13. oktober 2006 UKA 2006/29
Akileraaruserinermik ingerlatsineq pillugu Inatsisartut inatsisissaattut siunnersuut
pillugu
Inatsisartut Akileraarusiisarnermut Akitsuusiisarnermullu Ataatsimiititaliaata
ISUMALIUTISIISSUTAA
siunnersuutip aappassaaneerneqarnerani saqqummiunneqartoq
Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Augusta Salling, Atassut (siulittaasoq)
Inatsisartunut ilaasortaq Agnethe Davidsen, Siumut (siulittaasup tullia)
Inatsisartunut ilaasortaq Lars Emil Johansen, Siumut
Inatsisartunut ilaasortaq Agathe Fontain, Inuit Ataqatigiit
Inatsisartunut ilaasortaq Lene Knüppel, Demokraatit (sinniisussaq)
Inatsisartunut ilaasortaq Tommy Marø, Siumut (sinniisussaq)
Inatsisartunut ilaasortaq Jens Lars Fleischer, Siumut (sinniisussaq)
Inatsisartut Akileraartarnermut Akitsuusiisarnermullu Ataatsimiititaliaata UPA 2006-imi siunnersuutip siullermeerneqarnera tunngavigalugu inatsisissatut siunnersuut nassuiaatit ilanngullugit kiisalu tusarniaanermit akissutitut tiguneqartut misissuataarsimavai. Siullermee-rinninnermi apeqqutit saqqummiussat annertunerusumik paasinarsarneqarnissaat siunertaralugu Aningaasaqarnermut Nunanullu Allanut Naalakkersuisoq ulloq 2. oktober 2006 Aki-leraartarnermut Akitsuusiisarnermullu Ataatsimiititaliamut allagaqarpoq. Allagaq isumaliutissiissummut matumunnga Ilanngussaq 1-itut ilanngunneqarpoq.Naalakkersuisunut ilaasortap allagaani takuneqarsinnaavoq akileraartarnerup ingerlatsiviginerata qitiusumit aqunneqalernera 20 mio. kr. missaannik annertussusilinnik Namminersornerullutik Oqartussanit kommunit ukiumut taartisiaqartinneqartassasut ilimagineqartoq. Ernianit akiliutitigullu isertitanit annaasanit 11 mio. kr. missaannit kiisalu akileraarutinut ilassutinit isertitanit annaasanit 9 mio. kr. missaannit aningaasartai katitigaapput.
Akileraarutinit A-nit annaasat, akileraarutinut tapiliussat ilaasalu nunatta karsiata kommunillu akornanni nangittumik agguaanneqarnissaasa isumaqatigiissutigineqarnerannik kommuninut ataatsimoortumik tapiissutit pillugit isumaqatigiinniarnerit inerneqarsimasut Naalakkersuisut ilanngullugu nalunaaruteqarput. Namminersornerullutik Oqartussanut kommuninullu ukiumut annaasat katillugit maannakkut 22 mio. kr.-iupput. Taamaammat inatsisissatut siunnersuutip aappassaaneerneqarnissaanut agguataarinissamik isumaqatigiissutip sunniutaasa ilanngunneqarnerinik ilallugu Naalakkersuisut allannguutissatut siunnersuummik saqqummiussiniarput.
Siunnersuutittaaq siullermeerneqarnerani aalajangiissamaarneq pillugu allakkat Skatterrådilu pillugit apeqqutitut saqqummiunneqartut pillugit itisilerissutaasumik paasissutissanik aammattaaq Naalakkersuisunut ilaasortap allagaa imaqarpoq.
Skatterådip allaffeqarfikkoortumik sullinneqarnera pillugu Aningaasaqarnermut Nunanullu Allanut Naalakkersuisumut ulloq 10. oktober 2006 allagaqarluni Inatsisartut Akileraartar-nermut Akitsuusiisarnermullu Ataatsimiititaliaat tapiliussanik apeqquteqarpoq. Ataatsimiititaliap apeqqutai Naalakkersuisullu akissutaa 11. oktober 2006-imeersoq isumaliutissiissummut matumunnga Ilanngussaq 2-tut 3-tullu ilanngunneqarput.
