik sioqqullugu  kommuninut, Nakorsaaneqarfimmut, Nersutit Nakorsaqarnermi Inuussutissalerinermilu Oqartussaasumut Naalakkersuisumut akisussaasumut nassiussuunneqassalluni.

Aalajangersakkat allat

§ 35.  § 14, §§ 22-23, § 28 aamma § 30 naapertorlugit aalajangiisoqarnissaanut atatillugu, aalajangiisoqannginnerani Nakorsaaneqarfimmut aamma Nersutit Nakorsaqarnermi Inuussutissalerinermilu Oqartussaasumut Naalakkersuisumut akisussaasuusumut tusarniaasoqassaaq.

Nakkutilliinermut oqartussaasut.

§ 36.  Nalunaarut manna naapertorlugu kommunalbestyrelsi nakkutilliinermi oqartussaasuuvoq, taamaattorli takuuk imm. 2.
Imm. 2.  Avatangiisinut Naalakkersuisoq akisussaasuusoq kommunini imermut errortuivikumut kuuffeqarfikkut kuutsitsisarnermut aammalu suliffeqarfinnit atortuniillu, avatangiisit innarlitsaaliorneqarnissaannik Inatsisartut inatsisaanni, kingusinnerusukkut allannguuteqartinneqartumi annertuumik mingutsitsisutut imaluunniit sanaartukkatut annerusutut suliffeqarfittulluunniit pilersinneqartutut allatut, avatangiisinut annertuumik sunniuteqartussatut ilimagineqartutut taaneqartunit kuutsitsisarnermut nakkutilliisutut oqartussaasuuvoq.

Nakkutilliineq peqqussuteqartarnerlu

§ 37.  Paasissutissanik nutaanik takkuttoqarpat, imaluunniit paasissutissanik ilisimaneqareersunik naliliinerit ilisimatusarnermi paasisat nutaat ilisimasalluunniit allat tunngavigalugit allanngorsimappata, akuersissummik pigisaqartup nammineerluni akiligaanik imermi errortuivikumi akuutissanut tunngatillugu misissugassanik tigusinissamik, misissueqqissaarnissamik uuttuinissamilluunniit nakkutilliinermut oqartussaasut peqqusisinnaapput.
Imm. 2.  Misissoqqissaagassat laboratoriami akuerineqartumi suliarineqartassapput.
Imm. 3. Laboratoria akuerineqartoq, imm. 2-mi pineqartoq tassaavoq laboratoria, Den Danske Akkrediterings- og Metrologifond-imit (DANAK) imaluunniit akuersisartumit assingusumit, EA-p (European co-operation for Accreditation) akuerseqatigiinnissaq pillugu suleqatigiit amerlasuut isumaqatigiissutaannut atsioqataasimasunit akuerineqartoq.

§ 38.  Attaviliineq pioreersoq imermut errortuivikumut kuuffiup pisinnaasaanut akuerisamut aammalu imermik errortuivikumik kuutsitsinissamut akuersissummi piumasaqaatinut naleqqiullugu ajornartorsiortitsippat, nakkutilliinermi oqartussaasut atuisinnaatitaasoq attaviliinisamut akuersissummik nutaamik piniarnissamut peqqusinnaavaat.

§ 39.  Kuutsitsineq pioreersoq avatangiisinut imaluunniit isumannaallisaanermut peqqissutsimulluunniit immikkut ajornartorsiortitsippat, § 14 naapertorlugu nakkutilliinermi oqartussaasut attaviliinissamut akuersissummik nutaamik piniarnissamik peqqussuteqarsinnaapput.

§ 40.  Imeq illut qaavinut, imaartarfinnut nunallu qaavanut kuuttoq immikkut ittumik ajoqutaappat, erngup illut qaavinut, imaartarfinnut nunallu qaavanut kuuttup imermut errortuivikumut kuuffeqarfimmut, kangerlummut imaanulluunniit kuuffeqartumut kuuffilerneqarnissaa kommunalbestyrelsip atuisinnaatitaasumut peqqussutigisinnaavaa.

§ 41.  Inuinnaat pisortalluunniit imermut errortuivikumut kuuffeqarfiinik sananermi, allannguinermi iluarsaassinermiluunniit ataavartussamik iliuusissami, soorlu imermut errortuivikumut saliivimmik sananissamik, imermut errortuivikumut kuuffiit nuunneqarnissaannik allatulluunniit iliuuseqarallarnissamik, soorlu katersuiviugallartumut kuutsitsinissamik akuersissuteqartarnermut oqartussaasut peqqusisinnaapput.

