Anartarfiit imaannik aamma imermik errortuivikumik eqqaaneq pillugu Namminersorlutik Oqartussat nalunaarutaat nr. 10, 12. juuni 2015-imeersumi § 22, imm. 2, § 23, imm. 1, aamma § 33, imm. 1 aamma 2-mi (imikumut nalunaarut) aalajangersarneqarpoq:

 

Kapitali 1

Atuuffia

 

 

  § 1. Malittarisassani matumani pineqarput Kommuneqarfik Sermersuumi illuutini, suliffeqarfinni, peqatigiiffinni, aaqqissuussani inunnik katersuutsitsisuni kiisalu nunaminertani sanaartorfiunngitsuni anartarfilerinermik, anartarfiit imaannik imikumilluunniit pilersuisunik tamani anartarfiit imaat aamma imikoq.

  Imm. 2. Suliffeqarfinnit ingerlatsinermi imikumik kuutsitsineq malittarisassani matumani ilaatinneqanngilaq.

 

Kapitali 2

Nassuiaatit

 

 

  § 2. Uku imatut paasineqassapput:

1) Aqqusineq appakaaffik ima paasineqassaaq aqqusineq qamutit motoorillit aallertut unittarfiat, sumiiffillu anartarfinnik aallertut imaluunniit slamtankimik imaarsiartortut ikkussisarfiat.

2) Atuisinnaatitaasut tassaapput suliffeqarfiit nunaminertanik, nalinginnaasumik nunaminertanik atugassiiffiusartunik atuisinnaatitaasut tamarmik. Tamanna utaqqiisaagallartumik imaluunniit ataavartumik atugassiisarnermut, kiisalu nunaminertanut sanaartorfigineqarsimanngitsunut atuuppoq. Atuisinnaatitaasunut aamma suliffeqarfiit, peqatigiiffiit aaqqissuussinernullu aaqqissuisunut, ataavartumik imaluunniit utaqqiisaagallartumik inunnik amerlasuunik katersuutsitsisunut sanilliunneqassapput.

3) Illumik piginnittoq ima paasineqassaaq, tassa nunaminertamik atuisinnaatitaasoq nunaminertamik atuinissamut tunineqarsimanikkut, aamma nunaminertami tassani illumik imaluunniit illunik arlalinnik piginnittoq.

4) Akiliut ima paasineqassaaq aningaasat anartarfinnik imikumillu pilersuisut akilertagaat imikumik eqqagassamik igitsiniarnermut kommunimi aaqqissuussamut nalunaarsimasut.

5) Imeq sunaluunniit najugaqarfinnit, suliffeqarfinnit sanaartukkanillu allanit kuutsinneqartoq imikutut isigineqassaaq. Imikumi ilaatinneqarput illumit imikoorut, errorfinnit imikoorut, kiisalu qalianit, imaarsaanermit kiisalu imeq nuisaannartoq.  Imikoq pineqartillugu imikumik kuutsitsineq ilaatinneqanngilaq, § 1, imm. 2 innersuussutigalugu.

6) Imikoq mingoqannginnerusoq tassaavoq imeq illunit kuutsinneqartoq, tassungalu imeq anartarfinnit imikumit kuutsinneqartoq ilaanngilaq.

7) Illunit imikoq tassaatinneqarpoq angerlarsimaffinnit imeq kuutsinneqartoq, tassungalu ilaavoq imeq anartarfinnit imikumit kuutsinneqartoq.

8) Imeq illut qaavinut, imaartarfinnut nunallu qaavanut kuuttoq tassaavoq imeq nittaalarnerani illup qaavinut nunaminertanullu tamakkiisumik ilaannaasumilluunniit aalaakkaasunngorlutik sulianut torartoq. Imeq illut qaavinut, imaartarfinnut nunallu qaavanut kuuttoq akuutissanik, nunaminertanit taamaattunit nalinginnaasumik kuuttoqarnerani nassatarineqarsinnaasunik allanik akoqassanngilaq, imaluunniit allatut annertuumik akuugaassanani.

9) Kuuffiit tassaapput kuuffiit matoqqasut, illut imikumik kuutsitsisut ataannut silataannulluunniit inissinneqarsimasut.

