27. december 2005

UKIU 2006/14

 

Peqqussutissatut siunnersuummut oqaaseqaatit

Nalinginnaasumik oqaaseqaatit

1. Aallarniut:

Piginnaanngorsaaqqinneq pillugu aaqqissuussinerup kommuninit tamakkiisumik atorneqarnissaa pillugu kissaatigisaq tunngavigalugu Piginnaanngorsaaqqinnissamut ikiorsiisarneq pillugu Inatsisartut peqqussutaat nr. 4, 31. maj 2001-imeersup allanngortinnissaa pillugu Inatsisartut peqqussutissaattut siunnersuut saqqummiunneqarpoq. Tamatuma malitsigisaatut pilersaarutigineqarpoq suliffeqarfimmi piginnaanngorsaaqqinnermi akissarsianut tapiissutit, piginnaan-ngorsaaqqinnermi pilersaarut, piginnaanngorsaaqqinnermi ikiorsiissutit aammalu eqaannerusumik suliffeqarneq pillugit nutaamik nalunaarutissatut siunnersuummik saqqummiussisoqassasoq. Matumani nalunaarut tunngavisseeqataassaaq suliffeqarfimmi piginnaanngorsaaqqinnermi akissarsianut tapiissutit aamma piginnaanngorsaaqqinnermi ikiorsiissutit pillugit allaffisornikkut aqutsinerup pisariinnerusumik ingerlanneqarsinnaalernissaannut.

Piginnaanngorsaaqqinnermi suliniutit suliffeqarnermi suliniutigisanut allanut ataqatigiissinneqartariaqarput, tamatumani pineqartut qitiusumik soorluttaarlu najukkami ingerlanneqarpata. Taamaattumik orniginartuuvoq kommunit taamatut suliniutigisaqarneq sumiiffigisaminni suliffeqarnikkut suliniutiginiakkanut allanut akuliutititsiniarsinnaanissaat.

Tassunga atatillugu naatsorsuutigineqarpoq piginnaanngorsaaqqinnermi suliniarneq ilitsersuisartunik ilinniartitaanermi ilinniagaqartitseqqittarnermilu ingerlanneqareersunut pilersaarutigineqartunullu atatillugu ilinniartitaanikkut suliniutigineqartunut aamma iluaqutaasinnaassasoq, tamatumani inuit ataasiakkaat pillugit iliuuserisassanik pilersaarusiorsinnaasarnissanut sanilliullugu piginnaasaqarnerulersitsisoqassammat. Pineqartut piginnaanngorsaaqqinnermi suliniarnermut pingaaruteqartuupput. Inuillu ataasiakkaat pillugit iliuuserisassanik pilersaarutit pineqartut suliarineqartarnissaannut atatillugu iluaqutaalluarsinnaasassagaluarpoq tamanna kommunini suliffeqarnermut- aamma isumaginninnermut ingerlatsiviit akornanni suleqatigiittoqartarneratigut pippat. Taamatuttaaq taamatut suliniarneq najukkani sulisitsisut suleqatigalugit pisussaasariaqassaaq.

Kommuninit avinngarusimasuniittunit arlalinnit taaneqartarpoq piginnaanngorsaaqqinnermi aaqqissuusseriaaseq atuutilersitsivigissallugu ajornakusoorsinnaasartoq kommunini pineqartuni suliffissat amigaataasarnerat pissutigalugu. Taamatut ajornartorsiuteqartoqartarnera ilaatigut ikiorserneqarsinnaasassajunnarsivoq aalajangersimasunik iliuuseqartoqarneratigut. Tamannalu ilaatigut pisinnaasassaaq kommunit misilittagarisatik pillugit akunnerminni paarlaasseqatigiittarnerisigut, tamatumani ilanngullugit "suleriuserisartakkat pitsaanerpaat", isumassarsianik katersuiffiit allatigulluunniit attaveqaqatigiiffiusinnaasut aqqutigisinnaasarnerisigut.

