Kalaallit Nunaanni Namminersornerullutik Oqartussani kommuninilu tjenestemandit pillugu Inatsisartut inatsisissaat nr. 21, 18. december 2003-imeersoq
Kapitali 1
Inatsisip atuuffii§ 1. Inatsisartut inatsisaat manna kikkunnulluunniit Kalaallit Nunaanni Namminersornerullutik Oqartussani kommuniniluunniit tjenestemanditut atorfinitsinneqarsimallutik sulisorineqartunut kiisalu inunnut § 35, imm. 3 tunngavigalugu atorfinitsinneqarsimasunut atuuppoq, taamaattorli tak. imm. 2.
Imm. 2. Inatsisartut inatsisaat manna Inatsisartut suliffeqarfiini atorfeqartitaasunut atuutinngilaq.
Kapitali 2
Atorfinnik amerlassusiliineq qaffasissusiliinerlu§ 2. Namminersornerullutik Oqartussani tjenestemanditut atorfiit qassiussusissaannik aalajangersaaneq atorfiit qassiussusissaannik najuqqutassiamut ilanngunneqassaaq. Kommunini tjenestemanditut atorfiit qassiussusissaannik aalajangersaaneq kommunimi atorfiit qassiussusissaannik najoqqutassiaq aqqutigalugu pissaaq.
Imm. 2. Tjenestemanditut atorfiit qaffasissusilersorneqarnerat kapitali 12-imi malittarisassat malillugit pissaaq.
Kapitali 3
Atorfinitsitsisarneq§ 3. Tjenestemanditut atorfinitsitsineq ukunatut ilusilerlugu pisarpoq:
1) Misiligummik atorfinitsitsineq, kingusinnerusukkut ataavartumik atorfinitsitsinissaq siunertaralugu.
2) Ataavartumik atorfinitsitsineq.
3) Ukiuni killilinni atorfinitsitsineq.§ 4. Namminersornerullutik Oqartussani tjenestemandit Naalakkersuisunit ivertinneqartassapput. Kommunini tjenestemandit kommunalbestyrelsinit ivertinneqartassapput.
§ 5. Tjenestemanditut atorfinitsitsinermi pineqartup ukiuni, peqqissutsi ilinniakkanilu naapertorlugit atorfimmi pineqartumi suliassaminik ingerlatsinissaq sapinngikkaa tunngavigineqartarpoq. Ukiutigut, peqqissutsikkut ilinniagaqarsimanikkullu piumasaqaatit inatsisini allani inatsilluunniit manna tunngavigalugu malittarisassani aalajangersarneqarsimatinnagit malittarisassat piumasaqaatinik taamaattunik imaqartut Naalakkersuisunit aalajangersarneqarsinnaapput.
§ 6. Tjenestemanditut atorfinitsitsineq tamanut ammasumik allagarsiinerup kingorna pisassaaq, pineqartoq misiligummik atorfinitsinneqareernermi kingorna atorfinitsinneqassanngippat.
Imm. 2. Allagarsiussami atorfinitsitsivissaq atorfiullu taaguutaa kiisalu najukkami suliffiusumi massakkut atuuttumi akissaateqarfimmi atuuttumi sumiinnerat nalunaarneqassapput.
Imm. 3. Qinnuteqarnissamut piffissarititaasoq sivikinnerpaamik sapaatit akunnerinik pingasunik sivisussuseqassaaq, pissutsit immikkorluinnaq ittut atuutinngippata.
Imm. 4. Allagarsiinermi periaaseq pillugu malittarisassat erseqqinnerusut Naalakkersuisut aalajangersarsinnaavaat, aamma Aningaasarsiaqartitsineq pillugu Siunnersuisoqatigiit oqaaseqaateqartereerlugit imm. 1-imi aamma 2-mi malittarisassanik sanequtsisinnaanerit aalajangersarsinnaallugit.§ 7. Qinnuteqaateqarnissamut piffissaritaasoq naappat qinnuteqartut kattuffiillu, ilaasortaat atorfimmut qinnuteqartussatut pisussissamisoortut, piumasaqarnerisigut qinnuteqartut tamarmik aqqi pillugit paasissutissanik allattuiffik kiisalu inuit ataasiakkaat pillugit paasissutissanik ilaqartinneqarsinnaasoq, qinnuteqartut kikkuussusersinissaannut pisariaqartoq tunniunneqassaaq.
Imm. 2. Paasissutissat imm. 1 malillugu tunniunneqartut qinnuteqartut tamaasa akuersisereerlugit tamanut ammasumik issuarneqarsinnaapput.
Imm. 3. Qinnuteqartut tamakkerlutik atorfinitsitsisarnermi oqartussaasumut tamanut ammasumik issuaasinnaaneq akuersissutigisimanngippassuk, qinnuteqartut aqqinik allattuiffimmit, taassumaluunniit ilaanik, tamanut ammasunik issuaasinnaaneq pissanngilaq. Tamatuminnga unioqqutitsineq akiliisitsinermik kinguneqassaaq. Sulinermut kattuffimmit unioqqutitsisoqarpat, sulinermut kattuffik taamaattutut akiliisitaanermut akisussaatinneqarsinnaavoq.§ 8. Atorfimmut inuttassarsiuullugu allagarsiissutigineqarsimasumut piffissaagallartillugu qinnuteqartut arlaannaalluunniit atorfimmut naammattumik piukkunnaateqanngitsoq atorfinitsitsinermi oqartussaasoq naliliippat, imaluunniit nutaamik allagarseeqqinnikkut qinnuteqartunik piukkunnaateqarnerusunik pissarsisoqarsinnaappat atorfik inuttassarsiuullugu allagarsiuteqqinneqassaaq.
§ 9. Ataavartumik atorfinitsitsisineq siulleq misilugummik atorfeqartitsereernikkut pissaaq.
Imm. 2. Naalakkersuisut Aningaasarsiaqartitsineq pillugu Siunnersuisoqatigiinnik oqaaseqaateqartitsereerlutik imm. 1-imi malittarisassap saneqqunneqarsinnaanera pillugu malittarisassanik aalajangersaasinnaapput.
Imm. 3. Misiligummik atorfinitsitsineq pillugu malittarisassat Naalakkersuisut aalajangersarsinnaavaat, matumani ilinniagaqarsimaneq tamatumalu qanoq inerneqarsimanerata paasineqarnissaa ilanngullugit eqqarsaatigalugit.§ 10. Tjenestemandi atorfimmut inuttaqanngitsumut qinnuteqarpat tjenestemandip pisortarisaa tjenestemandip qinnuteqarneratigut tjenestemandi pillugu allakkatigut naliliilluni oqaaseqaateqassaaq.
§ 11. Atorfinitsitsinermi allakkiaq atorfiup taaguutaanik atorfiusumillu ilaqartinneqartoq tjenestemandimut tunniunneqassaaq.
