Radiukkut tv-kkullu aallakaatitsisarneq pillugu Inatsisartut peqqussutaanni nr. 6, 14. november 2004-meersumi § 43, imm. 4 aamma § 49 naapertorlugit aalajangersarneqarput:

§ 1. Aalajangiisartut ukiumut pingasoriarlutik-sisamariarlutik ileqquusumik ataatsimiittassapput ullunik ataatsimik-marlunnik sivisussuseqarsinnaasunik.
Imm. 2. Aalajangiisartut siulittaasuat, aalajangiisartut ataatsimiinnissaat kingusinnerpaamik sapaatip akunnerinik marlunnik sioqqullugu ataatsimiinnissamut aggersaasarlunilu ataatsimiinnermi atortussanik nassitsisassaaq.
Imm. 3. Aalajangiisartut siulittaasuat aalajangiisartut sulinerannik aaqqissuussillunilu aalajangiisartut ataatsimiinnerini isumaqatiginninniarnernik siulersuisuussaaq. Siulittaasoq ataatsimiinnernut piffissamik sumilu ataatsimiittoqarnissaanik aalajangiisassaaq, aalajangiisartullu suliaasa naapertuuttumik pilertussusilimmik suliarineqarnissaat nakkutigissallugu.

§ 2. Ilaasortat pingasut tamarmik peqataanerini Radio tv-lu pillugit aalajangiisartut aalajangiisinnaassuseqarput, taamaattorli tak. §§-it 2 aamma 8, imm. 2. Aalajangiinerit nalinginnaasumik amerlanerussuteqarnikkut pisassapput. Taasinerni amerlaqatigiittoqartillugu siulittaasup taasinera aalajangiisuussaaq.
Imm. 2. Suliani kinguartinneqarsinnaanngitsuni aalajangiisoqassatillugu, aalajangiisartuni ilaasortat sinnerinik ataatsimiigiaqqusinissaq periarfissaqanngippat siulittaasoq aalajangiisartut sinnerlugit aalajangiisinnaavoq.

§ 3. Ilaasortap suliassamut suliarineqartussamut attuumassuteqarnini pissutigalugu peqataasinnaannginnera aalajangiisartut aalajangiuppassuk, suliassaq ilaasortat sinnerinit suliarineqassaaq.

§ 4. Aalajangiisartut isumaqatiginninniarneri aalajangiinerilu imaqarniliorneqartassapput. Imaqarniliortoqarnera aalajangiisartut siulittaasuata nakkutigissavaa.
Imm. 2. Ilaasortap aalajangiinermi isumaqataanngitsup isummami imaqarniliami ilanngunneqarnissaa piumasarisinnaavaa. Ilaasortaq aalajangiinermi isumaqataanngippat tamanna aalajangikkami takuneqarsinnaassaaq.
Imm. 3. Allattoqarfiup imaqarniliap assilinera, aalajangiisartut tullianik ataatsimiinnissaannut aggersaanermut ilutigitillugu ilaasortanut nassiutissavaa. Imaqarniliap imarisai ataatsimiinnermi tassani akerlilerneqanngippata tamanna akuerineqartutut isigineqassaaq.

§ 5. Radio tv-lu pillugit aalajangiisartuni ilaasortaq ataaseq aalajangiisartullu allattaat ukiumut ataasiarlutik-marloriarlutik Kalaallit Nunaata Radioanut (KNR-imut) aamma aallakaatitsisinnaanermut akuersissummik piginnittunut nakkutilliiartortassapput.
Imm. 2. Aalajangiisartut pissutsit immikkut ittut atuutsillugit aalajangersinnaapput nakkutilliiartornissaq pillugu siumut nalunaaruteqassallutik.
Imm. 3. Aalajangiisartut nakkutilliiartornerminni aallakaatitsisinnaanermut akuersissummik piginnittut paasissutissanik sunilluunniit, aalajangiisartut suliassaannut pingaaruteqartunik piumasaqarfigisinnaavaat.

