Anartarfiit imaannik aamma imermik errortuivikumik eqqaaneq pillugu Namminersorlutik Oqartussat nalunaarutaat nr. 10, 12. juni 2015-imeersumi § 33 aamma § 49, imm. 1, nr. 3-mi aalajangersarneqarpoq:

 

Kapitali 1

Atuuffeqarfiat

 

  § 1. Qeqqata Kommuniani immikkoortuni tulliuttuni anartarfilerisarnermut annanik imermillu errortuivikumik kuutsitsinermut maleruaqqusaq atuuppoq:

1) Maleruaqqusami matumani pineqarput illuutit, suliffeqarfiit, peqatigiiffiit aaqqissuussanik aaqqissuisut, aalajangersimasumik sivikitsumilluunniit inunnik katersortitsisarnermikkut kiisalu nunaminertat sanaartorfiunngitsut annertunerusutigut 15-init amerlanerusunit peqataaffigineqartunit sammisaqartitsiviusartut, anartarfilerinermik, anartarfiit imaannik kiisalu imermik errortuivikumik pilersitsiviusut.

2) Nunaannarmi tamani sammisaqartitsinerni. Soorlu Piniarneq, takornariartitsineq, illuaqqaniinneq, timersornermi aaqqissuussat il.il. anartarfilerinermik, anartarfiit imaanik kiisalu imermik errortuivikumik pilersitsiviusoqassappat.

3) Tatsini, kangerlunnilu sikusimasuni, sermimi sermersuarmilu sammisaqartitsinerni anartarfilerinermik, anartarfiit imaanik kiisalu imeq errortuivikumik pilersitsiviusoqassappat.

  Imm. 2. Suliffeqarfinnit ingerlatsinermi imermik errortuivikumik kuutsitsineq maleruaqqusami ilaatinneqanngilaq.

  Imm. 3. Ingerlatsinermit imermik errortuivikumik kuutsitsinissamut qinnuteqaatit avatangiisinut akisussaasumut naakallersuisoqarfimmut ingerlatinneqartassapput.

 

Kapitali 2

Suunerinik nassuiaatit

 

  § 2. Maleruaqqusami matumani makku imatut paasineqassapput:

1) Imeq errortuivikoq tassaavoq imeq sunaluunniit najugaqarfinnit, suliffeqarfinnit illunillu allanit kuutsinneqartoq. Imermut errortuivikumut ilaatinneqartut tassaapput: inoqutigiinnit imeq errortuivikoq, imeq errortuivikoq mingoqannginnerusoq, imeq errortuivikoq mingoqarnerusoq, ingerlatsinermi imeq errortuivikoq kuutsinneqartoq, imeq imaarsaanermi kuutsinneqartoq kiisalu imeq illut qaavinut nunallu qaavanut kuuttoq.

2) Inoqutigiinnit imeq errortuivikoq tassaavoq illumit imeq errortuivikoq, tassunga ilanngullugu anartarfinnit imeq kuutsinneqartoq.

3) Anartarfinnit kuuffeqanngitsunit inoqutigiinnit imeq errortuivikut imeq errortuivikoq mingoqannginnerusoq.

4) Anartarfinnit imeq errortuivikutut imeq errortuivikoq mingoqarnerusoq.

5) Anartarfiit imaartakkat tassaapput eqqagassat inuit timaannit pisuusut, tassalu qooq anarlu.

6) Anartarfik imaartagaq tassaavoq eqqiluisaarnermut atortulersuut imilerneqartussaanngitsoq imaluunniit annikitsuaraannarmik imilersorneqarsinnaasoq (anartarfiit kuuffeqanngitsut). Anartarfiit taamaattut tassaasinnaapput puussiartalertakkat imaluunniit siparnilertakkat, kisiannili aamma tassaasinnaallutik perusuersartarfiit issunngortitsisartut.

7) Illuliornermut malittarisassat, kiisalu illuliornermut inatsisini maleruagassat aalajangersarneqarsimasut sukkulluunniit atuuttut naapertorlugit imermut errortuivikumut peqqussutit malillugit katersuivik tassaavoq tanki ussissoq qerinaveersaartinneqartoq kuuffeqanngitsorlu, kalerrisaarutitalik imaluunniit ulikkaarnermini allatut nalunaarsuutitalik, kiisalu imaarneqarnissamut maqitsivilik.

8)  Kuuffiit tassaapput kuuffiit matoqqasut, illut imermik errortuivikumik kuutsitsisut ataannut silataannulluunniit inissinneqarsimasut.

