Kapitali 1

Aallakaatitassiorsinnaatitaaneq

§ 1.  Uku § 2-mi taaneqartunik aallakaatitassiornissamut pisinnaatitaapput:
1)  Kalaallit Nunaata Radioa (KNR), tak. kapitali 4.
2)  Ingerlatseqatigiiffiit, peqatigiiffiit assigisaallu kiisalu kommunit kapitali 3 malillugu aallakaatitsisinnaanermut akuersissummik tunineqarsimasut.
Imm. 2.  Inatsisartut inatsisaat aammalu Inatsisartut inatsisaat naapertorlugu aalajangersakkat atuutilersinneqarsimasut kiisalu aallakaatitsisinnaanermut akuersissummik tunineqarnermi piumasaqaatitut nalunaarutigineqarsimasinnaasut naapertorlugit aallakaatitassiortoqartassaaq.

§ 2.  Aallakaatitassiorneq imatut paasineqassaaq:
1)  Radioqarfiit aqqutigalugit tusarnaagassianik isiginnaagassianillu inunnut tamanut aallakaatitsineq.
2)  Tusarnaagassianik isiginnaagassianillu nr. 1-imi ilanngullugit taaneqanngitsunik antenneqarfiit ataatsimoorussat iluaqutigalugit siammarterinerit.
Imm. 2.  Inatsisartut inatsisaanni matumani radioqarfinnik oqarnermi pineqarput radiukkut attaveqarnermut atortut silaannakkoortut suulluunniit.
Imm. 3.  Inatsisartut inatsisaanni matumani antenneqarfinnik ataatsimoorussanik oqarnermi pineqarput antenneqarfiit ataatsimoorussat kabeleqarfiillu allat aallakaatitassianik tusarnaagassanik isiginnaagassanillu ineqarfinnut namminerisamik najugaqarfiusunut inunnut tamanut siammarterinermut atortut.
Imm. 4.  Inatsisartut Inatsisaanni matumani kabeleqarfinnik oqarnermi pineqarput kabelit aqqutigalugit nalunaarasuartaatitigut attaveqaqatigiinnermut atortut.

§ 3.  Nalunaarasuartaatitigut attaveqarneq sullissinerlu pillugit Inatsisartut peqqussutaat naapertorlugu tamanut ammasumik nalunaarasuartaatitigut sullissinermi atortorisanik ingerlatsinermillu kiisalu tamakku suliariumannittussarsiorsinnaanerinut kisermaassisinnaanermik akuersissuteqartup, teknikkikkut atortunik KNR-ip § 2, imm. 1 naapertorlugu tusarnaagassianik isiginnaagassianillu inunnut tamanut aallakaatitsisarnermini pisariaqartitaanik, KNR-mik isumaqatigiissutit malillugit pilersissavai, atortunillu ingerlatsineq isumagissallugu.
Imm. 2.  Atortunik imm. 1-imi taaneqartunik ikkussuinermut ingerlatsinermullu piumasaqaatit aalajangersarneqassapput akuersissummik pigisaqartup Naalakkersuisullu isumaqatigiissusiornerisigut,

Kapitali 2
Tusarnaagassianik isiginnaagassianillu siammarterineq

TV-kkut aallakaatitsissutaasinnaasut digitaliusut iluaqutigalugit tusarnaagassianik isiginnaagassianillu siammarterineq

§ 4.  Tusarnaagassianik isiginnaagassianillu Kalaallit Nunaanneersunik nunanillu allaneersunik aallakaatitsissutit digitaliusut iluaqutigalugit nuna tamakkerlugu siammarterineq taamaallaat Naalakkersuisut akuersissuteqarnerisigut pisinnaavoq.
Imm. 2.  Naalakkersuisut akuersissummik tunniussinerminnut atatillugu akuersissummut piumasaqaatinik aalajangersaasinnaapput.
Imm. 3.  Akuersissuteqarnermut akitsuuteqartitsinissaq Naalakkersuisut piumasarisinnaavaat.
Imm. 4.  Naalakkersuisut akuersissummik atorunnaarsitsisinnaapput akuersissummik piginnittup
1)  Inatsisartut inatsisaat imaluunniit aalajangersakkat inatsit naapertorlugu aalajangersarneqarsimasut unioqqutippagit, unioqqutitsineq annertuppat unioqqutitsinerilluunniit qasseeriarluni akuttunngitsumik pippata, imaluunniit
2)  akuersissuteqarnermi piumasaqaatigineqartut sumiginnarpagit.
Imm. 5.  Tusarnaagassianik isiginnaagassianillu Kalaallit Nunaanneersunik nunanillu allaneersunik aallakaatitsissutit digitaliusut iluaqutigalugit nuna tamakkerlugu siammarterinermut akuersissummik tunniussisarneq pillugu maleruagassanik Naalakkersuisut aalajangiisinnaapput.

Antenneqarfinni ataatsimoorussani tusarnaagassianik isiginnaagassianillu siammarterisarneq

§ 5.  Tusarnaagassianik isiginnaagassianillu Kalaallit Nunaanneersunik nunanillu allaneersunik aallakaatitanik, antenne atorlugu tigooqqarneqartunik, imaluunniit kabeleqarfiit aqqutigalugit tigooqqarneqartunik, ingerlatitseqqiineq taamaallaat pissaaq allannguuteqartinnagit aallakaatitsinerullu peqatigisaanik.
Imm. 2.  Taamaattorli allagartalersuineq assigisaannillu iliuuseqarnerit, nipi assilissallu atorlugit aallakaatinneqartup imaanik allanngortitsinngitsut, kiisalu piffissakkut allakkut aallakaatitsinerit pisinnaapput radiukkut imaluunniit tv-kkut aallakaatitassiorfik pineqartoq akuersisimappat.

§ 6.  Antenneqarfinnik ataatsimoorussanik piginnittut pisussaapput tusarnaagassiat isiginnaagassiallu radioqarfiit aqqutigalugit KNR-imit siammarterneqartut siaruarternissaat qulakkiissallugu. Tamatumanili pineqanngillat aallakaatitassiat § 29, imm. 1, naapertorlugu aallakaatinneqartut. Pisussaaffik aamma atuutinngilaq KNR-ip aallakaatitai antenneqarfinnik ataatsimoorussanik atuisunit allatut tigoorarneqarsinnaappata.
Imm. 2.  KNR-imit aallakaatitassiat digitaliusut taamaallaat siaruarterneqassapput aallakaatitassiat digitaliusut allat antenneqarfimmi siaruarterneqarpata. KNR-imit aallakaatitassiat digitaliusut allanngortinneqarnissaat inerteqqutaavoq, ilutigitillugu aallakaatitassiat assingi digitaliusumik siaruarterneqanngippata.

§ 7.  Ataatsimoorussamik antenneqarfiit marlunnit amerlanerusunik kanaleqarpata aammattaaq kanali ataaseq atugassanngortinneqassaaq nunaqarfigisami aallakaatitassianut kapitali 3 malillugu akuersissut naapertorlugu aallakaatinneqartunut siammarterneqartunulluunniit.
Imm. 2.  Aallakaatitassiat ataatsimoortut neqeroorutigineqarpata:
1)  ataatsimoortut tamarmik aallakaatitassianik imm. 1-imi aamma § 6-imi ilanngunneqartunik imaqassapput, aammalu
2)  ataatsimoortut ataasiinnaat, aallakaatitassianik imm. 1-imi aamma § 6-imi ilanngunneqartunik imaqartut imaluunniit aallakaatitassianik taakkuinnarnik aallakaatitassianillu allanik imaqartut pisiarinissaannut periarfissaqassaaq, taakkulu ima killilimmik akeqartillugit akilerneqassapput aallakaatitassiat ilassutaat, aallakaatitassiat ataatsimoortut katillugit akiinut killilimmik naleqassallutik.
Imm. 3.  Imm. 2 naapertorlugu pisussaaffik atuutinngilaq aallakaatitassiat pineqartut antenneqarfinnik ataatsimoorussanik atuisunit allatut tigoorarneqarsinnaappata.

§ 8.  Dekoderit aallakaatitanik ilisarnarunnaarsakkanik allanngortitsilluni tv-kkut aallakaatitanik fjernsynikkut takuteqqeriaannanngortitsissutit antennini ataatsimoorussani atorneqarsinnaanerinut maleruagassanik Naalakkersuisut aalajangiisinnaapput. Maleruagassani pissutsit makku pineqarsinnaapput:
1)  Aallakaatitassianik neqerooruteqartut dekoderinik ataatsimoorussanik antenneqarfinni ataatsimoorussani atorneqartunik atuisinnaatitaanerat.
2)  Aallakaatitassianik neqerooruteqartut namminerisamik dekoderiminnik atuisinnaatitaanerat.
3)  Aallakaatitassianik neqerooruteqartut atuisunut toqqaannartumik akiliisitsisinnaanerat.

Kapitali 3
Aallakaatitsisinnaanermut akuersissut

§ 9.  Ingerlatseqatigiiffiit, peqatigiiffiit assigisaasaluunniit nuna tamakkerlugu aallakaatitassiornissamut qinnuteqarnerisa kingorna, Naalakkersuisut akuersissut tunniussinnaavaat (nuna tamakkerlugu aallakaatitsisinnaanermut akuersissut), tak. § 14.
Imm. 2.  Naalakkersuisut nuna tamakkerlugu aallakaatitsisinnaanermut akuersissuteqarnerminnut atatillugu akuersissummut piumasaqaatinik aalajangiisinnaapput, tassani ilanngullugu piffissamik killiliisinnaaneq.
Imm. 3.  Nuna tamakkerlugu aallakaatitsisinnaanermut akuersissummut piumasaqaatit atugassarititaasullu Naalakkersuisunit erseqqinnerusumik maleruagassiuunneqarsinnaapput.

