12. november 2003 UKA 2003/165
Imigassat ethanolimik akullit Kalaallit Nunaanni sananeqarsimasut akitsuutaat pillugit
Inatsisartut inatsisissaattut siunnersuut
pillugu
Inatsisartut Akileraartarnermut Akitsuusiisarnermullu Ataatsimiititaliaata
ISUMALIUTISSIISSUTAA
siunnersuutip aappassaaneerneqarnerani saqqummiunneqartoq
Inatsisartut Akileraartarnermut Akitsuusiisarnermullu Ataatsimiititaliaat suliarinninnermini uku-ninnga inuttaqarpoq:
Inatsisartuni ilaasortaq Isak Davidsen (Siumut), siulittaasoq
Inatsisartuni ilaasortaq Agathe Fontain (Inuit Ataqatigiit), siulittaasup tullia
Inatsisartuni ilaasortaq Jensine Berthelsen (Atassut)
Inatsisartuni ilaasortaq Per Skaaning (Demokraatit)
Inatsisartuni ilaasortaq Ole Thorleifsen (Siumut)Inatsisartut Akileraartarnermut Akitsuusiisarnermullu Ataatsimiititaliaata UKA 2003/165 UKA 2003-mi siullermeerneqareermat nassuiaatit ilanngullugit misissuataarpaa: Imigassat ethanolimik akullit Kalaallit Nunaanni sananeqarsimasut akitsuutaat pillugit Inatsisartut inatsisissaattut siunnersuut.
Tusarniaanermit akissutit
Aallarniutigalugu ataatsimiititaliamit maluginiarneqarpoq siunnersuut pineqartoq ulloq 5. september 2003, ulloq 19. september 2003-mut tusarniaaneq killilerlugu, tusarniaassutitut nassiunneqarsimasoq. Tunngaviusumik isigalugu tusarniaanermut killiliineq sivisunerusimanngimmat ataatsimiititaliap pitsaanngitsutut isigaa, Naalakkersuisullu kaammattussallugit tusarniaavigineqarsinnaatitaasut siunissami piffissaqartilluarlugit akissuteqarnissamut sapaatip akunnerinik sisamanik piffissalerneqartassasut.Siunnersuutip matumani pineqartup ataatsimiititaliamit suliarineqarnissaanut atugassatut tusarniaanermit akissutinik ataatsimiititaliaq piniarsimavoq. Siunnersuut Inuussutissarsiornermut Pisortaqarfimmut, Peqqissutsimut Pisortaqarfimmut Aningaasaqarnermullu Pisortaqarfimmut tusarniaassutigalugu nassiunneqarsimavoq. Ataatsmiititaliap taamaalilluni paasisinnaavaa Nuuk Imeq tusarniaavigissallugu Naalakkersuisut pisariaqartutut isigisimanngikkaat. Siunnersuut aaqqiinerinnaalluni Nuuk Imeq-up Unammilleqatigiinnermullu Ataatsimiititaliap akornanni eqqartuussivikkoortumik suliamut sunniuteqartussatut Naalakkersuisunit isigineqanngimmat tamanna ajornartorsiutissartaqartutut ataatsimiititaliamit isigineqanngilaq.
Inatsisissatut siunnersuummut nalinginnaasumik nassuiaatini atuarneqarsinnaavoq tusarniaanermit akissutinik pissarsiat inatsisissatut siunnersuummut ilanngullugit naatsorsuutigineqarsimasut. Ataatsimiititaliamilli suliarinninnissaq sioqqullugu Akileraartarnermi Pisortaqarfik Inatsisartut Akileraartarnermut Akitsuusiisarnermullu Ataatsimiititaliaannut allakkatigut nalunaaruteqarpoq Akileraartarnermi Pisortaqarfiup siunnersuummik suliarinninneranut Inuussutissarsiornermut Pisortaqarfimmit akiliummik aalajangersaasoqarnissaanik kaammattuut ilanngullugu naatsorsuutigineqarsimanngitsoq, akileraartarnermummi akitsuusiisarnermullu tunngasut pillugit oqartussanit suliarinninnermut atatillugu ataatsimut isigalugu akiliummik akiliisitsiniartoqarneq ajormat.
