20. januar 2006

UKIU 2006/12

 

Inatsisissatut siunnersuummut oqaaseqaatit

 

Oqaaseqaatit nalinginnaasut

1. Inatsisissatut siunnersuutip tunngavia imarisaalu:

Inatsisissatut siunnersuutip siunertaraa peqatigiiffiup il.il. eqquiniaasitsisup akileraarutit akiligassanngorsimasut akilerneqarnissaannut akisussaasuunerpaajuneranik erseqqissaanissaq. Tamanna inatsimmi maannakkorpiaq erseqqilluinnartumik allassimanngilaq. Akisussaasuuneq taanna pillugu nalornissutaasinnaasut inatsisissatut siunnersuummi matumani erseqqissarneqarput.

Inatsisissatut siunnersuut, eqquiniaasitsisup siulersuisullu akornanni akisussaasuunerup ersarinne-runissaanik Ombudsmandip piumasaqaateqarneranik tunngaveqarpoq.

Aamma inatsisissatut siunnersuutikkut erseqqissarneqarpoq akisussaasuunerup siulersuisunut ilaasortanut piumasaannarmik inissinneqarsinnaannginnera, siulersuisunummi ilaasortat akisussaasuunerat sinniisutut akiliussisussamaataanerusoq erseqqissarneqarpoq.

Siulersuisunut ilaasortat, akileraarutit akilerneqanngitsut akilerneqarnissaannut akisussaasuuneran-nut malittarisassaq Inatsisartut inatsisaata atuutilersinneqarnerani ulloq 31. oktober 1987-imili atuuppoq. Siulersuisunut ilaasortat akisussaasuunerat, akileraarutip landskarsimut akiligassaanera-nik tunngaveqarpoq. Tassa taakku pisortat aningaasaatigaat eqquiniaasitsisullu unerartillugillu aki-liutigisassavaat. Erseqqissaatigineqassaaq akileraarutinut akiitsut qaqutiguinnaq siulersuisunut ilaa-sortanut akileqquneqartarmata. Inatsisissatut siunnersuutip siunertarinngilaa ileqqorineqartup taas-suma allanngortinneqarnissaa, taamaattumik naatsorsuutigineqartariaqarpoq siulersuisunut ilaasor-tat akisussaasunngortinneqartarnerat pisuni arlaqanngitsuinnarni pisassasoq.

Sinniisuulluni akiliussisussamaataaneq najoqqutassat nalinginnaasut malillugit aatsaat atuutilersussaavoq, akiligassat inatsisit naapertorlugit akiliinissamut akisussaasuunerpaamut akilersinniaraluarlugit iluatsitsisoqanngippat. Inatsisissatut siunnersuut tunngavimmit tassannga allaassuteqarpoq, tassami sinniisuulluni akiliussisussamaataaneq atuutilersinneqassammat inatsisit naapertorlugit akiliinissamut akisussaanerpaasoq akileraarutinik akiligassanngorsimasunik piffissaagallartillugu akiliinngippat.

2. Pisortanut aningaasatigut allaffissornikkullu sunniutissai.

Eqquiniaasitsisup akisussaasuunerpaajuneranik erseqqissaaneq maannakkut inatsisaasumik allannguinermik imaqanngilaq, taamaammallu pisortat tassunga atatillugu aningaasatigut allaffissornikkulluunniit sunniuteqarfigineqarnissaat naatsorsuutigineqanngilaq.

Siulersuisunut ilaasortat akiliussisussamaataasarnissaannik atuutilersitsinerup akiliisitsiniartarnermik suliaqartarnermut pitsannguutaanissaa naatsorsuutigineqarpoq, taamaatuttaaq allaffissornikkut sullissinermik oqilisaassisoqassaaq isertitallu qaffatsinneqarsinnaanerannut aqqutissiuussisoqarluni. Allaffissornikkulli sullissinernit oqilisaassinerit pineqartut isertitaqaataanerulernissaat ima killeqartigisussatut nalilerneqarpoq, pisortanut sipaarutaasinnaanerat ilimagineqarani.

3. Inuussutissarsiutinik ingerlataqartunut aningaasatigut allaffissornikkullu sunniutissai:

Siunnersuut inuussutissarsiutinik ingerlataqartut aningaasarsiornerannut imaluunniit inuussutissarsiutinik ingerlataqartut allaffissornerannut sunniuteqartussaanngilaq.

4. Avatangiisinut pinngortitamullu sunniutissai:

Siunnersuut avatangiisinut pinngortitamulluunniit sunniuteqartussaanngilaq.

5. Innuttaasunut allaffissornikkut sunniutissai:

Siunnersuutip innuttaasunut allaffissornikkut sunniuteqarnissaa ilimagineqanngilaq.

6. Naalagaaffeqatigiinnermut namminersornermullu tunngasut:

Siunnersuut naalagaaffeqatigiinnermut namminersornermulluunniit tunngasunik imaqanngilaq.

7. Tusarniaaneq:

Siunnersuut KANUKOKA-mut, Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmut aamma Aningaasaqarnermut Pisortaqarfimmut tusarniaassutigineqarsimavoq.

Aningaasaqarnermut Pisortaqarfik tusarniaanermi akissutimini siunnersuuteqarpoq sinniisuulluni akiliussisussamaataanerup aningaasatigut sunniutissaa sukumiinerusumik nassuiaatigineqassasoq.

Oqaaseqaatinik allanik takkuttoqarsimanngilaq.

Tusarniaanermi akissuteqaatit siunnersuummut ilanngunneqarput.

