Oqaaseqaatit nalinginnaasut
Immiorfiit mikisuararsuit atorlugit Kalaallit Nunaanni immiaaqqanik immiorsinnaaneq teknikkikkut ineriartornerup ajornarunnaarsimmagu, aammalu taamatut tunisassiornissamut atortup siulliup piffissap sivikitsuararsuup ingerlanerani pilersinneqarsinnaanera naatsorsuutigineqarsinnaammat siunnersuutigineqarpoq, imigassat ethanolimik akullit Kalaallit Nunaanni sananeqarsimasut imigassat ethanolimik akullit Kalaallit Nunaannut eqqussorneqartartut volumenprocentimut literimut akitsuutaattut annertutigisumik akitsuuteqartinneqarnissaat.
Naalakkersuisut nioqqutissanik eqqussuineq annissuinerlu pillugit Inatsisartut inatsisaanni § 14 aqqutigalugu periarfissaqarput, nioqqutissat eqqussorneqartut akitsuusigaasarnerat assigalugu akitsuutinik aalajangersaanissamut. Pineqartoq qangarsuarli aalajangersagaammat Naalakkersuisut isumaqarput, akitsuutip taamaattup Inatsisartut inatsisaatigut ersitsuunissaa pissusissamisoortuussasoq, taamaattumillu Inatsisartunit aalajangersagaassasoq.
Inatsisissatut siunnersuut ima ilusiligaavoq, imigassat allat immiaaqqatulli ethanolimik akullit sananeqassagaluarpata aammattaaq inatsimmi ilaatinneqarnissaat isumannaarneqareerluni.
Inatsisissatut siunnersuut Inuussutissarsiornermut Pisortaqarfimmut tusarniaassutigineqarnikuuvoq, oqaaseqaatigisimasaallu siunnersuutigineqartumut ilanngunneqarsimallutik. Avatangiisinut Pinngortitamullu Pisortaqarfimmut, Peqqinnissamut Pisortaqarfimmut aamma Aningaasaqarnermut Pisortaqarfimmut tusarniaassutigineqarnikuuvoq, siunnersuummullu oqaaseqaateqarsimagatik.
Inatsisissatut siunnersuutip isertitassanut annertuumik sunniuteqarnissaa naatsorsuutigineqanngilaq, immiaaqqammi Kalaallit Nunaannut eqqussorneqartartut annertussusiata, immiaaqqat Kalaallit Nunaanni sananeqartussat annertoqqataanik millinissaa ilimagineqarpoq.
Inatsit allaffissornikkut annikitsuinnarnik, tassalu akuersissutiliornernik nakkutilliinermillu kinguneqassaaq.
Aalajangersakkanut ataasiakkaanut oqaaseqaatit
§ 1-imut.
Imigassat ethanolimik akullit Kalaallit Nunaanni sananeqartut, imigassat ethanolimik akullit Kalaallit Nunaanni akitsuuteqarfiusumut eqqunneqartut volumenprocentimut literimut akitsuutaasa annertoqqataannik akitsuuserneqartarnissaat siunnersuutaavoq.
Taamatuttaaq imigassat ethanolimik akullit Kalaallit Nunaanni sananeqartut literimut 2,25 volumenpct.-imik sakkortussusillit akitsuuteqartinneqassanngillat.
§ 2-mut.Siunnersuutigineqarpoq akitsuutinik akiliisussaaneq nioqqutissap atorneqarneratigut atuutilertassasoq, tassa imaappoq nioqqutissat suliffeqarfimmit anninneqarlutik pisisartuinut assartorneqaraangata. Nioqqutissat suliffeqarfimmi imigassanik ethanolimik akulinnik sanasumi tuniniagassaappata atugassaappataluunniit, nioqqutissat naammassillugit tunisassiarineqarnerminni atorneqartutut isigineqassapput.
Aalajangersakkami aammattaaq pineqarput imigassat ethanolimik akullit nammineq atugassatut sananeqartut. Taamaattorli imigassanik aalakoornartortalinnik tuniniaaneq sassaalliisarnerlu pillugit Inatsisartut inatsisaanni nr. 11, 11. november 2000-imeersumi § 16, imm. 1-imi allassimavoq imigassanik aalakoornartortalinnik angerlarsimaffimmi sananissaq inerteqqutaasoq.
