Namminersornerullutik Oqartussat umiarsualiveqarfiutaannik sanaartorneq, aserfallatsaaliineq, ingerlatsineq il.il. pillugit Inatsisartut peqqussutaata allanngortinneqarneranik Inatsisartut peqqussutaat nr. 2, 27. marts 2006-imeersoq.
(Sulliffeqarfinnut namminersortunut sumiiffinni aalajangersimasuni umiarsualiveqarfimmi pisortatut oqartussaasutut suliassanik tunniussineq)
§ 1
Namminersornerullutik Oqartussat umiarsualiveqarfiutaannik sanaartorneq, aserfallatsaaliineq, ingerlatsineq il.il. pillugit Inatsisartut peqqussutaat nr. 4, 29. oktober 1999-imeersoq ima allannguuteqartinneqarpoq:
1. § 4 ima oqaasertaqassaaq:
"§ 4. Umiarsialiveqarnermi qitiusumik pisortatut oqartussaaneq Naalakkersuisut suliassarivaat.
Imm. 2. Naalakkersuisut Namminersornerullutik Oqartussat suliffeqarfiutaannut, suliffeqarfittut inatsisitigut namminersortutut pilersinneqartumut, aammalu umiarsualiveqarnermut imarsiornermullu attuumassutilinnik ilisimasaqartumut sumiiffinni aalajangersimasuni Namminersornersornerullutik Oqartussat umiarsualiveqarfiutaanni ataatsimi amerlanerusuniluunniit umiarsualiveqarfimmi pisortatut oqartussaasutut suliassanik isumaginnittussatut piginnaatitsisinnaapput. Naalakkersuisut suliffeqarfimmut namminersortumut taamatut piginnaatitsinini pisussaaffittut tunniussinnaavaa.
Imm. 3. Sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittuusoq Naalakkersuisut sinnerlugit aalajangiisinnaatitaavoq. Qitiusumik umiarsualiveqarfinnut pisortatut oqartussaasoq sumiiffinni aalajangersimasuni umiarsualiveqarfimmi pisortatut oqartussaasutut suliassanut isumaginnittuusumut ilitsersuinissamik piginnaatitaavoq aamma nakkutilliissuusussaalluni.
Imm. 4. Naalakkersuisut sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittuusut suliassaat pillugit aalajangersakkanik erseqqinnerusunik aalajangiisinnaatitaapput.
Imm. 5. Sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittuusup aalajangigai Naalakkersuisunut naammagittaalliutigineqarsinnaapput. Naammagittaalliutip tunniunneqarnissaanut killissarititaq tassaavoq aalajangiinerup naammagittaalliutigineqartup innuttaasumit tiguneqarneranit kingusinnerpaamik sapaatit akunneri sisamat qaangiunneranni.".
§ 2
Inatsisartut peqqussutaat manna 2006-imi maajip aallaqqaataani atortussanngortinneqarpoq.
Namminersornerullutik Oqartussat, ulloq 27. marts 2006
Hans Enoksen/
Jørgen Wæver Johansen