07. oktober 2004

UKA2004/37

Inuussutissarsiutit siuarsarnissaat pillugu Inatsisartut inatsisaata

allanngortinneqarnissaa pillugu

Inatsisartut inatsisissaattut siunnersuut
(Unnuisarfinnik pilersitsiniarluni taarsigassarsiniarnissamut aningaasaateqarfiup ("Unnuisa-fonden") atorunnaarsinneqarnissaa)

pillugu

Inatsisartut Inuussutissarsiornermut Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

 

Inatsisartut Inuussutissarsiornermut Ataatsimiititaliaat suliarinninnermini ukuninnga inuttaqarpoq:

Inatsisartunut ilasortaq Ole Dorph, Siumut, siulittaasoq
Inatsisartunut ilasortaq Ane Hansen, Inuit Ataqatigiit, siulittaasup tullia
Inatsisartunut ilasortaq Otto Jeremiassen, Siumut
Inatsisartunut ilasortaq Finn Karlsen, Atassut
Inatsisartunut ilasortaq Per Skaaning, Demokraatit

Inatsisartut Inuussutissarsiornermut Ataatsimiititaliaata ulloq 5. oktober 2004-mi siullermeerinerup kingorna Naalakkersuisut inatsisissatut siunnersuutaat misissuataarpaa.

Aallaqqaasiut
Inuussutissarsiutinik siuarsaanermi aaqqissuussinerup nutarterneqarnissaanut atatillugu aalajangiinermi Naalakkersuisut "Unnuisa-fonden"ip, 1997-imili unnuisarfinnik pilersitsiniarnerni minnerunngitsumillu takornariaqarnermik tapersiisartup, atorunnaarsinneqarnissaa pissusissamisoortutut nalilerpaat.

Inuussutissarsiutit siuarsarneqarneranni aaqqissuussaaneq nutaaq, ukiup 2004-p 2005-illu nikinneranni atuutilersussaq ilaatigullu ingerlatsivinnik marlunnik allannguinissamik imaqartoq Inuussutissarsiornermut, Nunalerinermut Suliffeqarnermullu Naalakkersuisoq saqqummiussinermini allappoq.

SULISA A/S iluanaarniarluni ingerlatseqatigiiffittut (aningaasaliissutinik isumaginnittarfik) allanngortinneqassaaq. Greenland Tourism A/S inuussutissarsiutit siuarsaavigineqarnissaannut ingerlatseqatigiiffittut allanngortinneqassaaq, takornariartitsinerup iluani ingerlatanik suli ingerlatsisussaq ilutigisaanilli aallarnisaasartunik nunamilu inuussutissarsiornermik suliffeqarfinnik siunnersuisarnermik isumaginnittassalluni.

Tassungaluuna atatillugu unnuisarfiliortarnernut taarsigassarsisitsisarnermi aningaasaateqarfik pioreersoq pisariaarutissasoq, taamami attartortitsineq ingerlatseqatigiiffiit marluk nutaat killiliussiffigineqarnerisa iluini isumagineqarsinnaammat.

Naalakkersuisut oqarnerat malillugu aningaasaateqarfiup suliniutai ukiuni kingullerni marlussunni uninngatinneqareersimapput. Naalakkersuisulli oqaatigaat Unnuisa-fondenip atorunnaarsinneqarnissaanik siunnersuut takornarianut allanullu unnuisarfiliorniarnernut tapersiisarnermi periarfissat peerneqarnissaannik kissaataanngitsoq. Akerlianilli ingerlatseqatigiiffiit marluk nutaat killiliussiffigineqarnerisa iluini anguniarneqartumut taarsigassarsianik ingerlateqqiisoqarsinnaammat pisariillisaanissamik kissaatiginninnerup ersiutaatut taanna taaneqarsinnaavoq.

Inatsisissatut siunnersuutip imarisaa
Aningaasaliinernik aaqqissuussinerit namminersornerullutik oqartussanit aningaasaliivigineqartut assigiiaat, aqutsivigineqarnermikkut pisariaqarneranit anertunerusumik aningaasartuuteqarfiusut pigiiinarnissaat pinngitsoortikkumallugu aningaasaateqarfiup atorunnaarsinneqarnissaa Naalakkersuisut siunnersuutigaat. Inatsisartullumi inatsisaat atorlugu aningaasaateqarfik atorunnaarsinneqartussaavoq.