Imm. 2. Tamatumunnga peqatigitillugu atorfiup qanoq massakkut qaffasissusilerneqarsimanera tjenestemandillu sumi sulinerminik ingerlatsigallarnissaa tjenestemandimut nalunarutigineqassapput.
Imm. 3. Kinaluunniit tjenestemanditut atorfinni arlalinni ataatsikkut inatsisartut inatsisaat manna malillugu ataavartumik atorfinitsitaasinnaanngilaq.
Imm. 4. Inatsisartut inatsisaat manna malillugu tjenestemanditut atorfimmi kiisalu inatsit, ileqqoreqqusaq taakkuluunniit assigisaat malillugit atorfimmi ataasiusumi ataatsikkut atorfinitsitsisoqartillugu soraarnerussutisiat tjenestemandip soraarninngornerata nalaani soraarnerussutisiat pillugit inatsit, ileqqoreqqusaq taakkuluunniit assigisaat atorfimmut tjenestemandip atorfigisaanut atuuttoq malillugu tunniunneqartassapput.
Kapitali 4
Tjenestemandip pisussaaffii§ 12. Malittarisassat atorfimmut atuuttut tjenestemandip peqqusersuilluni malissavai, kiisalu atorfimmut naapertuttuumik ataqqinassuseqarnissamik tatigineqarnissamillu piumasaqaataasunik eqqortitsisinnaanini sulinermini sulinermilu avataani takutissallugit.
Imm. 2. Pissutsit tjenestemandip suliffini aqqutigalugu ilisimalikkani, pissutsimikkullu isertuuttariaqartut, tjenestemandip nipangiusimassavai. Nipangiussisussaatitaaneq tjenestemandip atorfimmit tunuarneratigut atorunnaarneq ajorpoq.§ 13. Tjenestemandinut atorfeqarfik inatsit manna tunngavigalugu atorfinitsitsiviusoq sumiinneq eqqarsaatigalugu Kalaallit Nunaanni tjenestemandit atorfiinut aalajangersarneqarpoq.
§ 14. Tjenestemandi atorfimmi nammineq atorfimmi taamaaqataani atorfimmiluunniit qutsinnerusumi suligallarsinnaanissaminut pisussaaffeqarpoq.
§ 15. Tjenestemandi suliami annertussusiisigut suussusiisigullu allanngortiterivigineqarnerminik, sulinerup pisussaanik allanngortitsinngitsunik, atorfiullu tjenestemandimut tulluanngitsutut isigineqarsinnaajunnaarneranik kinguneqanngitsunik akuerinninnissaminut pisussaaffeqarpoq.
Imm. 2. Ingerlatsiviup aaqqissuussaanerata suleriaasiataluunniit tamanna pisariaqalersippagu kattuffissuaq pineqartoq isumaqatigiissuteqarfigereerlugu tjenestemandi peqquneqarsinnaavoq atorfik manna tikillugu atorfinitsitsiviusup avataaniittoq tigussagaa.
Imm. 3. Tjenestemandi 60-it inorlugit ukiulik peqqiilliornini pissutigalugu atorfimmini sulianik isumaginninnissaminut naleqqukkunnaarpat, atorfik tjenestemandimut tassunga naleqquttutut isigineqartariaqartoq tigoqqullugu tjenestemandi peqquneqarsinnaavoq.§ 16. Sulinermi pisussaaffiit naammassiniarneqarnerat eqqarsaatigalugu sulisunut inissiamik atorfimmut atatitsinissaq naliliinikkut pisariaqartutut isigineqarpat tjenestemandip atorfini atorfigigallartillugu taanna najugaqarfigissallugu pisussaaffeqarpoq, tamatumalu kingorna taanna aamma qimattussaallugu, taamaattorli tak. § 33, imm. 1-imi oqaaseqatigiit kingulliit.
Imm. 2. Sulisunut inissiat pisatsersorneqarneri, aserfallatsaalineqarneri atorneqarnerilu kiisalu inissiat taamattut iserterfigineqartarneri qimanneqartarnerilu il.il. pillugit aalajangersakkat Aningaasarsiaqartitsineq pillugu Siunnersuisoqatigiit oqaaseqaateqartereerlugit Naalakkersuisunit aalajangersarneqartassapput. Taamaattorli tjenestemandip sulisunut inissiamik atuinermut akiliutai kapitali 12-imi malittarisassat malillugit aalajangersarneqartassapput.
Imm. 3. Imm. 1-imi pisut taaneqartut saniatigut inissianik qanoq annertutigisumik innersuussisoqartarnissaa kapitali 12-imi malittarisassat malillugit aalajangersarneqassaaq. Tjenestemandi atorfimmi tassani atorfeqarnermi nalaani inissiamik taamaattumik najugaqarsinnaatitaavoq, tamatumalu kingorna inissiap qimannissaa pisussaaffigalugu, taamaattorli tak. § 33, imm. 1-imi oqaaseqatigiit kingulliit.§ 17. Tjenestemandi qinikkatut pisortanilluunniit toqqakkatut suliaminik qinnuteqarnermigut Naalakkersuisunit ingerlatsiunnaarsinneqarsinnaavoq, tamanna atorfinitsitsinermi oqartussaasup suliat illersorneqarsinnaasumik suliarineqarnissaat eqqarsaatigalugu pisariaqartutut isigippagu. Tjenestemandip qinnuteqaateqarnera tunngavigalugu atorfinitsitsinermi oqartussaasup Naalakkersuisut qinnuigissavai aalajangeeqqullugit.
Imm. 2. Tjenestemandip qinikkatut pisortanilluunniit toqqakkatut suliaminik ingerlatsinerata kingunerisaanik tjenestemandip peqannginnerani taassuma suliassaasa suliarineqarnerannut aningaasartuutit qanoq annertutigisumik atorfinitsitsinermi oqartussaasumit akilerneqartarnissaat pillugu malittarisassat Naalakkersuisut aalajangersarsinnaavaat.§ 18. Tjenestemandi tjenestemanditut atorfimmi saniatigut taamaallaat suliffeqarsinnaavoq tamanna pisussaaffiit atorfimmut atasut suliarineqarnerannut akornutaanngitsumik atatinneqarsinnaappat, atorfiullu pisariaqarneratut ataqqineqarnissaanut tatigineqarnissaanullu naapertuuppat.
§ 19. Tjenestemandi tjenestemanditut atorfini malillugu pisussaaffimminik isumaginninnini kiisalu suliani tjenestemanditut atorfiup ilaatut isigisariaqartut pillugit taamaallaat akissariaqarsinnaavoq allanillu aningaasarsisinnaalluni §§-it 47-mit 49-mut imaluunniit § 56 tunngavigalugit aalajangersarneqarsimasunik.
