Imigassat ethanolimik akullit Kalaallit Nunaanni sananeqarsimasut akitsuutaat pillugit Inatsisartut inatsisaat nr. 20, 11. december 2003-imeersoq
§ 1. Imigassat ethanolimik akullit nunami maani sananeqartut akitsuutaat inatsimmi matumani maleruagassat naapertorlugit, imatullu annertutigisut akilerneqartassapput:
1) 2,25-3,09 volumenpct. literimut 3 kr. 19 øre. 2) 3,10-4,09 volumenpct. literimut 6 kr. 95 øre. 3) 4,10-5,09 volumenpct. literimut 18 kr. 45 øre. 4) 5,10-7,09 volumenpct. literimut 25 kr. 84 øre. 5) 7,10-9,09 volumenpct. literimut 37 kr. 04 øre. 6) 9,10-11,09 volumenpct. literimut 47 kr. 00 øre. 7) 11,10-13,09 volumenpct. literimut 54 kr. 00 øre. 8) 13,10-15,09 volumenpct. literimut 75 kr. 00 øre. 9) 15,10-18,09 volumenpct. literimut 92 kr. 47 øre. 10) 18,10-22.09 volumenpct. literimut 118 kr. 60 øre. 11) 22,10-26,09 volumenpct. literimut 150 kr. 12 øre. 12) 26,10-30,09 volumenpct. literimut 184 kr. 26 øre. 13) 30,10-35,09 volumenpct. literimut 224 kr. 46 øre. 14) 35,10-45,09 volumenpct. literimut 289 kr. 21 øre. 15) 45,10-60,09 volumenpct. literimut 396 kr. 77 øre. 16) 60,10-100,00 volumenpct. literimut 472 kr. 97 øre. § 2. Akitsuut akilerneqassaaq atuineq ilutigalugu, tassa imaappoq nioqqutissat akitsuutip atuutsinneqannginnissaanik akuersissuteqarluni aaqqissuussinermut ilaajunnaarpata. Nioqqutissat suliffeqarfimmi nioqqutissanik sanaffiusumi tuniniarneqarpata atorneqarpataluunniit, nioqqutissat naammassillugit tunisassiarineqarnerminni atorneqartutut isigineqassapput.
§ 3. Suliffeqarfiit nioqqutissanik akitsuusigassanik sanasut piginnittuusutut Akileraartarnermut Pisortaqarfimmi nalunaarsorneqassapput.
Imm. 2. Suliffeqarfiit nalunaarsorneqarsimasut akitsuummik atuutsitsinertaqanngitsumik nioqqutissanik akitsuusigassanik sanasinnaatitaallutillu uninngasuuteqarsinnaatitaapput.§ 4. Init piginnittuusut nalunaarsorneqarsimasut nioqqutissanik akitsuusertinneqarsimanngitsunik sananerminnut, suliaqarnerminnut, maqitsinerminnut uninngasuuteqarnerminnullu atugaat Akileraartarnermut Pisortaqarfimmit akuerineqarsimassapput.
Imm. 2. Init Akileraartarnermut Pisortaqarfiup § 14, imm. 1 naapertorlugu nakkutilliinissaanut naleqqutinngitsumik atorneqarpata aaqqissugaappataluunniit, akuersissuteqarfigineqarneq nalunaarsortinnerlu atorunnaarsinneqarsinnaapput.§ 5. Piffissaq akitsuuteqarfiusoq tassaavoq qaammat.
§ 6. Piginnittuusut nalunaarsorneqarsimasut piffissami akitsuuteqarfiusumi annertussuseq akitsuusigassaq naatsorsugassaat tassaavoq nioqqutissat akitsuusigassat suliffeqarfiup iniutaanit akuerisaasunit anninneqarsimasut annertussusiat, millissutaasimasut assigisaallu ilanngullugit.
Imm. 2. Naatsorsuineq maleruagassat Naalakkersuisunit aalajangersarneqarsimasut naapertorlugit sukumiisumik suliarineqassaaq.