Taamaammat siunnersuut taanna atorlugu kapitalip, aningaasaateqarfimmut tunngatillugu inatsisip aalajangersagartaanik imaqartup peerneqarnissaa Naalakkersuisut siunnersuutigaat. Kinguneqaatit iluarsiiffigineqarnerinik siunnersuuut aamma imaqatinneqarpoq.

Ataatsimiititaliap suliarinninnera
Naalakkersuisut oqarnerat malillugu siunnersuut ulloq 5. juni 2004 tusarniaassutigalugu nassiunneqarpoq oqaaseqaatissanik nassiussinissamut ulloq 16. juni 2004 killiliullugu. Siunnersuut Greenland Tourism A/S-imut – Takornariaqarneq pillugu Siunnersuisoqatigiinnut, Ingerlatseqatigiiffinnut allattoqarfimmut, DcR-imut, SULISA A/S-imut, Unnuisa-fondenimi siulersuisunut, Akileraartarnermi Pisortaqarfimmut aamma Aningasaqarnermut Pisortaqarfimmut tusarniaassutigineqarsimavoq.

Greenland Tourism a/s-ip inuussutissarsiutit siuarsarneqarnissaannik aaqqissuussinissamut siunnersuut naapertuuttuusoq isumaqarfigaa. Ingerlatseqatigiiffinnut allattoqarfik teknikkimut oqaaseqaatit saniatigut oqaaseqaatissaqanngilaq. Aningaasaqarnermut Pisortaqarfik, Akileraartarnermut Pisortaqarfik, DcR Sulisa A/S-ilu oqaaseqaateqanngillat. Aningaasaateqarfiup atorunnaarsinneqarnissaanik siunnersuut Unnuisa-fondenip siulersuisuisa tusaatissatut tiguaat.

Inuussutissarsiutit siuarsarneqarnisaannik aaqqissuussinerup allanngortinneqarnissaanut Naalakkersuisut tunngaviusumik isumaat tassaavoq aningaasanik amerlanerusunik atuinngikkaluarluni inuutissarsiornerup ineriartortinneqarnerata annertunerulersinneqarnissaa. Allangortitsinerup ingerlatsinermi aningaasanik amerlanerusunik landskarsimit nuussivigineqarnissaanik pisariaqartitsisoqanngitsoq Naalakkersuisut isumaqarput. Ilinniartitaanermut immikkoortumut pilersaarut inuussutissarsiutillu inerisaaneq – aningaasanut inatsisit – aqqutigalugu iluanaarniarluni ingerlatseqatigiiffimmut kiisalu suliniutinik nutaanik aallartitsinissamut aningaasanik nuussisoqarnissaa qinnutigineqarpoq, nutaamik siuariartortitsinissamik siunertaqarluni aallarnisaasartunut suliffeqarfinnullu taakku pingaarnerutillugit iluaqutaasariaqartut Naalakkersuisut isumaqarput.

Inatsisartulli inatsisissaattut siunersuutikkut ugguuna, unnuisarfiliorniatunut taarsigaasarsarsisitsisarfimmut aningaasaateqarfiup (Unnuisa-fonden) atorunnaasinneqarnissaa kisimi pineqarpoq. Naalakkersuisunut ilaasortap soorlu allaaserigaa, siunnersuut inuussutissarsiutit siuarsarneqarnissaannut aaqqissuussinerup allanngortiterneqarnera siuliani eqqartorneqartumut attuumasuteqarpoq. Allanngortiterineq taanna Inatsisartuni immikkoorsillugu suliarineqassanngilaq AIS 2005-imilli suliarinninnermut atatillugu saqqummiunneqarluni, assersuutigalugu kontuni tulliuttuni 17.02.11-mi, 64.10.16-imi, 64.10.17-imi aamma 64.10.20-mi taamaallaat takuneqarsinnaavoq.

