Radiukkut tv-kkullu aallakaatitsisarneq pillugu Inatsisartut peqqussutaanni nr. 6, 14. november 2004-meersumi § 9, imm. 3, § 12, imm. 4, aamma § 59, imm. 2 aamma 3 naapertorlugit aalajangersarneqarput:

 

 

Aallakaatitsisinnaanermut akuersissutit

§ 1. Ingerlatseqatigiiffiit, peqatigiiffiit assigisaasaluunniit qinnuteqarnerisigut Naalakkersuisut nuna tamakkerlugu aallakaatitsisinnaanermut akuersissuteqarsinnaapput (nuna tamakkerlugu aallakaatitsisinnaanermut akuersissut), tak. radiukkut tv-kkullu aallakaatitsisarneq pillugu Inatsisartut peqqussutaanni § 9, imm. 1.
Imm. 2. Ingerlatseqatigiiffiit, peqatigiiffiit assigisaasalu kiisalu kommunit qinnuteqarnerisigut Radio- tv-lu pillugit aalajangiisartut nunaqarfigisami aallakaatitsisinnaanermut akuersissuteqarsinnaapput (nunaqarfigisami aallakaatitsisinnaanermut akuersissut), tak. radiukkut tv-kkullu aallakaatitsisarneq pillugu Inatsisartut peqqussutaanni § 10, imm. 1.

 

Nuna tamakkerlugu aallakaatitsisinnaanermut akuersissutit

§ 2. Nuna tamakkerlugu aallakaatitsisinnaanermut akuersissummik qinnuteqaat kultureqarnermut pisortaqarfimmut, qinnuteqaatip paasissutissanik radiukkut tv-kkullu aallakaatitsisarneq pillugu Inatsisartut peqqussutaanni § 12, imm. 1-imi taaneqartunik imaqarneranik naliliisussamut nassiunneqassaaq. Qinnuteqaat aammattaaq aallakaatitassiornermut akisussaasumit atsiorneqarsimassaaq.

§ 3. Kultureqarnermut pisortaqarfiup nuna tamakkerlugu radiukkut tv-kkullu aallakaatitsisinnaanermut akuersissummik qinnuteqaatinik suliaqarnermini misissortassavaa, nuna tamakkerlugu aallakaatitsisinnaanermut akuersissummik tunniussinissamut piumasaqaatit radiukkut tv-kkullu aallakaatitsisarneq pillugu Inatsisartut peqqussutaanni § 14, imm. 1-imi aalajangersarneqarsimasut naammassinneqarsimanersut.

§ 4. Nuna tamakkerlugu aallakaatitsisinnaanermut akuersissut tunniunneqartinnagu kultureqarnermut pisortaqarfiup qinnuteqaat tusarniarneqartartussanut tusarniaassutigalugu nassiutissavaa.
Imm. 2. Kultureqarnermut pisortaqarfik tusarniaanermut imm. 1-imi taaneqartumut ilutigitillugu, radiofrekvensit pillugit inatsisip Kalaallit Nunaanni atuutilersinneqarnera pillugu peqqussut naapertorlugu frekvensimik atuinissamut akuersissummik, qinnuteqartoq sinnerlugu Namminersornerullutik Oqartussat Radioforvaltningianut qinnuteqassaaq.

§ 5. Kultureqarnermut pisortaqarfiup akuersissuteqarnissamini piumasarisinnaavai naatsorsuutit, sanaartornermut ingerlatsinermullu missingersuutit, matumani aamma ingerlatsinerup qanoq aningaasalersorneqarnissaanik, soorlu pilerisaarutitigut, aallakaatitanik aningaasalersuisoqarneratigut, piffissamik aallakaatitsivissamik tunisaqarnikkut atuisulluunniit akiliuteqartarnerisigut, pinnguaatit unammisitsinerillu aningaasarsiorfiusinnaasut pillugit paasissutissat nassiunneqarnissaat, ileqqoreqqusanik, ileqqoreqqusat allannguutaannik, aallakaatitsissutit aallakaatitassiornermilu atortut suunerisa allaaserineqarnerannik, aallakaatitsisarnermut uppernarsaatinik, ullormik aallartiffissamik, sapaatip akunneranut nal.ak. aallakaatitsiffissanik, taakkulu ullunut piffissanullu agguataarneqarnissaannik kissaatigisanik nassiussisoqarnissaa.
Imm. 2. Paasissutissanik imm. 1-imi taaneqartunik nassiussinissamut piffissaliussat kultureqarnermut pisortaqarfiup aalajangersarsinnaavai.
Imm. 3. Pissutsit qinnuteqaammi taaneqarsimasut piffissami akuersissuteqarfiusumi allannguuteqassagaluarpata taakku kultureqarnermut pisortaqarfimmut nalunaarutigineqassapput.