Imm. 3. Nioqqutissat akitsuusigassat annertussusiata qanoq angissusilerneqarnissaanut maleruagassat Naalakkersuisunit aalajangersarneqarsinnaapput.§ 7. Annertussutsimit akitsuusigassamit § 6, imm. 1 naapertorlugu naatsorsorneqartumit ilanngaatigineqassapput:
1) nioqqutissat ikuallattoqarneratigut, erngartoqarneratigut assigisaatigulluunniit suliffeqarfimmi imaluunniit suliffeqarfimmut suliffeqarfimmiilluunniit assartorneqarnerminni annaaneqartut,
2) nioqqutissat utertinneqartut, aki akitsuummik ilaqartoq pisisumut utertinneqarpat,
3) nioqqutissat sumiiffinnut Kalaallit Nunaata avataaniittunut anninneqartut.
Imm. 2. Imm. 1 naapertorlugu ilanngaatigineqarsinnaasut nakkutigineqarnissaannut malittarisassat Naalakkersuisunit aalajangersarneqarsinnaapput.§ 8. Piginnittuusut nalunaarsorsimasut nioqqutissanik akitsuusigassanik sananermut tunniussinermullu naatsorsuusiortassapput.
Imm. 2. Tamanna pillugu aalajangersakkat sukumiinerusut Naalakkersuisunit aalajangersarneqassapput.
Imm. 3. Piginnittuusut nalunaarsorsimasut naatsorsuutinut tunngasut, matumani aamma fakturat, fakturat assilineri, tunniussinermi uppernarsaatit aamma naatsorsukkat, ukiup naatsorsuusiorfiusup qaangiunnerata kingorna ukiuni 5-ini toqqortarissavaat.§ 9. Piginnittuusut nalunaarsorsimasut qaammatit naaneri tamaasa, kingusinnerpaamillu piffissap akitsuuteqarfiusup tulliata qaammatip 15-iani Akileraartarnermut Pisortaqarfimmut nalunaarutigisassavaat, nioqqutissat akitsuusigassat qanoq annertutiginerat, tak. §§ -it 6 aamma 7. Nalunaarut suliffeqarfiup akisussaalluni aqutsisuanit atsiorneqarsimassaaq.
Imm. 2. Nalunaarut piffissaliussap taaneqartup qaangiutinnginnerani tunniunneqanngippat Akileraartarnermut Pisortaqarfiup nalunaarsugaaneq, nalunaarutip tunniunneqanngitsup Akileraartarnermut Pisortaqarfimmit tiguneqarnissaata tungaanut atorunnaarsissinnaavaa.
Imm. 3. Nalunaarut piffissaliussap taaneqartup qaangiutinnginnerani tunniunneqanngippat, akitsuutinut akiligassaq Akileraartarnermut Pisortaqarfiup missingersuinermigut angissusilersinnaavaa.
Imm. 4. Naalakkersuisut nalunaarut pillugu aalajangersagaliorsinnaapput.§ 10. Piginnittuusut nalunaarsorsimasut piffissami akitsuuteqarfiusumi akitsuut Akileraartarnermut Pisortaqarfimmut akilissavaat kingusinnerpaamik qaammatip, piffissap akitsuuteqarfiusup tulliata ulluisa 15-ianni.
Imm. 2. Akitsuut piffissaagallartillugu akilerneqanngippat, qaammatip akiliiffissap aallaqqaataaniit aallartittumik qaammatit aallartinneri tamaasa erniaq qaammammut 1 pct.-iusoq akilerneqartassaaq.
Imm. 3. Naalakkersuisut akitsuutip akilerneqarnissaa pillugu aalajangersagaliorsinnaapput.§ 11. Akileraartarnermut Pisortaqarfiup piginnittuusoq nalunaarsorsimasoq akitsuummik piffissaagallartillugu akiliinngitsoq, piffissamik qaammammit ataatsimit sivikinnerusumik piffissalerlugu nalunaruteqaqqusinnaavaa.
Imm. 2. Aammattaaq Akileraartarnermut Pisortaqarfiup piginnittuusoq nalunaarsorsimasoq akitsuummik piffissaagallartillugu akiliinngitsoq, piffissamik § 10-mi taaneqartumit sivikinnerusumik piffissalerlugu akiliinissamut piffissalersinnaavaa.§ 12. Akitsuut akiligassanngorsimasoq akilerneqarfissami kingorna kingusinnerpaamik ullut 14-it qaangiunneranni akilerneqanngippat Akileraartarnermut Pisortaqarfiup nalunaarsugaaneq, akitsuutit akiligassanngorsimasut akilerneqarserlugit arsaarinnissutigisinnaavaa.