10) Anartarfiit imaartakkat tassaapput eqqagassat inuit timaannit pisuusut, tassalu qooq anarlu.

11) Attartortoq pineqaraangat kinaluunniit illuutillip illutaanik illuutillilluunniit immikkoortuani attartortoq pineqartarpoq.

12) Anartarfinnik eqqaanermi aaqqissuussaq paasineqassaaq kommunip aaqqissuussaanik anartarfinnik imikunillu sunilluunniit eqqaaneq.

13) Imikoq mingoqarnerusoq tassaavoq imeq anartarfinnit imikumit kuutsinneqartoq.

14) Anartarfikunik ilitsiviit paasineqassapput sumiiffiit anartarfinnik aallertarfiit, imaluunniit slamtankiniik imaarsisarfiit sumiiffii.

15) Anartarfik imaartagaq tassaavoq eqqiluisaarnermut atortulersuut imilerneqartussaanngitsoq imaluunniit annikitsuaraannarmik imilersorneqarsinnaasoq (anartarfiit kuuffeqanngitsut). Anartarfiit taamaattut tassaasinnaapput puussiartalertakkat imaluunniit siparnilertakkat, kisiannili aamma tassaasinnaallutik anartarfiit ikuallatsittakkat, nunamut issumulluunniit itersaliorsimasat.

16) Imikumik katersuiviit tankit pillugit malittarisassat, kiisalu illuliornermut inatsisini maleruagassat aalajangersarneqarsimasut sukkulluunniit atuuttut naapertorlugit imikumut peqqussutit malillugit katersuivik tassaavoq tanki ussissoq qerinaveersaartinneqartoq kuuffeqanngitsorlu, kalerrisaarutitalik imaluunniit ulikkaarnermini allatut nalunaarsuutitalik, kiisalu imaarneqarnissamut maqitsivilik.

 

Kapitali 3

Pisussaaffiit aamma pisinnaatitaaffiit, matumani paasissutissiisussaatitaaneq ilanngullugu

 

 

  § 3. Anartarfiit imaannik imikumillu mingoqannginnerusumik igitsiviit suulluunniit, matumani imikumut, ikuallatsittakkanut, nunamut issumullu itersaliorsimasanut, isatigassanut, kuuffissuarnut attavilersornernut il. il. kommunalbestyrelsimit allakkatigut akuersissutigineqassapput, taamaattoq takuuk imm. 2. Igitsiviit pioreersut eqqarsaatigalugit naammaginartumik piffissaliinerup iluani kommunalbestyrelse akuersissummik piumasaqarsinnaavoq.

  Imm. 2. Anartarfiit imaannik imikumillu mingoqannginnerusumik tigooragassanik igitsinermi, imikumut nalunaarummi § 14, imm. 1 naapertorlugu igitsinissamut akuersissummik nalunaaruteqartoqassaaq.

  Imm. 3. Kuutsitsinissamut akuersissummik qinnuteqaatit allakkatigut pissapput uungalu nassiunneqarlutik Kommuneqarfik Sermersooq, Sanarfinermut Avatangiisinullu Ingerlatsivik, Kuussuaq 2, 3900 Nuuk, imaluunniit e-mailikkut uunga sai@sermersooq.gl. Qinnuteqaat imikumut nalunaarummi Ilanngussaq 1-imi paasissutissanik ilaqartillugu nassiunneqassaaq.

  Imm. 4. Illunik piginnittut kuuffissuarnut kikkunnut tamanut atugassianut ikkutsissimanngitsut imaluunniit namminerisaminnik imaanut igitsiveqanngitsut namminneq akilikkaminnik kommunip akuerisaanik anartarfeqassapput siparnitalimmik imaluunniit anartarfimmut tankitaqassallutik kommunip akuerisaanik, taakkuninngalu aserfallatsaaliissallutik.

  Imm. 5. Illunik piginnittut kuuffissuarnut kikkunnut tamanut atugassianut ikkutsinnissamut periarfissaqanngitsut, anartarfeqarnermut kommunip aaqqiissutaanut imaluunniit imikumut tankit katersuiviit imaartakkanut aaqqiissummut ilaatinneqassapput, imikumut nalunaarummi § 25, imm. 2 innersuussutigalugu.

