25. april 2005 UPA 2005/18
Kommunit akiligassiissutinik akiligassiisarneq akiliisitsiniartarnerlu pillugit suleqatigiinnissaat pillugu Inatsisartut inatsisissaattut siunnersuut
pillugu
Inatsisartut Akileraartarnermut Akitsuusiisarnermullu Ataatsimiititaliaata
ISUMALIUTISSIISSUTAA
Siunnersuutip aappassaaneerneqarnerani saqqummiunneqartoq
Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Kalistat Lund, Siumut, siulittaasoq
Inatsisartunut ilaasortaq Agathe Fontain, Inuit Ataqatigiit, siulittaasup tullia
Inatsisartunut ilaasortaq Simon Olsen, Siumut
Inatsisartunut ilaasortaq Augusta Salling, Atassut
Inatsisartunut ilaasortaq Per Skaaning, Demokraatit
UPA 2005-imi siullermeerinerup kingorna siunnersuut matumani pineqartoq Inatsisartut Akileraartarnermut Akitsuusiisarnermullu Ataatsimiititaliaata suliaraa.
Siunnersuutip imarisaiInuuttaasut akiitsuinik akiligassiisarneq akiliisitsiniartarnerlu taassumalu nassatarisaanik ernialersuisarneq, akiligassiisarneq akitsuusiisarnerlu pillugit kommunit suleqatigiinnissamik isumaqatigiissusiorsinnaanerat siunnersuut manna aqqutigalugu tunngavissinneqarpoq.
Siunnersuutip matuma akuersissutigineqarnerata kingorna inuttaasunit pisassarisanik akiligassiissutiginnittarnermik akiliisitsiniartarnermillu suliassap tamakkiisup ilaannakuusulluunniit isumaginissaanut kommunalbestyrelsip aalajangersimasumik isumaqatigiissuteqarnikkut kommunalbestyrelsi alla Akileraatarnermulluunniit Pisortaqarfik piginnaatissinnaavaa. Suleqatigiinnerit taamaattut pillugit isumaqatigiissutit Akileraartarnermut Pisortaqarfimmit akuerineqartussaapput.
Oqartusssaasup suliassamik suliarinnittussanngorlugu suliakkerneqartup pineqartumut maleruagassat atuuttooreersut naapertorlugit suliakkiissut pingaarnertut isumagissavaa. Tassunga ilanngullugu pinngitsaaliissummik akiliisitsiniartarnermi iliuutsit kommunini atugaareersut atorneqarsinnaassapput.
Siunnersuutip kingunerisaanik suliassat ataatsimoortinneqarnerisigut kommunini akiliisitsiniartarnermik suliassaq sunniuteqarnerusumik eqaannerusumillu ingerlanneqarsinnaalissasoq Naalakkersuisut naatsorsuutigaat, taamaaliornikkullu inuuttaasut pisortanut tamakkiisumik akiitsuisa appartinneqarsinnaanissaat naatsorsuutigineqarluni.
Aningaasatigut kinguneqaatissatPisassarisanik akiligassiisarneq akiliisitsiniartarnerlu pillugit kommunit suleqatigiinnerat ersarinnerusumik immikkut annertussusilerneqanngitsumik kommunit allaffissornikkut sipaaruteqarnissaannut periarfissiisinnaavoq. Siunnersuutip kingunerisaanik pisassarisanik akiligassiisarnermik akiliisitsiniartarnermillu kommunit ingerlatsinerannik neriuutiginartutut pitsanngortitsineq innuttaasut pisortanut ataatsimoortumik akiitsuisa appartinneqarsinnaanerannik aamma nassataqarsinnaasoq naatsorsuutigineqarsinnaavoq.
Danskit inatsisaannut attuumassuteqarneqKommunit akiligassiissutinik akiligassiisarneq akiliisitsiniartarnerlu pillugit suleqatigiinnissaat pillugu inatsit nr. 52, 31. januar 2001-imeersoq Inatsisartut inatsisissaattut siunnersuutip matuma ilaatigut assigaa.
Tusarniaanermit akissutisiatSiunnersuut matumani pineqarpoq tusarniaanemut akissuteqarnissamut 20. december 2004 killiliullugu KANUKOKA-mut, Aningaasaqarnermut Pisortaqarfimmut, Naalakkersuisut Allattoqarfiannut aammalu Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfimmut ulloq 12. november 2004-mi tusarniaassutigalugu nassiunneqarpoq. Tusarniaaffigineqartussaatitaasut siunnersuummik naliliinissaannut naammaginartumik piffissalerneqarsimasut Akileraartarnermut Akitsuusiisarnermullu Ataatsimiititaliap iluarisimaarlugu maluginiarpaa.
Tusarniaanermit akissutigineqartut ilusiliinermut annertunerpaamik attuumassuteqartut aammalu tusarniaaffigineqartut oqaaseqaataat naammaginartumik annertussusilimmik ilanngunneqarsimasut ataatsimiititaliap paasivaa. Tamatuma saniatigut tusarniaanermit akissutisiat ataatsimiititaliap oqaaseqaateqarnissaanut pissutissaqalersitsinngillat.
Akileraartarnermut Akitsuusiisarnermullu Ataatsimiititaliap inassuteqaataaSiunnersuut saqqummiutissallugu pissutissaqarluartoq Akileraatarnermut Akitsuusiisarnermullu Ataatsimiititaliaq isumaqatigiittoq isumaqarpoq matumuunalu inassutigissallugu siunnersuut saqqummiunneqarnermisut iluseqarluni Inatsisartunit akuersissutigineqassasoq.
Jørgen Wæver Johansen,
SiulittaasoqAgathe Fontain
Simon Olsen
Augusta Salling
Per Skaaning