2. Siunnersuummi immikkoortut pingaarnerit pillugit nassuiaat:

Piginnaanngorsaaqqinneq pillugu inatsisitigut ullumikkut tunngavigisaq tassaavoq Piginnaanngorsaaqqinnissamut ikiorsiisarneq pillugu Inatsisartut peqqussutaat nr. 4, 31. maj 2001-imeersoq. Peqqussut atuuttoq allanngortinneqassaaq, taamaasilluni aaqqissuussineq pineqartoq kommuninut suliffeqarfinnullu pisariinnerusumik aqutsiviusinnaalersillugu.

Piginnaanngorsaqqittussap aaqqissuussarisatigut periarfissarisinnaasassai siunnersuut malillugu annertusineqassapput, taamaasilluni piginnaanngorsaqqittussaq piffiup piginnaanngorsaaqqiffiusup iluani ilinniagaqarsinnaanissamik aamma periarfissaqalissammat, tamatumani ilaalluni ilinniagaqaqqissinnaanissaq. Suliamut allamut ilinniarsinnaaneq aalajangersagaq ullumikkut atuuttoq malillugu periarfissaanngilaq.

Taamatuttaaq piginnaanngorsaqqittut tamarmik sungiusarneqarnissamik imaluunniit ilinniagaqarnissamik neqeroorfigineqarsinnaanissamik periarfissinneqassapput. Suliffeqarfimmi piginnaanngorsaaqqinnermi akissarsianut tapiissutisisoqarsinnaanissaanut pissutsit immikkut ittut atuuteqqaartariaqarnerat immikkut piumasaqaataajunnaassaaq. Taamatuttaaq aamma piumasaqaataajunnaassaaq piginnaanngorsaqqittup suliffeqarnermut siusinnerusukkut attuumassuteqareersimanissaa, imaluunniit aapparisamik qitornarisanilluunniit pilersuisuunissamik pisuussaaffeqartinneqaqqaarnissaa. Inuit suliffeqarnermut attuumassuteqarsimanngitsut imaluunniit aapparisamik qitornarisanilluunniit pilersuinissaminnik pisussaatinneqanngitsut suliffeqarfimmi piginnaanngorsaqqinnissamik neqeroorfigineqarsinnaanermik aalajangersagaq ullumikkut atuuttoq malillugu periarfissaqartinneqanngillat.

Taamatuttaaq siunnersuut malillugu siunertarineqarpoq piginnaanngorsaaqqinnissamut piffissaliussaq ukiunut marlunnut sivikillineqassasoq. Aalajangersagaq ullumikkut atuuttoq malillugu piginnaanngorsaqqittoqarsinnaavoq ukiut tallimat angullugit.

Inatsisartut piginnaanngorsaaqqinnissamut ikiorsiisarneq pillugu peqqussutissatut siunnersuutaat inatsisilianut allanut arlalinnut attuumassuteqarpoq:

Inatsisartut pisortanit ikiorsiissutit pillugit peqqussutaat, Inatsisartut pisortanit soraarnerussutisiat pillugit peqqussutaat aammalu Inatsisartut suliffissaaleqisunik sulisitsiniartarneq pillugu peqqussutaat, kiisalu Inatsisartut suliffeqanngikkallarnermi ikiorsiissutit pillugit peqqussutigiligassaat.

Peqqussut matumani pineqartoq peqqussutilianut matuma siuliini taaneqartunut naapertuuppoq, taamaattumillu inuit sulisinnaassuseqartutut ukiullit amerlanersaasa suliffeqarnermiiginnarsinnaanissaannik imaluunniit uterteqqinneqarsinnaanissaannik kissaatigisaqarneq tunngavigalugu matumani Piginnaanngorsaaqqinnissamut ikiorsiisarneq pillugu Inatsisartut peqqussutaat nr. 4, 31. maj 2001-imeersumut allannguutissatut siunnersuummik saqqummiussisoqarluni.