Inuussutissarsiutit siuarsarneqarneranni pissutsit atuuttut pitsanngorsarniarlugit Naalakkersuisut sulineranni ataatsimiititaliamit tapersersorneqarmata qularutigineqassanngilaq. Siunnersuutip isumaa ajunngilluinnartuusoq ataatsimiititaliamit tamarmiusumit isumagineqarpoq, taamaakkaluartoq isumaliutigilluagaallunilu piareersarneqarluarneqarsimassasoq erseqqissarneqassaaq.

Maleruagassanut tunngaviit assigiit siunnersuummi matumani kontunilu taaneqarluni pineqarput, ullormullu oqaluuserisassanut toqqaannartumik immikkoortunik naleqquttunik allanik peqanngimmat siunnersuut una kisimi, iluanaarniarluni ingerlatseqatigiiffik nutaaq inuussutissarsiutillu siuarsarneqarnissaannik aaqqissuussineq nutaaq immikkoorsillugu Naalakkersuisunik oqaloqateqarnissamut tunngavissiisutut ataatsimiititaliap isigaa.

Taamaattumik apeqqutit arlallit akineqarsinnaaqqullugit ataatsimiititaliap Inuussutissarsiornermut, Nunalerinermut Suliffeqarnermullu Naalakkersuisoq Johan Lund Olsen ataatsimiinnissamut aggersarpaa.

Aggersaaneq apeqqutitalik Naalakkersuisunullu ilaasortap akissutitut allagaa ilanngunneqarput.

Ataatsimiititaliaq isumaqatigiittoq siunnersuummut ima oqaaseqaateqarumavoq:

Aningaasateqarfiup suliniutai ukiuni kingullernili unitsinneqareersimammata aningaasaateqarfik ukiuni kingullerni iluaqutaavallaarani atuussimavoq. Taamaattumik siunnersuut ataatsimiititaliap tapersersorpaa.

Ataatsimiititaliamit aamma maluginiarneqarput siunnersuuteqartup oqaaseqaatigisai makku:

- Aningaasaateqarfiup aningaasaatai pigisassanngortinneqassasut aammalu aningaasaateqarfiup pisussaaffii suliassaalu ingerlatseqatigiiffimmut aningaasaliissutinik isumaqatiginninniartarfiusumut, inuussutissarsiutit siuarsarneqarnissaannik aaqqissuussinerup allanngortinneqareerneratigut 1. januar 2005-ip kingornatigut suliassanik isumaginnittussamut isumagisassanngortinneqassasut naatsorsuutigineqarpoq.

- Allattoqarfittut suliassamut aningaasaliissutit inuussutissarsiutit siuarsarneqarnissaannik aaqqissuussinerup allanngortinneqarneranut atasumik isumaqatiginninniartarfittut ingerlatseqatigiiffiup pilersinneqartup suliassaanut malinnaatinneqassasut naatsorsuutigineqarpoq.

- Inuussutissarsiutit siuarsarneqarnissaannut ingerlatseqatigiiffik pilersinneqaqqammersoq aammalu ingerlatseqatigiiffik aningaasaliussanik isumaqatiginninniartarfik aaqqissuussinerit allaffitsigut aqunneqarnissaanni kiffartuunneqarnissamik isumaqatigiissuteqarfigineqassasut naatsorsuutigineqarpoq.

- Annaaneqaratarsinnaasunik aningaasaliisartutut ingerlatseqatigiiffiliornermi niuernermik aallaaveqarluni annaaneqaratarsinnaasunik utaqqisinnaassuseqartunillu ingerlatseqatigiiffiup aningaasaliissuteqartarnissaa siunertaasoq Inuussutissarsiornermut Ataatsimiititaliap paasivaa.

Taamaalilluni saqqummiunneqartut tunngavigalugit siunnersuutip Inatsisartunit taperserneqarnissaa ataatsimiititaliap isumaqatigiittup inassutigaa.

Taama oqaaseqarluni Inatsisartut Inuussutissarsiornermut Ataatsimiititaliaata siunnersuut aappassaaniigassanngortippaa.

	Ole Dorph, Siumut, Siulittaasoq
Ane Hansen, Inuit Ataqatigiit, siulittaasup tullia		Otto Jeremiassen Siumut
Augusta Salling Atassut		Per Skaaning Demokraatit

Ilanngussaaq 1

Ilanngussaaq 2