31. januar 2005 UPA 2005/18
Inatsisissatut siunnersuummut oqaaseqaatit
Oqaaseqaatit nalinginnaasut
Inatsisissamut siunnersuutip tunngavia
Akiligassiisarnermik akiliisitsiniartarnermillu suliaqarnermi sulisorisatigut nukiit pitsaanerusumik atorneqarnissaat periarfissiuunniarlugu siunnersuutigineqarpoq kommunit imaluunniit Akileraartarnermut Pisortaqarfik tassuunakkut suleqatigiinnissaasa inatsisitigut periarfissiuunneqarnissaat.
Inatsisissamut siunnersuutip imarisaaSiunnersuutikkut periarfissiuunneqassaaq kommunalbestyrelsip, akiligassiissutinik kommunalbestyrelsip inatsisit malillugit akiligassiissutigisinnaasaanik akilersinniarsinnaasaanillu kommunalbestyrelsi alla imaluunniit Akileraartarnermut Pisortaqarfik tamakkiisumik ilaannakuusumilluunniit akiligassiisarnissamik akiliisitsiniartarnissamillu isumaginnittussanngorlugu piginnaatissinnaassagaa. Siunnersuutigineqartup innuttaasunut inatsisitigut sunniutissai erniinnartumik sunniuteqalissammata, siunnersuutigineqarpoq piginnaatitsineq Akileraartarnermut Pisortaqarfimmit akuersissutigineqartassasoq.
Inatsisissatut siunnersuutikkut periarfissiuunniarneqarpoq kommunalbestyrelsip ataatsip kommunalbestyrelsilluunniit arlaqartut, kommunalbestyrelsit peqataasut arlaata imaluunniit Akileraartarnermut Pisortaqarfik kommuni alla kommunilluunniit allat sinnerlugit akiligassiisarnissamik akiliisitsiniartarnissamillu tamakkiisumik ilaannakuusumilluunniit isumaginninnissaanik isumaqatigiissuteqarnissaat. Isumaqatigiissut taamaattoq tunngavigalugu akiitsoqartoq, assersuutigalugu kommunip najugaqarfigisaata akiligassiissumminik pisassaqarfigisaa, kommunimit imaluunniit Akileraartarnermut Pisortaqarfimmit isumaqatigiissut malillugu akiligassiisarnermik akiliisitsiniartarnermillu isumaginnittussamit akileeqquneqarsinnaavoq.
Kommunalbestyrelsi imaluunniit Akileraartarnermut Pisortaqarfik akiligassiisarnissamik akiliisitsiniartarnissamillu isumaginnittussatut piginnaatinneqartoq inatsisit malillugit pinngitsaaliissummik unerartitsinissamut sakkussanik atuisinnaatitaassaaq, soorlu aningaasarsianit unerartitsinikkut, aningaasanit pisassanit ilanngartuinikkut, ilanngaassinikkut, akiliisinnaajunnaartutut nalunaarutiginnissummik tunniussinikkut. Aamma kommunimi imaluunniit Akileraartarnermut Pisortaqarfimmi akiliisitsiniartarnissamik piginnaatinneqartumi akiliisitsiniartartoq inatsisini maleruagassat nalinginnaasut naapertorlugit arsaarinnissinnaatitaassaaq. Akiliisitsiniartartup sumiiffimmini pisinnaatitaanera pillugu maleruagassat nalinginnaasut tassuunakkut avaqqunneqassapput, tassami akiliisitsiniartartoq kommunimi piginnaatinneqartumi imaluunniit Akileraartarnermut Pisortaqarfimmi atorfeqartitaasoq piginnaatitsisoqarneratigut innuttaasut suliffeqarfiillu kommunimi suliakkiisumi angerlarsimaffeqartut arsaarinnissuteqarfiginissaannik suliassanik suliaqarsinnaatitaassammat.
