5. marts 2006

UKIU2006/13

 

Namminersornerullutik Oqartussat umiarsualiveqartiutaanik sanaartorneq,   aserfallatsaaliuineq, ingerlatsineq il. il. pillugit Inatsisartut peqqussutaata allanngortinneqarneranik Inatsisartut peqqussutaannut nr. xx, ulloq xx-imeersumut siunnersuut

pillugu

Inatsisartut Ineqarnermut Attaveqaqatigiinnermullu Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

 

Inatsisartut ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Godmand Rasmussen, Atassut, siulittaasoq
Inatsisartunut ilaasortaq Agathe, Fontain, Inuit Ataqatigiit , siulittaasup tullia
Inatsisartunut ilaasortaq Agnethe, Davidsen, Siumut
Inatsisartunut ilaasortaq Tommy, Marø, Siumut
Inatsisartunut ilaasortaq Esmar, Bergstrøm, Demokraatit

Inatsisartut Ineqarnermut Attaveqaqatigiinnermullu Ataatsimiititaliaata Inatsisartut peqqussutaataa allanngortinneqarneranik Inatsisartut peqqussutissaattut siunnersuummik siullermeerinerup kingorna siunnersuut oqaaseqaatitai ilanngullugit misissuataarpaaa.

Siunnersuutip imarisaa.

Inatsisartut Ombudsmandiannit oqaatigineqartut tunngavigalugit Inatsisartut peqqussutaanni inatsisitigut toqqammaviusumik ersarissaasoqartariaqarnera Naalakkersuisut pisariaqartissimagaat Inatsisartut Ineqarnermut Attaveqaqatigiinnermullu Ataatsimiititaliaata paasivaa. Najukkani umiarsualivinnik oqartussaasuulluni ingerlatsineq Namminersornerullutik Oqartussanut niuernikkut inissisimanermut sanilliullugu suliffeqarfinnut namminersortunut attuumassuteqanngitsunut Naalakkersuisut suliakkiisinnaanerisa qulakkeernissaannut Naalakkersuisut immikkut tunngavissinneqarnissaat pisinnaatitaanissaallu siunertaralugu.

Tusarniaaneq

Siunnersuut Royal Arctic Line A/S-imut, KNI Pilersuisoq A/S-imut Inuussutissarsiornermut, Nunalerinermut Suliffeqarnermullu Pisortaqarfimmullu tusarniaassutigalugu nassiunneqarsimasoq ataatsimiititaliap oqaatigissavaa. Inuussutissarsiornermut, Nunalerinermut Sulisoqarnermullu Pisortaqarfik oqaatsitigut iluarsiissuteqaqqusinissamut peqqutissaqarsimavoq. Tusarniaavigineqartut allat oqaaseqaatissamut peqqutissarsisimanngillat.

Ataatsimiititaliap inassuteqaataa

Ataatsimiititaliami amerlanerussutillit Siumut, Inuit Ataqtigiit aamma Atassut siunnersuutip akuersissutigineqarnissaa inassutigaat. Umiarsualivinnik oqartussaanerup suliakkiutiginissaanut tunngavissamik qulakkeerinissaq Naalakkersuisut allannguutissatut siunnersuummik saqqummiusaata periarfissimmagu tamanna pissusissamisoortuusoq amerlanerussutillit isumaqarput. Tamatuma saniatigut sinerissami umiuarsualivinni pisortaasut atuuffimminnut paatsuugassaanngitsumik maannakkumiit umiarsualivinnik oqartussaanermik ingerlatsisinnaanerat inatsisitigut tunngavissinneqarmat amerlanerussuteqartut nuannaarutigaat. Tunniussinerup malitsigisaanik suliffeqarfiit namminersortut aalajangiineri eqqarsaatigalugit innuttaasut naammagittaalliorsinnaanermut periarfissinneqarnerat Naalakkersuisut peqqussummi allassimagaat amerlanerussuteqartut maluginiarpaat. Tamanna pitsaasuusoq amerlanerussuteqartut isumaqarpuq aalajangersakkammi innuttaasut inatsisitigut illersorneqarnerat aamma patajaallisaaveqatigaa.

Ikinnersussuteqartut Demokraatit siunnersuut itigartitsissutigineqassasoq inassutigaat.

Demokraatit siunnersuut arlalinnik peqquteqartumik itigartippaat. Soqutigisaqaqatigiit amerlanerusut tusarniaanermut ilaatinneqarsimanngimmata Demokraatit pissusissamisuunngitsutut isumaqarfigaat. Peqqussutissatut siunnersuummut qanoq isumaqarnersut umiarsualivitsinnik atuisartut allat tusarniassallugit aamma naleqqulluartuusimassagaluarpoq. Suliffeqarfiit namminersortut aalajangiinerini aalajangikkat inerniliussallu pillugit naammagittaalliutinik Naalakkersuisut allannguisinnaanermut oqartussaasuusunerat Demokraatit aamma ajuusaarutigigitsik oqaatigissavaat.

Inatsisartut aalajangiinissaminnut tunngammavigissaanerunissaat qulakkeerumallugu illuatungerisat naleqquttut tamakkerlugit tamakkiisuusumik tusarniarneqaqqaarniassammata siunnersuummik Inatsisartut aappassaaneerinissaat UKA06-imut kinguartinneqarnissaa Demokraatit aammaarlutik kaammattuutigissavaat.

Taama oqaaseqarluni Inatsisartut Ineqarnermut Attaveqaqatigiinnermullu Ataatsimiititaliaata Inatsisartut peqqussutaata allanngortinneqarnera pillugu Inatsisartut peqqussutissaattut siunnersuut Inatsisartunit aappassaaniigassanngortippaa.

 

	Godmand Rasmussen, Siulittaasoq
Agathe Fontain, Siulittaasup tullia		Agnethe Davidsen
Tommy Marø		Esmar Bergstrøm