§ 42.  Imermut errortuivikumut kuuffeqarfimmut attaviliineq imaluunniit imermik errortuivikumik kuutsitsineq peqqissutsimut avatangiisinulluunniit ulorianartorsiortitsippat, nakkutilliinermi oqartussaasut ikiuutaasussamik, pinngitsoortitsiviusussamik iluarseeqqiffiusumilluunniit pilersitsinissamut peqqussuteqarsinnaapput imaluunniit imermut errortuivikumut kuuffimmut attaviliinissamut imermilluunniit errortuivikumik kuutsitsinissamut inerteqquteqarsinnaallutik.
Imm. 2.  Imermut errortuivikumut kuuffeqarfimmut attaviliineq imaluunniit imermik errortuivikumik kuutsitsineq imermut errortuivikumut kuuffeqarfiup ingerlaneranut ajornartorsiortitsippat, soorlu milittoorsimappat, orsoq katersuussimappat imaluunniit akuutissanit avatangiisinut ajoqutaasunit sunniuteqarfigineqarpat, nakkutilliinermi oqartussaasut ikiuutaasussamik, pinngitsoortitsiviusussamik iluarseeqqiffiusumilluunniit pilersitsinissamut peqqussuteqarsinnaapput imaluunniit imermut errortuivikumut kuuffimmut attaviliinissamut imermilluunniit errortuivikumik kuutsitsinissamut inerteqquteqarsinnaallutik.
Imm. 3.  Akuusunut tusarniaareernikkut nakkutilliinermut oqartussaasut peqqussuteqarnermut inerteqquteqarnermulluunniit aalajangiineq, Nakorsaaneqarfimmut aammalu Nersutip Nakorsaqarnermi Inuussutissalerinermilu Oqartussaanermut Naalakkersuisumut akisussaasuusumut nalunaarummik ilallugu allakkatigut akuusunut nalunaarutigissavaat. Aalajangiinerit peqqussuteqarnerup inerteqquteqarnerulluunniit naammassinissaanut piffissaliussamik imaqassapput.

§ 43.  Imermut errortuivikumut kuuffeqarfimmut attaviliineq imaluunniit imermik errortuivikumik kuutsitsineq peqqissutsimut annertuumik ajornartorsiortitsippat, kiisalu annertuumik mingutsitsinissaq mingutsitsinerulluunniit siaruarnissaa pinngitsoorniarlugu pilertortumik iliuuseqartoqarnissaa pisariaqartillugu, nakkutilliinermi oqartussaasut oqaasiinnaat atorlugit peqqussuteqarnissaat inerteqquteqarnissaallu aalajangiunneqarsinnaavoq.
Imm. 2. Imm. 1 naapertorlugu peqqussut inerteqquteqarnerluunniit erngerluni naammassineqassaaq.
Imm. 3.  Oqaasiinnaat atorlugit peqqussuteqarneq inerteqquteqarnerluunniit nakkutilliinermi oqartussaasunit ullut 14-it qaangiutsinnagit allakkatigut uppernarsarneqassaaq, taamaattoqanngippallu peqqussut atorunnaassaaq.

§ 44.  Anartarfinnut imaartakkanut aamma anartarfiit imaartakkat imaannik eqqaanermut kiisalu erngup errortuivikup eqqaavissaannut tunngatillugu kommunalbestyrelsi peqqussuteqarsinnaavoq inerteqquteqarsinnaallunilu, uku siunertaralugit:
1)  Mingutsitsinissamik pinaveersaartitsineq
2)  Peqqissutsimi pissutsinik pitsanngorsaaneq
3)  Eqqiluisaarnermik pitsanngorsaaneq
4)  Anartarfilerisut ajornartorsiutaannik annikillititsinissaq
Imm. 2.  Peqqussuteqarnermi anartarfiit imaartakkat amerlanerulernissaat, eqqiluisaanerup pitsaanerulernissaa, aqqutissat imaqartinneqannginnissaat, anartarfiit imaarneqartarnerisa akulikinnerulernissaa assigisaalluunniit piumasarineqarsinnaapput.

§ 45.  Nakkutilliinermi suliani, peqqissutsimik ulorianartorsiortoqarnera tamatumaluunniit pisinnaanera tunngavigalugu peqqussuteqarnissamik inerteqqussuteqarnissamilluunniit kissaateqarfiusuni tamani Nakorsaaneqarfik aalajangiinermut ilaatinneqartassaaq.