Kommunalbestyrelsip piginnaatinneqartup ulluinnarni piginnaatitaaffimmik isumaginninnissavik kommunip allaffeqarfianut, kommunit taakku marluk akiligassiissutaannik akiligassiisarlunilu akiliisitsiniartartussamut ingerlateqqissavaa. Arsaarinninnissamik suliassat naammassineqarnissaat akiliisitsiniartartumit ataatsimit akiliisitsiniartartunilluunniit arlaqartunit kommunimi piginnaatinneqartumi atorfeqartitaasunit isumagineqassaaq. Imaappat akiliisitsiniartarnermik suliassaq Akileraartarnermut Pisortaqarfimmut suliakkiutigineqarsimatillugu, taava kommunalbestyrelse piginnaatitsisuusoq Akileraartarnermut Pisortaqarfimmi atorfeqartitaasoq akiliisitsiniartartutut toqqagassanngortissinnaavaa, tassa kommunini akiliisitsiniartartunik toqqaasarneq kommunalbestyrelsep suliassaqarfiisa ataani inissisimammat. Periarfissatut allatut kommunalbestyrelsep piginnaatitsisuusup arsaarinninnissamik suliassat Akileraartarnermut Pisortaqarfimmut suliakkiutiginngiinnarsinnaavai, taassumalu kingorna kommunip nammineerluni illoqarfimmini akiliisitsiniartartumik atorfeqartitsinini attatiinnassallugu.
Akiligassiisarneq akiliisitsiniartarnerlu pillugit suleqatigiinnissamik isumaqatigiissuteqartoqarneratigut pisortatut oqartussaasunik nutaanik pilersitsisoqartussaanngilaq. Akiligassiisarnissamut akiliisitsiniartarnissamullu akisussaaneq pingaarneq kommunalbestyrelsip suliakkiisup pigiinnassavaa.Tassa imaappoq kommunalbestyrelsi piginnaatinneqartoq imaluunniit Akileraartarnermut Pisortaqarfik, kommunalbestyrelsip suliakkiisup akiligassiissutaanik akiligassiiguni akiliisitsiniarunilu kommunalbestyrelsi suliakkiisoq sinnerlugu taamaaliussaaq.
Piginnaatitaaneq akisussaanerlu kommunalbestyrelsip suliakkiisup attatiinnartussaammagit, kommunalbestyrelsip suliakkiussinini, matumani aamma sulianut ataasiakkaanut tunngatillugu, qaqugukkulluunniit tamakkiisumik ilaannakuusumilluunniit atorunnaarsissinnaavaa.
Kommunalbestyrelsip suliakkiisup maleruagassat atuuttut periarfissarititaasa iluanni nakkutigisinnaallugulu nakkutigisussaavaa suliassaq qanoq isumagineqarnersoq. Nakkutilliineq taanna soorlu ilitsersuinikkut aamma utertitseqqusinikkut (tassa pisortatut oqartussaasup suliassaq pisortatut oqartussaasup allap suliassaralua nammineerluni suliariumallugu imaluunniit suliakkiussineq atorunnaarsikkumallugu aalajangerpat) pisinnaavoq.
Piumasaqaataavoq kommunalbestyrelsip suliakkiisup, suliakkiineq apeqqutaatinnagu akiligassiisarnermik akiliisitsiniartarnermillu suliat isumagineqarnerannut piumasaqaatinik pingaarnernik aalajangersaasarnini ingerlatiinnassagaa. Suliassat isumagineqarnissaannut piumasaqaatit akiliisitsiniartarnissamik pilersaarutini assigisaannilu maannakkutuut aalajangersarneqarsinnaassapput.
Kommunalbestyrelsip suliakkiisup suleqatigiinnerup pilersinneqartup innuttaasunut ilisimatitsissutigineqarnissaa akisussaaffigaa. Aamma kommunalbestyrelsip suliakkiisup akisussaaffigaa suleqatigiinnerup allannguutai kiisalu suleqatigiinneq kipitinneqassagaluarpat taakkua innuttaasunut ilisimatitsissutigineqarnissaat.
Akiligassiisarneq akiliisitsiniartarnerlu pillugit suleqatigiinnerup innuttaasunut, soorlu arsaarinnissuteqarnissaq imaluunniit aningaasarsiornermut tunngasunik apersuinissaq pillugu akiitsoqartunik aggersaasoqarneratigut immikkut aningaasartuutaannginnissaa qulakkeerniarlugu aalajangerneqarpoq aggersaaneq taamaattoq taamaallaat kommunimi akiitsoqartup najugaqarfigisaani imaluunniit kommunimi angerlarsimaffigisaani pisinnaassasoq.