Kapitali 5
Suliunnaarsitaagallarneq naalasseriilliornerlu pissutigalugu suliassanngortitsisarneq§ 20. Tjenestemandi pissutsit atorfiup ingerlanneqarnerani tatigineqarnissamut assortuuttuusut pillugit tunngavissaqartumik pasineqarpat, imaluunniit tjenestemandip atorfimmini ingerlaannarnissaa eqqarsarnartoqarpat, tjenestemandi suliunnaarsitaagallarsinnaavoq suliamulluunniit allamut nuutsikkallarneqarsinnaalluni.
Imm. 2. Pissutsit imm. 1-imi atuuttut pinerluttulerinermik inatsit tunngavigalugu misissuiffigineqanngitsut attuuppata naalasseriilliorneq pissutigalugu misissuisarneq pillugu §§-ni 21-mit 27-mut malittarisassat atorneqassapput.
Imm. 3. Naalakkersuisut suliunnaarsitsigallarnerup aallartinneqarnera unitsinneqarneralu pillugit malittarissanik erseqqinnerusunik aalajangersaasinnaapput.§ 21. Tjenestemandi atorfeqarnini pissutigalugu atorfimmini unioqqutitsinerit pissutsilluunniit pinerluttulerineq pillugu inatsit tunngavigalugu pineqaatissiissutaasinnaasut pillugit nalunaarutigineqartoq suliami pisimasorpiaat pillugit saqqummiussamik tunineqassaaq, saqqummiussarlu pillugu allakkatigut oqaaseqaatiminik tunniussinissaminut periarfissaqartinneqassalluni. Tjenestemandi tamatumunnga peqatigitillugu ilisimatinneqassaaq saqqummiussap oqaaseqaateqarfiginissaanut pisussaaffiligaanngitsoq.
Imm. 2. Tjenestemandi sulinerminut atatillugu unioqqutitsinermigut naalasseriilliorneq pissutigalugu misissuiffigineqalerpat atorfinitsitsinermi oqartussaasup Kalaallit Nunaanni Eqqartuussisuuneq killisiuinermik ingerlatsisussamik toqqaaqqullugu qinnuigissavaa. Suliap qanoq ittuussusia tunngavigalugu Kalaallit Nunaanni Eqqartuussisuunerup naliliinermigut tamanna pisariaqartutut isigiguniuk Kalaallit Nunaata avataani eqqartuussiviit ilaata siulittaasua killisiuinermik ingerlatsisussamik toqqaaqqullugu qinnuigisinnaavaa.§ 22. Tjenestemandi illersuisoqarluni oqalutseqarlunilu ornigunnissaminut pisinnaatitaavoq, killisiuinermullu siullermik aggeqquneqarnermini tamatuminnga ilisimatinneqassalluni.
Imm. 2. Kattuffiup tjenestemandip ilaasortaaffigisaata sinniisaa, atorfinitsitsinermut oqartussaasumi suliffeqarfimmiluunniit sulisorineqartoq alla imaluunniit eqqartuussissuserisoq illersuisutut atorneqarsinnaavoq.
Imm. 3. Tjenestemandi oqaasissami allallugit tunniunnissaannut pisinnaatitaavoq, aamma killisiuinerit naammassereernerisigut.§ 23. Ilisimannittunik sassartitsisoqarnissaa uppernarsaatinillu allanik pissarsisoqarnissaa killisiuinermik ingerlatsisup aalajangissavaa.
Imm. 2. Atorfeqartitaasoq kinaluunniit killisiuinernut orniguttussaatitaavoq nassuiaateqartussaatitaallunilu. Ilisimannittutut eqqunngitsumik nassuiaateqartoq pinerluttulerineq pillugu inatsimmi § 85 tunngavigalugu eqqartuussutikkut pineqaatissinneqarsinnaavoq. Ilisimannittuusoq ornigutinngitsoorpat imaluunniit nassuiaateqarumanani pinaaserpat killisiuinermi pisortap ilisimannittuusoq taanna najukkami killisiuinermik ingerlatsiviusumi pineqartulluunniit najugarisaani eqqartuussivimmut killisiortissinnaavaa.
Imm. 3. Suliaq naammassillugu suliarineqareerpat killisiuinermik ingerlatsisoq nalunaarummik tunniussissaaq. Atorfinitsitsinermi oqartussaasup imaluunniit kattuffissuup tamanna kissaatigippagu killisiuinermik ingerlatsisoq suliap qanoq aalajangiivigineqarnissaa pillugu inassuteqaateqassaaq.§ 24. Tjenestemandimik killisiuinerit eqqartuussinerillu suliap suliarineqarnerani ingerlanneqartut tamanut ammasuunngillat. Taamaattorli suliap suliarineqarnera tamanit najuuffigineqarsinnaassasoq atorfinitsitsinermi oqartussaasup aalajangersinnaavaa, tamanna tjenestemandip kattuffissuullu qinnutigippassuk.
Imm. 2. Killisiuinerni eqqartuussinernilu tamanut ammasuunngitsuni pisimasunik tamanut ammasumik issuaasoq akiliisussanngortillugu eqqartuunneqassaaq.
Imm. 3. Imm. 2-mi aalajangersakkami suliap suliarineqarnerani killisiuinerni eqqartuussinernilu paasissutissat oqaasiinnartigut allakkatigullu saqqummertut ilaatinneqarput.§ 25. Suliap suliffimmut atorfimmulluunniit allamut nuutsitsinermik, atorfimmi appartitaanermik, imaluunniit soraarsitsinermik inerneqarnissaa naatsorsuutigineqarpat kattuffissuaq suliap qanoq inissisimaneranik nalunaarfigineqassaaq, taamaaliornikkut taanna suliap aalajangiivigineqannginnerani suliaq pillugu oqaaseqaateqarnissaminut periarfissaqartillugu.
Imm. 2. Kattuffissuaq qinnuteqarnermigut paasissutissat atorfeqarnermik misissuinikkut pissarsiarineqartut tunngavigalugit aalajangiineq pillugu ilisimatinneqartussaavoq.
Imm. 3. Tjenestemandi pissutsit pinerluttulerineq pillugu inatsit tunngavigalugu pineqaatissiissutaasinnaasut pillugit pasineqarpat suliap pinerluttuliornertut suliarineqarnissaa tjenestemandip piumasarisinnaavaa. Pinerluttuliornertut suliap inaarlugu suliarineqarnerata kingorna tjenstemandip atorfeqarnermi killisiuiffigineqarnissaanut periarfissaqarpoq.
Imm. 4. Tjenestemandip atorfeqarnerminik killisiorneqaqqaarnani atorfimmini naalasseriitsuliortutut pillaatisisup, tak. § 27, atorfeqarnermi misissuiffigineqarnissaa piumasarisinnaavaa. Piumasarineqartorli taanna aatsaat akuerineqartussaavoq kattuffissuarmit ilalerneqarpat.§ 26. Misissuineq atorfimmi naalasseriilliorneq pissutigalugu pillaanertaqanngitsumik inerneqarpat tjenestemandi illersuisumut oqalutsimullu aningaasartuutiminik taarsiivigineqassaaq. Pisuni allani illersuisumut oqalutsimullu aningaasartuutit tamakkiisumik ilaannakortumilluunniit taarsiissutigineqassanersut atorfinitsitsinermi oqartussaasup suliap qanoq inerneqarnera pissutsillu allat isiginiarlugit aalajangissavaa.
