Direktoratet for Erhverv, Landbrug og Arbejdsmarked
Den 5. oktober 2004
J.nr. 61.10.10.00

 

Naalakkersuisup saqqummiinermini najoqqutassaa

 

Pissut: Inuussutissarsiornermut ataatsimiititaliamik isumasioqateqarneq, marlunngorneq 5. oktober 2004, nal. 10.00 ataatsimiitsitaliat ataatsimiittarfiani 1-mi.

 

1) Sulisa A/S-ip aningaasaatai ullunikkut 24,9 mio. Kroninik amerlassuseqartut taassumalu qaavatigut ilinniartitaanermut inuussutissarsiutinullu aningaasat illuartinniakkanit ukiumut 15 mio. Kroninik 2007-ip tungaanut illuartitsisoqartarniarpoq, tassa 2007-imi 69,9 mio. Kronit missaanni aningaasaatigineqassapput. Naalakkersuisut qaqugu naatsorsuutigaat ingerlatseqatigiiffiup aningaasalersueqataanissaa pisinnaassasoq?

Siunissaq ungasinnerusoq isigalugu ventureselskabinut toqqammaviusutut aningaasaatissatut 250 mio. kr. tikillugit immikkoortinneqarsinnaasutut takorloorneqarput. Nunatta iluanit selskabimit annaaneqaratarsinnaasunik aningaasaliissutinik ingerlatitseqqittartumik aallartitsinissamut kisitsisit taaneqartut aalajangiussaviunngillat imaluunniit tunngaviusariaqanngillat. Selskabissap aningaasanik toqqammaveqarnissaanut apeqqutaapput suliassat pitsaasut piviusunngortinneqarsinnaasullu, kiisalu selskabip nammineq aningaasanik nassaarsinnaanermut periarfissaqassusianik qanorlu tamatumunnga piginnaaneqartigineranik. Ungasinnerusoq isigalugu selskabip nammineq isertitariumaagassai selskabimut aningaasatigut napatitsisinnaasumik toqqammavissiuisussatut naatsorsuutigineqarput.

Aamma apeqqutissinni pingaartitassitut aallaqqaataani aningaasatigut toqqammavissat SULISA A/S-ip iluani aningaasaatinit pituttorsimanngitsunit aaneqassasut, aammalu 2005-imi aningaasanut inatsisissaq naapertorlugu 2008-mi inuutissarsiutit pillugit ineriartortitsinissamut ilinniartitaanermullu immikkoortumik pilersaarusiamiit ukiumoortumik 15 mio. kr. aaneqartarnissaat Naalakkersuisut takorloorpaat. Ukiut pingasut-sisamat ingerlanerini pigisat taakku selskabip aningaasatigut toqqammavigisaa 85 mio. kr.-t missaannut qaffassavaa.

Ukiuni siullerni ventureselskabip ingerlanneqarnera amigartooruteqarfiussasoq naatsorsuutigineqassaaq, inuutissarsiutitigut suliniutissat aningaasaliiffigineqartussat sinneqartoortalernissaat piffissaq ingerlareerpat aatsaat pissammat – suliniutillu tamarmik iluatsinnissaat aamma naatsorsuutigineqarsinnaanngilaq. Pissutsit taamaattaramik.

Taamaattoq selskabip aallaqqaataaniilli ingerlanissaanut tamakku akornutaassanngillat, kisianni naatsorsuutigineqassaaq angusariumaagassat ilisimasat annertusiartornerat suliniutillu inerikkiartornerat ilutigalugit iluatsikkiartorumaartut, tamakkiisumillu tamakku aningaasatigut periarfissanut aalajangiisuujumaartut. Naak nunani allani ventureselskabersuarnut naleqqiullugu nammineq aningaasaatigisai annikitsuinnaagaluartut isumaqanngilaq ventureselskabi Kalaallit Nunaanneersoq annertunerusumik annaaneqaratarsinnaasunik aningaasaliisartutut piginnaaneqarluni niuernermi tunngavigisaat aallaavigalugit inuutissarsiornermi suliniutinik nutaaliorfiusunik ineriartortitsinermik tapersersuisinnaassanngitsoq. Suliniutinut ataasiakkaanut naleqqiullugu annaaneqaratarsinnaasunik aningaasaliisartutut ilusiliussassaq ventureselskabip siulersuisuini aalajangiunneqassaaq politikkikkut aalajangiussarisaanani.

