19. oktober 2004 UKA 2004/36
KNI A/S pillugu Inatsisartut peqqussutaata allanngortinneqarneranik Inatsisartut peqqussutaannut nr. xx, xx 2004-meersumut siunnersuut
(Ingerlatseqatigiiffissuup KNI-p ingerlataasa ilaneqarnissaat)
(Naalakkersuisut siulittaasuat)
Saqqummiussissut.
Siullermeerneqarnera.
KNI A/S pillugu Inatsisartut peqqussutaata allanngortinneqarneranik Inatsisartut peqqussutaannut nr. xx, xx 2004-meersumut siunnersuut matumuuna naalakkersuisut sinnerlugit saqqummiutissavara.
Naalakkersuisooqatigiit angallannikkut pissutsit pitsaanerusumik ataqatigiissaarneqarnissaannik sulissutiginninniarnerat naalakkersuisooqatigiinnissamik isumaqatigiissummi atuuttumi ilaavoq. Aammattaaq selskabit Namminersornerullutik Oqartussanit pigineqartut Naalakkersuisooqatigiinnit misissuiffigeqqissaarniarneqarput, pitsanngorsaataasussanut tunngaviliisussatut siunnersuutit nassaariniarneqarlutik aammalu selskabit ineriartornissamut periarfissaasa inuiaqatigiinnit tamakkiisumik iluaqutigineqarnissaat siunertaralugu allaffissorneq ataatsimoorussaq pisariitsorlu pilersinniarneqarluni. Taakkununnga ilutigitillugu aamma inuuniarnermi tunngaviusumik atugassarisaasut pitsanngorsaaviginiarlugit nunaqarfinni isorliunerusunilu ineriartornerup annertusarneqarnissaanut suliniutit Naalakkersuisooqatigiit siuarsaaviginiarpaat.
Naalakkersuisut 11. juni 2004-mi tunngaviusumik aalajangerput makku sulissutiginiarlugit:
- Royal Arctic Bygdeservice A/S-ip (RAB-ip) nioqqutissanik nunaqarfinnut pilersuinera KNI A/S-ip tigussagaa, imaluunniit RAB selskabitut KNI A/S-ip pigisaatut ingerlalissasoq.
- Arctic Umiaq Line A/S-ip nunaqarfinnut angallassinera (ilaasunik angallassinera) unitsinneqassasoq,
tamannalu KNI A/S-imit tiguneqassasoq.- KNI A/S-ip Nuka A/S tigussagaa.
Tassuunakkut qulakkeerniarneqarput:
- Nunaqarfinnik sullissinerup inuiaqatigiinnut aningaasartuutaanerata sutigut tamatigut akikinnerulernissaa, 2004-mut aningaasanut inatsimmi (ukiut missingersuusiorfiusut ilanngullugit) minnerpaamik missingersuutitigut annikilliliissutaasussatut annertussuseqartunik.
- Sullissinermi suliassat assigiinngitsut pitsaanerusumik ataqatigiissaarneqarnissaat.
- Nunaqarfinnik sullissineq qaffasinnerusoq kiisalu nunaqarfiit pisariaqartitaasa kissaataasalu aammalu sullissinerup neqeroorutigineqartup naapertuunnerusumik ataqatigiissaarneqarnissaat.
Naalakkersuisut tunngaviusumik aalajangernerannut ilaatigut tunngaviuvoq siunnersuisarfiup Arctic Innovators Aps-ip nalunaarusiaa. Siunnersuisarfik naliliivoq nunaqarfinnik sullissinermik ataatsimoortitsineq inuiaqatigiit aningaasatigut sipaaruteqarfigisinnaagaat, sullissineq ajornerulinngikkaluartoq atuisulluunniit akiliuteqartarnerat annertusinngikkaluartoq.
Naalakkersuisulli naliliipput nalunaarusiaq ataatsimoortitsinerup aningaasatigut sunniutissaanik erseqqissunik takussutissiinngitsoq. Taamaammat Naalakkersuisut ilassutissatut nalunaarusiamik Maersk Brokerimut piniarsimapput. Nalunaarusiaq taanna 17. september 2004-mi piareerneqarpoq.
Maersk Broker pingaarnertut naliliinermini allappoq:
" Suliakkiummik aqutsisut paasiniaaqqissaarneq kingornalu misissueqqissaarneq pillugit naliliinerat pingaarneq tassaavoq, Naalakkersuisut tunngaviusumik aalajangiinerat malillugu nunaqarfinni ingerlatanik KNI-p akissussaaffigisassaanik aqutassaanillu ataatsimoortitsiniarneq nunaqarfinni innuttaasut sullinneqarnerannut pitsanngoriaatissanik, aammalu inuiaqatigiit kalaallit ataatsimut isigalugit aningaasarsiornerannut pitsaaqutissanik arlaqartunik nassataqarumaartoq."Maersk Brokerilli siunnersuutigaa AUL A/S allanngortinneqassanngitsoq, taamaalillunilu KNI A/S-ip ataani ataatsimoortitsinermut ilaassanngitsoq.