Imm. 2. Imm. 1 malillugu taarsiissutit pissutsinut naapertuuttunik aningaasartalerlugit tunniunneqassapput, kisianni aatsaat tjenestemandip illersuisumut aningaasartuuteqarsimanera naapertuuttutut isigineqarpat. Killisiuinermik ingerlatsisoq qinnuigineqarluni tamanna pillugu oqaaseqaateqassaaq.
Imm. 3. Tjenestemandi atorfimmi naalasseriilliorneq pissutigalugu suliami uppernarsaatinik nammineerluni pissarsiniarsimappat tamatumunnga aningaasartuutai tamakkiisumik ilaannakortumilluunniit taarsiissutigineqassapput, tjenestemandi uppernarsaatinik pissarsiniarnissamut pissutissaqarluarsimasutut isigineqarpat. Killisiuinermik ingerlatsisoq qinnuigineqarluni tamanna pillugu oqaaseqaateqassaaq.§ 27. Atorfimmut tunngasumik unioqqutitsinermut pillaatitut mianersoqqussut imaluunniit assuarinninneq, akiliisitsineq, taamaattorli qaammammusiat affaannit amerlanerusinnaanngitsunik, suliamut allamut, suliffimmut allamut atorfimmulluunniit allamut nuutsitsineq, atorfimmi appartitsineq soraarsitsinerluunniit atorneqarsinnaapput.
Imm. 2. Allakkatigut tamakkiisumik nassuerutiginninneq, pissutsini pasilliutigineqartuni pisimasuinnik tjenestemandip nassuerutiginninneranik kiisalu suliamut tunngasumik unioqqutisisimanermi pisuussutut tjenestemandip nassuerutiginninneranik imalik tiguneqarpat akiliisitsineq imaluunniit suliamut allamut nuutsitsineq atorneqarsinnaavoq, §§-ni 21-mit 26-mut aalajangersakkat tunngavigalugit killisiuisoqanngikkaluartoq.
Imm. 3. Mianersoqqusineq, assuarinninneq imaluunniit qaammammusiat 1/25-ii ataallugit akiliisitsineq atorneqarsinnaavoq, allakkatigut nassuertoqanngikkaluartoq killisiuisoqanngikkaluartorluunniit.
Imm. 4. Suliamut tunngatillugu unioqqutitsinernut pillaatitut suliffimmut atorfimmulluunniit allamut nuutsitsineq, suliami appartitaaneq, atorfimmut tunngasumik killisiuisoqareersimappat aatsaat atorneqarsinnaapput, unioqqutsitsineq eqqartuussutikkut aalajangiivigineqarsimanngippat.
Imm. 5. Akiliisitsissutissanngortinneqartut akissarsianit unerartinneqarsinnaapput.
Kapitali 6
Soraarsitsisarneq§ 28. Tjenestemandit atorfinitsitsisartutut oqartussaasunit § 4-mi taaneqartunit soraarsinneqartarput.
§ 29. Tjenestemandit qaammatinik pingasunik piffissaliillutik qaammatip naaneranut soraarsinneqarnissaminnik piumasaqarsinnaapput, taamaattorli tak. § 34.
§ 30. Tjenestemandit qaammatinik pingasunik piffissaqartitaallutik qaammatip naaneranut qinnuteqaataanngitsumik soraarsinneqarsinnaapput. Taamaattorli soraarsitsineq sivikinnerusumik piffissaqartitsilluni pisinnaavoq, tamanna tjenestemandip pissutsit pinerluttulerineq pillugu inatsit tunngavigalugu pineqaatissiissutigineqarsinnaasut, atorfimmut tunngatillugu unioqqutitsineq imaluunniit atorfimmik paarsinerlunneq pissutigalugit atorfimminiiginnarnissaanut naleqqutinngineranik tunngavilersorneqarpat.
Imm. 2. Tjenestemandit ukiuni killiligaasuni atorfeqartitaasut § 30, imm. 1-imi aamma § 31-mit maleruagassat malillugit qinnuteqaatitaqanngitsumik soraarsinneqarsinnaapput. Taamatuttaaq ukiut killiligaasut naappata atorfeqartitsineq atorunnaassaaq.§ 31. Tjenestemandit qaammatip 65-inik ukioqalerfimmik naanerani imaluunniit 60-it qaa-ngerlugit ukioqalernermi kapitali 12-imi malittarisassat malillugit aalajangersagaasumik soraarsinneqarsinnaapput.
§ 32. Tjenestemandip qinnuteqaataanngitsumik soraarsinneqannginnerani, pisut § 31-mi taaneqartut ilanngunnagit, kattuffissuaq tjenestemandilu nammineq oqaaseqaateqarnissaminnut periarfissaqartinneqassapput, §§-ni 21-mit 25-mut aalajangersakkat malillugit killisiuisoqarsimanngippat.
Imm. 2. Qinnuteqaataanngitsumik soraarsitsinerit suulluunniit sioqqullugit, pisut § 31-mi taaneqartut ilanngunnagit, soraarnerussutisiaqartitsineq pillugu oqartussaasoq tjenestemandip soraarnerussutisiaqarumalluni piumasaqaataa pillugu oqaaseqaateqartinneqartassaaq. Tamanna qinnuteqaataasumik soraarsitsinermi aamma atuuppoq, soraarnissamik qinnuteqaat peqqiilliornermik pissuteqarpat.§ 33. Ingerlatsiviup aaqqissuussaanerani suleriaasianiluunniit allannguutit kingunerisaannik atorfiup atorunnaarsinneqarnera pissutigalugu tjenestemandi soraarsinneqarpat, tjenestemandillu suliffimmut allamut tjenestemandip § 15 malillugu tigussallugu pisussaaffigisaanik innersuussinissamut periarfissaqanngippat, tjenestemandip tamanna tikillugu akissarsiani ukiuni pingasuni pigiinnassavai, taamaattorli atorfimmut atatillugu ukioq soraarfissatut aalajangersarneqarsimasoq qaangernagu. Piffissami tassani tjenestemandi § 15-imi malittarisassani pineqartunut ilaatinneqarpoq. Piffissami tassani tjenestemandip sulisunut inissiami ineqarsinnaatitaanini aamma pigiinnassavaa.