9)  Atuisinnaatitaasusut piginnittut tassaapput suliffeqarfiit nunaminertanik, nalinginnaasumik nunaminertanik atugassiiffiusartunik atuisinnaatitaasut tamarmik. Tamanna utaqqiisaagallartumik imaluunniit ataavartumik atugassiisarnermut, kiisalu nunaminertanut sanaartorfigissarneqarsimanngitsunut atuuppoq. Atuisinnaatitaasutut piginnittut aamma suliffeqarfiit, peqatigiiffiit aaqqissuussinernullu aaqqissuisunut, ataavartumik imaluunniit utaqqiisaagallartumik inunnik amerlasuunik katersuutsitsisunut sanilliunneqassapput.

10) Illuutip najukkalluunniit ungasinngisaanut atuisup anartarfiit puussiartaanik ulikkaarnikumik karsi ilitsiviusartup inissiffia. Imaluunniit illuutip najukkalluunniit silataani annanik katersuiviup imaarneqarnissaanut ruujorip isua inissisimasoq.

11) Anartarfilerisoq anartarfiit puussiaannik aallertartoq annallu katersuivianik imaarsisartoq. Kommuniusinnaavoq imaluunniit namminersortoq.

12) Eqqaasarnissamut aaqqissuusseriaasermi anartarfilerineq aamma annanik katersuiviit kuuffissuillu pineqarput.

13) 1 personækvivalent (PE), nalunaarummi matumani allassimasoq ima paasineqassaaq, ukiumut akuutissat uumassusillit 21,9 kg-t, silaannarmik biokemiskiusumik (BI5), ukiumut kvælstof-imik katillugit 4,4 kg-nik imaluunniit ukiumut fosfor-imik katillugit 1,0 kg-nik atuisutut uuttorlugit.

 

Kapitali 3

Eqqaasarnissamut aaqqissuussineq nalinginnaasumik isigalugu

 

  § 3. Anartarfilerinermik, anartarfiit imaanik kiisalu imermik errortuivikumik pilersitsisut tamat, kommunalbestyrelsimit eqqaasarnissamut innersuunneqartunik atuissapput.

 

  § 4. Anartarfilerineq, anartarfiit imaannik kiisalu imermik errortuivikumik kuutsitsinerit kuuffissuakkut tamanut atugassianit kuutsinneqartassapput.

  Imm. 2. Atuisinnaatitaasutut piginnittoq, kuuffissuarnut atassusertinnissamik periarfissaqanngitsut, tassungaluunniit atassusilertinnissamut immikkut ittumik akuerineqarsimanngitsut, aaqqiissutinik tullinguuttunik nammineq akilikkamik pissarsinissartik, aserfallatsaaliinissartik atuinissartillu isumagissavaat:

1) Anartarfik siparnimik puussialertagaq kommunalbestyrelsimit akuerisaasut ilaat,

2) Annanik katersuivik kommunalbestyrelsimit akuerisaasoq imaluunniit

3) Aaqqiissut alla kommunalbestyrelsimit akuerisaasoq.

  Imm. 3. Anartarfilerinikkut, anartarfinnik kiisalu imermik errortuivikumik qanorluunniit kuutsitsinerit kommunimit akuerineqaqqaartassapput.

 

Kapitali 4

Anartarfilerinerup ingerlanneqarnera

 

  § 5. Anartarfilerinermut aaqqissuussamik atuisinnaatitaasutut piginnittut tullinnguuttutigut imaartittarnermut, anartarfiit puussiartaat ulikkaaqqannginnissaanut piniarlugu pisariaqartitat naapertorlugit nalunaarsortissapput.

1) Imaartinneq, anartarfilerisumit anartarfiup puussiartaa atuisup angerlarsimaffianut aassavaa

2) Imaartinneq, atuisup nammineerluni anartarfiup puussiartaa siparnimit peeriarlugu, anartarfiit puussiaanut karsimut ilitsivissamut silami inissisimasumut ilissavaa.

  Imm. 2. Anartarfilerinermi anartarfiit puussiartaanik katersinermi anartarfiit puussiartaalu Qeqqata Kommunianit akuerineqarsimasut kisimik atorneqassapput.

