NAMMINERSORNERULLUTIK OQARTUSSAT Kalaallit Nunaanni Inatsisartut Inatsisartut Allattoqarfiat	GRØNLANDS HJEMMESTYRE Grønlands Landsting Landstingets Bureau
Inuussutissarsiornermut, Nunalerinermut Sulinermullu Naalakkersuisoq Johan Lund Olsen /HER		Ulloq/Dato: J.nr.	01. oktober 2004 01.36.02.02-00006

 

Matumuuna Inuussutissarsiornermut, Nunalerinermut Suliffeqarnermullu Naalakkersuisoq Inatsisartut Inuussutissarsiornermut Ataatsimiititaliaata marlunngornermi ulloq 5. oktober 2004 nal. 10.00 ataatsimiititaliat ataatsimiittarfianni 1-mi ataatsimeeqatiginissaanut aggersarpaa.

 

Takornariartitsisarnermik inuussutissarsiuteqarnerup aamma nunami inuussutissarsiutit siuarsarneqarnissaat pillugit Inatsisartut inatsisaata allanngortinneqarnissaa pillugu Inuussutissarsiornermut, Nunalerinermut Suliffeqarnermullu Naalakkersuisoq siunnersuummik saqqummiussaqarpoq (UKA2004/37). Inatsisartut inatsisissaattut siunnersuutaat taanna unnuisarfinnik pilersitsinissamut aningaasaateqarfiup atorunnaarsinneqarnissaanik taamaallaat tunngassuteqarpoq (aningaasaateqarfik-Unnuisa).

Naalakkersuisuni ilaasortap alagaatut, siuliani taaneqartup inuussutissarsiutit siuarsarneqarnissaata allanngortinneqarnissaanut siunnersuut attuumassuteqarpoq. Allanngortitsineq tamanna Inatsisartuni immikkoortillugu suliarineqassanngilaq, AIS 2005-imilli suliarinninnermut atatillugu, assersuutigalugu kontuni 17.02.11-imi, 64.10.16-imi 64.10.17 64.10.20-milu taamaallaat takuneqarsinnaalluni.

Inuussutissarsiutit siuarsarneqarnissaannut atugassarititaasut pitsanngorsarniarlugit Naalakkersuisut sulineranni ataatsimiititaliamit tapersersorneqarmata qularutigineqassanngilaq. Siunnersuutip isumaa ajunngilluinnartuusoq ataatsimiititaliaq tamarmiusoq isumaqarpoq, erseqqissarneqassaarli isumaliutigilluagaallunilu piareersarneqarluarsimassammat.

Maleruagassanut tunngaviit assigiit siunnersuummi matumani kontunilu siuliani taaneqartuni pineqarput, ullormullu oqaluuserisassanik tassunga attuumassuteqartunik allanik toqqaannartumik peqanngimmat annaaneqaratarsinnaasunik aningaasaliisartutut ingerlatseqatigiiffimmik nutaamik kiisalu inuussutissarsiutit siuarsarneqarnissaannut ingerlatseqatigiiffimmik nutaamik pilersitsinissat naalakkersuisunut immikkut oqaloqatiginnissutiginissaannut siunnersuut una tunngavissatuatut ataatsimiititaliap isigaa.

Taamaattumik apeqqutit arlallit akineqarsinnaaqqullugit ataatsimiititaliap Inuussutissarsiornermut, Nunalerinermut Suliffeqarnermullu Naalakkersuisoq Johan Lund Olsen ataatsimiinnissamut aggersarpaa. Siunnersuutip siullermeerneqarnerani apeqqutit taakku apeqqutigineqarput, Naalakkersuisunulli ilaasortap pineqartut akissuteqarfigisinnaanagit. Taamaattumik ataani allassimasuni uteqqinneqassapput.

Naalakkersuisut saqqummiussaat naapertorlugu annaasaqaratarsinnaasunik aningaasaliisartutut ingerlatseqatigiiffik minnerpaamik 250 mio. Kr.-inik aningaasatigut tunngaveqarnissaa pingaarnertut tunngaviutinneqarpoq.

1) Sulisa A/S-ip aningaasaatai ullunikkut 24,9 mio. Kroninik amerlassuseqartut taassumalu qaavatigut ilinniartitaanermut inuussutissarsiutinullu aningaasat illuartinniakkanit ukiumut 15 mio. Kroninik 2007-ip tungaanut illuartitsisoqartarniarpoq, tassa 2007-imi 69,9 mio. Kronit kissaanni aningaasaatigineqassapput. Naalakkersuisut qaqugu naatsorsuutigaat ingerlatseqatigiiffiup aningaasalersueqataanissaa pisinnaassasoq?

2) Naalakkersuisut oqaatigaat Namminersornerullutik Oqartussat suliffeqarfiutai allat iluanaarutiminnit tunniussitinneqartarlutik ingerlatseqatigiiffimmut aningaasalersuitinneqarsinnaasut aammalu "ingerlatseqatigiiffiit allat" aningaasalersueqataasinnaanissaat periarfissaasoq. Aningaasat anguniakkat iluatsikkumallugit Namminersornerullutik Oqartussat suliffeqarfiutaat allat aningaasalersueqataanissamut pisussaaffilersorneqarnissaat qanoq annertutigissava?

3) Ingerlatseqatigiiffimmut "ingerlatseqatigiiffiit allat" aningaasalersueqataasinnaasut suuppat?

4) Namminersornerullutik Oqartussat aningaasaliissutit nalikilleratarsinnaanerannut atatillugu qanoq sillimmartaaruteqarniarpat?

5) Ingerlatseqatigiiffiup siulersorneqarnissaa aamma ingerlanneqarnissaa pillugu qanoq aalajangersaasoqassanersoq Naalakkersuisut qanoq siunniussaqarpat?

6) Ingerlatseqatigiiffiup nunami suliffeqarfinnut, takornariartitsinermut, aalaisarnermut aammalu aatsitassarsiornermut ingerlatseqatigiiffiup isumaginissaasa saniatigut suliffeqarfiit ajornartorsiortut aammalu suliffeqarfiit kinguaariit nikinnerannut ikaarsaarfimmiittut siunnersorsinnaasariaqarpai. Ingerlatseqatigiiffimmi sulisooreersut saniatigut sulisut qassit atorfinitsinneqarnissaat pisariaqarpa?

7) Greenland Tourism A/S-ip pisussaaffigiligassai matuma kingorna suussappat?

8) Annaaneqaratarsinnaasunik aningaasaliisartutut ingerlatseqatigiiffissaq assersuutigalugu aalisarnermut tunngasunik aamma suliaqartussaavoq. Tamanna qanoq ililluni inatsisip § 2, imm 2-anut naapertuuppa, tassanimi siunertanut Inatsisartut aalisarnermut, piniarnermut aamma nunalerinermut tapersiisarneq pillugu peqqussutaanni pineqartunut inatsit manna naapertorlugu tapersiisoqarsinnaanngitsoq allassimammat.

9) Inatsisip § 4-raani unnuisarfiit nassuiaaserneqarsimanerat suli attatiinnarneqassava?

 

Inussiarnersumik inuulluaqqusillunga

Ole Dorph
siulittaasoq