§ 10.  Naalakkersuisut ingerlatseqatigiiffiit, peqatigiiffiit assigisaasalu kiisalu kommunit qinnuteqaateqarnerisigut nunaqarfigisami aallakaatitsisinnaanermut akuersissuteqarfigisinnaavaat (nunaqarfigisami aallakaatitsisinnaanermut akuersissut) tak. § 13.
Imm. 2.  Nunaqarfigisap iluani aallakaatitsisinnaanermut akuersissut kommunip pineqartup killeqarfiisa iluanni aallakaatitsisinnaanermut akuersissutaavoq. Pissutsit immikkut ittut atuutsillugit kommunit sanilit iluanni aamma aallakaatitsisinnaaneq Naalakkersuisut aallakaatitsinissamut akuersissummik piginnittumut akuersissutigisinnaavaa.
Imm. 3.  Aallakaatitassiamik sumiiffimmi allami aallakaatitsisinnaanermut akuersissummik piginnittumit tassunga ilutigitillugu aallakaatinneqartumik aallakaatitsinissaq taamaallaat ajornanngilaq aallakaatitsisinnaanermut akuersissutinik piginnittut tamanna isumaqatigiissutigippassuk, aammalu aallakaatitassiat ataatsikkut aallakaatinneqartut ataasiakkaaginnaappata piffissamilu killilimmi pillutik.
Imm. 4.  Naalakkersuisut sumiiffimmi aallakaatitsisinnaanermut akuersissutaagallartumik tunniussinermikkut aallakaatitsisinnaaneq akuersissutigisinnaavaat, aallakaatitassiat sumiiffiup iluani piffissap sivikitsup ingerlanerani pisunik ataasiakkaanik imaqarpata.

§ 11.  Aallakaatitsisinnaanermut akuersissutip piumasaqaatitaraa qinnuteqartup radiofrekvensit pillugit inatsisip Kalaallit Nunaanni atuutilersinneqarnera pillugu Kunngip peqqussutaa naapertorlugu radiofrekvensimik atuinissamut akuersissummik pisimanissaa.
Imm. 2.  Aallakaatitsisinnaanermut akuersissut piffissami, qaammatisiutit malillugit ukiup akuersissummik tunniussiffiusup sinnerani kiisalu qaammatisiutit malillugit ukiuni taassuma tulliini tallimani atuuttussatut tunniunneqassaaq, aatsaalli piffissamut sivikinnerusumut qinnuteqartoqarsimanngippat. Piffissaq aallakaatitsisinnaanermut akuersissutip atuuffia naappat nutarterneqarnissaa qinnutigineqarsinnaavoq.

§ 12.  Aallakaatitsisinnaanermut akuersissummik qinnuteqaammi aallakaatitassiat suunerat nassuiarneqassaaq. Aallakaatitassiariniakkat suunera tamakkerlugit nassuiaammi ersersinneqassapput. Qinnuteqaat paasissutissanik makkuninnga imaqassaaq:
1)  Qinnuteqaateqartup aqqa, najugaa, immaqalu oqarasuaatip telefaxillu normui kiisalu e-mail adresse.
2)  Qinnuteqaateqartup IIN-normua aamma ingerlatsiveqarfittut normua.
3)  Aallakaatitsisinnaanermut akuersissutip qanoq siaruarsinnaatiginera.
4)  Sumiiffik aallakaatitat anngummaffigisinnaasaat.
5)  Aallakaatitsisinnaanermut akuersissutip suussusia.
6)  Piginnittunut, siulersugaanermut pisortaqarnermullu tunngasut.
7)  Tusagassiuutitut ingerlassanik allanik piginnittuusimagaanni suleqateqaraanniluunniit.
8)  Suleqatigiinnissamik pilersaaruteqartoqarnersoq.
9)  Aallakaatitassiornerup ilusia imarisaalu, aamma oqaatsit agguataagaanerat.
10)  Piffissat aallakaatitsiffiit.
11)  Aallakaatitassiornerup aningaasalersugaanera.
12)  Aallakaatitsinermut aallakaatitassiornermullu atortorissaarutit.
13)  Radiofrekvensit pillugit inatsisip Kalaallit Nunaanni atuutilersinneqarnera pillugu peqqussut naapertorlugu radiofrekvensimik atuinissamut akuersissummik qinnuteqartup pigisaqarneranut uppernarsaat.
Imm. 2.  Qinnuteqaat qinnuteqartumit atsiorneqarsimassaaq.
Imm. 3.  Qinnuteqaateqartup akuersissummik tunineqareernermi kingorna paasissutissanut imm. 1-imi taaneqartunut allannguutaasinnaasut Naalakkersuisunut qaqugukkulluunniit nalunaarutigisassavai.
Imm. 4.  Qinnuteqaateqarnermi periusissat pillugit maleruagassat aamma paasissutissanut ilassutissat Naalakkersuisut aalajangersinnaavaat.

§ 13.  Ingerlatseqatigiiffiit, peqatigiiffiit assigisaasalu sumiiffiup aalajangersimasup iluani aallakaatitsisinnaanerannut akuersissut piumasaqaatit makku naammassineqarsimappata tunniunneqassaaq:
1)  Ingerlatseqatigiiffik, peqatigiiffik assigisaaluunniit Kalaallit Nunaanni angerlarsimaffeqassaaq.
2)  Ingerlatseqatigiiffiup, peqatigiiffiup assigisaataluunniit qinnuteqaammi uppernarsaatissanut piumasaqaatit naammassisimassavai, tak. § 12, imm. 1.
3)  Aallakaatitassiat imarisaat inatsisinik malinnissorineqassapput.
4)  Radiofrekvensit pillugit inatsisip Kalaallit Nunaanni atuutilersinneqarnera pillugu peqqussut naapertorlugu frekvensimik atuinissamut akuersissummut piumasaqaatit naammassineqarsimassapput.
Imm. 2.  Kommunip aallakaatitsisinnaaneranut akuersissut tunniunneqassaaq imm. 1-imi piumasaqaatit naammassineqarsimappata, aammalu kommunip aallakaatitassiortarnissamini siunertarippagu innuttaasut soqutiginnittut aallakaatitassiornermut aallakaatitsinermullu atortorissaarutinik atugassaqartinnissaat imaluunniit kommunip paasissutissanik ingerlatitsisarnissaa.

§ 14.  Ingerlatseqatigiiffiit, peqatigiiffiit assigisaasalu nuna tamakkerlugu aallakaatitsisinnaanerannut akuersissut tunniunneqarsinnaavoq piumasaqaatit imaattut naammassineqarsimappata:
1)  § 13, imm. 1-imi piumasaqaatit naammassineqarsimappata.
2)  Qinnuteqaateqartoq sumiiffiup aalajangersimasup iluani tassunga ilutigitillugu aallakaatitsisinnaanermut akuersissummik tunineqarsimanngippat.
3)  Qinnuteqaateqartup aningaasaqarniarnikkut tunngavia naammaginartuuppat.
4)  Qinnuteqaateqartup aallakaatitsinissamut periarfissai naammaginartuuppata.
5)  Aallakaatitat annertussutsimikkut imarisamikkullu isumaqarfigineqarpata kulturikkut paasissutissiinikkullu innuttaasunut annertuumik tunniussisinnaasut.
Imm. 2.  Nuna tamakkerlugu aallakaatitsisinnaanermut akuersissummik kommunimut tunniussisoqarsinnaanngilaq.

§ 15.  KNR-ip akuersissutillu piginnittuata aallakaatitsinerit tamarmik aallakaatitassiornermut akisussaasoqartinneqarnissaat isumagissavaat.
Imm. 2.  KNR-ip akuersissutillu piginnittuata isumagissavaat aallakaatitassiat naammassineri tamaasa kia akisussaasimanerata nalunaarutigineqarnissaa, aammalu radioqarfiup tv-qarfiulluunniit suunera paasisitsissutigineqassaaq.
Imm. 3.  KNR-ip akuersissutillu piginnittuata ingerlatami aalajangersakkat eqqortinneqarnissaat nakkutigissavaat.

§ 16.  KNR-ip aamma aallakaatitsinnaanermut akuersissummik piginnittup pisussaaffigaat upalungaarsimanissami pingaaruteqartunik innuttaasunut nalunaarutinik ingerlatitseqqiinissartik.
Imm.2.  KNR pisussaavoq inuiaqatigiinnut paasissutissat innuttaasunut soqutiginartut aallakaatinnissaannut.
Imm. 3.  Imm. 1-imi 2-milu aallakaatinneqartussat taaneqartut qaqugu qanorlu aallakaatinneqartarnissaat pillugu Naalakkersuisut malittarisassanik aalajangiisinnaapput.

§ 17.  KNR-ip aallakaatitsinissamullu akuersissummik piginnittup aallakaatitassiat tamaasa immiuttassavaat qaammatinilu pingasuni toqqortarisassallugit, maleruagassat Naalakkersuisunit aalajangerneqartut naapertorlugit. Aallakaatitassiorneq pillugu suliamik, pilerisaarutit aallakaatinneqarsimasut ilanngullugit, suliaqarnermut atatillugu Naalakkersuisut KNR aamma aallakaatitsinissamut akuersissummik piginnittoq peqqusinnaavaat aallakaatitassianik immiussat tunniuteqqullugit. Aallakaatitsineq pillugu suliap suliarineqarnerata pisariaqartippagu KNR aamma aallakaatitsinissamut akuersissummik piginnittoq Naalakkersuisunit peqquneqarsinnaavoq aallakaatitassiat qaammatinit pingasunit sivisunerusumik toqqortareqqullugit.