Inatsisissatut siunnersuutip tusarniaassutigineqarnera.Inatsisissatut siunnersuut pillugu tusarniaanermut allagaq naapertorlugu Akileraartarnermi Pisortaqarfiup tusarniaanera piffissami ulloq 19. juni 2006-imiit ulloq 20. juli 2006-imut ingerlanneqarpoq. Tusarniaanermuttaaq ilanngunneqarput UKA 2006/30 aamma UKA 2006/32 innersuullugit akileraartarneq pillugu inatsisit allat marluk. Tusarniaavigineqartut aamma tusarniaanerup inerneranut tunngasut pillugit inatsisissatut siunnersuummut nalinginnaasumik nassuiaatit innersuussutigineqassapput.
Tusarniaanermi atortussat annertussusiat imartussusiallu, kiisalu piffissap tusarniaaviusup aasakkut sulinngiffeqarnerup ingerlaleruttorneranut piffissalerneqarsimanera eqqarsaatigalugit piffissaq tusarniaanermut akissuteqarfissaq sivikippallaatut aalajangerneqarsimasoq Aki-leraartarnermut Akitsuusiisarnermullu Ataatsimiititaliaq isumaqarpoq. Tusarniaanernut piffissaliinernik naammaginarnerusunik naalakkersuisoqarfik siunissami aalajangersaasariaqartassasoq ataatsimiititaliaq inassuteqarpoq.. Akileraartarnermut Akitsuusiisarnermullu Ataatsimiititaliap isummiussaasa itisilerneqarneri pillugit UKA 2006/30-mi inatsisissatut siunnersuummut ataatsimiititaliap isumaliutissiissutaa innersuussutigineqassaaq.
Akileraartarnermut Akitsuusiisarnermullu Ataatsimiititaliap isumaliutersuutai.Inatsisartunit isummernerit
Akileraarutinik akiliisitsiniartarnerup sunniuteqarnerusumik ingerlalernissaa siunertaralugu akileraartarnerup ingerlatsiviginerata aaqqissuuteqqinneqarnissaa qitiusumillu aqunneqalernissaa Inatsisartut 2. maj 2005-imi aalajangigaa inatsisissatut siunnersuut malitsigaa. Inatsisissatut siunnersuutip siullermeerneqarnerani partiit tamarmik inatsisissatut siunnersuutip a-nguniagai isumaqatigaat.
Siunnersuutip tamanut tunngasunik imarisai
Isertitanit akileraarutit akitsuutillu il.il. namminersornerullutik oqartussani ataatsimoortumik ingerlatsivimmi Nuummi qullersaqarfilimmik allaffilittut aaqqissuussami kiisalu Qaqortumi, Nuummi, Sisimiuni Ilulissanilu nunap immikkoortuini sisamanik allaffilittut ataatsimut aqutsivigineqassasut Naalakkersuisut siunnersuutigaat. Nunap immikkoortukkaartumik aaqqiinikkut innuttat 50%-iinit inuussutissarsiutinillu ingerlatsisut 75%-iinit amerlanerit toqqaannartumik attavigineqartarnissaat, nunallu sinnerani kommunini saaffiginnittarfitsigut, nunaqarfinni allaffitsigut aammalu tele atorlugu nutaaliaasumik attaveqaatitigut kiffartuussineq qulakkeerneqassaaq.
Innuttanullu aqutsinikkut oqilisaanerit aalajangersimasut, soorlu digitaliusumik imminut kiffartuunneq innuttallu ilaannut akileraarutit pillugit nammineerluni nalunaarsuisarnerup atorunnaarsinneqarnera Naalakkersuisut aammattaaq aallartisarniarpaat. Tamatumunnga soqutiginneqaluni Akileraartarnermut Akitsuusiisarnermullu Ataatsimiititaliaq ineriartornermik malittarinninniarpoq, inatsisissatullu siunnersuutip siullermeerneqarnerani aqutsinikkut oqilisaatissatut aalajangersimasumik siunnersuutit sapinngisamik annertunerpaamik ilanngunneqarnissaat ingammik Naalakkersuisunut kaammattuutigissallugit. Inunnut aalajangersimasumik isertitalinnut, soorlu pensionisialinnut, kiisalu akitsuutit aalajangersimasut pisariillisakkamik akilersinniarneqartarnerinut tunngatillugu isertitat pisariillisakkamik nalunaarsorneqartarnissaat ilaavoq.
