13. marts 2006

UKIU 2006/12

 

Eqquiniaasitsinermi akileraarutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut
(Akileraarutinik akiliinissamut akisussaasuunermik erseqqissaaneq kiisalu siulersuisuni ilaasortat akiliussisussamaataasarnissaannik atuutilersitsinissaq)

pillugu

Inatsisartut Akileraartarnermut Akitsuusiisarnermullu Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

 

Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Augusta Salling, Atassut, siulittaasoq
Inatsisartunut ilaasortaq Agnethe Davidsen, Siumut, siulittaasup tullia
Inatsisartunut ilaasortaq Agathe Fontain, Inuit Ataqatigiit
Inatsisartunut ilaasortaq Lars Emil Johansen, Siumut
Inatsisartunut ilaasortaq Lene Knüppel, Demokraatit
Inatsisartunut ilaasortaq Jens Lars Fleischer, Siumut - Sinniisussaq

Akileraartarnermut Akitsuusiisarnermullu Ataatsimiititaliap UKIU 2006-imi siullermeerinerup kingorna inatsisissatut siunnersut matumani pineqartoq nassuiaatitaalu misissorpai.

Siunnersuut UKA 05-imi (UKA 05/51) taamani Naalakkersuisuusunit saqqummiunneqaqqaarpoq. Inatsisartunut 15. november 2005-imi qinersinissap nalunaarutigineqarneratigut siunnersuut atorunnaarpoq. Siunnersuutip annertunerusumik allannguuteqartinnagu saqqummiuteqqinneqarnissaa Naalakkersuisunngortut toqqarsimavaat.

Siunnersuutip imarisai

2004-mut nalunaarummini (49-1) eqquiniaasitsinermut akileraarutit pillugit maleruagassat atuuttut nutarterneqarnissaat Inatsisartut Ombudsmandiata kaammattuutigaa. Inatsit malillugu akileraarutinik kikkut akiliisussaatitaanerat inatsisikkut erseqqissarneqassasoq Ombudsmandip immikkut kissaatigisimavaa.

Peqatigiiffiit il.il. eqquiniaasitsisut eqquiniaasitsinermi akileraarutit akilerneqarnissaannut akisussaanerat siunnersuutikkut matumuuna naqissuserneqassasoq Naalakkersuisut kissaatigaat.

Peqatigiiffiit il.il. eqquiniaasitsisut siulersuisuini ilaasortat eqquiniaasitsinermi akileraarutinik akiliingitsoortoqarnerani tulliullutik akiliisussanngortinneqartarnissaat siunnersuutigineqarpoq. Peqatigiiffiit il.il. eqquiniaasitsisut akileraarutinik piffissaq eqqorlugu akiliinngitsoorneranni taamatut akiliisussanngorneq atuutilertassaaq. Nalinginnaasumilli akiliisitsiniartarnermi periusaasup aallaavigaa peqatigiiffiup eqquiniaasitsisimasup akileraarutinit akilinngitsuugaanut akileeqqusissummik allakkamik tigusaqartoqarsimatinnagu akileraarutit akilinngitsuukkat akiliisitsiniartartumit akilersinniarneqarsinnaanngitsut.

Tusarniaanermit akissutisiat

Siunnersuut 5. april 2005-imi 6. maj 2005-imi tusarniaanermut akissuteqarnissamik piffissalerlugu taamani Naalakkersuisuusunit tusarniaassutigalugu nassiunneqarpoq. Siunnersuut taasariaqartunik allannguuteqanngimmat tusarniaaqqinnissaq Naalakkersuisunngortut pisariaqartutut isigisimanngilaat.

Tusarniaanermi akissutisiat nuutinneri siunnersuutip ataatsimiititaliamit suliarineqarnerani atugassatut ataatsimiititaliap pissarsiarai. Tusarniaanermi akissutisiat oqaaseqarnissamik pisariaqalersitsinngillat.

Siunnersuutip aningaasatigut kinguneqaatissai

Siunnersuutip siunertaa pingaarneq tassaammat maleruagassanik atuuttunik erseqqissaanissaq siunnersuutip aningaasatigut immikkut kinguneqaateqarnissaa Naalakkersuisut naatsorsuutiginngilaat.

Akisussaasuuneq

Siulersuisunut ilaasortat akisussaasuunerannut tunngaviusutut apeqqut Akitsuusiisarnermut Ataatsimiititaliap ataatsimiititaliatut sulinermini immikkut maluginiarsimavaa. Ulloq 24. februar 2006 tamanna pillugu allakkaminni Naalakkersuisut imaattunik ilisimatitsissuteqarput:

"… siunnersuutip nr. 2-ani ima allassimasoq takuneqarsinnaavoq "Akisussaasuuneq atuutilissaaq piffissaq peqatigiiffiup il.il. eqquiniaasitsisup eqquiniaasitsinermi akileraarutinik piffissaagallartillugu akiliiffissaa qaangiunniariarpat.".

