19. oktober 2004

UKA 2004/36

 

Peqqussutissatut siunnersuummut oqaaseqaatit

 

Oqaaseqaatit nalinginnaasut

1. Aallaqqaasiut:

Inatsisartut peqqussutissaattut siunnersuutip matuma siunertaraa makkuninnga suliniuteqarnissaq periarfissiuunniarlugu KNI A/S-ip ingerlataanik annertusisitsinissaq:

1. KNI A/S-ip ullormi 1. januar 2005-imi Nuka A/S-imik tigusinissaa.
2. KNI A/S-ip ullormi 1. januar 2006-imi Royal Arctic Bygdeservice A/S-imik tigusinissaa.
3. KNI A/S-ip nunaqarfinnut nunaqarfinniillu ilaasunik angallassinissamut akuerineqarnissaa, soorlu ilaasunik angallatini nioqqutissanik asiujasunik assartuutini ilaasqarnissamut akuerisaasimasuni ilaasoqarnermikkut.

Tassuunakkut makku tunngavissiuunniarneqarput:

- Nunaqarfinnik sullissinerup inuiaqatigiinnut aningaasartuutaanera sutigut tamatigut akikinnerusoq.
- Sullissinermi suliassat assigiinngitsut pitsaanerusumik ataqatigiissaarneqarnissaat.
- Nunaqarfinnik sullissineq qaffasinnerusoq kiisalu nunaqarfiit pisariaqartitaasa kissaataasalu aammalu sullissinerup neqeroorutigineqartup naapertuunnerusumik ataqatigiissaarneqarnissaat.


2. Siunnersuummi immikkoortut pingaarnerit:

Ingerlatseqatigiiffissuup KNI-p ingerlatsinera pillugu aalajangersakkani maanna atuuttuni allassimavoq, ingerlatseqatigiiffissuup ingerlatseqatigiiffii niuernermik tunngaveqarlutik quersuarniit niuertarfinniillu niuernermik ingerlatanillu tamatumunnga atasunik ingerlatsissasut.

Ingerlatseqatigiiffissuup ingerlatsinermini ingerlatai taakku siunnersuutikkut annertusineqassapput, taamaalillutik siunissami tassaalissallutik:

1. Quersuarniit niuertarfinniillu niuerneq.
2. Aalisakkanit qalerualinnillu tunisassiassanit, neqaarniat tunisassiaataannit inuussutissanillu allanit nioqqutissiorneq, kiisalu taakkununnga atatillugu aningaasaliisarnermik ingerlatsineq atuutereersoq.
3. Usinik ilaasunillu nunaqarfinnut nunaqarfinniillu imaatigut assartuineq.

Inatsisartut peqqussutaat maanna atuuttoq naapertorlugu Naalakkersuisut ingerlatseqatigiiffissuup ingerlatseqatigiiffii pisussaaffilersinnaavaat nioqqutissanik ulluinnarsiutinik, inuussutissarsiornermut atortunik, ikummatissanik imerpalasunik il.il. pilersuinermi pisortat sullissinerat pillugu niuernermik tunngaveqartumik atugassaqarfiusunik isumaqatigiissuteqartarnissaannut. (§ 2, imm. 3).

Ingerlatseqatigiiffissuup ingerlatseqatigiiffiisa niuernermik tunngaveqartumik atugassaqarfiusunik isumaqatigiissuteqartarnissaannut Naalakkersuisut pisussaaffiliisinnaanerat siunnersuutikkut annertusillugu aammattaaq usinik ilaasunillu imaatigut assartuinermik kiisalu suliffissaqartitsiniarneq annertusarniarlugu suliniutinik, matumani aamma tunitsivinnik tunisassiorfinnillu pilersitsinissamik attassiinnarnissamilluunniit siunertaqartunik ilaneqarpoq.

Tassuunakkut Namminersornerullutik Oqartussat inuiaqatigiit soqutigisaasa isumannaarneqarnissaannik qulakkeerinissaat periarfissinniarneqarpoq.