§ 6. Aalajangiisartuni ilaasortat, allattoqarfik kiisalu ikiuuttartuusinnaasut suliassat suliarineqartarnerat pillugu inatsisip tamanna pillugu maleruagassartai naapertorlugit nipangiussisussaatitaapput.

§ 7. Radio tv-lu pillugit aalajangiisartut allattoqarnissaat Kultureqarnermut Pisortaqarfiup isumagissavaa.
Imm. 2. Allattoqarfik suliassanik, radiukkut tv-kkullu aallakaatitsisarneq pillugu Inatsisartut peqqussutaanni aalajangersarneqarsimasunik piareersaasarnermigut aalajangiisartullu aalaja-ngiussaannik malitseqartitsisarnermigut aalajangiisartut ataatsimiinnissaannik piareersaaqataasarlunilu ingerlatseqataasassaaq.
Imm. 3. Allattoqarfiup suliassanut imm. 2-mi taaneqartunut tunngatillugu isumagisassavaa oqaluuserisassat, suliassanik aamma allattoqarfiup taakku pillugit allattugaataanik ilallugit nassiunnissaat.

§ 8. Suliassat immikkut suliassartaqanngitsut allakkatigut suliarineqarsinnaanerat siulittaasup aalajangersinnaavaa.

Radio tv-lu pillugit aalajangiisartut suliassaat

§ 9. Sumiiffigisami tv-qarfiit aallakaatitassiornissaannut tapiissutit, radiukkut tv-kkullu aallakaatitsisarneq pillugu Inatsisartut peqqussutaanni taaneqartut Radio tv-lu pillugit aalajangiisartunit aqunneqarlutillu agguaanneqartassapput, tak. sumiiffigisami radioqarfinnut tv-qarfinnullu il.il. tapiissutit pillugit nalunaarut.
Imm. 2. Tapiissutit imm. 1-imi taaneqartut, tapiissutit pillugit maleruagassanut naapertuutinngitsumik atorneqarsimanerat aalajangiisartunit paasineqarpat, aningaasat akuersissutigineqarsimasut tamakkiisumik ilaannakuusumilluunniit utertinneqarnissaat piumasarineqarsinnaavoq.
Imm. 3. Aalajangiisartut imm. 1 naapertorlugu aalajangiineri allaffeqarfitsigut oqartussaasunut allanut naammagittaalliuutigineqarsinnaanngillat.

§ 10. Radio tv-lu pillugit aalajangiisartut sumiiffigisami aallakaatitsisinnaanermut akuersissuteqarnissamik aalajangiisartuupput.
Imm. 2. Radio tv-lu pillugit aalajangiisartut radiumi tv-milu pilerisaarutit aallakaatitassianillu aningaasalersuisarnerit pillugit maleruagassanik unioqqutitsinermik aalajangiisartuupput.
Imm. 3. Radio tv-lu pillugit aalajangiisartut nuna tamakkerlugu aallakaatitsisinnaanermut akuersissutip atorunnaarsikkallarneqarnissaanik atorunnaarsivinneqarnissaanilluunniit Naalakkersuisunut inassuteqartartuupput.

§ 11.Misissuisitsisarnissat radiukkut tv-kkullu aallakaatitsisarneq pillugu Inatsisartut peqqussutaanni taaneqartut akulikissusissaat aalajangiisartunit aalajangerneqartassaaq. Misissuinerit radioqarfinnit tv-qarfinnillu ingerlanneqarsinnaanngillat.

§ 12. KNR-ip innuttaasunik kiffartuussinermut isumaqatigiissutip eqquutsinneqarnera pillugu ukiumoortumik nassuiaataa Radio tv-lu pillugit aalajangiisartut misissuataartassavaat, nassuiaatillu aalajangiisartunit tiguneqarneraniit kingusinnerpaamik sapaatip akunnerisa arfinillit qaangiunneranni Naalakkersuisunut tamanna pillugu oqaaseqaasiortassallutik.

