Piginnaanngorsaaqqinnissamut ikiorsiisarneq pillugu Inatsisartut peqqussutaata allanngortinnissaa pillugu Inatsisartut pequssutaat nr. 3, 1. juni 2006-imeersoq
(Piginnaanngorsaqqittussap periarfissai annertusarneqarput, piginnaanngorsartunut tamanut sungiusarnermut ilinniagaqarnermullu periarfissat annertusineqarput kiisalu piginnaanngorsarnermut piffissarititaq ukiunut marlunnut sivikillineqarluni)

 

§ 1

Piginnaanngorsaaqqinnissamut ikiorsiisarneq pillugu Inatsisartut peqqussutaanni nr. 4, 31. maj 2001-imeersumi imaattunik allannguisoqassaaq:

1. § 4, imm.1, ima oqaasertalerneqassaaq:
"Piginnaanngorsaqqinnissamik qinnuteqaateqartup inuussutissarsiornikkut siunnerfigiumasaa kommunimit qulaajarneqassaaq suliniutit qulaajaanermik siunertaqartut aqqutigalugit.".

2. § 4-imi immikkoortup 2-p kingorna immikkoortoq nutaaq ilanngunneqassaaq:
"Imm. 3. Naalakkersuisut piginnaanngorsaaqqinnissaq sioqqullugu qulaajagassat pillugit maleruagassiisinnaapput.".

3. § 6, imm. 1, nr. 4, ima oqaasertalerneqassaaq:
"4) Ilinniagaqarneq, taassumalu ataani allamik ilinniagaqarsinnaaneq.".

4. § 7 ima oqaasertalerneqassaaq:
"§ 7. Piginnaanngorsaqqittussat namminersortut pisortalluunniit suliffiini aningaasarsiaqartinneqarlutik sungiusaqqinnissamik imaluunniit ilinniagaqarnissamik neqeroorfigineqarsinnaapput.".

5. § 10, imm. 1-imi "ukiut tallimat" ima allanngortinneqassaaq: "ukiut marluk, tamaattoq takuuk imm. 2".

6. § 10-mi, imm. 2, nr. 1-mi aamma 2-mi ,"ukiut tallimat" ima allanngortinneqassapput "ukiut marluk".

7. § 16-imi immikkoortup 2-p kingorna immikkoortoq nutaaq ilanngunneqassaaq:
"Imm. 3. Kommunip akissarsianut tapiissutitut aningaasaliissutaa annerpaamik ukiumut ilivitsumut tunniunneqartassaaq. Taamaattoq piffissaq akissarsianut tapiissuteqarfiusoq sivitsorneqarsinnaavoq, pissutsit immikkut ittut atuutsillugit.".

 

§ 2

Inatsisartut peqqussutaat manna atuutilerpoq ulloq 1. juli 2006.

Namminersornerullutik Oqartussat, ulloq 1. juni 2006

Hans Enoksen

/

Siverth K. Heilmann

---

Siullermeerinninnermut siunnersuut

Siunnersuummut nassuiaatit

Isumaliutissiissut (Aappassaaneerinninneq)

Pingajussaaneerinninnermut allannguutissatut siunnersuut (akuerineqartoq)