3. Pisortanut aningaasaqarnikkut allaffissornikkullu sunniutissai:

Siunnersuut imminermini pisortanut aningaasaqarnikkut allaffissornikkullu sunniuteqartussaanngilaq. Nunaqarfinnili ingerlatanik ataatsimoortitsinissaq siunnersuutikkut periarfissaalersoq pisortanut, matumani aamma selskabinut pisortanit pigineqartunut aningaasaqarnikkut sunniuteqassaaq. Nunaqarfinni ingerlatanik ataatsimoortitsinissap qanoq ingerlanneqarnissaa, aammalu selskabit attuumassuteqartut nunaqarfinni ingerlatanik ataatsimoortitsinerup periarfissarititaasa iluanni qanoq iliorniarnerminnik aalajangiineri aningaasatigut sunniutissat taakku suunerinut qanorlu ittuunerinut aalajangiisuussapput. Nunaqarfinni ingerlatanik ataatsimoortitsinissami periuserineqartussap, atuutilersitsiniarluni maanna isummersuutigineqartunut aallaaviusup aningaasatigut sunniutissai ersersinniarlugit Mærsk Broker K/S nalunaarusiornikuuvoq. Erseqqissarneqassaarli taanna aallaavissaannaammat.

Nalunaarusiaq peqqussutissatut siunnersuummut ilanngunneqarpoq. Nalunaarusiami pingaarnertut naliliineq tassaavoq nunaqarfinni ingerlatanik KNI-p akisussaaffigisassaanik ataatsimoortitsiniarneq "nunaqarfinni innuttaasut sullinneqarnerannut pitsanngoriaatissanik, aammalu inuiaqatigiit kalaallit ataatsimut isigalugit aningaasarsiornerannut pitsaaqutissanik arlaqartunik nassataqarumaartoq."

Royal Arctic Bygdeservice A/S-ip umiarsuaatini ukiut ikittuinnaat ingerlaneranni taarsertussaassavai. Maannakkut sullissinerup annertussusia attatiinnarneqassappat taarsiinissap 150 mio. kr.-it missinginik akeqarnissaa Maersk Broker K/S-ip nalilerpaa. Taamaattorli Royal Arctic Line A/S-ip Royal Arctic Bygdeservice A/S-illu tusarniaanermut akissutiminni oqaatigaat, sullissinerup annertussusissaatut 2005-imut aningaasanut inatsisissatut siunnersuummi siunniunneqartup kingunerissagaa umiarsuaatit umiarsuarnut marlunnut ikilisinneqarsinnaanerat, tassuunakkullu taarsiinissaannarnut aningaasartuutissat 100 mio. kr.-inik annertussuseqassasut.

Tassunga taarsiullugu umiarsuarnik pisariaqartitanik piffissami aalajangersimasumi attartorsinnaaneq Maersk Broker K/S-ip periarfissaanerarpaa.

Mærsk Broker K/S eqqoriaavoq, umiarsuaatileqatigiiffimmik nunamit allameersumik kitaani assartuinermi nunaqarfinnik sullissinissaq pillugu piviusorsiortumik isumaqatigiinniaqateqarnissani 42,9 – 42,0 mio. kr.-it missinginik (akit malillugit iluarsineqartartussanik) aningaasartalimmik isumaqatigiissuteqarnissaq anguneqarsinnaassasoq. Taakku saniatigut aamma ilaapput assartuinermut tunngasunut aningaasartuutit sullissisunullu isumaqatigiissutit. Royal Arctic Bygdeservice A/S-ip kitaani sullissineranut aningaasartuutit 44,9 mio. kr.-iusut naatsorsorneqarsimavoq, taakkulu saniatigut ilanngunneqassapput assartuinermut tunngasunut aningaasartuutit sullissisunullu isumaqatigiissutit.

Umiarsuit nunaqarfinnik allatut sullissinissaasa atuutilersinneqarneranut atatillugu 5 mio. kr.-it atorlugit prammisisoqartariaqassaaq. Aammattaaq Royal Arctic Bygdeservice A/S-ip atorunnaarneranut aningaasartuutit 13,8 mio. kr.-iunissaat naatsorsorneqarpoq.