Akiligassiisarnissamik akiliisitsiniartarnissamillu piginnaatitaanerup nalinginnaasumik nuunneqarsinnaanerata saniatigut aamma siunnersuutikkut periarfissiisoqarpoq kommunip inummut suliffeqarfimmulluunniit kommunimi allami najugaqartumut angerlarsimaffeqartumulluunniit akiligassiissuteqartup kommuni najugaqarfigineqartoq angerlarsimaffigineqartorluunniit isumaqatigiissuteqarfigisinnaassagaa, kommuni akiligassaqarfik sinnerlugu akiligassiissummik taassuminnga akiligassiillunilu akiliisitsiniassasoq. Assersuutigalugu akiitsoqartoq kommunimiit kommunimut allamut nuussimaguni, taava kommunimut siusinnerusukkut najugaqarfigisimasaminut akiitsuminik kommunimit najugaqarfigilikkaminit akileeqquneqarsinnaavoq.
Taamaattoqartillugu kommunit akiliisitsiniartarnermik ikioqatigiillutik maannakkut suleqatigeereerput, kommunilli suliassani ataasiakkaani taamaattuni imminnut ikiorsinnaanerisa inatsisitigut erseqqissumik periarfissiuunneqarnissaat naleqquttutut isigineqarpoq.
Akiligassiissutinik akiligassiisinnaanermik akiliisitsiniarsinnaanermillu nuussisinnaanerup saniatigut aamma ernianik, akiliisitsissutinik akitsuutinillu akiligassiisinnaanermik nuussisinnaaneq akiligassiissutinik akiligassiisarneq akiliisitsiniartarnermullu atatillugu siunnersuutikkut periarfissinneqarpoq.
Akiliisitsiniartarnermik tamarmiusumik suliaqarnerup kommunalbestyrelsimut allamut imaluunniit Akileraartarnermut Pisortaqarfimmut isumagisassanngortinneqarsinnaanera tassuunakkut qulakkeerneqassaaq.
Pisortanut aningaasatigut allaffissornikkullu sunniutissaiAkiligassiisarneq akiliisitsiniartarnerlu pillugit suleqatigiissinnaaneq kommuninut periarfissaassaaq allaffissornikkut sipaaruteqarfiusinnaasoq. Pisortat sipaarutigisinnaasaasa suleqatigiinnerup qanoq annertutigineranik peqquteqassaaq, taamaattumik siuningaaraluni sipaarutissat taakku erseqqissumik naatsorsorneqarsinnaanngillat. Taamaakkarluartorli inatsisip periarfissaritai atorluaraanni kommunip suliakkiisup tamatuminnga suliaqarnerminut aningaasartuutaasa pingajorarterutaasa missinginik sipaaruteqartoqarsinnaanera aallaaviusinnaassangatinneqarpoq.
Inatsisissatut siunnersuut aamma kommunit akiligassiisarnermik akiliisitsiniartarnermillu pilersaarusiortarnerannik pitsanngorsaanissamut eqaallisaanissamullu periarfissiissaaq, taamatullu akiitsoqarfigisat tamakkiisut annertussusaannik annikillisitsisinnaassallunittaaq. Nali eqquuteqqissaartoq taaneqarsinnaanngilaq, tassunga akiitsut tamakkiisut ineriartornerisa aamma innuttaasut pisortanut akiitsoreriikkamik akilersornissaanut periarfissaat, siunissamut nunatsinni aningaasaqarniarnerup inissisimanerata ineriartorneranik tunngaveqarmatattaaq.
Kommunit akiligassiisarneq akiliisitsiniartarnerlu pillugit suleqatigiissinnaanerannik atuineq kommunit qarasaasiatigut atortuinik naleqqussaanermut aningaasartuuteqarnissamik nassataqarsinnaavoq.
Namminersorlutik inuussutissarsiuteqartunut aningaasatigut allaffissornikkullu sunniutissatSiunnersuut inuussutissarsiortut aningaasarsiornerannut inuussutissarsiortulluunniit allaffissornerannut sunniuteqartussaanngilaq.
Avatangiisinut pinngortitamullu sunniutissatInatsisissatut siunnersuut avatangiisinut pinngortitamulluunniit sunniuteqartussaanngilaq.
Innuttaasunut allaffissornikkut sunniutissatSiunnersuutip innuttaasunut allaffissornikkut sunniuteqarnissaa naatsorsuutigineqanngilaq.
Naalagaaffeqatigiinnermut namminersulernissamullu tunngasutInatsisissatut siunnersuut naalagaaffeqatigiinnermut namminersulernissamulluunniit tunngatillugu akornutissartaqanngilaq.
