19. november 2003

UKA 2003/11

 

Kalaallit Nunaanni Namminersornerullutik Oqartussani kommuninilu tjenestemandit pillugit Inatsisartut inatsisissaattut siunnersuut

pillugu

Inatsisartut Inatsisit Atortinneqarnerannut Ataatsimiititaliaata

ISUMALIUTISSIISSUTAA

siunnersuutip aappassaaneerneqarnerani saqqummiunneqartoq

 

Inatsisartut Inatsisit Atortinneqarnerannut Ataatsimiititaliaat suliarinninnermini ukuninnga inuttaqarpoq:

 

Inatsisartuni ilaasortaq Ane Hansen, Inuit Ataqatigiit, siulittaasoq
Inatsisartuni ilaasortaq Isak Davidsen, Siumut, siulittaasup tullia
Inatsisartuni ilaasortaq Enos Lyberth, Siumut
Inatsisartuni ilaasortaq Otto Jeremiassen, Atassut
Inatsisartuni ilaasortaq Marie Fleischer, Demokraatit

 

Kalaallit Nunaanni Namminersornerullutik Oqartussani kommuninilu tjenestemandit pillugit inatsisissatut siunnersuummik nutaamik upernaakkut ataatsimiinnermili (UPA 2003/11) Inatsisartut oqaluuserinnipput. Siunnersuulli pingajussaaneerneqannginnerani tunuartinneqarpoq, paasineqarmat Inatsisartut Ombudsmandiannut tunngatillugu inatsisissamut nassuiaatini immikkoortoq ataaseq tunngaviusumik isigalugu ajornartorsiutitaqartoq.

Siunnersuummi maannakkut oqallisigineqartumi inatsimmut nassuiaatit Ombudsmandimut tunngatillugu ajornartorsiutinik pilersitsisussaajunnaarlugit allanngortinneqarsimapput. Inatsisartut inatsisissaanissaaq iliuuserisinnaasanut aalajangersakkat allannguutissatut siunnersuummut Inatsisit Atortinneqarnerannut ataatsimiititaliap siusinnerusukkut saqqummiussaanut naapertuuttunngorlugit iluarsineqarsimapput.

Taamaammat Inatsisit Atortinneqarnerannut Ataatsimiititaliap siunnersuut tamaat tjenestemandinut inatsit naapertorlugu ilusiligaanermigut inatsimmullu nassuiaatitigut pisinnaatitaaffiit pisussaaffillu pillugit siunissami ajornaannerusumik paasineqarsinnaanngorlugu ilusiliivigineqarsimasoq tapersersinnaavaa.

Taamaalilluni Inatsisit Atortinneqarnerannut Ataatsimiititaliap isumaqatigiittup siunnersuut aku-ersissutigineqassasoq inassutigaa.

Ataatsimiititalialli UPA 2003/11-mut tunngatillugu isumaliutissiissutaani oqaatigineqartutut tje-nestemandeqarnerup atuutiinnarnissaata pissusissamisoortuunera kommunit arlallit apeqquseraat ataatsimiititaliap maluginiarpaa. Tjenestemandit pillugit inatsisip atuuttup atorneqarnera pisariusuusimavoq allaffissornikkullu nammatassanik annertuunik nassataqarsimalluni. Taamaammat tamatumunnga tunngatillugu KANUKOKA-mik piaartumik oqaloqateqarumalluni neriorsuutini Naalakkersuisut siulittaasuata uppernarsarmagu ataatsimiititaliap nuannaarutigaa.

Tassunga ilanngullugu maleruagassat, suliffeqarnermi allatigut aalajangersakkat, nunatsinni pissutsinut pisariillisarneqarsinnaaneri naleqqussarneqarsinnaanerilu pillugit periarfissat qulaajaavigeqqullugit Naalakkersuisunut ataatsimiititaliap kaammattuutigissavaa. Suliffeqarnerup atuulluartumik pisariunngitsumillu aalajangersaavigineqarnissaa siunertaralugu nutarterinermik sulinerup aallartinneqarnissaa ataatsimiititaliap paasinninnera malillugu Kalaallit Nunaannut iluaqutaassaaq, namminersulernissamillu anguniagaqarnermut naapertuutissalluni.

Taama oqaaseqarluni Inatsisit Atortinneqarnerannut Ataatsimiititaliap siunnersuut aappassaaniiganngortippaa.

 

	Ane Hansen Inuit Ataqatigiit, siulittaasoq
Isak Davidsen Siumut		Enos Lyberth Siumut
Otto Jeremiassen Atassut		Marie Fleischer Demokraatit