KNI A/S-ip naatsorsuutigaa Nuka A/S-ip suliassaataanik isumaginninnermi akissarsianut aningaasartuutinut ukiumut 7 mio. kr.-it missinginik sipaartoqarsinnaasoq, ukiumili atuutilersitsiffiusumi siullermi aningaasartuutaasussat 0,7 mio. kr.-it missaanniissangatinneqartut.

KNI A/S-ip angallatit nioqqutissanik asiujasunik assartuutit 3-t pigereerpai, sulilu 3-nik piseqqinnissani naatsorsuutigalugu. Angallatit nioqqutissanik asiujasunik assartuutit selskabip isorliunerusuni pisiniarfiutaasa nioqqutissanik naammaginartumik pilersorneqarnissaat qulakkeerpaat. Inatsisartut peqqussutissaattut siunnersuut manna isumaqataaffigineqassappat angallatit taakku suli atorluarneqarnerusinnaassapput, tassami aamma (taamaaliornissamut akuersissuteqartoqassappat) ilaasoqarsinnaassagamik taamaalillutillu nunaqarfiit innuttaasa takornariallu pitsaanerusumik angallanneqarnissaat qulakkiissallugu.

Taakku saniatigut aamma ataatsimoortitsinerup pitsaaqutissai nalilersorneqarsimanngitsut selskabinit tikkuartorneqartut arlaqarput:

Makkuninnga ataqatigiissaarineq:

- qerititsiviit/nillataartitsiviit atunngitsut
- assartuinermut atortut ataatsimoorussat (truck-it il.il.)
- pitsaassutsimik nakkutilliineq Aalborgimi
- nillataartitsivinnik/qerititsivinnik ikkussuisartumik Kalaallit Nunaannukartitsisarneq
- nunaqarfinni teknikkikkut atortunik aserfallatsaaliineq

Royal Arctic Bygdeservice A/S-ip Royal Arctic Line A/S-illu suleqatigiinneranni pitsaaqutit atuutereersut atuukkunnaarsinnaapput, tassa KNI A/S-ip sullinneqarnernik sunik Royal Arctic Line A/S-imit pisiumanissaa apeqqutaatillugu. Isumaqatigiinniartoqassappat tamanna niuernermik tunngaveqarluni atugassaqartitsiffiusumik pissaaq.

Atorfinnik allatut aaqqissuussinerup kingunerisaanik atorunnaarsinneqartunik atorfeqartut tamarmik allanik suliffissarsinngippata isumaginninnikkut aningaasartuutit amerlinissaat naatsorsuutigineqartariaqarpoq. Sulisussat Kalaallit Nunaannut akileraartussaatitaanngitsut atorneqassappata tamanna akileraarutitigut isertitassanit annaasaqarnermik kinguneqarsinnaavoq, imaluunniit akileraarutit tunngavii sulisut ikilinerat pissutigalugu appariaateqassapput. Nuka A/S-ip Nuummi iniutai maannakkut atugaanermissut atorneqanngippata taakku maannamut naatsorsorneqarsimanngitsunik naatsorsuutitigut nalikillilerneqarnissaat naatsorsuutigineqartariaqarpoq.


4. Inuussutissarsiutinik ingerlataqartunut aningaasaqarnikkut allaffissornikkullu sunniutissai:

Siunnersuut imminermini inuussutissarsiutinik ingerlataqartunut aningaasaqarnikkut allaffissornikkulluunniit sunniuteqassangatinneqanngilaq, aktieselskabit Namminersornerullutik Oqartussanit pigineqartut (KNI A/S, Nuka A/S, Royal Arctic Line A/S aamma Royal Arctic Bygdeservice A/S) toqqaannartumik sunnerneqartussat eqqaassanngikkaanni.

Ataatsimoortitsinissalli nunaqarfinni inuussutissarsiutit ineriartornissaannut periarfissanik, tassa sullissinerup qaffasinnerulerneratigut pitsaanerulersitsinissaa naatsorsuutigineqarpoq. Ilaasunik imaatigut assartuinerup kiisalu nioqqutissat ilaannik imaatigut assartuinerup akulikinnerulernissaat ilaatigut periarfissaalissaaq. Umiarsuit qerititsivillit maannakkut pigineqartut usigisinnaasaasa pingasoriaataannik useqarsinnaasut atorneqalersinnaanerat KNI A/S-ip isumaliutigaa.