Pisortanik kattuffinnillu tusarniaaneqInatsisissatut siunnersuut Naalakkersuisut Allattoqarfiannut (Nunami namminermi pissutsinut Allaffimmut), Aningaasaqarnermut Pisortaqarfimmut aamma KANUKOKA-mut tusarniaassutigineqarnikuuvoq.
Naalakkersuisut Allattoqarfiat (Nunami namminermi pissutsinut Allaffik) aamma KANUKOKA inatsisissamut siunnersuummut oqaaseqaateqarsimanngillat. Aningaasaqarnermut Pisortaqarfiup inatsisissamut siunnersuummut oqaaseqaatai aningaasatigut sunniutissanut attuumassuteqarneri naapertorlugit inatsisissap pisortanut sunniuteqaatissanut ilanngullugit suliarineqarsimapput.
Inatsisissatut siunnersuummi aalajangersakkanut ataasiakkaanut oqaaseqaatit
§ 1-imut
Imm. 1-imi aalajangersakkap imaraa kommunalbestyrelsip kommunalbestyrelsi alla imaluunniit Akileraartarnermut Pisortaqarfik, akiligassiisarnermik akiliisitsiniartarnermillu kommunalbestyrelsip inatsisit naapertorlugit isumagisaanik tamakkiisumik ilaannakuusumilluunniit isumaginnittussatut isumaqatigiissuteqarnikkut piginnaatissinnaagaa.
Akiligassiissutit suulluunniit kommunalbestyrelsip akiligassiissutigisinnaallugillu akilersinniarsinnaasamisut piginnaatitaaffigisai tamarmik suliakkiissutigineqarsinnaapput. Suleqatigiinnissamik isumaqatigiissutit nalinginnaasut imaluunniit akiliisitsiniarnermik suliassat ataasiakkaaginnaat isumaqatigiissutigineqarsinnaapput. Aammattaaq kommunalbestyrelsit akiligassiisarnissamik akiliisitsiniartarnissamillu suliassanik imminnut suliakkertarsinnaapput.
Akiligassiisarnermik suliaqarneq tassaavoq innuttaasunut suliffeqarfinnullu akiligassiissutinik akiligassanillu il.il. nassiussuineq akiliinerlu piffissaritap iluani pinersoq pillugu nakkutilliineq kiisalu kingusinnerusukkut pisariaqassappat akileeqqusilluni allakkanik nassiussuineq. Tassa imaappoq akiligassiisarnermik suliaqarneq tassaavoq ingerlatsineq kommunit, kommunalbestyrelsit nunaqarfinnilu aqutsisut pillugit Inatsisartut inatsisaanni (aqutsinermut inatsimmi) malillugu maannamut isumaqatigiissutigisinnaasaat. Siunnersuutip matuma Akileraartarnermut Pisortaqarfimmut suliakkiissummik ingerlatsisoqarsinnaaneranittaaq ilaqartinneqarluni.
Akiliisitsiniartarneq tassaavoq akiligassat pisassarineqartut akilerneqarnissaat siunertaralugu pinngitsaaliissutinik aamma nammineq piumassutsimik tunngaveqarluni akilersuinissamik aaqqissuussinernik inatsisini aalajangersarneqartunik akiitsoqartup tungaanut atuineq. Pinngitsaaliissutit ilaatigut tassaapput aningaasarsianit unerartitsineq, ilanngartuineq, akiliisinnaajunnaartutut nalunaarutiginnissummik tunniussineq kiisalu akiitsoqartumut piumasaqaatinik assigiinngitsunik, soorlu akiitsoqartup aningaasarsiornikkut inuttullu atugarisai pillugit paasissutissanik piumasaqarneq. Oqartussaasutut pisinnaatitaaffik taanna inatsisissatut siunnersuutikkut matumuuna kommunalbestyrelsimut allamut imaluunniit Akileraartarnermut Pisortaqarfimmut tunniunneqarsinnaalissaaq.
Arsaarinninnermik suliaqarneq akiliisitsiniartartumit isumagineqartoq kommunimi akiliisitsiniartarnermik sulinermut ilaavoq, taamaattumillu aamma suliakkiissutigineqarsinnaalluni. Arsaarinninnermilli suliaqarneq allaffissornikkut pinnani eqqartuussisutigoortumik pisinnaatitaaffiuvoq, akiliisitsiniartartullu taanna malillugu suliaa pillugu eqqartuussisunut naammagittaalliuutit kredsrettimit naliliivigineqartarput.