  Imm. 3. Anartarfiit puussiartaat pisuinnaat aqqutaannut imaluunniit nunaminertanut tamanut atorneqartunut inisseqqusaanngillat anartarfinneersuinnaassallutillu. Anartarfiup puussiartaanik aallernermi, puussiaq attanit allaangerusumik imaqarpat, anartarfilerisoq puussiartassanik nutaanik tunniussissanngilaq utertsitsinikkullu ajunngitsorsiassaqartitsinissamut periarfissaqanngilaq

 

  § 6. Atuisinnaatitaasutut piginnittoq anartarfiup puussiartaanik inissiiviup pitsaasuutitsinissamik aamma saligaatsuutitsinissamik, ilutigalugu anartarfeqarfimmit aqqusinermut, pisuinnaat aqqutaannut imaluunniit majuartarfinnut pisariaqarneratigut aqqutaanik aputaajaasarnissaq ujaraaralersuinissamulluunniit isumaginnittussaatitaavoq.

  Imm. 2. Illu aqqusinermit ungasissumi inissisimappat, anartarfilerisut biilii tunumorsorlutik ingerlasinnaaqqullugit nunap ilusaa naapertorlugu sapinngisamik pisariaqartinneqartumik nerutussuseqarlunilu portussuseqartumik aqqutissaqartinneqassaaq. Nerutussuseq portussuserlu pisariaqartinneqartoq Teknikkimut Avatangiisinullu immikkoortortamit nalunaarutigineqassaaq.

  Imm. 3. Kangerlussuarmi asiariartarfinni perusuersartarfinnik imaartakkanik atuisinnaatitaasutut piginnittoq, annanik kuutsitsivimmut namminneq imaarsisinnaapput. Kangerlussuarmi kommuni anartarfinnik katersisarnermik pilersitsissappat, tamanna atorneqassaaq.

 

  § 7.  § 5, imm. 1 nr. 1 naapertorlugu atuisinnaatitaasutut piginnittut angerlarsimaffimmut iserluni imaarsisarnermut nalunaarsoqqasumut anartarfimmut puussialertakkamut atatillugu pissutsit eqqiluisaanngippata, taava atuisoq § 5, imm. 1 nr. 2 naapertorlugu imaartinnermut nuunnissaanik kommunalbestyrelsi piumasaqarsinnaavoq.

  Imm. 2. Anartarfik puussialertagaq anartarfilerisumit tikinneqarsinnaanngippat, imm. 1 aamma atuuttarpoq.

 

  § 8. Anartarfiit puussiartaanut ulikkaarsimasunut karsimik ilitsiviusussamik, atuisinnaatitaasutut piginnittoq peqarnissamik isumaginnittussaatitaavoq. Karsimut ilitsiviusussamut tullinguuttut atuupput:

1) anartarfiup puussiartaasa pisariaqartinneqartut amerlassusaanut inissaqartitsilluassaaq,

2) qajannaatsuussaaq sivingalaartumillu ammaruminartumilli matoqartinneqassalluni.

3) ima sanaartugaassaaq inissinneqarlunilu, anartarfilerisup perusuersartarfiup puussiartaa annerpaamik 1 meterisut portutigisumik kivissinnaassallugu, tassa Suliffeqarfinnik Nakkutilliisoqarfiup piumasaqaataa naapertorlugu,

4) anartarfiup puussiartaata nippulluni qerruttuunnginnissaa qulakkeerneqassaaq,

5) minguitsuutinneqassaaq aputaajarsimassallunilu il.il.

6) anartarfilerisumit akornutitaqanngitsumik anguneqarsinnaalluni inissisimassaaq,

7) Ilitsivik igalaat eqqaqqissaavanut inissisimatinneqassanngilaq uumasunilluunniit imarisaa anguneqariaannaatinneqassanani,

8) karsi ilitsivimmit anartarfilerisut biiliinut ungasissuseq 25 m.-mik kiisalu anartarfilerisut pisullutik aqqutaa tamaat sinerlugu minnerpaamik 3,5 m.-mik portussuseqassalluni

  Imm. 2. Imm. 1 nr. 8 naapertorlugu ungasissusissamut Kommunalbestyrelsi immikkut akuersissuteqarsinnaavoq, assersuutigalugu atuisup innarluuteqarnera, nunap ilusaata appakaaffigiuminaannera imaluunniit assingusut patsisaallutik.

 

Kapitali 5

Annanik katersuiviit akuerisaasunik imaarsisarneq

 

  § 9. Qeqqata Kommuniani annanik katersuiviit akuerisaasut imaarneqarnissaat atuisinnaatitaasutut piginnittumit, tassa entreprenørit kinnernik milluaatilinnik, kommunip akuerisaanik, attanik katersuivinnik imaarsisarnissamik isumaqatigiinnikkut isumagineqassaaq. Annanik katersuiviit imaarneqartarnissaannut isumaqatigiissutinut tullinnguuttut atuupput:

1) Teknikkeqarnermut Avatangiisinullu immikkoortortap piumasaqarneratigut, isumaqatigiissutip assilinera, tankip imartussusaanik illoqutigiillu amerlassusaanik paasissutissartalik nassiunneqassaaq.

