20. december 2005 UKIU 2006/13
Peqqussutissatut siunnersuummut oqaaseqaatit
Oqaaseqaatit nalinginnaasut
1. Aallaaqaasiut
Umiarsualiveqarnermut pisortatut oqartussaanerup ingerlanneqarneranut maleruagassat maanna atuuttut Namminersornerullutik Oqartussat nalunaarutaanni nr. 14-mi, 14. maj 2002-meersumi takuneqarsinnaapput. Aammattaaq KNI Pilersuisoq A/S aamma Royal Arctic Line A/S Namminersornerullutik Oqartussat umiarsualiveqarfiutaannik suliassatigullu pisortatut oqartussaanermik ingerlatsisinnaanerannut isumaqatigiissuteqarfigineqarnikuupput. Isumaqatigiissutit atuunnikuupput 1993-imi jannuaarip aallaqqaataanit, Royal Artic Line A/S-mut tapiliussartaqalersinneqarluni 1998-imi jannuarip 26-ianit aamma 1999-imi juunip 23-ianit.
Suliffeqarfinnut namminersortunut inatsisit tunngavigalugit pilersinneqartunut suliakkiisinnaaneq pineqarpoq, inatsimmillu piginnaatitsissummik immikkut ersarissakkamik pisariaqartitsisoqarluni. Inatsisartut Ombudsmandiat Naalakkersuisunut erseqqissaassuteqarnikuuvoq, inatsimmik piginnaatitsissut tamanna naammassineqarnikuunngitsoq.
Naalakkersuisut Inatsisartut Ombudsmandiata oqaaseqaatai tunuliaqutaralugit piginnaatitsinerup pisariaqartup qulakkeerneqarnissaanut suliniuteqarput, suliffeqarfinnut namminersortunut inatsisit tunngavigalit pilersinneqartunut suliakkiisinnaanissamut. Naalakkersuisut isumaqarput piginnaatitsissut tamanna pitsaanerpaamik qulakkeerneqassasoq, Namminersornerullutik Oqartussat umiarsualiveqarfiutaannik sanaartorneq, aserfallatsaaliineq, ingerlatsineq il.il. pillugit Inatsisartut peqqussutaanni nr. 4-mi 29. oktober 1999-imeersumi UKA 1999-imi imm. 24-mi suliarineqartumi § 4-mi oqaasertat allanngortinnerisigut
2. Allannguutissatut siunnersuummi pingaarnerutitat nassuiaatigineqarneratNamminersornerullutik Oqartussat nalunaarutaat nr. 14-mi, 14. maj 2002-meersumi oqaatigineqartutut Naaminersornerullutik Oqartussat umiarsualiveqarnermut qitiusumik pisortatut oqartussaaneq ingerlatarivaat. Peqqussutissamut siunnersuuteqarnikkut tamanna ersarissarneqarpoq.
1993-imili sulinermi najoqqutaavoq Royal Arctic Line A/S-ip aamma KNI Pilersuisoq A/S-ip sumiiffinni aalajangersimasuni umiarsualiveqarfinni pisortatut oqartussaasutut suliassanik isumaginnittuusarnerat. Umiarsualiveqarfinnik ingerlatsinermut aamma suliassatigut umiarsualiveqarfimmi pisortatut oqartussaasuseqarnermut Kalaallit Nunaanni Namminersornerullutik Oqartussat isumaqatigiissuteqarfiusullu akornanni isumaqatigissutaasut tunngavigineqartarput. Taamatut suliakkiinermut tunualiaqutaavoq pissutsini immikkut ittuni pingaartumillu pisariaqartutigut aamma inuttassaqarnikkut, atortussaqarnikkullu umiarsualivinni pineqartuni Royal Artic Line A/S imaluunniit KNI Pilersuisoq A/S allaffeqarlutillu inuttaqartitsereermata.
Peqqussutissatut siunnersuutikkut immikkut piginnaatitsisoqarpoq, Naalakkersuisut sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittoqarneq suliakkiissutigisinnaagaat. Taamaalilluni atituumik piginnaatitsisoqarpoq, Naalakkersuisunit suliffeqarfiit namminersortut soorlu Royal Arctic Line A/S aamma KNI Pilersuisoq A/S niuernikkut Namminersornerullutik Oqartussanit immikkut inissisimasut umiarsualiveqarfimmi pisortatut oqartussaaffeqarnermik ingerlatsisinnaanerannut.