§ 46.  Suliffeqarfimmut peqqussut inerteqquteqarnerluunniit ingerlatsisumut tunniunneqassaaq. Ingerlatsisoq kinaanersoq paasineqarsinnaanngippat, peqqussut inerteqquteqarnerluunniit atuisinnaatitaasumut tunniunneqassaaq.
Stk. 2.  Inuinnaat illuannut peqqussut inerteqquteqarnerluunniit atuisinnaatitaasumut tunniunneqassaaq.
Imm. 3.  Imm. 1 aamma 2 naapertorlugit peqqussummik inerteqquteqarnermilluunniit tigusisoq peqqussutip inerteqquteqarnerulluunniit naammassinissaanut akisussaasuuvoq.

Saneqqutsisinnaanermut periarfissat

§ 47.  Avatangiisinut Naalakkersuisoq akisussaasuusoq kommunalbestyrelsimut tusarniaareernermini § 4-p, § 9-p, §§ 25-26-p aamma § 33-p saneqqunnissaannut immikkut ittumik akuersissuteqarsinnaavoq.
Imm. 2. Pisuni immikkut ittuni, ilanngullugu ilinniarnermi ilisimatusarnermilu suliat pineqartillugit, imaluunniit aningaasaqarnermi pissutsit piffissarluunniit eqqarsaatigalugit tunngavissaqartoqartillugu imm. 1 naapertorlugu saneqqutsinissamut akuersissuteqartoqarsinnaavoq.

Maalaarutit

§ 48.  Nalunaarut manna naapertorlugu aalajangiinerit tamarmik avatangiisinik innarlitsaaliuinissamut Inatsisartut peqqussutaanni kapitali 14-imi maleruagassat naapertorlugit maalaarutigineqarsinnaapput.

Pineqaatissiinermut atortuulersitsinermullu aalajangersakkat

§ 49.  Akiliisinneqarsinnaapput:
1)  § 4-mik, § 6-imik, § 8-mik, § 9, imm. 1-imik, imm. 2-mik aamma 4-mik, § 10, imm. 2-mik aamma imm. 5-imik, § 11-mik, § 12-imik, § 13-imik, § 14, imm. 1-imik, § 18, imm. 1-imik aamma 2-mik, § 21-mik, §§ 24-27-mik, § 28, imm. 1-3-mik, § 31, imm. 1-imik imaluunniit § 32-mik unioqqutitsisoq.
2)  § 23 imaluunniit §§ 37-44 naapertorlugit naalakkiutinik, peqqussutinik, inerteqqutinilluunniit sumiginnaasoq.
3)  malittarisassanik § 23, § 29, § 30 imaluunniit § 33 naapertorlugit aalajangersarneqartunik unioqqutitsisoq.
Imm. 2.  § 15, imm. 1-3-mi piumasaqaatinik aalajangersarneqartunik unioqqutitsisoq akiliisinneqarsinnaavoq.
Imm. 3.  Kalaallit Nunaanni pinerluttulerinermut inatsimmi maleruagassat naapertorlugit ingerlatsivimmut pisinnaatitaasumut pisussaatitaasumullu akiliisitsisoqarsinnaavoq.
Imm. 4.  Akiliisitsissutit, imm. 1-3 naapertorlugu aalajangersarneqartut Nunap Karsianut tutsinneqassapput.

Atortuulersitsineq ikaarsaarnermullu maleruagassat

§ 50.  Nalunaarut manna 1. august 2015 aallarnerfigalugu atuutilerpoq.
Imm. 2.  Tamatuma peqatigisaanik anartarfiit aamma imermik errortuivikumik anartarfiillu imaannik eqqaaneq pillugit Namminersornerullutik Oqartussat nalunaarutaat nr. 27, 17. september 1993-imeersoq atorunnaarsinneqarpoq.
Imm. 3.  Anartarfiit aamma imermik errortuivikumik anartarfiillu imaannik eqqaaneq pillugit Namminersornerullutik Oqartussat nalunaarutaat nr. 27, 17. september 1993-imeersoq naapertorlugu kommunini maleruagassiarineqartut kommunalbestyrelsimit taakkuninnga atorunnaarsitsisinnaanerisa tungaanut suli atuutissapput.

Namminersorlutik Oqartussat, ulloq 12. juni 2015

Mala Høy Kuko

/

Mette Skarregaard Pedersen