Imm. 2. Pineqartoq tjenestemandit soraarnerussutisiaqartitaanerat pillugu inatsimmi § 3 malillugu soraarnerussutisiaqarnissamik ukiunik naatsorsuinermi ilaatinneqartutut tjenestemanditut atorfinitsinneqarpat § 1 malillugu suliartoqquneqariataarsinnaanermut akissarsiat atorunnaassapput. Tamanna utaqqinermi aningaasarsianut, tjenestemandit pillugit inatsit 9. juni 1971 sioqqullugu atuuttoq tunngavigalugu tjenestemandimut pisassanngortinneqarsimasinnaasunut aamma atuuppoq.
Imm. 3. Ukiuni killiligaasuni atorfeqartitaanermi suliartoqquneqariataarsinnaanermi akissarsiat sivisunerpaamik ukiut killigaasut naanissaasa tungaanut tunniunneqartassapput.
Kapitali 7
Misiligummik atorfeqartitaasut pillugit aalajangersakkat immikkut ittut§ 34. Tjenestemandi misiligummik atorfeqartitaasoq misiligummik atorfeqartitaanermi qaammatini arfinilinni siullerni ullunik 14-inik piffissaqartitsilluni soraarsitaanissani, misiligummillu atorfeqartitaanerup sinnerani qaammammik ataatsimik piffissaqartitaalluni soraarsitaanissani qinnutigisinnaavaa, pisuni marlunni tamani qaammatip naaneranut.
Imm. 2. Misiligummik atorfeqartitaanermi qaammatini arfinilinni siullerni tjenestemandit taamaattut qinnuteqaataanngitsumik ullunik 14-inik piffissaqartitsilluni qaammatip naaneranut soraarsinneqarsinnaapput.
Imm. 3. § 32, imm. 3-mi kiisalu § 33-mi aalajangersakkat tjenestemandinut misiligummik atorfeqartitaasunut atuutinngillat, taamaattorli tjenestemandit soraarnerussutisiaqartitaanerat pillugu inatsimmi kapitalit 1 amma 5 malillugit soraarnerussutisiaqarsinnaatitaaneq pillugu apeqqutit saqqummerpata soraarnerussutisiaqartitsinissaq pillugu oqartussaasoq oqaaseqaateqartinneqassaaq, tak. § 32, imm. 3.
Kapitali 8
Ukiuni killilinni atorfinitsitsisarneq pillugu aalajangersakkat immikkut ittut§ 35. Ukiuni killilinni inunnik tjenestemanditut atorfeqareersunik allanillu atorfinitsitsisoqarsinnaassaaq.
Imm. 2. Kapitalimi matumani malittarisassat malillugit inunnik ukuninnga ukiuni killilinni tjenestemanditut atorfinitsitsisoqartarpoq:
1) tjenestemanditut atorfeqartitaareersunik, imaluunniit
2) tjenestemanditut atorfeqarnerminni soraarnerussutisiaqarsinnaatitaasunik imaluunniit soraarnerussutisiaqalersussanik.
Imm. 3. Imm. 2-mi taaneqartunit allaasunik ukiuni killilinni atorfinitsitsineq atugassaarititaasunik inatsit manna malillugu aamma atuuttut assinginik atugassaqartitsilluni pisinnaavoq, taamaattorli tak. § 41, imm. 1.§ 36. Atorfiit sorliit ukiuni killilinni inuttalerneqarsinnaanerat atorfinitsitsinermi oqartussaasup aalajangissavaa, tak. § 4, Aningaasarsiaqartitsineq pillugu Siunnersuisoqatigiit oqaaseqaateqartereerlugit.
§ 37. Ukiuni killilinni atorfinitsitsineq ukiunit pingasuniit arfinilinnut sivisussuseqartassaaq. Ukiuni killilinni atorfinitsitsineq sivisunerpaamik katillugit ukiut pingasut tikillugit sivitsorneqarsinnaavoq. Nutaamik allagarsiilluni inuttassarsiueqqinnerup kingorna ukiuni killilinni atorfimmi atorfinitsitseqqittoqarsinnaavoq.
§ 38. Akissarsiat atorfinitsitsinermilu atugassarititaasut allat § 47-mi malittarisassat naapertorlugit aalajangersarneqartassapput.
§ 39. Tjenestemanditut ataavartumik atorfeqartitamik ukiuni killilinni atorfeqartitaanerup naanerata allamilluunniit tjenestemandimut tutsinneqarsinnaanngitsumik pissuteqarluni unitsinneqarnerata kingorna atorfineqqittumik inissiineq atugassarititaasut § 38-mi taaneqartutut isumaqatigiissuteqarnikkut aalajangersarneqartut malillugit pisassaaq.
§ 40. Inunnut § 35, imm. 2-mi taaneqartunut soraarnerussutisialiussassat akissaateqarfik pineqartup soraarnerussutisiaqalernissani sioqqullugu ataavartumik atorfeqartitaanermini inissisimaffigisaa aallaavigalugu aalajangersarneqartassapput.
Imm. 2. Soraarnerussutisiassat naatsorsorneqarneranni ukiuni killilinni atorfeqartitaasimaneq ukiunut soraarnerussutisiaqalernissamut tunngaviusunut ilanngunneqartassaaq.
Imm. 3. Imm. 1 aamma 2 tunngavigalugit soraarnerussutisiassatut aalajangersarneqartunut tapiliisoqartassaaq, tapillu taakku ukiuni killilinni ukiut atorfeqarfiusunut ataasiakkaanut tamanut ukiuni killilinni atorfimmi akissaateqarfimmi soraarnerussutisiassat qaffasinnerpaat 2,7 %-iattut aalajangersarneqartassallutik. Taamaattorli soraarnerussutisiat katinnerisa soraarnerussutisiassat atorfimmit ukiuni killilinni atorfiup akissarsiatigut assigisaanit soraarnerussutisiassanit amerlanerusinnaanngillat.
Imm. 4. Imm. 3 malillugu soraarnerussutisiat tapii aningaasani aappaasup soraarnerusutiaqassaguni soraarnerussutisiassaatut naatsorsorneqartuni ilaatinneqassapput.§ 41. Tjenestemandinik soraarnerussutisiaqartitsineq pillugu inatsit inunnut § 35, imm. 3-mi pineqartunut ilaatinneqartunut atuutinngilaq, atorfinitsitsinermilu oqartussaasoq Aningaasarsiaqartitsineq pillugu Siunnersuisoqatigiit oqaaseqaateqartereerlugit pineqartup atorfeqartitaaneranut soraarnerussutisiaqartitsinermik allatut aaqqiissuussisoqarnissaa aalajangissavaa.
Imm. 2. Inuk § 35, imm. 2-mi taaneqartutut imm. 1-imi pineqartunut ilaatinneqalissasoq atorfinitsitsinermi oqartussaasup aalajangersinnaavaa, pissutsit aalajangersimasut immikkut ittut taamaaliornissaq periarfissaqartippassuk.