§ 18.  KNR-ip aamma sumiiffinni radioqarfiit tv-qarfiillu, kapitali 5 naapertorlugu tapiissutinik pissarsisartut, piginneqqaartussaatitaaneq pillugu inatsisip periarfissiinera naapertorlugu innuttaasunut periarfissiissapput aallakaatitassianik toqqortaasivimminni misissuisinnaatillugit.
Imm. 2.  Aallakaatitassianik toqqortaasivimmi pisortaq piumasaqarsinnaavoq misissuisinnaatitaanermut atatillugu aningaasartuutit matussutissaannik akiliuteqartitsinissamik.

§ 19.  Naalakkersuisut sumiiffimmi aallakaatitsisinnaanermut akuersissut atuukkunnaarallartissinnaavaat atuukkunnaavitsissinnaalluguluunniit, akuersissutip piginnittuata § 13 naapertorlugu aallakaatitsisinnaanermut akuersissuteqarnissamut piumasaqaatit naammassisinnaajunnaarpagit, imaluunniit akuersissutini ukioq ataaseq sinnerlugu atorsimanngippagu.
Imm. 2.  Naalakkersuisut sumiiffimmi aallakaatitsisinnaanermut akuersissut atuukkunnaarallartissinnaavaat atuukkunnaavitsissinnaalluguluunniit, akuersissutip piginnittuata
1)  paragraffit 15-imiit 18-imut, § 17 naapertorlugu peqqussutit nalunaarutigineqartut imaluunniit aalajangersakkat taakku malillugit § 16, imm. 3-mi peqqussutigineqartut sumiginnarpagit,
2)  § 12, imm. 3, unioqqutippagu,
3)  pilerisaarisarnermut aningaasalersuinermullu maleruagassat unioqqutippagit, tak. kapitali 6,
4)  Inatsisartut inatsisaat imaluunniit aalajangersakkat inatsit naapertorlugu aalajangersarneqarsimasut unioqqutippagit, unioqqutitsinerit annertuujuppata qasseeriarluniluunniit unioqqutitsineruppata,
5)  ingerlatsinermini inatsisit allat annertuumik qasseeriarluniluunniit unioqqutippagit, imaluunniit
6)  Radiofrekvensit pillugit inatsisip Kalaallit Nunaannut atuutilersinneqarnera naapertorlugu akileraarutit, akitsuutit inatsisilluunniit malillugit akiliutaasussat akilersimanngippagit.
Imm. 3.  Imm. 2-mi taaneqartut pisimatillugit nuna tamakkerlugu aallakaatitsisinnaanermut akuersissut Naalakkersuisut atorunnaarallartissinnaavaat atorunnaavitsissinnaalluguluunniit. Atorunnaarsitsineq pisinnaavortaaq akuersissutip piginnittuata aallakaatitsisinnaanermut akuersissummik tunineqarnerminut piumasaqaatit naammassisinnaajunnaarpagit, tak. § 14-imi akuersissummut piumasaqaatit, imaluunniit akuersissut ukioq ataaseq sinnerlugu atorneqarsimanngippat.

Kapitali 4
KNR

Siunertat suliassallu

§ 20.  KNR-ip siunertaraa Kalaallit Nunaanni innuttaasut tamakkerlugit aallakaatitassianik sullissinernillu tamatigoortunik nutaarsiassaqartitsinermut, qaammarsaanermut, ilinniartitsinermut, eqqumiitsuliornermut aliikkusersuinermullu tunngasunik (innuttaasunik kiffartuussinermi pisussaaffiit) tv radiolu aqqutigalugit pilersorneqarnissaat qulakkiissallugu. KNR-ittaaq aallakaatitassianik kiffartuussinernillu neqeroorutimini atorsinnaavai internet elektroniskimillu periarfissat allat.
Imm. 2.  Aallakaatitassiat suliarilluagaallutillu, tamatigoortuullutillu assigiinngisitaarnissaat anguniarneqassaaq.
Imm. 3.  KNR-ip aallakaatitassiai ataatsimut isigalugit Kalaallit Nunaanni inuiaqatigiit tamatigoortumik sammineqarnerannik imaqassapput, tassuunakkullu kulturikkut, inuunermik paasinninnikkut inuunermilu atugassarititaasutigut nunap immikkoortuini assigiinngitsuni atugaasut qanoq assigiinngisitaartiginerinik takussutissiissallutik.
Imm. 4.  Nunap tamavimmi sammineqarnissaa anguniarlugu KNR aallakaatitassiortartullu allat, aamma sumiiffinni radioqarfiit tv-qarfiillu, niuernerpalaartumik tunngaveqarlutik erseqqinnerusunik isumaqatigiissuteqassapput, taamaalillutik aallakaatitassiortartut allat sumiiffimminniit KNR-ip nuna tamakkerlugu aallakaatitsineranut ilaatigut pilersuisunngorlutik.
Imm. 5.  Aallakaatitassiat innuttaasut inuiaqatigiinnut tunngasunik pingaarutilinnik ilisimatinneqarnissaannik oqallinnissaanillu qulakkeerisuussapput.
Imm. 6.  Aallakaatitassiatigut eqqumiitsuliornikkut kulturikkullu pilersitsisarnerup tamatiguussusia takussutissaqartinneqassaaq, aallakaatitassianilu inuiaat kalaallit kulturikkut soqutigisaasa amerlasuunut sammisuunerat ersersinneqassalluni. KNR-ip kalaallit eqqumiitsuliaannik kulturiannillu, aamma kalaallit kulturikkut kingornussaannik sulissutiginninniartutut ingerlatitseqqiiniartutullu inissisimanini pingaartilluinnassavaa.
Imm. 7.  KNR-ip aallakaatitassiat meeqqanut inuusuttunullu immikkut sammitinneqartut isumagissavai.
Imm. 8.  KNR-ip teknikkikkut periarfissat nutaat atorlugit isumaginiassavaa inuit innarluutillit aallakaatitassianik atuisinnaanerannik annertusaanissaq, matumani aamma aallakaatitassiat inuiaqatigiinnut annertuumik soqutiginaatillit sapinngisamik allagartalersugaanissaat ussersornikkulluunniit nutserneqarnissaat anguniassallugu.
Imm. 9.  KNR-ip innuttaasuni ikinnerussuteqarlutik kalaallit oqaasiinik ilitsoqqussaralugu oqaaseqartuunngitsut aallakaatitassiamini sapinngisamik annertunerpaamik isumagineqarnissaat qulakkiissavaa.

§ 21.  KNR-ip aallakaatitassianik meeqqat ukiukinnerit timikkut, tarnikkut ileqqorissaarnikkulluunniit annertuumik ajoquserneqaatigisinnaasaannik, matumani pingaartumik aallakaatitassianik atoqatigiinnermut tunngasunik imaluunniit pissuteqanngivilluni nukersornermik imaqartunik aallakaatitsisoqannginnissaa qulakkiissavaa. Ilanngutassiat sakkortuumik nukersornernik imaqartut imaluunniit isiginnaagassat kanngunartunik imallit KNR-ip tusarnaartartunut isiginnaartartunullu mianersoqqussutigisassavai.
Imm. 2.  KNR-ip aallakaatitassianik ammip qalipaataanik, arnaanermik/angutaanermik, upperisamik, sumit naggueqarnermik, nunamit suminngaanneernermik, politikkikkut isummamik anguteqammilluunniit/arnaqammilluunniit atoqateqartartuunermik pissuteqartumik qinngarsuilernissamut aqqutissiueqataasinnaasunik aallakaatitsisoqannginnissaa qulakkiissavaa.

§ 22.  Aallakaatitassianik aaqqissuussinermi pingaartilluinnarneqassapput naqisimaneqanngitsumik paasissutissiisinnaatitaaneq oqaaseqarsinnaatitaanerlu.
Imm. 2.  Innuttaasut KNR aqqutigalugu paasissutissiisinnaanissamut periarfissinneqarnissaat KNR-ip qulakkiissavaa. KNR tassunga atatillugu aningaasartuutinut akiliuteqartitsilluni tusarnaartartut isiginnaartartullu nammineerlutik aallakaatitassiaminnik ineriartortitsineranni ikiorneqarnissaannik aammalu tusarnaartartut isiginnaartartullu allatut KNR aqqutigalugu saqqummiussisinnaanissaannik neqeroorfigisinnaavai.

§ 23.  Paasissutissiisarnermi tunngaveqarluartarnissaq nakerisarsiortannginnissarlu pingaartinneqassapput.

§ 24.  KNR-ip oqaatsit pillugit erseqqissumik anguniagaqarnermigut kalaallit oqaasiisa pigiinnarneqarnissaat ineriartortinneqarnissaallu peqataaffigissavaa.

