NAMMINERSORNERULLUTIK OQARTUSSAT GRØNLANDS HJEMMESTYRE
Kalaallit Nunnaanni Inatsisartut Inatsisartut Akileraartarnermut Akitsuusiisarnermullu Ataatsimiititaliaat
Grønlands Landsting
Landstingets Skatte- og Afgiftsudvalg
Aningaasaqarnermut Nunanullu Allanut
Naalakkersuisoq Josef Motzfeldt
Att.: Akileraartarnermut Pisortaqarfik
Akileraarusiinermik ingerlatsineq pillugu Inatsisartut inatsisissaattut siunnersuut (UKA 2006/29) pillugu 10. oktober 2006
sags. nr. 01.40.01Inatsisissatut siunnersuutip siullermeerneqarnerani Skatterådip allaffeqarfikkootumik kiffartuussinera immikkut soqutigineqarpoq. Inatsisissatut siunnersuutip § 5, imm. 7-iani tamanna ima aalajangersagartaqarpoq: Skatterådip allattoqarfeqarnissaa Naalakkersuisut isumagissavaat. Allattoqarfik sulinermini Naalakkersuisunut attuumassuteqanngilaq. Allaffeqarfiulli sulisui inuttut aaqqissuussaanikkulluunniit Naalakkersuisunut attuumassuteqartuunnginnerannik tigussaasumik iliuuseqarnikkut qulakkeerinninnissaq inatsimmut ilaatinneqanngilaq.
Siullermik Skatterådimut immikkut allaffeqarfimmik pilersitsinermi aningaasaqarnikkut pitsaanngequtissat Aningaasaqarnermut Nunanullu Allanut Naalakkersuisup 2. oktober 2006-imi allakkatigut akissummini pingaartillugit oqaatigai. Aappaatut Namminersornerullutik Oqartussat oqartussaaffiisa marluk akornanni akileraartarnermi sulisorisanik suliamut paasisimasaqarluartunik amerlagisassaanngitsunik pissarsiniunnikkut unammilleqatigiinnissaat pitsaanngequteqassasoq Naalakkersuisunut ilaasortap uparuarpaa. Allaffeqarfiuttaaq suliat pitsaassusissaasigut qaffasissumik pitsaassuseqarnissap, sulisullu suliassanik naammattumik amerlassusilinnik suliassaqarnissaasa akornanni equngasoqarsinnaaneranik Naalakkersuisut aarleqquteqarput.
Tunngavilersuutit taakku Akileraartarnermut Akitsuusiisarnermullu Ataatsimiititaliap tusaatissatut tiguai. Allaffeqarfiulli attuumassuteqannginnera tunngaviusumik isigalugu taamaallaat soqutiginaateqarnerarlugu Naalakkersuisut isumaqarnerat ataatsimiititaliap isumaqatigisinnaanngilaa. Skatterådip kiffartuussinerani atorfilinnik, naammagittaalliutitut suliassami illua tungiliuttumit, tassalu namminersornerullutik oqartussat akileraartarnermut ingerlatsiviani, atorfeqartinneqartumik akissarsiaqartinneqartumillu isumalluuteqartariaqarmat tamanna piviusumik tigussaasumillu ajornartorsiutaasoq Akileraartarnermut Akitsuusiisarnermullu Ataatsimiititaliaq isumaqarpoq. Taamatut aaqqiineq Skatterådip innuttanit isigineqarneranut tutsuiginassusianullu qularutissaanngitsumik naleqqutinngilaq.
