Oqaaseqaatit naliginnaasut
Siunnersuutigineqarpoq, ukiumut aningaasarsiorfiusumut 2004-imut Kalaallit Nunaanni tunngaviusumik ilinniarfinni ilinniartunut aningaasarsiat akileraaruteqaataasussat naatsorsorneqalerpata appartinneqassasut, imaalillugu ilinniagaqartup ilinnniagaqarnermini akissarsiai aningaasaarsiatut B-tut naatsorsorneqarnerisa annertoqataannut.
Inuit Inunnik isumaginnittunngorniarlutik ilinniagaqartut, Peqqinnissamik siammarsaasutut ilinniagaqartut, Savaatilittut inuussutissarsiortutut ilinniagaqartut kiisalu ilinniagaqartut atuarfimmit sulinikkut misiliisinneqartunut maleruagassaq atortinneqanngilaq taakku ilinniagaqarnersiutitik pisartagariinnassavaat taamaasillutillu aningaasarsiat B-t akileraaruserneqartussaanngitsut akileraa-rutitigut nalinga annaasaqaatigissanngimmassuk.
Siunnersuutigineqarpoq, maleruagassaq ukiumut aningaasarsiorfiusumut 2004-imut killilerlugu tamaallaat atuutsinneqassasoq Naalakkersuisut isumaqarmata maleruagassaq ukiunut tulliuttunut pisariaarutissasoq ukioq 2005-imiit ilinniagaqartut pineqartut tamarmik akileraarutitigut oqilisaassiffigineqarnerat 4.000 kr.-ip missaani nalilik sunniuteqalissammat, Inatsisartut ukiumut aningaasarsiorfiusumut 2005-imut akileraarutitigut ilanngaatit il.il. siunnersuutigineqartutuut akuersissu-tigissappassuk.
Kalaallit Nunaanni takornarianik angallassisartutut umiarsuaatillit nunani allani takornarianik angallassisartutut umiarsuaatilittut ingerlatsisunut Kalaallit Nunaata imartaani avataaniluunniit angallassisunut unammillersinnaanerat qulakkeerumallugu siunnersuutigineqarpoq, Kalaallit Nunaanni inunnik angallassissutitut umiarsuarni, Dansk Internationalt Skibsregisterimi nalunaarsor-simasumi inuttatut sulisunut, akileraaruteqaatasussaq tamarmiusoq appartinneqassaaq DIS-i malillugu akissarsiat annertoqataannut naapertuuttunngorlugu. DIS-i malillugu akissarsiat imatut paasineqassapput, inunnik angallassissutitut umiarsuarmi Dansk Internationalt Registerimi nalunaarsorsimasumi inuttatut sulinermi akissarsiat.
Umiarsuaq Kalaallit Nunaanni selskabimit pigineqarlunilu ingerlanneqartoq akileraartarnikkut Kalaallit Nunaanni angerlarsimaffeqartutut inissisimaannassaaq Dansk Internationalt Skibsregisterimi nalunaarsorneqaraluarpalluunniit, sumiluunniit angerlarsimaffeqartutut nalunaarsorneqarnera apeqqutaatinnagu.
Inatsisissatut siunnersuut Ineqarnermut attaveqarnermullu pisortaqarfimmut, Kultureqarnermut, ilinniartitaanermut, ilisimatusarnermut ilageeqarnermullu pisortaqarfimmut, Aningaasaqarnermut pisortaqarfimmut aammalu Kanukokamut, tusarniaassutigineqareerpoq taakkulu siunnersuummut oqaaseqaateqarsimanngillat.
Inatsisissatut siunnersuutip aningaasatigut ajunaarutaasinnaaneranik kinguneqartussatut naatsorsuutigineqanngilaq, tassa takornarianik angallassinerup pineqartup sunniutissaasa maleruagassat maannamut atuuttut naapertorlugit kalaallinit inuttalerneqarnavianngimmata taamatullu ilinniagaqartut aningaasarsiaminnit akileraaruteqaataasussanit aningaasarsiat B-t akileraaruserneqanngitsut annertoqataannik millisaavigineqarsimassagaluarmata maannamut ilinniagaqarnermi tapersiisar-nermi maleruagassaasut atuutsiinnarneqaraluarpata. Aningaasaqarnermut inatsimmi imaluunniit kommunit missingersuusiaanni ukiumut aningaasarsiorfiusumut 2004-imut allannguutissatut pineqartut iluanaaruteqarfiusussatut naatsorsuutinut ilanngunneqarsimanngillat. Ilinniartunut allannguuteqartitsisoqanngippat naatsorsuutigineqassaaq landskarsimut kommuninullu katillugit 2 mio. kr.-it missaanni aningaasartuuteqannginnerunissaq.