§ 25.  KNR-ip nutaarsiassaqartitsinermik aallakaatitaasa annertunersaasa nammineerluni aallakaatitassiaanissaat KNR-ip qulakkiissavaa, tak. imm. 2.
Imm. 2.  Nammineerluni aallakaatitassiat tassaapput radiukkut tv-kkullu aallakaatitassiat aaqqissorneqarsimasut KNR-ip nammineq suliarisimasai aamma aallakaatitassiat aaqqissorneqarsimasut KNR-ip pingaarnertut suliarinnittuulluni aallakaatitassiortartut allat aallakaatitassioqatigalugit suliarisimasai.
Imm. 3.  KNR-ip nammineerluni aallakaatitassiaasa saniatigut aallakaatitassiat piniarnerisigut aallakaatitassiortartunillu allanit pisinikkut pissarsiarineqartassapput, tak. § 20, imm. 4. Aallakaatitassiat aamma KNR-ip aallakaatitassiortartullu allat aallakaatitassioqatigiinnerisigut suliarineqarsinnaapput.

§ 26.  Innuttaasut aallakaatitsineq pillugu tusarniarneqartarnissaat KNR-ip qulakkiissavaa.

§ 27.  Pilerisaarutit aallakaatitassiallu aningaasalersorneqartut kapitali 6-imi maleruagassat malillugit aallakaatitsinermi ilaatinneqarsinnaapput.

§ 28.  Naalakkersuisut KNR-ilu naammassisassat pillugit isumaqatigiissusiussapput, tak. paragraffit 20-miit 26-mut (innuttaasunik kiffartuussinermut isumaqatigiissut) innuttaasunik kiffartuussinermi pisussaaffiit annertussusiinik qanorlu ittuunissaannik erseqqinnerusumik aalajangersaaffiusumik. Naammassisassat pillugit isumaqatigiissut ukiut sisamakkaarlugit nutarterneqartassaaq, taamaattorli tak. § 57.
Imm. 2.  Isumaqatigiissut minnerpaamik makkuninnga imaqassaaq:
1)  KNR-ip innuttaasunik kiffartuussinermi ingerlatsinermini aallakaatitsinissamut periarfissaasa qassiuneri pillugit nassuiaatit.
2)  KNR-ip piffissami isumaqatigiissuteqarfiusumi ingerlatsinissamini aningaasaqarnikkut atugassarisaasut naatsorsuutigineqartut pillugit nassuiaatit.
3)  Nammineerluni aallakaatitassiat ikinnerpaaffissaat nalunaarneqassaaq, tak. § 25, imm. 1 aamma 2.
4)  Kalaallisut aallakaatitassiat allat ikinnerpaaffissaat nalunaarneqassaaq, tak. imm. 3.
5)  Aallakaatitassiortartunit allanit pisiarineqartussat ikinnerpaaffissaat nalunaarneqassaaq, tak. § 20, imm. 4.
6)  Aallakaatitassiat nutaarsiassat maannarpiarlu soqutiginartut ikinnerpaaffissaat nalunaarneqassaaq, matumani aamma aallakaatitassiat nutaarsiassat maannarpiarlu soqutiginartut nammineerluni aallakaatitassiat ikinnerpaaffissaat, tak. § 25.
7)  Eqqumiitsuliorneq kulturilu pillugit aallakaatitassiat ikinnerpaaffissaat nalunaarneqassaaq, tak. § 20, imm. 6.
8)  Aallakaatitassiat meeqqanut inuusuttunullu immikkut sammitinneqartut ikinnerpaaffissaat nalunaarneqassaaq, tak. § 20, imm. 7.
9)  Aallakaatitassiat ilinniartitsinermut tunngasut ikinnerpaaffissaat nalunaarneqassaaq.
10)  Aallakaatitassiat inuiaqatigiinni assigiinngitsunik oqaasilinnut sammitinneqartut aallakaatitanut assigiinngitsunut agguataarsimasut annertussusiat pillugu nassuiaatit, tak. § 20, imm. 9.
11)  Ingerlatsinermi aningaasartuutit tamarmiusut ilaasa akissarsianut atorneqartussat annerpaaffissaat nalunaarneqassaaq.
12)  KNR-ip sulisuinik ilinniartitseqqittarnerup ingerlaqqiffiusumillu ilinniartitsinerup qanoq annertutiginissaannik nassuiaat.
13)  KNR-ip allanik aallakaatitsisarneranik allanillu ingerlataqarneranik imarisaat qanorlu annertutigineri pillugit nassuiaatit, tak. § 29.
Imm. 3.  Kalaallisut aallakaatitassianik allanik oqarnermi pineqarput radiukkut tv-kkullu aallakaatitassiat aaqqissorneqarsimasut, Kalaallit Nunaanni tv-qarfinnit radioqarfinnilluunniit allanit imaluunniit suliffeqarfinnit aallakaatitassiortartunit allanit Kalaallit Nunaanni angerlarsimaffeqartunit aallakaatitassiarineqarsimasut.
Imm. 4.  Nammineerluni aallakaatitassiat, kalaallisut aallakaatitassiat allat, aallakaatitassiortartunit allanit pisiat ikinnerpaaffissaannik aallakaatitassiallu ataasiakkaat suunissaannik aalajangersaanermi aallakaateqqitat, pilerisaarutit aallakaatitassiallu allat aaqqissorneqarsimanngitsut ilaatinneqassanngillat.
Imm. 5.  Naalakkersuisut innuttaasunik kiffartuussinermut isumaqatigiissutip imarisai pillugit erseqqinnerusunik maleruagassiorsinnaapput.
Imm. 6.  Innuttaasunik kiffartuussinermut isumaqatigiissutip eqquutsinneqarnera pillugu ukiumoortumik nassuiaatit KNR-ip suliaralugillu Naalakkersuisunut nassiutissavai. Nassuiaatit nassiunneqarsimaffissaannut killiliussaq isumaqatigiissummi aalajangerneqartassaaq.
Imm. 7.  Innuttaasunik kiffartuussinermut isumaqatigiissut taassumalu eqquutsinneqarnera pillugu nassuiaat tamanut saqqummiunneqartassapput.

§ 29.  KNR allanik aallakaatitassiorsinnaatitaavoq, assersuutigalugu nunanut allanut aallakaatitsinermi aammalu aallakaatitassiornermi aallakaatitsinertiguinnaanngitsoq siammarterneqartussanik. KNR aallakaatitassiornermik allamik, kapitali 3 naapertorlugu akuersissut malillugu, ingerlataqarsinnaanngilaq. Naalakkersuisut aallakaatitassiorneq alla pillugu maleruagassiorsinnaapput.
Imm. 2.  KNR aallakaatitassiornermik ingerlataqarnermut atatillugu imaluunniit ingerlatsiviup teknikkikkut atortuisa atorneqarnissaat, immikkut piginnaasaqarnerup il.il. iluaqutiginissaat siunertaralugit allanik ingerlataqarsinnaavoq. Pisariaqartitsineq naapertorlugu KNR sumiiffinni radioqarfinnik tv-qarfinnillu akiliisitsilluni ilitsersuisassaaq.
Imm. 3.  Naalakkersuisut ingerlataq alla pillugu maleruagassiorsinnaapput, matumani aamma ingerlatamik allamik suliaqarsinnaanermut killiliinerunissaq pillugu. Sumiiffinni radioqarfinnik tv-qarfinnillu KNR-ip ilitsersuinera pillugu akiliisitsinermi piumasaqaatit pillugit Naalakkersuisut aalajangersaasinnaapput, tak. imm. 2-mi oqaaseqatigiit aappaat.
Imm. 4.  Akiliisitsisarluni tv KNR-ip allanik aallakaatitassiornerani aamma ingerlataani allami ilaasinnaanngilaq.
Imm. 5.  Allanik aallakaatitassiorneq aamma ingerlataq alla unammilleqatigiinnermi atugassarititaasut tunngavigalugit ingerlanneqassaaq.

KNR-ip aaqqissuussaanera

§ 30.  KNR pisortat suliffeqarfigaat namminersortoq.
Imm. 2.  KNR-ip suliani aalajangiineri suliffeqarfiup ingerlatsineranut tunngassuteqartut, aqutsinikkut oqartussaasunut allanut ingerlateqqinneqarsinnaanngillat. Sulianili tusagassiornermi ileqqorissaarnissaq aammalu akissuteqartarnissaq pillugit KNR-ip aalajangiineri tusagassiuisarnermi akisussaassuseqarneq pillugu inatsimmi maleruagassat naapertorlugit Tusagassiuisarnerit pillugit Aalajangiisartunut ingerlateqqinneqarsinnaapput.