2) Teknikkeqarnermut Avatangiisinullu immikkoortortap piumasaqarneratigut, imaarsinermi biilinik ingerlatsisimanermut allagartap assilinera nassiunneqassaaq.

3) Annanik katersuivik ussissuulluni qerisinnanngitsuussaaq, immerneranullu kalerrisaaruteqarluni imaluunniit allatigut nalunaarsuuteqarluni kiisalu imaarneqarnissamut atortuligaalluni.

 

  § 10. Annanik katersuivimmit imaarneqarnissaanut ruujorimit isua, kinnernit milluaasunit slangimit ajornaquteqanngitsumik atassuserneqarsinnaanngorlugu inissinneqassaaq.

 

  § 11. Attanik katersuiviup imaarneqarnisaanut ruujorimit isua, kinnernit milluaasunit slangimit ajornaquteqanngitsumik atassuserneqarsinnaanngorlugu inissinneqassaaq, aputaajaanissamut/ujaraaralersornissaanut kiisalu annanik katersuiviup ajoquteqanngitsumik imaarneqarsinnaanissaanut atuisinnaatitaasutut piginnittoq isumaginnittussaatitaavoq.

 

  § 12. Maqitsineq nunamut userartuinertaqanngitsumik ingerlanneqassaaq, aammalu ruujorit slanngillu imaarluinnarneqassallutik.

  Imm. 2. Annat katersuivianit imermik errortuivikumik imaarsinermi:

1) Sisimiuni annanik eqqaaviup, B-805, Eqqaavimmut aqq-niittup avannaatungaani, meterialunnguanik ungasissusilimmiittumi kuuffissuartigut ruujorip isuatigut, annanik katersuivimmit imaakkat kuutsinneqartassapput.

2) Maniitsumi annanik eqqaaviup, B-1303, Annersuup eqqaani kuuffissuartigut ruujorip isuatigut, annanik katersuivimmit imaakkat kuutsinneqartassapput.

3) Kangerlussuarmi Kussuaq-p qanittuani kuuffissuup eqqaani kuitsivikkut attanik katersuivimmit imaakkat kuutsinneqartassapput.

 

Kapitali 6

Imermik errortuivikumik inoqutigiillu imermik errotuivikuannik kuutsitsineq

 

  § 13. Imeq errortuivikoq pisortat kuuffissuatigut kuutsinneqassaaq.

  Imm. 2. Atuisut kuuffissuarnut attavilernissamik periarfissaqanngitsut, annanik katersuivimmut imermik errortuivikumik imaluunniit inoqutigiinnit imermik errortuivikumik kuutsitsisassapput imaluunniit maangaannaq imermik errortuivikumik kuutsitsisinnaanissamik immikkut akuersissumik qinnuteqarsinnaapput.

  Imm. 3. Kuutsitsinissamut qinnuteqaat allakkatigut ingerlanneqassaaq aammalu Qeqqata Kommunia Teknikkeqarnermut Avatangiisinullu immikkoortortamut ilanngussaq 1-imi paasissutissat pillugit allassimasunik ilanngussalerlugu nassiunneqarluni.

  Imm. 4. Imm. 3 naapertorlugu akuersissummi pissutsinik annertuumik allanngortoqartillugu nutaamik qinnuteqartoqassaaq. Tulliuttunik qinnuteqartoqarsinnaavoq:

1) Inoqutigiinnit imermik errortuivikumik 50 PE tikillugu annertussuseqartup imermut errortuivikumut kuuffeqarfikkut, kangerlummut imaanullu kuutsitsineq.

2) Imermik errortuivikumik nunamut kussinernullu ammaannartunut, kangerlummut imaanullu kuuffilitsigut kuutsitsineq.

 

Kapitali 7

Maangaannartitsineq

 

  § 14. Anartarfimmit nunamut kuutsitsisoqassanngilaq. Taamaattumillu anartarfilerisoq atuisumut anartarfiit puussiartaanik aallernermini kuutsitsinngitsumik ingerlanneqassaaq. Soorluttaaq anartarfilerisoq anartarfinnit puussianik suliaqarnerminni annanik eqqaavimmullu imaarsinerani nunamut kuutsitsisoqassanngilaq.