Ataani allassimasuni ungalulikkani annaaneqaratarsinnaasunik aningaasaliisarnermik selskabimillu taamatut ingerlatsisumik nassuiaatit paasiuminarsakkat ilanngunneqarput.

Annaaneqaratarsinnaasunik aningaasaliisarneq: Aningaasat aningaasaliissutigisat imaluunniit iluanaarniutit. Ajunaarnissamut nalorninartua annertungaatsiartuuvoq, akerlianilli iluanaarutaasinnaasut annertoorsuullutik. Aningaasaliinerit suuneri apeqqutaatillugit piffissami sivisuumi aningaasaliinertut iluseqarsinnaapput, aallaqqaataani taamaallaat aningaasaliinerinnaasinnaallutik, iluanaarutaasinnaasoq ukiut arlalissuit qaangiuppata pisinnaalluni. Selskabit taamatut ittut aatsitassarsiornermi immikkoortumi, nutaaliornermik ingerlatitseqatigiiffinni assigisaannilu nalinginnaasuupput. Aningaasat pineqartut tassaapput annaaneqaratarsinnaasut ilalaartusullu. Soorlu 2002-mut inuutissarsiutit siuarsarnissaannut nassuiaammi uppernarsineqareersutut aningaasat annaaneqaratarsinnaasut nalinginnarmik aningaaserivinni allaniluunniit taarsigassarsisitsissutaasartunut naleqqiullugit nalorninartorsiorfiunermiipput.

Selskabi annaaneqaratarsinnaasunik aningaasaliisartoq - Ventureselskabi: Ingerlatseqatigiiffinnut assingusunut allanut naleqqiullugu ventureselskabi tassaavoq ataatsimoorussilluni naliliinerit aamma niuernermut atatillugu sianigisassat aallaavigalugit aningaasaliissutinut annaaneqaratarsinnaasunut aningaasaliisarfiusoq. Aningaasaliissutit ajunaarfiusut pissutigalugit ingerlatseqatigiiffik ajunaannginniassammat aningaasaliissutigisat nalinginnaasumik siammartinneqarsimasarput (manniit immersuiffimmut ataasiinnarmut ikinagit arlalinnut inissinneqassapput). Taamaalilluni selskabip tamakkiisumik aningaasaliissutissatut aningaasaataanut selskabimi ataatsimi ajunaartoorsinnaanerup ajoqusiinnginnissaa isumannaarneqassaaq. Aningaaserivinnit aningaasaliisartunillu allanit aningaasaliissutini nalorninartoqarnera annertunerummat aningaasaliissutigisat ilaanni nakkartooruteqartarnissaanik selskabi naatsorsuuteqartariaqarpoq – nakkartoorutillu taakku aningaasaliissutinit iluanaaruteqarfiusunit allanit matussuserneqartassapput. Taamaattumik iluanaarutit annaaneqaratarsinnaasullu (ajunaarfigisat) imminnut oqimaaqatigiisillugit selskabip aningaasaliissutissatut aningaasaatini sapinngisamik pitsaanerpaamik iluseqartittariaqarpai.

Ventureselskabip aningaasaliisartunit allanit nalinginnaasumik immikkoorutigisartagaa tassaavoq selskabini aningaasaliiffigisamini siulersuisut suliaqarnerannut annertunerusumik peqataaqataasarnera, pisortaqarfigisaanik siulersuisuinillu piginnaassuseqartitsinermik sulissuteqartarnera. Aammattaaq selskabip aningaasaliiffigisap nammineq ingerlassinnaalernerani selskabillu ingerlanneqarnissaanut akikinnerusumik aningaasaliisitsisinnaalernerani ventureselskabi tunuarnissaminut piareersimasarpoq. Taamaalilluni selskabi aningaasaliissutigisaminit qaffasissumik ernialiussaminit isertitaqarluartuusoq, aappaatigulli annaaneqaratarsinnaasoqartoq selskabimillu aningaasaliiffigisaminik inerititaqarnermik aammalu selskabip aqutsisuinik piginnaaneqalersitsiniarnermik peqataaqataasoq pineqarpoq.