Arctic Umiaq Line-ip oqaatigaa, angallatit attartukkat atorlugit uteqattaarluni ilaasunik assartuinissaq pillugu selskabi ukiut tamaasa namminersortunut angallataatilinnut isumaqatigiissusiortartoq. KNI-p isumaliutigineqartutuut angallatit nioqqutissanik asiujasunik assartuutit ilaasunik angallassissutitut atulissappagit namminersortut angallataatillit aningaasarsiornissamut tunngavissaat annikillissapput, tamannalu angallatit pineqartut akilersinnaasumik ingerlanneqarnissaannut aalajangiisuulluinnarsinnaavoq.

Ataatsimoortitsisoqarpat KNI A/S niuernikkut assigiinngitsutigut aalajangiisuusutut inissisimalersinnaavoq. Nuiernerup tungaatigut aalajangiisuusutut inissisimanermik atornerluineq unammilleqatigiinneq pillugu Inatsisartut inatsisaanni § 13 naapertorlugu inerteqqutaavoq. Aamma Unammilleqatigiinnermut Ataatsimiititaliaq Inatsisartut inatsisaatigut arlaqartunik piginnaatitaaffiligaavoq, unammilleqatigiinnermut killilersuutaasinnaasut kingunerluutigisinnaasaannik pinngitsoortitsinissamik siunertalinnik.

Ataatsimoortitsinissap atuisut akiliutigisartagaannik annertuumik qaffaanermik sullissinerulluunniit atuutereersup ajorseriarneranik kinguneqannginnissaanik piumasaqaat KNI A/S-ip isumaqatigalugu nalunaarutigereerpaa.


5. Avatangiisinut pinngortitamullu sunniutissai:

Siunnersuutip avatangiisinut pinngortitamullu imminermini sunniuteqarnissaa naatsorsuutigineqanngilaq. Nunaqarfinnut nunalittarnerit akulikissusiisa allanngornerat angallatinillu allanik atuilernissaq avatangiisinut sunniuteqarsinnaasutut eqqarsaatigineqarsinnaapput, tamatumali avatangiisit eqqissisimatitsinerlu pillugit aalajangersakkat atuuttut killissarititaasa iluanni taamaallaat pinissaa naatsorsuutigineqarpoq.


6. Innuttaasunut allaffissornikkut sunniutissai:

Siunnersuut innuttaasunut allaffissornikkut sunniuteqartussaanngilaq. Tamatumani naatsorsuutaavoq Royal Arctic Line-ip usinik assartuinermini aqutsissutaasa atorneqarnissaat, kiisalu assartuineq il.il. pillugit qanimut ataqatigiissaarinissap pilersinneqarnissaa Royal Arctic Line A/S-ip KNI A/S-illu isumaqatigiissutigissagaat.

Ataatsimoortitsinissap atuisut akiliutigisartagaannik annertuumik qaffaanermik sullissinerulluunniit atuutereersup ajorseriarneranik kinguneqannginnissaanik piumasaqaat KNI A/S-ip isumaqatigalugu nalunaarutigereerpaa.


7. Naalagaaffeqatigiinnermut namminersornermullu attuumassuteqartut:

Siunnersuut inuiaqatigiit aningaasaqarniarnikkut sipaaruteqarnissaannik kinguneqassaaq, taamaalillunilu aningaasarsiornikkut imminut napatilernissamik anguniagaqarnermut, namminiilernissap anguniarneqarnerani qitiusumut iluaqutaassalluni.


8. Oqartussaasunik kattuffinnillu il.il. tusarniaaneq:

Siunnersuut oqartussaasunut kattuffinnullu il.il. makkununnga tusarniaassutigineqarpoq:

Siunnersuut immikkut ittumik ullunik quliinnarnik piffissaliilluni tusarniaassutigineqarpoq. Tusarniaanermi akissuteqarnissamut piffissaliussaq sivisunerussagaluarpat siunnersuut maannakkut ataatsimiinnermi suliarineqarsinnaanavianngikkaluarpoq, tamannalu selskabinut sunnigaasussanut annertuumik kingunerlussagaluarluni.