Namminersortunut suliakkiinermi immikkut marloriaammik inatsisitigut tunngaveqarnissaq piumasaqaatigineqartarpoq. Taamaammat siunnersuutigineqarpoq Naalakkersuisut suliakkiisinnaasut pisussaaffittalimmik, aamma Naalakkersuisut sumiiffinni aalajangersimasuni umiarsualiveqarfimmi suliassanik isumaginnittutut pisortatut oqartussaaffeqartuusumut ilitsersuinissamik piginnaatitaasut, taamaalilluni qitiusumik umiarsualiveqarfinnut pisortatut oqartussaasoq namminersortunit piginnaatitsinerup ingerlanneqarneranut tamatigut ilitsersuisinnaallunilu nakkutilliisinnaassalluni.
Peqqussutissatut siunnersuutikkut erseqqissarneqarpoq, Naalakkersuisunit suliffeqarfik inatsisitigut namminersortutut pilersinneqartoq sumiiffinni aalajangersimasuni aamma suliassatigut umiarsualiveqarnermut pisortatut oqartussaaffeqarsinnaanermik suliakkerneqarsinnaasoq, suliffeqarfillu Naalakkersuisut sinnerlugit aalajangiisinnaatitaalluni.
Naak qitiusumik umiarsualiveqarnermut pisortatut oqartussaasoq sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittumut ilitsersuinissamut pisussaaffeqaraluartoq, siunnersuutigineqarpoq erseqqissarneqassasoq, Naalakkersuisut sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittumut malittarisassanik annertunerusunik aalajangersagaliorsinnaassasut. Tamanna siunnersuutigineqarpoq sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittuusup iliuuserisaani nalornissutaasinnaasut pinngitsoorniarlugit.
Siunnersuummi erseqqissarneqarpoq, sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittuusup aalajangigai pillugit naammagittaalliutit qitiusumit piginaatitsisunut naammagittaalliutigineqartassasut. Tamatuma kingunerisaanik innuttaasut inatsisitigut illersorneqarnerat qularnaarneqassaaq, naak allamut suliakkiisoqaraluartoq, Naalakkersuisummi tassaammata piginnaatitsinermik suliakkiisuusut, taamaalillutillu tassaallutik tunngaviatigut oqartussaasutut sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittuusup aalajangigai pillugit naammagittaalliutinik suliaqartussaasut. Naammagittaalliutip tunniunneqarnissaanut killissarititaq tassaavoq aalajangiinerup naammagittaalliutigineqartup tigusisussamit tiguneqarneranit kingusinnerpaamik sapaatit akunneri sisamat qaangiunneranni. Taamatut oqaasertaliinermut pissutaavoq, Kalaallit Nunaanni innuttaasut siaruarsimanerinut aamma nunap pissusaanut pissutsit immikkut ittut tigusisussamut akornutaatinniarneqanngimmata.
3. Inatsisinut allanut naleqqiussineqNaalakkersuisut sinnerlugit piginnaatitsisoqassappat, Naalakkersuisut pisortat ingerlatsineranni suliassat suliarineqartarnerat pillugu Inatsisartut inatsisaanni nr. 8-mi, 13. juni 1994-imeersumi (sullissisarneq pillugu inatsimmi) § 1 aamma pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaanni nr. 9-mi, 13. juni 1994-imeersumi (paasitinneqarsinnaatitaaneq pillugu inatsimmi) § 1, imm. 2 naapertorlugit maleruagassiussapput, sullissisarneq pillugu inatsimmi aamma paasitinneqarsinnaatitaaneq pillugu inatsimmi aalajangersakkat umiarsualiveqarfimmi pisortatut oqartussaasutut suliassanik isumaginnittuusup Naalakkersuisut sinnerlugit aalajangiinissamut piginnaatitaaffilerneqarneranut naleqquttumik atuutsinneqassasut.
4. Pisortanut aningaasaqarnikkut aamma allaffissornikkut kingunerisassai
4.1 Pisortanut aningaasaqarnikkut kingunerisassaiSiunnersuuteqarnikkut naatsorsuutigineqanngilaq Namminersornerullutik Oqartussanut aamma kommuneqarfinnut aningaasaqarnikkut sunniuteqassasoq.
4.2. Pisortanut allaffissornikkut kingunerisassaiSiunnersuuteqarnikkut naatsorsuutigineqanngilaq Namminersornerullutik Oqartussanut aamma kommuneqarfinnut allaffissornikkut sunniuteqassasoq.
5. Inuussutissarsiornermik ingerlatsisunut aningaasaqarnikkut aamma allaffissornikkut kingunerisassaiSiunnersuuteqarnikkut naatsorsuutigineqanngilaq inuussutissarsiornermik ingerlatsisunut aningaasarsiornikkut aamma allaffissornikkut sunniuteqartitsisoqassasoq.
6. Avatangiisinut aamma pinngortitamut tunngasunut sunniutissaiSiunnersuuteqarnikkut naatsorsuutigineqanngilaq avatangiisinut aamma pinngortitamut tunngasunut sunniuteqartitsisoqassasoq.