Niuernikkut tunngavigisat taama ittut tunngavigalugit selskabi siunnersuisarfiusoq ingerlanneqarsinnaanngilaq, selskabi taama ittoq selskabini siunnersuiffigisassami ilaanni aningaasaliisuusariaqanngimmat. Taamaalinerani selskabi marloqiusamik atuuffeqalissaaq, nakerisarsiunngitsumik siunnersuisuunerminik suliaqarnini ajornartorsiorfiulersissallugu.

Inuutissarsiutinik siuarsaanissamik ilusissamut nutaamut siunnersuummi selskabit taakku marluk piginnaassusaat imminnut akulerussinnaanatillu imminnut pinngitsoorsinnaanngillat.

2) Naalakkersuisut oqaatigaat Namminersornerullutik Oqartussat suliffeqarfiutai allat iluanaarutiminnit tunniussitinneqartarlutik ingerlatseqatigiiffimmut aningaasalersuitinneqarsinnaasut aammalu "ingerlatseqatigiiffiit allat" aningaasalersueqataasinnaanissaat periarfissaasoq. Aningaasat anguniakkat iluatsikkumallugit Namminersornerullutik Oqartussat suliffeqarfiutaat allat aningaasalersueqataanissamut pisussaaffilersorneqassappat? Taamaassappat aningaasanik qanoq amerlatigisunik?

Immikkoortumik pilersaarusiaq aqqutigalugu aningaasaliissutit taaneqareersut saniatigut aktieselskabit Namminersornerullutik Oqartussanit pigineqartut selskabitut aningaasaataannit aningaasaliisarnissaq takorloorneqarsinnaavoq, taamatut Nunatsinni inuutissarsiutitigut ineriartornermut iluaqutissanngorlugit atorneqarsinnaassallutik. Kisianni pisut ataasiakkaarlugit takkutereeraangata isumaliutigilluareernerisigut aatsaat tamanna pisinnaasassaaq. Taamaattumik ullumikkut selskabinit ataasiakkaanit Namminersornerullutik Oqartussat aktieselskabiutaannit illuartinneqarsinnaasut Naalakkersuisut oqaatigisinnaanngilaat.

Nunatsinni uumassusillit assigiinngiiaartuusut tunisassiarineqartalernissaannit sinneqartoorutaajumaarsinnaasut aamma ventureselskabip aningaasatigut toqqammavissaattut atorneqarsinnaassapput Nunatsinni inuutissarsiutitigut ineriartornermut ilapittuutaasinnaasuullutik.

3) Aningaasaliisinnaasutut "ingerlatseqatigiiffiit allat" taanerini selskabit suut Naalakkersuisut eqqarsaatigaat?

Ingerlatseqatigiiffiit allanik oqaatigisaqarnermi pineqarput selskabit aningaasaliisartut allat, suliniutini niuernermi sianigisarisat aallaavigalugit aningaasaliisartut, nalinginnarmik piffissami sivisuumi atuuttartussanik. Tamakku tassaasinnaapput aningaaseriviit, selskabit aningaasaliisartut, ventureselskabit allat, akiligassarsisitsisarfiit, selskabit soraarnerussutisianik aningaasaatillit, aningaasaateqarfiit soraarnerussutissiaqaartissat, peqatigiiffiit aningaasaliisarfiusut assigisaallu. Tamakku nunanit allaneersuusariaqanngillat, ventureselskabimimi nunatsinniit ingerlatseqatigiiffiit allat aningaasaliisinnaammata. Selskabit taakku nalinginnaasumik aningaasaliillutik ventureselskabini aningaasaliisarput, nalinginnaasumilli aningaasaliinermit aningaasaliissutimik annertunerusumik ernialiornissaannik naatsorsuutigisaqarlutik (ventureselskabip iluanaaruteqarfigisaanut aningaasaliinitik iluanaarfiginiarpaat).

Piffissap ingerlanerani aamma suliffeqarfinniit aningaasaliisartut selskabip aningaasatigut toqqammavissaanut tapiisarsinnaanissaat ilimagineqarsinnaavoq, taamaattoq tamanna aatsaat pisinnaassaaq selskabi ingerlalluarneqarpat malunniutilimmillu naammassisaqartarlerpat, aningaasanik ingerlatsivinni tatigineqalerluni. Taamaattumik tamanna siunissami ungasinnerusumi anguneqarsinnaassasoq ilimagineqarpoq.

