Katersugaasiveqarneq pillugu Inatsisartut peqqussutaata allannguuteqartinneqarnissaa pillugu Inatsisartut peqqussutaat nr. 4, 21. maj 2004-meersoq.
(Naalagaaffeqatigiit Naalagaaffiit Peqatigiit Imaq pillugu inatsisinik atuutsitsineq pillugu isumaqatigiissutaannik 10. december 1982-imeersumik atortussanngortitsinerisa kingunerisaanik allannguutit)

 

1

Katersugaasiveqarneq pillugu Inatsisartut peqqussutaat nr. 6, 30. oktober 1998-imeersumi imatut allannguisoqarpoq:


1.
24-p kingorna ilanngunneqassaaq:
" 24a. Qangarsuarnitsat nassaarineqartut, tassunga ilaallutik umiarsuit umiiarnerit, umiarsuit userisimasaat sinnikullu umiarsuit umiiarnerinit pisut ukiut untritillit sinnerlugit annaaneqarsimasorisatut naatsorsuuttariaqartut, immap itisoortaani Kalaallit Nunaanni aalajangersimasumik akunnikkallarlutilluunniit najugaqartunit Danmarkimi innuttaasunit imaluunniit Danmarkimi nalunaarsorneqarsimasutut Kalaallit Nunaanni inissisimaffeqartumit umiarsuarmit nassaarineqartut, nunat allat inuit ataasiakkaalluunniit piginnittuunertik uppernarsarsinnaanngippassuk, imm. 2 naapertorlugu Namminersornerullutik Oqartussanit pigineqartuupput.
Imm. 2. Immap itisoortaatut eqqaaneqartoq imatut paasineqassaaq tassaasoq immap naqqa tamatumalu nunataata ataa naalagaaffiup oqartussaaffiata killeqarfiata avataaniittuusoq.
Imm. 3. Imm. 1 naapertorlugu nassaat ingerlaannartumik Nunatta Katersugaasivianut nalunaarutigineqartassapput.
Imm. 4. Immap naqqani kulturikkut eriagisassat, Namminersornerullutik Oqartussanit, Kalaallit Nunaanni aalajangersimasumik akunnikkallarlutilluunniit najugaqartunit Danmarkimi innuttaasunit inatsisillu naapertorlugit inunnit Kalaallit Nunaanni najugaqartunit pigineqartut pissusii Naalakkersuisut akuersiteqqaarnagit allanngortinneqaqqusaanngillat, takuuk imm. 1. Immap naqqani kulturikkut eriagisassanik allanit pigineqartunik Kalaallit Nunaanni aalajangersimasumik akunnikkallarlutilluunniit najugaqartut Danmarkimilu innuttaasut inatsisillu naapertorlugit inuit Kalaallit Nunaanni najugaqartut, pineqartunit akuerineqaqqaaratik allannguisussaanngillat imaluunniit allannguititsiniartussaanngillat.
Imm. 5. Imm. 1 naapertorlugu Namminersornerullutik Oqartussanit pigineqartunik nassaanik qaqitsisoq nassaanillu taamaattunik tigummisaqalersoq nassaaminik ingerlaannartumik Nunatta Katersugaasivianut tunniussissaaq. Qaqitsisoq nassaarnermini akissarsisitsinneqarnissamik piumasaqarsinnaanngilaq.
Imm. 6. Qangarsuarnitsat nassaarineqartut, tassunga ilanngullugit umiarsuit umiiarnerit, umiarsuarnut usiusimasut ukiut untritillit inorlugit annaaneqarsimasorisat, imm. 1-imi aalajangersakkamut ilaatinneqarsinnaasut Naalakkersuisut aalajangersinnaavaat.
Imm. 7. Imm. 3-6-imi pissutsit taaneqartut pillugit Naalakkersuisut erseqqinnerusunik malittarisassanik aalajangersaasinnaapput."

2. 25-imi, imm. 2-mi uniffittut 2-tut ilanngunneqarput:
"1.-imi aalajangersagaq 24a, imm. 1-imi taaneqartuni nassaanut atuutissanngilaq, aamma taamatut atuupput 24a, imm. 6 aamma 7 naapertorlugit aalajangersakkat."

3. 33-mi "24"-p kingornagut ikkunneqassaaq: "24a, imm. 3-5"

4. 33-mi imm. 3-tut ilanngunneqassaaq:
"Imm. 3. Inatsisartut peqqussutaat una naapertorlugu malittarisassani saqqummiunneqartuni, aalajangersakkanik unioqqutitsisoqartillugu akiilisussanngortitsisinnaaneq pillugu malittarisassaliortoqarsinnaavoq".

2

Inatsisartut peqqussutaat 1. juni 2004-mi atuutilissaaq, atuuttuussallunilu immap naqqani kulturikkut eriagisassat pissusiisa allannguutaannut tunngatillugu, taakkununnga ilaallutik piffissap tamatuma kingorna nassaat qaqinneqartut.




Namminersornerullutik Oqartussat, ulloq 21. maj 2004




Hans Enoksen

/

Henriette Rasmussen


Siullermeerinninnermut siunnersuut

Siunnersuummut nassuiaatit

Isumaliutissiissut (Aappassaaneerinninneq)

Pingajussaaneerinninnermut siunnersuut