  Imm. 6. Anartarfiit imaannik igitsivissatut kommunimit toqqakkat kisimik imaarsivigineqarsinnaapput.

 

  § 4. Anartarfiit imaannik puussiamiittunik imaluunniit siparniniittunik aallertarneq ataasinngornermiit tallimanngornermut, imaluunniit sapaatip akunneranut marloriarluni pingasoriarluniluunniit pisarpoq, inoqarfigisaq apeqqutaalluni. Aallertarneq pisassaaq nal. 07.00 aamma nal. 18.00 akornanni. Ulloq sorleq aallarfiusartoq pillugu paasisaqarusukkaanni Kommuneqarfik Sermersuup Eqqagassalerivia attavigineqarsinnaavoq.

  Imm. 2. Imikumut anartarfiit tankiinik katersuivinnik imaarsisarneq pisassaaq ataasinngornermiit tallimanngornermut nal. 07.00 aamma nal. 18.00 akornanni. Imikumut anartarfiit tankiinik katersuivinnik imaarsisarneq qaqugukkut pisartoq paasisaqarusukkaanni Kommuneqarfik Sermersuup Eqqagassalerivia attavigineqarsinnaavoq.

  Imm. 3. Nalliuttut ullui tulleriiginnaat arlaliutillugit nalliuttunittaaq anartarfiit imaanik aallertoqartarsinnaavoq.

 

  § 5. Nalliuttunut, sila pissutaalluni siumut ilimagereerneq ajornartunut (apineq, nilakkarneq, anorersuit il. il) aamma allanut tunngatillugu ullut aallerfiusartut utaqqiisaasumik illuarsinnaapput. Sila pissutaalluni siumut ilimagereerneq ajornartut ullut tulleriit arlallit pinerinut atatillugu, aallertoqanngitsoorsimanerani aanngitsuukkat nalinginnaasumik aallernermi tullinnguuttumi aaneqassapput.

 

  § 6. Inoqutigiit imikumut anartarfiit tankiinut katersuivinnut imaluunniit anartarfiit annittakkat imaartarnissaannut isumaqatigiissummut ilaatinneqarpata, inoqutigiit imaluunniit taakku entreprenøriat Sanarfinermut Avatangiisinullu Ingerlatsivimmut paasissutissiisarnissaat erseqqissaatigineqassaaq, paasissutissat soorlu tankip angissusaa, angalanerit allassimaffiat aamma imaarsisarnermut akiligassap allagartaa pillugit paasissutissat pisariaqartut pineqarput kommunalbestyrelsip makkuninnga suliaqarnissaanut atugassat:

1) Imikumik eqqaanermut pilersaarusiorneq.

2) Imikumik eqqaanissamut naleqquttunik periarfissanik qulakkeerineq.

3) Malittarisassani matumani malittarisassat naapertorlugit imikumik eqqaanermik qulakkeerineq.

 

Kapitali 4

Imikumik aamma anartarfiit imaanik suliarinninneq

Tamat kuuffissuannut atassusilersinneq

 

  § 7. Illu tamat kuuffissuinut ikkunneqaraangat anartarfinnik aallertarneq atorunnaassaaq. Illumik piginnittup anartarfiit imaarneqartarnerinut nalunaarsimanerup unitsinneqarnissaanut pisussaavoq. Tamat kuuffissuinut attavilersornermut imikumut nalunaarummi § 10-mi piumasaqaatit atuutsinneqarput.

 

Anartarfiit imartaakkat

 

  § 8. Anartarfiit imaannik puussianiittunik imaluunniit siparniniittunik inoqarfimmi aallertoqartassasoq kommunalbestyrelsimit aalajangerneqassaaq.

 

  § 9. Illumik piginnittoq pisussaavoq anartarfiit imaarneqartarnerinut ilanngutissalluni puussiat / aallernerit amerlassusii pisariaqartut naapertorlugit aammalu puussiat / siparnit aallernerit marluk akornanni ulikkaarpallaarneqartannginnissaat isumagisassaralugu.