  Imm. 2. Anartarfimmit maangaannaq kuutsitanik atuisussaatitaasutut piginnittoq erngerluni piiaassaaq. Tamanna anartarfinnut puussiamut issoraanikkut annanillu eqqaavimmut tunniussinikkut ingerlanneqassaaq. Anartarfiit puussiartaanik anartarfinnik eqqaavimmut tunniussinissaq pillugu atuisussaatitaasoq anartarfilerisumut isumaqatigiissuteqassaaq, kommunimilu imermik errortuivikumut akitsuutinut ileqqorisassani akigititai naapertorlugit akiliisoqassalluni.

 

Kapitali 8

Akitsuutit

 

  § 15. Anartarfiit puussiartaanik katersinermut (anartarfiit puussiartaanut aaqqiissut) ukiumut akitsuutinik kiisalu imermik errortuivikumik kuuffissuarmut kuutsitsinermut ukiumut akitsuutinik Kommunalbestyrelsi aalajangersaasarpoq. Kommunip imermut errortuivikumut akitsuutinut ileqqoreqqusaani ukiut tamaasa nutarterneqartartuni aammalu kommunip nittartagaani tamanit takuneqarsinnaasuni akitsuutit takuneqarsinnaapput.

  Imm. 2. Atuisinnaatitaasutut piginnittumit anartarfiup puussiartaanut imaluunniit kuuffissuarmut aaqqiissummut nalunaarsoqqasumut akitsuut akilerneqartassaaq.

  Imm. 3. Iserternermi atuisinnaatitaasutut piginnittoq anartarfiup puussiartaanut aaqqiissummut imaluunniit kuuffissuarmut aaqqiissummut nalunaarsortissaaq aammalu nutseqqinnermi aaqqiissummut toqqarsimasamut taamaatitsissalluni. Nuunnermut atatillugu Qeqqata Kommuniani Teknikkeqarnermut Avatangiisinullu immikkoortortamut taamaatitsinnginnermi, atuisinnaatitaasutut piginnittoq imaartittarnissamut akiliisarnissaminik pisussaatitaavoq, tassa atuisinnaatitaasutut piginnittup allap nalunaarsorneqarnissaata tungaanut.

  Imm. 4. Akiliiffissamik allannguinermi, matumani akiliisarnissamut piffissarititap iluini nalunaarsortinnerni nutaani kiisalu atorunnaarsitsinermi, piffissap iluani imaartittarnissamut amerlassutsit nalunaarsorfiusut akilerneqartassapput.

  Imm. 5. Illuaqqanit, illunit allanit kiisalu nunaannarmi sammisaqartitsinermit anartarfiit puussiartaat imallit, anartarfilerisunik isumaqatigiissuteqarnikkut, imermik errortuivikumut akitsuutinut ileqqoreqqusat naapertorlugit akiliuteqarnikkut annanut eqqaavimmut tunniunneqarsinnaapput.

  Imm. 6. Atuisut ataasiakkaat entreprenørinut toqqaannartumik annanik katersuivimmik imaarsisarnermik akiliisassapput.

  Imm. 7. Imermik errortuivikumik aammalu inoqutigiinnit imermik errortuivikumik nunamut kuutsitsinissamut akuersissutinut akitsuutit Kommunalbestyrelsimit aalajangersarneqartarput, tamakkulu imermik errortuivikumik akitsuutinut ileqqoreqqusami allassimapput.

 

Kapitali 9

Nakkutilliineq

 

  § 16. Anartarfiit puussialertakkanik, annanik katersuivinnik kiisalu taakkunannga imaarsinermi suleriutsinik misissuinissamut, Qeqqata Kommuniani Teknikkeqarnermut Avatangiisinullu immikkoortortaq eqqartuussiviup aalajangigaanik peqarnani aammalu kinaassutsimik uppernarsaateqarnikkut qaqugukkulluunniit nakkutilliinermik oqartussaasuupput. Isersinnaaneq sioqqullugu atuisinnaatitaasutut piginnittoq sapinngisamik siumut nalunaarfigineqaqqaassaaq.

  Imm. 2. Eqqartuussiviup aalajangigaanik peqarnani imm. 1 naapertorlugu iserneq aatsaat pissaaq annertuumik peqqissutsimut ulorianartorsiortitsisoqartoq aamma annertuumik mingutsitsineq imaluunniit mingutsitsinerup siaruarnera pinngitsoortinniarlugu ingerlaannartumik iliuuseqartoqartariaqartoq ilimanarpat imaluunniit natsorsuutigineqarpat.