Naammagittaalliummut aalajangiisutut inunnit taakkunannga naammagittaalliortarfiup aalajangigassai piareersarneqartassammata suliami peqataasinnaanermut ingerlatsinermut inatsimmi maleruagassat akornusiisuussammata ataatsimiititaliap maluginiarpaa. Tamatumali allaffeqarfimmi sulisorisani suliffimmut tunniusimalluarnikkut annertuumik aporfissaqartoqalernissaa pinaveersimatinnavianngilaa. Inatsisissatut siunnersuummi aaqqiinertut toqqakkakkut allaffeqarfimmi sulisut ulluinnarni qullersariminnit pappiaqqakkut ilitsersorneqarnissakkullu attuumassuteqannginissaat qulakkeerneqassaaq. Tamatumali pisortamik suleqatimillu isumaannik ilisimasaminnik pisussaasutut pissusissamisoortumik innimisunnissaannik misigisimajunnaarsinnavianngilai. Taamaammat assersuutigalugu Isumaginninnermi Naammagittaalliuteqartarfimmut, Atuisartut Siunnersuisoqatigiivinut aamma Kalaallit Nunaanni Unammilleqatigiinnermut Ataatsimiititaliamut iluatsissimanertulli allaffeqarfiup sulisoqarnikkut aaqqissuussaanikkullu attuumassuteqartuunnginneranik inatsisitigut isumannaatsuutitsisoqarsinnaasoq ulluinnarnilu tunngavilersuisoqarsinnaasoq oqaatigineqarsinnaavoq.
Naammagittaalliortarfimmut piumasaqaatit, taanna tassunga tunngasumik aqutsinikkut kisiartaalluni naammagittaalliorfissaatillugu, tutsuiginassutsimut piumasaqaatit sakkortusissammata,
Innuttat sulliviillu kalluarneqartut aningaasaqarniarnikkut inissisimanerannut sunniuteqarnerpaasinnaasumik Skatterådimit aalajangerneqartassammata, Skatterådip akisussaaffii akitsuutinut tunngasut ilanngullugit siunissami annertusineqassammata, kiisalu Kommunini aalajangiinernut rådi isummertarunnaarluni qitiusumilli aqutsivimmi ataatsimit, manna tikillugu rådimut allaffeqarfeqarnikkut ikiorteqartitsisuusimasumit, aalajangiinernut isummertussaatillugu Skatterådip allaffeqarfeqarnikkut arlaannut attuumassuteqanngitsumit sullinneqarnissaa annertuumik qaffariarttussaammat Akileraartarnermut Akitsuusiisarnermullu Ataatsimiititaliap nangaassuteqarnera aammattaaq tunngaveqartutut isigineqartariaqarpoq. Skatterådip allaffeqarfeqarnikkut sullinneqarneranut apeqqummut Naalakkersuisut isummernertik isumaliutigeqqissagaat Akileraartarnermut Akitsuusiisarnermullu
Ataatsimiititaliap nassuiaatigineqartut tunngavigalugit kaammattuutigissavaa, qitiusumillu ingerlatsivik sulisoqarnikkut aaqqissuussaanikkullu allaffeqarfik arlaannaannulluunnit tamakkiisumik attaveqanngitsoq qulakkeerlugu, allannguutissatut siunnersuuteqarsinnaassasut.
Manna tikillugu siunnersuutigineqartutut Skatterådip allaffeqafeqarnikkut sullinneqarnissaanik Naalakkersuisut kissaatertik aalajangiusimassappassuk Namminersornerullutik Oqartussani allatut ittumik naammagittaalliortarfeqarluni ataatsimoortumik allaffeqarfittut ilusilerneqarsimasinnaasumik allaffeqarfimmik arlaannaannulluunniit attuumassuteqanngitsumik pilersitsinissap pinngitsoorneratigut aningaasartuutit angissusiisa katitigaanerisalu uppernarsarnissaannik Naalakkersuisut kaammattorneqassapput.
Akileraartarnermut Akitsuusiisarnermullu Ataatsimiititaliap siunnersuummik suliarinneqqinnissaa pissutigalugu saaffiginnissummut uunga Naalakkersuisunut ilaasortap akissutaa kingusinnerpaamik arfininngorneq ulloq 14. oktober 2006 ataatsimiititaliamut apuussimassasoq qinnutigineqassaaq.
Inussiarnersumik inuulluaqqusillunga
Augusta Salling
Ataatsimiititaliap siulittaasua