  Imm. 2. Anartarfiit imaartakkat kommunalbestyrelsimit akuerisat kisimik atorneqassapput.

  Imm. 3. Anartarfiit puussiartallit imaarneqartarnerini puussiat kommunalbestyrelsip tunniussai kisimik atorneqassapput.

  Imm. 4. Anartarfiit imaartakkat anartarfiit imaanut puussiat imaluunniit siparnit aanissaannut anartarfilerisunik isumaqatigiissuteqartoqarsimanngippat, illunik piginnittut illup silataani takuneqarsinnaasumik tigoriaannaasumillu anartarfiit imaanut puussiat imaluunniit siparnit inissiissapput.

  Imm. 5. Illumik piginnittoq ilisarfinnik pitsaasuutitsinissaminut eqqiluitsuutitsinissaminullu kiisalu isumannaatsumik aqqutissaqarluni aallertoqarsinnaanera isumagisussaallugu pisussaavoq.

  Imm. 6. Anartarfinnut imaartakkanut atatillugu eqqiluittuutitsinngittoqartillugu, illumik piginnittoq kommunalbestyrelsimit peqquneqarsinnaavoq anartarfiit imaanut puussiat imaluunniit siparnit illup silataanut inisseqqullugu.

  Imm. 7. Anartarfiit imaanut puussiat imaluunniit siparnit illup silataanut aasassanngorlugu inissinnerani, anartarfiit imaanut puussiat imaluunniit siparnit qimminut, timmissanut uumasunullu allanut tikissinnaajunnaarlugu inissinneqassaaq, imikumut nalunaarummi § 24 innersuussutigalugu.

  Imm. 8. Anartarfiit imaanut puussiat isumannaatsumik matusimassapput qilerneqarsimassallutillu aamma ullormi aallerfissami kingusinnerpaamik 07.00 inissiivissamut isumaqatigiissutigineqarsimasumut inissinneqarsimassallutik.

  Imm. 9. Illumik piginnittup aallerfissaq anartarfiit imaanik kuerarsimannginnissaa kiisalu aqqutigineqarsinnaanissaa isumagissavaa.

  Imm. 10. Illumik piginnittup anartarfiit imaanut puussiap imaluunniit siparnip ajornartorsiutitaqanngitsumik aaneqarsinnaanera qulakkiissavaa, matumani assersuutigalugu puussiap imaluunniit siparnip puussiaq siparniluunniit illup silataanut inissinneqarsimassappat qerussunnginnissaa qulakkiissallugu.

  Imm. 11. Anartarfiit imaanut puussiaq imaluunniit siparni aallerfiup nalaani imaqanngippat, anartarfilerisoq imaarsinavianngilaq. Anartarfiit imaanut puussiaq imaqanngitsoq ilanngunneqanngippat, illumik piginnittoq imaluunniit tassani attartortoq anartarfiit imaanut puussiamik nutaamik tunineqassanngilaq. Siuliani taaneqartut imaartinneqanngitsoornermi taarsiisoqarnavianngilaq.

 

Tankit katersuiviit

 

  § 10. Nuummi entreprenørit ilaannik kommunalbestyrelsip akuerisaannik atuisinnaatitaasut isumaqatigiissuteqarnermigut imikumut tankit imaarnissaat isumagissavaat.

Imm. 2. Tasiilami, Kulusummi, Kuummiini aamma Arsummi imikumut tankit katersuiviit pumpeqartinneqassapput tankinik katersuivinnik imaarsisinnaasunik.

 

  § 11. Anartarfiit imaanut tankit katersuivii ussillutillu qerisinnaassanngillat ulikkaarnissamut kalerrisaaruteqarlutik allatulluunniit nalunaarsuuteqarlutik, kiisalu sanaartornermi malittarisassanut atuuttunut avatangiisinullu inatsisinut naapertuuttumik suliaasimassallutik.

  Imm. 2. Imikumut tankip katersuivianiit slangimut ikkuffiata maqitsivia ajornaquteqanngitsumik slangip ikkussimanissaa isumagineqarsimassaaq. Isumagineqarnera ima suliarineqarsimassaaq:

1) Anartarfilerisoq slangimik ruujorimilluunniit imaarsinissamut maqitsivimmut toqqaannartumik atassusiisinnaanngorlugu.