Ukiut ataaseq-marluk matuma siorna aningaasaliinissaq pillugu Nuummi isumasioqatigiitsitsisoqarnissaa pimoorullugu pilersaarusiortoqareerpoq.

Nunatsinni inuutissarsiutitigut ineriartortitsinissaq aqqutissiorniarlugu annaaneqaratarsinnaasunik aningaasaliinissamut soqutiginnittut kajumissaarnissaannut periarfissanik qulaajaaneq isumasioqatigiitsitsinissap siunertaraa. Nunani avannarlerni killerni Danmarkimilu attuumassuteqartut arlallit, Nunatsinniillu aningaasaqarnikkut inuutissarsiutitigullu ingerlatsisut politikerillu nuimasut seminarimut qaaqquneqarput. Taamanikkut politikkikkut annertuumik aalassassimasoqarnera pissutigalugu piffissami tassani taamatut naapitsitsisoqarnissaa tulluussorineqanngimmat isumasioqatigiitsitsinissaagaluaq unitsikallarneqarpoq.

Ventureselskabissaq pilersinneqareerpat iluatsittumillu ingerlalereerluni aningaasaliisartussanik tatigineqalereerpat aatsaat seminareqartitsoqarnissaa pissusissamisoortuussasoq nalilerneqarpoq.

4) Namminersornerullutik Oqartussat aningaasaliissutaasimasut apparujussuarnissaat pakkersimaarniarlugu qanoq upalungaarsarsimappat?

Nunatsinni pissusiviusut pillugit ilisimasaqarluartunik tunuliaqutaqarluni ventureselskabiliortoqarnera Naalakkersuisut aningaasaliissutaasimasut apparujussuarnissaannut pinaveersaartitsissasoq takorloorpaat. Soorlu 1998-imi nalunaarusiami "Inuutissarsiutit nunamiittut tapiiffigineqartarneri pillugit isumaliutissiissut"-mik taaneqartumi aammalu "Inuussutissarsiornermik siuarsaaneq pillugu nassuiaat" 2002-meersumi aammattaaq"Inuutissarsiornikkut ineriartortitsinissaq pillugu ataatsimoorullugu ataatsimiititaliaq"-mit nalunaarusiami 2003-meersumi eqqaaneqareersoq aningaasanik ileqqaakkanik amigaateqartarneq aammalu annaaneqaratarsinnaasunik aningaasaliiumasut utaqqisinnaassuseqarluartut amigaatigineqartarneri pissutaallutik Nunatsinni aningaasaliissutaasartut assigiinngitsutigut kigaalaquserneqartarput.

Naalakkersuisut sipaarniarluni kontop akileraarutitigut oqilisaavigineqarsimasup "Nanoq konto"-p pilersinneratigut Nunatsinni ileqqaarniartarneq ikiorsiiviginiarsimavaa ventureselskabillu pilersinneratigut annaaneqaratarsinnaasunik aningaasaliiumasut utaqqisinnaassuseqarluartut piginnaaneqarluartunik sulisoqarluni nassaarineqarnissaat misilillugu suliniutigilerpaat. Ventureselskabip niuernerpalaartumik ingerlanissaa selskabimilu suliat ataasiakkaat suliarineranni politikkikkut akuliuuttoqartannginnissaa pingaaruteqarluinnartuuvoq, taamaanngippat ingerlatseqatigiiffinnit aningaasaliisussanit pisariaqartinneqartumik tatiginnittoqalernavianngimmat.