§ 31.  KNR siulersuisunit tallimanik ilaasortalimmit aqunneqassaaq, taakkunannga siulersuisut siulittaasuat ilaasortarlu ataaseq Naalakkersuisunit toqqarneqartarlutik. Ilaasortat allat pingasut ukunannga innersuussisoqarneratigut Naalakkersuisunit toqqarneqartarput:
1)   Ilisimatusarfik, ilaasortassamik ataatsimik Kalaallit Nunaanni tusagassiornermut tunngatillugu tusagassiornermik annertuumik piginnaasalimmik innersuussisartoq.
2)  Kalaallit Nunaanni eqqumiitsuliortut kulturimillu ingerlatsisut nuna tamakkerlugu kattuffiat ilaasortassamik ataatsimik eqqumiitsuliornermik kulturimillu annertuumik assigiinngiiaartunillu ilisimasaqartumik innersuussisartoq.
3)  Ilaasortaq ataaseq KNR-imi aalajangersimasumik atorfillit inassuteqarnerisigut.
Imm. 2.  Ilaasortat 18-inik ukioqalereersimassapput, aammalu Inatsisartunut, Folketingimut kommunalbestyrelsinulluunniit ilaasortaassanatik taakkununngaluunniit qinigassanngortittuussaanatik. KNR-imi atorfillit siulersuisunut toqqarneqarsinnaanngillat, imm. 1, nr. 3 malillugu inassuteqaataasimanngikkunik.
Imm. 3.  Siulersuisut tamarmiullutik tusagassiorneq, kultureqarneq, pisortatut aqutsineq inuussutissarsiornerlu paasisimasaqarfigissavaat. Ilaasortaq KNR-imi aalajangersimasumik sulisut innersuussinerisigut toqqarneqartoq pinnagu, ilaasortat ataasiakkaat pisortatut aqutsinermik inuussutissarsiornermillu ilisimasaqassapput aammalu uppernarsarneqarsinnaasumik suliamik ingerlatsinermi piginnaasaqassallutik aammalu naleqquttumik ilinniagaqarsimassallutik, siulersuisuni pisortaqatigiinniluunniit taakkununnga assingusuni peqataanikuunermikkut misilittagaqassallutik. Tamassuma saniatigut ilaasortat inassuteqaateqartoqartinnagit toqqarneqartut aappaa aningaasaqarnermik ilisimasaqassaaq aappaalu sulisut pillugit suliassanik ilisimasaqassalluni.
Imm. 4.  Siulersuisunut ilaasortat tamarmik, siulittaasoq kisiat pinnagu, ataasiakkaarlutik sinniisussaannik toqqaasoqassaaq, taannalu siulersuisunut ilaasortanngussaaq siulersuisunut ilaasortaq sinniisussaaffimmini tunuarpat, soraarsitaappat sivisuumilluunniit peqassanngippat. Sinniisussaq toqqarneqarsimasoq siulersuisunut aalajangersimasumik ilaasortanngorpat sinniisussamik nutaamik toqqaasoqassaaq. Siulittaasoq tunuarpat soraarsitaappalluunniit Naalakkersuisut siulittaasumik nutaamik toqqaassapput.
Imm. 5.  Siulersuisut akunnerminni siulittaasup tullianik toqqaassapput.
Imm. 6.  Ilaasortat ukiuni sisamani atasussatut toqqarneqassapput, toqqagaaffimmili siullermi 1. august 2014-imiit 31. december 2018-imut. Ilaasortat toqqarneqaqqissinnaapput, kisiannili ataasiaannarlutik. Naalakkersuisut siulersuisunut ilaasortaq sinniisussarluunniit aalajangersimasumik ilaasortanngorsimasoq piffissap toqqagaaffiup ingerlanerani soraarsissinnaavaat, siulersuisutut akisussaaffini annertuumik sumiginnarpagu, tak. § 32, imm. 1, allatulluunniit siulersuisuni issianissaminut imminut piukkunnarunnaarsissimappat.
Imm. 7.  Siulersuisut akissarsiaqarnissaat aamma siulersuisunut ilaasortat akissaajaatiminnut, matumani ilanngullugit KNR-imik sullissinerminni angalanerminnut, nerisaqarnerminnut ineqarnerminnullu taarsiivigineqarnissaat pillugit Naalakkersuisut maleruagassiorsinnaapput.

§ 32.  Siulersuisut KNR-ip siulersuisorai qullerpaat, KNR-illu ingerlatsinera pillugu aalajangersakkat malinneqarnissaannut akisussaanerpaajullutik. Tassunga atasumik siulersuisut akisussaaffigaat KNR-ip ingerlatsinera tamarmiusoq aamma innuttaasunik kiffartuussinermut isumaqatigiissutip eqquutsinneqarnissaa. Siulersuisut ulluinnarni aallakaatitassiorneq aallakaatitassallu ataasiakkaat sunniuteqarfigisussaanngilaat, tak. § 34, imm. 1.
Imm. 2.  Siulersuisut KNR-ip ingerlatsineranut maleruagassat nalinginnaasut aalajangersassavaat.
Imm. 3.  Siulersuisut pisortamik atorfinitsitsisartuullutillu soraarsitsisartuupput.
Imm. 4.  Naalakkersuisut KNR-imi maleruagassanik aalajangersaassapput.

§ 33.  Naalakkersuisut Atuisut Siunnersuisoqatigiivinik pilersitsissapput KNR-ip aallakaatitassiornermini anguniagai suliassaalu, inatsimmi aalajangersarneqarsimasut, KNR-ip qanoq ililluni pitsaanerpaamik isumaginnissinnaanerinik KNR-ip siulersuisuinut siunnersuisussanik. Atuisut Siunnersuisoqatigiivi ukiut sisamakkaarlugit pilersinneqartassapput, siullermik 1. august 2014-imiit 31. december 2018-imut.
Imm. 2.  Atuisut siunnersuisoqatigiiffianni qulingiluanik ilaasortaqartumi ilaasortat ukuninnga innersuussisoqarneratigut Naalakkersuisunit toqqarneqartassapput:
1)  Meeqqat illersuisuat, ilaasortassamik ataatsimik innersuussisartoq.
2)  Oqaasileriffik, ilaasortassamik ataatsimik innersuussisartoq.
3)  Kalaallit Nunaanni eqqumiitsuliortut kulturimillu ingerlatsisut nuna tamakkerlugu kattuffiat ilaasortassamik ataatsimik innersuussisartoq.
4)  Innarluutillit nuna tamakkerlugu kattuffiat  ilaasortassamik ataatsimik innersuussisartoq.
5)  Kalaallit Nunaanni tusarnaartartut isiginnaartartullu nuna tamakkerlugu kattuffiat ilaasortassamik ataatsimik innersuussisartoq.
6)  Radioqarfiit tv-qarfiillu nuna tamakkerlugu kattuffiat ilaasortassamik ataatsimik innersuussisartoq.
7)  Ilisimatusarfik ilaasortassamik ataatsimik innersuussisartoq.
8)  Nunaqarfiit Nuna Tamakkerlugu Peqatigiiffiat ilaasortassamik ataatsimik innersuussisartoq.
9)  Kalaallit Nunaanni Utoqqaat Peqatigiiffiat ilaasortassamik ataatsimik innersuussisartoq.
Imm. 3.  Inassuteqarsinnaatitaasut imm. 2-mi taaneqartut arlaannit inassuteqartoqarsinnaanngippat Naalakkersuisut ilaasortassamik toqqaasinnaapput, toqqaasinnaatitaasup susassaqarfiata iluani atuisut soqutigisaannik sinniisuusinnaasumik.
Imm. 4.  Atuisut Siunnersuisoqatigiivini ilaasortat Kalaallit Nunaanni najugaqavissuussapput aammalu Inatsisartunut, kommunalbestyrelsimut Folketingimullu ilaasortaassanatik taakkununngaluunniit qinigassanngortittuussanatik, imaluunniit KNR-ip siulersuisuinut ilaasortaassanatik, kiisalu KNR-imi imaluunniit sumiiffinni radioqarfinni tv-qarfinnilu atorfiliussanatik.
Imm. 5.  KNR Atuisut Siunnersuisoqatigiivinut allattuutitaqassaaq.
Imm. 6.  Atuisut Siunnersuisoqatigiivisa suleriaasissaanni maleruagassat Naalakkersuisunit aalajangerneqassapput.
Imm. 7.  Atuisut Siunnersuisoqatigiivinut ilaasortat siunnersuisoqatigiit ataatsimiinnissaannut peqataaniarlutik najukkaminnit aallartariaqartut ullormusiaqartinneqassapput angalanerminnullu akiliunneqarlutik  maleruagassat Inatsisartunut, Naalakkersuisunut il.il. ilaasortat akiliunneqartarnerinik il.il. Inatsisartut Inatsisaanni kapitali 7-imiittut malillugit.

§ 34.  Pisortaq ulluinnarni aallakaatitassanut akisussaasuuvoq aammalu KNR-ip ulluinnarni allaffissornikkut aningaasatigullu aqunneqarneri isumagissallugit. Suliffeqarfiup malittarisassat tamatumunnga tunngasut maleruagassallu siulersuisut aalajangersimasaat malillugit aqunneqarnissaa pisortap qulakkiissavaa.
Imm. 2.  Pisortaq KNR-imi suleqataasunik atorfinitsitsisartuullunilu soraarsitsisartuuvoq.

§ 35.  Atorfinitsitaanerni atugassarititaasut pissutsillu allat, atorfeqarnerup nalaani pissutsit soraarsitsinerillu eqqarsaatigalugit KNR-ip pisussaaffigaa aalajangersakkat Namminersorlutik Oqartussani atorfeqartunut qaqugukkulluunniit atuuttut malissallugit.

KNR-ip aningaasalersugaanera

§ 36.  KNR-ip ingerlatsinera Nunatta karsianit tapiissutit, pilerisaarutit, aallakaatitassiat aningaasalersorneqartut suliatigullu allatigut isertitat aqqutigalugit aningaasalersorneqarpoq. Imm. 2.  Nunatta karsianit ukiumoortumik tapiissutit, ukiumut aningaasanut inatsisiliorfiup tullianut aningaasanut inatsisissap akuersissutigineqarneranut atatillugu Inatsisartunit aalajangersarneqartarput.