§ 3-mut.Suliffeqarfiit imigassanik ethanolimik akulinnik, inuussutissarsiutigalugu ingerlatsinerminni atugassaminnik sananissamik kissaateqartut Akileraartarnermut Pisortaqarfimmi pinngitsooratik nalunaarsortittussaanissaat siunnersuutaavoq, tamannami aamma suliffeqarfiit nioqqutissat akitsuusigassat akitsuutaannik akiliinngikkallarlutik sanasinnaanissaannut uninngasuuteqarsinnaanissaannullu piumasaqaataavoq.
Nalunaarsortinngitsoorneq pillaammik akiliisitaanermik kinguneqarsinnaavoq, soorluttaaq nalunaarsortinngitsoorneq akitsuutinik akiliinngitsoortitaanissamik kinguneqarsinnaanngitsoq.
§ 4-mut.Nakkutilliinermut tunngasut eqqarsaatigalugit siunnersuutigineqarpoq init, uninngasuutinik piginnittuusup nalunaarsortissimasup nioqqutissanik suli akitsuusertinneqanngitsunik sananermut, suliaqarnermut, maqitsinermut uninngatitsinermullu atugaasa Akileraartarnermut Pisortaqarfimmit akuerineqarnissaat, soorluttaaq pisortaqarfiup nakkutilliinera naleqquttumik ingerlanneqarsinnaanngippat akuersissuteqarfigineqarneq nalunaarsortinnerluunniit Akileraartarnermut Pisortaqarfiup atorunnaarsissinnaassagaa.
§ 5-imut.Akitsuusigassat suliffeqarfinnit qaammatikkaartumik naatsorsorneqartarnissaat siunnersuutigineqarpoq.
§ 6-imut.Piffissami sumiluunniit akitsuusiiffiusussami akitsuusigassap annertussusiata, annertussutsip suliffeqarfiup iniutaanit akuerisaasunit anninneqartup, millissutaasinnaasunik assigisaanilluunniit ilanngakkap annertussuseqataatut naatsorsorneqartarnissaa siunnersuutigineqarpoq.
Tamanna ima paasineqassaaq suliffeqarfik, nioqqutissat allanut tunniunneqaratik ininit akuerisaasunit tammartut akitsuutaannik akiliissasoq.
Akileraartarnermi Pisortaqarfik nioqqutissat akitsuusigassat annertussusaannik immikkut nalunaarusiornikkut qanoq naatsorsuusiortoqassaneranik maleruagassanik aalajangersaasinnaassasoq siunnersuutigineqarportaaq.
Naggasiullugu Naalakkersuisut nioqqutissat akitsuusigassat annertussusaasa aalajangersarneqarnissaannut atatillugu maleruagassanik aalajangersaasinnaasut siunnersuutigineqassaaq.
§ 7-imut.Siunnersuutigineqarpoq nioqqutissat suliffeqarfimmi ikuallattoqarneratigut, erngartoqarneratigut assigisaatigulluunniit imaluunniit suliffeqarfimmut suliffeqarfimmiillu assartuinermi annaaneqartut annertussutsip akitsuusigassap § 6, imm. 1 naapertorlugu naatsorsorneqarnerani ilanngaatigineqarsinnaassasut. Erngartoqarneranik oqarnermi pineqarpoq, tankit poortuutilluunniit allat aserorneqarnerisigut nioqqutissat annaaneqarnerat. Nioqqutissat tillinniartoqarneratigut annaaneqartut ilanngaatigineqarsinnaanngillat.
Aammattaaq siunnersuutigineqarpoq nioqqutissat utertinneqartut annertussutsip akitsuusigassap § 6, imm. 1 naapertorlugu naatsorsorneqarnerani ilanngaatigineqarsinnaassasut, utertinneqartut akitsuutitaat ilanngullugu suliffeqarfiup utertissimappagu.
Kiisalu siunnersuutigineqarpoq nioqqutissat sumiiffinnut Kalaallit Nunaata avataaniittunut anninneqartut, annertussutsip akitsuusigassap § 6, imm. 1 naapertorlugu naatsorsorneqarnerani ilanngaatigineqarsinnaanissaat.
Oqaatigineqassaaq suliffeqarfiup nalunaarsorneqarsimasup nioqqutissat inunnut suliffeqarfimmi sulisuusunut akeqanngitsumik atugassanngortissimasani, annertussutsip akitsuusigassap § 6, imm. 1 naapertorlugu naatsorsorneqarnerani ilanngaatigisinnaanngimmagit.