5) Selskabit ingerlanneqarnera aqunneqarneralu (ilaatigut pisortap siulersuisullu akisussaaffii il.il.) eqqarsaatigalugit Naalakkersuisut qanoq pilersaaruteqarpat

Soorlu ilisimaneqariissasoq selskabit pilersinneqartut marluk aktieselskabitut Naalakkersuisut pilersippaat. Tamanna, Inatsisartullu isumaqatigiillutik 2004-mi upernaakkut ataatsimiinnermi aktieselskabit Namminersornerullutik Oqartussat pigisaasa malittarisassaasa sukannernerulersinneqarnerisigut aktieselskabit pillugit nutaamik inatsisissap, ukiumoortumillu nalunaarusiortarnermut inatsisissap nutaap januaarip aallaqqaatani 2005-imi atulersinneqarnissaa malillugu Naalakkersuisut isumaat naapertorlugu naammappoq. Tassa aktieselskabit Namminersornerullutik Oqartussanit pigineqartut 2005-imi januaarip aallaqqaataaniit inatsiseqarneq naapertorlugu qallunaat naalagaaffiata aktieselskabiiutaattut assigiissutut isigineqalissapput. Kiisalu 2004-mit selskabi Kalaallit Nunaanni selskabinik pitsaasumik ingerlatsinissamut malittarisassat ataaniitinneqalissaaq.

Takornariaqarnermut siunnersuisoqatigiit inuutissarsiutitigut ineriartortitsinermut selskabissami nutaami ilaasussatut naatsorsuutigineqarput takornariaqarnermullu tunngatillugu Nunatsinni nunallu tamalaat akornannni takornariaqarneq pillugu atukkat ineriartornerlu pillugit ilisimasaminik Naalakkersuisunut suli kiffartuussisarnertik aallutiinnassavaat.

Inuutissarsiutitigut ineriartortitsinermut selskabissap iluani suliniuteqarfissat ataasiakkaat pillugit ataatsimiititaliaqartitsissaaq, ulluinnarnilu pingaarnertut anguniagaqarfinni marluinni, inuutissarsiutit nunamiittuni takornariaqarnermilu, selskabip suliniarnera ataatsimiititaliat taakkua pitsanngorsarlugulu anguniakkanut toqqissassavaat. Ataatsimiititaliat takornariaqarnerup iluani maanna ukiuni arlaqalersuni pioreerput aaqqissuussaanerallu ingerlalluarsimavoq ingerlateqqiinnarnissaallu kissatigineqarpoq.

6) Selskabip inuutissarsiutit nunamiittut, takornariaqarnerup, aalisarnerup aatsitassarsiornerullu suliarinerisa saniatigut suliffeqarfiit ajornartorsiortut suliffeqarfiillu inuusunnerusunik aqunneqalertut siunnersortartussaavai. Maannamut sulisooreersut saniatigut qassinik atorfinitsitsisoqassava?

Selskabinut marlunnut taakkununnga ataatsimut isigalugu aningaasaliisoqaqqissanngilaq, selskabimit aappaanut nikisitsisoqartussaammat.

Tamanna isumaqarpoq suliassat siunnersuinermik imaqartut Sulisa A/S-imi inissisimasut Greenland Toursim A/S-imut nuunneqassasut. Isumaginnittussatut isumaqatigiissusiaq Sulisa A/S-ip Namminersornerullutillu Oqartussat atsiugassaat aqqutigalugu akiliisarnermi suliassat tassunga ilaatinneqareerput. Ventureselskabi eqqarsaatigalugu taassuma aningaasartuutini aalajangersimasut nammineq aningaasaatini aningaasaliisarnermigullu isertittakkani atorlugit akilertassavai. Selskabit iluanni atorfillit amerlineqassanngillat. Ventureselskabi inuutissarsiutinillu ineriartortitsinermut ingerlatitseqatigiiffiup sulianik naammassinninniarnermini aningaasartuutit annertusinissaat pinngitsoorniarlugu siunnersortit namminersortut atortassavai.

7) Greenland Tourism A/S-ip siunissami suliassat tigussaasut sorliit isumagissavai?

Greenland Tourism A/S takornariaqarnermut inuutissarsiutillu nunamiittut ataatsimoortillugit inuutissarsiutinik ineriartortitsinermut ingerlatsitseqatigiiffittut ingerlatsilersussatut takorloorneqarpoq.

Taamaalilluni Greenland Tourism A/S maannakkut suliarisani ingerlatissavai, kisianni inuutissarsiutit nunamiittut aamma suliassaqarfigilissavai tassani periarfissat ilusissallu ilanngullugit.