Arsaarinnissuteqarnissamik suliassat inatsisissatut siunnersuummi § 1, imm. 3 malillugu kommunimi piginnaatinneqartumi kommunip akiliisitsiniartartuanit suliarineqartassapput. Kommunimi piginnaatinneqartumi akiliisitsiniartartup tassani piginnaatitaaffigissavaa innuttaasut suliffeqarfiillu kommunimi suliakkiisumi angerlarsimaffeqartut arsaarinnissuteqarfiginissaannik suliassanik isumaginnittuunissaq, taamaattorli tak. § 4. Tassa kommunimi piginnaatinneqartumi akiliisitsiniartartup immikkut akuerineqaqqaarnissaa pisariaqanngilaq.
Akiliisitsiniarnermik suliassap Akileraartarnermut Pisortaqarfimmut suliakkiutigineqarsimatillugu, kommunalbestyrelse piginnaatitsisuusoq Akileraartarnermut Pisortaqarfimmi atorfeqartitamik akiliisitsiniartartutut toqqagassanngortitsisinnaavoq, tassa kommunini akiliisitsiniartartunik toqqaasarneq piffinni kommunalbestyrelsep suliassaqarfiisa ataani inissisimammat. Periarfissatut allatut kommunalbestyrelsep piginnaatitsisuusup arsaarinninnissamik suliassat Akileraartarnermut Pisortaqarfimmut suliakkiutiginngiinnarsinnaavai, taassumalu kingorna kommunip nammineerluni illoqarfimmini akiliisitsiniartartumik atorfeqartitsinini attatiinnassallugu.
Innuttaasut suliffeqarfiillu kommunimi suliakkiisumi angerlarsimaffeqartut suleqatigiinnissamik isumaqatigiissutaasimasoq akerlilersinnaanngilaat, innuttaasullu suliffeqarfiilluunniit kommunimi suliakkiisumiittut inatsisit malillugit pisussaafigisinnaasaat suleqatigiinnissamik isumaqatigiissuteqartoqarnerata kingunerisaanik atorunnaassanngillat.
§ 1, imm. 1-imi aalajangersagaq inatsisitigut periarfissiinngilaq kommunalbestyrelsep, kommunalbestyrelse alla imaluunniit Akileraartarnermut Pisortaqarfik piginnaatissallugit akiligassiissutinik isumakkeerinnissinnaatissallugit, akiliuteqanngikkallarnissamik nalunaaruteqarsinnaatissallugit imaluunniit pisortanut oqartussaasunut allanut isumakkeerinninnissaq pillugu imaluunniit akiliuteqanngikkallarnissaq pillugu inassuteqaasiorsinnaatitsinermik. Taamaattorli isumaqatigiissusiortoqarneratigut akornutissaqanngilaq, kommunalbestyrelsep piginnaatinneqartup, piginnaatinneqarnermigut allattoqarfimminik suliamut piareersaatinik suliaqartitsippat, tamatumani suliat inaarneqarnissaannut inassuteqaasiornerit suliarissallugit, kisiannili aalajangiinissavik kommunimi suliakkiissuteqartumit kommunalbestyrelsep aalajangiivigissallugu.
Kommunit suleqatigiinnissaasa aaqqissuussaanissaat aningaasalersorneqarnissaallu pillugit kommunalbestyrelsit isumaqatigiissuteqarnissaat naatsorsuutigineqarpoq. Suliassanut suliakkiutigineqartunut akiliutissaq suliassap kommunimi allami isumagineqarneranut atatillugu toqqaannartumik toqqaannanngitsumillu aningaasartuutinik matussusiissaaq. Akiliutip suliamut naapertuuttumik angissusilerneqarnissaanut pissutaavoq kommunit suliassarinngimmatigik kommuninut allanut tapiissuteqarnissaq kommunilluunniit ingerlatsineratigut iluanaaruteqarnissaq. Akiliummik angissusiliinissami aamma isummerfigineqassaaq akiliisitsissutinik ernianillu akiligassiinikkut isertinneqarumaarsinnaasut kommunip piginnaatinneqartup imaluunniit suliakkiisup pisassarissanerai. Kiisalu aamma isumaqatigiissummi isummerfigineqassaaq kommunimut piginnaatinneqartumut imaluunniit suliakkiisumut akiliuteqartitsineq qanoq pissanersoq. Qulaani apeqqutit eqqaaneqartut isummerfigineqassapputtaaq akiliisitsiniarnermik suliassaq Akileraartarnermut Pisortaqarfimmut suliakkiutigineqarpat.