3. Pisortanut aningaasaqarnikkut allaffissornikkullu malitsigiumaakkat:

Piginnaanngorsaaqqinnermi suliniarneq kissaatigisatut annertusiumaneqarneratigut pisortat aningaasartuutigisartagaat eqqarsaatigalugit aningaasanut inatsit malillugu pineqartumut annertussusilikkat qaangerneqassappata pisariaqassaaq kommunit pineqartoq pillugu aningaasartuutigisartagaannut atasumik apeqqutip kommuninut ataatsimut tapiissutaasartut pillugit isumaqatigiissusiortarnermut ilanngullugu oqallisigineqaqqittariaqarnissaa.

2006-imut aningaasanut inatsisissatut siunnersuummi piginnaanngorsaaqqinnissamut ikiorsiisarnermut 3 mio. koruunit immikkoortinneqarput. Aningaasaliissutit pineqartut kommunini piginnaanngorsaaqqinnermut aningaasartuutigisartakkat 50%-ii tikillugit matussuserneqarsinnaanerannut aningaasalersuutaassapput. Kommunit 2006-imut naatsorsuutigaat piginnaan-ngorsaaqqinnermut aningaasartuutigisartakkat marloriaataat sinnerlugit qaffakkumaartut.

Kommunit piginnaanngorsaaqqinnissamut ikiorsiissutinut aningaasartuutigisartagaasa 2006-imi taama annertutigisumik qaffariaateqarnissaat nalilerneqarpoq piviusorsiortumik tunngavissaqanngitsoq. Inuussutissarsiornermut, Nunalerinermut Suliffeqarnermullu Pisortaqarfiup naatsorsuutigaa piginnaanngorsaaqqinnissamut ikiorsiissutinut aningaasartuutaasareersut 2006-imi marloriaataat sinnernavianngikkaat. Taamaattumik 2006-imut aningaasanut inatsisissatut siunnersuut malillugu 3 mio. koruuninik aningaasaliissuteqartoqarnissaa naammassarinartinneqarpoq. Kommunit piginnaanngorsaaqqinnermi 2006-ip ingerlanerani suliniarnerisa annertussusiat apeqqutaatillugu pisariaqalersinnaassaaq 2007-imut aningaasaliissutigiumasat annertusineqartariaqarsinnaanerat. Annertusineqarsinnaanissaannut aningaasaliussassat siusinaartumik soraarnerussutisiaqalersimasut ikilinerisigut aammalu pisortanit ikiorsiissutit pillugit peqqussut malillugu pisartagaqartartut ikilinerisigut pissarsiassaasinnaassapput, pineqartut piginnaanngorsaaqqinnermi suliniarnerup annertusineratigut taaneqareersut naatsorsuutigineqarsinnaassammata.

Piginnaanngorsaaqqinnermi suliniarnerup annertusinera kommunit aamma Namminersornerullutik Oqartussat piginnaanngorsaaqqinnermut atatillugu aningaasartuutigisartagaasa annertusinissaannik malitseqaannartussaanngilaq. Amerlanerusut piginnaanngorsaqqinnerminnik iluatsitsilluartut ilutigitillugit pisortat isumaginninnikkut aningaasartuutigisartagaat piffissaq ungasinnerusoq eqqarsaatigalugu appassapput amerlanerusut suliffeqarnermi akuullualersussaassammata.

Piginnaanngorsaaqqinnissamut ikiorsiissutit pillugit siunnersuut suliffeqarnermi pisortanut atatillugu immini allannguuteqarfiunavianngilaq, tamatumani kommunit aamma Namminersornerullutik Oqartussat akornanni aningaasartuutinik agguaasseriaaseq allannguuteqarnavianngimmat.

Naatsorsuutigineqarpoq siunnersuutip malitsigiumaaraa kommunini pineqartut pillugit allaffissornikkut pisariinnerusumik ingerlatsisinnaasoqalernissaa. Kissaatiginartuuvorlu suliffissarsiorlutik kommunimut saaffiginnittut pineqartillugit kommuninit piginnaanngorsaqqissinnaanerat tunngavigalugu naliliiffigineqartarumaartut. Pissusissamisoortuussaarlu isumaginninnermut ingerlatsiviit aamma suliffissarsiuussisarfiit piginnaanngorsaaqqinneq pillugu suleqatigiippata.