2) Nunamut kuutsitsisoqartussaajunnaarlugu.

3) Ruujorit slangillu imaarlugit imaarneqassapput.

  Imm. 3. Illumik piginnittup pisussaaffigaa, katersuiviit eqqaata assersorneqarsimannginnissaa, maqitsiviatalu nalaa kuuttoorfiusimannginnissaa.

  Imm. 4. Imikumut tankinik katersiffiusunik imaarsisarneq ima akulikitsigissaaq, ulikkaartoornikkut nunamut kuuttoornissaa pinngitsoortinneqarluni.

  Imm. 5. Katersuivimmik, pumpissaa ilanngullugu, innaallagissamut atanilerlugu ikkuffilernissaanut, pumpip aserfallatsaalinissaanut ingerlatsinermullu imaluunniit innaallagissamik atuinermut aningaasartuutit illumik piginnittup akilissavai.

 

  § 12. Imikumut il. il. tankinut katersuiviit aserfallatsaaliorneqarnissaat immikkoortup mingutsitsisoqaratarsinnaanngorlugu illumik piginnittumit qulakkeerneqanngippata, Avatangiisit innarlitsaaliorneqarnissaannik Inatsisartut inatsisaat § 50, imm. 1 innersuussutigalugu kommunalbestyrelsimit peqqusinikkut Avatangiisit innarlitsaaliorneqarnissaannik Inatsisartut inatsisaat § 51, imm. 1 innersuussutigalugu piginnittup akiligaanik suliarineqarsinnaavoq.

  Imm. 2. Illumik piginnittup imikumut tankip katersuiviusup aserfallatsaalineqarnissaa qulakkiinngippagu, aamma Avatangiisit innarlitsaaliorneqarnissaannik Inatsisartut inatsisaat § 50, imm. 1 innersuussutigalugu kommunalbestyrelse peqqussuteqarluni, tankip katersuiviusup aserfallatsaaliorneqarsimannginnera paasineqarpat, Avatangiisit innarlitsaaliorneqarnissaannik Inatsisartut inatsisaat § 50, imm. 2 naapertorlugu anartarfiup imaartakkap atorunnaarsinneqarnissaa kommunalbestyrelsimit piumasarineqarsinnaavoq Avatangiisillu innarlitsaaliorneqarnissaannik Inatsisartut inatsisaat § 51, imm. 1 naapertorlugu illumik piginnittup akiligaanik pisinissamut imaartittarnissamullu ilanngunnissamut aalajangiisoqarsinnaalluni.

 

Imikup mingoqannginnerusup eqqarneqarnera

 

  § 13. Imikup mingoqannginnerusup iginnissaanut tamat kuuffissuatigut kuutsinneqassaaq.

  Imm. 2. Atuisut tamat kuuffissuinut attavilernissamik periarfissaqanngitsut, tankimik katersuivimmut imikumik imaluunniit maangaannaq imikumik kuutsitsisinnaanissamik immikkut akuersissummik qinnuteqarsinnaapput, imikumut nalunaarut § 14 innersuussutigalugu.

 

Asimi imikumik eqqaaneq

 

  § 14. Asimiinnerup nalaani anartarfiit imaannit imikumilluunniit mingoqarnerusumik § 3, imm. 1 naapertorlugu akuersissuteqarnissamut piumasaqaateqarnermi assaanissaq imaluunniit toqqaannartumik imaanut eqqaaneq atuutsinneqanngilaq. Tamatumunnga atatillugu assaasoqaqqusaanngilaq imaluunniit plastikkit eqqakkalluunniit allat qimaannaqqusaanngillat.

 

Kapitali 5

Isertarfiit

 

 

  § 15. Illumik piginnittup puussiat imaluunniit anartarfiit imaanut siparnit aanissaannut aqquteqarnissaa aamma imikumut tankinut katersuiviit imaarnissaannut aqquteqarnissaa qulakkiissavaa.

  Imm. 2. Aqqutaa manissuutinneqassallunilu tinunertaqartinneqassanngilaq, tamatuma saniatigut tummarfissat isumannaatsuussapput.