Erseqqissarneqassaaq isumaqatigiissuteqarnermi imaluunniit piginnaatitsilluni isumaqatigiissusiornermi Akileraartarnermut Pisortaqarfimmi atorfeqartitaasoq akiliisitsiniartartutut toqqagassanngortinneqartoq aqqatigut isumaqatigiissuteqarnermi taaneqassanngimmat.
Kommunip suleqatigiinnissamik isumaqatigiissut atorunnaarsinniarsinnaavaa suleqatigiinnermilu peqataajunnaarsinnaalluni. Atorunnaarsitsinissamut piumasaqaatit erseqqinnerusut, matumani aamma piffissaq atorunnaarsitsinissamik nalunaaruteqarfissaq, suleqatigiinnissamik isumaqatigiissummi allassimassapput. Akileraartarnermut Pisortaqarfiup akiliisitsiniarnermik suliassamik pisortaqarfimmi suliakkerneqarsimatilluni aammattaaq suleqatigiinnissamik isumaqatigiissut atorunnaarsinniarsinnaavaa.
§ 2-mutKommunalbestyrelsip akiligassaqartut kommunimut akiitsuisa kingusinaartumik akilerneqarnerannut erniatigut, akiliisitsissutitigut aamma akitsuutitigut akiligassiisinnaanera sapinngisamik pisassaaq. Tassunga assersuutaasinnaapput pisortanut akiitsunik akiliisitsiniartartut akiliisitsiniarnerannut atatillugu akileeqqusisarneq pillugu nalunaarut malillugu akiligassiissutit erniallu, kiisalu erniat pillugit inatsit aamma aningaasarsianit akileraarutit pillugit inatsit malillugit piumasarisat.
Inatsisissatut siunnersuut malillugu isumaqatigiissutigineqarsinnaavoq kommunalbestyrelsip suliakkiisup ernianik, akiliisitsissutitigut aamma akitsuutitigut akiligassiisinnaatitaanera kommunalbestyrelsimut piginnaatinneqartumut imaluunniit Akileraartarnermut Pisortaqarfimmut nuunneqassasoq. Nuussinissaq taamaattoq isumaqatigiissutigineqarpat kommunalbestyrelsi piginnaatinneqartoq imaluunniit Akileraartarnermut Pisortaqarfik tamatumunngattaaq tunngatillugu aamma kommunalbestyrelsi suliakkiisoq sinnerlugu taamaaliussaaq.
Tamatumunnga piginnaatitaanermik nuussineq inatsisissatut siunnersuummi § 1 naapertorlugu isumaqatigiissuteqartoqarneratigut ingerlaannaq pissanngilaq, immikkulli isumaqatigiissutaasussaalluni.
Isumaqatigiissummi ernianut, akiliisitsissutinut aamma akitsuutinut akiligassiisarnerup annertussusiliivigineqarsinnaaneranut piginnaatitaaneq nuunneqarsinnaanngilaq, taamaammallu isumaqatigiissusiornermi taakku annertussusissaannik isumaqatigiittoqariissalluni.
§ 3-mutAalajangersakkani § 3-mi aalajangersakkap qulakkiissavaa suleqatigiinnissamik isumaqatigiissutip innuttaasumut ataasiakkaanut aningaasartuutaanerulinnginnissaa, soorlu assersuutigalugu angalanermut aningaasartuuteqarnerulernerit. Taamaasilluni § 3 malillugu piumasarineqarsinnaanngilaq innuttaasup kommunimut najugarinngisaminut angerlarsimaffigisaminulluunniit ornigunnissaa, soorluttaaq akiitsoqartup aningaasaqarniarneranut tunngasutigut apersuinissaq taamaallaat pisinnaasoq akiitsoqartup najugaqarfigalugu imaluunniit angerlarsimaffigalugu kommunerisaani. Tamanna pisuni tamani pinngitsoorani suleqatigiinnissamik isumaqatigiissummi allassimassaaq.