§ 6. Kultureqarnermut pisortaqarfiup nuna tamakkerlugu aallakaatitsisinnaanermut akuersissummik tunniussisoqarnissaanut atatillugu aallakaatitsisarnermut il.il. piumasaqaatit erseqqinnerusut aalajangersarsinnaavai. Piumasaqaatit aallakaatitsisinnaanermut akuersissummi allassimassapput.
Imm. 2. Kultureqarnermut pisortaqarfiup ingerlatseqatigiiffiit, peqatigiiffiit assigisaasalu nuna tamakkerlugu aallakaatitsisarnissaannut akuersissummik tunniussinerminut atatillugu aallakaatitsisarnissap qinnuteqaammut naapertuuttumik ingerlanneqartarnissaa piumasarisinnaavaa.

§ 7. Pilerisaarutit aallakaatitanullu aningaasalersuisoqartarnera, peqqussummi kapitali 7-imi maleruagassat aammalu aalajangersakkat peqqussummi §§-it 53 aamma 55 naapertorlugit aalajangersarneqartut malillugit aallakaatitsisarnermi ilaasinnaapput.
Imm. 2. Pilerisaarutit aallakaatitanullu aningaasalersuisoqartarnera pillugit maleruagassat malinneqarnerat akuersissutip piginnittuata nakkutigissavaa.

§ 8. Pinnguaatit unammisitsinerillu aningaasarsiorfiusinnaasut aallakaatitsisarnermi ilaasinnaapput.

§ 9. Nuna tamakkerlugu aallakaatitsisinnaanermut akuersissummik piginnittup radiukkut tv-kkullu aallakaatitsisarneq pillugu maleruagassanik malinninnera kiisalu aallakaatitsisarnermut piumasaqaatinik malinninnera Radio- tv-lu pillugit aalajangiisartut nakkutigissavaat.

§ 10. Akuersissummik piginnittup maleruagassat radiukkut tv-kkullu aallakaatitsisarneq pillugu peqqussummi aalajangersarneqartut aalajangersakkalluunniit peqqussut naapertorlugu aalajangersarneqartut, matumani aamma nalunaarummi uani maleruagassat unioqqutippagit, unioqqutitsinerlu annertuppat arlaleriarluniluunniit unioqqutitsineruppat nuna tamakkerlugu aallakaatitsisinnaanermut akuersissut kultureqarnermut pisortaqarfiup Radio- tv-lu pillugit aalajangiisartut inassuteqarnerisigut atorunnaarsikkallarsinnaavaa atorunnaarsivissinnaalluguluunniit.
Imm. 2. Atorunnaarsitsineq aammattaaq pisinnaavoq akuersissummik piginnittup piumasaqaatit akuersissuteqarnermi nalunaarutigineqarsimasut sumiginnarpagit.

§ 11. Kultureqarnermut pisortaqarfiup aallakaatitsisinnaanermut akuersissutit piffissami aalajangersimasumi, annerpaamik ukiunik 10-nik sivisussuseqartumi atuussinnaasut tunniuttassavai. Aallakaatitsisinnaanermut akuersissut piffissap qaangiutilernerani qinnuteqartoqarneratigut nutarterneqarsinnaavoq, tak. § 1, imm. 1.

 

Nunaqarfigisami aallakaatitsisinnaanermut akuersissutit

§ 12. Nunaqarfigisami aallakaatitsisinnaanermut akuersissummik qinnuteqaat Radio- tv-lu pillugit aalajangiisartunut, nunaqarfigisami aallakaatitsisinnaanermut akuersissutinik tunniussinissamut piumasaqaatit radiukkut tv-kkullu aallakaatitsisarneq pillugu Inatsisartut peqqussutaanni § 13, imm. 1-imi aalajangersarneqartut naammassineqarsimanerannik naliliisussanut nassiunneqassaaq.
Imm. 2. Nunaqarfigisami aallakaatitsisinnaanermut akuersissummik qinnuteqaatip immersugassaq Radio- tv-lu pillugit aalajangiisartunit tunniunneqartoq atorlugu pinissaa Radio- tv-lu pillugit aalajangiisartut aalajangersinnaavaat. Immersugassaq Radio- tv-lu pillugit aalajangiisartunit suliarineqassaaq.
Imm. 3. Radio- tv-lu pillugit aalajangiisartut nunaqarfigisami aallakaatitsisinnaanermut akuersissummik qinnuteqaatip imm. 1-imi taaneqartup suliarineqarneranut ilutigitillugu, radiofrekvensit pillugit inatsisip Kalaallit Nunaanni atuutilersinneqarnera pillugu peqqussut naapertorlugu frekvensimik atuinissamut akuersissummik, qinnuteqartoq sinnerlugu Namminersornerullutik Oqartussat Radioforvaltningianut qinnuteqassapput.