Imm. 2. Piffissaq akitsuuteqarfiusoq imaluunniit piffissaq akiliiffissaq § 11 naapertorlugu sivikillineqarsimappat nalunaarsugaaneq, piffissap akiliiffissap qaangiunneratigut ingerlaannaq arsaarinnissutigineqarsinnaavoq.§ 13. Piginnittuusup nalunaarsorsimasup paasissutissanik eqqunngitsunik Akileraartarnermut Pisortaqarfimmut nalunaaruteqarsimanera, taamaalillunilu akitsuutinut akiliinikippallaarsimanera paasineqarpat aningaasat akiligassanngortut akileqquneqarneranniit kingusinnerpaamik ullut 14-it qaangiunneranni akilersinneqassapput.
Imm. 2. Akitsuutinut akiligassat annertussusiat naatsorsuutit tunngavigalugit naatsorsorneqarsinnaanngippat, akitsuutinut akiligassat Akileraartarnermut Pisortaqarfiup missingersuinermigut angissusilersinnaavai.
Imm. 3. Pisuni imm. 1-imiit 2-mut taaneqartuni akitsuutissaq piffissaagallartillugu akilerneqanngippat qaammatip, piginnittuusup nalunaarsorsimasup akiliiffissaata aallaqqaataaniit aallartittumik qaammatit aallartinneri tamaasa erniaq qaammammut 1 pct.-iusoq akilerneqartassaaq qaammatit aningaasat piginnittuusumit nalunaarsorsimasumit akilerneqarfissaaa aallaqqaataanniit qaammammoortumik ernialiussaq 1 pct.-iusoq akilerneqartassaaq.§ 14. Akileraartarnermut Pisortaqarfik pisinnaatitaavoq suliffeqarfinni inatsimmi pineqartuni misissuinissamut aammalu suliffeqarfiit nioqqutissaataannik, niuernerminni allattaaviinik, naatsorsuutaannut tunngasunik kiisalu allagarsiarisarsimasaannik allagarisarsimasaannillu il.il. misissuinissamut.
Imm. 2. Suliffeqarfiit piginnittui sulisorisaallu Akileraartarnermut Pisortaqarfiup misissuinermik imm. 1-imi taaneqartumik ingerlatsinerani pisariaqarnera naapertorlugu ilitsersuisussaapput ikiuuttussaallutillu.
Imm. 3. Pappialat imm. 1-imi taaneqartut Akileraartarnermut Pisortaqarfiup piumasaqarneratigut tunniunneqassapput nassiunneqarlutilluunniit.
Imm. 4. Naatsorsuutit il.il. inummi pingajuusumiippata, taanna taakkuninnga tunniussaqartussaatitaanngikkaluaruniluunniit, taakkua Akileraartarnermut Pisortaqarfimmut tunniutissavai, Akileraartarnermullu Pisortaqarfiup isumagisassaraa atorneqareerpata inummut pingajuusumut pineqartumut utertissallugit.§ 15. Pisortat oqartussaasut peqquneqarnermikkut paasissutissat suulluunniit, suliffeqarfinnik inatsimmi pineqartunik nalunaarsuinissamut nakkutilliinissamullu atorneqartussat Akileraartarnermut Pisortaqarfimmut nalunaarutigisassavaat.
Imm. 2. Politiit, maleruagassat Naalakkersuisut justitsministereqarfiullu isumaqatigiinniarnerisa kingorna aalajangersarneqarsimasut naapertorlugit Akileraartarnermut Pisortaqarfimmut ikiuuttassapput.§ 16. Nakkutilliinerit pillugit aalajangersakkat inatsisip atuutsinneqarneranut pisariaqartut allat Naalakkersuisunit aalajangersarneqarsinnaapput.
§ 17. Naalakkersuisut Akileraartarnermut Pisortaqarfik inatsit manna naapertorlugu aalajangiisarnissamut piginnaatissinnaavaat. Aalajangiinerit naammagittaalliuutigineqarsinnaanerat pillugu maleruagassanik, matumani aamma aalajangiinerit allaffeqarfitsigut oqartussaasumut qaffasinnerusumut naammagittaalliuutigineqarsinnaannginnerat pillugu Naalakkersuisut aalajangersaasinnaapput.