§ 4-imutPiginnaatitsinermi innuttaasunut inatsisitigut sunniutissai erniinnartumik sunniuteqalissammata, siunnersuutigineqassaaq piginnaatitsineq Akileraartarnermut Pisortaqarfimmit akuersissutigineqartassasoq, matumani piginnaatinneqarnerup paasiuminarnissaanut inatsimmut innersuussutit (paragraffit) assigisaasalu atorneqarnissaannik qulakkeerneqaqqullugu.
Innuttaasut inatsisitigut isumannaatsuunissaat eqqarsaatigalugu siunnersuutigineqassaaq, piginnaatitsissut akuersissutigineqarsimasoq kommunimi maleruagassat allat assigalugit pisortatigoortumik nalunaarutigineqartarneratuulli tusarliunneqassasoq.
Piginnaatitsinerup taamaallaat akiitsulimmut aalajangersimasumut akiligassiissutinut aalajangersimasunut tunngatillugu imaluunniit akiitsoqartunut aalajangersimasunut attuumassuteqarpata, taava pisortatigoortumik nalunaaruteqarneq inuit akiitsoqartut ataasiakkaat toqqaannartumik allakkatigut nalunaaruteqarfigineratigut pissaaq.
§ 5-imutNalinginnarmik isumaqartoqartarpoq suliakkiineq pisortatut oqartussaasut naligiissut akornanni pippat, pisortatut oqartussaasut suliakkiisut naammagittaalliuuteqarfigineqarsinnaaneq ajortut. Periuseq taanna inatsisissatut siunnersuummi § 5, imm. 1-imi erseqqissarneqarpoq.
Inatsisissatut siunnersuummi § 5, imm. 2-mi aalajangersarneqarpoq kommunalbestyrelsip imaluunniit Akileraartarnermut Pisortaqarfiup § 1 naapertorlugu piginnaatinneqarneq tunngavigalugu aalajangiineranut naammagittaalliuut naammagittaalliorfissamut kommunalbestyrelsip suliakkiisup aalajangiineranut suliakkiutigineqarsinnaasoq. Tassa imaappoq naammagittaalliuutaasimasinnaasoq pisortatut oqartussaasut taakkorpiaat suliarisussaavaat, soorlu aamma taamaattoqassasoq kommunalbestyrelsip akiligassiisarnissaq akiliisitsiniartarnissarlu pillugit suliassat kommunalbestyrelsimit allamit Akileraartarnermut Pisortaqarfimmulluunniit isumagineqarnissaat siunertaralugu piginnaatitsisinnaatitaanini atorsimanngikkaluarpagu.
Tassa akiligassiisarneq akiliisitsiniartarnerlu pillugit, taakkununngalu tunngatillugu aalajangiinerit pillugit naammagittaalliuutit maannakkutut naammagittaalliuutigineqarsinnaapput. Taamaammat soorlu akiliisitsiniartartup arsaarinnissuteqarneri pillugit naammagittaalliuutinik kredsrettip aalajangiiffiginnittarnera atuutiinnarpoq.
Akiligassiisarnissaq akiliisitsiniartarnissarlu pillugit akisussaaffik anneq kommunimi suliakkiisumit tigummiinnarneqarnissaa peqqutigalugu, siunnersuutigineqassaaq naammagittaalliorfissatut taasap nammineerluni kommuni suliakkiuteqartuusoq ingerlaavartumik naammagittaalliutit tigusat taakkualu aalajangiivigineqarneri pillugit tamatigut nalunaaruteqarnikkut naammassineqarnissaa isumagissagaa.
§ 6-imutKommunalbestyrelsip piginnaatinneqartup imaluunniit Akileraartarnermut Pisortaqarfiup pisuni assigiinngitsuni, akiitsoqartup aningaasarsiornikkut, suliffeqarnikkut ineqarniarnikkullu il.il. atugarisai pillugit paasissutissanik assigiinngitsunik pisariaqartitsisarnissaa naatsorsuutigineqarsinnaavoq.