Ataatsimiititaliattaaq paasivaa § 6, imm. 2-p, ima oqaasertallip "Naatsorsuineq maleruagassat Akileraartarnermi Pisortaqarfimmit aalajangersarneqarsimasut naapertorlugit sukumiisumik suliarineqassaaq" ima oqaasertaqalerluni "Naatsorsuineq maleruagassat Naalakkersuisunit aa-lajangersarneqarsimasut naapertorlugit sukumiisumik suliarineqassaaq" (ataatsimiititaliap ataatigut titagai) allanngortinneqarnissaanik Inuussutissarsiornermut Pisortaqarfiup kaammattuutaa inatsisissatut siunnersuummi ilaannakuusumik naatsorsuutigineqarsimasoq, allannguummi § 6-imut nassuiaatinut ilanngullugu naatsorsuutigineqarsimanngimmat. Ataatsimiititaliarli ima paasinnippoq taamatut aaqqiineq ilanngunneqanngikkuni sunniuteqangaassanngitsoq, taamaalillunilu Inatsisartuni inatsisissatut siunnersuutip suliarineqarnerata ingerlateqqinneqarneranut kinguneqaateqartariaqarani.
Siunnersuutip imarisai
Ullumikkut niuerfinnut annikitsunut allaat imigassamik ethanolimik akulimmik immiornissap ajornarunnaarsimaneranik siunnersuut tunngaveqarpoq. Assersuutigalugu immiaaqqat "immiorfeeqqanik" taaneqartartut atorlugit tunisassiarineqartut pineqarsinnaapput. Naalakkersuisullu naatsorsuutigaat tunisassiorfik piffissaq sivisunngitsoq piffissaralugu pilersinneqarsinnaassasoq.Imigassat ehtanolimik akullit Kalaallit Nunaanni immiorneqartut siunnersuut malillugu literimut ataatsimut annertussusia tunngavigalugu ethanolimik akulittut imigassanut ullumikkut atuuttup angeqataanik akitsuusiivigineqassapput, tak. nioqqutissanik eqqussuinermi akitsuutit pillugit Inatsisartut inatsisaanni nr. 19, 30. oktober 1992-imeersumi § 1, nr. 3, kingusinnerusukkut allannguutai ilanngullugit. Taamaalilluni assersuutigalugu immiaaraq literimut ataatsimut 4,50-mik annertussusilik literimut ataatsimut 18,45 kr.-inik, allatulluunniit oqaatigalugu puiaasaaqqamut 33 cl.-itut imalimmut ataatsimut 6,15 kr.-imik, akitsuusiivigineqassaaq.
Naalakkersuisut naatsorsuutiginngilaat siunnersuut iluanaarutitigut sunniuteqassasoq, Kalaallimmi Nunaanni ethanolimik akulinnik imigassanik immiukkat annertoqataannik Kalaallit Nunaannut eqqussukkat ikileriassasut naatsorsuutigineqarmat.
Ataatsimiititaliaq isumaqatigiittoq siunnersuut pillugu ima oqaaseqassaaq:
Siunnersuut iluarisimaarlugu ataatsimiititaliamit naliliivigineqarpoq.
Ataatsimiititaliaq ima paasinnippoq Naalakkersuisut siunnersuut atorlugu teknologiikkut atugassarisanut periarfissanullu nutaanut inatsit naleqqussarniaraat. Ataatsimiititaliattaaq pingaartutut isigaa unammilleqatigiinnermi atugassarisat assigiiaartut inuussutissarsiornikkut suliniuteqarnernut tunngaviusarnissaat siunnersuutikkut pilersinniarneqarmat.
Taamaalilluni siunnersuut Inatsisartunit akuersissutigineqassasoq ataatsimiititaliamit isu-maqatigiittumit inassutigineqarpoq.
Taama oqaaseqarluni Inatsisartut Akileraartarnermut Ataatsimiititaliaata inatsisissatut siunnersuut aappassaaniigassanngortippaa.
Isak Davidsen (S), siulittaasoq
Agathe Fontain (IA)
Jensine Berthelsen (A)
Per Skaaning (D)
Ole Thorleifsen (S)