Soorlu ukiuni kingullerni Inatsisartut aningaasatigut inatsisaanni takuneqarsinnaasoq ukiuni arlaqalersuni maanna inuutissarsiutit siuarsarneqarnissaat pillugit nalunaarusiami 2002-meersumi aallaaveqartumik takornariaqarneq inuutissarsiutillu nunamiittut pillugit inatsisit aningaasaliissutaasartullu ataatsimoortinniarneqarput. Taamaalilluni Greenland Tourism A/S-ip inuutissarsiutinik ineriartortitsinermut ataatsimut ingerlatsitseqatigiiffittut pilersinneqarnera siusinnerusukkut suliniuteqarsimanerit toqqammavigalugit ineriartorneruvoq pissusissamisoortoq.

8) Annaaneqaratarsinnaasunik aningaasaliisartutut ingerlatseqatigiiffissaq assersuutigalugu aalisarnermut tunngasunik aamma suliaqartussaavoq. Tamanna qanoq ililluni inatsisip § 2, imm 2-anut naapertuuppa, tassanimi siunertanut Inatsisartut aalisarnermut, piniarnermut aamma nunalerinermut tapersiisarneq pillugu peqqussutaanni pineqartunut inatsit manna naapertorlugu tapersiisoqarsinnaanngitsoq allassimammat.

Ilumoorpoq takornariaqarnermik aamma inuutissarsiutinullu nunamiittut iluini inuutissarsiutinik ineriartortitsinissaq pillugu Inatsisartut inatsisaanni nr. 14-imi, 12. november 2001-imeersoq najoqqutaralugu ilaatigut allassimammat:

"Imm. 2. Inatsit una naapertorlugu tapersiissuteqartoqarsinnaanngilaq siunertanut Inatsisartut aalisarnermut, piniarnermut aamma nunalerinermut tapersiisarneq pillugu peqqussutaanni pineqartunut."

Inatsilli tunuliaqutaralugu ventureselskabi aningaasaliissuteqartassanngilaq, Ventureselskabip tungaanit aningaasaliinerinnaammata tapiissutaanatillu. Qulaani nassuiarneqartutut Ventureselskabi niuernermi sianigisassaannaviit aallaavigalugit aningaasaliisassaaq.

Taamaattorli Inuutissarsiutinik ineriartortitsivittut selskabip ilaatigut suliassap ineriartortinnissaanut tapiissutinik, sillimmasiissutissiinermut il.il. qinnuteqaatit suliarinerinut siunnersuiffiginerinullu neqerooruteqartassaaq. Tamanna takornariaqarnermi inuutissarsiutinullu nunamiittut iluini inuutissarsiutinik ineriartortitsinissaq pillugu Inatsisartut inatsisaat nr. 14, 12. november 2001-imeersoq najoqqutaralugu pissaaq.

Taamaattumik inatsisip § 2-ani, imm. 2-ani oqaasertanut aammalu inuutissarsiutit ineriartortinnissaanut ilusiliussamut nutaamut naleqqiullugu ajornartorsiuteqartoqarneranik takusassaqanngilaq.

9) Inatsisip § 4-raani unnuisarfiit nassuiaaserneqarsimanerat suli attatiinnarneqassava?

Inatsisartut ataatsimiinneranni maannakkut pisumi Aningaasaateqarfik Unnuisap atorunnaarsinnera piviusunngortinneqassaaq. Aningaasaateqarfiup aningaasaatigisaasa ventureselskabimut ingerlateqqinneqarnissaat Inuutissarsiutit ineriartortinneri pillugit inatsisartut inatsisaata allanngortinnissaanut siunnersuummut nalinginnaasumik oqaaseqaatigisaniippoq. Niuernerpalaartumik tunngavilimmik aningaasanik annaaneqaratarsinnaasunik utaqqisinnaassuseqartunillu aningaasaliisartussaagami ventureselskabi siunissami unnuisarfissarsiornermut qinnuteqaatinik suliaqarsinnaassaaq. Suliassanilli ineriartortitsinissamut tapiissuteqartarnissat, kiisalu aammalu unnuisarfinnik isumannaarsuussisoqartarneq pineqartartussaassammat maannakkut inatsisartut inatsisaanni nassuiaasersuinerup pigiinnarnissaa siunertamut tulluartuussaaq.