Inatsisissatut siunnersuutip ilinniagaqartut siunnersuummi pineqartut pillugit maleruagassanilu nutaani pineqartunut ukiumut aningaasarsiorfiusumut 2004-imut aningaasarsianit akileraarusersuilernermi angissusiliinerni annikikkitsuinnarmik allaffissornikkut suliassaqartitsinerulaassaaq.
Inatsisissatut siunnersuutip maleruagassaanut ataasiakkaanut oqaaseqaatit
§ 1, nr. 1-imut
Siunnersuutigineqarpoq, ukiumut aningaasarsiorfiusumut 2004-imut Kalaallit Nunaanni tunngaviusumik ilinniartitsivinni ilinniagaqartunut, aningaasarsiat akileraaruteqaataasussat naatsorsorneqalerpata appartinneqassasut imaalillugu, ilinniagaqartup ilinniagaqarnermini akissarsiai aningaasar-siatut B-tut naatsorneqarnerisa annertoqataannut.
Ilinniagaqartoq katissimappat aapparisanilu ataatsimut akileraarusigaappata, taava aappariit aningaasarsiaannut akileraaruteqaataasussat appartinneqassapput, soorlumi ilinniagaqartup ilinniagaqarnermini akissarsiai aningaasarsiatut B-tut naatsorrneqarnerisa annertoqataannut.
Inuit Inunnik isumaginnittunngorniarlutik ilinniagaqartut, Peqqinnissamik siammarsaasutut ilinniagaqartut, Savaatilittut inuussutissarsiortutut ilinniagaqartut kiisalu ilinniagaqartut atuarfimmit sulinikkut misiliisinneqartunut maleruagassamut pineqartumut ilaatinneqanngillat, ilinniagaqartunut taakkununnga ilinniagaqarnersiut akissarsiaat aningaasarsiatut B-tut ingerlaannassammat.
§ 1, nr. 2-imut
Siunnersuutigineqarpoq, maleruagassaq inunnut, umiarsuarni Dansk Internationalt Skibsregisterimi nalunaarsorsimasuni inuttatut sulisunut, akileraarutissat tamarmiusut akissarsiat taakkua akileraarutitaannut naapertuuttumik annertussusilinnik appartinneqassasut, aammattaaq umiarsuarnut inunnut angallassissutini, takornarianillu angallassissutini inuttanut allanut atortinneqalissasoq, angallassineq Kalaallit Nunaata imartaaniippat avataaniippalluunniit apeqqutaatinnagu. Maleruagassaq inunnut Kalaallit Nunaannut tamakkiisumik akileraartussaatitanut aammalu killilimmik akileraartussaatitanut atuutsinneqassaaq.
Takornarianik angallassineq ima paasineqassaaq, siumut pilersaarusiugaanngitsumik inunnik angallassineq, umiarsualivimmiit umiarsualivimmut allamut pingaarnerutillugu inunnik angallassinerunngitsoq. Ilaasunut pingaarnertut siunertaagajuttarpoq nuannaariarneq imaluunniit qasuersaarneq, taamatuttaaq umiarsuarmut ilaaneq namminermini takornariarnertut pilerinartuutinneqartarluni. Takornarianik angallassinermik nassuiaateqarneq taamaasilluni umiarsualivimmiinnermut aamma umiarsuit takornarianik angallassissutit ilaasunik angallassinerannut akileraarutit pillugit Inatsisartut inatsisaanni § 1, imm. 2-imut nassuiaatigineqarneranut assinguvoq.
Umiarsuaq inunnik angallassissut piffissap ilaani takornarianik angallassiunnaarluni umiarsualivimmiit umiarsualivimmut allamut ilaasunik angallassissutitut atorneqaleraangat angalassinerit taama ittut aaqqissuussinermut matumunnga atuutsinneqanngillat, angallassinernilu taama ittuni angallassinermi akissarsiat akileraarutinik A-nik unerartitsineqartassalluni.
§ 2-imut
Siunnersuutigineqarpoq inatsit juunip aallaqqaataani 2004-mi atuutsinneqalissasoq ukiorlu aningaasarsiorfiusoq 2004 aallarnerfigalugu atuuttuulersinneqalerluni, ilinniagaqarnersiuteqarnermut taarsiullugu ilinniarnermi akissarsiaqalerneq januarip aallaqqaataaniit 2004-mi atuutilersinneqarnera pissutigalugu.