5. november 2006 UKA2006/53
Peqqinnissaqarfiup sullissineri il.il. pillugit Inatsisartut peqqussutaata allanngortinneqarnissaanut Inatsisartut peqqussutissaattut siunnersuut
(Peqqinnisaqarfiup sullissinernut akileeqqusisinnaanerata il.il. inatsisitigut ersarissarneqarnera)pillugu
Inatsisartut Peqqissutsimut Ataatsimiititaliaata
ISUMALIUTISSIISSUTAA
Siunnersuutip aappassaaneerneqarnerani saqqummiunneqartoq
Inatsisartut Peqqissutsimut Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Jens Lars Fleischer, Siumut, siulittaasoq
Inatsisartunut ilaasortaq Godmand Rasmussen, Atassut, siulittaasup tullia
Inatsisartunut ilaasortaq Vittus Mikaelsen, Siumut
Inatsisartunut ilaasortaq Juliane Henningsen, Inuit Ataqatigiit
Inatsisartunut ilaasortaq Astrid Fleischer Rex, Demokraatit
UKA 2006-imi siullermeerininnerup kingorna Inatsisartut Peqqissutsimut Ataatsimiititaliaata peqqussutissatut siunnersuut nassuiaatitai ilanngullugit misissorpaa.
Tusarniaanermit akissuteqaatit
Siunnersuummut pineqartumut tusarniaanernermi akissutigineqarsimasut assilineri ataatsimiititaliami suliarininnissami atugassatut Ataatsimiititaliamit pissarsiarineqarput.
Kanukoka tusarniaanermut akissuteqarsimanngimmat taamaattumik tamatuma kingorna tusarniaanermit akissutinik Kanukokamit pissarsiniartoqarsimasoq Ataatsimiititaliap maluginiarpaa. Nuna tamakkerlugu peqatigiiffiup maannakkut malittarisassanik suliassaqarfimmilu suleriaatsinik inatsisiliornikkut allannguinertut siunnersuut isigineqarmat oqaaseqaateqarnissamut pissutissaqarsimanatik taamaattumillu tusarniaanermut akissuteqarsimanatik akissuteqaamminni Kanukoka ilisimatisivoq. Tamanna tusaatissatut Ataatsimiititaliamit tiguneqarpoq.
Siunnersuut:
Peqqinnissaqarfiup sullissineri pillugit Inatsisartut peqqussutaani paragraffit marluk allanngortinneqassasut siunnersuutigineqarpoq: Pisuni immikkut illuinnartuni atortorissaarutinut Kalaallit Nunaata avataani pissarsiarineqartunut tapiissuteqartoqarsinnaaneranut Naalakkersuisut malittarisassiorsinnaanerannut § 24 imm. 2 pisinnaatitsivoq. Pisinnaatitsinermut tunngaviup atorunnaarsinneqarnissaa Naalakkersuisunit kissatigineqarpoq taamaalilluni peqqinnissaqarfiup atortorissaarutinut tamakkiisumik ilaannakuusumilluunniit akilertagaat peqqinnissaqarfimmit nakkutigineqassammata. Tamanna nakkutiginninneq Peqqinnissaqarfiup pitsaassuseq qulakkeersimappagu Peqqinnissaqarfiup Danmarkimi niiuerfinnut immikkut toqqakkanut atortorissaarutinik pisiniarnerani pisarpoq.
§ 25-ip allanngortinneqarnissaa aammattaaq Naalakkersuisunit kissaatigineqarpoq. Sullissineq pillugu maannakkut peqqussummi pisuni peqqussummi aalajangersaavigineqarsimanngitsuni akiliilluni peqqinnissaqarfimmit sullinneqarsinnaanermut Naalakkersuisut isumaqatigiissuteqarsinnaapput. Isumaqatigiissutit qanoq ittut Peqqinnissaqarfiup akuliuffigisinnaanerai siunnersuummi ersarissisinneqqarnissat kissaatigineqarpoq. Aammattaaq allannguutissatut siunnersuut napparsimasimasunut naammassineqartumik katsorsartissimasunut peqqinnissaqarfiup suliffeqarfiutaanni najugaqartitsisarnerni atugassarititaasut pillugit kiisalu peqqissaanermi atortussanik, iluaqusersuutinik sullissinernillu allanik akilersillugit tunniunneqartartut pillugit atugassarititaatitaasut pillugit nalunaarusiornikkut maleruagassanik Naalakkersuisut aalajangersaanissamut inatsisitigut tunngavissaannik imalik siunnersuutaavoq.
Ataatsimiititaliap siunnersuummik suliarininninnera:
Siunnersuummik Inatsisartuni siullermeerinninnermi partiit oqaaseqartitaanit apeqqutinik arlalinnik saqqummersoqarpoq. Naalakkersuisunut ilaasortap allagaani 12. oktober 2006-imeersuni apeqqutit taakku akineqarsimapput.
Akissutigineqartoq taanna naammagisimaarlugu Ataatsimiititaliap oqaatigaa annertunerusumillu siunnersuummut oqaaseqaatissaqarani. Akissuteqaat isumaliutissiissummut ilanngussatut ilanngunneqarpoq.
Tamanna tunuliaqutaralugu siunnersuut maanna ilusimisut ilusilik Ataatsimiititaliap isumatigiittup akuersissutigineqassasoq inasuutigaa.
Taama oqaaseqarlutik Inatsisartut Peqqissutsimut Ataatsimiititaliaata "Peqqinnissaqarfiup sullissineri il.il. pillugit Inatsisartut peqqussutaata nr. xx xx 2006-imeersup allanngortinneqarnissaanut Inatsisartut peqqussutissaattut siunnersuut" (Peqqinnisaqarfiup sullissinernut akileeqqusisinnaanerata il.il. inatsisitigut ersarissarneqarnera) appassaaniigassanngortippaa.
Jens Lars Fleischer, Siulittaasoq
Godmand Rasmussen
Vittus Mikaelsen
Juliane Henningsen
Astrid Fleischer Rex
Ilanngussaq (pdf-format)