§ 37.  KNR-ip siulersuisuisa ukiumut aningaasanut inatsisiliorfiup tullianut aningaasatigut missingersuutit Naalakkersuisunut ukiut tamaasa tunniuttassavaat, Naalakkersuisut piffissaliussaat nallertinnagu. Siunnersuutip imarissavai isertitassatut, ingerlatsinermut aningaasartuutissatut sanaartornermullu aningaasartuutissatut naatsorsuutigisat missingersornerat kiisalu ukiut nikinneranni aningaasaatit akiitsullu. Tamatuma peqatigisaanik ukiumi aningaasanut inatsisiliorfimmi taaneqartumi Nunatta karsiata tapiissutissaasa qanoq amerlatiginissaannik siunnersuut siulersuisut tunniuttassavaat.
Imm. 2.  Siulersuisut missingersuutinut tamarmiusunut siunnersuummut ilanngullugu aallakaatitassiornermik allamik ingerlatsinissamut ingerlatsinermullu allamut immikkut missingersuutit, taassuma iluaniillutik ingerlatat allat tamaasa ataasiakkaarlugit immikkut missingersuusiorneri, tunniussaqartassapput.

§ 38.  KNR-ip ukioq naatsorsuusiorfia tassaavoq ukioq aningaasanut inatsisiliorfik. Namminersorlutik Oqartussani aningaasatigut missingersuusiornermut, naatsorsuutinik nalunaarsuinermut naatsorsuutinillu saqqummiussisarnermut malittarisassat qaqugukkulluunniit atuuttut KNR-ip malissavai.
Imm. 2.  Ukiumoortumik naatsorsuutit piffissalersukkamillu naatsorsuutit allat imarissavaat KNR-ip pisortat sullissinerannik ingerlatsineranut immikkut naatsorsuutit. Allamik aallakaatitassiornerit allamillu ingerlatsinerit naatsorsuutaat tamaasa immikkut ataasiakkaarlugit nalunaarsorneqassapput.
Imm. 3.  Naalakkersuisut innuttaasunik kiffartuussinermi ingerlatsinerup aallakaatitassiornermillu allamik ingerlatsinerup aamma allamik ingerlatsinerup missingersuutitigut naatsorsuutitigullu immikkoortinneqarnissaat pillugu maleruagassanik aalajangersaasinnaapput.
Imm. 4.  Ukiumoortumik naatsorsuutit Namminersorlutik Oqartussat kukkunersiuisuinit kukkunersiorneqartassapput.
Imm. 5.  Piffissaliussaq Naalakkersuisunit aalajangerneqartoq tikitsinnagu, ukiumoortumik naatsorsuutit kukkunersiorneqarsimasut siulersuisunit akuerineqarsimasut kukkunersiuisut oqaaseqaataannik ilaqartillugit, siulersuisunit Naalakkersuisunut akuersissutigisassatut saqqummiunneqartassapput. Naalakkersuisut ukiumoortumik naatsorsuutit tamatuma kingorna Inatsisartunut ilisimatitsissutitut ingerlateqqissavaat.
Imm. 6.  Siulersuisut naatsorsuutinik Naalakkersuisunut saqqummiussinertik ilutigalugu naatsorsuutit tamanut saqqummiutissavaat.

Kapitali 5
Sumiiffinni radioqarfinnut tv-qarfinnullu tapiissutit

§ 39.  Naalakkersuisut tunngaviusumik tapiissutinik tapiiffigineqarnissamik qinnuteqaateqartoqartillugu aningaasanut inatsimmi tassunga aningaasaliissutigineqarsimasut periarfissiinerat malillugu sumiiffinni radioqarfinnut tv-qarfinnullu piumasaqaatinik makkuninnga naammassinnittunut tunngaviusumik tapiissuteqartassapput:
1)  Aallakaatitsivik aallakaatitsisinnaanermut akuersissummik atuuttumik peqassaaq.
2)  Aallakaatitsiviup missingersuutit, naatsorsuutit kukkunersiuisoqarnerlu pillugit Namminersorlutik Oqartussat maleruagassiaat eqquutsissavai.
3)  Aallakaatitsiviup aallakaatitassiornermik ingerlatsinermut uppernarsaatit pillugit Namminersorlutik Oqartussat maleruagassiaat eqquutsissavai, tak. § 43, imm. 1.
4)  Aallakaatitsiviup sumiiffimmi innuttaasut sumiiffimmi nutaarsiassanik ilisimatittassavai.
5)  Aallakaatitsiviup sumiiffimmi innuttaasut oqaaseqarnissamut periarfissaqartissavai.
6)  Aallakaatitsiviup aallakaatitassiornermik ingerlatsinermini ilaatigut aallakaatissavai siammartissallugilluunniit aallakaatitassiat aaqqissorneqarsimasut, aallakaatitsiviup nammineerluni suliai imaluunniit aallakaatitsiviup aallakaatitassiornermik ingerlatsivinnik allanik suleqateqarluni pingaarnertut aallakaatitassiortuulluni suliai (nammineerluni aallakaatitassiat). Aallakaatitseqqiinerit, ussassaarutit aallakaatitassiallu aaqqissorneqarsimanngitsut nammineerluni aallakaatitassiatut isigineqanngillat.
7)  Aallakaatitsiviup aallakaatitassianik meeqqat ukiukinnerit timikkut, tarnikkut ileqqorissaarnikkulluunniit ineriartornerminni annertuumik ajoquserneqaatigisinnaasaannik, matumani pingaartumik aallakaatitassianik atoqatigiinnermut tunngasunik imaluunniit pissuteqanngivilluni nukersornermik imaqartunik aallakaatitsisoqannginnissaa qulakkiissavaa. Ilanngutassiat sakkortuumik nukersornermik imaqartut imaluunniit isiginnaagassat kanngunartut pillugit aallakaatitsivik tusarnaartartunut isiginnaartartunullu mianersoqqusisassaaq.
8)  Aallakaatitsiviup aallakaatitassianik ammip qalipaataanik, arnaanermik/angutaanermik, upperisamik, sumit naggueqarnermik, nunamit suminngaanneernermik, politikkikkut isummanik anguteqammilluunniit/arnaqammilluunniit atoqateqartartuunermik pissuteqartumik qinngarsuilernissamut aqqutissiueqataasinnaasunik aallakaatitsisoqannginnissaa qulakkiissavaa.
Imm. 2.  Piumasaqaatit imm. 1, nr. 4-miit 6-imut taaneqartut qanoq annertutiginissaasa ikinnerpaaffissaat pillugit maleruagassat Naalakkersuisunit aalajangersarneqarsinnaapput.
Imm. 3.  Tapiissutit qaammatit pingasukkuutaartumik siumoortumik tunniunneqartassapput.
Imm. 4.  Tapiissutinik pissarsisup aallakaatitassiornermik ingerlatsinermi allannguutit, imm. 1-imi piumasaqaatinik naammassinnikkunnaarnermik kinguneqartut, Naalakkersuisunut nalunaarutigisussaavai.
Imm. 5.  Tapiissutinik pissarsisup aallakaatitsinermik ingerlataqarnini, piffissaliussaq Naalakkersuisunit aalajangerneqartoq nallertinnagu, ukiumoortumik naatsorsuutitigut kiisalu ukiumoortumik nalunaarutikkut nassuiaatigisassavaa.

§ 40.  Naalakkersuisut aallakaatitassiornissamut tapiissutinik tapiiffigineqarnissamik qinnuteqaateqartoqartillugu aningaasanut inatsimmi tassunga aningaasaliissutigineqarsimasut periarfissiinerat malillugu sumiiffinni radioqarfinnut tv-qarfinnullu, tunngaviusumik tapiissutinik tapiiffigineqarnissamik piumasaqaatinik aamma nammineerluni aallakaatitassiat aalajangersimasut ikinnerpaaffissaannik piumasaqaatinik naammassinnittunut tapiissuteqartassapput, tak. imm. 2.
Imm. 2.  Nammineerluni aallakaatitassiat qanoq ittut aallakaatitassiornermut tapiissutinik tapiiffigineqarsinnaanerat pillugu maleruagassat Naalakkersuisut aalajangersassavaat, aammalu aallakaatitassiornermut tapiissutit, matumani aamma tapiissutit annertussusiinik ataasiakkaanik pisinnaanermut piumasaqaatit pillugit maleruagassat, aalajangersarsinnaallugit.
Imm. 3.  Aallakaatitassiornermut tapiissutit qaammatit pingasukkuutaartumik tunniunneqassapput qinnuteqaateqartup qaammatip pingasukkuutaap taassuma siuliani nammineerluni aallakaatitassiarisimasaasa annertussusii tunngavigalugit. Aallakaateqqitat, pilerisaarutit aallakaatitallu allat aaqqissorneqanngitsut nammineerluni aallakaatitassiat naatsorsorneqarneranni ilaassanngillat.
Imm. 4.  Tapiissutinik pissarsisup nammineerluni aallakaatitassiornermik ingerlataqarnini piffissaliussaq Naalakkersuisunit aalajangerneqartoq nallertinnagu ukiumoortumik naatsorsuutitigut ukiumoortumillu nalunaarutikkut nassuiaatigisassavaa.

§ 41.  Naalakkersuisut aningaasanut inatsimmi tassunga aningaasaliissutigineqarsimasut periarfissiinerat malillugu sumiiffinni radioqarfiit tv-qarfiillu namminneq sulisuisa ilinniarteqqinneqartarnerannik ingerlaqqiffiusumillu ilinniartinneqarnerannik ineriartortitsinermut tapiissuteqartassapput.