Siullermik imarisat allannguutaasa ilaanni akileraarutinut akitsuutinullu tunngasuni assigiin-ngitsuni ingerlatsinikkut nakkutilliinikkullu periusissanik assigiiaarnerusunik inatsisissatut siunnersuut pilersitsissammat Akileraartarnermut Akitsuusiisarnermullu Ataatsimiititaliap maluginiarpaa. Ilaatigut erniat ilassutillu angissusiisigut akilersinniarneqarnerisigullu naleqqusaasoqassaaq, tamannalu innuttanut annertunerusumik siumut naatsorsuutiginnitsitsilissaaq.
Aalajangiissamaarneq pillugu allakkat
Inatsisissatut siunnersuutip siullermeerneqarnerani Demokraatit apeqqutigaat Inatsisissatut siunnersuummi § 12, imm. 2-mi aalajangiissamaarneq pillugu allakkat kingunerissaneraat kingullermik akileraarusiineq pillugu akileraartarnermut ingerlatsiviup aalajangiineri pillugit innuttat amigartumik ilisimatinneqartassanersut. Manna tikillugu periuserineqarsimasoq assigalugu ilanngaatigineqartussatut kissaatigineqartup itigartinneqarneratigut isertitanik angissusiliineq allanngortinniarneqarpat akileraaruseriviup innuttaasumut nalunaaruteqartarnissaa anguniarneqarpoq. Taamatut nalunaaruteqarnermut innuttaasoq qisuarianngippat aalajangiissamaarneq pillugu allakkamut naapertuuttumik inaarutaasumik naatsorsuinermi isertitanik angissusiliineq allanngortinneqassaaq.
Naalakkersuisunut ilaasortaq 2. oktober 2006 allakkamigut taamatut aaqqiinissamut tunngaviusoq itisileriffigaa kiisalu aalajangiissamaarneq pillugu allakkamut assersuut ilanngullugu nassiullugu. Aalajangiissamaarneq pillugu allakkat akileraaruasiinermik aalajangiinerup immikkoortuinut aalajangersimasunut tunngatillugu tusarniaanermut allakkatut taamaattussatut, kingusinnerusukkut inaarutaasumik naatsorsuinermi innutaasumut inaarutaasumik nalunaarutigineqartussatut isigineqartariaqarput. Akileraartarnermut ingerlatsiviup angissusiliinertut ingerlataa, innuttaasoq uparuaateqanngippat, ingerlatsivimmit aalajangikkatut pissuseqanngitsoq, aammalu ilaannakuusumik aalajangiinertut iluseqanngitsutut aalajangiinertulluunniit kingusinnerusukkut atortussanngortinneqartussatut Akileraartarnermut Akitsuusiisarnermullu Ataatsimiititaliap tamatuma kingorna tunngavissaatippaa. Naalakkersuisunut ilaasortap oqaatigisaa naapertorlugu kingusinnerusukkut aalajangiinermik, tassalu inaarutaasumik naatsorsuinermik, innuttaasup naammagittaalliutigisinnaagaa inernerup taassuma uppernarsarpaa, aamma aalajangiissamaarneq pillugu llakkami pissutsit pineqartut ilanngullugit eqqarsaatigalugit. Aalajangiissamaarneq pillugu allakkamut innuttaasoq qisuariaateqanngippat inatsisitigut persaqusersorneqassanngitsoq ataatsimiititaliap paasivaa.
§ 12, imm. 2 naapertorlugu aalajangiissamaarneq pillugu allagaqartarnermik maannamut periuserineqartoq pillugu tunngavissarititat taaneqartut atorlugit Akileraartarnermut Akitsuusiisarnermullu ataatsimiititaliaq upaaruaatissaqanngilaq. Aalajangiissamaarnerli pillugu allakkami inaarutaasumik naatsorsuineq pillugu kingusinnerusukkut naammagittaalliummik tunniussisinnaaneranut sunniuteqartussaanngitsoq akileraartarnermut ingerlatsiviup innuttaasumut paasinarsartariaqaraa ataatsimiititaliap kissaatigaa. Taamatut erseqqissaanikkut innuttaasut uparuaasinnaanermut piffissaliussaq pituttuisuusumik naammagittaalliornissamut piffissaliinerusutut kukkusumik paasineqarnissaa pinngitsoortinneqassaaq, tak. maannakkut oqaasertaliinertut atorneqartartoq: "Ulloq killissarititaasoq nallertinnagu akerliliissuteqarsimanngikkuit, naatsorsuutigissavat angissusiliineq saqqummiunneqartoq suliarineqareersutut."