4. Inuussutissarsiutinik ingerlataqartunut aningaasaqarnikkut allaffissornikkullu malitsigiumaakkat:

Siunniussaanngilaq inuussutissarsiutinik ingerlataqartunut aningaaqarnikkut malitseqarfiunissaa. Allaffissornikkut malitsigiumaakkat eqqarsaatigalugit siunniunneqarpoq nalunaarusiortoqassasoq siunertaralugu suliffeqarfiit piginnaanngorsaqqittunik sulisoqartut allaffissornikkut pisariillisaaffigineqarsinnaanissaat.

5. Avatangiisitigut aamma pinngortitamut malitsigiumaakkat:

Siunnersuut malillugu avatangiisitigut imaluunniit pinngortitamut sunniuteqartitsisoqarnavianngilaq.

6. Innuttaasunut allaffissornikkut malitsigiumaakkat:

Siunnersuut malillugu innuttaasunut allaffissornikkut sunniuteqartitsisoqarnavianngilaq.

7. Naalagaaffeqatigiinnermut aamma Namminersornissamut tunngassuteqartut:

Siunnersuut malillugu Naalagaaffeqatigiinnermut atatillugu sunniuteqartoqartitsisoqarnavianngitsoq nalilerneqarpoq.

Siunnersuut Namminersornissamut atatillugu Naalakkersuisut aamma Inatsisartut sapinngisamik amerlanerpaat imminnut pilersorsinnaanissaannik anguniagaqarnerannut naapertuuppoq.

8. Pisortat oqartussaasuinut kattuffinnullu tusarniaaneq:

Siunnersuut saqqummiunneqartinnagu missingiusiaq tusarniaassutigineqarnikuuvoq Ilaqutariinnermut Pisortaqarfimmut, Akileraartarnermut Pisortaqarfimmut, Aningaasaqarnermut Pisortaqarfimmut, Peqqinnissamut Pisortaqarfimmut, Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmut, KANUKOKA-mut, SIK-mut, Sulisitsisut Peqatigiiffiannut, ILIK-mut aamma NUSUKA-mut.

Akileraartarnermut Pisortaqarfik, Ilaqutariinnermut Pisortaqarfik aamma ILIK allannguutissatut siunnersuummut pineqartumut oqaaseqaateqanngillat.

Aningaasaqarnermut Pisortaqarfiup kissaatigaa § 1, nr. 1 malillugu inuttut nutaamik ineriartorfiusussat pillugit taasat qanoq aaqqissuunneqarnerannik aningaasalersorneqarnissaannillu nassuiaasoqassasoq. Tassunga atatillugu malugeqquneqarpoq peqqussut matumani pineqartoq malillugu ikiorserneqartussat tassaajumaarmata pisortanit ikiorsiissutit pillugit peqqussut imaluunniit siusinaartumik soraarnerussutisiallit pillugit peqqussut malillugit pisartagaqartut. Taamaattoqarpallu taamatut ikiorserneqartartut ikilissapput allatut aaqqissuussamut nuukkunik.

Sulianut allanut ilinniarnermut ilinniartitaanermullu tunngatillugu piginnaanngorsaqqittut piginnaanngorsaaqqinnissamut ikiorsiissutinik pisartagaqalersinnaanissaannik qaqugulu ilinniagaqarnersiuteqarsinnaalernissaanik nassuiaasiornissaq Aningaasaqarnermut Pisortaqarfiup ujartorpaa. Ilinniagaqarnersiutit nalinginnaasumik neqeroorutigineqarsinnaalersarput ilinniarneq aallartinneqaraangat. Piginnaanngorsaaqqinniarnermi ilinniartitaanermut tunngatillugu pineqarpoq piginnaanngorsaqqittussaq ilinniartitaanerup aallartinnissaanut ilinniagassanik ataasiakkaanik amigaateqarnersoq, imaalillugu ilinniartitaanerup aallartinnissaanut piginnaanngorsaasoqartariaqarnersoq piareersaasoqartariaqarnersorluunniit.