§ 18. Akileraartarnermut Pisortaqarfiup makku pillugit aalajangiineranik naammagittaalliuutit Skatterådip aalajangiiffigisassavai:
1) Nioqqutissat akitsuuteqartussaaneri pillugit.
2) Akitsuusigassat annertussusii pillugit aalajangiineq.
3) § 9, imm. 3 aamma § 13, imm. 2 aamma 3 naapertorlugit missingersuinikkut angissusiliineq.
Imm. 2. Skatterådip aalajangiineri, aalajangiinerup taassuma pineqartumut nalunaarutigineqarneraniit sap.ak. 4-t qaangiutsinnagit Kalaallit Nunaata Landsret-ianut siullertut suliaqartussamut ingerlateqqinneqarsinnaapput. Suliassiissutigineqartussat tassaapput Naalakkersuisut.§ 19. Kinaluunniit piaaraluneerluni mianersuaalliorujussuarluniluunniit iliuuseqartoq pineqaatissinneqarnikkut akiliisinneqassaaq:
1) paasissutissanik akitsuutinik nakkutilliinermut atugassanik eqqunngitsunik paatsoorneqarsinnaasunilluunniit tunniussisoq imaluunniit paasissutissanik nipangiussisoq,
2) § 3, imm. 1-imik, § 6, imm. 1-imik, § 8, imm. 1-imik, § 9, imm. 1-imik, § 10, imm. 1-imik, § 14, imm. 2-mik 3-milluunniit unioqqutitsisoq,
3) § 11, imm. 1 naapertorlugu peqquneqarnermik malinninngitsoq,
4) nalunaarsorneqarnerup Akileraartarnermut Pisortaqarfimmit § 9, imm. 2 imaluunniit § 12, imm. 1 aamma 2 naapertorlugit arsaarinnissutigineqareernerata kingorna ingerlatamik akitsuuteqarfiusumik ingerlatsiinnartoq,
5) nioqqutissanik, inatsit manna naapertorlugu akitsuutaannik akilerneqarsimasussaagaluanik akitsuuserneqarsimanngitsunilli tunniussisoq, pissarsisoq pisorluunniit.
Imm. 2. Inatsit manna naapertorlugu maleruagassiani aalajangersarneqarsinnaapput, maleruagassiani aalajangersakkanik piaaraluneerluni mianersuaalliorujussuarluniluunniit unioqqutitsisup akiliisinneqarnissaa pillugu aalajangersakkat.
Imm. 3. Unioqqutitsinerit imm. 1-imi imaluunniit imm. 2-mi taaneqartut arlaat aktieselskabimit, anpartsselskabimit, andelsselskabimit, peqatigiiffimmit, ingerlatsivimmit imminut pigisumit, aningaasaateqarfimmit assigisaanilluunniit unioqqutitsineruppat, inatsisit malillugit inuttut isigineqarsinnaasoq taanna taamatut akiliisinneqarsinnaavoq.
Imm. 4. Akiliisitsissutit landskarsimut iluaqutissanngortinneqassapput.§ 20. Naalakkersuisut, inatsimmi matumani aalajangersakkanik unioqqutitsisoq nalunaarfigisinnaavaat suliassaq eqqartuussinertaqanngitsumik naammassineqarsinnaasoq, unioqqutitsisup unioqqutitsisimanini nassuerutigippagu aammalu akiliisitsissut nalunaarummi allassimasoq piffissap aalajangersimasup, qinnuteqarnikkut sivitsorneqarsinnaasup iluani akilerumallugu piareersimappat.
Imm. 2. Nalunaarutiginninnermut, imm. 1-imi taaneqartumut atatillugu eqqartuussisarnermi inatsimmi aalajangersakkani unnerluutiginninnermut allassimasut atuutissapputtaaq.
Imm. 3. Akiliisitsissut piffissaagallartillugu akilerneqarpat, aalajangiunneqareernermigulluunniit akilersinneqarpat suliaq malersoqqinneqassanngilaq.§ 21. Inatsit ulloq 1. januar 2004-miit atortuulerpoq.
Namminersornerullutik Oqartussat, ulloq 11. december 2003
Hans Enoksen/
Josef Motzfeldt