Skatterådip sulinera allaffeqarfiullu kiffartuussinera
Akileraaruseriviup sulinera naammagittaalliummik suliaqarneq iluarsineqartarpoq aallunneqartarlunilu. Inatsisissatut siunnersuutip siullermeerneqarnerani Skatterådip allaffeqarfikkootumik kiffartuussinera immikkut soqutigineqarpoq. Inatsisissatut siunnersuutip § 5, imm. 7-iani tamanna ima aalajangersagartaqarpoq: Skatterådip allattoqarfeqarnissaa Naalakkersuisut isumagissavaat. Allattoqarfik sulinermini Naalakkersuisunut attuumassuteqanngilaq. Allaffeqarfiulli sulisui inuttut aaqqissuussaanikkulluunniit Naalakkersuisunut attuumassuteqartuunnginnerannik tigussaasumik iliuuseqarnikkut qulakkeerinninnissaq inatsimmut ilaatinneqan-ngilaq.
Siullermik Skatterådimut immikkut allaffeqarfimmik pilersitsinermi aningaasaqarnikkut pitsaanngequtissat Aningaasaqarnermut Nunanullu Allanut Naalakkersuisup 2. oktober aamma 11. oktober 2006-imi allakkatigut akissummini pingaartillugit oqaatigaa. Skatterådip namminerisaminik allaffeqarfeqarneranut aningaasartuuteqarnerussutit ukiumut 1,5 mio. kr.-iussasut kiisalu allaffeqarfiup pilersinneqarnerani ataasiartamik aningaasartuutit 0,5 mio. kr.-iussasut Naalakkersuisunit missingerneqarput. Aappaatut namminersornerullutik Oqartussat oqartussaaffiisa marluk akornanni akileraartarnermi sulisorisanik suliamut paasisimasaqarluartunik amerlagisassaanngitsunik pissarsiniunnikkut unammilleqatigiinnissaat pitsaanngequteqassasoq Naalakkersuisunut ilaasortap uparuarpaa. Allaffeqarfiuttaaq suliat pitsaassusissaasigut qaffasissumik pitsaassuseqarnissap, sulisullu suliassanik naammattumik amerlassusilinnik suliassaqarnissaasa akornanni equngasoqarsinnaaneranik Naalakkersuisut aarleqquteqarput.
Tunngavilersuutit taakku Akileraartarnermut Akitsuusiisarnermullu Ataatsimiititaliap tusaatissatut tiguai. Allaffeqarfiulli attuumassuteqannginnera tunngaviusumik isigalugu taamaallaat soqutiginaateqarnerarlugu Naalakkersuisut isumaqarnerat ataatsimiititaliap isumaqatigisinnaanngilaa. Skatterådip kiffartuussinerani atorfilinnik, naammagittaalliutitut suliassami illua tungiliuttumit, tassalu namminersornerullutik oqartussat akileraartarnermut ingerlatsiviani, atorfeqartinneqartumik akissarsiaqartinneqartumillu isumalluuteqartariaqarmat tamanna piviusumik tigussaasumillu ajornartorsiutaasoq Akileraartarnermut Akitsuusiisarnermullu Ataatsimiititaliaq isumaqarpoq. Taamatut aaqqiineq Skatterådip innuttanit isigineqarneranut tutsuiginassusianullu qularutissaanngitsumik naleqqutinngilaq.