Inuit ataasiakkaat nammineq inuunerannut tunngasut pillugit paasissutissat (paasissutissanik allat susassarinngisaannik taaneqartartut) pisortatut oqartussaasunut allanut ingerlateqqinneqarnissaat, pisortat ingerlatsineranni suliassat suliarineqartarnerat pillugu Inatsisartut inatsisaanni (suliassat suliarineqartarnerat pillugu inatsimmi) naapertorlugu, tunngaviatigut inerteqqutaavoq. Tamannali atuutinngilaq paasissutissat ingerlateqqinneqarnissaat inatsimmi allassimatillugu, tak. suliassat suliarineqartarnerat pillugu inatsit. Periarfissaq taamaattoq inatsisissatut siunnersuummi matumani § 6, imm. 1-imi eqqunneqarpoq. Paasissutissalli akiligassiisarneq akiliisitsiniartarnerlu pillugit kiisalu isummakkeerinissamik kinguartitsinissamillu apeqqutit pillugit suliassap suliarineqarnissaanut pisariaqartinneqartut amerlanersaasa paasissutissatut allanit susassarineqanngitsutut isigineqartussaanissaat naatsorsuutigineqanngilaq.
Taamatuttaaq aamma pisortat oqartussaasut nalunaarsuiffii pillugit inatsimmi (nalunaarsuiffiit pillugit inatsimmi) allassimavoq paasissutissanik tunioraaqatigiinneq pisinnaasoq, tamanna inatsimmi allassimatillugu.
Kommunalbestyrelsip suliakkiisup, kommunalbestyrelsip piginnaatinneqartup imaluunniit Akileraartarnermut Pisortaqarfiup paasissutissanik pissarsiarisimasaanik pissarsisinnaanissaa qulakkeerneqartariaqarmat imm. 2-mi aalajangersagaq, kommunalbestyrelsip suliakkiisup paasissutissanik, kommunalbestyrelsip piginnaatinneqartup imaluunniit Akileraartarnermut Pisortaqarfiup § 1 naapertorlugu piginnaatinneqarnermikkut pissarsiarisimasaanik pissarsisinnaanissaanik qulakkeerisoq ilanngunneqarpoq. Kommunalbestyrelsip suliakkiisup taamaalilluni kommunalbestyrelsi piginnaatinneqartoq imaluunniit Akileraartarnermut Pisortaqarfik, innuttaasut suliffeqarfiilluunniit kommunimi suliakkiisumi najugaqartut angerlarsimaffeqartulluunniit pillugit akiligassiisarneq akiliisitsiniartarnerlu pillugit paasissutissanik piumaffigisinnaavaa, tassa kommunalbestyrelsip suliakkiisup suliassamik suliaqarnissaani paasissutissat pisariaqartinneqarnerat naapertorlugu. Kommunalbestyrelsip suliakkiisup suleqatigiinneq tamakkiisumik ilaannakuusumilluunniit kipitinneqassagaluarpat, kommunalbestyrelsip akiligassiisarnermik akiliisitsiniartarnermillu piffissaq tamaat isumaginnissimagaluaruni inissisimanerminit ajornerusumik inissinnginnissaa taamaalillugu aalajangersakkakkut qulakkeerneqarpoq.
Imm. 3-mi aalajangersakkakkut qulakkeerneqarpoq kommunalbestyrelsip piginnaatinneqartup imaluunniit Akileraartarnermut Pisortaqarfik, akiligassiisarneq akiliisitsiniartarnerlu pillugit suliassap suliarineqarnissaanut atatillugu paasissutissanik, kommunalbestyrelsip suliakkiisup suliassamik nammineerluni suliaqassagaluaruni pisortanit oqartussaasunit namminersortunillu inatsisit malillugit qinnutigisinnaasaanik pissarsisinnaanissaa. Soorlu sulisitsisut, kukkunersiuisut, pisiniartut, pisisut, assartuisut, nassiussalerisut il.il. qinnuigineqarnermikkut paasissutissanik sunilluunniit akiliisitsiniartartup akiitsunik akiliisitsiniarneranut pingaarutilinnik akiliisitsiniartartumut nalunaaruteqartussaapput, tak. Pisortanut akiitsut akilersinniarneqartarnerat pinaveersaartinneqarnissaallu pillugit Inatsisartut inatsisaat.
Piginnaatitaaffinnut pisussaaffinnullu § 6 naapertorlugu kommunalbestyrelsimut inissinneqarsimasunut aammalu akisussaaffigineqartunut pineqarportaaq kommunimi pineqartumi akiliisitsiniartartoq.
§ 7-imutInatsisartut inatsisaat aalajangersaq malillugu atortuulissaaq ulloq 1. juli 2005.