Imm. 3. Nammineq soraarnerussutisiat 60-inik ukioqalerneq sioqqullugu tunniunneqarnissaat soraarnerussutisiaqalersitsinissamut oqartussaasup akuerisinnaavaa, soraarnerussutisiaqarsinnaatitaasoq peqqilliinermigut inuussutissaarsiorsinnaajunnaarpat, imaluunniit pissutsit allat tamanna periarfissaqartippassuk.
Kapitali 9
Kommunini tjenestemandit pillugit aalajangersakkat immikkut ittut§ 42. Kommunimi tjenestemandi kommunimi allami imaluunniit Namminersornerullutik Oqartussani suleqqullugu kommunalbestyrelsimit peqquneqarpat atorfik taanna tjenestemandimut aatsaat tigoqquneqarsinnaavoq kattuffissuaq pineqartoq tamanna pillugu isumaqatigiissuteqarfigineqareerpat. Tjenestemandip Namminersornerullutik Oqartussat ataanni atorfeqartitaasup qinnuteqaataanngitsumik kommunimi atorfeqartitaanermut nuutsinneqarnerani tamanna aamma atuuppoq.
Imm. 2. Kommunit marluk akornanni imaluunniit kommunip Namminersornerullutillu Oqartussat akornanni qinnuteqaataanngitsumik nuutsitsisoqassappat atorfinitsitsinermi oqartussaasut taakku akornanni tamanna pillugu isumaqatigiittoqarnissaa piumasaqaataavoq.
Kapitali 10
Meeqqat atuarfiat pillugu aalajangersakkat immikkut ittut§ 43. Meeqqat atuarfianni tjenestemandimik killisiuinermi kinaluunniit meeqqat atuarfianni imaluunniit kommunip ingerlatsiviani meeqqat atuarfiannut tunngassuteqartumi atorfeqartitaasoq, suliatigut pisortaqarfimmi susassaqartumi atorfeqartitaasut, kommunalbestyrelsimi kommunalbestyrelsillu ataani ataatsimiititaliami meeqqat atuarfiannut tunngassuteqartumi atuarfiillu siulersuisuini ilaasortaasut orniguteqquneqarunik nassuiaateqaqquneqarunillu taamaaliornissaminnut pisussaaffeqarput.
Imm. 2. Kinaluunniit § 43, imm. 1-imi pineqartoq killisiuinerni takkuttussaatitaavoq nassuiaateqartussaatitaallunilu. Ilisimannittutut eqqunngitsunik nassuiaasoq pinerluttulerinermi inatsimmi § 85 malillugu pineqaatissinneqarsinnaavoq. Ilisimannittoq takkutinngippat nassuiaateqarumananiluunniit killisiuinermi pisortaasup ilisimannittoq eqqartuussivimmi killisiuinerit ingerlanneqarfigisaanni imaluunniit pineqartup najugaqarfiani killisiorneqartissinnaavaa.
Kapitali 11
Ilagiinni tjenestemandit pillugit aalajangersakkat immikkut ittut§ 44. § 14-imi, § 15, imm. 1-imi aamma § 16, imm. 2-mi oqaaseqatigiinni siullerni aalajangersakkat ilagiinni tjenestemandinut atuutinngillat.
§ 45. Ilagiinni tjenestemandi nammineq atorfimmini sulinermut taarsiullugu imaluunniit nammineq atorfimmini sulinerminut atatillugu atorfimmi assigisaani imaluunniit nammineq atorfimminit qutsinnerusumi suligallaqquneqaruni taamaaliornissaminut pisussaaffeqarpoq.
Imm. 2. Palasi atorfimmut allamut ivertinneqartoq, mannalu tikillugu atorfigisimasaa inissisimanini pissutigalugu palaseqqarfimmi saniliusumi palasimit isumagineqarsinnaanngippat, atorfimmi tassaniiginnarallassaaq, atorfinitsitseqqissinnaalernerup tungaanut, taamaattorli sivisunerpaamik qaammatini arfinilinni.§ 46. Ilagiinni tjenestemandi suliami annertussusiisigut suussusiisigullu allanngortiterivigineqarnerminik, sulinerup pisussaanik allanngortitsinngitsunik, atorfiullu tjenestemandimut tulluanngitsutut isigineqarsinnaajunnaarneranik kinguneqanngitsunik akuerinninnissaminut pisussaaffeqarpoq.
Kapitali 12
Isumatigiinniartarnernut kattuffeqarnermullu tunngasut§ 47. Akissarsiat atorfinitsitsinermilu atugassarititaasut allat Naalakkersuisut kattuffissuillu § 51-imi taaneqartut isumaqatigiissuteqarnerisigut aalajangersarneqartassapput.
Imm. 2. Taamaattorli pissutsit inatsisikkut imalunniit inatsit tunngavigalugu aalajangersarneqartut, imaluunniit ingerlatsiviup suliassaanut, aaqqissuussaaneranut sulisunilluunniit pisariaqartitsinermut tunngasut imm. 1 malillugu isumaqatigiissutigineqarsinnaanngillat.
Imm. 3. Kommunini tjenestemandit akissarsiatigut, atugassaritaasutigut soraarnerussutisiaqartitaanikkullu atugassarisaat ataatsimut isigalugit aalajangersakkat, aalajangersakkat taamaattut inatsisikkut matumuuna inatsisikkulluunniit allakkut aalajangersarneqarsimanngitsut, Naalakkersuisut aamma Kalaallit Nunaanni Kommunit Kattuffiata isumaqatigiissuteqarnerisut imaluunniit isumaqatigiissutaat malillugit aalajangersarneqartassapput.§ 48. Akissarsiat atorfinitsitsinermilu atugassarititaasut allanngortinneqarnissaannut, matumani akissaasersuinermut najoqqutassiat sumiinnermullu tapisiat aaqqiissutissaat, tjenestemandit atorfiisa akissarsiatigut inissisimanerisa allannguuttaat kiisalu tjenestemanditut atorfiup isumagineranut tunniunneqartartut allat allannguutaat ilanngullugit eqqarsaatigalugit, aningaasat tamarmiusut amerlassusissaat isumaqatigiissutigineqarsinnaanngippat, tak. § 19, Naalakkersuisut inatsisissatut siunnersuummik immikkut ittumik saqqummiussissapput.
Imm. 2. Aningaasat imm. 1-imi atorneqarnerat pillugu isumaqatigiissuteqartoqarsinnaanngippat Naalakkersuisut Aningaasarsiaqartitsineq pillugu Siunnersuisoqatigiit oqaaseqaateqartereerlugit inatsisissatut siunnersuummik immikkut ittumik saqqummiussissapput.§ 49. Pissutsit § 48-mi pineqartunut ilaatinneqanngitsut pillugit isumaqatigiissuteqartoqarsinnaanngippat Naalakkersuisut Aningaasarsiaqartitsineq pillugu Siunnersuisoqatigiit oqaaseqaateqartereerlugit aalajangiissapput.