Naalakkersuisut ilaagaatigisassat pineqartut pillugit uppernarsaaserneqarnissaannut nakkutilliinermi maleruagassatut atugassanik aalajangersaasinnaasut siunnersuutigineqarportaaq.
§ 8-mut.Suliffeqarfiit qanoq iliorlutik akitsuutinut naatsorsuutinik pisariitsumik isumannaatsumillu ingerlatsinissaannut Akileraartarnermut Pisortaqarfiup naatsorsuusiornermut maleruagassanik sukumiinerusunik aalajangersaasinneqarnissaa siunnersuutigineqarpoq.
Naatsorsuutinut tunngasut il.il. pineqartut ukiup naatsorsuusiorfiusup qaangiunneraniit ukiuni 5-ini toqqortarineqassapput.
§§-inut 9-mut 10-mullu.Akitsuusigassat nalunaarutigineqarnerat akitsuutillu Akileraartarnermut Pisortaqarfimmut akilerneqarnera kingusinnerpaamik pissapput qaammatip tulliuttup 15-iani.
Piffissaagallartillugu nalunaaruteqartoqanngippat suliffeqarfiup nalunaarsugaanera, nalunaarutip Akileraartarnermut Pisortaqarfimmit tiguneqarnissaa tikillugu Akileraartarnermut Pisortaqarfimmit atorunnaarsinneqarsinnaavoq, soorluttaaq akitsuusigassat annertussusiat Akileraartarnermut Pisortaqarfiup missingersuinermigut angissusilersinnaagaa.
Piffissaagallartillugu akiliisoqanngippat suliffeqarfiup pillaatitut ernianik akiligassinneqarnissaa siunnersuutigineqarpoq. Pillaatitut erniat akiligassanngortut qaammatikkaartumik kingumoortumik immikkut akiligassiissutigineqartassapput.
§ 11-mut.Suliffeqarfik arlaleriarluni piffissaagallartillugu nalunaaruteqartarsimanngippat imaluunniit akitsuummik piffissaagallartillugu akiliisarsimanngippat, suliffeqarfiup nalunaaruteqarnissamut imaluunniit akiliinissamut sivikinnerusumik piffissalerneqarsinnaanissaa siunnersuutigineqarpoq.
Naatsorsuutigineqarpoq suliffeqarfiup nalunaaruteqarnissamut imaluunniit akiliinissamut sivikinnerusumik piffissaliunneqarsimasoq piffissami aalajangersimasumi malissimappagu, allakkatigut qinnuteqartoqarneratigut piffissap nalunaaruteqarfissap imaluunniit akiliiffissap nalinginnaasup atorneqaqqilersinnaanissaa.
§ 12-imut.Suliffeqarfiup akitsuut akiligassanngorsimasoq akilerneqarfissaata kingorna kingusinnerpaamik ullut 14-it qaangiunneranni akilersimanngippagu, Akileraartarnermut Pisortaqarfiup suliffeqarfiup nalunaarsugaaneranik atorunnaarsitsisinnaanissaa siunnersuutigineqarpoq. Suliffeqarfik akiliinissamut § 11 naapertorlugu sivikinnerusumik piffissalerneqarsimappat, nalunaarsugaaneq piffissap akiliiffissap qanngiunneratigut ingerlaannartumik atorunnaarsinneqarsinnaavoq.
Suliffeqarfiup nalunaarsugaanini akileereeruni peqqissinnaavaa.
§ 13-imut.Suliffeqarfik akitsuutinut akiliinikippallaarsimasoq kingusinnerusukkut paasineqarpat, akiliinikippallaarutaasup pillaatitut ernialiunneqarsinnaasut ilanngullugit akileqquneqarnerisa kingorna ullut 14-it qaangiutinnginneranni akilerneqartarnissaat siunnersuutigineqarpoq. Akitsuut piffissaagallartillugu akilerneqanngippat pillaatitut erniat amerlanerusut akiligassiissutigineqassapput.
Suliffeqarfik nalunaarummik nassiussaqanngippat imaluunniit akitsuutinut akiliutissaq suliffeqarfiup naatsorsuutai tunngavigalugit naatsorsorneqarsinnaanngippat, suliffeqarfiup akitsuutinut akiligassaata Akileraartarnermut Pisortaqarfimmit missingersorlugu angissusilerneqartarnissaa aammattaaq siunnersuutigineqarpoq.