Aammattaaq Aningaasaqarnermut Pisortaqarfiup kissaatigaa aningaasatigut malitsigisassat siunnersuutip nassatarisassai ilanngullugit suliarineqassasut, piginnaanngorsaqqittussap suliffeqarfinni namminersortuni pisortalluunniit pigisaanni sungiusarnissamik ilinniarnissamilluunniit neqeroorfigineqarsinnaanerani pissutsinik immikkut ittunik soqarnersoq apeqqutaajunnaarsillugu. Tassunga tunngatillugu oqaatigineqassaaq piginnaanngorsaaqqinniarnermut aningaasanik amerlanerusunik atugassiinissaq pisariaqalersinnaanersoq, pingaartinneqartariaqarporli piginnaanngorsaqqinniakkat amerlanerulernissaat pisortanit ikiorsiissutit pillugit peqqussut malillugu pisartagallit siusinaartumillu soraarnerussutisiallit ikilisinneqarnerannik kinguneqassanersoq.

Piginnaanngorsaaqqinniartarnermi nalinginnaasumik piffissaliussap sivikillisinnissaa aalajangersimasumilluunniit piffissamik killiliisoqarnissaa Sulisitsisut Peqatigiiffiata pissusissamisoorsorinngilaa. Piffissamik killiliussaq ukiunut marlunnnut aalajangerneqarsimappat piginnaanngorsaqqinniakkap pisartagaqarluni ilinniarnini naammassisinnaanavianngilaa. Sulisitsisut Peqatigiiffiata innersuussutigaa piffissap piginnaanngorsaaqqinniarfiusup sivisussusia piginnaanngorsaaqqinniarnermik pilersaarummut naleqqussarneqassasoq tamannalu pilersaarummi aalajangerneqassasoq. Tasunnga tunngatillugu oqaatigineqarsinnaavoq ilinniarneq sivisunerussappat piginnaanngorsaqqitsinniagaq ilinniagaqarnersiuteqarsinnaalissammat taamaattumillu piginnaanngorsaaqqinniarneq pillugu peqqussummit ilaatinneqarunnaassalluni.

KANUKOKA-p oqaatigaa kommuninit arfiniliusunit ataatsimut isumaqartoqartoq piffissap piginnaanngorsaaqqinniarfiusup sivisussusia ukiunit tallimaniit marlunnut sivikillineqarnissaa ajunngitsuusoq, kommunilli ataasiakkaat kissaatigigaat innarluutillit anniaatillillu piginnaanngorsaqqitsinniarnerat ukiunik marlunnik sivisunerussannginnera pingaartinneqassasoq. Innarluutillit allallu anniaatillit peqqussummi § 10, imm. 2-mi eqqarsaatigineqarput.

Piffissap piginnaanngorsaaqqinniarfiusup sivikillisinnissaa Ammassallip Kommuniata eqqarsarnartoqartinnerarpaa Ammassallip Kommuniata annilaangassutigimmagu immikkut akuersinissamik maleruagassaq ilaatinneqannginnerminngarnit maleruagassaanerulissasoq. Malugeqquneqarpoq kommunit missingersuuteqarmata maleruarneqartussamik aammalu immikkut akuerineqarnissamik periarfissaqanngitsoq taamaattumillu ilanngunneqannginnissaq erseqqissaatigisariaqartoq.

Sulisitsisup Peqatigiiffiata oqaatigaa eqaannerusumik suliffeqarnerup piffissamik killiliiffiginissaa iluaqutaanavianngitsoq eqaannerusumik suliffeqarneq inunnut nalinginnaasumik atugassaqartitaalluni suliffeqalersinnaanermut ataavartumillu suliffeqalersinnaasunut tunngatinneqartarmat. Sulisitsisut Peqatigiiffiata innersuussutigaa tamatumunnga taarsiullugu aalajangersakkamik ilanngussisoqassasoq imatut oqaasertalimmik akissarsiatigut tapiissutinut aningaasaliissut annerpaamik ukioq ilivitsukkaarlugu tunniunneqartassasoq. Oqaaseqaatit siunnersuummut ilanngullugit suliarineqarput.