 

Inatsisissatut siunnersuummi aalajangersakkanut ataasiakkaanut oqaaseqaatit

§ 1-imut

Nr. 1-imut

Siunnersuummi nr. 1-imi siunnersuutigineqarpoq erseqqissarneqassasoq, eqquiniaasitsisup akile-raarutit akilerneqarnissaannut akisussaasuunera. Pineqarpoq pingaarnertut akisussaasuuneq, aamma akiliisitsiniartarnermi maleruagassat nalinginnaasut, matumani aamma ilanngullugit akiliisinnaajunnaartarnermut tunngasut, inatsisit malillugit akiliinissamut akisussaatitaasumut eqquiniaasitsisumut sakkugineqarsinnaapput. Taamaalilluni eqqartuussisarnermik inatsimmi aammalu akiitsut akilersinniarneqartarnerannut pisoqalisoortarneranullu inatsimmi maleruagassat naapertorlugit pinngitsaaliissummik akiliisitsiniartoqarsinnaavoq.

Nr. 2-mut

Aammattaaq siunnersuutigineqarpoq, peqatigiiffimmi il.il. eqquiniaasitsisumi siulersuisunut ilaasortat akileraarutinut akiligassat akilerneqarnissaannut sinniisuullutik akisussaasuusut. Akisussaasuuneq atuutilissaq piffissaq peqatigiiffiup il.il. eqquiniaasitsisup eqquiniaasitsinermi akileraarutinik piffissaagallartillugu akiliiffissaa qaangiunniariarpat. Taamaammat peqatigiiffiup pisussaaffimminik sumiginnaanerata eqqartuussutikkut, akiliisinnaajunnaarnermik nalunaarutiginnittoqarneratigut assigisaatigulluunniit paasineqarnera siulersuisunut ilaasortat akisussaasuunissaannut aalajangiisuunngilaq. Tassa imaappoq siulersuisunut ilaasortat akisussaasuunerat akiliussisussamaatitut qularnaveeqqusiisutut tunngavimmigut nammineq akiitsulittut qularnaveqqusiisutut pissuseqarpoq.

Kisianni akiliisitsiniartarnermik suleriaatsini nalinginnaasuni peqqussutaavoq akiliisitsiniartartutut oqartussaasut eqquiniaasitsinermi akileraarutinik akiligassanngorsimasunik, peqatigiiffik il.il. eqquiniaasitsisuusoq nukingisaarilluni allakkanik tigusaqareersimatinnagu, siulersuisunut ilaasortanut akiliisitsiniarsinnaanngitsut. Taamatuttaaq akileraarutinut akiligassanik akiliinngitsoornerup inatsisitigut kingunissai peqatigiiffimmut il.il. ilisimatitsissutigineqassapput. Taamaammat siulersuisunut ilaasortat sinniisuullutik akiliussisussamaataanerat aatsaat atuutilersussaavoq, eqquiniaasitsisup akiliisitsiniartartutut oqartussaasut akileraarutinik nalunaarutiginneqqulluni akileeqqullunilu qinnuiginninnerat arlaleriarluni sumiginnarsimappagu.

Eqquiniaasitsisup taamatullu aamma siulersuisunut ilaasortat akisussaasuunerat tamanut atuuppoq. Tassa imaappoq akisussaasuuneq atuutsinneqarsinnaavoq ilaasortap ataasiinnaviup isornartorsiugassaanera apeqqutaatinnagu aamma akileraarutinik akiliisimannginnerup ilaasortat arlaannit ilisimaneqarsimannginnera apeqqutaatinnagu. Taamaammat akisussaasuuneq siulersuisunut ilaasortap siulersuisut ataatsimiinneranni ataatsimi arlaqartuniluunniit najuussimannginnera pissutigalugu atorunnaassanngilaq. Taamaattumik napparsimaneq assigisaaluunniit pissutigalugit najuussimannginneq akisussaasuunerup atorunnaarnissaanik kinguneqassanngilaq.

Maleruagassatut siunnersuutigineqartoq naapertorlugu siulersuisunut ilaasortaq akileraarutit, pineqartup piffissami siulersuisunut ilaasortaaffigisaani akiligassanngorsimasut akilerneqarnissaannut akisussaasuuvoq. Akileraarutit piffissami taaneqartumi akiligassanngorsimasut akilerneqarnissaannut akisussaaneq atuutiinnassaaq, siulersuisunut ilaasortaq siulersuisunut ilaasortaajunnaaraluarpalluunniit.

Siulersuisunut ilaasortat assigiimmik pisussaaffeqarput. Tamanna isumaqarpoq akiliisitsiniartartutut oqartussaasut akileraarutit akiligassanngorsimasut tamarmiusut siulersuisunut ilaasortanut tamanut imaluunniit ataasiinnarmut arlalinnulluunniit akilersinniarsinnaagaat. Siulersuisunut ilaasortap ataatsip arlallilluunniit akiliisinneqarsimasup/-sut taamaalillutik siulersuisunut ilaasortaqatitik akilikkamik ilaannik utertitseqqullugit piumasaqarfigisinnaavaat.

Siulersuisunut ilaasortat sinniisussaat akileraarutit akiligassanngorsimasut akilerneqarnissaannut akisussaasuunngillat.

 

§ 2-mut

Inatsisartut inatsisaata ullormit 1. april 2006-imiit atortuulernissaa siunnersuutigineqarpoq. Siunnersuut eqquiniaasitsinernut ulloq taanna taassumalu kingorna ingerlanneqartunut taamaallaat atuuppoq.