§ 50. Atorfinitsitsinermi atugassarititaasut isumaqatigiissutigineqarsinnaanngitsut pillugit aalajangersakkat, kiisalu aalajangersakkat taamaattut allannguutaat pillugit aalajangersakkat kattuffissuit § 51-imi taaneqartut isumaqatigiinniuteqarfigineqareernerisigut Naalakkersuisunit aalajangersarneqartassapput.
Imm. 2. Kattuffissuit § 51-imi taaneqartut sulianut apeqqutit tjenestemandinut tunngasut tamaasa Naalakkersuisunut isumaqatigiinniutigisinnaavaat.§ 51. Tjenestemandit, atorfillit minnerit soraarninngornerit tjenestemandillu soraarninngornerit isumaqatigiinniarsinnaatitaanerat kattuffissuit Kalaallit Nunaanni angerlarsimaffeqartut, Naalakkersuisullu Aningaasarsiaqartitsineq pillugu Siunnersuisoqatigiit oqaaseqaateqartereerlugit isumaqatigiissuteqarnermi periaatsit kiisalu isumaqatigiinniarsinnaatitaanerup atorneqartarnerani malittarisassat pillugit tunngaviusumik isumaqatigiissuteqarfigisartagaat aqqutigalugit ingerlanneqartarput.
Imm. 2. Kattuffissuit pineqartut tamarmiullutik tjenestemandit, atorfillit minnerit soraarninngornerit tjenestemandillu soraarninngornerit tamaasa sinniisoqarnissaannut periarfissaqartissavaat.
Imm. 3. Tunngaviusumik isumaqatigiissummi kattuffiit kattuffissuarnut atasut apeqqutinik kattuffiup ilaasortaannaanut tunngasunik isumaqatigiinniuteqarnissaannut periarfissaq pillugu malittarisassamik aalajangersaasoqassaaq.
Kapitali 13
Aningaasarsiaqartitsineq pillugu Siunnersuisoqatigiit§ 52. Aningaasarsiaqartitsineq pillugu Siunnersuisoqatigiit ilaasortarissavaat siulittaasoq, siulittaasup tullia, ilaasortat marluk tulleriinneri malillugit Namminersornerullutik Oqartussat aamma Kalaallit Nunaanni Kommunit Kattuffianni aqutsisoqarfiup sinniisaat kiisalu ilaasortat sisamat kattuffissuit § 51-imi taaneqartut sinniisaat, Naalakkersuisunit toqqagaasut. Kalaallit Nunaanni Kommunit Kattuffianni aqutsisoqarfiup sinniisai Kalaallit Nunaanni Kommunit Kattuffiata toqqagarai.
Imm. 2. Kalaallit Nunaanni Inatsisartut akunnerminni ilaasortat tallimat qinissavai. Aammattaaq Kalaallit Nunaanni Kommunit Kattuffiata siulersuisuini ilaasortat marluk imaluunniit kommunalbestyrelsimi ilaasortat marluk Kalaallit Nunaanni Kommunit Kattuffiata inassuteqaateqarneratigut Naalakkersuisut toqassavaat.
Imm. 3. Ilaasortat imm. 1-imi aamma 2-mi taaneqartut sinniisissaat toqqarneqassapput qinerneqassallutilluunniit.
Imm. 4. Siulittaasoq, siulittaasup tullia, ilaasortat taakkulu sinniisissaat ukiut sisamakkaarlugit toqqarneqartassapput qinerneqartassallutilluunniit. Taamaattorli ilaasortat Inatsisartunit qinigaasut Inatsisartunut qinersivik malitaraat, taamaattorli ilaasortat taakku siinniisissaallu Inatsisartunit tunuarunik aamma tunuassallutik. Kattuffissuit siinniisaat ilaasortallu Kalaallit Nunaanni Kommunit Kattuffiata inassuteqaateqarneratigut toqqagaasut tunuartassapput inassuteqaat nutaaq saqqummiuneqaraangat.
Imm. 5. Siunnersuisoqatigiit nalinginnaasumik amerlanerussuteqarnikkut aalajangiisassapput. Taamaattorli siulittaasup tullia siulittaasup peqannginnerani taamaallaat taaseqataasinnaavoq.§ 53. Aningaasarsiaqartitsineq pillugu Siunnersuisoqatigiinnut atatillugu ulluinnarni ingerlatsisutut ataatsimiititaliaq Aningaasarsiaqartitsineq pillugu Siunnersuisoqatigiinni ilaasortanik inuttaqartoq pilersinneqassaaq.
Imm. 2. Ulluinnarni ingerlatsisutut ataatsimiititaliami ilaasortaapput tjenestemandit kattuffissuisa sinniisaat marluk, Kalaallit Nunaanni Inatsisartut sinniisaat ataaseq, Kalaallit Nunaanni Kommunit Kattuffianni aqutsisoqarfiup sinniisaa ataaseq kiisalu Aningaasarsiaqartitsineq pillugu Siunnersuisoqatigiit siulittaasuat, ulluinnarni ingerlatsisutut ataatsimiititaliap siulittaasorisaa.
Imm. 3. Ulluinnarni ingerlatsisutut ataatsimiititaliap piginnaatitaanera pillugu aalajangersakkat erseqqinnerusut Aningaasarsiaqartitsineq pillugu Siunnersuisoqatigiinnit aalajangersarneqartassapput.§ 54. Apeqqutini suniluunniit inatsisartut inatsisaat manna aqqutigalugu saqqummertuni Aningaasarsiaqartitsineq pillugu Siunnersuisoqatigiit oqaaseqaateqaqqullugit Naalakkersuisunit qinnuigineqarsinnaapput.
Imm. 2. Apeqqutini Naalakkersuisut isumaqatigiinniuteqarfigineqarnerisigut aaqqinneqarsinnaasimanngitsuni Aningaasarsiaqartitsineq pillugu Siunnersuisoqatigiit oqaaseqaateqartinneqarnissaat kattuffiussuit § 51-imi taaneqartut piumasarisinnaavaat.
Imm. 3. Suliat tjenestemandit pillugit eqqartuussiviup suliassaanut ilaasut Aningaasarsiaqartitsineq pillugu Siunnersuisoqatigiinnut saqqummiunneqarsinnaanngillat.
Kapitali 14
Soraarnerussutisiat§ 55. Tjenestemandit naalagaaffiup Kalaallit Nunaanni tjenestemandiisa soraarnerussutisiaqartitaanerat pillugu malittarisassat sukkulluunniit atuuttut malillugit soraarnerussutisiaqartinneqassapput.
Imm. 2. Naalakkersuisut naalagaaffik isumaqatigiissuteqarfigisinnaavaat, taannalu malillugu tjenestemandit inatsit manna aamma tjenestemandit Inatsisartut suliffeqarfiutaanni atorfeqartitaasut pillugit Inatsisartut inatsisaat tunngavigalugut atorfinitsitaasut soraarnerussutisiassaat naatsorsortassallugit tunniuttassallugillu.