Naammagittaalliummut aalajangiisutut inunnit taakkunannga naammagittaalliortarfiup aalajangigassai piareersarneqartassammata suliami peqataasinnaanermut ingerlatsinermut inatsimmi maleruagassat akornusiisuussammata ataatsimiititaliap maluginiarpaa. Tamatumali allaffeqarfimmi sulisorisani suliffimmut tunniusimalluarnikkut annertuumik aporfissaqartoqalernissaa pinaveersimatinnavianngilaa. Inatsisissatut siunnersuummi aaqqiinertut toqqakkakkut allaffeqarfimmi sulisut ulluinnarni qullersariminnit pappiaqqakkut ilitsersorneqarnissakkullu attuumassuteqannginissaat qulakkeerneqassaaq. Tamatumali pisortamik suleqatimillu isumaannik ilisimasaminnik pisussaasutut pissusissamisoortumik innimisunnissaannik misigisimajunnaarsinnavianngilai. Taamaammat assersuutigalugu Isumaginninnermi Naammagittaalliuteqartarfimmut, Atuisartut Siunnersuisoqatigiivinut aamma Kalaallit Nunaanni Unammilleqatigiinnermut Ataatsimiititaliamut iluatsissimanertulli allaffeqarfiup sulisoqarnikkut aaqqissuussaanikkullu attuumassuteqartuunnginneranik inatsisitigut isumannaatsuutitsisoqarsinnaasoq ulluinnarnilu tunngavilersuisoqarsinnaasoq oqaatigineqarsinnaavoq.
Skatterådi namminerisaminik allaffeqarfimmit sullinneqassappat akileraartartutut innuttat inatsisitigut illersugaanerat ilumut ajorseriartinneqassasoq tassunga tunngatillugu Aningaasaqarnermut Nunanullu Allanut Naalakkersuisoq ulloq 11. oktober 2006 allagaqarluni oqaaseqarpoq. Taamatut oqaaseqarneq ataatsimiititaliap eqqumiigisorujussuuaa naatsorsuutigiumanagulu toqqartariaqarlugu. Suliamut naammagittaalliutaasumut akuusunut allaffeqarfimmit attuumassuteqanngitsumit piginnaalluartumit siulersorneqarneq inatsisitigut illersugaanermut pitsaaqutaassasoq qularutissaassagunanngilaq.
Skatterådip allaffeqarfianik attuumassuteqanngitsumik pilersitsinissamut isumaqataanermut akerliunermullu tunngavilersuutit oqallisigereerlugit Akileraartarnermut Akitsuusiisarnermullu Ataatsimiititaliaq isummernermini assigiinngitsunik isumaqarpoq:
Skatterådip aamma siunissami allaffeqarfeqarnikkut sullinneqarnera akileraartarnermut ingerlatsivimmit isumagineqarnissaanik Akileraartarnermut Akitsuusiisarnermullu Ataatsimiititaliami amerlanerussutillit, tassaasut Siumumit, Inuit Ataqatigiinnit Atassummillu sinniisorisat Naalakkersuisut siunnersuutaannut isumaqataasinnaapput. Qitiusumik aqutsinerup sapinngisamik annertunerpaamik killilersimaarneqarnissaa, akileraartarnermullu ingerlatsiviup qitiusumut inissinneqarneratigut aqutsinerup annikillisarneqarnissaa siunertarerpiarlugulu paasisimasaqarluartut sapinngisamik annertunerpaamik ataatsimoortinneqarnissaat amerlanerussutillit tassunga atatillugu pingaartippaat. Skatterådimit aalajangiineq innuttaasumit tutsuiginartutut isigineqanngippat pineqartoq Inatsisartut Ombudsmandiannut eqqartuussivinnulluunniit eqqartuussivikkoortumik aalajangiinerup misilinneqarnissaa pillugu pisariaqarpat saaffiginnissinnaavoq.
Akileraartarnermut Akitsuusiisarnermullu Ataatsimiititaliami ikinnerussutilik, Demokraatit sinniisorisaat isumaqarpoq inatsisitigut illersugaanissaq pissutigalugu Skatterådip allaffeqarfiata attuumassuteqartuunnginnissaa erseqqissumik pisariaqartoq. Taamaalilluni Skatterådi inatsisinik atuinermi, taamatullu naliliinermik ingerlatsinermini akileraartarnermut ingerlatsiviup soqutigisaanut attuumassuteqartuunngitsoq innuttanit tutsuigineqarsinnaavoq. Taamaammat ikinnerussutillip inatsisissatut siunnersuummut allannguutissatut siunnersuut ilan-ngunneqartoq saqqummiuppaa.