KANUKOKA-p kissaatigaa kommunit aningaasartuutaasa utertittarneranni periaatsit pisariillisinnissaat sulissutigineqassasoq. Periaaseq pisariillisinneqarsinnaanersoq maanna misissorneqaleruttorpoq. Kommunip tamarmiusup qinnuteqaateqariaasia ataasiinnarmik sammiveqartinneqalissaaq tamannalu allaffissornikkut oqiliallaatigineqassalluni.

KANUKOKA-p aamma maluginiaqquaa naatsorsuutigineqarmat ilitsersuutit peqqussummut attuumassutillit kiisalu nalunaarutissaq siunnersuutip atuutilersinnissaa sioqqullugu piffissaatillugu suliarineqarsimammata. Nalunaarutit peqqussutip atuutilinnginnerani suliarineqassapput. Peqqussummut ilitsersuummut tunngatillugu piginnaanngorsaaqqinniarneq pillugu peqqussummut ilitsersuummik peqareerpoq taannalu peqqussutissap atuutilinnginnerani piginnaanngorsaaqqinnissamut ikiorsiissutit pillugit peqqussutip allannguutaa naapertorlugu naleqqussarneqassalluni.

 

Peqqussutissatut siunnersuummi aalajangersakkanut ataasiakkaanut oqaaseqaatit

§ 1-mut

Nr. 1-mut

Suliniutissatut periarfissat saniatigut siunnersuutigineqarpoq piginnaanngorsaqqinniagaq piffissap piginnaanngorsaaqqinniarfiusup nalaani inuttut ineriartortitsinernut peqataanissamut periarfissinneqassasoq. Kommunit oqaloqatiginnittarnerit aqqutigalugit paasiniarumasarpaat inuttut suut ineriartorfissat piginnaanngorsaqqinniakkap atorfissaqartinnerai. Ilinniagaqarnissamut piukkunnarsaanermut suliniutit tassaasinnaapput ilinniagassat qinnuteqaateqartup sanngiiffiginerpaasaasa pikkorissarfigineqarnissaat, qinnuteqaateqartup ilinniagassat aallartinnissaannut kingorna pisinnaasaqarfigiligassai.

Inuussutissarsiutinut piukkunnarsaatissat tassaasinnaapput sivikinnerusumik suliffeqarfimmiinnerit; qinnuteqaateqartoq sulilernissamut piareersarumallugu.

Inuttut ineriartortitsiniutit tassaapput pikkorissarnerit inuttut ineriartorfiusussat. Kommunit ilaat tassunga tunngaasunik misilittaateqareerput paasineqarsinnaasimavorlu amerlanerit suliffittaartarsimasut namminnerlu akisusaaffimmik tigusaqarsinnaalersimasut. Pikkorissartitsisarnerit imaalillugit aaqqissuussaapput qinnuteqaateqartut anersaakkut ineriartortillugit suliffik ilinniakkalluunnit naammassinissaa isumagisinnaangorlugu.

Nr. 2-mut

Piginnaanngorsaqqissinnaaneq sioqqullugu qulaajagassat pillugit maleruagassat erseqqinnerusut nalunaarut aqqutigalugu Naalakkersuisunit aalajangersarneqarsinnaapput.

Kommunit piginnaanngorsaaqqissinnaaneq pillugu suliaat assigiiaarnerulersikkumallugit nalunaarummi pineqarsinnaapput piffissami qulaajaanerup nalaani suliniutissat suunissaannik nassuiaatit erseqqinnerusut, ilanngullugit suliniutit inuttut ineriartornissamut tunngasut suliniutillu inuussutissarsiutinut piukkunnarsaatit.

Nr. 3-mut

Aalajangersagaq ilanngunneqassaaq piffissami piginnaanngorsaaqqinniarnermi pineqartup ilinnialersinnaanerata erseqqinnerulersinnissaa siunertaralugu, ilanngullugu allamik ilinniagaqalersinnaaneq. Tamanna pissutaaqataassaaq pineqartup suliffimmiiginnarnissaa sulilersinnaalernissaaluunniit. Allamik ilinniagaqalerneq pineqartunut amerlasuutigut tunngaviussaaq suliffissanut sulilersinnaanissamut.