§ 13. Aalajangiisartut ukiut aningaasanut inatsiseqarfiusut naaneri tamaasa, aalajangiisartut ukiumi qaangiuttumi sulisimanerat pillugu nalunaarummik suliaqartassapput. Nalunaarut kultureqarnermut pisortaqarfimmut nassiunneqartassaaq.
Imm. 2. Nalunaarutip ilaatigut imarissavaa aalajangiisartut ukiumi qaangiuttumi suliarisimasaasa allattorsimaffiat. Suliassat suuneri pillugit paasissutissat, suliassat suliarineqarsimasut amerlassusiat kiisalu tunngavissatut aalajangiinerit pillugit imaqarniliat allattorsimaffimmi ilaatinneqassapput.

Suliassat il.il. tunniunneqartarneri suliarineqartarnerilu

§ 14. Qinnuteqaatit, naammagittaalliuutit kiisalu siunnersoqqulluni qinnuteqaatit il.il. uunga nassiunneqartassapput: Radio tv-lu pillugit aalajangiisartut, Postboks 1029, 3900 Nuuk.

§ 15. Qinnuteqaatit naammagittaalliuutillu tunngavissaqarsorinanngitsut Radio tv-lu pillugit aalajangiisartunit itigartitsissutigineqarsinnaapput.

§ 16. KNR-ip akuersissutilluunniit piginnittuata pineqartup aallakaatitat, pilerisaarutit il.il. suliassamut tunngassuteqartut immiunneqarnerinik, piffissap aalajangiisartunit aalajangerneqarsimasup iluani aalajangiisartunut atugassiissuteqarnissaa imaluunniit nassiussinissaa Radio tv-lu pillugit aalajangiisartut pisariaqarsorigunikku piumasarisinnaavaat.
Imm. 2. Radio tv-lu pillugit aalajangiisartut, KNR-ip akuersissutilluunniit piginnittuata pineqartup sinniisui aamma aalajangiisartunut suliakkiuteqartoq erseqqinnerusumik nassuiaanissaat siunertaralugu aalajangiisartunut ataatsimiigiaqqullugit kajumissaarsinnaavaat.

§ 17. Radio tv-lu pillugit aalajangiisartut aalajangiinissaat sioqqullugu KNR, akuersissutip piginnittua pineqartoq imaluunniit aalajangiisartunut suliakkiuteqartoq paasissutissanik pigineqartunik ilisimasaqalernissamut aammalu suliamut tunngatillugu oqaaseqarnissamut periarfissaqartinneqassapput.
Imm. 2. Radio tv-lu pillugit aalajangiisartut piffissaliussamik akissutip nassiunneqarsimaffissaanik, nalinginnaasumik ullunit 14-init sivikinnerusinnaanngitsumik aalajangiissapput.
Imm. 3. Aalajangiinerit tunngavilersuutitaqartassapput.

§ 18. Aalajangiinerit tigusisussamut piaarnerpaamik ilisimatitsissutigineqartarnissaat aamma tunngavissatut aalajangiinerit tamanut saqqummiunneqartarnissaat Radio tv-lu pillugit aalajangiisartut isumagisassavaat.

§ 19. Nalunaarut una ulloq 1. marts 2005-imi atortuulerpoq.
Imm. 2. Naammagittaalliuutit Radio tv-lu pillugit naammagittaalliuuteqartarfimmut ulloq 1. januar 2005 nallertinnagu anngunneqartut Radio tv-lu pillugit naammagittaalliuuteqartarfiup, radiukkut fjernsynikkullu aallakaatitsisarneq pillugu Inatsisartut peqqussutaanni nr. 3, 17. maj 1990-imeersumi maleruagassat aammalu maleruagassat Inatsisartut peqqussutaat taanna naapertorlugu aalajangersarneqartut malillugit inaarlugit naammassissavai, tak. radiukkut tv-kkullu aallakaatitsisarneq pillugu Inatsisartut peqqussutaat.

Namminersornerullutik Oqartussat, ulloq 7. marts 2005

Henriette Rasmussen

/

Lise Lennert Olsen