§ 42.  Tunngaviusumik tapiissutit tamakkiisumik ilaannakuusumilluunniit utertinneqarnissaat piumasarineqarsinnaavoq, tapiissutinik pissarsisoq:
1)  tunngaviusumik tapiissutinik tapiiffigineqarnissamik qinnuteqaateqarnermini eqqunngitsunik paasissutissiisimappat,
2)  aallakaatitassiornermik ingerlataqarnermi annertuumik allannguutit nalunaarutigisimanngippagit, tak. 39, imm. 4,
3)  aallakaatitassiornermik ingerlataqarnini pillugu nassuiaammik piffissaliussatut aalajangersarneqartup iluani tunniussaqarsimanngippat, tak. 39, imm. 5, imaluunniit
4)  aallakaatitsisinnaanermut akuersissummik tunineqarnissamut piumasaqaatinik naammassinnikkunnaarsimappat, tak. § 13.
Imm. 2.  Aallakaatitassiornermut tapiissutit tamakkiisumik ilaannakuusumilluunniit utertinneqarnissaat piumasarineqarsinnaavoq, tapiissutinik pissarsisoq:
1)  aallakaatitassiornermut tapiissutinik tapiiffigineqarnissamik qinnuteqaateqarnermini eqqunngitsunik paasissutissiisimappat,
2)  nammineerluni aallakaatitassiornini pillugu nassuiaammik piffissaliussatut aalajangersarneqartup iluani tunniussaqarsimanngippat, tak. 40, imm. 4, imaluunniit
3)  aallakaatitsisinnaanermut akuersissummik tunineqarnissamut piumasaqaatinik naammassinnikkunnaarsimappat, tak. § 13.
Imm. 3.  Tunngaviusumik tapiissutit, aallakaatitassiornermut tapiissutit aamma nammineq sulisorisat ilinniarteqqinnerinut ingerlaqqiffiusumillu ilinniartinnerinut tapiissutit tamakkiisumik ilaannakuusumilluunniit utertinneqarnissaat piumasarineqarsinnaavoq, tapiissutinik pissarsisup tapiissutit aningaasaliissutigineqarneranni siunertaannit allaanerusunut atorsimappagit.

§ 43.  Naalakkersuisut tunngaviusumik aamma aallakaatitassiornermut tapiissutit kiisalu sumiiffinni radioqarfiit tv-qarfiillu sulisuisa ilinniarteqqinnerinut ingerlaqqiffiusumillu ilinniartinnerinut tapiissutinut maleruagassiorsinnaapput, matumani ilanngullugit qinnuteqaat, naatsorsuutit utertitsinissarlu kiisalu tapiissutit ilaasa killilikkat allaffissornermut paasissutissiinermullu atornissaannik maleruagassat.
Imm. 2.  Naalakkersuisut imm. 1-imi taaneqartut allaffissornikkut aqunneqarnerat tamakkiisumik ilaannakuusumilluunniit peqatigiiffimmut suliffeqarfimmulluunniit namminersortumut isumagisassanngortissinnaavaat, tassungalu tunngasunik maleruagassaliorlutik.
Imm. 3.  Aningaasat tunngaviusumik aamma aallakaatitassiornermut tapiissutitut atunngitsoorneqartut ilinniartitseqqinnermut ingerlaqqiffiusumillu ilinniartitsinermut tapiissutitut Naalakkersuisunit atorneqarsinnaapput, tak. § 41, imm. 1. Tapiissutinik allaffissornikkut aqutsineq allamut isumagisassanngortinneqarsimappat, tak. imm. 2, taamatut piginnaatinneqartup tunngaviusumik aamma aallakaatitassiornermut tapiissutit atunngitsoorneqartut ilinniartitseqqinnermut ingerlaqqiffiusumillu ilinniartitsinermut tapiissutitut atorsinnaavai.

Kapitali 6
Pilerisaarutit aallakaatitanillu aningaasalersuisarneq

§ 44.  Radiumi tv-milu pilerisaarutit imatut paasineqassapput:
1)  Nioqqutissanut, kiffartuussinernut suliffeqarfiillu iluanaarniarnissamik siunertaqartut kaammattuutit nersorinninnerillu, aallakaatitassiamut akiliuteqartoqarsimagaluarpalluunniit.
2)  Aningaasarsiornikkut soqutigisaqaqatigiit pillugit ilisimatitsissutit isummanillu saqqummiussinerit, assersuutigalugu inuussutissarsiuteqartut kattuffii, sulisitsisut kattuffii sulisartullu peqatigiiffii pillugit aammalu upperisarsiornikkut paasissutissiinerit politikkikkulluunniit isummiussat, peqatigiit taakkua isumaasa siuarsarneqarnissaat kaammattuutigineqarnissaallu siunertaralugit, aallakaatitassiamut akiliuteqartoqarsimagaluarpalluunniit.
Imm. 2.  Pilerisaarutit ilumut taamaattuunerat paasineqarsinnaasunngortinneqassaaq, taamaalilluni imarisaat saqqummiunneqariaasiallu aallakaatitanit nalinginnaasunit allaanerulluni.

§ 45.  Tv-kkut, tekst-tv kisiat pinnagu, pilerisaarutit taamaallaat sivisunerpaamik minutsinik tallimanik sivisussusilinnut katiterlugit aallakaatinneqarsinnaapput. Taama katitikkat aallakaatitanut akunniliullugit inissinneqassapput.

Imm. 2.  Radiukkut pilerisaarutit katitikkat KNR-imi taamaallaat sivisunerpaamik minutsinik tallimanik sivisussusilikkuutaamik aallakaatinneqarsinnaapput, aallakaatitanullu akunniliussatut inissinneqassallutik.
Imm. 3.  Pilerisaarutinik aallakaatitsinerit piffissap ullormut aallakaatitsiviusup 10 procentianit sivisunerussanngillat.

§ 46.  Nakorsaatit, tupat, immiaaqqat, viinnit imigassallu kimittuut pilerisaarutinut ilanngunneqaqqusaanngillat, taamaattorli tak. imm. 3.
Imm. 2.  Taamattaaq upperisarsioqatigiit aamma politikkikkut partiit, kattusseqatigiit kisimiillutillu qinigassanngortittut taakkuluunniit suleqatigiiffii tv-kkut pilerisaarutinut ilanngunneqaqqusaanngillat, taamaattorli tak. imm. 3.
Imm. 3.  Naalakkersuisut imm. 1-imi 2-milu inerteqqutit avaqqunneqarsinnaaneri pillugit maleruagassiorsinnaapput.

§ 47.  Pilerisaarutit aallakaatitassiornermi qanoq ittumik ilanngunneqartarnissaat Naalakkersuisut malittarisassiuussinnaavaat, matumani ilanngullugit pilerisaarutit suunerannik uppernarsaanermut, inissisimanerannut, oqaasiinut imarisaannullu aammalu qanoq annertussuseqarnissaannut maleruagassat. Tamatumunnga atatillugu pilerisaarutit meeqqanut sammitinneqartut inissinneqarnissaannut aamma nioqqutissanik meeqqanut tunngasunik pilerisaarutinut Naalakkersuisut malittarisassiuussiisinnaapput.

§ 48.  Aallakaatitassianut aningaasalersuisarnerup iluaniipput radiukkut tv-kkulluunniit aallakaatitassianut, tassunga ilaallutik tekst-tv-mi imaluunniit internetikkut elektroniskiusumilluuniit periarfissat allat atorlugit takutitanut toqqaannartumik toqqaannanngitsumilluunniit tapiissutit suulluunniit, inuup ingerlatsiviulluunniit aallakaatitsinermik aallakaatitassiornermilluunniit ingerlataqartuunngitsup, atermi, ilisarnaatimi (logo), kinaassutsimi, ingerlatami nioqqutissiamiluunniit ilisimaneqarnerulernissaat siunertaralugu aningaasaliiffigisai.
Imm. 2.  Aallakaatitap aningaasalersugaanera aallakaatitap aallartinnerani, naanerani aallakaatitalluunniit nalinginnaasumik unillatsiarfiini, imaluunniit taaneqartut arlaanni arlalinni, tapiissuteqartup aqqata ilisarnaataataluunniit (logo) nalunaarneqarneratigut ilisarnarsisinneqarsinnaasariaqarpoq. Tamakkuali aallakaatitami namminermi ilanngunneqassanngillat. Taamaattorli tekst-tv-mi takutitani ataasiakkaani, imm. 1 naapertorlugu tapiiffigineqartuni, tapiissuteqartup aqqa ilisarnaataaluunniit (logo) nalunaarneqassapput.
Imm. 3.  Aallakaatitap aningaasalersorneqartup imarisaa qanorlu saqqummiunneqarnera tapiissuteqartumit imatut sunniuteqarfigineqassanngilaq, radioqarfiup tv-qarfiulluunniit aallakaatitanut tunngatillugu aaqqissuinermini nammineersinnaaneranut malunniutissalluni.
Imm. 4.  Aallakaatitassiat inuup ingerlatsiviulluunniit immiaaqqanik, viinninik imigassanillu kimittuunik, tupanit nioqqutissianik, nakorsaatinik nioqqutissanilluunniit pujortarnermut atatillugu atorneqarnerusartunik pingaarnertut ingerlataqartup aningaasalersugai aallakaatinneqaqqusaanngillat, taamaattorli tak. Imm. 8.
Imm. 5.  Aallakaatitassiat upperisarsioqatigiinnit aamma politikkikkut partiinit, kattusseqatigiinnit, kisimiillutik qinigassanngortittunit taakkuluunniit suleqatigiiffiinit aningaasalersorneqartut aallakaatinneqaqqusaanngillat, taamaattorli tak. imm. 7 aamma 8.
Imm. 6.  Aallakaatitassiat nutaarsiassanik maannarpiarlu soqutiginartunik imallit aningaasalersorneqaqqusaanngillat.
Imm. 7.  Radioqarfiit tv-qarfiillu tapiissutinik pissarsineq ajortut imm. 5-imi pineqanngillat.
Imm. 8.  Naalakkersuisut imm. 4-mi 5-imilu inerteqqutit avaqqunneqarsinnaaneri pillugit maleruagassiorsinnaapput.