 

Kapitali 10

Kinguneqartitsinerit

 

  § 17. §§ 5-8, §§ 9-11, §13 aamma § 14-imik unioqqutitsinerit Kalaallit Nunaanni Pinerluttulerineq pillugu Inatsimmi malittarisassat naapertorlugit pineqaatissiinermik akiliisitsinikkut kinguneqartinneqarsinnaapput. 

  Imm. 2.  Pinerluttulerinermut Inatsimmi Kalaallit Nunaannut atuuttumi maleruagassat malillugit inuk inatsisit malillugit akisussaatinneqartoq akiliisinneqarsinnaavoq.

  Imm. 3. Imm. 1 aamma 2 malillugit suliat Kalaallit Nunaanni Eqqartuussivimmut suliaqartussatut siullertut suliakkiutigineqassapput.

  Imm. 4.  Akiliisitsissutit imm. 1 aamma 2 malillugit pineqaatissiissutigineqartut Nunatta Karsianut pisassanngortinneqassapput.

 

Kapitali 11

Naammagittaalliutit

 

  § 18. Qeqqata Kommuniani imermik errortuivikumik eqqaaneq pillugu saaffiginnissutit Teknikkeqarnermut Avatangiisinullu immikkoortortamut ingerlateqqinneqartassapput. Mail: Qeqqata@qeqqata.gl imal. allakkatigut:

1) Sisimiunut nunaqarfiit ilanngullugit: Makkorsip Aqq. 2, postboks 1014, 3911 Sisimiut

2) Maniitsumut nunaqarfiit ilanngullugit: Kuuttartoq 8, postboks 100, 3912 Maniitsoq.

 

  § 19. Kommunalbestyrelsip aalajangiineri Avatangiisit Innarlitsaalineqarnissaat pillugu Naammagittaalliuteqartarfimmut naammagittaalliutigineqarsinnaapput. Naammagittaalliuuteqarsinnaatitaasut tassaapput:
1)  Aalajangiinermik nassitsivigineqartut.

2) Nunatsinni Nakorsaaneqarfik

3) Kinaluunniit suliap qanoq naammassineqarnissaanut nammineq immikkut annertuumillu soqutigisaqartoq.

4) Peqatigiiffiit kattuffiillu, ileqqoreqqusatik naapertorlugit peqqissarfiullutik qasuersaarfiusartunik, avatangiisinik pinngortitamillu annertuumik soqutigisanik isumagisaqarnissamik siunertaqartut.

  Imm. 2. Aalajangiinerup aalajangiinermi pineqartumut nalunaarutigineqarfianit ullormit sapaatip-akunneri arfinillit naammagittaalliornissamut piffissarititaapput.

  Imm. 3. Avatangiisit Innarlitsaaliorneqarnissaat pillugit Naammagittaalliuuteqartarfiup suliami aalajangiinissaata tungaanut imaluunniit Naammagittaalliuuteqartarfiup allatut aalajangiinissaata tungaanut maalaaruteqarneq peqqussinermut imaluunniit inerteqqussummut kinguartitsisarpoq. Peqqussummik inerteqqummilluunniit aalajangiisoqarsimappat, immikkut tunngaveqartoqartillugu, peqqussuteqarnerup imaluunniit inerteqquteqarnerup saniatigut, qanorluunniit maalaaruteqartoqartillugu Kommuni aalajangiinerup malinneqarnissaanik aalajangiisinnaavoq. Akuersissutinut imaluunniit immikkut akuersissummut maalaarutit kinguartitsineqarneq ajorput.

 

Kapitali 12

Atuutilersitsinermut atorunnaarsitsinermullu aalajangersakkat

 

  § 20. Kommunalbestyrelsimit akuersissutigineqarneranit qaammatisiutit ulluisa 30-t qaangiunneranni maleruaqqusaq atuutilersinneqarpoq.

  Imm. 2. IIutigitillugu anartarfilerinermut, anartarfiit imaannik kiisalu imermik mingunnikumik eqqaaneq pillugu maleruaqqusaq 24. november 2016-imeersoq atorunnaarsinneqarpoq.

  Imm. 3. 2023-mi oktober-ip 26-ani Qeqqata Kommunip Kommunalbestyrelsianit akuersissutigineqarpoq.

 

 

Malik Berthelsen (atsior.)

Borgmesteri

 

 

/ Hans Christian Sværd (atsior.)