§ 13. Radio- tv-lu pillugit aalajangiisartut piumasaqaatit radiukkut tv-kkullu aallakaatitsisarneq pillugu Inatsisartut peqqussutaanni aalajangersarneqarsimasut saniatigut piumasarisinnaavaat qinnuteqarnermut atatillugu naatsorsuutinik, sanaartornermut ingerlatsinermullu missingersuutinik, matumani aamma ingerlatsinerup qanoq aningaasalersorneqarnissaanik paasissutissanik nassiussisoqarnissaa, soorlu makkunuunatigut:
1) Pilerisaarutit.
2) Aallakaatitanut aningaasalersuinerit.
3) Piffissamik aallakaatitsivissamik tunisineq.
4) Atuisut akiliuteqartarnerat.
5) Pinnguaatit aningaasarsiorfiusinnaasut.
6) Unammisitsinerit.
Imm. 2. Aammattaaq Radio- tv-lu pillugit aalajangiisartut qinnuteqaatip nassiunneqarneranut atatillugu makkuninnga nassitsisoqarnissaa piumasarisinnaavaat:
1) Ileqqoreqqusat, matumani aamma ileqqoreqqusat allannguutaat.
2) Aallakaatitsisarneq pillugu uppernarsaat.
3) Aallakaatitsinerup allaaserineqarnera, matumani aamma sapaatip akunneranut nal.ak. aallakaatitsiviusut amerlassusii, taakkulu ullunut piffissanullu agguataarneqarneri.
4) Ulloq aallartiffissaq pillugu kissaatigisat.
Imm. 3. Paasissutissanik imm. 1-imi 2-milu taaneqartunik nassiussinissamut piffissaliussat Radio- tv-lu pillugit aalajangiisartut aalajangersarsinnaavaat.

§ 14. Nunaqarfigisami aallakaatitsisinnaanermut akuersissummik § 17, imm. 1 aamma § 18 naapertorlugit qinnuteqaammut tunngatillugu Radio-tv-lu pillugit aalajangiisartut aalajangigaat allaffeqarfikkoortumik oqartussaasunut allanut naammagittaalliuutigineqarsinnaanngillat.

 

Pineqaatissiisarnerit il.il.

§ 15. Kinaluunniit § 1, § 5, imm. 1, §§-it 6-imiit 10-mut, §§-it 13-imiit 14-imut aamma § 18, imm. 1 aamma 2 unioqqutillugit aallakaatitsisoq pillaammik akiliisinneqarsinnaavoq, tak. peqqussummi § 59.
Imm. 2. Aktieselskabit, anpartsselskabit, andelsselskabit, peqatigiiffiit assigisaalluunniit unioqqutitsippata, tak. imm. 1, ingerlatseqatigiiffik il.il. peqqussummi § 59, imm. 3 naapertorlugu akiliisitsissummik taamaattumik akiliisussanngortinneqarsinnaavoq. Kommuni kommunilluunniit suleqatigiiffiat il.il. unioqqutitsippat kommuni kommunilluunniit suleqatigiiffiat il.il. aalajangersagaq aamma taanna naapertorlugu akiliisitsissummik taamaattumik akiliisussanngortinneqarsinnaavoq.

§ 16. § 1 naapertorlugu aallakaatitsisinnaanermut akuersissutit Tusagassiuuteqarnermi akisussaaneq pillugu inatsisip Kalaallit Nunaanni atuutilersinneqarnera pillugu peqqussummi nr. 39, 20. januar 1997-imeersumi maleruagassanut naapertuuttumik atorneqassapput.
Imm. 2. Maleruagassanik imm. 1-imi taaneqartunik unioqqutitsineq Kalaallit Nunaanni Tusagassiuutit pillugit aalajangiisartut, pitsaasumik tusagassiornissaq akissuteqartarnerlu pillugit suliassani naammagittaalliortarfiusup oqartussaaffiinut ilaavoq.

 

Aalajangersakkat atortuulersitsisuusut, ikaarsaarutaasut atorunnaarsitsisuusullu

§ 17. Nalunaarut una ulloq 1. januar 2005-imi atortuulerpoq. Tassunga ilutigitillugu atorunnaarsinneqarpoq Radiukkut fjernsynikkullu aallakaatitsisarneq pillugu Namminersornerullutik Oqartussat nalunaarutaat nr. 34, 26. november 1991-imeersoq, taamaattorli tak. imm. 2.
Imm. 2. Akuersissutit Radiukkut fjernsynikkullu aallakaatitsisarneq pillugu Namminersornerullutik Oqartussat nalunaarutaat nr. 34, 26. november 1991-imeersoq naapertorlugu nunaqarfigisami radioqarfinnut tv-qarfinnullu tunniunneqarsimasut atuutiinnassapput ullup akuersissutip atorunnaarfissaatut aalajangersarneqarsimasup tungaanut, imaluunniit Radiukkut tv-kkullu aallakaatitsisarneq pillugu Inatsisartut peqqussutaat naapertorlugu akuersissummik tunineqarnissap tungaanut, tak. Radiukkut tv-kkullu aallakaatitsisarneq pillugu Inatsisartut peqqussutaanni § 63, imm. 1 aamma § 60, imm. 3.

Namminersornerullutik Oqartussat, ulloq 23. december 2004

Henriette Rasmussen

/

Lise Lennert Olsen