Makkua tusarniaanermut akissuteqarput:

Peqqissutsimut Pisortaqarfik, Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfik, Aatsitassanut Pisortaqarfik, Aalisarnermut Piniarnermullu Pisortaqarfik kiisalu Nunami namminermi pissutsinut Allaffik siunnersuummut oqaaseqaatissaqannginnerarput. KANUKOKA-p siunnersuut isumaqataaffigaa. Kommuneqarfiit kattuffiat isumaqarpoq peqqussutissatut siunnersuut nunaqarfinnik sullissinerup aammalu KNI A/S-ip Nuka A/S-imik tigusineratigut nunaqarfinni isorliunerusunilu aalisakkanit qalerualinnillu tunisassiassanik nioqqutissiornerup pitsaanerulernerannik kinguneqarumaartoq. Aammattaaq kommuneqarfiit kattuffiata oqaatigaa, tigusineq aalisakkanit qalerualinnillu tunisassiassanit nioqqutissiornerup aamma "nunaqarfiit nioqqutissiaannik" nunap iluani nunanullu allanut tunisaqartarnerup pitsaanerusumik ataqatigiissaarneqarsinnaanissaannut periarfissatsialaassagunartoq.

Tusarniaanermi akissutit tiguneqarsimasut allat siunnersuutip suliarineqarnerani ilanngunniarneqarput.

Taamaattorli Nuka A/S-ip aningaasaliisarsinnaanermik ingerlatsinissamik kissaataa ilaannakuusumik akuersaarneqarpoq, tak. § 1, nr. 1-imut oqaaseqaatit.

Taakku saniatigut ingerlatsinermik aaqqissuussinissaq tassungalu atatillugu aningaasatigut naatsorsuutigisat pillugit oqaaseqaatit ilanngunneqarsinnaasimanngillat. Tassunga patsisaavoq Inatsisartut peqqussutaata taamaallaat ingerlatseqatigiiffissuup KNI-p ingerlatsinermini periarfissaanik imaqarnera. KNI-p niuernermik aallaaveqarluni nammineq isumagisassaraa ingerlatseqatigiiffissuup ingerlanneqarnera, taamaallaat aningaasanut inatsimmit aammalu atuisut akiliuteqartarnerisa annertuumik qaffannginnissaanik sullissinerulluunniit pioreersup ajorseriannginnissaanik piumasaqaammit pituttorneqarluni. Taassuma aamma nassatarissavaa umiarsuarnik attartorsinnaaneq angallatinilluunniit il.il. pisisinnaaneq pillugit apeqqutit KNI-mit aalajangiiffigineqartussaanissaat.

Siunnersuutaagallartoq tusarniaassutigineqartoq Naalakkersuisut 11. juni 2004-mi tunngaviusumik aalajangiussaannik tunngaveqarpoq. Tamanna pissutigalugu siunnersuutaagallartoq aalajangersakkanik KNI-p Arctic Umiaq Line A/S-ip nunaqarfinnut angallassineranik tigusisinnaanissaanik siunertaqartunik imaqarpoq. Naalakkersuisut tunngaviusumik aalajangiinerminnut uiggiullugu nunaqarfinni ingerlatanik ataatsimoortitsinissamik isumaliutaaqqaartup aningaasatigut kingunissai erseqqissumik paasiumallugit Maersk Broker K/S naliliisissimavaat. Naliliineq taanna tunngavigalugu Naalakkersuisut aalajangerput Arctic Umiaq Line A/S ataatsimoortitsinissami ilaatinneqartariaqanngitsoq. Taamaalillutik ajornartorsiutit tusarniaanermi akissutigineqartuni eqqartorneqartut ataasiakkaat soqutiginaataarutereerput.

 

 

Peqqussutissatut siunnersuummi aalajangersakkanut ataasiakkaanut oqaaseqaatit

§ 1-imut

Nr. 1-imut:

§ 2, imm. 1-ip oqaasertassaatut siunnersuutigineqartoq ingerlatseqatigiiffissuup KNI-p ingerlataanik annertusisitsineruvoq.

