Peqqinnissaqarfiup sullissineri il.il. pillugit Inatsisartut peqqussutaata allanngortinneqarnera pillugu Inatsisartut peqqussutaat nr. 16, 20. november 2006-imeersoq
(Sullissinernut il.il. peqqinnissaqarfiup akiliisitsisinnaaneranut inatsisitigut tunngavissaq ersarissoq)
§ 1
Peqqinnissaqarfiup sullissineri il.il. pillugit Inatsisartut peqqussutaanni nr. 15-imi, 6. november 1997-imeersumi, Inatsisartut peqqussutaatigut nr. 12-ikkut, 14. november 2004-meersukkut allanngortinneqarsimasumi makku allannguutigitinneqassapput:
1. § 24 imaattunik oqaasertaqassaaq:
"§ 24. Malittarisassat matuma siuliani aalajangersarneqartut tunngavigalugit akeqanngitsumik sullissisoqarsinnaatinnagu, Naalakkersuisut akiliuteqartitsisarneq pillugu malittarisassanik aalajangersaasinnaapput.".2. § 25 imaattunik oqaasertaqassaaq:
"§ 25. Pisuni Inatsisartut peqqussutaatigut matumuuna aalajangersaavigineqarsimanngitsuni atortussanik, iluaqusersuutinik, peqqissaanermi atortussanik kiisalu sullissinernik allanik akiliisitsilluni tunisinissamik Naalakkersuisut isumaqatigiissuteqarsinnaapput.
Imm. 2. Napparsimasimasunut naammassineqartumik katsorsartissimasunut paaqqutarinniffissatut inissat pillugit ataasiakkaartunik ataatsimoorussanillu isumaqatigiissuteqarnermi atugassarititaasut kiisalu atortussanik, peqqissaanermi atortussanik, iluaqusersuutinik sullissinernillu allanik tunisinermi atugassarititaasut pillugit isumaqatigiissuteqarnissamut malittarisassanik Naalakkersuisut aalajangersaasinnaapput.".
§ 2
Inatsisartut peqqussutaat atuutilerpoq 1. januar 2007.
Namminersornerullutik Oqartussat, 20. november 2006
Hans Enoksen/
Agathe Fontain
Isumaliutissiissut (Aappassaaneerinninneq)