§ 49.  Aningaasalersuisarnerit aallakaatitassiornermik ingerlatsinermi qanoq ittumik ilanngunneqarsinnaanerannut maleruagassat erseqqinnerusut Naalakkersuisunit aalajangersarneqarsinnaapput.

§ 50.  Naalakkersuisut makkununnga aalajangiisassapput:
1)  Pilerisaarutit taamaattutut paasineqarsinnaanerat, inissiffissaat, oqaatsit atugassat pilerisaarutillu annertussusissaat, tak. §§ 44-45 aamma § 47.
2)  Radiukkut tv-kkullu pilerisaarutit imarisaat, tak. § 46. Maleruagassanik unioqqutitsinerit Naalakkersuisunit uparuarneqarsinnaapput aammalu KNR imaluunniit aallakaatitsinissamut akuersissummik pigisaqartoq peqqusinnaallugu aalajangiineq avammut saqqummiutissagaa. Naalakkersuisut aalajangersinnaavaat tamanna qanoq iliorluni qanorlu isikkoqarluni saqqummiunneqassanersoq.
3)  Pilerisaarutitut aallakaatinneqartuni paasissutissanut piviusunut uparuaaneq. Uparuaasoqarsinnaanera aalajangiiffigineqassaaq paasissutissiinerit kinguneqarsinnaappata isiginnaartartut naalaartartulluunniit aningaasaqarnikkut innarlerneqarnerannik allatulluunniit sunniutilimmik innarlerneqarneqarnerannik, paasissutissiissutillu eqqortuuneri qularnaarneqavissinnaanngippata. Naalakkersuisut aalajangernerminnik KNR imaluunniit aallakaatitsinissamut akuersissummik pigisaqartoq peqqusinnaavaat uparuaassut aallakaateqqullugu, uparuaassutip imaanut, ilusaanut inissiffissaanullu pissuserisassat erseqqinnerusut malillugit.
4)  Aningaasaliisup kinaanerata aallakaatitallu aningaasaliiffigineqartut taamaattuunerisa paasineqarsinnaaneri, tak. §§ 48-49.

§ 51.  Pilerisaarutit ilanngunneqartut aallakaatitassiallu aningaasaliiffigineqartut pillugit naammagittaalliutit ilanngunneqartup aallakaatinneqartulluunniit aallakaatinneqareerneratigut sapaatip akunneri sisamat qaangiutsinnagit Naalakkersuisunit tiguneqareersimassapput.
Imm. 2.  Naalakkersuisut nammineerlutik suliassanngortitsisinnaapput.
Imm. 3.  Naalakkersuisut pilerisaarutit aallakaatitanillu aningaasalersuisarneq pillugit sulianik naammagittaalliuteqartarneq pillugu maleruagassanik aalajangersaasinnaapput, tassunga ilaalluni naammagittaalliutip qanoq iluseqarnissaanik maleruagassat.

Kapitali 8
Misileraanerit, nakkutilliineq pineqaatissiinerillu

§ 52.  Misileraanerit Inatsisartut inatsisaanni aalajangersakkat periarfissiinerat naapertorlugu ingerlanneqarnissaat Naalakkersuisut akuersissutigisinnaavaat.

§ 53.  Dekoderinik imaluunniit dekoderinut atortunik allanik, radiukkut tv-kkulluunniit aallakaatitap ilisarnarunnaarsarneqarsimasup (kodet) imarisaanik pisortanit akuerisaanngitsumik pissarsinissamut atugassanik sananissaq, eqqussuinissaq, tuniniaanissaq, ikkussinissaq, peqarnissaq allanngortitsinissarluunniit inerteqqutaapput. Atortut tamakkua takoqqusaarutiginissaat allatulluunniit pilerisaarutini ilanngunneqarnissaat inerteqqutaavoq.

§ 54.  Naalakkersuisut nakkutigisaraat KNR-ip aamma radioqarfiit tv-qarfiillu allat radiukkut tv-kkullu aallakaatitsinermut maleruagassanik eqquutsitsinersut. Inatsisartut inatsisaannik, Inatsisartut inatsisaat malillugu aalajangersakkanik akuersissuteqarnernilu malitassanik unioqqutitsinerit Naalakkersuisunit uparuarneqarsinnaapput.
Imm. 2.  Naalakkersuisut nakkutilliinerminni atugassaminnik KNR aallakaatitsisinnaanermullu akuersissummik pigisaqartoq piumasaqaateqarfigisinnaavaat ingerlatsiviup ingerlatsineranut paasissutissanik tunniusseqqullugu.

§ 55.  Akiliisinneqarsinnaavoq
1)  § 1-imut akerliusumik tusarnaagassanik isiginnaagassanillu aallakaatitassiortoq,
2)  tusarnaagassianik isiginnaagassianillu § 4, imm. 1-imut imaluunniit § 4, imm. 2 aamma 3 kiisalu § 9, imm. 2-3 malillugit piumasaqaatinut akerliusunik, aallakaatitsissutit digitaliusut aqqutigalugit siammarterisoq,
3)  tusarnaagassianik isiginnaagassianillu paragraffinut 5-imiit 7-imut akerliusumik antenneqarfiit ataatsimoorussat atorlugit siammarterisoq,
4)  aningaasaliiffigineqartunit allaanerusumik tapiissutinik siunertanut allanut atuisoq,
5)  § 50, nr. 1  aamma 2 malillugit aalajangikkanik sumiginnaasoq,
6)  uparuaanissamik aalajangiinermik sumiginnaasoq, tak. § 50, nr. 3, imaluunniit
7)  § 6-imik, § 7, imm. 1-imik 2-millu, § 12, imm. 3-mik, § 15, imm. 1-imik 2-millu, § 16, imm. 1-imik 2-millu §§ 17-18-inik, § 44, imm. 2-mik, § 45-mik, § 46 imm. 1-imik 2-millu, § 48, imm. 2-miit 6-imut, § 53-imik imaluunniit § 17 naapertorlugu peqqussummik unioqqutitsisoq.
Imm. 2.  § 4, imm. 5-imi, § 8-mi, § 12-imi, imm. 4-mi, § 16-imi, imm. 3-mi, § 39, imm. 2-mi, § 40, imm. 2-mi, § 43, imm. 1-imi, § 47-mi aamma § 49-mi inassutinik unioqqutitsinerit akiliisussanngortitsissutaasinnaapput Kalaallit Nunaanni Pinerluttulerinermi Inatsisip maleruagassai malillugit.
Imm. 3.  Aktietigut ingerlatseqatigiiffiit, piginneqatigiilluni ingerlatseqatigiiffiit, peqatigiiffiit assigisaalluunniit pillaammik akiliisussanngortinneqarsinnaapput. Kommuni kommunilluunniit suleqatigiiffiat il.il. pillaammik akiliisussanngortinneqarsinnaapput.
Imm. 4.  Inatsisartut Inatsisaat manna malillugu akiliisitsissutitigut isertitat Landskarsimut nakkassapput.

Kapitali 9
Atuutilersitsissutaasumik, ikaarsaarutaasumik atuukkunnaarsitsissutaasumillu aalajangersakkat

§ 56.  Inatsisartut Inatsisaat 1. august 2014-imiit atuutilissaaq, kisiannili inatsisip kapitalia 5 aatsaat 1. januar 2015-imi atuutilissalluni. Tassunga peqatigitillugu radiukkut tv-kkullu aallakaatitsisarneq pillugu Inatsisartut peqqussutaat nr. 6, 14. november 2004-meersoq atuukkunnaarsinneqassaaq, taamaattorli tak. imm. 2 aamma 3.
Imm. 2.  Maleruagassat radiukkut tv-kkullu aallakaatitsisarneq pillugu Inatsisartut peqqussutaat nr. 6, 14. november 2004-meersoq naapertorlugu aalajangersarneqartut atuutiinnassapput, Inatsisartut inatsisaanni uani Inatsisartulluunnit inatsisaanni allani maleruagassat malillugit taarserneqarnissamik atuukkunnaarsinneqarnissamilluunniit tungaannut.
Imm. 3.  Inatsisip kapitalia 5 aatsaat 1. januar 2015-imiit atuutilissaaq. Kapitali 5-imi imm. 1-ip oqaaseqatigiivisa aappaani Inatsisartut peqqussutaat taaneqartoq pillugu atsaat atorunnaassapput 1. januar 2015-imiit.

§ 57.  Naalakkersuisut KNR-illu anguniagassat pillugit isumaqatigiissutissaat, tak. § 28, siullermeerluni nutarterneqassaaq Inatsisartut Inatsisaata uuma atuutilerneraniit piffissamut 1. januar 2016-imiit 31. december 2018-imut.

§ 58.  Akuersissutit Inatsisartut Peqqussutaat nr. 6, 14. november 2004-meersoq malillugu sumiiffinni radioqarfinnut tv-qarfinnullu tunniunneqarsimasut, taannalu malillugu aalajangersagaasut, atuutiinnassapput akuersissutip atorunnaarfissaatut killiliussap tungaanut.

§ 59.  Inatsisartut Inatsisaat Pituffimmi radiukkut tv-kkullu ingerlatsinernut sakkutooqarfimmik kiffartuussisuusumut atuutinngilaq.

Namminersorlutik Oqartussat, ulloq 8. juni 2014

Aleqa Hammond