Kapitali 15
Inummut tapit§ 56. Tjenestemandi § 15-imi malittarisassat tunngavigalugit imaluunniit pisoq tjenestemandimut tutsinneqarsinnaanngitsoq pissutigalugu atorfimmut akissaateqarfimmi manna tikillugu inissisimaffiusumit appasinnerusumi inissisimasumut nuuppat tjenestemandi inummut tapisiaqartinneqalissaaq, assigiinngissutaasut matusissutissaannik.
Imm. 2. Imm. 1 malillugu tapiliussat taakku akissaateqarfimmut qaffasinnerusumut nuunnikkut akissarsiat qaffariarnerisigut atorunnaassapput.
Kapitali 16
Akissarsiassanik qularnaveeqqusiussineq§ 57. Tjenestemandit akissarsiassatik taarsigassarsisitsisarfinnut Naalakkersuisut kattuffissuillu isumaqatigiissutaatigut taamaattussatut akuerisanut qularnaveeqqusiussinnaavaat, malittarissat Naalakkersuisiunit aalajangersarneqartut malillugit.
Imm. 2. Pisut imm. 1-imi taaneqartut eqqaassanngikkaanni, tjenestemandit akissarsiassatik suli tunniunneqanngitsut qularnaveqqusiussinnaanngilaat allatulluunniit iliorlutik atorsinnaanagit.
Kapitali 17
Immikkut ittumik sulinngiffeqarneq il.il.§ 58. Atorfinitsitsinermi oqartussaasup tjenestemandi tunaartarisassat Naalakkersuisunit aalajangersarneqartut malillugit piffissami siumoortumik aalajangersagaasumi sivikinnerpaamik qaammammik ataatsimik sivisussusilimmi akissarsiaqartinnagu sulinngiffeqartissinnaavaa. Piffissaq taanna piffissap akissarsiaqarfiusup naatsorsorneqarnerani ilanngaatigineqassaaq.
Imm. 2. Tjenestemandi sulinngiffeqarnerpiaap (feriarnerpiaap) avataatigut sulinngiffeqarnissaminut tunaartarisassat Naalakkersuisunit aalajangersarneqartut malillugit akuerineqarsinnaavoq.
Imm. 3. Tjenestemandip piffissani aalajangersimasumik sivisussusilimmi imaluunniit killiligaanngikkallartumi tamatumunnga naapertuuttumik akissarsiamigut appaallalluni sivikinnerusumik sulisarnissaminik qinnuteqaataa sulinerup ajunngitsumik ingerlanneqarneranut akornutaanngippat atorfinitsitsinermi oqartussaasup akuersinnaavaa.
Imm. 4. Imm. 2 malillugu sulinngiffeqarnermi imaluunniit sivikinnerusumik sulisarnermi akissarsiat tamakkiisumik ilaannakortumillulunniit pigiinnarneqarnissaat piffissalu akissarsiaqarfiusup naatsorsorneqarnerata allanngunnginnissaa pillugu aalajangersakkat Aningaasarsiaqartitsineq pillugu Siunnersuisoqatigiit oqaaseqaateqartinneqareernerisigut Naalakkersuisut aalajangersassavaat.
Imm. 5. Tjenestemandit siunertanut erseqqinnerusumik nassuiarneqarsimasunut akissarsiaqarnatik sulinngiffeqartitaanerat pillugu malittarisassat Aningaasarsiaqartitsineq pillugu Siunnersuisoqatigiit oqaaseqaateqartinneqareernerisigut Naalakkersuisut aalajangersarsinnaavaat.§ 59. Tjenestemandip ilassutaasumik ilinniagaqarnissaq siunertaralugu akissarsiaqarluni sulinngiffeqarnissaa atorfinitsitsinermi oqartussaasup tunaartarisassat Naalakkersuisunit aalajangersarneqartut malillugit akuersissutigisinnaavaa. Sulinngiffeqarneq taanna piffissap akissarsiaqarfiusup ukiullu soraarnerussutisiaqalersitsissutaasussat naatsorsorneqarneranni annaasaqaataanngitsumik akuersissutigineqartassaaq.
Imm. 2. Ilinniarnermut atorfinitsitsinermi oqartussaasup akiligaanut tjenestemandip ilinniarnermi naammassinerata kingorna piffissami aalajangersimasumi suliffimmiiginnarnissaa siumoortumik pisussaaffigissagaa, kiisalu pisussaaffik taanna eqqortinneqanngippat ilinniarnerup nalaani akissarsiat ilinniarnermullu aningaasartuutaasinnaasut allat tamakkiisumik ilaannakortumilluunniit utertillugit akilerneqarnissaat sinakkusiussat § 47 tunngavigalugu isumaqatigiissutikkut aalajangersarneqartut iluanni Naalakkersuisut piumasaqaatinngortissinnaavaat.
Kapitali 18
Atortuulersitsinermi ikaarsaariarnermilu aalajangersakkat§ 60. Inatsisartut inatsisaat manna ulloq 1. januar 2004 atuutilerpoq.
§ 61. Inatsisartut inatsisaata matuma atuutilerneranut peqatigitillugu Kalaallit Nunaanni Namminersornerullutik Oqartussani kommuninilu tjenestemandit pillugit inatsisartut inatsisaat nr. 5, 14. maj 1990-imeersoq atorunnaarsinneqarpoq.
§ 62. Kalaallit Nunaanni Namminersornerullutik Oqartussani kommuninilu tjenestemandit inatsisip matuma atuutilinnginnerani atorfinitsinneqarsimasut eqqarsaatigalugit pisinnaatitaaffiit pisussaaffiillu inatsisikkut imaluunniit inatsit, isumaqatigiissut il.il. 31. december 2003-mi atuuttoq tunngavigalugu taakku pissarsiarisimassaat atuutiinnassapput.
Imm. 2. Taamaattorli imm. 1-mi aalajangersakkami akissarsianit siumoorluni tigusisinnaatitaaneq ilaatinneqanngilaq, tak. Kalaallit Nunaanni Namminersornerullutik Oqartussani kommuninilu tjenestemandit pillugit Inatsisartut inatsisaanni nr. 5-imi 14. maj 1990-imeersumi § 58.§ 63. Suliassaqarfinni Inatsisartut inatsisaat manna malillugu malittarisassanik erseqqinnerusunik aalajangersaaviusussani isumaqatigiissuteqarfiusussaniluunniit malittarisassat siusinnerusukkut inatsisit tunngavigalugit aalajangersarneqarsimasut aalajangersakkanit nutaanit taarserneqarnissamik tungaanut atuutissapput.
Namminersornerullutik Oqartussat, ulloq 18. december 2003
Hans Enoksen/
Kaj Kleist