Aningaasarsianit akileraarutit pillugit inatsisartut inatsisaata allanngortinneqarnissaanut, inatsisartut inatsisaat nr. 2, 21. maj 2004-meersoq.
(Umiarsuit takornarianik angallassissutit angallassinerat Dansk Internationalt Skibsregisterimi nalunaarsorneqalernissaannik aammalu ilinniagaqartut ilaannut ilanngaammik immikkut ittumik ilanngaateqalersitsineq)

 

1

Aningaasarsianit akileraarutit pillugit inatsisartut inatsisaat nr. 5, 19. maj 1979-imeersoq, kingullermik inatsisartut inatsisaatigut nr. 6, 10. april 2003-imeersukkut allanngortinneqartutigut, matumuuna uku allannguutigitinneqassapput:


1.
15-ip kingorna ilanngunneqassaaq:
" 15 a. Inunnut Kalaallit Nunaanni tunngaviusumik ilinniartitsivinni ilinniartunut, Kalaallit Nunaanni sulinermik misiliillutik Kalaallit Nunaannilu ilinniarfinnut paarlakaajaallugit ilinniartunut, imaluunnit Kalaallit Nunaanni sulinermik misiliillutik Danmarkimilu ilinniarfinnut paarlakaajaallugit ilinniartunut, ilinniagaqarnermut tapiissuteqartarnerup inatsisartut peqqussutaanni 2 a naapertorlugu ilinniartunut akissarsiaqartitsineq sulisitsisumut tapiissutigineqartartoq, ukiumut ani-ngaasarsiorfiusumut 2004-imut aningaasarsiat akileraaruteqaataasussat naatsorsuiffigineqalerpata appartinneqassapput imaalillugu, ilinniagaqartup ilinniagaqarnermini akissarsiai aningaasarsiat B-tut naatsorsorneqarnerisa annertoqataanut.
Imm. 2. Inuit Inunnik isumaginnittunngorniarlutik ilinniagaqartunut, Peqqinnissamik siammarsaa-sutut ilinniagaqartunut, Savaatilittut inuussutissarsiortutut ilinniagaqartunut aammalu ilinniagaqar-tut atuarfimmit sulinikkut misiliisinneqartunut, immikkoortoq 1-imi maleruagassamut ilaatinne-qanngillat.

2. 34-ip kingorna ilanngunneqassaaq:
" 34 b. Inuk 1 imaluunniit 2 naapertorlugu akileraartussaatitaasoq umiarsuarmi Dansk Internationalt skibsregisterimi nalunaarsorsimasumi, umiarsuarmi inunnik angallassissummi 1.100 bruttotonnage taannaluunniit qaangerlugu usitussusilimmi, umiarsuartullu takornarianik angallassisutitut angalasumi sulinermigut akissarsiaqarsimappat, akileraarutissat tamarmiusut akissarsiat taakkua akileraarutitaannut naapertuuttumik annertussusilinnik appartinneqassapput."

 

2

Inatsit 1. juni 2004-imi atuutsinneqalissaaq, ukioq aningaasarsiorfiusoq 2004 aallarnerfigalugu atuuttuulersinneqassalluni.




Namminersornerullutik Oqartussat ulloq 21. maj 2004




Hans Enoksen

/

Josef Motzfeldt


Siunnersuummut nassuiaatit

Isumaliutissiissut (Aappassaaneerinninneq)