  Imm. 3. Puussiat anartarfiillu imaanut siparnit aanissaannut aqqutaa sumiiffillu ukiukkut aputaajarsimassallunilu sermeqassanngilaq.

  Imm. 4. Puussiat anartarfiilluunniit imaanut siparnit katersornerinut aqqutaa ungasinnerpaamik 50 meteriutinneqassaaq.

  Imm. 5. Imikumut tankit katersuiviliisoqartillugu anartarfilerisup slangia annerpaamik 15 meterit atorlugit ajornaquteqanngitsumik ikkunneqarsinnaanngorlugu imaarsivik sullulimmut atassusertagaq inissinneqarsimassaaq.

  Imm. 6. Illut imaartakkanik anartarfillit imikumulluunniit tankimik katersuivittalik, tankenik imaarsinermut puussianillu anartarfiilluunniit imaanut siparninik aallernermut atatillugu piumasaqaatinik aamma malinnissapput:

1) Aqqutaa naannerpaamik 90 cm-inik silissuseqassaaq 220 cm-inillu portussuseqassalluni.

2) Aqqutaa qaammaqquteqarluassaaq. Tassa anartarfilerisoq sumiissusersiorsinnaassaaq, inuit suullu nalinginnaasut takusinnaassallugit aammalu maniinnersat kiisalu eqqagassaasiviup toqqammavia malugisinnaassallugit.

3) Matut, ungallut matui isaarissallu namminneerlutik ammarsinnaassapput.

4) Aqqutaa inioqqavinnit, biilinit uninngasunit sikkilinit allanilu asserneqassanngilaq.

5) Eqqakkanik aallarnerup nalaani eqqaaviisivimmut aqqut qimmeqassanngilaq.

  Imm. 7. Illu aqqusinernit pingaarnernit avinngarusimappat qamutinik motoorilinnik oqimaatsunik aqqut usisaassuarnit aporfissaqassanani aqqutigineqarsinnaassaaq aamma 350 centimeterinik silissuseqarluni 400 centimeterinillu portussuseqarluni.

 

Kapitali 6

Akiliutit

 

 

  § 16. Aaqqissuussinernut aalajangersarneqarsimasunut aningaasartuutit matussutissaannik illunik piginnittut akiliisassapput. Illumik piginnittoq kommunip anartarfilerinermut aaqqissuussaanut ilanngussimasut akileeqquneqartassaaq.

  Imm. 2. Nuummi atuisut ataasiakkaat entreprenørinut toqqaannartumik imikumut tankinik katersuivinnik imaarsisarnermik akiliisassapput.

  Imm. 3. Kommunip anartarfilerinermi atortorissaarutaanik atuisut kommunip nalinginnaasumik anartarfilerinermi atortorissaarutinik ingerlatsinermut aserfallatsaaliuinermullu aningaasartuutaanut matussusiisussanik akiliuteqartassapput. Kommunip akigititaani atuuttuniittut akitsuutit kommunimi imaarsaanermut aaqqiissutaanut ilaatinneqarput.

  Imm. 4. Anartarfilerinermi aallertarnermut eqqaanermullu akit annertussusaat ukiumut ataasiarlugit kommunalbestyrelsimit aalajangersarneqartarput, matumani puussianik imaluunniit anartarfiit imaanut siparninik aallernerit kiisalu imikumut tankinut katersuiviit imaartarneri ilanngullugit. Akit annertussusaat kommunip nittartagaatigut akigititat atuuttut atorlugit kommunalbestyrelsimit nalunaarutigineqassapput.

  Imm. 5. Pisortat imikumik eqqaaviat atorlugu imikumik aniatitsinermut ukiumut akiliutissat kommunalbestyrelsip aalajangersartartussaavai. Imikumik kuutsitsinermut akiliut ukiumoortoq taamaallaat aningaasanik, kommunip atortulersuutinik ingerlatsineranut aningaasartuutinut matussutissanik, kiisalu siunissami imikumut kuuffeqarfinnik iluarsaassinermut taarsiinermulluunniit atugassanik imaqarsinnaavoq. Eqqagassalerinermut akit kommunip akinik allattorsimaffiutaanni nalunaarsuiffianiipput. Illup ineqarfittut, inuussutissarsiorfittut allatulluunniit atorneqarnera apeqqutaatinnagu akiligassiisoqartarpoq.