§§-inut 14-imut 15-imullu.Akitsuusigassat iluamik nakkutigineqarsinnaanissaat qulakkeerniarlugu siunnersuutigineqarpoq, Akileraartarnermut Pisortaqarfik sumiiffimmi akitsuutinik misissuisinnaassasoq, imaluunniit naatsorsuutinut tunngasut il.il. tunniunneqarnissaannik nassiunneqarnissaannilluunniit piumasaqarsinnaassasoq. Tamanna aamma atuuppoq pappialat inummi pingajuusumiikkaluarpataluunniit, taannalu tunniussisussaatitaanngikkaluarpalluunniit.
Aammattaaq siunnersuutigineqarpoq pisortat oqartussaasut qinnuigineqarnermikkut paasissutissat inatsisip atuutsinneqarneranut nakkutigineqarneranullu pisariaqartinneqartut Akileraartarnermut Pisortaqarfimmut nalunaarutigisassagaat.
§ 16-imut.Siunnersuutigineqarpoq nakkutilliinermut tunngassutillit inatsisip atuutsinneqarnissaanut pisariaqartut Naalakkersuisunit aalajangersagaliuunneqarsinnaassasut.
§ 17-imut.Siunnersuutigineqarpoq Akileraartarnermut Pisortaqarfiup inatsit manna naapertorlugu aalajangiisinnaanissaanut, kiisalu aalajangiinerit naammagittaalliuutigineqarsinnaanerat, matumani ilanngullugu aalajangiinerit allaffeqarfitsigut oqartussaasunut qaffasinnerusunut suliassanngortinneqarsinnaannginnerat, pillugu maleruagassiorsinnaanissaanut Naalakkersuisut piginnaatitsisinnaassasut.
§ 18-imut.Siunnersuutigineqarpoq Skatterådi tassaassasoq Akileraartarnermut Pisortaqarfiup nioqqutissat akitsuusigassaanerannik aalajangiinerinik, akitsuusigassat annertussusiannik aalajangiinerinik kiisalu missingersuinikkut angissusiliinerinik allaffeqarfitsigut naammagittaalliortarfik.
Aammattaaq siunnersuutigineqarpoq Skatterådip aalajangiinerata, aalajangiinerup taassuma pineqartumut nalunaarutigineqarnerata kingorna sap.ak. 4-t qaangiutsinnagit Kalaallit Nunaata Landsret-ianut suliassanngortinneqarsinnaanissaa. Suliassiissutigineqartussaq tassaavoq Kalaallit Nunaanni Naalakkersuisut.
§§-inut 19-imut 20-mullu.Siunnersuutigineqarpoq inatsimmik unioqqutitsineq akiliisitsinermik pineqaatissinneqarsinnaassasoq. Aammattaaq siunnersuutigineqarpoq unioqqutitsineq pillugu suliaq allaffeqarfitsigoortumik naammassineqarsinnaassasoq, pineqartup unioqqutitsinini akiliisitsissutillu annertussusia akuersissutigippagit.
Unioqqutitsineq landskarsimut akitsuummik akiliinngitsoorniarluni piaaraluneerluni unioqqutitsinerusimappat, akiliisitsissut amerlanertigut angissusilerneqarsinnaassaaq aningaasat akilinngitsoorniarneqartut 2-3-riaataattut annertutigisumik. Unioqqutitsineq mianersuaalliorujussuarluni pisimappat, akiliisitsissut amerlanertigut aningaasat akilinngitsoorniarneqartut affaattut annertutigisumik pissaaq. Aalajangersaaneq pissaaq pineqartup aningaasarsiaanut pigisaanullu tunngasut aammalu pisut nalinginnaasut qissimigaareerlugit.
Naak eqqartuussisarnermi inatsit unnerluussutip ilusaanik imarisassaanilluunniit aalajangersimasunik maannakkut piumasaqaateqanngikkaluartoq nalunaarutiginninnermi unnerluussutip ilusaa imarisaalu pillugit malittarisassat naqitanngorlugit pigineqanngitsut sukkulluunniit atuuttut malinneqassapput.
§ 21-mut.Inatsisip ulloq 1. januar 2004-miit atortuulernissaa siunnersuutigineqarpoq.