Skatterådip ilaasortaqarneranut tunngasoq
20. juli 2006 tusarniaanermut akissummini Kanukokap oqaatigaa Skatterådimut ilaasortanut tamanut, siulittaasoq kisiat pinnagu, pissusissamisoortumik piumasaqaataasariaqartoq akileraarutinut maleruagassanik paasisimasaqarnissaq. Siunnersuutip siullermeerneqarnerani Demokraatit isuma taamaattoq isumaqatigaat. Isuma taanna inatsisissatut siunnersuummut nalinginnaasumik nassuiaatini naalakkersuisunulluunniit ilaasortap siunnersuutip siullermeerneqarnerata kingorna oqaatigalugit allallugillu oqaatigisaasigut oqaaseqarfigineqanngilaq.
Tunngaviusumik isigalugu akileraarutinut ataatsimiititaliami ilaasortat akileraartarnermi maleruagassanik paasisimasaqartariaqarnerannik isummamut Akileraartarnermut Ataatsimiititaliami ilaasortat isumaqataapput. Ataatsimiititaliami ilaasortanut naammagittaalliutitut suliassani pituttuisuusumik aalajangiisartunut, inatsiseqarnikkut pisariusinnaasunut innuttaasumullu annertuumik kinguneqaateqarsinnaasunut tamanna naatsorsuutigissallugu pissusissamisuussaaq.
Piumasaqaat taama ittoq inatsimmut ilaatinneqartariaqarnersoq tamatuma kingorna apeqqutaalerpoq. Taamaassimassappat ilaasortat paasisimasaqarnerat kiisalu ilaasortanik paasisimasaqarnikkut amigaatilinnik toqqaasoqarsinnaanera kia alaatsinaattussaaneraa inatsimmi isummerfigineqartariaqassaaq. Allat tamaasa allanngortinnagit Naalakkersuisut ilaasortanik aalajangersimasumik qaffasissusilimmik piginnaasalinnik eqquutitsisinnaasutut nalilerneqartunik Naalakkersuisut toqqaanissamut taamaallaat pisussaasaqariaqarput. Taamatulli periuseqartoqassappat inuit kikkut ataatsimoortumik naliliivigereerlugit suliassamut piukkunnarnerpaanersut pillugit kattufiit maannakkut nammineerlutik naliliisinnaanerata annertuumik annikillisinneqarnera kingunerissagaa Akileraartarnermut Akitsuusiisarnermullu Ataatsimiititaliaq isumaqarpoq.
Tamanna tunngavigalugu maannakkut inatsisissatut siunnersuutip aaqqiissutissarititaa, tassaasoq; siulittaasup akileraartarnermi maleruagassanik paasisimasaqarnera kiisalu allatigut isigineqarnera Naalakkersuisut kisiisa akisussaaffigissagaat, § 3, imm. 2. Naalakkersuisut § 3, imm. 3, oqaaseqatigiit aappaat (kattuffiup inassuteqarsimannginnera pissutigalugu) inassuteqaatitaqanngitsumik ilaasortamik allamik toqqaappata pineqartup akileraartarnermi inatsisinik paasisimasaqarnera isigineqarneralu Naalakkersuisut aamma ilanngullugu eqqarsaatigissagaat ataatsimiititaliap naatsorsuutigaa. Taamaattoqarpat ataatsimiititaliap siulittaasuanut piginnaasanut piumasaqaatigineqartut qaffasitsiginissaat piumasarissallugu pisariaqassanngilaq. Pisuni allani pineqartup piukkunassusianik kattuffiit inassuteqartussatut naliliisinnaanerat pingaartinneqassasoq ataatsimiititaliaq isumaqarpoq.
Taamatullu Skatterådimut ilaasortat tamarmik, ilaatigut akileraartarnermut akitsuusiisarnermullu tunngasuni inatsisinut naleqquttunut pikkorissaanerit atorlugit, suliassaannik suliassaqarfiinillu nassuiaannissaannut pisariaqartutut sulisunik atugassiinissaq naalakkersuisoqarfiup isumagissagaa Akileraartarnermut Akitsuusiisarnermullu Ataatsimiititaliap naatsorsuutigaa.