7. Allaffissornikkut innuttaasunut sunniutissaiSiunnersuuteqarnikkut naatsorsuutigineqanngilaq allaffissornikkut innuttaasunut sunniuteqartitsisoqassasoq.
8. Naalagaaffeqatigiinnermut aamma namminneernerulernissamut tunngasutSiunnersuuteqarnikkut naatsorsuutigineqanngilaq Naalagaaffeqatigiinnermut aamma namminneernerulernissamut tunngasutigut sunniuteqartitsisoqassasoq.
9. Oqartussaasunik kattuffinnillu tusarniaaneqSiunnersuut ukununnga tusarniaassutigineqarpoq: Royal Arctic Line A/S, KNI Pilersuisoq A/S aamma Inuussutissarsiornermut, Nunalerinermut Suliffeqarnermullu Pisortaqarfik. Inuussutissarsiornermut, Nunalerinermut Suliffeqarnermullu Pisortaqarfik taamaallaat ataasiinnarmik oqaaseqaateqarpoq, taannalu oqariartaatsimut tunngasuuvoq.
Peqqussutissatut siunnersuutip aalajangersagartaanut ataasiakkaanut oqaaseqaatit
§ 1-mut.Imm. 1-mut
Aalajangersakakkut ersarissarneqarpoq umiarsialiveqarnermi qitiusumik pisortatut oqartussaaneq Naalakkersuisut akisussaaffigigaat. Umiarsualiveqarnermi qitiusumik pisortatut oqartussaasup umiarsualiveqarnermi inatsisiliorneq suliassarivaa, tamatumanilu ilaalluni Aningaasanut Inatsimmi konto pingaarneq 73.02.01 Umiarsualiveqarnermi oqartussaaneq, sumiiffinnilu aalajangersimasuni umiarsualiveqarfinnik pisortatut oqartussaasunik isumaqatigiissuteqarnerit aqutarisussaallugit. Qitiusumik umiarsualiveqarnermi pisortatut oqartussaasut sumiiffinni aalajangersimasuni umiarsualiveqarfinnik pisortatut oqartussaasut aalajangigaannut naammagittaalliorfigineqartassapput.
Imm. 2-mutAalajangersagaq ersarissumik inatsisikkut piginnaatitsivoq, Naalakkersuisut suliffeqarfimmut inatsisitigut namminersortutut pilersinneqartumut sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittussanut suliakkiisinnaasut.
Suliakkiinissamut peqqutaasut immikkut ittuussapput, pingaartumik suliassatigut isumalluutitigullu tamatumunga tunngavissaqartoqarpat.
Sumiiffinni aalajangersimasuni umiarsualiveqarfimmi pisortatut oqartussaasutut suliassat ingerlatseqatigiiffinnut Namminersornerullutik Oqartussanit pigineqartunut Royal Arctic Line A/S-imut aama KNI Pilersuisoq A/S-imut, tassalu umiarsuarlivinni oqartussaasutut suliassanik isumaginnittooreersunut suliakkiissutigineqarsinnaassapput. Kisianni aamma Naalakkersuisut suliassanik ingerlatseqatigiiffinnut, Namminersornerullutik Oqartussat tamakkiisumik pigisaannut, suliffeqarfittut inatsisitigut namminersortutut pilersinneqarsimasunut suliakkiisinnaapput, ingerlatseqatigiiffik umiarsualiveqarnermut imarsiornermullu attuumassutilinnik ilisimasaqarpat. Tamatuma saniatigut suliassatigut isumalluutitigullu tunngavissaqartoqassaaq, assersuutigalugu ingerlatseqatigiiffiit umiarsualivinni pineqartuni allaffeqassallutik sulisoqassallutillu.
Sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittup suliassarivai umiarsualiveqarnermi maleruagassat qaqukkulluunniit atuuttut nakkutigissallugit, tamatumanilu ilaallutik akuersissutit, inassuteqaasiortarnissaq, angallatinik peersitsisarnissaq, umiarsualiveqarfimmi torersumik ingerlatsisoqarnera isumagissallugu, alapernaarsuineq nakkutiliinnerlu ingerlatissallugu, taarseeqqusissutinik piumasaqaateqartassalluni il.il.
Imm. 2-mi erseqqissaatigineqarpoq, Naalakkersuisut suliffeqarfimmut namminersortumut taamatut piginnaatitsinertik pisussaaffittut tunniussinnaagaat. Pisussaaffeqarnermut piumasaqaatip immikkoortua kingulleq pisariaqarpoq, Naalakkersuisut sumiiffinni aalajangersimasuni suliassatigut umiarsualiveqarfimmi pisortatut oqartussaaffeqartup ilitsersornissaanut nakkutiginissaanullu piginaatitaammata.
Sumiiffinni aalajangersimasuni umiarsualiveqarfimmi pisortatut oqartussaasutut suliassat isumaqatigiissuteqarnermi akilerneqassapput.