Paasissutissat pigineqartut tunngavigalugit makku sulissutiginissaat Naalakkersuisut aalajangerpaat:
- Nuka A/S ulloq 1. januar 2005 KNI A/S-imut tunineqassasoq.
- RAB A/S ulloq 1. januar 2006 KNI A/S-imut tamakkiisumik tunineqassasoq, taamaattorli ukiumi 2005-imi ikaarsaariarnissamut piffissaqartitsisoqarluni.
Naalakkersuisut oqaasertaliussaq, Namminersornerullutik Oqartussat NUKA-mi aktiaataasa ullormi 1/1-2005-imi KNI A/S-imi aktianik pisissutigineqarnissaannik Naalakkersuisunik piginnaatitsisoq, 2005-imut aningaasanut inatsisissatut siunnersuummut allannguutissatut siunnersuutitut saqqummiutissavaat.
Aammattaaq Naalakkersuisut oqaasertaliussamik, Royal Arctic Line A/S-ip Royal Arctic Bygdeservice-imi aktiaatiminik 1. januar 2006 aallarnerfigalugu agguaassinissaanik taakkualu tassunga ilutigitillugu KNI A/S-imi aktianik pisissutigineqarnissaannik Naalakkersuisut selskabip ileqquusumik ataatsimeersuarnerani qinnuiginninnissaannik piginnaatitsisumik saqqummiussissapput.
Kiisalu KNI A/S pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuut manna saqqummiunneqarpoq. Siunnersuutip siunertaraa KNI A/S-ip umiarsuaatileqatigiiffimmik ingerlatsinissamut, matumani aamma ilaasunik angallassinissamut kiisalu tunitsiviunissamut nioqqutissiornissamullu periarfissinneqarnissaa.
Ingerlatseqatigiiffissuup KNI-p ingerlatsinera pillugu aalajangersakkani maanna atuuttuni allassimavoq, ingerlatseqatigiiffissuup selskabiutai niuernermik tunngaveqarlutik quersuarniit niuertarfinniillu niuernermik taassumalu assigisaanik ingerlataqarnermik ingerlatsissasut.
Ingerlatseqatigiiffissuup ingerlatsineranut periarfissat taakku siunnersuutikkut annertusineqarnerisa kingunerisaanik ingerlatai siunissami makkuulissapput:
- Quersuarniit niuertarfinniillu niuerneq.
- Aalisakkanit qalerualinnillu tunisassiassanit, neqaarniat tunisassiaataannit inuussutissanillu allanit nioqqutissiorneq aammalu pineqartunut tunngatillugu aningaasalersuisalernissaq ilanngullugu.
- Usinik ilaasunillu nunaqarfinnut nunaqarfinniillu imaatigut assartuineq.
Inatsisartut peqqussutaat maanna atuuttoq naapertorlugu Naalakkersuisut ingerlatseqatigiiffissuup ingerlatseqatigiiffii pisussaaffilersinnaavaat nioqqutissanik ulluinnarsiutinik, inuussutissarsiornermut atortunik, ikummatissanik imerpalasunik il.il. pilersuinermi pisortat sullissinerat pillugu niuernermik tunngaveqartumik atugassaqarfiusunik isumaqatigiissuteqartarnissaannut.
Ingerlatseqatigiiffissuup ingerlatseqatigiiffiisa niuernermik tunngaveqartumik atugassaqarfiusunik isumaqatigiissuteqartarnissaannut Naalakkersuisut pisussaaffiliisinnaanerat siunnersuutikkut annertusillugu aammattaaq usinik ilaasunillu imaatigut assartuinermik kiisalu suliffissaqartitsiniarneq annertusarniarlugu suliniutinik, matumani aamma tunitsivinnik tunisassiorfinnillu pilersitsinissamik attassiinnarnissamilluunniit siunertaqartunik ilaneqarpoq.
Tassuunakkut Namminersornerullutik Oqartussat inuiaqatigiit soqutigisaasa isumannaarneqarnissaannik qulakkeerinissaat periarfissinniarneqarpoq.
KNI pillugu peqqussummik allannguinissaq nunaqarfinni ingerlatanik ataatsimoortitsinissap ingerlanneqarsinnaanissaanut aalajangiisuussaaq. Kisianni KNI pillugu peqqussummik allannguinermi erseqqissumik isummerfigineqanngilaq nunaqarfinni ingerlatanik ataatsimoortitsinissaq qanoq ingerlanneqassanersoq.
Taamatut oqaaseqarlunga peqqussutissatut siunnersuut Inatsisartunut ajunngitsumik isummerfigisassanngorlugu suliassanngortippara.