Nr. 4-mut

Siunnersuut aqqutigalugu pissutsit immikkut ittut atorunnaassapput piginnaanngorsaqqinniagaq suliffeqarfinni namminersortuni pisortanilluunniit pigineqartuni sungiusarnermik ilinniarnisamilluunniit neqeroorfigineqarsinnaalernissaanut akissarsiatigut tapiissuteqartitsiviusumik. Tassa neqeroorummi pineqarput piginnaanngorsaqqinniakkat tamarmik. Aalajangersakkami atuuttumi mattunneqarput inuit suliffeqarnermut attuumassuteqarsimanngitsut imaluunniit aapparisamik qitornarisanilluunniit pilersuinissamik pisussaaffeqanngitsut - suliffeqarfinni piginnaanngorsaaqqinniarnissaq pillugu neqeroorfigineqarnissamit. Taamatut killiliinneq aammattaaq atorunnaarsinneqarpoq.

Nr. 5 aamma 6-imut

Piginnaanngorsaaqqinnissamut ikiorsiissutit pillugit Inatsisartut peqqussutaanni § 10, imm. 1 naapertorlugu piffissaq piginnaanngorsaaqqinniarfiusoq tunngaviatigut ukiunit tallimanit sivisunerusinnaanngilaq. Siunnersuutigineqarpoq piffissaq piginnaanngorsaaqqinniarfiusoq allanngortinneqassasoq ukiunut marlunnut piginnaanngorsaaqqinniarneq "ilatsiinnarfiulissanngimmat". Piffissaq sivikinnerusoq atoraanni piginnaanngorsaaqqinniarnermut suliniarneq iliuuseqarnissamut samminerulersinneqassaaq, soorunalumi pineqartunut ataasiakkaanut malinnaatitsissutitut suliniuteqarfiusumik.

Aalajangersagarli periarfissiivoq ukiunit marlunnit sivitsuinissamut, pissutsit immikkut ittut atuutsillugit. Pineqartut ilaannut ilaasinnaavoq naatsorsuutigineqalissasoq piginnaanngorsaaqqinniarneqarneq ukiunit marlunnit sivisunerussasoq taakku suliffeqarfinni sulisinnaalernissaannut ilinnialersinnaalernissaannulluunniit piukkunnarsisillugit. Kommunip naammineq aalajangissavaa taakkuninnga oqaloqateqartareernikkut pissutsit immikkut ittut taakkununnga atuunnersut, ilanngullugit inuttut, peqqisutsikkut inuuniarnikkulluunniit pissutsit immikkut ittut pisariaqalersissimaneraat ukiut marluk sinnerlugit sivitsuisoqassanersoq.

Nr. 7-imut.

Kommunip akissarsianut tapiissutinut aningaasaliinissaanut tunngatillugu annerpaamik ukiumut ataasiakkaartumik tunniussisoqartassaaq pineqartoq taamaallaat ukiumut ataatsimut qulakkeeriffigalugu. Taamaattorli pineqartoq, kommunip - eqaannerusumik suliffimmut tapiissutit pillugit immikkut ittumik pisoqartillugu - sukumiisumik nalileereerneratigut, sivitsorneqarsinnaalluni. Mississorneqassaaq atugassarititaasut nalinginnaasut atorlugit piginnaanngorsaqqinnissaq aqqutigalugu suliffissaqalernissamut periarfissaqarnersoq, suliffik eqaannerusoq neqeroorutigineqalersinnagu.

Eqaannerusumik suliffilittut tapiissutisisartut naliliiffiginissaat kommuninut pisariaqarsinnaasassaaq, ilanngullugu aalajangerneqarsinnaanngorlugu piffissaq ukioq ataaseq sinnerlugu sivitsuisoqassanersoq. Tamanna pillugu aalajangersakkat sukumiinerusut nalunaarummi aalajangersarneqassapput Inatsisartut peqqussutaani § 17-imi inatsisitigut tunngavilimmik atuutilersumi.

 

§ 2-mut

Siunnersuutigineqarpoq peqqussut ulloq 1. juli 2006-mi atuutilissasoq.