Eqquiniaasitsinermi akileraarutit pillugit Inatsisartut inatsisaata allanngortinneqarneranik Inatsisartut inatsisaat nr. 4, 27. marts 2006-imeersoq
(Akileraarutinik akiliinissamut akisussaasuunermik erseqqissaaneq kiisalu siulersuisuni ilaasortat akiliussisussamaataasarnissaannik atuutilersitsinissaq)
§ 1
Eqquiniaasitsinermi akileraarutit pillugit Inatsisartut inatsisaanni nr. 7, 31. oktober 1987-imeersumi, Inatsisartut inatsisaanni nr. 3, 12. juni 1995-imi kingullermik allanngortinneqartumi makku allannguutigitinneqarput:
1. § 3-mi imm. 2-p kingornani immikkoortutut nutaatut ilanngunneqassaaq:
"Imm. 3. Eqquiniaasitsisoq akileraarutit akilerneqarnissaannut akisussaasuuvoq".Imm. 3 aamma 4 matuma kingorna tassaalerput imm. 4 aamma 5.
2. § 3, imm. 3 imm. 4-nngortoq ima oqaasertaqassaaq:
"Imm. 4. Peqatigiiffimmi il.il. eqquiniaasitsisumi siulersuisunut ilaasortat akileraarutit akilerneqarnissaannut akisussaasuullutik taanna sinnerlugu akiliussisussamaataapput. Akiliussisussamaataaneq atuutilissaaq piffissaq peqatigiiffiup il.il. eqquiniaasitsisup akileraarutinik piffissaagallartillugu akiliiffissaa qaangiunniariarpat.".
§ 2
Inatsisartut inatsisaat atuutilissaaq ulloq 1. april 2006-imiit.
Namminersornerullutik Oqartussat, ulloq 27. marts 2006
Hans Enoksen/
Josef Motzfeldt