Aalajangersagaq maanna atuuttoq naapertorlugu ingerlatseqatigiiffissuup KNI-p selskabiuutai niuernermik tunngaveqarlutik quersuarniit niuertarfinniillu niuernermik, ingerlatanillu tassunga atasunik ingerlatsisuupput.

Aamma aalisakkanit qalerualinnillu tunisassiassanit, neqaarniat tunisassiaannit nerisassanillu allanit nioqqutissiornerup kiisalu tassunga atatillugu aningaasaliisarnermik ingerlatsinerup pioreersup aalajangersakkami ilaatinneqalernissaat siunnersuutaavoq. Tassuunakkut KNI A/S-ip Nuka A/S-imik tigusisinnaanissaa periarfissiunneqarpoq.

Nuka A/S-ip ileqqoreqqusai maannakkut atuuttut naapertorlugit selskabip siunertaraa aalisakkanit qalerualinnillu tunisassiassanit, neqaarniat tunisassiaannit nerisassanillu allanit nioqqutissiornermik niuernermillu, aammalu siulersuisut naliliinerat malillugu taakkununnga assingusunik ingerlatsinissaq kiisalu aningaasaliisarnermik ingerlatsinissaq.

Aningaasaliisarnermik ingerlatsineq pillugu Nuka A/S-ip tusarniaanermut akissummini oqaatigaa, selskabi angallatinik nutaanik pisinermut arlaleriarluni taarsigassarsisitsisimasoq. Tassuunakkut siunertaasimavoq amerlanerusunik tunitsivigineqarnissamik tunisallu pitsaassusiisa qaffasinnerunissaannik qulakkeeriniarneq. Periarfissap taassuma attatiinnarneqarnissaa selskabip neriuutigaa. Selskabi taarsigassarsiariteriikkaminik atorunnaarsitsisariaqalissappat taamaaliornissap kingunerluutigisinnaasai selskabip immikkut pingaartillugit taavai.

KNI A/S-ip ingerlataasa aningaasaliisarnermik ingerlatsinermik ilaqarnissaat pisariaqartutut naleqquttutulluunniit isigineqanngilaq, tassa aalisakkanit qalerualinnillu tunisassiassanit, neqaarniat tunisassiassaataannit nerisassanillu allanit nioqqutissiornermut nalinginnaasumik immikkulluunniit ittumik attuumassuteqartumik. Matumani eqqarsaatigineqanngillat aningaasaliisarnissamik isumaqatigiissutit pioreersut (tassa imaappoq aningaasaliisarnissamik isumaqatigiissutit Nuka A/S-ip Inatsisartut peqqussutaata atuutilerfissaa sioqqullugu isumaqatigiissutigisimasai). Siunnersuut tassunga naapertuuttumik ilusiligaavoq. Taamaammat Nuka A/S-ip malittarisassai allanngortillugit taamaallaat aningaasaliisarnermik ingerlatsinerup pioreersup selskabip siunertaani ilaatinneqalernissaa naatsorsuutigineqarpoq.

Aalajangersakkap aammattaaq usinik ilaasunillu nunaqarfinniit nunaqarfinnullu imaatigut assartuinermik ilaqartinneqalernissaa siunnersuutaavoq. Tassuunakkut siunertaavoq KNI A/S-ip Royal Arctic Bygdeservice A/S-imik tigusisinnaanissaa. Siunertaavortaaq KNI A/S-ip nunaqarfinnut nunaqarfinniillu usinik ilaasunillu angallassinermik ataatsikkoortitsisinnaanissaa, soorlu angallatit nioqqutissanik asiujasunik assartuutit ilaasunik assartuinermut akuerineqarsimasut atorlugit.

Royal Arctic Bygdeservice A/S-ip KNI A/S-imit tiguneqarnermini aterminik allanngortitsinissaa naatsorsuutaavoq.

§ 2, imm. 2-p allanngortinneqarani ingerlaannarnissaa siunnersuutaavoq. Aalajangersakkami allassimavoq ingerlatseqatigiiffiit ingerlatseqatigiiffinni aqutani tamakkiisumik ilaannakuusumilluunniit pigisaminni suliffeqarfiit allat suleqatigalugit allanillu ateqartitsillutik ingerlatsinertik pineqartoq ingerlassinnaagaat.