Skatterådip kalaallisut taaguuserneqarnissanut tunngasoq
Siunnersuutip siullermeerneqarnerani periarfissaq manna iluatsillugu, manna tikillugu "Skatterådi"-mik taaguummut taarsiullugu Skatterådip kalaallisut taaguuserneqarnissaanik Atassutip siunnersuutaa Akileraartarnermut Akitsuusiisarnermullu ataatsimiititaliap iluaraa. Apeqqummut isummaminnik tassungalu ilanngullugu taaguutitut siunnersuutigineqartoq Akileraartarnermut Siunnersuisoqarfik pillugu Naalakkersuisut saqqummiissasut ataatsimiititaliap kaammattorpai.
Akileraarusiisarnermut Akitsuusiisarnermullu Ataatsimiititaliap ataatsimoortumik naliliinera.Siunnersuutip siullermeerneqarnerani Inatsisartut isumaqatigiittut assigalugit Akileraartarnermut Akitsuusiisarnermullu Ataatsimiititaliap nuannaarutigaa akileraartarnermut akitsuusiisarnermullu inatsisit ingerlatsivigineqarnerat pillugu aalajangersakkat pingaarnerit katersorneqarlutillu assigiissaarneqarmata. Inatsit akileraartarnikkut qitiusumik sunniuteqarnerusumillu aqutsinissamut taamaalilluni ammaassivoq. Qitiusumit aqutsineq allaffissornerup annikinnerulernerinnaanik akileraarutinillu akiliisitsiniartarnerup sunniuteqarnerulerneranik taamaallaat inerneqassanngitsoq, nunatsinnili akileraartartutut innuttat assigiiaarnerusumik inussiarnernerusumillu pissuseqarfigineqalernissaannut annertunerpaamik aamma tunngavissiissasoq Akileraartarnermut Akitsuusiisarnermullu Ataatsimiititaliap naatsorsuutigaa.
Inatsisitigulli isumannaatsuutitsinissaq pissutigalugu Skatterådip allaffeqarfikkut attuumassuteqanngitsumit sullinneqarnissaa pisariaqartoq ataatsimiititaliami ikinnerussuteqartoq isumaqarpoq.
Aappassaaneerinninnissamut allannguutitut siunnersuuteqalersaarnermik Naalakkersuisut nalunaaruteqarnerat pillugu ataatsimiititaliap oqaatigissavaa isumaliutissiissutip matuma akuersissutigineqarnissaatut piffissaliussap iluani tamanna suli saqqummiunneqarsimanngimmat.
Akileraartarnermut Akitsuusiisarnermullu Ataatsimiititaliap inassuteqaataa.Annaasassat ilaasa agguaanneqarnissaat pillugu Naalakkersuisut Kanukokamut aningaasaqarnikkut isumaqatigiissutaasa pilersitaanik inatsisissatut siunnersuutip allannguutai ilanngullugit saqqummiunneqartoq aappassaaneerinermi siuliani oqaaseqaatigineqartut ilanngullugit akuerissutigineqassasoq Akileraartarnermut Akitsuusiisarnermullu Ataatsimiititaliami amerlanerussutillit tassaasut Siumumit, Inuit Ataqatigiinnit Atassummillu sinniisorisat inassutigaat.
Inatsisissatut siunnersuut annaasassat ilaasa agguaanneqarnissaat pillugu Naalakkersuisut Kanukokamut aningaasaqarnikkut isumaqatigiissutaasa malitsigisaanik allannguutissatut siunnersuut kiisalu allannguutit ilanngunneqartut malitsigisaanik inatsisissatut siunnersuutip allannguutai ilanngullugit saqqummiunneqartoq Akileraartarnermut Akitsuusiisarnermullu Ataatsimiititaliami ikinnerussutillip Demokraatineersup Inatsisartunit akuersissutigineqassa-soq inassutigaa.
Taama oqaaseqarluni Inatsisartut Akileraartarnermut Akitsuusiisarnermullu Ataatsimiititaliaata siunnersuut Inatsisartunut aappassaaniigassanngortippaa.
Augusta Salling
Formand
Lars Emil Johansen
Agathe Fontain
Agnethe Davidsen
Lene Knüppel