Pisassat akileqquneqartarnerannik akiliisitsiniartarnermillu kommunit suleqatigiinnerat pillugu Inatsisartut inatsisaat nr. 4, 12. maj 2005-imeersoq
Akiligassiisarneq aamma akiliisitsiniartarneq
§ 1. Kommunalbestyrelsip, akiligassiissutinik akiligassiisarnermik akiliisitsiniartarnermillu kommunalbestyrelsip inatsisit naapertorlugit isumagisaanik kommunalbestyrelsi alla imaluunniit Akileraartarnermut Pisortaqarfik isumaqatigiissuteqarnikkut tamakkiisumik ilaannakuusumilluunniit isumaginnittussatut piginnaatissinnaavaa.
Imm. 2. Imm. 1 malillugu piginnaatitsissummi ilaavoq kommunalbestyrelsip suliakkiisup akiliisitsiniarnermi pinngitsaaliissutinik inatsisit naapertorlugit atuisinnaatitaanera.
Imm. 3. Imm. 1 malillugu piginnaatitsisoqarnerani arsaarinninnissamik suliassat akiliisitsiniartartumit kommunimi piginnaatinneqartumi atorfeqartitaasumit suliarineqassapput. Akileraartarnermut Pisortaqarfik suliamut piginnaatinneqarpat, kommunip suliakkiisup Akileraartarnermut Pisortaqarfimmi atorfeqartitaasoq akiliisitsiniartartutut toqqagassanngortissinnaavaa.§ 2. § 1 malillugu piginnaatitsissummi ilaasinnaapput kommunalbestyrelsip akiligassiissutinik akiligassiinermut akiliisitsiniarnermullu atatillugu ernianik, akiliisitsissutinik akitsuutinillu inatsisit malillugit akiligassiisinnaatitaanera.
§ 3. § 1 malillugu piginnaatitsissummi aalajangersakkami, akiitsoqartup kommunimi suliakkerneqartumiittup taamaallaat arsaarinnissuteqarnissaq pillugu, kommunimi najugarisami imaluunniit kommunimi angerlarsimaffigisami aningaasarsiornikkut pissutsit atugai assigisaalluunniit pillugit apersuinissaq siunertaralugu aggeqquneqarsinnaaneranik aalajangersakkamik imaqassaaq.
§ 4. § 1 malillugu piginnaatitsissut Akileraartarnermut Pisortaqarfimmit akuersissutigineqarsimassaaq, taanna kommunimi maleruagassat allat assigalugit pisortatigoortumik nalunaarutigineqartarnerattuulli tusarliunneqassaaq.
Imm. 2. Imm. 1 malillugu piginnaatitsineq taamaallaat akiitsulimmut aalajangersimasumut imaluunniit akiligassiissutinut aalajangersimasunut imaluunniit akiitsoqartunut aalajangersimasunut attuumassuteqarpata taava kommunip suliakkiisup, inuit akiitsoqartut ataasiakkaat toqqaannartumik allakkatigut piginnaatitsisimaneq pillugu nalunaaruteqarfigissavai.
Naammagittaalliorneq
§ 5. Aalajangiinermut naammagittaalliuut taanna § 1 naapertorlugu piginnaatitsissut malillugu aalajangiinerutillugu, pisortatut oqartussaasumut naammagittaalliutigineqarsinnaavoq, kommunalbestyrelsep suliakkiisup aalajangiinerinut naammagittaalliorfissaasutut taasamut.
Imm. 2. § 1 naapertorlugu piginnaatitsissut malillugu aalajangiinerit kommunalbestyrelsemut suliakkiisumut naammagittaalliuutigineqarsinnaanngillat.
Imm. 3. Aalajangiinermut naammagittaalliuutit tigusat taakkualu aalajangiivigineqarneri pillugit kommunalbestyrelsimut suliakkiisumut, suliamut piginnaatinneqartup tamatigut nalunaaruteqarnikkut naammassineqarnissaa isumagissavaa.
Paasissutissanik piumasaqarsinnaaneq
§ 6. Kommunalbestyrelsip imaluunniit Akileraartarnermut Pisortaqarfik, § 1 naapertorlugu piginnaatinneqarsimasup, kommunalbestyrelsip imaluunniit Akileraartarnermut Pisortaqarfiup akiligassiissummik akiliisitsiniarnissamilluunniit suliassamik suliaqarnissaanut atatillugu kommunalbestyrelsi suliakkiisoq, paasissutissanik suliap suliarineqarnissaanut pisariaqartinneqartunik piumasaqarfigisinnaavaa.
Imm. 2. Kommunalbestyrelsip kommunalbestyrelsimik allamik imaluunniit Akileraartarnermut Pisortaqarfimmik § 1 naapertorlugu piginnaatitsisimasup, kommunalbestyrelsip suliassamik suliaqarnissaanut atatillugu kommuni piginnaatinneqartoq imaluunniit Akileraartarnermut Pisortaqarfik paasissutissanik, piginnaatinneqarnini tunngavigalugu pissarsiarisimasaanik piumasaqarfigisinnaavaa.
Imm. 3. Kommunalbestyrelsip imaluunniit Akileraartarnermut Pisortaqarfiup § 1 naapertorlugu piginnaatinneqarsimasup, kommunalbestyrelsip imaluunniit Akileraartarnermut Pisortaqarfiup akiligassiissummik akiliisitsiniarnissamilluunniit suliassamik suliaqarnissaanut atatillugu paasissutissat, kommunalbestyrelsip suliakkiisup suliamik suliaqarsimasuuguni pisortatut oqartussaasunut namminersortunullu inatsisit malillugit qinnutigisinnaasaralui qinnutigisinnaavai.
Atuutilerfissaq
§ 7. Inatsisartut inatsisaat ullormi 1. juli 2005-imi atortuulissaaq.
Namminersornerullutik Oqartussat, ulloq 12. maj 2005
Hans Enoksen/
Josef Motzfeldt
Isumaliutissiissut (Aappassaaneerinninneq)