KNI A/S pillugu Inatsisartut peqqussutaata allanngortinneqarnera pillugu Inatsisartut peqqussutaat nr. 7, 14. november 2004-meersoq
(Ingerlatseqatigiiffissuup KNI-p ingerlataasa ilaneqarnissaat)
§ 1
KNI A/S pillugu Inatsisartut peqqussutaanni nr. 4, 6. juni 1997-imeersumi, Inatsisartut peqqussutaatigut nr. 1, 31. maj 2001-imeersukkut kingullermik allanngortinneqartumi makku allannguutigitinneqarput:
1. § 2 ima oqaasertaqassaaq:
"§ 2. Ingerlatseqatigiiffissuarmi KNI-mi ingerlatseqatigiiffiit niuernermik tunngaveqarlutik makkuninnga, niuernerullu tungaatigut taakkununnga atareersunik ingerlatsissapput:
1) Quersuarniit niuertarfinniillu niuerneq.
2) Aalisakkanit qalerualinnillu tunisassiassanit, neqaarniat tunisassiaataannit inuussutissanillu allanit nioqqutissiorneq aammalu pineqartunut tunngatillugu aningaasalersuisalernissaq ilanngullugu.
3) Usinik ilaasunillu nunaqarfinnut nunaqarfinniillu imaatigut assartuineq.
Imm. 2. Ingerlatseqatigiiffiit ingerlatseqatigiiffinni aqutani tamakkiisumik ilaannakuusumilluunniit pigisaminni suliffeqarfiit allat suleqatigalugit allanillu ateqartitsillutik ingerlatsinertik ingerlassinnaavaat.
Imm. 3. Naalakkersuisut ingerlatseqatigiiffiit pisussaaffilersinnaavaat nioqqutissanik ulluinnarsiutinik, inuussutissarsiornermut atortunik, ikummatissanik imerpalasunik pilersuinermi kiisalu usinik ilaasunillu imaatigut assartuinermi pisortat sullissinerat pillugu niuernermik tunngaveqartumik atugassaqarfiusunik isumaqatigiissuteqartarnissaannut. Aammattaaq Naalakkersuisut ingerlatseqatigiiffiit pisussaaffilersinnaavaat suliassaqartitsineq annertusarniarlugu suliniutit, matumani aamma tunitsivinnik tunisassiorfinnillu pilersitsinissamik attassiinnarnissamilluunniit siunertaqartut pillugit niuernermik tunngaveqartumik atugassaqarfiusunik isumaqatigiissuteqartarnissaannut."2. § 3 atorunnaarsinneqassaaq.
§ 2
Peqqussut ullormi 1. januar 2005-mi atortuulissaaq.
Namminersornerullutik Oqartussat, ulloq 14. november 2004
Hans Enoksen/
Kaj Kleist