Imm. 3-mutSumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginninneq ingerlanneqassaaq Naalakkersuisut sinnerlugit, taakkua qitiusumik pisortatut oqartussaasuummata, imm. 1 naapertorlugu.
Qitiusumik umiarsualiveqarfinnut pisortatut oqartussaasoq sumiiffinni aalajangersimasuni suliassatigut umiarsualiveqarfimmi pisortatut oqartussaasumut sutigut tamatigut ilitsersuinissamik piginnaatitaavoq aamma nakkutilliissuussalluni. Tamanna ima paasineqassaaq, qitiusumik umiarsualiveqarfinnut pisortatut oqartussaasoq ilitsersuisinnaatitaassasoq, sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittup pisussaaffeqarnermi qanoq ingerlatsinissaanut, kiisalu qitiusumik umiarsualiveqarfinnut pisortatut oqartussaasoq piginnaatitsissutip ingerlanneqarneranik nakkutiliisuussasoq.
Imm. 4-mutSiunnersuutigineqarpoq Naalakkersuisut sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnitumut annertunerusumik aalajangersakkanik aalajangiisinnaatitaassasut. Taamatut pigiginaa-titsinermik siunnersuuteqarnikkut Naalakkersuisut ilaatigut pisortatut oqartussaaffiup ingerlanneqarneranik nakkutiliinermi malittarisassaliornissamut piginnaatinneqassapput, sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittumut ajunngitsorsiassaqartitsinermut tunngasuni, sumiiffinni umiarsualiveqarfimmi pisortatut oqartussaasutut suliassanik isumaginnitup sunik suliaqarnissaanut, tamatumunnga ilaallutik nakkutilliinermut misissuinermullu tunngasut, kiisalu qitiusumik umiarsualiveqarfinnut pisortatut oqartussaasumut pissutsit immikkut ittut nalunaarute-qartarnissaannut.
Imm. 5-imut
Siunnersuutigineqarpoq erseqqissaatigineqassasoq, sumiiffinni aalajangersimasuni umiarsualiveqarfimmi pisortatut oqartussaasutut suliassanik isumaginnittuusup aalajangigai pillugit naammagittaalliutit Naalakkersuisunut naammagittaalliutigineqartassasut. Naammagittaalliutip tunniunneqarnissaanut killissarititaq tassaavoq, naammagittaalliu-tigineqartumi aalajangiinerup innuttaasumit tiguneqarneranit kingusinnerpaamik sapaatit akunneri sisamat qaangiunneranni.
Peqqussut manna naapertorlugu aalajangikkap allakkatigoortumik "tigiuneqarnera" pisimassaaq, tigusisup pissutsit ileqqorineqartartut naapertorlugit aalajangiinerup imarisai pillugit ilisimasaqalernissamut periarfissaqalereersimappat. Tamanna tunngavigalugu peqqussut manna naapertorlugu aalajangiineq apuussimassutut naatsorsuutigineqassaaq, tigusisussamut tunniunneqareersimappat - toqqaannartumik tunniunneqarpat imaluunniit allakkanut nakkartitsivianut ilineqarpat. Tamatumanittaaq pineqarpoq postboksi allakkanik ullormoortumik allakkerivimmi/allakkerisarfimmi ilioraaviusartoq. Tamatumanittaaq pineqarput POST Greenlandip summiiffinni allakkeriveqanngitsuni suleqatigisai allakkanik aallerfiusinnaasut. Allagaq allaffiup matoreerneratigut tunniunneqartoq, aatsaat takkussimasutut naatsorsuutigineqassaaq ullup suliffiusup tulliuttup ullaakkuani, pissutsinik aalajangersimasunik takussutissartaqarsimanngippat allagaq siusinnersukkut aaneqarsimanersoq.
Aalajangigaq allakkasuartaatikkut imaluunnit assigisaatigut nassiunneqarsinnaaneratigut, aalajangigaq ulloq unnuarlu sukkulluunniit tigusisussamut nassiunneqarsinnaavoq, allakkasuartaat imaluunnit assigisaa qaminngasimanngippat, imaluunnit pappilissatigut unittoortoqarsimanngippat. Allakkasuartaatip uppernarsaateqarsinnaanikkut iluaqutigivaa, nalunaarut qanga tigusisussamut takkussimanersoq tamatigut takuneqarsinnaasarmat. Allakkasuartaatikkut aamma tunngavisiisoqarsinnaavoq, aalajangigaq allaffiup ileqquusutut ammasarfia sioqqullugu apuussinnaasarmat.
§ 2-mut
Siunnersuutigineqarpoq Inatsisartut peqqussutaat 2006-imi maajip aallaqqaataani atortussanngortinneqassasoq.