  Imm. 6. Akit qaqugukkulluunniit atuuttut kommunip nittartagaanit aaneqarsinnaapput imaluunniit Innuttaasunik Kiffartuussivianut saaffiginnilluni pissarsiarineqarsinnaapput.

 

Kapitali 7

Anartarfiit imaanik imikumillu eqqaanermut kommunip aaqqissuussinera

Ilanngunnissamut nalunaarneq

 

 

  § 17. Anartarfiit imaanik imikumillu eqqaanermut kommunip aaqqiissutaanut ilanngunnissamut nalunaarneq pisinnaavoq www.sullissivik.gl aqqutigalugu imaluunniit Innuttaasunik Kiffartuussivimmut saaffiginninnikkut. Kommunip aaqqissuussineranut nalunaarnermi ilanngunnissamut immersuiffissaq immersorneqassaaq.

  Imm. 2. Nalunaarneq kiisalu allannguinerit kingusinnerpaamik sapaatip akunneranik ataatsimik siumut ilisimatitsinikkut kommunip Eqqagassaleriffianut nalunaarutigineqartassapput.

  Imm. 3. Illut imaartakkanik anartarfittallit illumik piginnittup imaluunniit taassuminnga attartortup sapaatip akunneranut qasseriarlugu imaarneqartassasoq ilanngullugu nalunaarutigissavaa. Anartarfiit imaanut imikumullu kommunip aaqqissuussaanut illup eqqortumik ilanngunnissaa illumik piginnittup akisussaaffigaa.

  Imm. 4. Kommunalbestyrelsip nalilerpagu illumut pigineqartumut sapaatip akunneranut qanoq amerlatigisunik aallertoqartarnissaanut ilannguttoqarsimanngitsoq, sapaatip akunneranut arlaleriarluni aallertarnissamut illumik piginnittoq kommunalbestyrelsimit peqquneqarsinnaavoq.

  Imm. 5. Inoqutigiit taamaaliortussaatitaagaluarlutik anartarfiit imaanut imikumullu aaqqiissummut nalunaarsimanngitsut kommunalbestyrelsip paasigunigit aaqqissuussinermut ilannguteqqullugit illumik piginnittut peqqusinnaavai.

 

Unitsitsiniarluni nalunaaruteqarneq

 

  § 18. Illumiit allamut nuunnermi illumik piginnittutut imaluunniit attartortutut nuuttoq anartarfiit imaanut imikumullu kommunip aaqqissuussineranik unitsitsiniarluni nalunaaruteqassaaq. Illumik piginnittup illu kommunip aaqqissuussineranit eqqortumik unitsitsiniarluni nalunaaruteqarnissani akisussaaffigaa.

  Imm. 2. Attartortunut inissiaatileqatigiiffik aqqutigalugu ilanngunnissamut nalunaarsimasunut illumit nuunnermi unitsitsiniarluni nalunaaruteqarnissamut piumasaqaat atuutsinneqanngilaq.

  Imm. 3. Anartarfiit imaanut imikumullu kommunip aaqqissuussineranik unitsitsiniarluni nalunaaruteqarneq pisinnaavoq www.sullissivik.gl aqqutigalugu imaluunniit Innuttaasunik Kiffartuussivimmut saaffiginninnikkut. Kommunip aaqqissuussineranut unitsitsiniarluni nalunaarnermi unitsitsinissamut immersuiffissaq immersorneqassaaq.

  Imm. 4. Illumik piginnittoq imaluunniit attartortoq anartarfiit imaanut imikumullu kommunip aaqqissuussineranik unitsitsiniarluni nalunaaruteqanngikkuni, illumik piginnittup attartortulluunniit allap ilanngunnissaata tungaanut imaluunniit ilanngussimanerup Sanarfinermut Avatangiisinullu Ingerlatsivimmit unitsinneqarnissaata tungaanut pineqartup aaqqissuussineq akilertassavaa.