§ 2, imm. 3-p oqaasertassaatut siunnersuutip kingunerisaanik Naalakkersuisut ingerlatseqatigiiffissuup KNI-p ingerlatseqatigiiffiutaasa niuernermik tunngaveqartumik atugassaqartitsiffiusumik isumaqatigiissuteqartarnissaannik pisussaaffiliisinnaanerat annertusissaaq.

Aalajangersakkami maannakkut atuuttumi allassimavoq Naalakkersuisut ingerlatseqatigiiffiit nioqqutissanik ulluinnarsiutinik, inuussutissarsiornermullu atortunik kiisalu ikummatissanik imerpalasunik il.il. pilersuinermi pisortat sullissinerat pillugu niuernermik tunngaveqartumik atugassaqartitsiffiusumik isumaqatigiissuteqartarnissaannut pisussaaffilersinnaagaat.

Aalajangersakkap aammattaaq usinik ilaasunillu imaatigut assartuinermik kiisalu suliffissaqartitsiniarnerup annertusarneqarnissaanik suliniutinik, matumani aamma tunitsivinnik tunisassiorfinnillu pilersitsinissamik attassiinnarnissamilluunniit siunertaqartunik ilaneqarnissaa siunnersuutaavoq.

Tassuunakkut qulakkeerniarneqarpoq Namminersornerullutik Oqartussat, ingerlatseqatigiiffissuup KNI-p ingerlatseqatigiiffiutaasa inuiaqatigiit soqutigisaannik isumaginninnissartik siunertaralugu sullissinissamik isumaqatigiissuteqartarnissaannik pisussaaffiliisinnaanissaat.

Isumaqatigiissutit niuernermik tunngaveqartumik atugassaqartitsiffiunissaasa kingunerissavaat selskabip pineqartup ilaatigut isumaqatigiissutip kingunerisaanik selskabimut aningaasartuutinik (pisariaqartunik) matussusiisariaqarnera, ilaatigullu aamma naammaginartumik iluanaaruteqarsinnaanissaa. Naammaginartumik iluanaarutip suuneranut ilaatigut aalajangiisuussapput suliat tungaasigut niuernikkullu pissutsit (selskabip nammattariaqagai eqqarsaatigalugit). Naliliinermi aamma ilaassaaq unammilleqatigiinneq pillugu inatsisip aalajangiisuusutut inissisimanermik atornerluinissamut inerteqqutaa.


Nr. 2-mut:

Inatsisartut peqqussutaanni maanna atuuttumi § 3 atorunnaartussatut siunnersuutaavoq sunniutaarunnissaa pissutigalugu. Aalajangersagaq ima oqaasertaqarpoq:

"§ 3. Ingerlatseqatigiiffissuarmi KNI-mi ingerlatseqatigiiffiit KNI Pilersuisoq A/S-ip aamma KNI Pisiffik A/S-ip ingerlataasa ingerlanneqarnerat tigussavaat.
Imm. 2. TELE Attaveqaatit A/S-ip Kalaallit Allakkeriviata ingerlanneqarnera KNI Pilersuisoq A/S-imit ingerlanneqartoq kingusinnerpaamik 1. januar 1998-imi tigussavaa.
Imm. 3. KNI A/S-ip siulersuisui KNI Pilersuisoq A/S-ip umiarsuaateqarnermik bilitseerniarfinnillu ingerlatsinermik ingerlataqarnerminik unitsitsinissaa pillugu pilersaarusiorlutillu naalakkersuisunut inassuteqaasiussapput. Naalakkersuisut umiarsuaateqarnermik bilitseerniarfinnillu ingerlatsinerup tamakkiisumik ilaannakuusumilluunniit tunniunneqarnissaannik isumaqatigiissutit akuersissutigisinnaavaat, piumasaqaatigalugu nunaqarfinnik isorliunerusunillu ilaasunik angallassinikkut usinillu umiarsuartigut assartuinikkut sullissinerup ingerlaannarnissaat isumannaarneqassasut."

 

§ 2-mut

Inatsisartut peqqussutissaata ullormi 1. januar 2005-imi atortuulernissaa siunnersuutaavoq.