Siunnersuummut oqaaseqaatini ilaatigut oqaatigineqarpoq "Taamaammat siulersuisunut ilaasortat sinniisuullutik akiliussisussamaataanerat aatsaat atuutilersussaavoq, eqquiniaasitsisup akiliisitsiniartartutut oqartussaasut akileraarutinik nalunaarutiginneqqulluni akileeqqullunilu qinnuiginninnerat arlaleriarluni sumiginnarsimappagu.".

Tamanna tunngavigalugu Demokratit aperipput, arlaleriarluni-mik oqarneq qanoq paasisariaqarpa? Aamma qaangiunniariarpat qanorpiaq isumaqarami?

Tassunga tunngatillugu oqaatigisinnaavara inatsisip oqaasertaani allassimasoq qaangiunniariarpat isumaqarmat siulersuisuni ilaasortat akileraarutip akilerneqarnissaanut akisussaasuulissasut, peqatigiiffiup il.il. eqquiniaasitsisup piffissaq akileraarutinik piffissaagallartillugu akiliiffissani kingusinnerpaaq qimmuppagu. Tassunga tunngatillugu innersuussutigineqarpoq inatsisissatut siunnersuummi aalajangersakkanut ataasiakkaanut oqaaseqaatini nr. 2-mi immikkoortoq 1.

Oqaaseq arlaleriarluni inatsisissatut siunnersuummi aalajangersakkanut ataasiakkaanut oqaaseqaatini nr. 2-mi immikkoortoq 2-mi atorneqarpoq. Immikkoortumi tassani eqqartorneqarput akiliisitsiniartarnermik periutsit nalinginnaasut, tassa imaappoq eqquiniaasitsinermi akileraarutit akiligassanngorsimasut qanoq innikkut siulersuisunut ilaasortanut ataasiakkaanut akilersinniarneqartarnerannik periuseq.

Taamaalilluni imaalerpoq akisussaasuuneq piffissaagallartillugu akiliiffissaq kingulleq qimmunneqarniariarpat atuutilissasoq, akiligassalli nalinginnaasumik periuseq malillugu aatsaat siulersuisunut ilaasortanut akilersinniarneqassapput peqatigiiffimmut il.il. akileraarutinik akiliisussaatitaasumut akilersinniaraluarlugit iluatsitsisoqanngippat.

Imaanngilarli akiligassat siulersuisunut ilaasortanut pisut ilaanni siusinnerusukkut akilersinniarneqartarsinnaanngitsut. Taamaaliortoqarsinnaavoq assersuutigalugu peqatigiiffik il.il. pineqartoq pisortanut annertuunik akiligassaqarpat, imaluunniit akiligassallip annertuunik annaasaqarfigineqarnissaa ilimanarsorinarpat…"

Naalakkersuisut akissuteqaataat Akileraartarnermut Akitsuusiisarnermullu Ataatsimiititaliap tusaatissatut tiguaa.

Akileraartarnermut Akitsuusiisarnermullu Ataatsimiititaliap inassuteqaataa

Akiitsunut akilerneqanngitsunut 2004-ip naanerani Akileraartarnermut Pisortaqarfiup takussutissiaa naapertorlugu eqquiniaasitsinermut akileraarutit akilerneqanngitsut 2 mio. kr. sinnerlugit angissuseqartut Akileraartarnermut Akitsuusiisarnermullu Ataatsimiititaliap takusinnaavaa. Aningaasat taakku pissusissamisuunngitsumik amerlavallaartut ataatsimiititaliaq isumaqarpoq. Tamanna tunngavigalugu ataatsimiititaliap Naalakkersuisunut inassutigissavaa akiitsut akilinngitsuukkaat amerliartuinnarnissaat pinaveersimatinniarlugu tamassuma pisortanit nakkutilliivigineqarnera sakkortusineqassasoq sakkortunerusumillu tunngavilimmik periuseqarfigineqassasoq. Taamatut sammivilimmik iliuuseqarnissamut siunnersuut matumani pineqartoq atorneqarluarsinnaasoq ataatsimiititaliaq isumaqarpoq. Taamaammat inatsiseqarnerup allannguteqarnerata sakkortusineqarneratalu ilisimaneqarnera siammarsarumallugu immikkut iliuuseqarnermik takutitsissasut ataatsimiititaliap ilanngullugu Naalakkersuisunut kaammattuutigissavaa.

Akileraartarnermut Akitsuusiisarnermullu Ataatsimiititaliap isumaqatigiittup siunnersuutip akuersisutigineqarnissaa inassutigaa.

Taama oqaaseqarluni Inatsisartut Akileraartarnermut Akitsuusiisarnermullu Ataatsimiititaliaata siunnersuut aappassaaniigassanngortippaa.

 

	Augusta Salling, Siulittaasoq
Agnethe Davidsen		Agathe Fontain
Lars-Emil Johansen		Lene Knüppel