  Imm. 5. Anartarfiit imaanut imikumullu kommunip aaqqissuussineranik unitsitsiniarluni nalunaaruteqarneq kommunalbestyrelsimut kingusinnerpaamik sapaatip akunneranik ataatsimik ilimasaaruteqarnikkut pissaaq.

  Imm. 6. Illup sivikinnerpaamik qaammatini pingasuni inoqartannginnera uppernarsarneqarsinnaappat piffissami tassani akiliinnginnissamik qinnuteqartoqarsinnaavoq. Taamaattoqassappalli illumik piginnittup allakkatigut kommunalbestyrelse nalunaarfigalugu uppernarsartariaqarpaa illu sivikinnerpaamik qaammatini pingasuni inoqassanngitsoq, piffissamilu tassani illumiit anartarfilerisoqartariaqanngitsoq. Tamatuma saniatigut akiliinnginnissaq qinnutigineqassasoq aamma illup qimakkallannginnerani akuersissut tunniunneqareersimassasoq piumasarineqarput.

  Imm. 7. Imm. 6 naapertorlugu akiliisarunnaarnissamut tunngasoq inoqutigiinnut inissiaatileqatigiiffik aqqutigalugu anartarfileritittarnissamut ilanngussimasunut atuutinngilaq.

 

Kapitali 8

Naammagittaalliuteqarneq

 

 

  § 19. Nalunaarut manna naapertorlugu aalajangiinerit tamarmik Avatangiisinik innarlitsaaliuinissamut Inatsisartut inatsisaat kapitali 14-imi maleruagassat naapertorlugit maalaarutigineqarsinnaapput.

  Imm. 2. Kommunalbestyrelsip aalajangiussaanut naammagittaalliuutit uunga nassiunneqassapput Atuisunut Unammilleqatigiinnermullu Aqutsisoqarfik, Imaneq 29, 1. sal, Postboks 689, 3900 Nuuk imaluunniit E-mailikkut uunga: aua@nanoq.gl, tassanngaanniit naammagittaalliuut Avatangiisinik innarlitsaaliuinissaq pillugu Naammagittaalliuteqartarnermut ataatsimiititaliamut ingerlateqqinneqassaaq.

  Imm. 3. Avatangiisinik innarlitsaaliuinissamut Inatsisartut inatsisaat § 60, imm. 3 naapertorlugu naammagittaalliuteqarnissamut piffissaliussaq aalajangiunneqartumut aalajangiinerup nalunaarutigineqarneraniit sapaatit akunnerinik arfinilinnik sivisussuseqarpoq.

 

Kapitali 9

Piginnaatitsineq

 

  § 20. Malittarisassat uku malillugit Sanarfinermut Avatangiisinullu Ingerlatsiviup aalajangiinissamut kommunalbestyrelsimit pisinnaatinneqarpoq.

 

Kapitali 10

Atuutsinneqalerfik

 

  § 21. Malittarisassat uku ulloq 1. Auggusti 2025. atuutilersinneqarput.

  Imm. 2. Malittarisassat uku atuutilerneranut peqatigitillugu Kommuneqarfik Sermersuumut anartarfilerinermut malittarisassat 2016-imeersut atorunnaarsinneqarput.

  Imm. 3. Kommuneqarfik Sermersuumi anartarfilerinermut malittarisassat 2016-imeersut naapertorlugit aalajangiunneqartut atuukkunnaarnissami, utertinneqarnissami imaluunniit nutaanik aalajangiisoqarnissaata tungaanut atuutsinneqarput. Assinganik suliat malittarisassat uku atuutilernissaasa tungaanut, naammassillugit suliarineqarnissaannut malittarisassat atuuttut naapertorlugit suliarineqarneri atuutissapput.

 

Taamaalilluni Kommuneqarfik Sermersooq kommunalbestyrelsianit ulloq 15. juuli 2025

 

 

 

Avaaraq S. Olsen (atsior.)

Borgmesteri

Kommuneqarfik Sermersooq

 

 

 

Namminersorutik Oqartussat, ulloq 15. juuli 2025

 

 

 

Bentiaraq Ottosen (atsior.)

Pinngortitamut Avatangiisinullu Naalakkersuisoq